Shri Dakshinamurti Kavacham (rudrayamala)

ॐ

ஶ்ரீ தக்ஷிணாமூர்தி கவசம் (ருத்ரயாமல)

Shiva Kavacham Tamil

பார்வத்யுவாச

நமஸ்தேऽஸ்து த்ரயீநாத பரமாநந்தகாரக ।

கவசம் தக்ஷிணாமூர்தேஃ க்ரு'பயா வத மே ப்ரபோ ॥ 1 ॥

ஈஶ்வர உவாச

வக்ஷ்யேऽஹம் தேவதேவேஶி தக்ஷிணாமூர்திரவ்யயம் ।

கவசம் ஸர்வபாபக்நம் வேதாந்தஜ்ஞாநகோசரம் ॥ 2 ॥

அணிமாதி மஹாஸித்திவிதாநசதுரம் ஶுபம் ।

வேதஶாஸ்த்ரபுராணாநி கவிதா தர்க ஏவ ச ॥ 3 ॥

பஹுதா தேவி ஜாயந்தே கவசஸ்ய ப்ரபாவதஃ ।

ரு'ஷிர்ப்ரஹ்மா ஸமுத்திஷ்டஶ்சந்தோऽநுஷ்டுபுதாஹ்ரு'தம் ॥ 4 ॥

தேவதா தக்ஷிணாமூர்திஃ பரமாத்மா ஸதாஶிவஃ ।

பீஜம் வேதாதிகம் சைவ ஸ்வாஹா ஶக்திருதாஹ்ரு'தா ।

ஸர்வஜ்ஞத்வேऽபி தேவேஶி விநியோகம் ப்ரசக்ஷதே ॥ 5 ॥

த்யாநம்

அத்வந்த்வநேத்ரமமலேந்துகலாவதம்ஸம்

ஹம்ஸாவலம்பித ஸமாந ஜடாகலாபம் ।

ஆநீலகண்டமுபகண்டமுநிப்ரவீராந்

அத்யாபயந்தமவலோகய லோகநாதம் ॥

கவசம்

ஓம் । ஶிரோ மே தக்ஷிணாமூர்திரவ்யாத் பாலம் மஹேஶ்வரஃ ।

த்ரு'ஶௌ பாது மஹாதேவஃ ஶ்ரவணே சந்த்ரஶேகரஃ ॥ 1 ॥

கபோலௌ பாது மே ருத்ரோ நாஸாம் பாது ஜகத்குருஃ ।

முகம் கௌரீபதிஃ பாது ரஸநாம் வேதரூபத்ரு'த் ॥ 2 ॥

தஶநாம் த்ரிபுரத்வம்ஸீ சோஷ்டம் பந்நகபூஷணஃ ।

அதரம் பாது விஶ்வாத்மா ஹநூ பாது ஜகந்மயஃ ॥ 3 ॥

சுபுகம் தேவதேவஸ்து பாது கண்டம் ஜடாதரஃ ।

ஸ்கந்தௌ மே பாது ஶுத்தாத்மா கரௌ பாது யமாந்தகஃ ॥ 4 ॥

குசாக்ரம் கரமத்யம் ச நகராந் ஶங்கரஃ ஸ்வயம் ।

ஹ்ரு'ந்மே பஶுபதிஃ பாது பார்ஶ்வே பரமபூருஷஃ ॥ 5 ॥

மத்யமம் பாது ஶர்வோ மே நாபிம் நாராயணப்ரியஃ ।

கடிம் பாது ஜகத்பர்தா ஸக்திநீ ச ம்ரு'டஃ ஸ்வயம் ॥ 6 ॥

க்ரு'த்திவாஸாஃ ஸ்வயம் குஹ்யாமூரூ பாது பிநாகத்ரு'த் ।

ஜாநுநீ த்ர்யம்பகஃ பாது ஜங்கே பாது ஸதாஶிவஃ ॥ 7 ॥

ஸ்மராரிஃ பாது மே பாதௌ பாது ஸர்வாங்கமீஶ்வரஃ ।

இதீதம் கவசம் தேவி பரமாநந்ததாயகம் ॥ 8 ॥

ஜ்ஞாநவாகர்ததம் வீர்யமணிமாதிவிபூதிதம் ।

ஆயுராரோக்யமைஶ்வர்யமபம்ரு'த்யுபயாபஹம் ॥ 9 ॥

ப்ராதஃ காலே ஶுசிர்பூத்வா த்ரிவாரம் ஸர்வதா ஜபேத் ।

நித்யம் பூஜாஸமாயுக்தஃ ஸம்வத்ஸரமதந்த்ரிதஃ ॥ 10 ॥

ஜபேத் த்ரிஸந்த்யம் யோ வித்வாந் வேதஶாஸ்த்ரார்தபாரகஃ ।

கத்யபத்யைஸ்ததா சாபி நாடகாஃ ஸ்வயமேவ ஹி ।

நிர்கச்சந்தி முகாம்போஜாத்ஸத்யமேதந்ந ஸம்ஶயஃ ॥ 11 ॥

இதி ருத்ரயாமலே உமாமஹேஶ்வரஸம்வாதே ஶ்ரீ தக்ஷிணாமூர்தி கவசம் ॥

Roman (IAST) Transliteration

