nārada uvāca |
indrākṣīstotramākhyāhi nārāyaṇa guṇārṇava |
pārvatyai śivasamproktaṃ paraṃ kautūhalaṃ hi me ||
nārāyaṇa uvāca |
indrākṣī stotra mantrasya māhātmyaṃ kena vocyate |
indreṇādau kṛtaṃ stotraṃ sarvāpadvinivāraṇam ||
tadevāhaṃ bravīmyadya pṛcchatastava nārada |
asya śrī indrākṣīstotramahāmantrasya, śacīpurandara ṛṣiḥ, anuṣṭupchandaḥ, indrākṣī durgā devatā, lakṣmīrbījaṃ, bhuvaneśvarī śaktiḥ, bhavānī kīlakaṃ, mama indrākṣī prasāda siddhyarthe jape viniyogaḥ |
karanyāsaḥ
indrākṣyai aṅguṣṭhābhyāṃ namaḥ |
mahālakṣmyai tarjanībhyāṃ namaḥ |
maheśvaryai madhyamābhyāṃ namaḥ |
ambujākṣyai anāmikābhyāṃ namaḥ |
kātyāyanyai kaniṣṭhikābhyāṃ namaḥ |
kaumāryai karatalakarapṛṣṭhābhyāṃ namaḥ |
aṅganyāsaḥ
indrākṣyai hṛdayāya namaḥ |
mahālakṣmyai śirase svāhā |
maheśvaryai śikhāyai vaṣaṭ |
ambujākṣyai kavacāya hum |
kātyāyanyai netratrayāya vauṣaṭ |
kaumāryai astrāya phaṭ |
bhūrbhuvassuvaromiti digbandhaḥ ||
dhyānam
netrāṇāṃ daśabhiśśataiḥ parivṛtāmatyugracarmāmbarām |
hemābhāṃ mahatīṃ vilambitaśikhāmāmuktakeśānvitām ||
ghaṇṭāmaṇḍitapādapadmayugalāṃ nāgendrakumbhastanīm |
indrākṣīṃ paricintayāmi manasā kalpoktasiddhipradām || 1 ||
indrākṣīṃ dvibhujāṃ devīṃ pītavastradvayānvitām |
vāmahaste vajradharāṃ dakṣiṇena varapradām ||
indrākṣīṃ sahayuvatīṃ nānālaṅkārabhūṣitām |
prasannavadanāmbhojāmapsarogaṇasevitām || 2 ||
dvibhujāṃ saumyavadānāṃ pāśāṅkuśadharāṃ parām |
trailokyamohinīṃ devīṃ indrākṣī nāma kīrtitām || 3 ||
pītāmbarāṃ vajradharaikahastāṃ
nānāvidhālaṅkaraṇāṃ prasannām |
tvāmapsarassevitapādapadmāṃ
indrākṣīṃ vande śivadharmapatnīm || 4 ||
pañcapūjā
laṃ pṛthivyātmikāyai gandhaṃ samarpayāmi |
haṃ ākāśātmikāyai puṣpaiḥ pūjayāmi |
yaṃ vāyvātmikāyai dhūpamāghrāpayāmi |
raṃ agnyātmikāyai dīpaṃ darśayāmi |
vaṃ amṛtātmikāyai amṛtaṃ mahānaivedyaṃ nivedayāmi |
saṃ sarvātmikāyai sarvopacārapūjāṃ samarpayāmi ||
digdevatā rakṣa
indra uvāca |
indrākṣī pūrvataḥ pātu pātvāgneyyāṃ tatheśvarī |
kaumārī dakṣiṇe pātu nairṛtyāṃ pātu pārvatī || 1 ||
vārāhī paścime pātu vāyavye nārasiṃhyapi |
udīcyāṃ kālarātrī māṃ aiśānyāṃ sarvaśaktayaḥ || 2 ||
bhairavyordhvaṃ sadā pātu pātvadho vaiṣṇavī tathā |
evaṃ daśadiśo rakṣetsarvadā bhuvaneśvarī || 3 ||
oṃ hrīṃ śrīṃ indrākṣyai namaḥ |
stotraṃ
indrākṣī nāma sā devī devataissamudāhṛtā |
gaurī śākambharī devī durgānāmnīti viśrutā || 1 ||
nityānandī nirāhārī niṣkalāyai namo'stu te |
kātyāyanī mahādevī candraghaṇṭā mahātapāḥ || 2 ||
sāvitrī sā ca gāyatrī brahmāṇī brahmavādinī |
nārāyaṇī bhadrakālī rudrāṇī kṛṣṇapiṅgalā || 3 ||
agnijvālā raudramukhī kālarātrī tapasvinī |
meghasvanā sahasrākṣī vikaṭāṅgī (vikārāṅgī) jaḍodarī || 4 ||
mahodarī muktakeśī ghorarūpā mahābalā |
ajitā bhadradā'nantā rogahantrī śivapriyā || 5 ||
śivadūtī karālī ca pratyakṣaparameśvarī |
indrāṇī indrarūpā ca indraśaktiḥparāyaṇī || 6 ||
