Sakala Janani Stavah — InfoLyter.in

ॐ

ஸகல ஜநநீ ஸ்தவஃ

Sakala Janani Stavah

Tamil

அஜாநந்தோ யாந்தி க்ஷயமவஶமந்யோந்யகலஹை-

-ரமீ மாயாக்ரந்தௌ தவ பரிலுடந்தஃ ஸமயிநஃ ।

ஜகந்மாதர்ஜந்மஜ்வரபயதமஃ கௌமுதி வயம்

நமஸ்தே குர்வாணாஃ ஶரணமுபயாமோ பகவதீம் ॥ 1 ॥

வசஸ்தர்காகம்யஸ்வரஸபரமாநந்தவிபவ-

-ப்ரபோதாகாராய த்யுதிதுலிதநீலோத்பலருசே ।

ஶிவாத்யாராத்யாய ஸ்தநபரவிநம்ராய ஸததம்

நமஸ்தஸ்மை கஸ்மைசந பவது முக்தாய மஹஸே ॥ 2 ॥

அநாத்யந்தாபேதப்ரணயரஸிகாபி ப்ரணயிநீ

ஶிவஸ்யாஸீர்யத்த்வம் பரிணயவிதௌ தேவி க்ரு'ஹிணீ ।

ஸவித்ரீ பூதாநாமபி யதுதபூஃ ஶைலதநயா

ததேதத்ஸம்ஸாரப்ரணயநமஹாநாடகமுகம் ॥ 3 ॥

ப்ருவந்த்யேகே தத்த்வம் பகவதி ஸதந்யே விதுரஸ-

-த்பரே மாதஃ ப்ராஹுஸ்தவ ஸதஸதந்யே ஸுகவயஃ ।

பரே நைதத்ஸர்வம் ஸமபிதததே தேவி ஸுதிய-

-ஸ்ததேதத்த்வந்மாயாவிலஸிதமஶேஷம் நநு ஶிவே ॥ 4 ॥

லுடத்குஞ்ஜாஹாரஸ்தநபரநமந்மத்யலதிகா-

-முதஞ்சத்தர்மாம்பஃ கணகுணிதவக்த்ராம்புஜருசம் ।

ஶிவம் பார்தத்ராணப்ரவணம்ரு'கயாகாரகுணிதம்

ஶிவாமந்வக்யாந்தீம் ஶரணமஹமந்வேமி ஶபரீம் ॥ 5 ॥

மிதஃ கேஶாகேஶிப்ரதநநிதநாஸ்தர்ககடநாஃ

பஹுஶ்ரத்தாபக்திப்ரணதிவிஷயாஃ ஶாஸ்த்ரவிதயஃ ।

ப்ரஸீத ப்ரத்யக்ஷீபவ கிரிஸுதே தேஹி ஶரணம்

நிராலம்பம் சேதஃ பரிலுடதி பாரிப்லவமிதம் ॥ 6 ॥

ஶுநாம் வா வஹ்நேர்வா ககபரிஷதோ வா யதஶநம்

கதா கேந க்வேதி க்வசிதபி ந கஶ்சித்கலயதி ।

அமுஷ்மிந்விஶ்வாஸம் விஜஹிஹி மமாஹ்நாய வபுஷி

ப்ரபத்யேதாஶ்சேதஃ ஸகலஜநநீமேவ ஶரணம் ॥ 7 ॥

தடித்கோடிஜ்யோதிர்த்யுதிதலிதஷட்க்ரந்திகஹநம்

ப்ரவிஷ்டம் ஸ்வாதாரம் புநரபி ஸுதாவ்ரு'ஷ்டிவபுஷா ।

கிமப்யஷ்டாவிம்ஶத்கிரணஸகலீபூதமநிஶம்

பஜே தாம ஶ்யாமம் குசபரநதம் பர்பரகசம் ॥ 8 ॥

சதுஷ்பத்ராந்தஃ ஷட்தலபுடபகாந்தஸ்த்ரிவலய-

-ஸ்புரத்வித்யுத்வஹ்நித்யுமணிநியுதாபத்யுதிலதே ।

ஷடஶ்ரம் பித்த்வாதௌ தஶதலமத த்வாதஶதலம்

கலாஶ்ரம் ச த்வ்யஶ்ரம் கதவதி நமஸ்தே கிரிஸுதே ॥ 9 ॥

குலம் கேசித்ப்ராஹுர்வபுரகுலமந்யே தவ புதாஃ

பரே தத்ஸம்பேதம் ஸமபிதததே கௌலமபரே ।

சதுர்ணாமப்யேஷாமுபரி கிமபி ப்ராஹுரபரே

மஹாமாயே தத்த்வம் தவ கதமமீ நிஶ்சிநுமஹே ॥ 10 ॥

ஷடத்வாரண்யாநீம் ப்ரலயரவிகோடிப்ரதிருசா

