1.30 Balakanda - Trimsha Sargah

ॐ

1.30 பாலகாண்ட - த்ரிம்ஶ ஸர்கஃ

Valmiki Tamil

ஶ்ரீமத்வால்மீகீய ராமாயணே பாலகாண்டம் ।

அத த்ரிம்ஶஸ்ஸர்கஃ ।

அத தௌ தேஶகாலஜ்ஞௌ ராஜாபுத்ராவரிந்தமௌ ।

தேஶே காலே ச வாக்யஜ்ஞாவப்ரூதாம் கௌஶிகம் வசஃ ॥ 1 ॥

பகவந் ஶ்ரோதுமிச்சாவோ யஸ்மிந் காலே நிஶாசரௌ ।

ஸம்ரக்ஷணீயௌ தௌ ப்ரஹ்மந்நாதிவர்தேத தத்க்ஷணம் ॥ 2 ॥

ஏவம் ப்ருவாணௌ காகுத்ஸ்தௌ த்வரமாணௌ யுயுத்ஸயா ।

ஸர்வே தே முநயஃ ப்ரீதாஃ ப்ரஶஶம்ஸுர்ந்ரு'பாத்மஜௌ ॥ 3 ॥

அத்யப்ரப்ரு'தி ஷட்ராத்ரம் ரக்ஷதம் ராகவௌ யுவாம் ।

தீக்ஷாம் கதோ ஹ்யேஷ முநிர்மௌநித்வம் ச கமிஷ்யதி ॥ 4 ॥

தௌ து தத்வசநம் ஶ்ருத்வா ராஜபுத்ரௌ யஶஸ்விநௌ ।

அநித்ரௌ ஷடஹோராத்ரம் தபோவநமரக்ஷதாம் ॥ 5 ॥

உபாஸாஞ்சக்ரதுர்வீரௌ யத்தௌ பரமதந்விநௌ ।

ரரக்ஷதுர்முநிவரம் விஶ்வாமித்ரமரிந்தமௌ ॥ 6 ॥

அத காலே கதே தஸ்மிந் ஷஷ்டேऽஹநி ஸமாகதே ।

ஸௌமித்ரிமப்ரவீத்ராமோ யத்தோ பவ ஸமாஹிதஃ ॥ 7 ॥

ராமஸ்யைவம் ப்ருவாணஸ்ய த்வரிதஸ்ய யுயுத்ஸயா ।

ப்ரஜஜ்வால ததோ வேதிஸ்ஸோபாத்யாயபுரோஹிதா ॥ 8 ॥

ஸதர்பசமஸஸ்ருக்கா ஸஸமித்குஸுமோச்சயா ।

விஶ்வாமித்ரேண ஸஹிதா வேதிர்ஜஜ்வால ஸர்த்விஜா ॥ 9 ॥

மந்த்ரவச்ச யதாந்யாயம் யஜ்ஞோऽஸௌ ஸம்ப்ரவர்ததே ।

ஆகாஶே ச மஹாந் ஶப்தஃ ப்ராதுராஸீத்பயாநகஃ ॥ 10 ॥

ஆவார்ய ககநம் மேகோ யதா ப்ராவ்ரு'ஷி நிர்கதஃ ।

ததாமாயாம் விகுர்வாணௌ ராக்ஷஸாவப்யதாவதாம் ॥ 11 ॥

மாரீசஶ்ச ஸுபாஹுஶ்ச தயோரநுசராஶ்ச யே ।

ஆகம்ய பீமஸங்காஶா ருதிரௌகமவாஸ்ரு'ஜந் ॥ 12 ॥

ஸா தேந ருதிரௌகேண வேதிர்ஜஜ்வால மண்டிதா ।

ஸஹஸாऽபித்ருதோ ராமஸ்தாநபஶ்ய த்ததோ திவி ॥ 13 ॥

தாவாபதந்தௌ ஸஹஸா த்ரு'ஷ்ட்வா ராஜீவலோசநஃ ।

லக்ஷ்மணம் த்வபிஸம்ப்ரேக்ஷ்ய ராமோ வசநமப்ரவீத் ॥ 14 ॥

பஶ்ய லக்ஷ்மண துர்வ்ரு'த்தாந் ராக்ஷஸாந் பிஶிதாஶநாந் ।

மாநவாஸ்த்ரஸமாதூதாநநிலேந யதா கநாந் ॥ 15 ॥

மாநவம் பரமோதாரமஸ்த்ரம் பரமபாஸ்வரம் ।

சிக்ஷேப பரமக்ருத்தோ மாரீசோரஸி ராகவஃ ॥ 16 ॥

ஸ தேந பரமாஸ்த்ரேண மாநவேந ஸமாஹிதஃ ।

ஸம்பூர்ணம் யோஜநஶதம் க்ஷிப்தஸ்ஸாகரஸம்ப்லவே ॥ 17 ॥

விசேதநம் விகூர்ணந்தம் ஶீதேஷு பலதாடிதம் ।

