Gitagovindam Dvitiyah Sargah - Aklesha Keshavah

ॐ

கீதகோவிந்தம் த்விதீயஃ ஸர்கஃ - அக்லேஶ கேஶவஃ

Vishnu Gita Jayadeva Tamil

॥ த்விதீயஃ ஸர்கஃ ॥

॥ அக்லேஶகேஶவஃ ॥

விஹரதி வநே ராதா ஸாதாரணப்ரணயே ஹரௌ விகலிதநிஜோத்கர்ஷாதீர்ஷ்யாவஶேந கதாந்யதஃ ।

க்வசிதபி லதாகுஞ்ஜே குஞ்ஜந்மதுவ்ரதமண்டலீ-முகரஶிகரே லீநா தீநாப்யுவாச ரஹஃ ஸகீம் ॥ 14 ॥

॥ கீதம் 5 ॥

ஸஞ்சரததரஸுதாமதுரத்வநிமுகரிதமோஹநவம்ஶம் ।

சலிதத்ரு'கஞ்சலசஞ்சலமௌலிகபோலவிலோலவதம்ஸம் ॥

ராஸே ஹரிமிஹ விஹிதவிலாஸம் ஸ்மரதி மநோ மம க்ரு'தபரிஹாஸம் ॥ 1 ॥

சந்த்ரகசாருமயூரஶிகண்டகமண்டலவலயிதகேஶம் ।

ப்ரசுரபுரந்தரதநுரநுரஞ்ஜிதமேதுரமுதிரஸுவேஶம் ॥ 2 ॥

கோபகதம்பநிதம்பவதீமுகசும்பநலம்பிதலோபம் ।

பந்துஜீவமதுராதரபல்லவமுல்லஸிதஸ்மிதஶோபம் ॥ 3 ॥

விபுலபுலகபுஜபல்லவவலயிதவல்லவயுவதிஸஹஸ்ரம் ।

கரசரணோரஸி மணிகணபூஷணகிரணவிபிந்நதமிஸ்ரம் ॥ 4 ॥

ஜலதபடலவலதிந்துவிநந்தகசந்தநதிலகலலாடம் ।

பீநபயோதரபரிஸரமர்தநநிர்தயஹ்ரு'தயகவாடம் ॥ 5 ॥

மணிமயமகரமநோஹரகுண்டலமண்டிதகண்டமுதாரம் ।

பீதவஸநமநுகதமுநிமநுஜஸுராஸுரவரபரிவாரம் ॥ 6 ॥

விஶதகதம்பதலே மிலிதம் கலிகலுஷபயம் ஶமயந்தம் ।

மாமபி கிமபி தரங்கதநங்கத்ரு'ஶா மநஸா ரமயந்தம் ॥ 7 ॥

ஶ்ரீஜயதேவபணிதமதிஸுந்தரமோஹநமதுரிபுரூபம் ।

ஹரிசரணஸ்மரணம் ப்ரதி ஸம்ப்ரதி புண்யவதாமநுரூபம் ॥ 8 ॥

கணயதி குணக்ராமம் பாமம் ப்ரமாதபி நேஹதே வஹதி ச பரிதோஷம் தோஷம் விமுஞ்சதி தூரதஃ ।

யுவதிஷு வலஸ்த்ரு'ஷ்ணே க்ரு'ஷ்ணே விஹாரிணி மாம் விநா புநரபி மநோ வாமம் காமம் கரோதி கரோமி கிம் ॥ 15 ॥

॥ கீதம் 6 ॥

நிப்ரு'தநிகுஞ்ஜக்ரு'ஹம் கதயா நிஶி ரஹஸி நிலீய வஸந்தம் ।

சகிதவிலோகிதஸகலதிஶா ரதிரபஸரஸேந ஹஸந்தம் ॥

ஸகி ஹே கேஶிமதநமுதாரம் ரமய மயா ஸஹ மதநமநோரதபாவிதயா ஸவிகாரம் ॥ 1 ॥

ப்ரதமஸமாகமலஜ்ஜிதயா படுசாடுஶதைரநுகூலம் ।

ம்ரு'துமதுரஸ்மிதபாஷிதயா ஶிதிலீக்ரு'தஜகநதுகூலம் ॥ 2 ॥

கிஸலயஶயநநிவேஶிதயா சிரமுரஸி மமைவ ஶயாநம் ।

க்ரு'தபரிரம்பணசும்பநயா பரிரப்ய க்ரு'தாதரபாநம் ॥ 3 ॥

அலஸநிமீலிதலோசநயா புலகாவலிலலிதகபோலம் ।

ஶ்ரமஜலஸகலகலேவரயா வரமதநமதாததிலோலம் ॥ 4 ॥

கோகிலகலரவகூஜிதயா ஜிதமநஸிஜதந்த்ரவிசாரம் ।

ஶ்லதகுஸுமாகுலகுந்தலயா நகலிகிதகநஸ்தநபாரம் ॥ 5 ॥

சரணரணிதமநிநூபுரயா பரிபூரிதஸுரதவிதாநம் ।

முகரவிஶ்ரு'ங்கலமேகலயா ஸகசக்ரஹசும்பநதாநம் ॥ 6 ॥

ரதிஸுகஸமயரஸாலஸயா தரமுகுலிதநயநஸரோஜம் ।

நிஃஸஹநிபதிததநுலதயா மதுஸூதநமுதிதமநோஜம் ॥ 7 ॥

ஶ்ரீஜயதேவபணிதமிதமதிஶயமதுரிபுநிதுவநஶீலம் ।

ஸுகமுத்கண்டிதகோபவதூகதிதம் விதநோது ஸலீலம் ॥ 8 ॥

ஹஸ்தஸ்ரஸ்தவிலாஸவம்ஶமந்ரு'ஜுப்ரூவல்லிமத்பல்லவீ-வ்ரு'ந்தோத்ஸாரித்ரு'கந்தவீக்ஷிதமதிஸ்வேதார்த்ரகண்டஸ்தலம் ।