ருசா பஸ்மீக்ரு'த்ய ஸ்வபதகமலப்ரஹ்வஶிரஸாம் ।

விதந்வாநஃ ஶைவம் கிமபி வபுரிந்தீவரருசிஃ

குசாப்யாமாநம்ரஸ்தவ புருஷகாரோ விஜயதே ॥ 11 ॥

ப்ரகாஶாநந்தாப்யாமவிதிதசரீம் மத்யபதவீம்

ப்ரவிஶ்யைதத்த்வந்த்வம் ரவிஶஶிஸமாக்யம் கபலயந் ।

ப்ரபத்யோர்த்வம் நாதம் லயதஹநபஸ்மீக்ரு'தகுலஃ

ப்ரஸாதாத்தே ஜந்துஃ ஶிவமகுலமம்ப ப்ரவிஶதி ॥ 12 ॥

மநுஷ்யாஸ்திர்யஞ்சோ மருத இதி லோகத்ரயமிதம்

பவாம்போதௌ மக்நம் த்ரிகுணலஹரீகோடிலுடிதம் ।

கடாக்ஷஶ்சேத்யத்ர க்வசந தவ மாதஃ கருணயா

ஶரீரீ ஸத்யோऽயம் வ்ரஜதி பரமாநந்ததநுதாம் ॥ 13 ॥

ப்ரியங்குஶ்யாமாங்கீமருணதரவாஸம் கிஸலயாம்

ஸமுந்மீலந்முக்தாபலவஹலநேபத்யஸுபகாம் ।

ஸ்தநத்வந்த்வஸ்பாரஸ்தபகநமிதாம் கல்பலதிகாம்

ஸக்ரு'த்த்யாயந்தஸ்த்வாம் தததி ஶிவசிந்தாமணிபதம் ॥ 14 ॥

ஷடாதாராவர்தைரபரிமிதமந்த்ரோர்மிபடலைஃ

லஸந்முத்ராபேநைர்பஹுவிதலஸத்தைவதசஷைஃ ।

க்ரமஸ்ரோதோபிஸ்த்வம் வஹஸி பரநாதாம்ரு'தநதீ

பவாநி ப்ரத்யக்ரா ஶிவசிதம்ரு'தாப்திப்ரணயிநீ ॥ 15 ॥

மஹீபாதோவஹ்நிஶ்வஸநவியதாத்மேந்துரவிபி-

-ர்வபுர்பிக்ரஸ்தாஶைரபி தவ கியாநம்ப மஹிமா ।

அமூந்யாலோக்யந்தே பகவதி ந குத்ராப்யணுதமா-

-மவஸ்தாம் ப்ராப்தாநி த்வயி து பரமவ்யோமவபுஷி ॥ 16 ॥

கலாமாஜ்ஞாம் ப்ரஜ்ஞாம் ஸமயமநுபூதிம் ஸமரஸம்

குரும் பாரம்பர்யம் விநயமுபதேஶம் ஶிவபதம் ।

ப்ரமாணம் நிர்வாணம் ப்ரக்ரு'திமபிபூதிம் பரகுஹாம்

விதிம் வித்யாமாஹுஃ ஸகலஜநநீமேவ முநயஃ ॥ 17 ॥

ப்ரலீநே ஶப்தௌகே ததநு விரதே பிந்துவிபவே

ததஸ்தத்த்வே சாஷ்டத்வநிபிரநபாயிந்யதிகதே ।

ஶ்ரிதே ஶாக்தே பர்வண்யநுகலிதசிந்மாத்ர கஹநாம்

ஸ்வஸம்வித்திம் யோகீ ரஸயதி ஶிவாக்யாம் பகவதீம் ॥ 18 ॥

பராநந்தாகாராம் நிரவதிஶிவைஶ்வர்யவபுஷம்

நிராகாராம் ஜ்ஞாநப்ரக்ரு'திமபரிச்சிந்நகருணாம் ।

ஸவித்ரீம் லோகாநாம் நிரதிஶயதாமாஸ்பதபதாம்

பவோ வா மோக்ஷோ வா பவது பவதீமேவ பஜதாம் ॥ 19 ॥

ஜகத்காயே க்ரு'த்வா ததபி ஹ்ரு'தயே தச்ச புருஷே

புமாம்ஸம் பிந்துஸ்தம் ததபி வியதாக்யே ச கஹநே ।

ததேதத்ஜ்ஞாநாக்யே ததபி பரமாநந்தகஹநே

மஹாவ்யோமாகாரே த்வதநுபவஶீலோ விஜயதே ॥ 20 ॥

விதே வேத்யே வித்யே விவிதஸமயே வேதகுலிகே

விசித்ரே விஶ்வாத்யே விநயஸுலபே வேதஜநநி ।

