kṛṣṇa yajurvedīya taittirīya āraṇyake navamaḥ prapāṭhakaḥ - bhṛguvallī
o-nnamaḥ paramātmane, śrī mahāgaṇapataye namaḥ,
śrī gurubhyo namaḥ | ha॒riḥ॒ om ||
bhṛgu vallī
sa॒ha nā̭ vavatu | sa॒ha naṷ bhunaktu | sa॒ha vī॒rya̭-ṅkaravāvahai | te॒ja॒svinā॒ vadhī̭tamastu॒ mā vi̭dviṣā॒vahai᳚ ||
oṃ śānti॒-śśānti॒-śśāntiḥ̭ ||
anuvākaṃ 15
bhṛgu॒rvai vā̭ru॒ṇiḥ | varṷṇa॒-mpita̭ra॒-mupa̭sasāra | adhī̭hi bhagavo॒ brahmeti̭ || tasmā̭ e॒ta-tpro̭vāca | anna̭-mprā॒ṇa-ñcakṣu॒-śśrotra॒-mmano॒ vāca॒miti̭ ||
tagṃ ho̭vāca | yato॒ vā i॒māni॒ bhūtā̭ni॒ jāya̭nte |
yena॒ jātā̭ni॒ jīva̭nti | ya-tpraya̭ntya॒bhi saṃvi~̭śanti |
ta-dviji̭jñāsasva | ta-dbrahmeti̭ ||
sa tapo̭-'tapyata | sa tapa̭-sta॒ptvā || 35 ||
anna॒-mbrahmeti॒ vya̭jānāt | a॒nnāddhyḙva khalvi॒māni॒ bhūtā̭ni॒ jāya̭nte | annḙna॒ jātā̭ni॒ jīva̭nti | anna॒-mpraya̭ntya॒bhi-saṃvi~̭śa॒ntīti̭ || ta-dvi॒jñāya̭ | puna̭re॒va varṷṇa॒-mpita̭ra॒-mupa̭sasāra | adhī̭hi bhagavo॒ brahmeti̭ | tagṃ ho̭vāca | tapa̭sā॒ brahma॒ viji̭jñāsasva |
tapo॒ brahmeti̭ | sa tapo̭-'tapyata | sa tapa̭-sta॒ptvā || 36 ||
prā॒ṇo bra॒hmeti॒ vya̭jānāt | prā॒ṇāddhyḙva khalvi॒māni॒ bhūtā̭ni॒ jāya̭nte | prā॒ṇena॒ jātā̭ni॒ jīva̭nti |
prā॒ṇa-mpraya̭ntya॒bhi-saṃvi~̭śa॒ntīti̭ || ta-dvi॒jñāya̭ |
puna̭re॒va varṷṇa॒-mpita̭ra॒-mupa̭sasāra | adhī̭hi bhagavo॒ brahmeti̭ | tagṃ ho̭vāca | tapa̭sā॒ brahma॒ viji̭jñāsasva | tapo॒ brahmeti̭ | sa tapo̭-'tapyata | sa tapa̭-sta॒ptvā || 37 ||
mano॒ brahmeti॒ vya̭jānāt | mana̭so॒ hyḙva khalvi॒māni॒ bhūtā̭ni॒ jāya̭nte | mana̭sā॒ jātā̭ni॒ jīva̭nti | manaḥ॒ praya̭ntya॒bhi-saṃvi~̭śa॒ntīti̭ || ta-dvi॒jñāya̭ | puna̭re॒va varṷṇa॒-mpita̭ra॒-mupa̭sasāra | adhī̭hi bhagavo॒ brahmeti̭ | tagṃ ho̭vāca | tapa̭sā॒ brahma॒ viji̭jñāsasva |
tapo॒ brahmeti̭ | sa tapo̭-'tapyata | sa tapa̭-sta॒ptvā || 38 ||
vi॒jñāna॒-mbrahmeti॒ vya̭jānāt |
vi॒jñānā॒-ddhyḙva khalvi॒māni॒ bhūtā̭ni॒ jāya̭nte |
vi॒jñānḙna॒ jātā̭ni॒ jīva̭nti | vi॒jñāna॒-mpraya̭ntya॒bhi-saṃvi~̭śa॒ntīti̭ ||
ta-dvi॒jñāya̭ | puna̭re॒va varṷṇa॒-mpita̭ra॒-mupa̭sasāra | adhī̭hi bhagavo॒ brahmeti̭ | tagṃ ho̭vāca | tapa̭sā॒ brahma॒ viji̭jñāsasva | tapo॒ brahmeti̭ | sa tapo̭-'tapyata | sa tapa̭-sta॒ptvā || 39 ||
