📄 Save this Stotram as PDF Click the button to open the Save dialog
How to save: 1 Click "Save as PDF" → 2 A dialog opens → 3 Choose "Save as PDF" as printer → 4 Click Save
ॐ
5.65 സുന്ദരകാണ്ഡ - പഞ്ചഷഷ്ടിതമ സര്ഗഃ
5.65 Sundarakanda - Panchashashtitama Sargah
Valmiki Malayalam
ശ്രീമദ്വാല്മീകീയ രാമായണേ സുന്ദരകാണ്ഡമ് ।
അഥ പഞ്ചഷഷ്ടിതമസ്സര്ഗഃ ।
തതഃ പ്രസ്രവണം ശൈലം തേ ഗത്വാ ചിത്രകാനനമ് ।
പ്രണമ്യ ശിരസാ രാമം ലക്ഷ്മണം ച മഹാബലമ് ॥ 1 ॥
യുവരാജം പുരസ്കൃത്യ സുഗ്രീവമഭിവാദ്യ ച ।
പ്രവൃത്തിമഥ സീതായാഃ പ്രവക്തുമുപചക്രമുഃ ॥ 2 ॥
രാവണാന്തഃ പുരേ രോധം രാക്ഷസീഭിശ്ച തര്ജനമ് ।
രാമേ സമനുരാഗം ച യശ്ചായം സമയഃ കൃതഃ ॥ 3 ॥
ഏതദാഖ്യാന്തി തേ സര്വേ ഹരയോ രാമസന്നിധൌ ।
വൈദേഹീമക്ഷതാം ശ്രുത്വാ രാമസ്തൂത്തരമബ്രവീത് ॥ 4 ॥
ക്വ സീതാ വര്തതേ ദേവീ കഥം ച മയി വര്തതേ ।
ഏതന്മേ സര്വമാഖ്യാത വൈദേഹീം പ്രതി വാനരാഃ ॥ 5 ॥
രാമസ്യ ഗദിതം ശ്രുത്വാ ഹരയോ രാമസന്നിധൌ ।
ചോദയന്തി ഹനൂമന്തം സീതാവൃത്താന്തകോവിദമ് ॥ 6 ॥
ശ്രുത്വാ തു വചനം തേഷാം ഹനുമാന്മാരുതാത്മജഃ ।
പ്രണമ്യ ശിരസാ ദേവ്യൈ സീതായൈ താം ദിശം പ്രതി ॥ 7 ॥
ഉവാച വാക്യം വാക്യജ്ഞസ്സീതായാ ദര്ശനം യഥാ ।
സമുദ്രം ലങ്ഘയിത്വാഹം ശതയോജനമായതമ് ॥ 8 ॥
അഗച്ഛം ജാനകീം സീതാം മാര്ഗമാണോ ദിദൃക്ഷയാ ।
തത്ര ലങ്കേതി നഗരീ രാവണസ്യ ദുരാത്മനഃ ॥ 9 ॥
ദക്ഷിണസ്യ സമുദ്രസ്യ തീരേ വസതി ദക്ഷിണേ ।
തത്ര ദൃഷ്ടാ മയാ സീതാ രാവണാന്തഃ പുരേ സതീ ॥ 10 ॥
സന്ന്യസ്യ ത്വയി ജീവന്തീ രാമാ രാമ മനോരഥമ് ।
ദൃഷ്ടാ മേ രാക്ഷസീമധ്യേ തര്ജ്യമാനാ മുഹുര്മുഹുഃ ॥ 11 ॥
രാക്ഷസീഭിര്വിരൂപാഭീ രക്ഷിതാ പ്രമദാവനേ ।
ദുഃഖ മാസാദ്യതേ ദേവീ തഥാഽദുഃഖോചിതാ സതീ ॥ 12 ॥
രാവണാന്തഃ പുരേ രുദ്ധാ രാക്ഷസീഭി സ്സുരക്ഷിതാ ।
ഏകവേണീധരാ ദീനാ ത്വയി ചിന്താപരായണാ ॥ 13 ॥
അധഃശയ്യാ വിവര്ണാങ്ഗീ പദ്മിനീവ ഹിമാഗമേ ।
രാവണാദ്വിനിവൃത്താര്ഥാ മര്തവ്യകൃതനിശ്ചയാ ॥ 14 ॥
ദേവീ കഥഞ്ചിത്കാകുത്സ്ഥ ത്വന്മനാ മാര്ഗിതാ മയാ ।
ഇക്ഷ്വാകുവംശവിഖ്യാതിം ശനൈഃ കീര്തയതാനഘ ॥ 15 ॥
സാ മയാ നരശാര്ദൂല വിശ്വാസമുപപാദിതാ ।
തത സ്സമ്ഭാഷിതാ ദേവീ സര്വമര്ഥം ച ദര്ശിതാ ॥ 16 ॥
രാമസുഗ്രീവസഖ്യം ച ശ്രുത്വാ പ്രീതിമുപാഗതാ ।
നിയത സ്സമുദാചാരോ ഭക്തിശ്ചാസ്യാസ്തഥാ ത്വയി ॥ 17 ॥
ഏവം മയാ മഹാഭാഗാ ദൃഷ്ടാ ജനകനന്ദിനീ ।
ഉഗ്രേണ തപസാ യുക്താ ത്വദ്ഭക്ത്യാ പുരുഷര്ഷഭ ॥ 18 ॥
അഭിജ്ഞാനം ച മേ ദത്തം യഥാ വൃത്തം തവാന്തികേ ।