ஶிவஜ்ஞே ஶூலஸ்தே ஶிவபதவதாந்யே ஶிவநிதே

ஶிவே மாதர்மஹ்யம் த்வயி விதர பக்திம் நிருபமாம் ॥ 21 ॥

விதேர்முண்டம் ஹ்ரு'த்வா யதகுருத பாத்ரம் கரதலே

ஹரிம் ஶூலப்ரோதம் யதகமயதம்ஸாபரணதாம் ।

அலஞ்சக்ரே கண்டம் யதபி கரலேநாம்ப கிரிஶஃ

ஶிவஸ்தாயாஃ ஶக்தேஸ்ததிதமகிலம் தே விலஸிதம் ॥ 22 ॥

விரிஞ்ச்யாக்யா மாதஃ ஸ்ரு'ஜஸி ஹரிஸஞ்ஜ்ஞா த்வமவஸி

த்ரிலோகீம் ருத்ராக்யா ஹரஸி விததாஸீஶ்வரதஶாம் ।

பவந்தீ நாதாக்யா விஹரஸி ச பாஶௌகதலநீ

த்வமேவைகாऽநேகா பவஸி க்ரு'திபேதைர்கிரிஸுதே ॥ 23 ॥

முநீநாம் சேதோபிஃ ப்ரம்ரு'திதகஷாயைரபி மநா-

-கஶக்யம் ஸம்ஸ்ப்ரஷ்டும் சகிதசகிதைரம்ப ஸததம் ।

ஶ்ருதீநாம் மூர்தாநஃ ப்ரக்ரு'திகடிநாஃ கோமலதரே

கதம் தே விந்தந்தே பதகிஸலயே பார்வதி பதம் ॥ 24 ॥

தடித்வல்லீம் நித்யாமம்ரு'தஸரிதம் பாரரஹிதாம்

மலோத்தீர்ணாம் ஜ்யோத்ஸ்நாம் ப்ரக்ரு'திமகுணக்ரந்திகஹநாம் ।

கிராம் தூராம் வித்யாமவிநதகுசாம் விஶ்வஜநநீ-

-மபர்யந்தாம் லக்ஷ்மீமபிதததி ஸந்தோ பகவதீம் ॥ 25 ॥

ஶரீரம் க்ஷித்யம்பஃ ப்ரப்ரு'திரசிதம் கேவலமசித்

ஸுகம் துஃகம் சாயம் கலயதி புமாம்ஶ்சேதந இதி ।

ஸ்புடம் ஜாநாநோऽபி ப்ரபவதி ந தேஹீ ரஹயிதும்

ஶரீராஹங்காரம் தவ ஸமயபாஹ்யோ கிரிஸுதே ॥ 26 ॥

பிதா மாதா ப்ராதா ஸுஹ்ரு'தநுசரஃ ஸத்ம க்ரு'ஹிணீ

வபுஃ க்ஷேத்ரம் மித்ரம் தநமபி யதா மாம் விஜஹதி ।

ததா மே பிந்தாநா ஸபதி பயமோஹாந்ததமஸம்

மஹாஜ்யோத்ஸ்நே மாதர்பவ கருணயா ஸந்நிதிகரீ ॥ 27 ॥

ஸுதா தக்ஷஸ்யாதௌ கில ஸகலமாதஸ்த்வமுதபூஃ

ஸதோஷம் தம் ஹித்வா ததநு கிரிராஜஸ்ய துஹிதா ।

அநாத்யந்தா ஶம்போரப்ரு'தகபி ஶக்திர்பகவதீ

விவாஹாஜ்ஜாயாஸீத்யஹஹ சரிதம் வேத்தி தவ கஃ ॥ 28 ॥

கணாஸ்த்வத்தீப்தீநாம் ரவிஶஶிக்ரு'ஶாநுப்ரப்ரு'தயஃ

பரம் ப்ரஹ்ம க்ஷுத்ரம் தவ நியதமாநந்தகணிகா ।

ஶிவாதி க்ஷித்யந்தம் த்ரிவலயதநோஃ ஸர்வமுதரே

தவாஸ்தே பக்தஸ்ய ஸ்புரஸி ஹ்ரு'தி சித்ரம் பகவதி ॥ 29 ॥

புரஃ பஶ்சாதந்தர்பஹிரபரிமேயம் பரிமிதம்

பரம் ஸ்தூலம் ஸூக்ஷ்மம் ஸகலமகுலம் குஹ்யமகுஹம் ।

தவீயோ நேதீயஃ ஸதஸதிதி விஶ்வம் பகவதீ

ஸதா பஶ்யந்த்யாக்யாம் வஹஸி புவநக்ஷோபஜநநீம் ॥ 30 ॥

ப்ரவிஶ்ய த்வந்மார்கம் ஸஹஜதயயா தேஶிகத்ரு'ஶா

ஷடத்வத்வாந்தௌகச்சிதுரகணநாதீதகருணாம் ।