ā॒na॒ndo bra॒hmeti॒ vya̭jānāt | ā॒nandā॒-ddhyḙva-khalvi॒māni॒ bhūtā̭ni॒ jāya̭nte |
ā॒na॒ndena॒ jātā̭ni॒ jīva̭nti | ā॒na॒nda-mpraya̭ntya॒bhi-saṃvi~̭śa॒ntīti̭ || saiṣā bhā᳚rga॒vī vā̭ru॒ṇī vi॒dyā | pa॒ra॒me vyo̭ma॒-nprati̭ṣṭhitā || ya e॒vaṃ-ve~da॒ prati̭tiṣṭhati | anna̭vānannā॒do bha̭vati |
ma॒hā-nbha̭vati pra॒jayā̭ pa॒śubhi̭-rbrahmavarca॒sena̭ |
ma॒hān kī॒rtyā || 40 ||
anna॒-nna ni̭ndyāt | ta-dvra॒tam || prā॒ṇo vā anna᳚m | śarī̭ramannā॒dam | prā॒ṇe śarī̭ra॒-mprati̭ṣṭhitam | śarī̭re prā॒ṇaḥ prati̭ṣṭhitaḥ |
tade॒ta-danna॒-manne॒ prati̭ṣṭhitam ||
sa ya e॒ta-danna॒-manne॒ prati̭ṣṭhitaṃ॒-ve~da॒ prati̭tiṣṭhati | anna̭vā-nannā॒do bha̭vati |
ma॒hā-nbha̭vati pra॒jayā̭ pa॒śubhi̭-rbrahmavarca॒sena̭ |
ma॒hān kī॒rtyā || 41 ||
anna॒-nna pari̭cakṣīta | ta-dvra॒tam | āpo॒ vā anna᳚m | jyoti̭rannā॒dam | a॒phsu jyotiḥ॒ prati̭ṣṭhitam | jyoti॒ṣyāpaḥ॒ prati̭ṣṭhitāḥ |
tade॒ta-danna॒-manne॒ prati̭ṣṭhitam ||
sa ya e॒ta-danna॒-manne॒ prati̭ṣṭhitaṃ॒-ve~da॒ prati̭tiṣṭhati | anna̭vā-nannā॒do bha̭vati | ma॒hā-nbha̭vati pra॒jayā̭ pa॒śubhi̭-rbrahmavarca॒sena̭ |
ma॒hān kīrtyā || 42 ||
anna̭-mba॒hu kṷrvīta | ta-dvra॒tam || pṛ॒thi॒vī vā anna᳚m | ā॒kā॒śo᳚-'nnā॒daḥ | pṛ॒thi॒vyā-mā̭kā॒śaḥ prati̭ṣṭhitaḥ | ā॒kā॒śe pṛ̭thi॒vī prati̭ṣṭhitā |
tade॒ta-danna॒-manne॒ prati̭ṣṭhitam ||
sa ya e॒ta-danna॒-manne॒ prati̭ṣṭhitaṃ॒-ve~da॒ prati̭tiṣṭhati | anna̭vānannā॒do bha̭vati | ma॒hā-nbha̭vati pra॒jayā̭ pa॒śubhi̭-rbrahmavarca॒sena̭ |
ma॒hān kī॒rtyā || 43 ||
na kañcana vasatau pratyā̭cakṣī॒ta | ta-dvra॒tam ||
tasmādyayā kayā ca vidhayā bahva̭nna-mprā॒pnuyāt ||
arāddhyasmā annami̭tyāca॒kṣate || etadvai mukhato᳚-'nnagṃ rā॒ddham |
mukhato-'smā a̭nnagṃ rā॒ddhyate | etadvai maddhyato᳚-'nnagṃ rā॒ddham |
maddhyato-'smā a̭nnagṃ rā॒ddhyate |
edadvā antato᳚-'nnagṃ rā॒ddham |
antato-'smā a̭nnagṃ rā॒ddhyate | || 44-' ||
ya ḙvaṃ-ve~॒da || kṣema i̭ti vā॒ci | yogakṣema iti prā̭ṇāpā॒nayoḥ | karmḙti ha॒stayoḥ | gati-ri̭ti pā॒dayoḥ | vimukti-ri̭ti pā॒yau | iti mānuṣī᳚-ssamā॒jñāḥ || atha dai॒vīḥ | tṛpti-ri̭ti vṛ॒ṣṭau | bala-mi̭ti vi॒dyuti | || 44.b ||
