4.33 Kishkindhakanda - Trayastrimsha Sargah

ॐ

4.33 කිෂ්කින්ධාකාණ්ඩ - ත්රයස්ත්රිංශ සර්ගඃ

Valmiki Sinhala

ශ්රීමද්වාල්මීකීය රාමායණේ කිෂ්කින්ධාකාණ්ඩම් .

අථ ත්රයස්ත්රිංශස්සර්ගඃ .

අථ ප්රතිසමාදිෂ්ටෝ ලක්ෂ්මණඃ පරවීරහා .

ප්රවිවේශ ගුහාං ඝෝරාං කිෂ්කින්ධාං රාමශාසනාත් .. 1 ..

ද්වාරස්ථා හරයස්තත්ර මහාකායා මහාබලාඃ .

බභූවුර්ලක්ෂ්මණං දෘෂ්ට්වා සර්වේ ප්රාඤ්ජලය ස්ථිතාඃ .. 2 ..

නිශ්වසන්තං තු තං දෘෂ්ට්වා ක්රුද්ධං දශරථාත්මජම් .

බභූවුර්හරයස්ත්රස්තා න චෛනං පර්යවාරයන් .. 3 ..

ස තාං රත්නමයීං ශ්රීමාන්දිව්යාං පුෂ්පිතකානනාම් .

රම්යාං රත්නසමාකීර්ණාං දදර්ශ මහතීං ගුහාම් .. 4 ..

හර්ම්යප්රාසාදසම්බාධාං නානාපණ්යෝපශෝභිතාම් .

සර්වකාමඵලෛර්වෘක්ෂෛඃ පුෂ්පිතෛරුපශෝභිතාම් .. 5 ..

දේවගන්ධර්වපුත්රෛශ්ච වානරෛඃ කාමරූපිභිඃ .

දිව්යමාල්යාම්බරධරෛ ශ්ශෝභිතාං ප්රියදර්ශනෛඃ .. 6 ..

චන්දනාගරුපද්මානාං ගන්ධෛස්සුරභිගන්ධිනාම් .

මෛරේයාණාං මධූනාං ච සම්මෝදිතමහාපථාම් .. 7 ..

වින්ධ්යමේරුගිරිප්රඛ්යෛඃ ප්රාසාදෛර්නෛකභූමිභිඃ .

දදර්ශ ගිරිනද්යශ්ච විමලාස්තත්ර රාඝවඃ .. 8 ..

අඞ්ගදස්ය ගෘහං රම්යං මෛන්දස්ය ද්විවිධස්ය ච .

ගවයස්ය ගවාක්ෂස්ය ගජස්ය ශරභස්ය ච .. 9 ..

විද්යුන්මාලේශ්ච සම්පාතේ ස්සූර්යාක්ෂස්ය හනූමතඃ .

වීරබාහෝ ස්සුබාහෝශ්ච නලස්ය ච මහාත්මනඃ .. 10 ..

කුමුදස්ය සුෂේණස්ය තාරජාම්බවතෝස්තථා .

දධිවක්ත්රස්ය නීලස්ය සුපාටලසුනේත්රයෝඃ .. 11 ..

ඒතේෂාං කපිමුඛ්යානාං රාජමාර්ගේ මහාත්මනාම් .

දදර්ශ ගෘහමුඛ්යානි මහාසාරාණි ලක්ෂ්මණඃ .. 12 ..

පාණ්ඩුරාභ්රප්රකාශානි දිව්යමාල්යයුතානි ච .

ප්රභූතධනධාන්යානි ස්ත්රීරත්නෛ ශ්ශෝභිතානි ච .. 13 ..

පාණ්ඩුරේණ තු සාලේන පරික්ෂිප්තං දුරාසදම් .

වානරේන්ද්රගෘහං රම්යං මහේන්ද්රසදනෝපමම් .. 14 ..

ශුක්ලෛඃ ප්රාසාදශිඛරෛඃ කෛලාසශිඛරෝපමෛඃ .

සර්වකාමඵලෛර්වෘක්ෂෛඃ පුෂ්පිතෛරුපශෝභිතම් .. 15 ..

මහේන්ද්රදත්තෛශ්ශ්රීමද්භිර්නීලජීමූතසන්නිභෛඃ .