பராமாஜ்ஞாகாராம் ஸபதி ஶிவயந்தீம் ஶிவதநும்

ஸ்வமாத்மாநம் தந்யாஶ்சிரமுபலபந்தே பகவதீம் ॥ 31 ॥

மயூகாஃ பூஷ்ணீவ ஜ்வலந இவ தத்தீப்திகணிகாஃ

பயோதௌ கல்லோலாஃ ப்ரதிஹதமஹிம்நீவ ப்ரு'ஷதஃ ।

உதேத்யோதேத்யாம்ப த்வயி ஸஹ நிஜைஃ ஸாத்த்விககுணை-

-ர்பஜந்தே தத்த்வௌகாஃ ப்ரஶமமநுகல்பம் பரவஶாஃ ॥ 32 ॥

விதுர்விஷ்ணுர்ப்ரஹ்மா ப்ரக்ரு'திரணுராத்மா திநகரஃ

ஸ்வபாவோ ஜைநேந்த்ரஃ ஸுகதமுநிராகாஶமலிநஃ ।

ஶிவஃ ஶக்திஶ்சேதி ஶ்ருதிவிஷயதாம் தாமுபகதாம்

விகல்பைரேபிஸ்த்வாமபிதததி ஸந்தோ பகவதீம் ॥ 33 ॥

ஶிவஸ்த்வம் ஶக்திஸ்த்வம் த்வமஸி ஸமயா த்வம் ஸமயிநீ

த்வமாத்மா த்வம் தீக்ஷா த்வமயமணிமாதிர்குணகணஃ ।

அவித்யா த்வம் வித்யா த்வமஸி நிகிலம் த்வம் கிமபரம்

ப்ரு'தக்தத்த்வம் த்வத்தோ பகவதி ந வீக்ஷாமஹ இமே ॥ 34 ॥

த்வயாஸௌ ஜாநீதே ரசயதி பவத்யைவ ஸததம்

த்வயைவேச்சத்யம்ப த்வமஸி நிகிலா யஸ்ய தநவஃ ।

ஜகத்ஸாம்யம் ஶம்போர்வஹஸி பரமவ்யோமவபுஷஃ

ததாப்யர்தம் பூத்வா விஹரஸி ஶிவஸ்யேதி கிமிதம் ॥ 35 ॥

அஸங்க்யைஃ ப்ராசீநைர்ஜநநி ஜநநைஃ கர்மவிலயா-

-த்ஸக்ரு'ஜ்ஜந்மந்யந்தே குருவபுஷமாஸாத்ய கிரிஶம் ।

அவாப்யாஜ்ஞாம் ஶைவீம் ஶிவதநுமபி த்வாம் விதிதவா-

-ந்நயேயம் த்வத்பூஜாஸ்துதிவிரசநேநைவ திவஸாந் ॥ 36 ॥

யத்ஷட்பத்ரம் கமலமுதிதம் தஸ்ய யா கர்ணிகாக்யா

யோநிஸ்தஸ்யாஃ ப்ரதிதமுதரே யத்ததோங்காரபீடம் ।

தஸ்யாப்யந்தஃ குசபரநதாம் குண்டலீதி ப்ரஸித்தாம்

ஶ்யாமாகாராம் ஸகலஜநநீம் ஸந்ததம் பாவயாமி ॥ 37 ॥

புவி பயஸி க்ரு'ஶாநௌ மாருதே கே ஶஶாங்கே

ஸவிதரி யஜமாநேऽப்யஷ்டதா ஶக்திரேகா ।

வஹஸி குசபராப்யாம் யாவநம்ராபி விஶ்வம்

ஸகலஜநநி ஸா த்வம் பாஹி மாமித்யவாச்யம் ॥ 38 ॥

இதி ஶ்ரீகாலிதாஸ விரசித பஞ்சஸ்தவ்யாம் பஞ்சமஃ ஸகலஜநநீஸ்தவஃ ।

Roman (IAST) Transliteration

ajānanto yānti kṣayamavaśamanyonyakalahai-

-ramī māyāgranthau tava pariluṭhantaḥ samayinaḥ |

jaganmātarjanmajvarabhayatamaḥ kaumudi vayaṃ

namaste kurvāṇāḥ śaraṇamupayāmo bhagavatīm || 1 ||

vacastarkāgamyasvarasaparamānandavibhava-

-prabodhākārāya dyutitulitanīlotpalaruce |

śivādyārādhyāya stanabharavinamrāya satataṃ

