3.6 Aranyakanda - Shashtha Sargah

ॐ

3.6 අරණ්යකාණ්ඩ - ෂෂ්ඨ සර්ගඃ

Valmiki Sinhala

ශ්රීමද්වාල්මීකීය රාමායණේ අරණ්යකාණ්ඩම් .

අථ ෂෂ්ඨස්සර්ගඃ .

ශරභඞ්ගේ දිවං ප්රාප්තේ මුනිසඞ්ඝාස්සමාගතාඃ .

අභ්යගච්ඡන්ත කාකුත්ස්ථං රාමං ජ්වලිතතේජසම් .. 1 ..

වෛඛානසා වාලඛිල්යාස්සම්ප්රක්ෂාලා මරීචිපාඃ .

අශ්මකුට්ටාශ්ච බහවඃ පත්රාහාරාශ්ච තාපසාඃ .. 2 ..

දන්තෝලූඛලිනශ්චෛව තථෛවෝන්මජ්ජකාඃ පරේ .

ගාත්රශය්යා අශය්යාශ්ච තථෛවාභ්රාවකාශකාඃ .. 3 ..

මුනයස්සලිලාහාරාවායුභක්ෂා ස්තථාපරේ .

ආකාශනිලයාශ්චෛව තථා ස්ථණ්ඩිලශායිනඃ .. 4 ..

ව්රතෝපවාසිනෝ දාන්තාස්තථා(අ)ර්ද්රපටවාසසඃ .

සජපාශ්ච තපෝනිත්යාස්තථා පඤ්චතපෝ(අ)න්විතාඃ .. 5 ..

සර්වේ බ්රාහ්ම්යා ශ්රියා ජුෂ්ටා දෘඪයෝගාස්සමාහිතාඃ .

ශරභඞ්ගාශ්රමේ රාමමභිජග්මුශ්ච තාපසාඃ .. 6 ..

අභිගම්ය ච ධර්මජ්ඤා රාමං ධර්මභෘතාං වරම් .

ඌචුඃ පරමධර්මජ්ඤමෘෂිසඞ්ඝාස්සමාහිතාඃ .. 7 ..

ත්වමික්ෂ්වාකුකුලස්යාස්ය පෘථිව්යාශ්ච මහාරථ .

ප්රධානශ්චාසි නාථශ්ච දේවානාං මඝවානිව .. 8 ..

විශ්රුතස්ත්රිෂු ලෝකේෂු යශසා වික්රමේණ ච .

පිතෘභක්තිශ්ච සත්යං ච ත්වයි ධර්මශ්ච පුෂ්කලඃ .. 9 ..

ත්වාමාසාද්ය මහාත්මානං ධර්මජ්ඤං ධර්මවත්සලම් .

අර්ථිත්වාන්නාථ වක්ෂ්යාමස්තච්ච නඃ ක්ෂන්තුමර්හසි .. 10 ..

අධර්මස්සුමහාංස්තාත භවේත්තස්ය මහීපතේඃ .

යෝ හරේද්බලිෂඩ්භාගාං න ච රක්ෂති පුත්රවත් .. 11 ..

යුඤ්ජානස්ස්වානිව ප්රාණාන්ප්රාණෛරිෂ්ටාන්සුතානිව .

නිත්යයුක්තස්සදා රක්ෂන්සර්වාන්විෂයවාසිනඃ .. 12 ..

ප්රාප්නෝති ශාශ්වතීං රාම කීර්තිං ස බහුවාර්ෂිකීම් .

බ්රහ්මණස්ස්ථානමාසාද්ය තත්ර චාපි මහීයතේ .. 13 ..

යත්කරෝති පරං ධර්ම මුනිර්මූලඵලාශනඃ .

තත්ර රාජ්ඤශ්චතුර්භාග ප්රජා ධර්මේණ රක්ෂිතඃ .. 14 ..

සෝ(අ)යං බ්රාහ්මණභූයිෂ්ඨෝ වානප්රස්ථගණෝ මහාන් .

