5.7 Sundarakanda - Saptama Sargah

ॐ

5.7 සුන්දරකාණ්ඩ - සප්තම සර්ගඃ

Valmiki Sinhala

ශ්රීමද්වාල්මීකීය රාමායණේ සුන්දරකාණ්ඩම් .

අථ සප්තමස්සර්ගඃ .

ස වේශ්මජාලං බලවාන් දදර්ශ ව්යාසක්තවෛඩූර්යසුවර්ණජාලම් .

යථා මහත් ප්රාවෘෂි මේඝජාලං විද්යුත්පිනද්ධං සවිහඞ්ගජාලම් .. 1 ..

නිවේශනානාං විවිධාශ්ච ශාලාඃ ප්රධානශඞ්ඛායුධචාපශාලාඃ .

මනෝහරාශ්චාපි පුනර්විශාලාඃ දදර්ශ වේශ්මාද්රිෂු චන්ද්රශාලාඃ .. 2 ..

ගෘහාණි නානාවසුරාජිතානි දේවාසුරෛශ්චාපි සුපූජිතානි .

සර්වෛශ්ච දෝෂෛඃ පරිවර්ජිතානි කපිර්දදර්ශ ස්වබලාර්ජිතානි .. 3 ..

තානි ප්රයත්නාභිසමාහිතානි මයේන සාක්ෂාදිව නිර්මිතානි .

මහීතලේ සර්වගුණෝත්තරාණි දදර්ශ ලඞ්කාධිපතේර්ගෘහාණි .. 4 ..

තතෝ දදර්ශෝඡ්රචිතමේඝරූපං මනෝහරං කාඤ්චනචාරුරූපම් .

රක්ෂෝ(අ)ධිපස්යාත්මබලානුරූපං ගෘහෝත්තමං හ්යප්රතිරූපරූපම් .. 5 ..

මහීතලේ ස්වර්ගමිව ප්රකීර්ණං ශ්රියා ජ්වලන්තං බහුරත්නකීර්ණම් .

නානාතරූණාං කුසුමාවකීර්ණං ගිරේරිවාග්රං රජසාවකීර්ණම් .. 6 ..

නාරීප්රවේකෛරිව දීප්යමානං තටිද්භිරම්භෝදවදර්ච්යමානම් .

හංසප්රවේකෛරිව වාහ්යමානං ශ්රියා යුතං ඛේ සුකෘතාං විමානම් .. 7 ..

යථා නගාග්රං බහුධාතුචිත්රං යථා නභශ්ච ග්රහචන්ද්රචිත්රම් .

දදර්ශයුක්තීකෘතමේඝචිත්රං විමානරත්නං බහුරත්නචිත්රම් .. 8 ..

මහී කෘතා පර්වතරාජිපූර්ණා ශෛලාඃ කෘතා වෘක්ෂවිතානපූර්ණාඃ .

වෘක්ෂාඃ කෘතාඃ පුෂ්පවිතානපූර්ණාඃ පුෂ්පං කෘතං කේසරපත්රපූර්ණම් .. 9 ..

කෘතානි වේශ්මානි ච පාණ්ඩුරාණි තථා සුපුෂ්පාණ්යපි පුෂ්කරාණි .

පුනශ්ච පද්මානි සකේසරාණි ධන්යානි චිත්රාණි තථා වනානි .. 10 ..

පුෂ්පාහ්වයං නාමවිරාජමානං රත්නප්රභාභිශ්ච විවර්ධමානම් .

වේශ්මෝත්තමානාමපි චෝච්යමානං මහාකපිස්තත්ර මහාවිමානම් .. 11 ..

කෘතාශ්ච වෛඩූර්යමයා විහඞ්ගාඃ රූප්යප්රවාලෛශ්ච තථා විහඞ්ගාඃ .

චිත්රාශ්ච නානාවසුභිර්භුජඞ්ගාඃ ජාත්යානුරූපාස්තුරගාඃ ශුභාඞ්ගාඃ .. 12 ..

ප්රවාලජාම්බූනදපුෂ්පපක්ෂාඃ සලීලමාවර්ජිතජිහ්මපක්ෂාඃ .

කාමස්ය සාක්ෂාදිව භාන්ති පක්ෂාඃ කෘතා විහඞ්ගාඃ සුමුඛාඃ සුපක්ෂාඃ .. 13 ..

නියුජ්යමානාස්තු ගජාඃ සුහස්තාඃ සකේසරාශ්චෝත්පලපත්රහස්තාඃ .

බභූවදේවී ච කෘතා සුහස්තා ලක්ෂ්මී ස්තථා පද්මිනි පද්මහස්තා .. 14 ..

ඉතීව තද්ගෘහමභිගම්ය ශෝභනං සවිස්මයෝ නගමිව චාරුශෝභනම් .

පුනශ්ච තත්පරමසුගන්ධි සුන්දරං හිමාත්යයේ නගමිව චාරුකන්දරම් .. 15 ..