namastasmai kasmaicana bhavatu mugdhāya mahase || 2 ||

anādyantābhedapraṇayarasikāpi praṇayinī

śivasyāsīryattvaṃ pariṇayavidhau devi gṛhiṇī |

savitrī bhūtānāmapi yadudabhūḥ śailatanayā

tadetatsaṃsārapraṇayanamahānāṭakamukham || 3 ||

bruvantyeke tattvaṃ bhagavati sadanye vidurasa-

-tpare mātaḥ prāhustava sadasadanye sukavayaḥ |

pare naitatsarvaṃ samabhidadhate devi sudhiya-

-stadetattvanmāyāvilasitamaśeṣaṃ nanu śive || 4 ||

luṭhadguñjāhārastanabharanamanmadhyalatikā-

-mudañcaddharmāmbhaḥ kaṇaguṇitavaktrāmbujarucam |

śivaṃ pārthatrāṇapravaṇamṛgayākāraguṇitaṃ

śivāmanvagyāntīṃ śaraṇamahamanvemi śabarīm || 5 ||

mithaḥ keśākeśiprathananidhanāstarkaghaṭanāḥ

bahuśraddhābhaktipraṇativiṣayāḥ śāstravidhayaḥ |

prasīda pratyakṣībhava girisute dehi śaraṇaṃ

nirālambaṃ cetaḥ pariluṭhati pāriplavamidam || 6 ||

śunāṃ vā vahnervā khagapariṣado vā yadaśanaṃ

kadā kena kveti kvacidapi na kaścitkalayati |

amuṣminviśvāsaṃ vijahihi mamāhnāya vapuṣi

prapadyethāścetaḥ sakalajananīmeva śaraṇam || 7 ||

taṭitkoṭijyotirdyutidalitaṣaḍgranthigahanaṃ

praviṣṭaṃ svādhāraṃ punarapi sudhāvṛṣṭivapuṣā |

kimapyaṣṭāviṃśatkiraṇasakalībhūtamaniśaṃ

bhaje dhāma śyāmaṃ kucabharanataṃ barbarakacam || 8 ||

catuṣpatrāntaḥ ṣaḍdalapuṭabhagāntastrivalaya-

-sphuradvidyudvahnidyumaṇiniyutābhadyutilate |

ṣaḍaśraṃ bhittvādau daśadalamatha dvādaśadalaṃ

kalāśraṃ ca dvyaśraṃ gatavati namaste girisute || 9 ||

kulaṃ kecitprāhurvapurakulamanye tava budhāḥ

pare tatsambhedaṃ samabhidadhate kaulamapare |

caturṇāmapyeṣāmupari kimapi prāhurapare

mahāmāye tattvaṃ tava kathamamī niścinumahe || 10 ||

ṣaḍadhvāraṇyānīṃ pralayaravikoṭipratirucā

rucā bhasmīkṛtya svapadakamalaprahvaśirasām |

vitanvānaḥ śaivaṃ kimapi vapurindīvararuciḥ

kucābhyāmānamrastava puruṣakāro vijayate || 11 ||