நிரஸ்தம் த்ரு'ஶ்ய மாரீசம் ராமோ லக்ஷ்மணமப்ரவீத் ॥ 18 ॥

பஶ்ய லக்ஷ்மண ஶீதேஷும் மாநவம் தர்மஸம்ஹிதம் ।

மோஹயித்வா நயத்யேநம் ந ச ப்ராணைர்வ்யயுஜ்யத ॥ 19 ॥

இமாநபி வதிஷ்யாமி நிர்க்ரு'ணாந் துஷ்டசாரிணஃ ।

ராக்ஷஸாந் பாபகர்மஸ்தாந் யஜ்ஞக்நாந் ருதிராஶநாந் ॥ 20 ॥

ஸங்க்ரு'ஹ்யாஸ்த்ரம் ததோ ராமோ திவ்யமாக்நேயமத்புதம் ।

ஸுபாஹூரஸி சிக்ஷேப ஸவித்தஃ ப்ராபதத்புவி ॥ 21 ॥

ஶேஷாந் வாயவ்யமாதாய நிஜகாந மஹாயஶாஃ ।

ராகவஃ பரமோதாரோ முநீநாம் முதமாவஹந் ॥ 22 ॥

ஸ ஹத்வா ராக்ஷஸாந் ஸர்வாந் யஜ்ஞக்நாந் ரகுநந்தநஃ ।

ரு'ஷிபிஃ பூஜிதஸ்தத்ர யதேந்த்ரோ விஜயே புரா ॥ 23 ॥

அத யஜ்ஞே ஸமாப்தே து விஶ்வாமித்ரோ மஹாமுநிஃ ।

நிரீதிகா திஶோ த்ரு'ஷ்டவா காகுத்ஸ்தமிதமப்ரவீத் ॥ 24 ॥

க்ரு'தார்தோऽஸ்மி மஹாபாஹோ க்ரு'தம் குருவசஸ்த்வயா ।

ஸித்தாஶ்ரமமிதம் ஸத்யம் க்ரு'தம் ராம மஹாயஶஃ ॥ 25 ॥

இத்யார்ஷே ஶ்ரீமத்ராமாயணே வால்மீகீய ஆதிகாவ்யே பாலகாண்டே த்ரிம்ஶஸ்ஸர்கஃ ॥

Roman (IAST) Transliteration

śrīmadvālmīkīya rāmāyaṇe bālakāṇḍam |

atha triṃśassargaḥ |

atha tau deśakālajñau rājāputrāvarindamau |

deśe kāle ca vākyajñāvabrūtāṃ kauśikaṃ vacaḥ || 1 ||

bhagavan śrotumicchāvo yasmin kāle niśācarau |

saṃrakṣaṇīyau tau brahmannātivarteta tatkṣaṇam || 2 ||

evaṃ bruvāṇau kākutsthau tvaramāṇau yuyutsayā |

sarve te munayaḥ prītāḥ praśaśaṃsurnṛpātmajau || 3 ||

adyaprabhṛti ṣaḍrātraṃ rakṣataṃ rāghavau yuvām |

dīkṣāṃ gato hyeṣa munirmaunitvaṃ ca gamiṣyati || 4 ||

tau tu tadvacanaṃ śrutvā rājaputrau yaśasvinau |

anidrau ṣaḍahorātraṃ tapovanamarakṣatām || 5 ||

upāsāñcakraturvīrau yattau paramadhanvinau |

rarakṣaturmunivaraṃ viśvāmitramarindamau || 6 ||

atha kāle gate tasmin ṣaṣṭhe'hani samāgate |

saumitrimabravīdrāmo yatto bhava samāhitaḥ || 7 ||

rāmasyaivaṃ bruvāṇasya tvaritasya yuyutsayā |

prajajvāla tato vedissopādhyāyapurohitā || 8 ||

sadarbhacamasasrukkā sasamitkusumoccayā |