sadā sammohinī devī sundarī bhuvaneśvarī |
ekākṣarī parā brāhmī sthūlasūkṣmapravardhanī || 7 ||
rakṣākarī raktadantā raktamālyāmbarā parā |
mahiṣāsurasaṃhartrī cāmuṇḍā saptamātṛkā || 8 ||
vārāhī nārasiṃhī ca bhīmā bhairavavādinī |
śrutissmṛtirdhṛtirmedhā vidyālakṣmīssarasvatī || 9 ||
anantā vijayā'parṇā mānasoktāparājitā |
bhavānī pārvatī durgā haimavatyambikā śivā || 10 ||
śivā bhavānī rudrāṇī śaṅkarārdhaśarīriṇī |
airāvatagajārūḍhā vajrahastā varapradā || 11 ||
dhūrjaṭī vikaṭī ghorī hyaṣṭāṅgī narabhojinī |
bhrāmarī kāñci kāmākṣī kvaṇanmāṇikyanūpurā || 12 ||
hrīṅkārī raudrabhetālī hruṅkāryamṛtapāṇinī |
tripādbhasmapraharaṇā triśirā raktalocanā || 13 ||
nityā sakalakalyāṇī sarvaiśvaryapradāyinī |
dākṣāyaṇī padmahastā bhāratī sarvamaṅgalā || 14 ||
kalyāṇī jananī durgā sarvaduḥkhavināśinī |
indrākṣī sarvabhūteśī sarvarūpā manonmanī || 15 ||
mahiṣamastakanṛtyavinodana-
sphuṭaraṇanmaṇinūpurapādukā |
jananarakṣaṇamokṣavidhāyinī
jayatu śumbhaniśumbhaniṣūdinī || 16 ||
śivā ca śivarūpā ca śivaśaktiparāyaṇī |
mṛtyuñjayī mahāmāyī sarvaroganivāriṇī || 17 ||
aindrīdevī sadākālaṃ śāntimāśukarotu me |
īśvarārdhāṅganilayā indubimbanibhānanā || 18 ||
sarvorogapraśamanī sarvamṛtyunivāriṇī |
apavargapradā ramyā āyurārogyadāyinī || 19 ||
indrādidevasaṃstutyā ihāmutraphalapradā |
icchāśaktisvarūpā ca ibhavaktrādvijanmabhūḥ || 20 ||
bhasmāyudhāya vidmahe raktanetrāya dhīmahi tanno jvaraharaḥ pracodayāt || 21 ||
mantraḥ
oṃ aiṃ hrīṃ śrīṃ klīṃ klūṃ indrākṣyai namaḥ || 22 ||
oṃ namo bhagavatī indrākṣī sarvajanasammohinī kālarātrī nārasiṃhī sarvaśatrusaṃhāriṇī anale abhaye ajite aparājite mahāsiṃhavāhinī mahiṣāsuramardinī hana hana mardaya mardaya māraya māraya śoṣaya śoṣaya dāhaya dāhaya mahāgrahān saṃhara saṃhara yakṣagraha rākṣasagraha skandagraha vināyakagraha bālagraha kumāragraha coragraha bhūtagraha pretagraha piśācagraha kūṣmāṇḍagrahādīn mardaya mardaya nigraha nigraha dhūmabhūtānsantrāvaya santrāvaya bhūtajvara pretajvara piśācajvara uṣṇajvara pittajvara vātajvara śleṣmajvara kaphajvara ālāpajvara sannipātajvara māhendrajvara kṛtrimajvara kṛtyādijvara ekāhikajvara dvayāhikajvara trayāhikajvara cāturthikajvara pañcāhikajvara pakṣajvara māsajvara ṣaṇmāsajvara saṃvatsarajvara jvarālāpajvara sarvajvara sarvāṅgajvarān nāśaya nāśaya hara hara hana hana daha daha paca paca tāḍaya tāḍaya ākarṣaya ākarṣaya vidveṣaya vidveṣaya stambhaya stambhaya mohaya mohaya uccāṭaya uccāṭaya huṃ phaṭ svāhā || 23 ||
oṃ hrīṃ oṃ namo bhagavatī trailokyalakṣmī sarvajanavaśaṅkarī sarvaduṣṭagrahastambhinī kaṅkālī kāmarūpiṇī kālarūpiṇī ghorarūpiṇī paramantraparayantra prabhedinī pratibhaṭavidhvaṃsinī parabalaturagavimardinī śatrukaracchedinī śatrumāṃsabhakṣiṇī sakaladuṣṭajvaranivāriṇī bhūta preta piśāca brahmarākṣasa yakṣa yamadūta śākinī ḍākinī kāminī stambhinī mohinī vaśaṅkarī kukṣiroga śiroroga netraroga kṣayāpasmāra kuṣṭhādi mahāroganivāriṇī mama sarvarogaṃ nāśaya nāśaya hrāṃ hrīṃ hrūṃ hraiṃ hrauṃ hraḥ huṃ phaṭ svāhā || 24 ||