மாமுத்வீக்ஷ்ய விலக்ஷிதம் ஸ்மிதஸுதாமுக்தாநநம் காநநே கோவிந்தம் வ்ரஜஸுந்தரீகணவ்ரு'தம் பஶ்யாமி ஹ்ரு'ஷ்யாமி ச ॥ 16 ॥

துராலோகஸ்தோகஸ்தபகநவகாஶோகலதிகா-விகாஸஃ காஸாரோபவநபவநோऽபி வ்யதயதி ।

அபி ப்ராம்யத்ப்ரு'ங்கீரணிதரமணீயா ந முகுல-ப்ரஸூதிஶ்சூதாநாம் ஸகி ஶிகரிணீயம் ஸுகயதி ॥ 17 ॥

॥ இதி கீதகோவிந்தே அக்லேஶகேஶவோ நாம த்விதீயஃ ஸர்கஃ ॥

Roman (IAST) Transliteration

|| dvitīyaḥ sargaḥ ||

|| akleśakeśavaḥ ||

viharati vane rādhā sādhāraṇapraṇaye harau vigalitanijotkarṣādīrṣyāvaśena gatānyataḥ |

kvacidapi latākuñje guñjanmadhuvratamaṇḍalī-mukharaśikhare līnā dīnāpyuvāca rahaḥ sakhīm || 14 ||

|| gītaṃ 5 ||

sañcaradadharasudhāmadhuradhvanimukharitamohanavaṃśam |

calitadṛgañcalacañcalamaulikapolavilolavataṃsam ||

rāse harimiha vihitavilāsaṃ smarati mano mama kṛtaparihāsam || 1 ||

candrakacārumayūraśikhaṇḍakamaṇḍalavalayitakeśam |

pracurapurandaradhanuranurañjitameduramudirasuveśam || 2 ||

gopakadambanitambavatīmukhacumbanalambhitalobham |

bandhujīvamadhurādharapallavamullasitasmitaśobham || 3 ||

vipulapulakabhujapallavavalayitavallavayuvatisahasram |

karacaraṇorasi maṇigaṇabhūṣaṇakiraṇavibhinnatamisram || 4 ||

jaladapaṭalavaladinduvinandakacandanatilakalalāṭam |

pīnapayodharaparisaramardananirdayahṛdayakavāṭam || 5 ||

maṇimayamakaramanoharakuṇḍalamaṇḍitagaṇḍamudāram |

pītavasanamanugatamunimanujasurāsuravaraparivāram || 6 ||

viśadakadambatale militaṃ kalikaluṣabhayaṃ śamayantam |

māmapi kimapi taraṅgadanaṅgadṛśā manasā ramayantam || 7 ||

śrījayadevabhaṇitamatisundaramohanamadhuripurūpam |

haricaraṇasmaraṇaṃ prati samprati puṇyavatāmanurūpam || 8 ||

gaṇayati guṇagrāmaṃ bhāmaṃ bhramādapi nehate vahati ca paritoṣaṃ doṣaṃ vimuñcati dūrataḥ |

yuvatiṣu valastṛṣṇe kṛṣṇe vihāriṇi māṃ vinā punarapi mano vāmaṃ kāmaṃ karoti karomi kim || 15 ||

|| gītaṃ 6 ||

nibhṛtanikuñjagṛhaṃ gatayā niśi rahasi nilīya vasantam |

cakitavilokitasakaladiśā ratirabhasarasena hasantam ||

sakhi he keśimathanamudāraṃ ramaya mayā saha madanamanorathabhāvitayā savikāram || 1 ||

prathamasamāgamalajjitayā paṭucāṭuśatairanukūlam |

mṛdumadhurasmitabhāṣitayā śithilīkṛtajaghanadukūlam || 2 ||

kisalayaśayananiveśitayā ciramurasi mamaiva śayānam |

kṛtaparirambhaṇacumbanayā parirabhya kṛtādharapānam || 3 ||

alasanimīlitalocanayā pulakāvalilalitakapolam |

śramajalasakalakalevarayā varamadanamadādatilolam || 4 ||

kokilakalaravakūjitayā jitamanasijatantravicāram |

ślathakusumākulakuntalayā nakhalikhitaghanastanabhāram || 5 ||

caraṇaraṇitamaninūpurayā paripūritasuratavitānam |

mukharaviśṛṅkhalamekhalayā sakacagrahacumbanadānam || 6 ||

ratisukhasamayarasālasayā daramukulitanayanasarojam |

niḥsahanipatitatanulatayā madhusūdanamuditamanojam || 7 ||

śrījayadevabhaṇitamidamatiśayamadhuripunidhuvanaśīlam |

sukhamutkaṇṭhitagopavadhūkathitaṃ vitanotu salīlam || 8 ||

hastasrastavilāsavaṃśamanṛjubhrūvallimadballavī-vṛndotsāridṛgantavīkṣitamatisvedārdragaṇḍasthalam |

māmudvīkṣya vilakṣitaṃ smitasudhāmugdhānanaṃ kānane govindaṃ vrajasundarīgaṇavṛtaṃ paśyāmi hṛṣyāmi ca || 16 ||

durālokastokastabakanavakāśokalatikā-vikāsaḥ kāsāropavanapavano'pi vyathayati |

api bhrāmyadbhṛṅgīraṇitaramaṇīyā na mukula-prasūtiścūtānāṃ sakhi śikhariṇīyaṃ sukhayati || 17 ||

|| iti gītagovinde akleśakeśavo nāma dvitīyaḥ sargaḥ ||