5.50 Sundarakanda - Panchasha Sargah

ॐ

5.50 സുന്ദരകാണ്ഡ - പഞ്ചാശ സര്ഗഃ

Valmiki Malayalam

ശ്രീമദ്വാല്മീകീയ രാമായണേ സുന്ദരകാണ്ഡമ് ।

അഥ പഞ്ചാശസ്സര്ഗഃ ।

തമുദ്വീക്ഷ്യ മഹാബാഹുഃ പിങ്ഗാക്ഷം പുരത സ്ഥിതമ് ।

കോപേന മഹതാഽവിഷ്ടോ രാവണോ ലോകരാവണഃ ॥ 1 ॥

ശങ്കാഹൃതാത്മാ ദധ്യൌ സ കപീന്ദ്രം തേജസാവൃതമ് ।

കിമേഷ ഭഗവാന്നന്ദീ ഭവേത്സാക്ഷാദിഹാഗതഃ ॥ 2 ॥

യേന ശപ്തോഽസ്മി കൈലാസേ മയാ സഞ്ചാലിതേ പുരാ ।

സോഽയം വാനരമൂര്തിസ്സ്യാത്കിംസ്വിദ്ബാണോ മഹാഽസുരഃ ॥ 3 ॥

സ രാജാ രോഷതാമ്രാക്ഷഃ പ്രഹസ്തം മന്ത്രിസത്തമമ് ।

കാലയുക്തമുവാചേദം വചോഽവിപുലമര്ഥവത് ॥ 4 ॥

ദുരാത്മാ പൃച്ഛ്യതാമേഷ കുതഃ കിം വാത്ര കാരണമ് ।

വനഭങ്ഗേ ച കോഽസ്യാര്ഥോ രാക്ഷസീനാം ച തര്ജനേ ॥ 5 ॥

മത്പുരീമപ്രധൃഷ്യാം വാഽഗമനേ കിം പ്രയോജനമ് ।

ആയോധനേ വാ കിം കാര്യം പൃച്ഛയതാമേഷ ദുര്മതിഃ ॥ 6 ॥

രാവണസ്യ വചശ്ശ്രുത്വാ പ്രഹസ്തോ വാക്യമബ്രവീത് ।

സമാശ്വസിഹി ഭദ്രം തേ ന ഭീഃ കാര്യാ ത്വയാ കപേ ॥ 7 ॥

യദി താവത്ത്വമിന്ദ്രേണ പ്രേഷിതോ രാവണാലയമ് ।

തത്ത്വമാഖ്യാഹി മാ ഭൂത്തേ ഭയം വാനര മോക്ഷ്യസേ ॥ 8 ॥

യദി വൈശ്രവണസ്യ ത്വം യമസ്യ വരുണസ്യ ച ।

ചാരരൂപമിദം കൃത്വാ പ്രവിഷ്ടോ നഃ പുരീമിമാമ് ॥ 9 ॥

വിഷ്ണുനാ പ്രേഷിതോ വാഽപി ദൂതോ വിജയകാങ്ക്ഷിണാ ।

ന ഹി തേ വാനരം തേജോ രൂപമാത്രം തു വാനരമ് ॥ 10 ॥

തത്ത്വതഃ കഥയസ്വാദ്യ തതോ വാനര മോക്ഷ്യസേ ।

അനൃതം വദതശ്ചാപി ദുര്ലഭം തവ ജീവിതമ് ॥ 11 ॥

അഥവാ യന്നിമിത്തസ്തേ പ്രവേശോ രാവണാലയേ ।

ഏവമുക്തോ ഹരിശ്രേഷ്ഠസ്തദാ രക്ഷോഗണേശ്വരമ് ॥ 12 ॥

അബ്രവീന്നാസ്മി ശക്രസ്യ യമസ്യ വരുണസ്യ വാ ।

ധനദേന ന മേ സഖ്യം വിഷ്ണുനാ നാസ്മി ചോദിതഃ ॥ 13 ॥

ജാതിരേവ മമ ത്വേഷാ വാനരോഽഹമിഹാഗതഃ ।

ദര്ശനേ രാക്ഷസേന്ദ്രസ്യ ദുര്ലഭേ തദിദം മയാ ॥ 14 ॥

വനം രാക്ഷസരാജസ്യ ദര്ശനാര്ഥേ വിനാശിതമ് ।

തതസ്തേ രാക്ഷസാഃ പ്രാപ്താ ബലിനോ യുദ്ധകാങ്ക്ഷിണഃ ।

രക്ഷണാര്ഥം തു ദേഹസ്യ പ്രതിയുദ്ധാ മയാ രണേ ॥ 15 ॥

അസ്ത്രപാശൈര്ന ശക്യോഽഹം ബദ്ധും ദേവാസുരൈരപി ॥ 16 ॥

പിതാമഹാദേഷ വരോ മാമാപ്യേഷോഽഭ്യുപാഗതഃ ।

രാജാനം ദ്രഷ്ടുകാമേന മയാസ്ത്രമനുവര്തിതമ് ॥ 17 ॥

വിമുക്തോ ഹ്യഹമസ്ത്രേണ രാക്ഷസൈസ്ത്വഭിപീഡിതഃ ।

കേനചിദ്രാജകാര്യേണ സമ്പ്രാപ്തോഽസ്മി തവാന്തികമ് ॥ 18 ॥

ദൂതോഽഹമിതി വിജ്ഞേയോ രാഘവസ്യാമിതൌജസഃ ।

ശ്രൂയതാം ചാപി വചനം മമ പഥ്യമിദം പ്രഭോ ॥ 19 ॥

ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ സുന്ദരകാണ്ഡേ പഞ്ചാശസ്സര്ഗഃ ॥

Roman (IAST) Transliteration

