4.14 Kishkindhakanda - Chaturdasha Sargah

ॐ

4.14 කිෂ්කින්ධාකාණ්ඩ - චතුර්දශ සර්ගඃ

Valmiki Sinhala

ශ්රීමද්වාල්මීකීය රාමායණේ කිෂ්කින්ධාකාණ්ඩම් .

අථ චතුර්දශස්සර්ගඃ .

සර්වේ තේ ත්වරිතං ගත්වා කිෂ්කින්ධාං වාලි පාලිතාම් .

වෘක්ෂෛරාත්මානමාවෘත්ය ව්යතිෂ්ඨන් ගහනේ වනේ .. 1 ..

විචාර්ය සර්වතෝ දෘෂ්ටිං කානනේ කානනප්රියඃ .

සුග්රීවෝ විපුලග්රීවඃ ක්රෝධමාහාරයද්භෘශම් .. 2 ..

තතස්ස නිනදං ඝෝරං කෘත්වා යුද්ධාය චාහ්වයත් .

පරිවාරෛඃ පරිවෘතෝ නාදෛර්භින්දන්නිවාම්බරම් .. 3 ..

ගර්ජන්නිව මහාමේඝෝ වායුවේගපුරස්සරඃ .

අථ බාලාර්කසදෘශෝ දෘප්තසිංහගතිස්තදා .. 4 ..

දෘෂ්ට්වා රාමං ක්රියාදක්ෂං සුග්රීවෝ වාක්යමබ්රවීත් .

හරිවාගුරයා ව්යාප්තාං තප්තකාඤ්චනතෝරණාම් .

ප්රාප්තාඃ ස්ම ධ්වජයන්ත්රාඪ්යාං කිෂ්කින්ධාං වාලිනඃ පුරීම් .. 5 ..

ප්රතිජ්ඤා යා ත්වයා වීර කෘතා වාලිවධේ පුරා .

සඵලාං කුරු තාං ක්ෂිප්රං ලතාං කාල ඉවාගතඃ .. 6 ..

ඒවමුක්තස්තු ධර්මාත්මා සුග්රීවේණ ස රාඝවඃ .

තමේවෝවාච වචනං සුග්රීවං ශත්රුසූදනඃ .. 7 ..

කෘතාභිජ්ඤානචිහ්නස්ත්ව මනයා ගජසාහ්වයා .

ලක්ෂ්මණේන සමුත්පාට්ය යෛෂා කණ්ඨේ කෘතා තව .. 8 ..

ශෝභසේ(අ)හ්යධිකං වීර ලතයා කණ්ඨසක්තයා .

විපරීත ඉවාකාශේ සූර්යෝ නක්ෂත්රමාලයා .. 9 ..

අද්ය වාලිසමුත්ථං තේ භයං වෛරං ච වානර .

ඒකේනාහං ප්රමෝක්ෂ්යාමි බාණමෝක්ෂේණ සංයුගේ .. 10 ..

මම දර්ශය සුග්රීව වෛරිණං භ්රාතෘරූපිණම් .

වාලී විනිහතෝ යාවද්වනේ පාංසුෂු වේෂ්ටතේ .. 11 ..

යදි දෘෂ්ටිපථං ප්රාප්තෝ ජීවන්ස විනිවර්තතේ .

තතෝ දෝෂේණ මා ගච්ඡේත්සද්යෝ ගර්හේච්ච මා භවාන් .. 12 ..

ප්රත්යක්ෂං සප්ත තේ සාලා මයා බාණේන දාරිතාඃ .

තේනාවේහි බලේනාද්ය වාලිනං නිහතං මයා .. 13 ..

අනෘතං නෝක්තපූර්වං මේ වීර කෘච්ඡ්රේ(අ)පි තිෂ්ටතා .

ධර්මලෝභපරීතේන න ච වක්ෂ්යේ කථඤ්චන .. 14 ..

සඵලාං ච කරිෂ්යාමි ප්රතිජ්ඤාං ජහි සම්භ්රමම් .

ප්රසූතං කලමං ක්ෂේත්රේ වර්ෂේණේව ශතක්රතුඃ .. 15 ..

තදාහ්වානනිමිත්තං ත්වං වාලිනෝ හේමමාලිනඃ .

සුග්රීව කුරු තං ශබ්දං නිෂ්පතේද්යේන වානරඃ .. 16 ..

ජිතකාශී බලශ්ලාඝී ත්වයා චාධර්ෂිතඃ පුරා .

නිෂ්පතිෂ්යත්යසඞ්ගේන වාලී ස ප්රියසංයුගඃ .. 17 ..

රිපූණාං ධර්ෂිණ ශූරා මර්ෂයන්ති න සංයුගේ .

ජානන්තස්තු ස්වකං වීර්යං ස්ත්රීසමක්ෂං විශේෂතඃ .. 18 ..

ස තු රාමවචශ්ශ්රුත්වා සුග්රීවෝ හේමපිඞ්ගලඃ .

නනර්ද ක්රූරනාදේන විනිර්භින්දන්නිවාම්බරම් .. 19 ..

තස්ය ශබ්දේන විත්රස්තා ගාවෝ යාන්ති හතප්රභාඃ .

