📄 Save this Stotram as PDF Click the button to open the Save dialog
How to save: 1 Click "Save as PDF" → 2 A dialog opens → 3 Choose "Save as PDF" as printer → 4 Click Save
ॐ
5.7 സുന്ദരകാണ്ഡ - സപ്തമ സര്ഗഃ
5.7 Sundarakanda - Saptama Sargah
Valmiki Malayalam
ശ്രീമദ്വാല്മീകീയ രാമായണേ സുന്ദരകാണ്ഡമ് ।
അഥ സപ്തമസ്സര്ഗഃ ।
സ വേശ്മജാലം ബലവാന് ദദര്ശ വ്യാസക്തവൈഡൂര്യസുവര്ണജാലമ് ।
യഥാ മഹത് പ്രാവൃഷി മേഘജാലം വിദ്യുത്പിനദ്ധം സവിഹങ്ഗജാലമ് ॥ 1 ॥
നിവേശനാനാം വിവിധാശ്ച ശാലാഃ പ്രധാനശങ്ഖായുധചാപശാലാഃ ।
മനോഹരാശ്ചാപി പുനര്വിശാലാഃ ദദര്ശ വേശ്മാദ്രിഷു ചന്ദ്രശാലാഃ ॥ 2 ॥
ഗൃഹാണി നാനാവസുരാജിതാനി ദേവാസുരൈശ്ചാപി സുപൂജിതാനി ।
സര്വൈശ്ച ദോഷൈഃ പരിവര്ജിതാനി കപിര്ദദര്ശ സ്വബലാര്ജിതാനി ॥ 3 ॥
താനി പ്രയത്നാഭിസമാഹിതാനി മയേന സാക്ഷാദിവ നിര്മിതാനി ।
മഹീതലേ സര്വഗുണോത്തരാണി ദദര്ശ ലങ്കാധിപതേര്ഗൃഹാണി ॥ 4 ॥
തതോ ദദര്ശോഛ്രചിതമേഘരൂപം മനോഹരം കാഞ്ചനചാരുരൂപമ് ।
രക്ഷോഽധിപസ്യാത്മബലാനുരൂപം ഗൃഹോത്തമം ഹ്യപ്രതിരൂപരൂപമ് ॥ 5 ॥
മഹീതലേ സ്വര്ഗമിവ പ്രകീര്ണം ശ്രിയാ ജ്വലന്തം ബഹുരത്നകീര്ണമ് ।
നാനാതരൂണാം കുസുമാവകീര്ണം ഗിരേരിവാഗ്രം രജസാവകീര്ണമ് ॥ 6 ॥
നാരീപ്രവേകൈരിവ ദീപ്യമാനം തടിദ്ഭിരമ്ഭോദവദര്ച്യമാനമ് ।
ഹംസപ്രവേകൈരിവ വാഹ്യമാനം ശ്രിയാ യുതം ഖേ സുകൃതാം വിമാനമ് ॥ 7 ॥
യഥാ നഗാഗ്രം ബഹുധാതുചിത്രം യഥാ നഭശ്ച ഗ്രഹചന്ദ്രചിത്രമ് ।
ദദര്ശയുക്തീകൃതമേഘചിത്രം വിമാനരത്നം ബഹുരത്നചിത്രമ് ॥ 8 ॥
മഹീ കൃതാ പര്വതരാജിപൂര്ണാ ശൈലാഃ കൃതാ വൃക്ഷവിതാനപൂര്ണാഃ ।
വൃക്ഷാഃ കൃതാഃ പുഷ്പവിതാനപൂര്ണാഃ പുഷ്പം കൃതം കേസരപത്രപൂര്ണമ് ॥ 9 ॥
കൃതാനി വേശ്മാനി ച പാണ്ഡുരാണി തഥാ സുപുഷ്പാണ്യപി പുഷ്കരാണി ।
പുനശ്ച പദ്മാനി സകേസരാണി ധന്യാനി ചിത്രാണി തഥാ വനാനി ॥ 10 ॥
പുഷ്പാഹ്വയം നാമവിരാജമാനം രത്നപ്രഭാഭിശ്ച വിവര്ധമാനമ് ।
വേശ്മോത്തമാനാമപി ചോച്യമാനം മഹാകപിസ്തത്ര മഹാവിമാനമ് ॥ 11 ॥
കൃതാശ്ച വൈഡൂര്യമയാ വിഹങ്ഗാഃ രൂപ്യപ്രവാലൈശ്ച തഥാ വിഹങ്ഗാഃ ।
ചിത്രാശ്ച നാനാവസുഭിര്ഭുജങ്ഗാഃ ജാത്യാനുരൂപാസ്തുരഗാഃ ശുഭാങ്ഗാഃ ॥ 12 ॥
പ്രവാലജാമ്ബൂനദപുഷ്പപക്ഷാഃ സലീലമാവര്ജിതജിഹ്മപക്ഷാഃ ।
കാമസ്യ സാക്ഷാദിവ ഭാന്തി പക്ഷാഃ കൃതാ വിഹങ്ഗാഃ സുമുഖാഃ സുപക്ഷാഃ ॥ 13 ॥
നിയുജ്യമാനാസ്തു ഗജാഃ സുഹസ്താഃ സകേസരാശ്ചോത്പലപത്രഹസ്താഃ ।
ബഭൂവദേവീ ച കൃതാ സുഹസ്താ ലക്ഷ്മീ സ്തഥാ പദ്മിനി പദ്മഹസ്താ ॥ 14 ॥
ഇതീവ തദ്ഗൃഹമഭിഗമ്യ ശോഭനം സവിസ്മയോ നഗമിവ ചാരുശോഭനമ് ।
പുനശ്ച തത്പരമസുഗന്ധി സുന്ദരം ഹിമാത്യയേ നഗമിവ ചാരുകന്ദരമ് ॥ 15 ॥
തതഃ സ താം കപിരഭിപത്യ പൂജിതാം ചരന് പുരീം ദശമുഖബാഹുപാലിതാമ് ।
അദൃശ്യ താം ജനകസുതാം സുപൂജിതാം സുദുഃഖിതഃ പതിഗുണവേഗവര്ജിതാമ് ॥ 16 ॥
തതസ്തദാ ബഹുവിധഭാവിതാത്മനഃ കൃതാത്മനോ ജനകസുതാം സുവര്ത്മനഃ ।
അപശ്യതോഽഭവദതിദുഃഖിതം മനഃ സുചക്ഷുഷഃ പ്രവിചരതോ മഹാത്മനഃ ॥ 17 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ സുന്ദരകാണ്ഡേ സപ്തമസ്സര്ഗഃ ॥
Roman (IAST) Transliteration
