5.60 Sundarakanda - Shashtitama Sargah

ॐ

5.60 സുന്ദരകാണ്ഡ - ഷഷ്ടിതമ സര്ഗഃ

Valmiki Malayalam

ശ്രീമദ്വാല്മീകീയ രാമായണേ സുന്ദരകാണ്ഡമ് ।

അഥ ഷഷ്ടിതമസ്സര്ഗഃ ।

തസ്യ തദ്വചനം ശ്രുത്വാ വാലിസൂനുരഭാഷത ।

അയുക്തം തു വിനാ ദേവീം ദൃഷ്ടവദ്ഭിശ്ച വാനരാഃ ॥ 1 ॥

സമീപം ഗന്തുമസ്മാഭീ രാഘവസ്യ മഹാത്മനഃ ।

ദൃഷ്ടാ ദേവീ ന ചാനീതാ ഇതി തത്ര നിവേദനമ് ॥ 2 ॥

അയുക്തമിവ പശ്യാമി ഭവദ്ഭിഃ ഖ്യാതവിക്രമൈഃ ।

ന ഹി നഃ പ്ലവനേ കശ്ചിന്നാപി കശ്ചിത്പരാക്രമേ ॥ 3 ॥

തുല്യ സ്സാമരദൈത്യേഷു ലോകേഷു ഹരിസത്തമാഃ ।

തേഷ്വേവം ഹതവീരേഷു രാക്ഷസേഷു ഹനൂമതാ ॥ 4 ॥

കിമന്യദത്ര കര്തവ്യം ഗൃഹീത്വാ യാമ ജാനകീമ് ।

തമേവം കൃതസങ്കല്പം ജാമ്ബവാന് ഹരിസത്തമഃ ॥ 5 ॥

ഉവാച പരമപ്രീതോ വാക്യമര്ഥവദര്ഥവിത് ।

ന താവദേഷാ മതിരക്ഷമാ നോ യഥാ ഭവാന് പശ്യതി രാജപുത്ര ।

യഥാ തു രാമസ്യ മതിര്നിവിഷ്ടാ തഥാ ഭവാന് പശ്യതു കാര്യസിദ്ധിമ് ॥ 6 ॥

ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ സുന്ദരകാണ്ഡേ ഷഷ്ടിതമസ്സര്ഗഃ ॥

Roman (IAST) Transliteration

śrīmadvālmīkīya rāmāyaṇe sundarakāṇḍam |

atha ṣaṣṭitamassargaḥ |

tasya tadvacanaṃ śrutvā vālisūnurabhāṣata |

ayuktaṃ tu vinā devīṃ dṛṣṭavadbhiśca vānarāḥ || 1 ||

samīpaṃ gantumasmābhī rāghavasya mahātmanaḥ |

dṛṣṭā devī na cānītā iti tatra nivedanam || 2 ||

ayuktamiva paśyāmi bhavadbhiḥ khyātavikramaiḥ |

na hi naḥ plavane kaścinnāpi kaścitparākrame || 3 ||

tulya ssāmaradaityeṣu lokeṣu harisattamāḥ |

teṣvevaṃ hatavīreṣu rākṣaseṣu hanūmatā || 4 ||

kimanyadatra kartavyaṃ gṛhītvā yāma jānakīm |

tamevaṃ kṛtasaṅkalpaṃ jāmbavān harisattamaḥ || 5 ||

uvāca paramaprīto vākyamarthavadarthavit |

na tāvadeṣā matirakṣamā no yathā bhavān paśyati rājaputra |

yathā tu rāmasya matirniviṣṭā tathā bhavān paśyatu kāryasiddhim || 6 ||

ityārṣe śrīmadrāmāyaṇe vālmīkīya ādikāvye sundarakāṇḍe ṣaṣṭitamassargaḥ ||