1.27 Balakanda - Saptavimsha Sargah

ॐ

1.27 பாலகாண்ட - ஸப்தவிம்ஶ ஸர்கஃ

Valmiki Tamil

ஶ்ரீமத்வால்மீகீய ராமாயணே பாலகாண்டம் ।

அத ஸப்தவிம்ஶஸ்ஸர்கஃ ।

அத தாம் ரஜநீமுஷ்ய விஶ்வாமித்ரோ மஹாயஶாஃ ।

ப்ரஹஸ்ய ராகவம் வாக்யமுவாச மதுராக்ஷரம் ॥ 1 ॥

பரிதுஷ்டோऽஸ்மி பத்ரம் தே ராஜபுத்ர மஹாயஶஃ ।

ப்ரீத்யா பரமயா யுக்தோ ததாம்யஸ்த்ராணி ஸர்வஶஃ ॥ 2 ॥

தேவாஸுரகணாந்வாபி ஸகந்தர்வோரகாநபி ।

யைரமித்ராந் ப்ரஸஹ்யாஜௌ வஶீக்ரு'த்ய ஜயிஷ்யஸி ॥ 3 ॥

தாநி திவ்யாநி பத்ரம் தே ததாம்யஸ்த்ராணி ஸர்வஶஃ ।

தண்டசக்ரம் மஹத்திவ்யம் தவ தாஸ்யாமி ராகவ ॥ 4 ॥

தர்மசக்ரம் ததோ வீர காலசக்ரம் ததைவ ச ।

விஷ்ணுசக்ரம் ததாத்யுக்ரமைந்த்ரமஸ்த்ரம் ததைவ ச ॥ 5 ॥

வஜ்ரமஸ்த்ரம் நரஶ்ரேஷ்ட ஶைவம் ஶூலவரம் ததா ।

அஸ்த்ரம் ப்ரஹ்மஶிரஶ்சைவ ஐஷீகமபி ராகவ ॥ 6 ॥

ததாமி தே மஹாபாஹோ ப்ராஹ்மமஸ்த்ரமநுத்தமம் ।

கதே த்வே சைவ காகுத்ஸ்த மோதகீ ஶிகரீ உபே ॥ 7 ॥

ப்ரதீப்தே நரஶார்தூல ப்ரயச்சாமி ந்ரு'பாத்மஜ ।

தர்மபாஶமஹம் ராம காலபாஶம் ததைவ ச ॥ 8 ॥

பாஶம் வாருணமஸ்த்ரம் ச ததாம்யஹமநுத்தமம் ।

அஶநீ த்வே ப்ரயச்சாமி ஶுஷ்கார்த்ரே ரகுநந்தந ॥ 9 ॥

ததாமி சாஸ்த்ரம் பைநாகமஸ்த்ரம் நாராயணம் ததா ।

ஆக்நேயமஸ்த்ரம் தயிதம் ஶிகரம் நாம நாமதஃ ॥ 10 ॥

வாயவ்யம் ப்ரதநம் நாம ததாமி ச தவாநக ।

அஸ்த்ரம் ஹயஶிரோ நாம க்ரௌஞ்சமஸ்த்ரம் ததைவ ச ।

ஶக்தித்வயம் ச காகுத்ஸ்த ததாமி தவ ராகவ ॥ 11 ॥

கங்காலம் முஸலம் கோரம் காபாலமத கங்கணம் ।

தாரயந்த்யஸுரா யாநி ததாம்யேதாநி ஸர்வஶஃ ॥ 12 ॥

வைத்யாதரம் மஹாஸ்த்ரம் ச நந்தநம் நாம நாமதஃ ।

அஸிரத்நம் மஹாபாஹோ ததாமி ச ந்ரு'பாத்மஜ ॥ 13 ॥

காந்தர்வமஸ்த்ரம் தயிதம் மாநவம் நாம நாமதஃ ।

ப்ரஸ்வாபநப்ரஶமநே தத்மி ஸௌரம் ச ராகவ ॥ 14 ॥

தர்பணம் ஶோஷணம் சைவ ஸந்தாபநவிலாபநே ।

மதநம் சைவ துர்தர்ஷம் கந்தர்பதயிதம் ததா ॥ 15 ॥

பைஶாசமஸ்த்ரம் தயிதம் மோஹநம் நாம நாமதஃ ।

ப்ரதீச்ச நரஶார்தூல ராஜபுத்ர மஹாயஶஃ ॥ 16 ॥

தாமஸம் நரஶார்தூல ஸௌமநம் ச மஹாபல ।

ஸம்வர்தம் சைவ துர்தர்ஷம் மௌஸலம் ச ந்ரு'பாத்மஜ ॥ 17 ॥

ஸத்யமஸ்த்ரம் மஹாபாஹோ ததா மாயாதரம் பரம் ।

கோரம் தேஜஃ ப்ரபம் நாம பரதேஜோऽபகர்ஷணம் ॥ 18 ॥

