த்வத்ஸேவோத்கஸ்ஸௌபரிர்நாம பூர்வம்
காலிந்த்யந்தர்த்வாதஶாப்தம் தபஸ்யந் ।
மீநவ்ராதே ஸ்நேஹவாந் போகலோலே
தார்க்ஷ்யம் ஸாக்ஷாதைக்ஷதாக்ரே கதாசித் ॥1॥
த்வத்வாஹம் தம் ஸக்ஷுதம் த்ரு'க்ஷஸூநும்
மீநம் கஞ்சிஜ்ஜக்ஷதம் லக்ஷயந் ஸஃ ।
தப்தஶ்சித்தே ஶப்தவாநத்ர சேத்த்வம்
ஜந்தூந் போக்தா ஜீவிதம் சாபி மோக்தா ॥2॥
தஸ்மிந் காலே காலியஃ க்ஷ்வேலதர்பாத்
ஸர்பாராதேஃ கல்பிதம் பாகமஶ்நந் ।
தேந க்ரோதாத்த்வத்பதாம்போஜபாஜா
பக்ஷக்ஷிப்தஸ்தத்துராபம் பயோऽகாத் ॥3॥
கோரே தஸ்மிந் ஸூரஜாநீரவாஸே
தீரே வ்ரு'க்ஷா விக்ஷதாஃ க்ஷ்வேலவேகாத் ।
பக்ஷிவ்ராதாஃ பேதுரப்ரே பதந்தஃ
காருண்யார்த்ரம் த்வந்மநஸ்தேந ஜாதம் ॥4॥
காலே தஸ்மிந்நேகதா ஸீரபாணிம்
முக்த்வா யாதே யாமுநம் காநநாந்தம் ।
த்வய்யுத்தாமக்ரீஷ்மபீஷ்மோஷ்மதப்தா
கோகோபாலா வ்யாபிபந் க்ஷ்வேலதோயம் ॥5॥
நஶ்யஜ்ஜீவாந் விச்யுதாந் க்ஷ்மாதலே தாந்
விஶ்வாந் பஶ்யந்நச்யுத த்வம் தயார்த்ரஃ ।
ப்ராப்யோபாந்தம் ஜீவயாமாஸித த்ராக்
பீயூஷாம்போவர்ஷிபிஃ ஶ்ரீகடக்ஷைஃ ॥6॥
கிம் கிம் ஜாதோ ஹர்ஷவர்ஷாதிரேகஃ
ஸர்வாங்கேஷ்வித்யுத்திதா கோபஸங்காஃ ।
த்ரு'ஷ்ட்வாऽக்ரே த்வாம் த்வத்க்ரு'தம் தத்விதந்த-
ஸ்த்வாமாலிங்கந் த்ரு'ஷ்டநாநாப்ரபாவாஃ ॥7॥
காவஶ்சைவம் லப்தஜீவாஃ க்ஷணேந
ஸ்பீதாநந்தாஸ்த்வாம் ச த்ரு'ஷ்ட்வா புரஸ்தாத் ।
த்ராகாவவ்ருஃ ஸர்வதோ ஹர்ஷபாஷ்பம்
வ்யாமுஞ்சந்த்யோ மந்தமுத்யந்நிநாதாஃ ॥8॥
ரோமாஞ்சோऽயம் ஸர்வதோ நஃ ஶரீரே
பூயஸ்யந்தஃ காசிதாநந்தமூர்சா ।
ஆஶ்சர்யோऽயம் க்ஷ்வேலவேகோ முகுந்தே-
த்யுக்தோ கோபைர்நந்திதோ வந்திதோऽபூஃ ॥9॥
ஏவம் பக்தாந் முக்தஜீவாநபி த்வம்
முக்தாபாங்கைரஸ்தரோகாம்ஸ்தநோஷி ।
தாத்ரு'க்பூதஸ்பீதகாருண்யபூமா
ரோகாத் பாயா வாயுகேஹாதிவாஸ ॥10॥
Roman (IAST) Transliteration
tvatsevotkassaubharirnāma pūrvaṃ
kālindyantardvādaśābdaṃ tapasyan |
mīnavrāte snehavān bhogalole
tārkṣyaṃ sākṣādaikṣatāgre kadācit ||1||
tvadvāhaṃ taṃ sakṣudhaṃ tṛkṣasūnuṃ
mīnaṃ kañcijjakṣataṃ lakṣayan saḥ |
taptaścitte śaptavānatra cettvaṃ
jantūn bhoktā jīvitaṃ cāpi moktā ||2||
tasmin kāle kāliyaḥ kṣveladarpāt
sarpārāteḥ kalpitaṃ bhāgamaśnan |
tena krodhāttvatpadāmbhojabhājā
pakṣakṣiptastaddurāpaṃ payo'gāt ||3||
ghore tasmin sūrajānīravāse
tīre vṛkṣā vikṣatāḥ kṣvelavegāt |
pakṣivrātāḥ peturabhre patantaḥ
kāruṇyārdraṃ tvanmanastena jātam ||4||
kāle tasminnekadā sīrapāṇiṃ
muktvā yāte yāmunaṃ kānanāntam |
tvayyuddāmagrīṣmabhīṣmoṣmataptā
gogopālā vyāpiban kṣvelatoyam ||5||
naśyajjīvān vicyutān kṣmātale tān
viśvān paśyannacyuta tvaṃ dayārdraḥ |
prāpyopāntaṃ jīvayāmāsitha drāk
pīyūṣāmbhovarṣibhiḥ śrīkaṭakṣaiḥ ||6||
kiṃ kiṃ jāto harṣavarṣātirekaḥ
sarvāṅgeṣvityutthitā gopasaṅghāḥ |
dṛṣṭvā'gre tvāṃ tvatkṛtaṃ tadvidanta-
stvāmāliṅgan dṛṣṭanānāprabhāvāḥ ||7||
gāvaścaivaṃ labdhajīvāḥ kṣaṇena
sphītānandāstvāṃ ca dṛṣṭvā purastāt |
drāgāvavruḥ sarvato harṣabāṣpaṃ
vyāmuñcantyo mandamudyanninādāḥ ||8||
romāñco'yaṃ sarvato naḥ śarīre
bhūyasyantaḥ kācidānandamūrchā |
āścaryo'yaṃ kṣvelavego mukunde-
tyukto gopairnandito vandito'bhūḥ ||9||
evaṃ bhaktān muktajīvānapi tvaṃ
mugdhāpāṅgairastarogāṃstanoṣi |
tādṛgbhūtasphītakāruṇyabhūmā
rogāt pāyā vāyugehādhivāsa ||10||