śrīmadvālmīkīya rāmāyaṇe sundarakāṇḍam |

atha pañcāśassargaḥ |

tamudvīkṣya mahābāhuḥ piṅgākṣaṃ purata sthitam |

kopena mahatā'viṣṭo rāvaṇo lokarāvaṇaḥ || 1 ||

śaṅkāhṛtātmā dadhyau sa kapīndraṃ tejasāvṛtam |

kimeṣa bhagavānnandī bhavetsākṣādihāgataḥ || 2 ||

yena śapto'smi kailāse mayā sañcālite purā |

so'yaṃ vānaramūrtissyātkiṃsvidbāṇo mahā'suraḥ || 3 ||

sa rājā roṣatāmrākṣaḥ prahastaṃ mantrisattamam |

kālayuktamuvācedaṃ vaco'vipulamarthavat || 4 ||

durātmā pṛcchyatāmeṣa kutaḥ kiṃ vātra kāraṇam |

vanabhaṅge ca ko'syārtho rākṣasīnāṃ ca tarjane || 5 ||

matpurīmapradhṛṣyāṃ vā'gamane kiṃ prayojanam |

āyodhane vā kiṃ kāryaṃ pṛcchayatāmeṣa durmatiḥ || 6 ||

rāvaṇasya vacaśśrutvā prahasto vākyamabravīt |

samāśvasihi bhadraṃ te na bhīḥ kāryā tvayā kape || 7 ||

yadi tāvattvamindreṇa preṣito rāvaṇālayam |

tattvamākhyāhi mā bhūtte bhayaṃ vānara mokṣyase || 8 ||

yadi vaiśravaṇasya tvaṃ yamasya varuṇasya ca |

cārarūpamidaṃ kṛtvā praviṣṭo naḥ purīmimām || 9 ||

viṣṇunā preṣito vā'pi dūto vijayakāṅkṣiṇā |

na hi te vānaraṃ tejo rūpamātraṃ tu vānaram || 10 ||

tattvataḥ kathayasvādya tato vānara mokṣyase |

anṛtaṃ vadataścāpi durlabhaṃ tava jīvitam || 11 ||

athavā yannimittaste praveśo rāvaṇālaye |

evamukto hariśreṣṭhastadā rakṣogaṇeśvaram || 12 ||

abravīnnāsmi śakrasya yamasya varuṇasya vā |

dhanadena na me sakhyaṃ viṣṇunā nāsmi coditaḥ || 13 ||

jātireva mama tveṣā vānaro'hamihāgataḥ |

darśane rākṣasendrasya durlabhe tadidaṃ mayā || 14 ||

vanaṃ rākṣasarājasya darśanārthe vināśitam |

tataste rākṣasāḥ prāptā balino yuddhakāṅkṣiṇaḥ |

rakṣaṇārthaṃ tu dehasya pratiyuddhā mayā raṇe || 15 ||

astrapāśairna śakyo'haṃ baddhuṃ devāsurairapi || 16 ||

pitāmahādeṣa varo māmāpyeṣo'bhyupāgataḥ |

rājānaṃ draṣṭukāmena mayāstramanuvartitam || 17 ||

vimukto hyahamastreṇa rākṣasaistvabhipīḍitaḥ |

kenacidrājakāryeṇa samprāpto'smi tavāntikam || 18 ||

dūto'hamiti vijñeyo rāghavasyāmitaujasaḥ |

śrūyatāṃ cāpi vacanaṃ mama pathyamidaṃ prabho || 19 ||

ityārṣe śrīmadrāmāyaṇe vālmīkīya ādikāvye sundarakāṇḍe pañcāśassargaḥ ||