prakāśānandābhyāmaviditacarīṃ madhyapadavīṃ

praviśyaitaddvandvaṃ raviśaśisamākhyaṃ kabalayan |

prapadyordhvaṃ nādaṃ layadahanabhasmīkṛtakulaḥ

prasādātte jantuḥ śivamakulamamba praviśati || 12 ||

manuṣyāstiryañco maruta iti lokatrayamidaṃ

bhavāmbhodhau magnaṃ triguṇalaharīkoṭiluṭhitam |

kaṭākṣaścedyatra kvacana tava mātaḥ karuṇayā

śarīrī sadyo'yaṃ vrajati paramānandatanutām || 13 ||

priyaṅguśyāmāṅgīmaruṇataravāsaṃ kisalayāṃ

samunmīlanmuktāphalavahalanepathyasubhagām |

stanadvandvasphārastabakanamitāṃ kalpalatikāṃ

sakṛddhyāyantastvāṃ dadhati śivacintāmaṇipadam || 14 ||

ṣaḍādhārāvartairaparimitamantrormipaṭalaiḥ

lasanmudrāphenairbahuvidhalasaddaivatajhaṣaiḥ |

kramasrotobhistvaṃ vahasi paranādāmṛtanadī

bhavāni pratyagrā śivacidamṛtābdhipraṇayinī || 15 ||

mahīpāthovahniśvasanaviyadātmenduravibhi-

-rvapurbhigrastāśairapi tava kiyānamba mahimā |

amūnyālokyante bhagavati na kutrāpyaṇutamā-

-mavasthāṃ prāptāni tvayi tu paramavyomavapuṣi || 16 ||

kalāmājñāṃ prajñāṃ samayamanubhūtiṃ samarasaṃ

guruṃ pāramparyaṃ vinayamupadeśaṃ śivapadam |

pramāṇaṃ nirvāṇaṃ prakṛtimabhibhūtiṃ paraguhāṃ

vidhiṃ vidyāmāhuḥ sakalajananīmeva munayaḥ || 17 ||

pralīne śabdaughe tadanu virate binduvibhave

tatastattve cāṣṭadhvanibhiranapāyinyadhigate |

śrite śākte parvaṇyanukalitacinmātra gahanāṃ

svasaṃvittiṃ yogī rasayati śivākhyāṃ bhagavatīm || 18 ||

parānandākārāṃ niravadhiśivaiśvaryavapuṣaṃ

nirākārāṃ jñānaprakṛtimaparicchinnakaruṇām |

savitrīṃ lokānāṃ niratiśayadhāmāspadapadāṃ

bhavo vā mokṣo vā bhavatu bhavatīmeva bhajatām || 19 ||

jagatkāye kṛtvā tadapi hṛdaye tacca puruṣe

pumāṃsaṃ bindusthaṃ tadapi viyadākhye ca gahane |

tadetadjñānākhye tadapi paramānandagahane

mahāvyomākāre tvadanubhavaśīlo vijayate || 20 ||

vidhe vedye vidye vividhasamaye vedagulike

