5.25 Sundarakanda - Panchavimsha Sargah

ॐ

5.25 සුන්දරකාණ්ඩ - පඤ්චවිංශ සර්ගඃ

Valmiki Sinhala

ශ්රීමද්වාල්මීකීය රාමායණේ සුන්දරකාණ්ඩම් .

අථ පඤ්චවිංශස්සර්ගඃ .

අථ තාසාං වදන්තීනාං පරුෂං දාරුණං බහු .

රාක්ෂසීනාමාසෞම්යානාං රුරෝද ජනකාත්මජා .. 1 ..

ඒවමුක්තා තු වෛදේහී රාක්ෂසීභිර්මනස්විනී .

උවාච පරමත්රස්තා භාෂ්පග්ද්ගදයා ගිරා .. 2 ..

න මානුෂී රාක්ෂසස්ය භාර්යා භවිතුමර්හති .

කාමං ඛාදත මාං සර්වා න කරිෂ්යාමි වෝ වචඃ .. 3 ..

සා රාක්ෂසීමධ්යගතා සීතා සුරසුතෝපමා .

න ශර්ම ලේභේ දුඃඛාර්තා රාවණේන ච තර්ජිතා .. 4 ..

වේපතේ ස්මාධිකං සීතා විශන්තී වාඞ්ගමාත්මනඃ .

වනේ යූථපරිභ්රෂ්ටා මෘගී කෝකෛරිවාර්දිතා .. 5 ..

සා ත්වශෝකස්ය විපුලාං ශාඛාමාලම්බ්ය පුෂ්පිතාම් .

චින්තයාමාස ශෝකේන භර්තාරං භග්නමානසා .. 6 ..

සා ස්නාපයන්තී විපුලෞ ස්තනෞ නේත්රජලස්රවෛඃ .

චින්තයන්තී න ශෝකස්ය තදාන්තමධිගච්ඡති .. 7 ..

සා වේපමානා පතිතා ප්රවාතේ කදලී යථා .

රාක්ෂසීනාං භයත්රස්තා විවර්ණවදනාභවත් .. 8 ..

තස්යාඃ සා දීර්ඝවිපුලා වේපන්ත්යා සීතයා තදා .

දදෘශේ කම්පිනී වේණී ව්යාලීව පරිසර්පතී .. 9 ..

සා නිඃශ්වසන්තී දුඃඛාර්තා ශෝකෝපහතචේතනා .

ආර්තා ව්යසෘජදශ්රූණි මෛථිලී විලලාප ච .. 10 ..

හා රාමේති ච දුඃඛාර්තා හා පුනර්ලක්ෂ්මණේති ච .

හා ශ්වශ්රු මම කෞසල්යේ හා සුමිත්රේති භාමිනී .. 11 ..

ලෝකප්රවාදඃ සත්යෝ(අ)යං පණ්ඩිතෛඃ සමුදාහෘතඃ .

අකාලේ දුර්ලභෝ මෘත්යුඃ ස්ත්රියා වා පුරුෂස්ය වා .. 12 ..

යදහමේවං ක්රූරාභී රාක්ෂසීභිරිහාර්දිතා .

ජීවාමි හීනා රාමේණ මුහූර්තමපි දුඃඛිතා .. 13 ..

ඒෂාල්පපුණ්යා කෘපණා විනශිෂ්යාම්යනාථවත් .

සමුද්රමධ්යේ නෞඃ පූර්ණා වායුවේගෛරිවාහතා .. 14 ..

භර්තාරං තමපශ්යන්තී රාක්ෂසීවශමාගතා .

සීදාමි ඛලු ශෝකේන කූලං තෝයහතං යථා .. 15 ..

තං පද්මදලපත්රාක්ෂං සිංහවික්රාන්තගාමිනම් .

ධන්යාඃ පශ්යන්ති මේ නාථං කෘතජ්ඤං ප්රියවාදිනම් .. 16 ..

සර්වථා තේන හීනායා රාමේණ විදිතාත්මනා .

තීක්ෂ්ණං විෂමිවාස්වාද්ය දුර්ලභං මම ජීවිතම් .. 17 ..

කීදෘශං තු මහාපාපං මයා ජන්මාන්තරේ කෘතම් .

යනේදං ප්රාප්යතේ දුඃඛං මයා ඝෝරං සුදාරුණම් .. 18 ..