ත්වන්නාථෝ(අ)නාථවද්රාම රාක්ෂසෛර්වධ්යතේ භෘශම් .. 15 ..

ඒහි පශ්ය ශරීරාණි මුනීනාං භාවිතාත්මනාම් .

හතානාං රාක්ෂසෛර්ඝෝරෛර්බහූනාං බහුධා වනේ .. 16 ..

පම්පානදීනිවාසානාමනුමන්දාකිනීමපි .

චිත්රකූටාලයානාං ච ක්රියතේ කදනං මහත් .. 17 ..

ඒවං වයං න මෘෂ්යාමෝ විප්රකාරං තපස්විනාම් .

ක්රියමාණං වනේ ඝෝරං රක්ෂෝභිර්භීමකර්මභිඃ .. 18 ..

තතස්ත්වාං ශරණාර්ථං ච ශරණ්යං සමුපස්ථිතාඃ .

පරිපාලය නෝ රාම වධ්යමානාන්නිශාචරෛඃ .. 19 ..

පරා ත්වත්තෝ ගතිර්වීර පෘථිව්යාං නෝපපද්යතේ .

පරිපාලය න ස්සර්වාන්රාක්ෂසේභ්යෝ නෘපාත්මජ .. 20 ..

ඒතච්ඡ්රුත්වා තු කාකුත්ස්ථස්තාපසානාං තපස්විනාම් .

ඉදං ප්රෝවාච ධර්මාත්මා සර්වානේව තපස්විනඃ .. 21 ..

නෛවමර්හථ මාං වක්තුමාජ්ඤාප්යෝ(අ)හං තපස්විනාම් .

කේවලේනාත්මකාර්යේණ ප්රවේෂ්ටව්යං මයා වනම් .. 22 ..

විප්රකාරමපාක්රෂ්ටුං රාක්ෂසෛර්භවතාමිමම් .

පිතුස්තු නිර්දේශකරඃ ප්රවිෂ්ටෝ(අ)හමිදං වනම් .. 23 ..

භවතාමර්ථසිද්ධ්යර්ථමාගතෝ(අ)හං යදෘච්ඡයා .

තස්ය මේ(අ)යං වනේ වාසෝ භවිෂ්යති මහාඵලඃ .. 24 ..

තපස්විනාං රණේ ශත්රූන්හන්තුමිච්ඡාමි රාක්ෂසාන් .

පශ්යන්තු වීර්යමෘෂයස්සභ්රාතුර්මේ තපෝධනාඃ .. 25 ..

දත්ත්වා(අ)භයං චාපි තපෝධනානාං ධර්මේ ධෘතාත්මා සහ ලක්ෂ්මණේන .

තපෝධනෛශ්චාපි සභාජ්යවෘත්තඃ සුතීක්ෂ්ණමේවාභිජගාම වීරඃ .. 26 ..

ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අරණ්යකාණ්ඩේ ෂෂ්ඨස්සර්ගඃ ..