දිව්යපුෂ්පඵලෛර්වෘක්ෂෛශීතච්ඡායෛර්මනෝරමෛඃ .. 16 ..

හරිභිස්සංවෘතද්වාරං බලිභිශ්ශස්ත්රපාණිභිඃ .

දිව්යමාල්යාවෘතං ශුභ්රං තප්තකාඤ්චනතෝරණම් .. 17 ..

සුග්රීවස්ය ගෘහං රම්යං ප්රවිවේශ මහාබලඃ .

අවාර්යමාණස්සෞමිත්රිර්මහාභ්රමිව භාස්කරඃ .. 18 ..

ස සප්ත කක්ෂ්යා ධර්මාත්මා නානාජනසමාකුලාඃ .

ප්රවිශ්ය සුමහද්ගගුප්තං දදර්ශාන්තඃපුරං මහත් .. 19 ..

හෛමරාජතපර්යඞ්කෛර්බහුභිශ්ච වරාසනෛඃ .

මහාර්හාස්තරණෝපේතෛස්තත්ර තත්රෝපශෝභිතම් .. 20 ..

ප්රවිශන්නේව සතතං ශුශ්රාව මධුරස්වරම් .

තන්ත්රීගීතසමාකීර්ණං සමගීතපදාක්ෂරම් .. 21 ..

බහ්වීශ්ච විවිධාකාරා රූපයෞවනගර්විතාඃ .

ස්ත්රියස්සුග්රීවභවනේ දදර්ශ සුමහාබලඃ .. 22 ..

දෘෂ්ට්වා(අ)භිජනසම්පන්නාශ්චිත්රමාල්යකෘතස්රජඃ .

ඵලමාල්යකෘතව්යග්රා භූෂණෝත්තමභූෂිතාඃ .. 23 ..

නාතෘප්තාන්නාපි චාව්යග්රාන්නානුදාත්තපරිච්ඡදාන් .

සුග්රීවානුචරාංශ්චාපි ලක්ෂයාමාස ලක්ෂ්මණඃ .. 24 ..

කූජිතං නූපුරාණාං ච කාඤ්චීනාං නිනදං තථා .

සන්නිශම්ය තත ශ්රීමාන්සෞමිත්රිර්ලජ්ජිතෝ(අ)භවත් .. 25 ..

රෝෂවේගප්රකුපිතශශ්රුත්වා චාභරණස්වනම් .

චකාර ජ්යාස්වනං වීරෝ දිශශ්ශබ්දේන පූරයන් .. 26 ..

චාරිත්රේණ මහාබාහුරපකෘෂ්ට ස්සලක්ෂ්මණඃ .

තස්ථාවේකාන්තමාශ්රිත්ය රාමකෝපසමන්විතඃ .. 27 ..

තේන චාපස්වනේනාථ සුග්රීවඃ ප්ලවගාධිපඃ .

විජ්ඤායා(අ)ගමනං ත්රස්ත ස්සඤ්චචාල වරාසනාත් .. 28 ..

අඞ්ගදේන යථා මහ්යං පුරස්තාත්ප්රතිවේදිතම් .

සුව්යක්තමේෂ සම්ප්රාප්ත ස්සෞමිත්රිර්භ්රාතෘවත්සලඃ .. 29 ..

අඞ්ගදේන සමාඛ්යාතං ජ්යාස්වනේන ච වානරඃ .

බුබුධේ ලක්ෂ්මණං ප්රාප්තං මුඛං චාස්යව්යශුෂ්යත .. 30 ..

තතස්තාරාං හරිශ්රේෂ්ඨස්සුග්රීවඃ ප්රියදර්ශනාම් .

උවාච හිතමව්යග්රස්ත්රාස සම්භ්රාන්තමානසඃ .. 31 ..

කින්නු තත්කාරණං සුභ්රු ප්රකෘත්යා මෘදුමානසඃ .

සරෝෂ ඉව සම්ප්රාප්තෝ යේනායං රාඝවානුජඃ .. 32 ..

කිං පශ්යසි කුමාරස්ය රෝෂස්ථානමනින්දිතේ .

න ඛල්වකාරණේ කෝපමාහරේන්නරසත්තමඃ .. 33 ..

යදස්ය කෘතමස්මාභිර්බුධ්යසේ කිඤ්චිදප්රියම් .

තදබුද්ධ්යා සම්ප්රධාර්යාශු ක්ෂිප්රමර්හසි භාෂිතුම් .. 34 ..