vicitre viśvādye vinayasulabhe vedajanani |

śivajñe śūlasthe śivapadavadānye śivanidhe

śive mātarmahyaṃ tvayi vitara bhaktiṃ nirupamām || 21 ||

vidhermuṇḍaṃ hṛtvā yadakuruta pātraṃ karatale

hariṃ śūlaprotaṃ yadagamayadaṃsābharaṇatām |

alañcakre kaṇṭhaṃ yadapi garalenāmba giriśaḥ

śivasthāyāḥ śaktestadidamakhilaṃ te vilasitam || 22 ||

viriñcyākhyā mātaḥ sṛjasi harisañjñā tvamavasi

trilokīṃ rudrākhyā harasi vidadhāsīśvaradaśām |

bhavantī nādākhyā viharasi ca pāśaughadalanī

tvamevaikā'nekā bhavasi kṛtibhedairgirisute || 23 ||

munīnāṃ cetobhiḥ pramṛditakaṣāyairapi manā-

-gaśakyaṃ saṃspraṣṭuṃ cakitacakitairamba satatam |

śrutīnāṃ mūrdhānaḥ prakṛtikaṭhināḥ komalatare

kathaṃ te vindante padakisalaye pārvati padam || 24 ||

taṭidvallīṃ nityāmamṛtasaritaṃ pārarahitāṃ

malottīrṇāṃ jyotsnāṃ prakṛtimaguṇagranthigahanām |

girāṃ dūrāṃ vidyāmavinatakucāṃ viśvajananī-

-maparyantāṃ lakṣmīmabhidadhati santo bhagavatīm || 25 ||

śarīraṃ kṣityambhaḥ prabhṛtiracitaṃ kevalamacit

sukhaṃ duḥkhaṃ cāyaṃ kalayati pumāṃścetana iti |

sphuṭaṃ jānāno'pi prabhavati na dehī rahayituṃ

śarīrāhaṅkāraṃ tava samayabāhyo girisute || 26 ||

pitā mātā bhrātā suhṛdanucaraḥ sadma gṛhiṇī

vapuḥ kṣetraṃ mitraṃ dhanamapi yadā māṃ vijahati |

tadā me bhindānā sapadi bhayamohāndhatamasaṃ

mahājyotsne mātarbhava karuṇayā sannidhikarī || 27 ||

sutā dakṣasyādau kila sakalamātastvamudabhūḥ

sadoṣaṃ taṃ hitvā tadanu girirājasya duhitā |

anādyantā śambhorapṛthagapi śaktirbhagavatī

vivāhājjāyāsītyahaha caritaṃ vetti tava kaḥ || 28 ||

kaṇāstvaddīptīnāṃ raviśaśikṛśānuprabhṛtayaḥ

paraṃ brahma kṣudraṃ tava niyatamānandakaṇikā |

śivādi kṣityantaṃ trivalayatanoḥ sarvamudare

tavāste bhaktasya sphurasi hṛdi citraṃ bhagavati || 29 ||

puraḥ paścādantarbahiraparimeyaṃ parimitaṃ