yaśa i̭ti pa॒śuṣu | jyotiriti na̭kṣatre॒ṣu |
prajāti-ramṛta-mānanda i̭tyupa॒sthe | sarva mi̭tyākā॒śe ||
ta-tpratiṣṭhe-tyṷpāsī॒ta | pratiṣṭhā̭vā-nbha॒vati | tanmaha ityṷpāsī॒ta | ma̭hā-nbha॒vati | tanmana ityṷpāsī॒ta | māna̭vā-nbha॒vati | || 44.c ||
tannama ityṷpāsī॒ta | namyante᳚-'smai kā॒māḥ | tadbrahme-tyṷpāsī॒ta | brahma̭vā-nbha॒vati | ta-dbrahmaṇaḥ parimara ityṷpāsī॒ta | paryeṇa-mmriyante dviṣantaḥ̭ sapa॒tnāḥ | pari ye᳚-'priyā᳚ bhrātṛ॒vyāḥ || sa yaścā̭ya-mpu॒ruṣe | yaścāsā̭-vādi॒tye | sa ekaḥ̭ | || 44.d ||
sa ya̭ evaṃ॒-vi~t | asmāl-lo̭kā-tpre॒tya |
etamannamaya-mātmāna-mupa̭saṅkra॒mya |
eta-mprāṇamaya-mātmāna-mupa̭saṅkra॒mya |
eta-mmanomaya-mātmāna-mupa̭saṅkra॒mya |
etaṃ-vi~jñānamaya-mātmāna-mupa̭saṅkra॒mya |
eta mānandamaya mātmāna mupa̭saṅkra॒mya |
imān ~lokān kāmānnī kāma-rūpya̭nusa॒ñcarann |
eta-thsāma gā̭yannā॒ste || hā(3) vu॒ hā(3) vu॒ hā(3) vṷ | || 44è ||
a॒ha-manna-ma॒ha-manna-ma॒hamannam |
a॒hamannā॒do(2)-'hamannā॒do(2) 'hamannā॒daḥ |
a॒hagg śloka॒kṛ-da॒hagg śloka॒kṛ-da॒hagg śloka॒kṛt | a॒hamasmi prathamajā ṛtā(3) sya॒ |
pūrva-ndevebhyo amṛtasya nā(3) bhā॒ i॒ |
yo mā dadāti sa ideva mā(3)vāḥ॒ |
a॒ha-manna॒-manna̭-ma॒danta॒-mā(3) dmi॒ |
a॒haṃ-vi~śva॒-mbhuva̭na॒-mabhya̭bha॒vām | suva॒rna jyotīḥ᳚ || ya e॒vaṃ-ve~da̭ || ityṷpa॒niṣa̭t || 44.f ||
sa॒ha nā̭ vavatu | sa॒ha naṷ bhunaktu | sa॒ha vī॒rya̭-ṅkaravāvahai | te॒ja॒svinā॒ vadhī̭tamastu॒ mā vi̭dviṣā॒vahai᳚ || oṃ śānti॒-śśānti॒-śśāntiḥ̭ ||
(bhṛgu॒strayo̭da॒śā - nna̭m - prā॒ṇo - mano̭ - vi॒jñāna॒-ndvāda̭śa dvādaśā - na॒ndo daśā - nna॒-nna ni̭ndyā॒ - danna॒-nna pari̭cakṣī॒tā -nna̭-mba॒hukṷrvi॒ taikā̭daśaikādaśa॒ - na kañca naika̭ṣaṣṭi॒rdaśa̭ ) (a. 15)
|| iti bhṛguvallī samāptā ||
(śa-nnaḥ॒ - śīkṣāgṃ - sa॒ha nau॒ - ya ̭007ā;chanda̭sā॒m - bhūḥ - sa yaḥ - pṛ̭thi॒ - vyomi - tyṛta-ñcā॒ - ham - ~vedamanucya - śa-nnaḥ̭ - sa॒ha nā̭vavatu - brahma॒vi-d- bhṛguḥ॒ pañca̭daśa)
(śa-nno॒ - maha॒ ityā̭di॒tyo - no i̭tarā॒ṇya - sa̭nne॒vā - nna॒-nna ni̭ndyā॒ccatṷścatvārigṃśat )
(śanna॒ - ityṷpa॒niṣa̭t )
|| hariḥ̭ om ||
|| kṛṣṇa yajurvedīya taittirīya āraṇyake navamaḥ prapāṭhaka-ssamāptaḥ ||