අථවා ස්වයමේවෛනං ද්රෂ්ටුමර්හසි භාමිනි .

වචනෛ ස්සාන්ත්වයුක්තෛශ්ච ප්රසාදයිතුමර්හසි .. 35 ..

ත්වද්දර්ශන විශුද්ධාත්මා න ස කෝපං කරිෂ්යති .

න හි ස්ත්රීෂු මහාත්මානඃ ක්වචිත්කුර්වන්ති දාරුණම් .. 36 ..

ත්වයා සාන්ත්වෛරුපක්රාන්තං ප්රසන්නේන්ද්රියමානසම් .

තතඃ කමලපත්රාක්ෂං ද්රක්ෂ්යාම්යහමරින්දමම් .. 37 ..

සා ප්රස්ඛලන්තී මදවිහ්වලාක්ෂී ප්රලම්බකාඤ්චීගුණ හේමසූත්රා .

සලක්ෂණා ලක්ෂ්මණසන්නිධානං ජගාම තාරා නමිතාඞ්ගයෂ්ටිඃ .. 38 ..

ස තාං සමීක්ෂ්යෛව හරීශපන්තීං තස්ථාවුදාසීනතයා මහාත්මා .

අවාඞ්මුඛෝ(අ)භූන්මනුජේන්ද්රපුත්රඃ ස්ත්රීසන්නිකර්ෂාද්විනිවෘත්තකෝපඃ .. 39 ..

සා පානයෝගාද්විනිවෘත්තලජ්ජා දෘෂ්ටිප්රසාදාච්ච නරේන්ද්රසූනෝඃ .

උවාච තාරා ප්රණයප්රගල්භං වාක්යං මහාර්ථං පරිසාන්ත්වපූර්වම් .. 40 ..

කිං කෝපමූලං මනුජේන්ද්රපුත්ර කස්තේ න සන්තිෂ්ඨති වාඞ්නිදේශේ .

ක ශ්ශුෂ්කවෘක්ෂං වනමාපතන්තං දවාග්නිමාසීදති නිර්විශඞ්කඃ .. 41 ..

ස තස්යා වචනං ශ්රුත්වා සාන්ත්වපූර්වමශඞ්කිතම් .

භූයඃ ප්රණයදෘෂ්ටාර්ථං ලක්ෂ්මණෝ වාක්යමබ්රවීත් .. 42 ..

කිමයං කාමවෘත්තස්තේ ලුප්තධර්මාර්ථසඞ්ග්රහඃ .

භර්තා භර්තෘහිතේ යුක්තේ න චෛනමවබුද්ධ්යසේ .. 43 ..

න චින්තයති රාජ්යාර්ථං නාස්මාන් ශෝකපරායණාන් .

සාමාත්යපරිෂත්තාරේ පානමේවෝපසේවතේ .. 44 ..

ස මාසාංශ්චතුරඃ කෘත්වා ප්රමාණං ප්ලවගේශ්වරඃ .

ව්යතීතාං ස්තාන්මදව්යග්රෝ විහරන්නාවබුධ්යතේ .. 45 ..

න හි ධර්මාර්ථසිද්ධ්යර්ථං පානමේවං ප්රශස්යතේ .

පානාදර්ථශ්ච ධර්මශ්ච කාමශ්ච පරිහීයතේ .. 46 ..

ධර්මලෝපෝ මහාංස්තාවත්කෘතේ හ්යප්රතිකුර්වතඃ .

අර්ථලෝපශ්ච මිත්රස්ය නාශේ ගුණවතෝ මහාන් .. 47 ..

මිත්රං හ්යර්ථගුණශ්රේෂ්ඨං සත්යධර්මපරායණම් .

තද්ද්වයං තු පරිත්යක්තං න තු ධර්මේ ව්යවස්ථිතම් .. 48 ..

තදේවං ප්රස්තුතේ කාර්යේ කාර්යමස්මාභිරුත්තරම් .

යත්කාර්යං කාර්යතත්ත්වජ්ඤේ තදුදාහර්තුමර්හසි .. 49 ..

සා තස්ය ධර්මාර්ථසමාධියුක්තං නිශම්ය වාක්යං මධුරස්වභාවම් .