රාජදෝෂපරාමෘෂ්ටාඃ කුලස්ත්රිය ඉවාකුලාඃ .. 20 ..

ද්රවන්ති ච මෘගාශ්ශීඝ්රං භග්නා ඉව රණේ හයාඃ .

පතන්ති ච ඛගා භූමෞ ක්ෂීණපුණ්යා ඉව ග්රහාඃ .. 21 ..

තතස්සජීමූතගණප්රණාදෝ නාදං හ්යමුඤ්චත්ත්වරයා ප්රතීතඃ .

සූර්යාත්මජශ්ශෞර්යවිවෘද්ධතේජාඃ සරිත්පතිර්වා(අ)නිලචඤ්චලෝර්මිඃ .. 22 ..

ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ කිෂ්කින්ධාකාණ්ඩේ චතුර්දශස්සර්ගඃ ..

Roman (IAST) Transliteration

śrīmadvālmīkīya rāmāyaṇe kiṣkindhākāṇḍam |

atha caturdaśassargaḥ |

sarve te tvaritaṃ gatvā kiṣkindhāṃ vāli pālitām |

vṛkṣairātmānamāvṛtya vyatiṣṭhan gahane vane || 1 ||

vicārya sarvato dṛṣṭiṃ kānane kānanapriyaḥ |

sugrīvo vipulagrīvaḥ krodhamāhārayadbhṛśam || 2 ||

tatassa ninadaṃ ghoraṃ kṛtvā yuddhāya cāhvayat |

parivāraiḥ parivṛto nādairbhindannivāmbaram || 3 ||

garjanniva mahāmegho vāyuvegapurassaraḥ |

atha bālārkasadṛśo dṛptasiṃhagatistadā || 4 ||

dṛṣṭvā rāmaṃ kriyādakṣaṃ sugrīvo vākyamabravīt |

harivāgurayā vyāptāṃ taptakāñcanatoraṇām |

prāptāḥ sma dhvajayantrāḍhyāṃ kiṣkindhāṃ vālinaḥ purīm || 5 ||

pratijñā yā tvayā vīra kṛtā vālivadhe purā |

saphalāṃ kuru tāṃ kṣipraṃ latāṃ kāla ivāgataḥ || 6 ||

evamuktastu dharmātmā sugrīveṇa sa rāghavaḥ |

tamevovāca vacanaṃ sugrīvaṃ śatrusūdanaḥ || 7 ||

kṛtābhijñānacihnastva manayā gajasāhvayā |

lakṣmaṇena samutpāṭya yaiṣā kaṇṭhe kṛtā tava || 8 ||

śobhase'hyadhikaṃ vīra latayā kaṇṭhasaktayā |

viparīta ivākāśe sūryo nakṣatramālayā || 9 ||

adya vālisamutthaṃ te bhayaṃ vairaṃ ca vānara |

ekenāhaṃ pramokṣyāmi bāṇamokṣeṇa saṃyuge || 10 ||

mama darśaya sugrīva vairiṇaṃ bhrātṛrūpiṇam |

vālī vinihato yāvadvane pāṃsuṣu veṣṭate || 11 ||

yadi dṛṣṭipathaṃ prāpto jīvansa vinivartate |

tato doṣeṇa mā gacchetsadyo garhecca mā bhavān || 12 ||

pratyakṣaṃ sapta te sālā mayā bāṇena dāritāḥ |

tenāvehi balenādya vālinaṃ nihataṃ mayā || 13 ||

anṛtaṃ noktapūrvaṃ me vīra kṛcchre'pi tiṣṭatā |

dharmalobhaparītena na ca vakṣye kathañcana || 14 ||

saphalāṃ ca kariṣyāmi pratijñāṃ jahi sambhramam |

prasūtaṃ kalamaṃ kṣetre varṣeṇeva śatakratuḥ || 15 ||

tadāhvānanimittaṃ tvaṃ vālino hemamālinaḥ |

sugrīva kuru taṃ śabdaṃ niṣpatedyena vānaraḥ || 16 ||

jitakāśī balaślāghī tvayā cādharṣitaḥ purā |

niṣpatiṣyatyasaṅgena vālī sa priyasaṃyugaḥ || 17 ||

ripūṇāṃ dharṣiṇa śūrā marṣayanti na saṃyuge |

jānantastu svakaṃ vīryaṃ strīsamakṣaṃ viśeṣataḥ || 18 ||

sa tu rāmavacaśśrutvā sugrīvo hemapiṅgalaḥ |

nanarda krūranādena vinirbhindannivāmbaram || 19 ||

tasya śabdena vitrastā gāvo yānti hataprabhāḥ |

rājadoṣaparāmṛṣṭāḥ kulastriya ivākulāḥ || 20 ||

dravanti ca mṛgāśśīghraṃ bhagnā iva raṇe hayāḥ |

patanti ca khagā bhūmau kṣīṇapuṇyā iva grahāḥ || 21 ||

tatassajīmūtagaṇapraṇādo nādaṃ hyamuñcattvarayā pratītaḥ |

sūryātmajaśśauryavivṛddhatejāḥ saritpatirvā'nilacañcalormiḥ || 22 ||

ityārṣe śrīmadrāmāyaṇe vālmīkīya ādikāvye kiṣkindhākāṇḍe caturdaśassargaḥ ||