ஸௌம்யாஸ்த்ரம் ஶிஶிரம் நாம த்வஷ்டுரஸ்த்ரம் ஸுதாமநம் ।

தாருணம் ச பகஸ்யாபி ஶிதேஷு மத மாநவம் ॥ 19 ॥

ஏதாந் ராம மஹாபாஹோ காமரூபாந் மஹாபலாந் ।

க்ரு'ஹாண பரமோதாராந் க்ஷிப்ரமேவ ந்ரு'பாத்மஜ ॥ 20 ॥

ஸ்திதஸ்து ப்ராங்முகோ பூத்வா ஶுசிர்முநிவரஸ்ததா ।

ததௌ ராமாய ஸுப்ரீதோ மந்த்ரக்ராமமநுத்தமம் ॥ 21 ॥

ஸர்வஸங்க்ரஹணம் யேஷாம் தைவதைரபி துர்லபம் ।

தாந்யஸ்த்ராணி ததா விப்ரோ ராகவாய ந்யவேதயத் ॥ 22 ॥

ஜபதஸ்து முநேஸ்தஸ்ய விஶ்வாமித்ரஸ்ய தீமதஃ ।

உபதஸ்துர்மஹார்ஹாணி ஸர்வாண்யஸ்த்ராணி ராகவம் ॥ 23 ॥

ஊசுஶ்ச முதிதாஸ்ஸர்வே ராமம் ப்ராஞ்ஜலயஸ்ததா ।

இமே ஸ்ம பரமோதாராஃ கிங்கராஸ்தவ ராகவ ॥ 24 ॥

ப்ரதிக்ரு'ஹ்ய ச காகுத்ஸ்தஃ ஸமாலப்ய ச பாணிநா ।

மாநஸா மே பவிஷ்யத்வமிதி தாநப்யசோதயத் ॥ 25 ॥

ததஃ ப்ரீதமநா ராமோ விஶ்வாமித்ரம் மஹாமுநிம் ।

அபிவாத்ய மஹாதேஜா கமநாயோபசக்ரமே ॥ 26 ॥

இத்யார்ஷே ஶ்ரீமத்ராமாயணே வால்மீகீய ஆதிகாவ்யே பாலகாண்டே ஸப்தவிம்ஶஸ்ஸர்கஃ ॥

Roman (IAST) Transliteration

śrīmadvālmīkīya rāmāyaṇe bālakāṇḍam |

atha saptaviṃśassargaḥ |

atha tāṃ rajanīmuṣya viśvāmitro mahāyaśāḥ |

prahasya rāghavaṃ vākyamuvāca madhurākṣaram || 1 ||

parituṣṭo'smi bhadraṃ te rājaputra mahāyaśaḥ |

prītyā paramayā yukto dadāmyastrāṇi sarvaśaḥ || 2 ||

devāsuragaṇānvāpi sagandharvoragānapi |

yairamitrān prasahyājau vaśīkṛtya jayiṣyasi || 3 ||

tāni divyāni bhadraṃ te dadāmyastrāṇi sarvaśaḥ |

daṇḍacakraṃ mahaddivyaṃ tava dāsyāmi rāghava || 4 ||

dharmacakraṃ tato vīra kālacakraṃ tathaiva ca |

viṣṇucakraṃ tathātyugramaindramastraṃ tathaiva ca || 5 ||

vajramastraṃ naraśreṣṭha śaivaṃ śūlavaraṃ tathā |

astraṃ brahmaśiraścaiva aiṣīkamapi rāghava || 6 ||

dadāmi te mahābāho brāhmamastramanuttamam |

gade dve caiva kākutstha modakī śikharī ubhe || 7 ||

pradīpte naraśārdūla prayacchāmi nṛpātmaja |

dharmapāśamahaṃ rāma kālapāśaṃ tathaiva ca || 8 ||

pāśaṃ vāruṇamastraṃ ca dadāmyahamanuttamam |

aśanī dve prayacchāmi śuṣkārdre raghunandana || 9 ||