තාරා ගතාර්ථේ මනුජේන්ද්රකාර්යේ විශ්වාසයුක්තං තමුවාච භූයඃ .. 50 ..

න කෝපකාලඃ ක්ෂිතිපාලපුත්ර න චාති කෝප ස්ස්වජනේ විධේයඃ .

ත්වදර්ථකාමස්ය ජනස්ය තස්ය ප්රමාදමප්යර්හසි වීර සෝඪුම් .. 51 ..

කෝපං කථං නාම ගුණප්රකෘෂ්ටඃ කුමාර කුර්යාදපකෘෂ්ටසත්ත්වේ .

කස්ත්වද්විධඃ කෝපවශං හි ගච්ඡේ ත්සත්ත්වාවරුද්ධස්තපසඃ ප්රසූතිඃ .. 52 ..

ජානාමි රෝෂං හරිවීරබන්ධෝ ර්ජානාමි කාර්යස්ය ච කාලසඞ්ගම් .

ජානාමි කාර්යං ත්වයි යත්කෘතං න ස්තච්චාපි ජානාමි යදත්ර කාර්යම් .. 53 ..

තච්චාපි ජානාමි යථවිෂහ්යං බලං නරශ්රේෂ්ඨ ශරීරජස්ය .

ජානාමි යස්මිංශ්ච ජනේ(අ)වබද්ධං කාමේන සුග්රීවමසක්තමද්ය .. 54 ..

න කාමතන්ත්රේ තව බුද්ධිරස්ති ත්වං වෛ යථා මන්යුවශං ප්රපන්නඃ .

න දේශකාලෞ හි න චාර්ථධර්මා වවේක්ෂතේ කාමරතිර්මනුෂ්යඃ .. 55 ..

තං කාමවෘත්තං මම සන්නිකෘෂ්ටං කාමාභියෝගාච්ච නිවෘත්තලජ්ජම් .

ක්ෂමස්ව තාවත්පරවීරහන්ත ස්ත්වද්භ්රාතරං වානරවංශනාථම් .. 56 ..

මහර්ෂයෝ ධර්මතපෝ(අ)භිකාමාඃ කාමානුකාමාඃ ප්රතිබද්ධමෝහාඃ .

අයං ප්රකෘත්යා චපලඃ කපිස්තු කථං න සජ්ජේත සුඛේෂු රාජා .. 57 ..

ඉත්යේවමුක්ත්වා වචනං මහාර්ථං සා වානරී ලක්ෂ්මණමප්රමේයම් .

පුන ස්සඛේදං මදවිහ්වලඤ්ච භර්තුර්හිතං වාක්යමිදං බභාෂේ .. 58 ..

උද්යෝගස්තු චිරාජ්ඤප්ත ස්සුග්රීවේණ නරෝත්තම .

කාමස්යාපි විධේයේන තවාර්ථප්රතිසාධනේ .. 59 ..

ආගතා හි මහාවීර්යා හරයඃ කාමරූපිණඃ .

කෝටීශතසහස්රාණි නානානගනිවාසිනඃ .. 60 ..

තදාගච්ඡ මහාබාහෝ චාරිත්රං රක්ෂිතං ත්වයා .

අච්ඡලං මිත්රභාවේන සතාං දාරාවලෝකනම් .. 61 ..

තාරයා චාභ්යනුජ්ඤාතස්ත්වරයා චාපි චෝදිතඃ .

ප්රවිවේශ මහාබාහුරභ්යන්තරමරින්දමඃ .. 62 ..

තත ස්සුග්රීවමාසීනං කාඤ්චනේ පරමාසනේ .

මහාර්හාස්තරණෝපේතේ දදර්ශාදිත්යසන්නිභම් .. 63 ..

දිව්යාභණචිත්රාඞ්ගං දිව්යරූපං යශස්විනම් .

දිව්යමාල්යාම්බරධරං මහේන්ද්රමිව දුර්ජයම් .. 64 ..

දිව්යාභරණමාලාභිඃ ප්රමදාභි ස්සමාවෘතම් .

සංරබ්ධතරරක්තාක්ෂෝ බභූවාන්තකසන්නිභඃ .. 65 ..

රුමාං තු වීර පරිරභ්ය ගාඪං වරාසනස්ථෝ වරහේමවර්ණඃ .

දදර්ශ සෞමිත්රිමදීනසත්ත්වං විශාලනේත්රස්සුවිශාලනේත්රම් .. 66 ..

ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ කිෂ්කින්ධාකාණ්ඩේ ත්රයස්ත්රිංශස්සර්ගඃ ..

Roman (IAST) Transliteration

śrīmadvālmīkīya rāmāyaṇe kiṣkindhākāṇḍam |

atha trayastriṃśassargaḥ |

atha pratisamādiṣṭo lakṣmaṇaḥ paravīrahā |

praviveśa guhāṃ ghorāṃ kiṣkindhāṃ rāmaśāsanāt || 1 ||

dvārasthā harayastatra mahākāyā mahābalāḥ |

babhūvurlakṣmaṇaṃ dṛṣṭvā sarve prāñjalaya sthitāḥ || 2 ||

niśvasantaṃ tu taṃ dṛṣṭvā kruddhaṃ daśarathātmajam |

babhūvurharayastrastā na cainaṃ paryavārayan || 3 ||

sa tāṃ ratnamayīṃ śrīmāndivyāṃ puṣpitakānanām |

ramyāṃ ratnasamākīrṇāṃ dadarśa mahatīṃ guhām || 4 ||

harmyaprāsādasambādhāṃ nānāpaṇyopaśobhitām |

sarvakāmaphalairvṛkṣaiḥ puṣpitairupaśobhitām || 5 ||

devagandharvaputraiśca vānaraiḥ kāmarūpibhiḥ |

divyamālyāmbaradharai śśobhitāṃ priyadarśanaiḥ || 6 ||

candanāgarupadmānāṃ gandhaissurabhigandhinām |

maireyāṇāṃ madhūnāṃ ca sammoditamahāpathām || 7 ||

vindhyamerugiriprakhyaiḥ prāsādairnaikabhūmibhiḥ |

dadarśa girinadyaśca vimalāstatra rāghavaḥ || 8 ||

aṅgadasya gṛhaṃ ramyaṃ maindasya dvividhasya ca |

gavayasya gavākṣasya gajasya śarabhasya ca || 9 ||

vidyunmāleśca sampāte ssūryākṣasya hanūmataḥ |

vīrabāho ssubāhośca nalasya ca mahātmanaḥ || 10 ||

kumudasya suṣeṇasya tārajāmbavatostathā |

dadhivaktrasya nīlasya supāṭalasunetrayoḥ || 11 ||

eteṣāṃ kapimukhyānāṃ rājamārge mahātmanām |

dadarśa gṛhamukhyāni mahāsārāṇi lakṣmaṇaḥ || 12 ||

pāṇḍurābhraprakāśāni divyamālyayutāni ca |

prabhūtadhanadhānyāni strīratnai śśobhitāni ca || 13 ||

pāṇḍureṇa tu sālena parikṣiptaṃ durāsadam |

vānarendragṛhaṃ ramyaṃ mahendrasadanopamam || 14 ||

śuklaiḥ prāsādaśikharaiḥ kailāsaśikharopamaiḥ |

sarvakāmaphalairvṛkṣaiḥ puṣpitairupaśobhitam || 15 ||

mahendradattaiśśrīmadbhirnīlajīmūtasannibhaiḥ |

divyapuṣpaphalairvṛkṣaiśītacchāyairmanoramaiḥ || 16 ||

haribhissaṃvṛtadvāraṃ balibhiśśastrapāṇibhiḥ |

divyamālyāvṛtaṃ śubhraṃ taptakāñcanatoraṇam || 17 ||

sugrīvasya gṛhaṃ ramyaṃ praviveśa mahābalaḥ |

avāryamāṇassaumitrirmahābhramiva bhāskaraḥ || 18 ||

sa sapta kakṣyā dharmātmā nānājanasamākulāḥ |

praviśya sumahadgaguptaṃ dadarśāntaḥpuraṃ mahat || 19 ||

haimarājataparyaṅkairbahubhiśca varāsanaiḥ |

mahārhāstaraṇopetaistatra tatropaśobhitam || 20 ||

praviśanneva satataṃ śuśrāva madhurasvaram |

tantrīgītasamākīrṇaṃ samagītapadākṣaram || 21 ||

bahvīśca vividhākārā rūpayauvanagarvitāḥ |

striyassugrīvabhavane dadarśa sumahābalaḥ || 22 ||

dṛṣṭvā'bhijanasampannāścitramālyakṛtasrajaḥ |

