5.8 Sundarakanda - Ashtama Sargah

ॐ

5.8 സുന്ദരകാണ്ഡ - അഷ്ടമ സര്ഗഃ

Valmiki Malayalam

ശ്രീമദ്വാല്മീകീയ രാമായണേ സുന്ദരകാണ്ഡമ് ।

അഥ അഷ്ടമസ്സര്ഗഃ ।

സ തസ്യ മധ്യേ ഭവനസ്യ സംസ്ഥിതം മഹദ്വിമാനം മണിവജ്രചിത്രിതമ് ।

പ്രതപ്തജാമ്ബൂനദജാലകൃത്രിമം ദദര്ശ വീരഃ പവനാത്മജഃ കപിഃ ॥ 1 ॥

തദപ്രമേയാപ്രതികാരകൃത്രിമം കൃതം സ്വയം സാധ്വിതി വിശ്വകര്മണാ ।

ദിവം ഗതം വായുപഥപ്രതിഷ്ഠിതം വ്യരാജതാദിത്യപഥസ്യ ലക്ഷ്മവത് ॥ 2 ॥

ന തത്ര കിഞ്ചിന്ന കൃതം പ്രയത്നതോ ന തത്ര കിഞ്ചിന്ന മഹാര്ഹരത്നവത് ।

ന തേ വിശേഷാ നിയതാഃ സുരേഷ്വപി ന തത്ര കിഞ്ചിന്ന മഹാവിശേഷവത് ॥ 3 ॥

തപഃ സമാധാനപരാക്രമാര്ജിതം മനഃ സമാധാനവിചാരചാരിണമ് ।

അനേകസംസ്ഥാനവിശേഷനിര്മിതം തതസ്തതസ്തുല്യവിശേഷദര്ശനമ് ॥ 4 ॥

വിശേഷമാലമ്ബ്യ വിശേഷസംസ്ഥിതം വിചിത്രകൂടം ബഹുകൂടമണ്ഡിതമ് ।

മനോഽഭിരാമം ശരദിന്ദുനിര്മലം വിചിത്രകൂടം ശിഖരം ഗിരേര്യഥാ ॥ 5 ॥

വഹന്തി യം കുണ്ഡലശോഭിതാനനാഃ മഹാശനാ വ്യോമചരാ നിശാചരാഃ ।

വിവൃത്തവിധ്വസ്തവിശാലലോചനാഃ മഹാജവാ ഭൂതഗണാഃ സഹസ്രശഃ ॥ 6 ॥

വസന്തപുഷ്പോത്കരചാരുദര്ശനം വസന്തമാസാദപി കാന്തദര്ശനമ് ।

സ പുഷ്പകം തത്ര വിമാനമുത്തമം ദദര്ശ തദ്വാനരവീരസത്തമഃ ॥ 7 ॥

ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ സുന്ദരകാണ്ഡേ അഷ്ടമസ്സര്ഗഃ ॥

Roman (IAST) Transliteration

śrīmadvālmīkīya rāmāyaṇe sundarakāṇḍam |

atha aṣṭamassargaḥ |

sa tasya madhye bhavanasya saṃsthitaṃ mahadvimānaṃ maṇivajracitritam |

prataptajāmbūnadajālakṛtrimaṃ dadarśa vīraḥ pavanātmajaḥ kapiḥ || 1 ||

tadaprameyāpratikārakṛtrimaṃ kṛtaṃ svayaṃ sādhviti viśvakarmaṇā |

divaṃ gataṃ vāyupathapratiṣṭhitaṃ vyarājatādityapathasya lakṣmavat || 2 ||

na tatra kiñcinna kṛtaṃ prayatnato na tatra kiñcinna mahārharatnavat |

na te viśeṣā niyatāḥ sureṣvapi na tatra kiñcinna mahāviśeṣavat || 3 ||

tapaḥ samādhānaparākramārjitaṃ manaḥ samādhānavicāracāriṇam |

anekasaṃsthānaviśeṣanirmitaṃ tatastatastulyaviśeṣadarśanam || 4 ||

viśeṣamālambya viśeṣasaṃsthitaṃ vicitrakūṭaṃ bahukūṭamaṇḍitam |

mano'bhirāmaṃ śaradindunirmalaṃ vicitrakūṭaṃ śikharaṃ gireryathā || 5 ||

vahanti yaṃ kuṇḍalaśobhitānanāḥ mahāśanā vyomacarā niśācarāḥ |

vivṛttavidhvastaviśālalocanāḥ mahājavā bhūtagaṇāḥ sahasraśaḥ || 6 ||

vasantapuṣpotkaracārudarśanaṃ vasantamāsādapi kāntadarśanam |

sa puṣpakaṃ tatra vimānamuttamaṃ dadarśa tadvānaravīrasattamaḥ || 7 ||

ityārṣe śrīmadrāmāyaṇe vālmīkīya ādikāvye sundarakāṇḍe aṣṭamassargaḥ ||