śrīmadvālmīkīya rāmāyaṇe sundarakāṇḍam |
atha saptamassargaḥ |
sa veśmajālaṃ balavān dadarśa vyāsaktavaiḍūryasuvarṇajālam |
yathā mahat prāvṛṣi meghajālaṃ vidyutpinaddhaṃ savihaṅgajālam || 1 ||
niveśanānāṃ vividhāśca śālāḥ pradhānaśaṅkhāyudhacāpaśālāḥ |
manoharāścāpi punarviśālāḥ dadarśa veśmādriṣu candraśālāḥ || 2 ||
gṛhāṇi nānāvasurājitāni devāsuraiścāpi supūjitāni |
sarvaiśca doṣaiḥ parivarjitāni kapirdadarśa svabalārjitāni || 3 ||
tāni prayatnābhisamāhitāni mayena sākṣādiva nirmitāni |
mahītale sarvaguṇottarāṇi dadarśa laṅkādhipatergṛhāṇi || 4 ||
tato dadarśochracitamegharūpaṃ manoharaṃ kāñcanacārurūpam |
rakṣo'dhipasyātmabalānurūpaṃ gṛhottamaṃ hyapratirūparūpam || 5 ||
mahītale svargamiva prakīrṇaṃ śriyā jvalantaṃ bahuratnakīrṇam |
nānātarūṇāṃ kusumāvakīrṇaṃ girerivāgraṃ rajasāvakīrṇam || 6 ||
nārīpravekairiva dīpyamānaṃ taṭidbhirambhodavadarcyamānam |
haṃsapravekairiva vāhyamānaṃ śriyā yutaṃ khe sukṛtāṃ vimānam || 7 ||
yathā nagāgraṃ bahudhātucitraṃ yathā nabhaśca grahacandracitram |
dadarśayuktīkṛtameghacitraṃ vimānaratnaṃ bahuratnacitram || 8 ||
mahī kṛtā parvatarājipūrṇā śailāḥ kṛtā vṛkṣavitānapūrṇāḥ |
vṛkṣāḥ kṛtāḥ puṣpavitānapūrṇāḥ puṣpaṃ kṛtaṃ kesarapatrapūrṇam || 9 ||
kṛtāni veśmāni ca pāṇḍurāṇi tathā supuṣpāṇyapi puṣkarāṇi |
punaśca padmāni sakesarāṇi dhanyāni citrāṇi tathā vanāni || 10 ||
puṣpāhvayaṃ nāmavirājamānaṃ ratnaprabhābhiśca vivardhamānam |
veśmottamānāmapi cocyamānaṃ mahākapistatra mahāvimānam || 11 ||
kṛtāśca vaiḍūryamayā vihaṅgāḥ rūpyapravālaiśca tathā vihaṅgāḥ |
citrāśca nānāvasubhirbhujaṅgāḥ jātyānurūpāsturagāḥ śubhāṅgāḥ || 12 ||
pravālajāmbūnadapuṣpapakṣāḥ salīlamāvarjitajihmapakṣāḥ |
kāmasya sākṣādiva bhānti pakṣāḥ kṛtā vihaṅgāḥ sumukhāḥ supakṣāḥ || 13 ||
niyujyamānāstu gajāḥ suhastāḥ sakesarāścotpalapatrahastāḥ |
babhūvadevī ca kṛtā suhastā lakṣmī stathā padmini padmahastā || 14 ||
itīva tadgṛhamabhigamya śobhanaṃ savismayo nagamiva cāruśobhanam |
punaśca tatparamasugandhi sundaraṃ himātyaye nagamiva cārukandaram || 15 ||
tataḥ sa tāṃ kapirabhipatya pūjitāṃ caran purīṃ daśamukhabāhupālitām |
adṛśya tāṃ janakasutāṃ supūjitāṃ suduḥkhitaḥ patiguṇavegavarjitām || 16 ||
tatastadā bahuvidhabhāvitātmanaḥ kṛtātmano janakasutāṃ suvartmanaḥ |
apaśyato'bhavadatiduḥkhitaṃ manaḥ sucakṣuṣaḥ pravicarato mahātmanaḥ || 17 ||
ityārṣe śrīmadrāmāyaṇe vālmīkīya ādikāvye sundarakāṇḍe saptamassargaḥ ||
InfoLyter.in — Sacred Vedic Knowledge Portal · Free forever