Shri Gayatri Hridayam — InfoLyter.in

ॐ

ଶ୍ରୀ ଗାଯତ୍ରୀ ହୃଦଯଂ

Shri Gayatri Hridayam

Hrudayam Oriya

ନାରଦ ଉଵାଚ

ଭଗଵନ୍ ଦେଵଦେଵେଶ ଭୂତଭଵ୍ଯଜଗତ୍ପ୍ରଭୋ ।

କଵଚଂ ଚ ଶ୍ରୁତଂ ଦିଵ୍ଯଂ ଗାଯତ୍ରୀମନ୍ତ୍ରଵିଗ୍ରହମ୍ ॥ 1 ॥

ଅଧୁନା ଶ୍ରୋତୁମିଚ୍ଛାମି ଗାଯତ୍ରୀହୃଦଯଂ ପରମ୍ ।

ଯଦ୍ଧାରଣାଦ୍ଭଵେତ୍ପୁଣ୍ଯଂ ଗାଯତ୍ରୀଜପତୋଽଖିଲମ୍ ॥ 2 ॥

ଶ୍ରୀନାରାଯଣ ଉଵାଚ

ଦେଵ୍ଯାଶ୍ଚ ହୃଦଯଂ ପ୍ରୋକ୍ତଂ ନାରଦାଥର୍ଵଣେ ସ୍ଫୁଟମ୍ ।

ତଦେଵାହଂ ପ୍ରଵକ୍ଷ୍ଯାମି ରହସ୍ଯାତିରହସ୍ଯକମ୍ ॥ 3 ॥

ଵିରାଡ୍ରୂପାଂ ମହାଦେଵୀଂ ଗାଯତ୍ରୀଂ ଵେଦମାତରମ୍ ।

ଧ୍ଯାତ୍ଵା ତସ୍ଯାସ୍ତ୍ଵଥାଙ୍ଗେଷୁ ଧ୍ଯାଯେଦେତାଶ୍ଚ ଦେଵତାଃ ॥ 4 ॥

ପିଣ୍ଡବ୍ରହ୍ମଣ୍ଡଯୋରୈକ୍ଯାଦ୍ଭାଵଯେତ୍ସ୍ଵତନୌ ତଥା ।

ଦେଵୀରୂପେ ନିଜେ ଦେହେ ତନ୍ମଯତ୍ଵାଯ ସାଧକଃ ॥ 5 ॥

ନାଦେଵୋଽଭ୍ଯର୍ଚଯେଦ୍ଦେଵମିତି ଵେଦଵିଦୋ ଵିଦୁଃ ।

ତତୋଽଭେଦାଯ କାଯେ ସ୍ଵେ ଭାଵଯେଦ୍ଦେଵତା ଇମାଃ ॥ 6 ॥

ଅଥ ତତ୍ସମ୍ପ୍ରଵକ୍ଷ୍ଯାମି ତନ୍ମଯତ୍ଵମଥୋ ଭଵେତ୍ ।

ଗାଯତ୍ରୀହୃଦଯସ୍ଯାଽସ୍ଯାଽପ୍ଯହମେଵ ଋଷିଃ ସ୍ମୃତଃ ॥ 7 ॥

ଗାଯତ୍ରୀଛନ୍ଦ ଉଦ୍ଦିଷ୍ଟଂ ଦେଵତା ପରମେଶ୍ଵରୀ ।

ପୂର୍ଵୋକ୍ତେନ ପ୍ରକାରେଣ କୁର୍ଯାଦଙ୍ଗାନି ଷଟ୍କ୍ରମାତ୍ ।

ଆସନେ ଵିଜନେ ଦେଶେ ଧ୍ଯାଯେଦେକାଗ୍ରମାନସଃ ॥ 8 ॥

ଅଥାର୍ଥନ୍ଯାସଃ । ଦ୍ଯୌମୂର୍ଧ୍ନି ଦୈଵତମ୍ । ଦନ୍ତପଙ୍କ୍ତାଵଶ୍ଵିନୌ । ଉଭେ ସନ୍ଧ୍ଯେ ଚୌଷ୍ଠୌ । ମୁଖମଗ୍ନିଃ । ଜିହ୍ଵା ସରସ୍ଵତୀ । ଗ୍ରୀଵାଯାଂ ତୁ ବୃହସ୍ପତିଃ । ସ୍ତନଯୋର୍ଵସଵୋଽଷ୍ଟୌ । ବାହ୍ଵୋର୍ମରୁତଃ । ହୃଦଯେ ପର୍ଜନ୍ଯଃ । ଆକାଶମୁଦରମ୍ । ନାଭାଵନ୍ତରିକ୍ଷମ୍ । କଟ୍ଯୋରିନ୍ଦ୍ରାଗ୍ନୀ । ଜଘନେ ଵିଜ୍ଞାନଘନଃ ପ୍ରଜାପତିଃ । କୈଲାସମଲଯେ ଊରୂ । ଵିଶ୍ଵେଦେଵା ଜାନ୍ଵୋଃ । ଜଙ୍ଘାଯାଂ କୌଶିକଃ । ଗୁହ୍ଯମଯନେ । ଊରୂ ପିତରଃ । ପାଦୌ ପୃଥିଵୀ । ଵନସ୍ପତଯୋଽଙ୍ଗୁଲୀଷୁ । ଋଷଯୋ ରୋମାଣି । ନଖାନି ମୁହୂର୍ତାନି । ଅସ୍ଥିଷୁ ଗ୍ରହାଃ । ଅସୃଙ୍ମାଂସମୃତଵଃ ॥ ସଂଵତ୍ସରା ଵୈ ନିମିଷମ୍ । ଅହୋରାତ୍ରାଵାଦିତ୍ଯଶ୍ଚନ୍ଦ୍ରମାଃ । ପ୍ରଵରାଂ ଦିଵ୍ଯାଂ ଗାଯତ୍ରୀଂ ସହସ୍ରନେତ୍ରାଂ ଶରଣମହଂ ପ୍ରପଦ୍ଯେ ॥

ଓଁ ତତ୍ସଵିତୁର୍ଵରେଣ୍ଯାଯ ନମଃ । ଓଁ ତତ୍ପୂର୍ଵାଜଯାଯ ନମଃ । ତତ୍ପ୍ରାତରାଦିତ୍ଯାଯ ନମଃ । ତତ୍ପ୍ରାତରାଦିତ୍ଯପ୍ରତିଷ୍ଠାଯୈ ନମଃ ॥

ପ୍ରାତରଧୀଯାନୋ ରାତ୍ରିକୃତଂ ପାପଂ ନାଶଯତି । ସାଯମଧୀଯାନୋ ଦିଵସକୃତଂ ପାପଂ ନାଶଯତି । ସାଯଂ ପ୍ରାତରଧୀଯାନୋ ଅପାପୋ ଭଵତି । ସର୍ଵତୀର୍ଥେଷୁ ସ୍ନାତୋ ଭଵତି । ସର୍ଵୈର୍ଦେଵୈର୍ଜ୍ଞାତୋ ଭଵତି । ଅଵାଚ୍ଯଵଚନାତ୍ପୂତୋ ଭଵତି । ଅଭକ୍ଷ୍ଯଭକ୍ଷଣାତ୍ପୂତୋ ଭଵତି । ଅଭୋଜ୍ଯଭୋଜନାତ୍ପୂତୋ ଭଵତି । ଅଚୋଷ୍ଯଚୋଷଣାତ୍ପୂତୋ ଭଵତି । ଅସାଧ୍ଯସାଧନାତ୍ପୂତୋ ଭଵତି । ଦୁଷ୍ପ୍ରତିଗ୍ରହଶତସହସ୍ରାତ୍ପୂତୋ ଭଵତି । ସର୍ଵପ୍ରତିଗ୍ରହାତ୍ପୂତୋ ଭଵତି । ପଙ୍କ୍ତିଦୂଷଣାତ୍ପୂତୋ ଭଵତି । ଅନୃତଵଚନାତ୍ପୂତୋ ଭଵତି । ଅଥାଽବ୍ରହ୍ମଚାରୀ ବ୍ରହ୍ମଚାରୀ ଭଵତୀ । ଅନେନ ହୃଦଯେନାଧୀତେନ କ୍ରତୁସହସ୍ରେଣେଷ୍ଟଂ ଭଵତି । ଷଷ୍ଟିଶତସହସ୍ରଗାଯତ୍ର୍ଯା ଜପ୍ଯାନି ଫଲାନି ଭଵନ୍ତି । ଅଷ୍ଟୌ ବ୍ରାହ୍ମଣାନ୍ ସମ୍ଯଗ୍ଗ୍ରାହଯେତ୍ । ତସ୍ଯ ସିଦ୍ଧିର୍ଭଵତି । ଯ ଇଦଂ ନିତ୍ଯମଧୀଯାନୋ ବ୍ରାହ୍ମଣଃ ପ୍ରାତଃ ଶୁଚିଃ ସର୍ଵପାପୈଃ ପ୍ରମୁଚ୍ଯତ ଇତି । ବ୍ରହ୍ମଲୋକେ ମହୀଯତେ ॥