dadāmi cāstraṃ painākamastraṃ nārāyaṇaṃ tathā |

āgneyamastraṃ dayitaṃ śikharaṃ nāma nāmataḥ || 10 ||

vāyavyaṃ prathanaṃ nāma dadāmi ca tavānagha |

astraṃ hayaśiro nāma krauñcamastraṃ tathaiva ca |

śaktidvayaṃ ca kākutstha dadāmi tava rāghava || 11 ||

kaṅkālaṃ musalaṃ ghoraṃ kāpālamatha kaṅkaṇam |

dhārayantyasurā yāni dadāmyetāni sarvaśaḥ || 12 ||

vaidyādharaṃ mahāstraṃ ca nandanaṃ nāma nāmataḥ |

asiratnaṃ mahābāho dadāmi ca nṛpātmaja || 13 ||

gāndharvamastraṃ dayitaṃ mānavaṃ nāma nāmataḥ |

prasvāpanapraśamane dadmi sauraṃ ca rāghava || 14 ||

darpaṇaṃ śoṣaṇaṃ caiva santāpanavilāpane |

madanaṃ caiva durdharṣaṃ kandarpadayitaṃ tathā || 15 ||

paiśācamastraṃ dayitaṃ mohanaṃ nāma nāmataḥ |

pratīccha naraśārdūla rājaputra mahāyaśaḥ || 16 ||

tāmasaṃ naraśārdūla saumanaṃ ca mahābala |

saṃvardhaṃ caiva durdharṣaṃ mausalaṃ ca nṛpātmaja || 17 ||

satyamastraṃ mahābāho tathā māyādharaṃ param |

ghoraṃ tejaḥ prabhaṃ nāma paratejo'pakarṣaṇam || 18 ||

saumyāstraṃ śiśiraṃ nāma tvaṣṭurastraṃ sudāmanam |

dāruṇaṃ ca bhagasyāpi śiteṣu matha mānavam || 19 ||

etān rāma mahābāho kāmarūpān mahābalān |

gṛhāṇa paramodārān kṣiprameva nṛpātmaja || 20 ||

sthitastu prāṅmukho bhūtvā śucirmunivarastadā |

dadau rāmāya suprīto mantragrāmamanuttamam || 21 ||

sarvasaṅgrahaṇaṃ yeṣāṃ daivatairapi durlabham |

tānyastrāṇi tadā vipro rāghavāya nyavedayat || 22 ||

japatastu munestasya viśvāmitrasya dhīmataḥ |

upatasthurmahārhāṇi sarvāṇyastrāṇi rāghavam || 23 ||

ūcuśca muditāssarve rāmaṃ prāñjalayastadā |

ime sma paramodārāḥ kiṅkarāstava rāghava || 24 ||

pratigṛhya ca kākutsthaḥ samālabhya ca pāṇinā |

mānasā me bhaviṣyadhvamiti tānabhyacodayat || 25 ||

tataḥ prītamanā rāmo viśvāmitraṃ mahāmunim |

abhivādya mahātejā gamanāyopacakrame || 26 ||

ityārṣe śrīmadrāmāyaṇe vālmīkīya ādikāvye bālakāṇḍe saptaviṃśassargaḥ ||