තතඃ ස තාං කපිරභිපත්ය පූජිතාං චරන් පුරීං දශමුඛබාහුපාලිතාම් .

අදෘශ්ය තාං ජනකසුතාං සුපූජිතාං සුදුඃඛිතඃ පතිගුණවේගවර්ජිතාම් .. 16 ..

තතස්තදා බහුවිධභාවිතාත්මනඃ කෘතාත්මනෝ ජනකසුතාං සුවර්ත්මනඃ .

අපශ්යතෝ(අ)භවදතිදුඃඛිතං මනඃ සුචක්ෂුෂඃ ප්රවිචරතෝ මහාත්මනඃ .. 17 ..

ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ සුන්දරකාණ්ඩේ සප්තමස්සර්ගඃ ..

Roman (IAST) Transliteration

śrīmadvālmīkīya rāmāyaṇe sundarakāṇḍam |

atha saptamassargaḥ |

sa veśmajālaṃ balavān dadarśa vyāsaktavaiḍūryasuvarṇajālam |

yathā mahat prāvṛṣi meghajālaṃ vidyutpinaddhaṃ savihaṅgajālam || 1 ||

niveśanānāṃ vividhāśca śālāḥ pradhānaśaṅkhāyudhacāpaśālāḥ |

manoharāścāpi punarviśālāḥ dadarśa veśmādriṣu candraśālāḥ || 2 ||

gṛhāṇi nānāvasurājitāni devāsuraiścāpi supūjitāni |

sarvaiśca doṣaiḥ parivarjitāni kapirdadarśa svabalārjitāni || 3 ||

tāni prayatnābhisamāhitāni mayena sākṣādiva nirmitāni |

mahītale sarvaguṇottarāṇi dadarśa laṅkādhipatergṛhāṇi || 4 ||

tato dadarśochracitamegharūpaṃ manoharaṃ kāñcanacārurūpam |

rakṣo'dhipasyātmabalānurūpaṃ gṛhottamaṃ hyapratirūparūpam || 5 ||

mahītale svargamiva prakīrṇaṃ śriyā jvalantaṃ bahuratnakīrṇam |

nānātarūṇāṃ kusumāvakīrṇaṃ girerivāgraṃ rajasāvakīrṇam || 6 ||

nārīpravekairiva dīpyamānaṃ taṭidbhirambhodavadarcyamānam |

haṃsapravekairiva vāhyamānaṃ śriyā yutaṃ khe sukṛtāṃ vimānam || 7 ||

yathā nagāgraṃ bahudhātucitraṃ yathā nabhaśca grahacandracitram |

dadarśayuktīkṛtameghacitraṃ vimānaratnaṃ bahuratnacitram || 8 ||

mahī kṛtā parvatarājipūrṇā śailāḥ kṛtā vṛkṣavitānapūrṇāḥ |

vṛkṣāḥ kṛtāḥ puṣpavitānapūrṇāḥ puṣpaṃ kṛtaṃ kesarapatrapūrṇam || 9 ||

kṛtāni veśmāni ca pāṇḍurāṇi tathā supuṣpāṇyapi puṣkarāṇi |

punaśca padmāni sakesarāṇi dhanyāni citrāṇi tathā vanāni || 10 ||

puṣpāhvayaṃ nāmavirājamānaṃ ratnaprabhābhiśca vivardhamānam |

veśmottamānāmapi cocyamānaṃ mahākapistatra mahāvimānam || 11 ||

kṛtāśca vaiḍūryamayā vihaṅgāḥ rūpyapravālaiśca tathā vihaṅgāḥ |

citrāśca nānāvasubhirbhujaṅgāḥ jātyānurūpāsturagāḥ śubhāṅgāḥ || 12 ||

pravālajāmbūnadapuṣpapakṣāḥ salīlamāvarjitajihmapakṣāḥ |

kāmasya sākṣādiva bhānti pakṣāḥ kṛtā vihaṅgāḥ sumukhāḥ supakṣāḥ || 13 ||

niyujyamānāstu gajāḥ suhastāḥ sakesarāścotpalapatrahastāḥ |

babhūvadevī ca kṛtā suhastā lakṣmī stathā padmini padmahastā || 14 ||

itīva tadgṛhamabhigamya śobhanaṃ savismayo nagamiva cāruśobhanam |

punaśca tatparamasugandhi sundaraṃ himātyaye nagamiva cārukandaram || 15 ||

tataḥ sa tāṃ kapirabhipatya pūjitāṃ caran purīṃ daśamukhabāhupālitām |

adṛśya tāṃ janakasutāṃ supūjitāṃ suduḥkhitaḥ patiguṇavegavarjitām || 16 ||

tatastadā bahuvidhabhāvitātmanaḥ kṛtātmano janakasutāṃ suvartmanaḥ |

apaśyato'bhavadatiduḥkhitaṃ manaḥ sucakṣuṣaḥ pravicarato mahātmanaḥ || 17 ||

ityārṣe śrīmadrāmāyaṇe vālmīkīya ādikāvye sundarakāṇḍe saptamassargaḥ ||