ଇତ୍ଯାହ ଭଗଵାନ୍ ଶ୍ରୀନାରାଯଣଃ ॥

ଇତି ଶ୍ରୀଦେଵୀଭାଗଵତେ ମହାପୁରାଣେ ଦ୍ଵାଦଶସ୍କନ୍ଧେ ଶ୍ରୀ ଗାଯତ୍ରୀ ହୃଦଯଂ ନାମ ଚତୁର୍ଥୋଽଧ୍ଯାଯଃ ॥

Roman (IAST) Transliteration

nārada uvāca

bhagavan devadeveśa bhūtabhavyajagatprabho |

kavacaṃ ca śrutaṃ divyaṃ gāyatrīmantravigraham || 1 ||

adhunā śrotumicchāmi gāyatrīhṛdayaṃ param |

yaddhāraṇādbhavetpuṇyaṃ gāyatrījapato'khilam || 2 ||

śrīnārāyaṇa uvāca

devyāśca hṛdayaṃ proktaṃ nāradātharvaṇe sphuṭam |

tadevāhaṃ pravakṣyāmi rahasyātirahasyakam || 3 ||

virāḍrūpāṃ mahādevīṃ gāyatrīṃ vedamātaram |

dhyātvā tasyāstvathāṅgeṣu dhyāyedetāśca devatāḥ || 4 ||

piṇḍabrahmaṇḍayoraikyādbhāvayetsvatanau tathā |

devīrūpe nije dehe tanmayatvāya sādhakaḥ || 5 ||

nādevo'bhyarcayeddevamiti vedavido viduḥ |

tato'bhedāya kāye sve bhāvayeddevatā imāḥ || 6 ||

atha tatsampravakṣyāmi tanmayatvamatho bhavet |

gāyatrīhṛdayasyā'syā'pyahameva ṛṣiḥ smṛtaḥ || 7 ||

gāyatrīchanda uddiṣṭaṃ devatā parameśvarī |

pūrvoktena prakāreṇa kuryādaṅgāni ṣaṭkramāt |

āsane vijane deśe dhyāyedekāgramānasaḥ || 8 ||

athārthanyāsaḥ | dyaumūrdhni daivatam | dantapaṅktāvaśvinau | ubhe sandhye cauṣṭhau | mukhamagniḥ | jihvā sarasvatī | grīvāyāṃ tu bṛhaspatiḥ | stanayorvasavo'ṣṭau | bāhvormarutaḥ | hṛdaye parjanyaḥ | ākāśamudaram | nābhāvantarikṣam | kaṭyorindrāgnī | jaghane vijñānaghanaḥ prajāpatiḥ | kailāsamalaye ūrū | viśvedevā jānvoḥ | jaṅghāyāṃ kauśikaḥ | guhyamayane | ūrū pitaraḥ | pādau pṛthivī | vanaspatayo'ṅgulīṣu | ṛṣayo romāṇi | nakhāni muhūrtāni | asthiṣu grahāḥ | asṛṅmāṃsamṛtavaḥ || saṃvatsarā vai nimiṣam | ahorātrāvādityaścandramāḥ | pravarāṃ divyāṃ gāyatrīṃ sahasranetrāṃ śaraṇamahaṃ prapadye ||

oṃ tatsaviturvareṇyāya namaḥ | oṃ tatpūrvājayāya namaḥ | tatprātarādityāya namaḥ | tatprātarādityapratiṣṭhāyai namaḥ ||

prātaradhīyāno rātrikṛtaṃ pāpaṃ nāśayati | sāyamadhīyāno divasakṛtaṃ pāpaṃ nāśayati | sāyaṃ prātaradhīyāno apāpo bhavati | sarvatīrtheṣu snāto bhavati | sarvairdevairjñāto bhavati | avācyavacanātpūto bhavati | abhakṣyabhakṣaṇātpūto bhavati | abhojyabhojanātpūto bhavati | acoṣyacoṣaṇātpūto bhavati | asādhyasādhanātpūto bhavati | duṣpratigrahaśatasahasrātpūto bhavati | sarvapratigrahātpūto bhavati | paṅktidūṣaṇātpūto bhavati | anṛtavacanātpūto bhavati | athā'brahmacārī brahmacārī bhavatī | anena hṛdayenādhītena kratusahasreṇeṣṭaṃ bhavati | ṣaṣṭiśatasahasragāyatryā japyāni phalāni bhavanti | aṣṭau brāhmaṇān samyaggrāhayet | tasya siddhirbhavati | ya idaṃ nityamadhīyāno brāhmaṇaḥ prātaḥ śuciḥ sarvapāpaiḥ pramucyata iti | brahmaloke mahīyate ||

ityāha bhagavān śrīnārāyaṇaḥ ||

iti śrīdevībhāgavate mahāpurāṇe dvādaśaskandhe śrī gāyatrī hṛdayaṃ nāma caturtho'dhyāyaḥ ||