paraṃ sthūlaṃ sūkṣmaṃ sakalamakulaṃ guhyamaguham |

davīyo nedīyaḥ sadasaditi viśvaṃ bhagavatī

sadā paśyantyākhyāṃ vahasi bhuvanakṣobhajananīm || 30 ||

praviśya tvanmārgaṃ sahajadayayā deśikadṛśā

ṣaḍadhvadhvāntaughacchiduragaṇanātītakaruṇām |

parāmājñākārāṃ sapadi śivayantīṃ śivatanuṃ

svamātmānaṃ dhanyāściramupalabhante bhagavatīm || 31 ||

mayūkhāḥ pūṣṇīva jvalana iva taddīptikaṇikāḥ

payodhau kallolāḥ pratihatamahimnīva pṛṣataḥ |

udetyodetyāmba tvayi saha nijaiḥ sāttvikaguṇai-

-rbhajante tattvaughāḥ praśamamanukalpaṃ paravaśāḥ || 32 ||

vidhurviṣṇurbrahmā prakṛtiraṇurātmā dinakaraḥ

svabhāvo jainendraḥ sugatamunirākāśamalinaḥ |

śivaḥ śaktiśceti śrutiviṣayatāṃ tāmupagatāṃ

vikalpairebhistvāmabhidadhati santo bhagavatīm || 33 ||

śivastvaṃ śaktistvaṃ tvamasi samayā tvaṃ samayinī

tvamātmā tvaṃ dīkṣā tvamayamaṇimādirguṇagaṇaḥ |

avidyā tvaṃ vidyā tvamasi nikhilaṃ tvaṃ kimaparaṃ

pṛthaktattvaṃ tvatto bhagavati na vīkṣāmaha ime || 34 ||

tvayāsau jānīte racayati bhavatyaiva satataṃ

tvayaivecchatyamba tvamasi nikhilā yasya tanavaḥ |

jagatsāmyaṃ śambhorvahasi paramavyomavapuṣaḥ

tathāpyardhaṃ bhūtvā viharasi śivasyeti kimidam || 35 ||

asaṅkhyaiḥ prācīnairjanani jananaiḥ karmavilayā-

-tsakṛjjanmanyante guruvapuṣamāsādya giriśam |

avāpyājñāṃ śaivīṃ śivatanumapi tvāṃ viditavā-

-nnayeyaṃ tvatpūjāstutiviracanenaiva divasān || 36 ||

yatṣaṭpatraṃ kamalamuditaṃ tasya yā karṇikākhyā

yonistasyāḥ prathitamudare yattadoṅkārapīṭham |

tasyāpyantaḥ kucabharanatāṃ kuṇḍalīti prasiddhāṃ

śyāmākārāṃ sakalajananīṃ santataṃ bhāvayāmi || 37 ||

bhuvi payasi kṛśānau mārute khe śaśāṅke

savitari yajamāne'pyaṣṭadhā śaktirekā |

vahasi kucabharābhyāṃ yāvanamrāpi viśvaṃ

sakalajanani sā tvaṃ pāhi māmityavācyam || 38 ||

iti śrīkālidāsa viracita pañcastavyāṃ pañcamaḥ sakalajananīstavaḥ |