oṃ namo bhagavatī māheśvarī mahācintāmaṇī durge sakalasiddheśvarī sakalajanamanohāriṇī kālakālarātrī mahāghorarūpe pratihataviśvarūpiṇī madhusūdanī mahāviṣṇusvarūpiṇī śiraśśūla kaṭiśūla aṅgaśūla pārśvaśūla netraśūla karṇaśūla pakṣaśūla pāṇḍuroga kāmārādīn saṃhara saṃhara nāśaya nāśaya vaiṣṇavī brahmāstreṇa viṣṇucakreṇa rudraśūlena yamadaṇḍena varuṇapāśena vāsavavajreṇa sarvānarīṃ bhañjaya bhañjaya rājayakṣma kṣayaroga tāpajvaranivāriṇī mama sarvajvaraṃ nāśaya nāśaya ya ra la va śa ṣa sa ha sarvagrahān tāpaya tāpaya saṃhara saṃhara chedaya chedaya uccāṭaya uccāṭaya hrāṃ hrīṃ hrūṃ phaṭ svāhā || 25 ||
uttaranyāsaḥ
karanyāsaḥ
indrākṣyai aṅguṣṭhābhyāṃ namaḥ |
mahālakṣmyai tarjanībhyāṃ namaḥ |
maheśvaryai madhyamābhyāṃ namaḥ |
ambujākṣyai anāmikābhyāṃ namaḥ |
kātyāyanyai kaniṣṭhikābhyāṃ namaḥ |
kaumāryai karatalakarapṛṣṭhābhyāṃ namaḥ |
aṅganyāsaḥ
indrākṣyai hṛdayāya namaḥ |
mahālakṣmyai śirase svāhā |
maheśvaryai śikhāyai vaṣaṭ |
ambujākṣyai kavacāya hum |
kātyāyanyai netratrayāya vauṣaṭ |
kaumāryai astrāya phaṭ |
bhūrbhuvassuvaromiti digvimokaḥ ||
samarpaṇaṃ
guhyādi guhya goptrī tvaṃ gṛhāṇāsmatkṛtaṃ japam |
siddhirbhavatu me devī tvatprasādānmayi sthirān || 26
phalaśrutiḥ
nārāyaṇa uvāca |
etairnāmaśatairdivyaiḥ stutā śakreṇa dhīmatā |
āyurārogyamaiśvaryaṃ apamṛtyubhayāpaham || 27 ||
kṣayāpasmārakuṣṭhādi tāpajvaranivāraṇam |
coravyāghrabhayaṃ tatra śītajvaranivāraṇam || 28 ||
māheśvaramahāmārī sarvajvaranivāraṇam |
śītapaittakavātādi sarvaroganivāraṇam || 29 ||
sannijvaranivāraṇaṃ sarvajvaranivāraṇam |
sarvaroganivāraṇaṃ sarvamaṅgalavardhanam || 30 ||
śatamāvartayedyastu mucyate vyādhibandhanāt |
āvartayansahasrāttu labhate vāñchitaṃ phalam || 31 ||
etat stotraṃ mahāpuṇyaṃ japedāyuṣyavardhanam |
vināśāya ca rogāṇāmapamṛtyuharāya ca || 32 ||
dvijairnityamidaṃ japyaṃ bhāgyārogyābhīpsubhiḥ |
nābhimātrajalesthitvā sahasraparisaṅkhyayā || 33 ||
japetstotramimaṃ mantraṃ vācāṃ siddhirbhavettataḥ |
anenavidhinā bhaktyā mantrasiddhiśca jāyate || 34 ||
santuṣṭā ca bhaveddevī pratyakṣā samprajāyate |
sāyaṃ śataṃ paṭhennityaṃ ṣaṇmāsātsiddhirucyate || 35 ||
coravyādhibhayasthāne manasāhyanucintayan |
saṃvatsaramupāśritya sarvakāmārthasiddhaye || 36 ||
rājānaṃ vaśyamāpnoti ṣaṇmāsānnātra saṃśayaḥ |
aṣṭadorbhissamāyukte nānāyuddhaviśārade || 37 ||
bhūtapretapiśācebhyo rogārātimukhairapi |
nāgebhyaḥ viṣayantrebhyaḥ ābhicārairmaheśvarī || 38 ||
rakṣa māṃ rakṣa māṃ nityaṃ pratyahaṃ pūjitā mayā |
sarvamaṅgalamāṅgalye śive sarvārthasādhike |
śaraṇye tryambake devī nārāyaṇī namo'stu te || 39 ||
varaṃ pradādmahendrāya devarājyaṃ ca śāśvatam |
indrastotramidaṃ puṇyaṃ mahadaiśvaryakāraṇam || 40 ||
iti indrākṣī stotram |