pārvatyuvāca

namaste'stu trayīnātha paramānandakāraka |

kavacaṃ dakṣiṇāmūrteḥ kṛpayā vada me prabho || 1 ||

īśvara uvāca

vakṣye'haṃ devadeveśi dakṣiṇāmūrtiravyayam |

kavacaṃ sarvapāpaghnaṃ vedāntajñānagocaram || 2 ||

aṇimādi mahāsiddhividhānacaturaṃ śubham |

vedaśāstrapurāṇāni kavitā tarka eva ca || 3 ||

bahudhā devi jāyante kavacasya prabhāvataḥ |

ṛṣirbrahmā samuddiṣṭaśchando'nuṣṭubudāhṛtam || 4 ||

devatā dakṣiṇāmūrtiḥ paramātmā sadāśivaḥ |

bījaṃ vedādikaṃ caiva svāhā śaktirudāhṛtā |

sarvajñatve'pi deveśi viniyogaṃ pracakṣate || 5 ||

dhyānam

advandvanetramamalendukalāvataṃsaṃ

haṃsāvalambita samāna jaṭākalāpam |

ānīlakaṇṭhamupakaṇṭhamunipravīrān

adhyāpayantamavalokaya lokanātham ||

kavacam

om | śiro me dakṣiṇāmūrtiravyāt phālaṃ maheśvaraḥ |

dṛśau pātu mahādevaḥ śravaṇe candraśekharaḥ || 1 ||

kapolau pātu me rudro nāsāṃ pātu jagadguruḥ |

mukhaṃ gaurīpatiḥ pātu rasanāṃ vedarūpadhṛt || 2 ||

daśanāṃ tripuradhvaṃsī coṣṭhaṃ pannagabhūṣaṇaḥ |

adharaṃ pātu viśvātmā hanū pātu jaganmayaḥ || 3 ||

cubukaṃ devadevastu pātu kaṇṭhaṃ jaṭādharaḥ |

skandhau me pātu śuddhātmā karau pātu yamāntakaḥ || 4 ||

kucāgraṃ karamadhyaṃ ca nakharān śaṅkaraḥ svayam |

hṛnme paśupatiḥ pātu pārśve paramapūruṣaḥ || 5 ||

madhyamaṃ pātu śarvo me nābhiṃ nārāyaṇapriyaḥ |

kaṭiṃ pātu jagadbhartā sakthinī ca mṛḍaḥ svayam || 6 ||

kṛttivāsāḥ svayaṃ guhyāmūrū pātu pinākadhṛt |

jānunī tryambakaḥ pātu jaṅghe pātu sadāśivaḥ || 7 ||

smarāriḥ pātu me pādau pātu sarvāṅgamīśvaraḥ |

itīdaṃ kavacaṃ devi paramānandadāyakam || 8 ||

jñānavāgarthadaṃ vīryamaṇimādivibhūtidam |

āyurārogyamaiśvaryamapamṛtyubhayāpaham || 9 ||

prātaḥ kāle śucirbhūtvā trivāraṃ sarvadā japet |

nityaṃ pūjāsamāyuktaḥ saṃvatsaramatandritaḥ || 10 ||

japet trisandhyaṃ yo vidvān vedaśāstrārthapāragaḥ |

gadyapadyaistathā cāpi nāṭakāḥ svayameva hi |

nirgacchanti mukhāmbhojātsatyametanna saṃśayaḥ || 11 ||

iti rudrayāmale umāmaheśvarasaṃvāde śrī dakṣiṇāmūrti kavacam ||