ചിത്രകൂടേ മഹാപ്രാജ്ഞ വായസം പ്രതി രാഘവ ॥ 19 ॥
വിജ്ഞാപ്യശ്ച നരവ്യാഘ്രോ രാമോ വായുസുത ത്വയാ ।
അഖിലേനേഹ യദ്ധൃഷ്ടമിതി മാമാഹ ജാനകീ ॥ 20 ॥
അയം ചാസ്മൈ പ്രദാതവ്യോ യത്നാത്സുപരിരക്ഷിതഃ ।
ബ്രുവതാ വചനാന്യേവം സുഗ്രീവസ്യോപശൃണ്വതഃ ॥ 21 ॥
ഏഷ ചൂഡാമണിശ്ശ്രീമാന് മയാ സുപരിരക്ഷിതഃ ।
മനശ്ശിലായാസ്തിലകോ ഗണ്ഡപാര്ശ്വേ നിവേശിതഃ ॥ 22 ॥
ത്വയാ പ്രണഷ്ഠേ തിലകേ തം കില സ്മര്തുമര്ഹസി ।
ഏഷ നിര്യാതിതശ്ശ്രീമാന്മയാ തേ വാരി സമ്ഭവഃ ।
ഏതം ദൃഷ്ട്വാ പ്രഹൃഷ്യാമി വ്യസനേ ത്വാമിവാനഘ ॥ 23 ॥
ജീവിതം ധാരയിഷ്യാമി മാസം ദശരഥാത്മജ ॥ 24 ॥
ഊര്ധ്വം മാസാന്ന ജീവേയം രക്ഷസാം വശമാഗതാ ।
ഇതി മാമബ്രവീത്സീതാ കൃശാങ്ഗീ ധര്മചാരിണീ ॥ 25 ॥
രാവണാന്തഃ പുരേ രുദ്ധാ മൃഗീവോത്ഫുല്ലലോചനാ ।
ഏതദേവ മയാഖ്യാതം സര്വം രാഘവ യദ്യഥാ ॥ 26 ॥
സര്വഥാ സാഗരജലേ സന്താരഃ പ്രവിധീയതാമ് ।
തൌ ജാതാശ്വാസൌ രാജപുത്രൌ വിദിത്വാ തച്ചാഭിജ്ഞാനം രാഘവായ പ്രദായ ।
ദേവ്യാ ചാഖ്യാതം സര്വമേവാനുപൂര്വ്യാദ്വാചാ സമ്പൂര്ണം വായുപുത്ത്ര ശ്ശശംസ ॥ 27 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ സുന്ദരകാണ്ഡേ പഞ്ചഷഷ്ടിതമസ്സര്ഗഃ ॥
Roman (IAST) Transliteration
śrīmadvālmīkīya rāmāyaṇe sundarakāṇḍam |
atha pañcaṣaṣṭitamassargaḥ |
tataḥ prasravaṇaṃ śailaṃ te gatvā citrakānanam |
praṇamya śirasā rāmaṃ lakṣmaṇaṃ ca mahābalam || 1 ||
yuvarājaṃ puraskṛtya sugrīvamabhivādya ca |
pravṛttimatha sītāyāḥ pravaktumupacakramuḥ || 2 ||
rāvaṇāntaḥ pure rodhaṃ rākṣasībhiśca tarjanam |
rāme samanurāgaṃ ca yaścāyaṃ samayaḥ kṛtaḥ || 3 ||
etadākhyānti te sarve harayo rāmasannidhau |
vaidehīmakṣatāṃ śrutvā rāmastūttaramabravīt || 4 ||
kva sītā vartate devī kathaṃ ca mayi vartate |
etanme sarvamākhyāta vaidehīṃ prati vānarāḥ || 5 ||
rāmasya gaditaṃ śrutvā harayo rāmasannidhau |
codayanti hanūmantaṃ sītāvṛttāntakovidam || 6 ||
śrutvā tu vacanaṃ teṣāṃ hanumānmārutātmajaḥ |
praṇamya śirasā devyai sītāyai tāṃ diśaṃ prati || 7 ||
uvāca vākyaṃ vākyajñassītāyā darśanaṃ yathā |
samudraṃ laṅghayitvāhaṃ śatayojanamāyatam || 8 ||
agacchaṃ jānakīṃ sītāṃ mārgamāṇo didṛkṣayā |
tatra laṅketi nagarī rāvaṇasya durātmanaḥ || 9 ||
dakṣiṇasya samudrasya tīre vasati dakṣiṇe |