Roman (IAST) Transliteration

śrīmadvālmīkīya rāmāyaṇe araṇyakāṇḍam |

atha ṣaṣṭhassargaḥ |

śarabhaṅge divaṃ prāpte munisaṅghāssamāgatāḥ |

abhyagacchanta kākutsthaṃ rāmaṃ jvalitatejasam || 1 ||

vaikhānasā vālakhilyāssamprakṣālā marīcipāḥ |

aśmakuṭṭāśca bahavaḥ patrāhārāśca tāpasāḥ || 2 ||

dantolūkhalinaścaiva tathaivonmajjakāḥ pare |

gātraśayyā aśayyāśca tathaivābhrāvakāśakāḥ || 3 ||

munayassalilāhārāvāyubhakṣā stathāpare |

ākāśanilayāścaiva tathā sthaṇḍilaśāyinaḥ || 4 ||

vratopavāsino dāntāstathā'rdrapaṭavāsasaḥ |

sajapāśca taponityāstathā pañcatapo'nvitāḥ || 5 ||

sarve brāhmyā śriyā juṣṭā dṛḍhayogāssamāhitāḥ |

śarabhaṅgāśrame rāmamabhijagmuśca tāpasāḥ || 6 ||

abhigamya ca dharmajñā rāmaṃ dharmabhṛtāṃ varam |

ūcuḥ paramadharmajñamṛṣisaṅghāssamāhitāḥ || 7 ||

tvamikṣvākukulasyāsya pṛthivyāśca mahāratha |

pradhānaścāsi nāthaśca devānāṃ maghavāniva || 8 ||

viśrutastriṣu lokeṣu yaśasā vikrameṇa ca |

pitṛbhaktiśca satyaṃ ca tvayi dharmaśca puṣkalaḥ || 9 ||

tvāmāsādya mahātmānaṃ dharmajñaṃ dharmavatsalam |

arthitvānnātha vakṣyāmastacca naḥ kṣantumarhasi || 10 ||

adharmassumahāṃstāta bhavettasya mahīpateḥ |

yo haredbaliṣaḍbhāgāṃ na ca rakṣati putravat || 11 ||

yuñjānassvāniva prāṇānprāṇairiṣṭānsutāniva |

nityayuktassadā rakṣansarvānviṣayavāsinaḥ || 12 ||

prāpnoti śāśvatīṃ rāma kīrtiṃ sa bahuvārṣikīm |

brahmaṇassthānamāsādya tatra cāpi mahīyate || 13 ||

yatkaroti paraṃ dharma munirmūlaphalāśanaḥ |

tatra rājñaścaturbhāga prajā dharmeṇa rakṣitaḥ || 14 ||

so'yaṃ brāhmaṇabhūyiṣṭho vānaprasthagaṇo mahān |

tvannātho'nāthavadrāma rākṣasairvadhyate bhṛśam || 15 ||

ehi paśya śarīrāṇi munīnāṃ bhāvitātmanām |

hatānāṃ rākṣasairghorairbahūnāṃ bahudhā vane || 16 ||

pampānadīnivāsānāmanumandākinīmapi |

citrakūṭālayānāṃ ca kriyate kadanaṃ mahat || 17 ||

evaṃ vayaṃ na mṛṣyāmo viprakāraṃ tapasvinām |

kriyamāṇaṃ vane ghoraṃ rakṣobhirbhīmakarmabhiḥ || 18 ||

tatastvāṃ śaraṇārthaṃ ca śaraṇyaṃ samupasthitāḥ |

paripālaya no rāma vadhyamānānniśācaraiḥ || 19 ||

parā tvatto gatirvīra pṛthivyāṃ nopapadyate |

paripālaya na ssarvānrākṣasebhyo nṛpātmaja || 20 ||

etacchrutvā tu kākutsthastāpasānāṃ tapasvinām |

idaṃ provāca dharmātmā sarvāneva tapasvinaḥ || 21 ||

naivamarhatha māṃ vaktumājñāpyo'haṃ tapasvinām |

kevalenātmakāryeṇa praveṣṭavyaṃ mayā vanam || 22 ||

viprakāramapākraṣṭuṃ rākṣasairbhavatāmimam |

pitustu nirdeśakaraḥ praviṣṭo'hamidaṃ vanam || 23 ||

bhavatāmarthasiddhyarthamāgato'haṃ yadṛcchayā |

tasya me'yaṃ vane vāso bhaviṣyati mahāphalaḥ || 24 ||

tapasvināṃ raṇe śatrūnhantumicchāmi rākṣasān |

paśyantu vīryamṛṣayassabhrāturme tapodhanāḥ || 25 ||

dattvā'bhayaṃ cāpi tapodhanānāṃ dharme dhṛtātmā saha lakṣmaṇena |

tapodhanaiścāpi sabhājyavṛttaḥ sutīkṣṇamevābhijagāma vīraḥ || 26 ||

ityārṣe śrīmadrāmāyaṇe vālmīkīya ādikāvye araṇyakāṇḍe ṣaṣṭhassargaḥ ||