phalamālyakṛtavyagrā bhūṣaṇottamabhūṣitāḥ || 23 ||

nātṛptānnāpi cāvyagrānnānudāttaparicchadān |

sugrīvānucarāṃścāpi lakṣayāmāsa lakṣmaṇaḥ || 24 ||

kūjitaṃ nūpurāṇāṃ ca kāñcīnāṃ ninadaṃ tathā |

sanniśamya tata śrīmānsaumitrirlajjito'bhavat || 25 ||

roṣavegaprakupitaśaśrutvā cābharaṇasvanam |

cakāra jyāsvanaṃ vīro diśaśśabdena pūrayan || 26 ||

cāritreṇa mahābāhurapakṛṣṭa ssalakṣmaṇaḥ |

tasthāvekāntamāśritya rāmakopasamanvitaḥ || 27 ||

tena cāpasvanenātha sugrīvaḥ plavagādhipaḥ |

vijñāyā'gamanaṃ trasta ssañcacāla varāsanāt || 28 ||

aṅgadena yathā mahyaṃ purastātprativeditam |

suvyaktameṣa samprāpta ssaumitrirbhrātṛvatsalaḥ || 29 ||

aṅgadena samākhyātaṃ jyāsvanena ca vānaraḥ |

bubudhe lakṣmaṇaṃ prāptaṃ mukhaṃ cāsyavyaśuṣyata || 30 ||

tatastārāṃ hariśreṣṭhassugrīvaḥ priyadarśanām |

uvāca hitamavyagrastrāsa sambhrāntamānasaḥ || 31 ||

kinnu tatkāraṇaṃ subhru prakṛtyā mṛdumānasaḥ |

saroṣa iva samprāpto yenāyaṃ rāghavānujaḥ || 32 ||

kiṃ paśyasi kumārasya roṣasthānamanindite |

na khalvakāraṇe kopamāharennarasattamaḥ || 33 ||

yadasya kṛtamasmābhirbudhyase kiñcidapriyam |

tadabuddhyā sampradhāryāśu kṣipramarhasi bhāṣitum || 34 ||

athavā svayamevainaṃ draṣṭumarhasi bhāmini |

vacanai ssāntvayuktaiśca prasādayitumarhasi || 35 ||

tvaddarśana viśuddhātmā na sa kopaṃ kariṣyati |

na hi strīṣu mahātmānaḥ kvacitkurvanti dāruṇam || 36 ||

tvayā sāntvairupakrāntaṃ prasannendriyamānasam |

tataḥ kamalapatrākṣaṃ drakṣyāmyahamarindamam || 37 ||

sā praskhalantī madavihvalākṣī pralambakāñcīguṇa hemasūtrā |

salakṣaṇā lakṣmaṇasannidhānaṃ jagāma tārā namitāṅgayaṣṭiḥ || 38 ||

sa tāṃ samīkṣyaiva harīśapantīṃ tasthāvudāsīnatayā mahātmā |

avāṅmukho'bhūnmanujendraputraḥ strīsannikarṣādvinivṛttakopaḥ || 39 ||

sā pānayogādvinivṛttalajjā dṛṣṭiprasādācca narendrasūnoḥ |

uvāca tārā praṇayapragalbhaṃ vākyaṃ mahārthaṃ parisāntvapūrvam || 40 ||

kiṃ kopamūlaṃ manujendraputra kaste na santiṣṭhati vāṅnideśe |

ka śśuṣkavṛkṣaṃ vanamāpatantaṃ davāgnimāsīdati nirviśaṅkaḥ || 41 ||

sa tasyā vacanaṃ śrutvā sāntvapūrvamaśaṅkitam |

bhūyaḥ praṇayadṛṣṭārthaṃ lakṣmaṇo vākyamabravīt || 42 ||

kimayaṃ kāmavṛttaste luptadharmārthasaṅgrahaḥ |

bhartā bhartṛhite yukte na cainamavabuddhyase || 43 ||

na cintayati rājyārthaṃ nāsmān śokaparāyaṇān |

sāmātyapariṣattāre pānamevopasevate || 44 ||

sa māsāṃścaturaḥ kṛtvā pramāṇaṃ plavageśvaraḥ |

vyatītāṃ stānmadavyagro viharannāvabudhyate || 45 ||

na hi dharmārthasiddhyarthaṃ pānamevaṃ praśasyate |