tatra dṛṣṭā mayā sītā rāvaṇāntaḥ pure satī || 10 ||
sannyasya tvayi jīvantī rāmā rāma manoratham |
dṛṣṭā me rākṣasīmadhye tarjyamānā muhurmuhuḥ || 11 ||
rākṣasībhirvirūpābhī rakṣitā pramadāvane |
duḥkha māsādyate devī tathā'duḥkhocitā satī || 12 ||
rāvaṇāntaḥ pure ruddhā rākṣasībhi ssurakṣitā |
ekaveṇīdharā dīnā tvayi cintāparāyaṇā || 13 ||
adhaḥśayyā vivarṇāṅgī padminīva himāgame |
rāvaṇādvinivṛttārthā martavyakṛtaniścayā || 14 ||
devī kathañcitkākutstha tvanmanā mārgitā mayā |
ikṣvākuvaṃśavikhyātiṃ śanaiḥ kīrtayatānagha || 15 ||
sā mayā naraśārdūla viśvāsamupapāditā |
tata ssambhāṣitā devī sarvamarthaṃ ca darśitā || 16 ||
rāmasugrīvasakhyaṃ ca śrutvā prītimupāgatā |
niyata ssamudācāro bhaktiścāsyāstathā tvayi || 17 ||
evaṃ mayā mahābhāgā dṛṣṭā janakanandinī |
ugreṇa tapasā yuktā tvadbhaktyā puruṣarṣabha || 18 ||
abhijñānaṃ ca me dattaṃ yathā vṛttaṃ tavāntike |
citrakūṭe mahāprājña vāyasaṃ prati rāghava || 19 ||
vijñāpyaśca naravyāghro rāmo vāyusuta tvayā |
akhileneha yaddhṛṣṭamiti māmāha jānakī || 20 ||
ayaṃ cāsmai pradātavyo yatnātsuparirakṣitaḥ |
bruvatā vacanānyevaṃ sugrīvasyopaśṛṇvataḥ || 21 ||
eṣa cūḍāmaṇiśśrīmān mayā suparirakṣitaḥ |
manaśśilāyāstilako gaṇḍapārśve niveśitaḥ || 22 ||
tvayā praṇaṣṭhe tilake taṃ kila smartumarhasi |
eṣa niryātitaśśrīmānmayā te vāri sambhavaḥ |
etaṃ dṛṣṭvā prahṛṣyāmi vyasane tvāmivānagha || 23 ||
jīvitaṃ dhārayiṣyāmi māsaṃ daśarathātmaja || 24 ||
ūrdhvaṃ māsānna jīveyaṃ rakṣasāṃ vaśamāgatā |
iti māmabravītsītā kṛśāṅgī dharmacāriṇī || 25 ||
rāvaṇāntaḥ pure ruddhā mṛgīvotphullalocanā |
etadeva mayākhyātaṃ sarvaṃ rāghava yadyathā || 26 ||
sarvathā sāgarajale santāraḥ pravidhīyatām |
tau jātāśvāsau rājaputrau viditvā taccābhijñānaṃ rāghavāya pradāya |
devyā cākhyātaṃ sarvamevānupūrvyādvācā sampūrṇaṃ vāyuputtra śśaśaṃsa || 27 ||
ityārṣe śrīmadrāmāyaṇe vālmīkīya ādikāvye sundarakāṇḍe pañcaṣaṣṭitamassargaḥ ||
InfoLyter.in — Sacred Vedic Knowledge Portal · Free forever