viśvāmitreṇa sahitā vedirjajvāla sartvijā || 9 ||

mantravacca yathānyāyaṃ yajño'sau sampravartate |

ākāśe ca mahān śabdaḥ prādurāsīdbhayānakaḥ || 10 ||

āvārya gaganaṃ megho yathā prāvṛṣi nirgataḥ |

tathāmāyāṃ vikurvāṇau rākṣasāvabhyadhāvatām || 11 ||

mārīcaśca subāhuśca tayoranucarāśca ye |

āgamya bhīmasaṅkāśā rudhiraughamavāsṛjan || 12 ||

sā tena rudhiraugheṇa vedirjajvāla maṇḍitā |

sahasā'bhidruto rāmastānapaśya ttato divi || 13 ||

tāvāpatantau sahasā dṛṣṭvā rājīvalocanaḥ |

lakṣmaṇaṃ tvabhisamprekṣya rāmo vacanamabravīt || 14 ||

paśya lakṣmaṇa durvṛttān rākṣasān piśitāśanān |

mānavāstrasamādhūtānanilena yathā ghanān || 15 ||

mānavaṃ paramodāramastraṃ paramabhāsvaram |

cikṣepa paramakruddho mārīcorasi rāghavaḥ || 16 ||

sa tena paramāstreṇa mānavena samāhitaḥ |

sampūrṇaṃ yojanaśataṃ kṣiptassāgarasamplave || 17 ||

vicetanaṃ vighūrṇantaṃ śīteṣu balatāḍitam |

nirastaṃ dṛśya mārīcaṃ rāmo lakṣmaṇamabravīt || 18 ||

paśya lakṣmaṇa śīteṣuṃ mānavaṃ dharmasaṃhitam |

mohayitvā nayatyenaṃ na ca prāṇairvyayujyata || 19 ||

imānapi vadhiṣyāmi nirghṛṇān duṣṭacāriṇaḥ |

rākṣasān pāpakarmasthān yajñaghnān rudhirāśanān || 20 ||

saṅgṛhyāstraṃ tato rāmo divyamāgneyamadbhutam |

subāhūrasi cikṣepa saviddhaḥ prāpatadbhuvi || 21 ||

śeṣān vāyavyamādāya nijaghāna mahāyaśāḥ |

rāghavaḥ paramodāro munīnāṃ mudamāvahan || 22 ||

sa hatvā rākṣasān sarvān yajñaghnān raghunandanaḥ |

ṛṣibhiḥ pūjitastatra yathendro vijaye purā || 23 ||

atha yajñe samāpte tu viśvāmitro mahāmuniḥ |

nirītikā diśo dṛṣṭavā kākutsthamidamabravīt || 24 ||

kṛtārtho'smi mahābāho kṛtaṃ guruvacastvayā |

siddhāśramamidaṃ satyaṃ kṛtaṃ rāma mahāyaśaḥ || 25 ||

ityārṣe śrīmadrāmāyaṇe vālmīkīya ādikāvye bālakāṇḍe triṃśassargaḥ ||