ජීවිතං ත්යක්තුමිච්ඡාමි ශෝකේන මහතා වෘතා .

රාක්ෂසීභිශ්ච රක්ෂන්ත්යා රාමෝ නාසාද්යතේ මයා .. 19 ..

ධිගස්තු ඛලු මානුෂ්යං ධිගස්තු පරවශ්යතාම් .

න ශක්යං යත්පරිත්යක්තුමාත්මච්ඡන්දේන ජීවිතම් .. 20 ..

ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ සුන්දරකාණ්ඩේ පඤ්චවිංශස්සර්ගඃ ..

Roman (IAST) Transliteration

śrīmadvālmīkīya rāmāyaṇe sundarakāṇḍam |

atha pañcaviṃśassargaḥ |

atha tāsāṃ vadantīnāṃ paruṣaṃ dāruṇaṃ bahu |

rākṣasīnāmāsaumyānāṃ ruroda janakātmajā || 1 ||

evamuktā tu vaidehī rākṣasībhirmanasvinī |

uvāca paramatrastā bhāṣpagdgadayā girā || 2 ||

na mānuṣī rākṣasasya bhāryā bhavitumarhati |

kāmaṃ khādata māṃ sarvā na kariṣyāmi vo vacaḥ || 3 ||

sā rākṣasīmadhyagatā sītā surasutopamā |

na śarma lebhe duḥkhārtā rāvaṇena ca tarjitā || 4 ||

vepate smādhikaṃ sītā viśantī vāṅgamātmanaḥ |

vane yūthaparibhraṣṭā mṛgī kokairivārditā || 5 ||

sā tvaśokasya vipulāṃ śākhāmālambya puṣpitām |

cintayāmāsa śokena bhartāraṃ bhagnamānasā || 6 ||

sā snāpayantī vipulau stanau netrajalasravaiḥ |

cintayantī na śokasya tadāntamadhigacchati || 7 ||

sā vepamānā patitā pravāte kadalī yathā |

rākṣasīnāṃ bhayatrastā vivarṇavadanābhavat || 8 ||

tasyāḥ sā dīrghavipulā vepantyā sītayā tadā |

dadṛśe kampinī veṇī vyālīva parisarpatī || 9 ||

sā niḥśvasantī duḥkhārtā śokopahatacetanā |

ārtā vyasṛjadaśrūṇi maithilī vilalāpa ca || 10 ||

hā rāmeti ca duḥkhārtā hā punarlakṣmaṇeti ca |

hā śvaśru mama kausalye hā sumitreti bhāminī || 11 ||

lokapravādaḥ satyo'yaṃ paṇḍitaiḥ samudāhṛtaḥ |

akāle durlabho mṛtyuḥ striyā vā puruṣasya vā || 12 ||

yadahamevaṃ krūrābhī rākṣasībhirihārditā |

jīvāmi hīnā rāmeṇa muhūrtamapi duḥkhitā || 13 ||

eṣālpapuṇyā kṛpaṇā vinaśiṣyāmyanāthavat |

samudramadhye nauḥ pūrṇā vāyuvegairivāhatā || 14 ||

bhartāraṃ tamapaśyantī rākṣasīvaśamāgatā |

sīdāmi khalu śokena kūlaṃ toyahataṃ yathā || 15 ||

taṃ padmadalapatrākṣaṃ siṃhavikrāntagāminam |

dhanyāḥ paśyanti me nāthaṃ kṛtajñaṃ priyavādinam || 16 ||

sarvathā tena hīnāyā rāmeṇa viditātmanā |

tīkṣṇaṃ viṣamivāsvādya durlabhaṃ mama jīvitam || 17 ||

kīdṛśaṃ tu mahāpāpaṃ mayā janmāntare kṛtam |

yanedaṃ prāpyate duḥkhaṃ mayā ghoraṃ sudāruṇam || 18 ||

jīvitaṃ tyaktumicchāmi śokena mahatā vṛtā |

rākṣasībhiśca rakṣantyā rāmo nāsādyate mayā || 19 ||

dhigastu khalu mānuṣyaṃ dhigastu paravaśyatām |

na śakyaṃ yatparityaktumātmacchandena jīvitam || 20 ||

ityārṣe śrīmadrāmāyaṇe vālmīkīya ādikāvye sundarakāṇḍe pañcaviṃśassargaḥ ||