pānādarthaśca dharmaśca kāmaśca parihīyate || 46 ||

dharmalopo mahāṃstāvatkṛte hyapratikurvataḥ |

arthalopaśca mitrasya nāśe guṇavato mahān || 47 ||

mitraṃ hyarthaguṇaśreṣṭhaṃ satyadharmaparāyaṇam |

taddvayaṃ tu parityaktaṃ na tu dharme vyavasthitam || 48 ||

tadevaṃ prastute kārye kāryamasmābhiruttaram |

yatkāryaṃ kāryatattvajñe tadudāhartumarhasi || 49 ||

sā tasya dharmārthasamādhiyuktaṃ niśamya vākyaṃ madhurasvabhāvam |

tārā gatārthe manujendrakārye viśvāsayuktaṃ tamuvāca bhūyaḥ || 50 ||

na kopakālaḥ kṣitipālaputra na cāti kopa ssvajane vidheyaḥ |

tvadarthakāmasya janasya tasya pramādamapyarhasi vīra soḍhum || 51 ||

kopaṃ kathaṃ nāma guṇaprakṛṣṭaḥ kumāra kuryādapakṛṣṭasattve |

kastvadvidhaḥ kopavaśaṃ hi gacche tsattvāvaruddhastapasaḥ prasūtiḥ || 52 ||

jānāmi roṣaṃ harivīrabandho rjānāmi kāryasya ca kālasaṅgam |

jānāmi kāryaṃ tvayi yatkṛtaṃ na staccāpi jānāmi yadatra kāryam || 53 ||

taccāpi jānāmi yathaviṣahyaṃ balaṃ naraśreṣṭha śarīrajasya |

jānāmi yasmiṃśca jane'vabaddhaṃ kāmena sugrīvamasaktamadya || 54 ||

na kāmatantre tava buddhirasti tvaṃ vai yathā manyuvaśaṃ prapannaḥ |

na deśakālau hi na cārthadharmā vavekṣate kāmaratirmanuṣyaḥ || 55 ||

taṃ kāmavṛttaṃ mama sannikṛṣṭaṃ kāmābhiyogācca nivṛttalajjam |

kṣamasva tāvatparavīrahanta stvadbhrātaraṃ vānaravaṃśanātham || 56 ||

maharṣayo dharmatapo'bhikāmāḥ kāmānukāmāḥ pratibaddhamohāḥ |

ayaṃ prakṛtyā capalaḥ kapistu kathaṃ na sajjeta sukheṣu rājā || 57 ||

ityevamuktvā vacanaṃ mahārthaṃ sā vānarī lakṣmaṇamaprameyam |

puna ssakhedaṃ madavihvalañca bharturhitaṃ vākyamidaṃ babhāṣe || 58 ||

udyogastu cirājñapta ssugrīveṇa narottama |

kāmasyāpi vidheyena tavārthapratisādhane || 59 ||

āgatā hi mahāvīryā harayaḥ kāmarūpiṇaḥ |

koṭīśatasahasrāṇi nānānaganivāsinaḥ || 60 ||

tadāgaccha mahābāho cāritraṃ rakṣitaṃ tvayā |

acchalaṃ mitrabhāvena satāṃ dārāvalokanam || 61 ||

tārayā cābhyanujñātastvarayā cāpi coditaḥ |

praviveśa mahābāhurabhyantaramarindamaḥ || 62 ||

tata ssugrīvamāsīnaṃ kāñcane paramāsane |

mahārhāstaraṇopete dadarśādityasannibham || 63 ||

divyābhaṇacitrāṅgaṃ divyarūpaṃ yaśasvinam |

divyamālyāmbaradharaṃ mahendramiva durjayam || 64 ||

divyābharaṇamālābhiḥ pramadābhi ssamāvṛtam |

saṃrabdhatararaktākṣo babhūvāntakasannibhaḥ || 65 ||

rumāṃ tu vīra parirabhya gāḍhaṃ varāsanastho varahemavarṇaḥ |

dadarśa saumitrimadīnasattvaṃ viśālanetrassuviśālanetram || 66 ||

ityārṣe śrīmadrāmāyaṇe vālmīkīya ādikāvye kiṣkindhākāṇḍe trayastriṃśassargaḥ ||