📄 Save this Stotram as PDF Click the button to open the Save dialog
How to save: 1 Click "Save as PDF" → 2 A dialog opens → 3 Choose "Save as PDF" as printer → 4 Click Save
ॐ
5.43 സുന്ദരകാണ്ഡ - ത്രിചത്വാരിംശ സര്ഗഃ
5.43 Sundarakanda - Trichatvarimsha Sargah
Valmiki Malayalam
ശ്രീമദ്വാല്മീകീയ രാമായണേ സുന്ദരകാണ്ഡമ് ।
അഥ ത്രിചത്വാരിംശസ്സര്ഗഃ ।
തതസ്സ കിങ്കരാന്ഹത്വാ ഹനുമാന്ധ്യാനമാസ്ഥിതഃ ।
വനം ഭഗ്നം മയാ ചൈത്യപ്രാസാദോ ന വിനാശിതഃ ॥ 1 ॥
തസ്മാത്പ്രാസാദമപ്യേവം ഭീമം വിധ്വംസയാമ്യഹമ് ।
ഇതി സഞ്ചിന്ത്യ മനസാ ഹനുമാന്ദര്ശയന്ബലമ് ॥ 2 ॥
ചൈത്യപ്രാസാദമാപ്ലുത്യ മേരുശൃങ്ഗമിവോന്നതമ് ।
ആരുരോഹ കപിശ്രേഷ്ഠോ ഹനുമാന്മാരുതാത്മജഃ ॥ 3 ॥
ആരുഹ്യ ഗിരിസങ്കാശം പ്രാസാദം ഹരിയൂഥപഃ ।
ബഭൌ സ സുമഹാതേജാഃ പ്രതിസൂര്യ ഇവോദിതഃ ॥ 4 ॥
സമ്പ്രധൃഷ്യ ച ദുര്ധര്ഷം ചൈത്യപ്രാസാദമുത്തമമ് ।
ഹനുമാന്പ്രജ്വലന്ലക്ഷ്മ്യാ പാരിയാത്രോപമോഽഭവത് ॥ 5 ॥
സ ഭൂത്വാ സുമഹാകായഃ പ്രഭാവാന്മാരുതാത്മജഃ ।
ധൃഷ്ടമാസ്ഫോടയാമാസ ലങ്കാം ശബ്ദേന പൂരയന് ॥ 6 ॥
തസ്യാസ്ഫോടിതശബ്ദേന മഹതാ ശ്രോത്രഘാതിനാ ।
പേതുര്വിഹങ്ഗമാസ്തത്ര ചൈത്യപാലാശ്ച മോഹിതാഃ ॥ 7 ॥
അസ്ത്രവിജ്ജയതാം രാമോ ലക്ഷ്മണശ്ച മഹാബലഃ ।
രാജാ ജയതി സുഗ്രീവോ രാഘവേണാഭിപാലിതഃ ॥ 8 ॥
ദാസോഽഹം കോസലേന്ദ്രസ്യ രാമസ്യാക്ലിഷ്ടകര്മണഃ ।
ഹനുമാന്ശത്രുസൈന്യാനാം നിഹന്താ മാരുതാത്മജഃ ॥ 9 ॥
ന രാവണസഹസ്രം മേ യുദ്ധേ പ്രതിബലം ഭവേത് ।
ശിലാഭിസ്തു പ്രഹരതഃ പാദപൈശ്ച സഹസ്രശഃ ॥ 10 ॥
അര്ദയിത്വാ പുരീം ലങ്കാമഭിവാദ്യ ച മൈഥിലീമ് ।
സമൃദ്ധാര്ഥോ ഗമിഷ്യാമി മിഷതാം സര്വരക്ഷസാമ് ॥ 11 ॥
ഏവമുക്ത്വാ വിമാനസ്ഥശ്ചൈത്യസ്ഥാന്ഹരിയൂഥപഃ ।
നനാദ ഭീമനിര്ഹ്രാദോ രക്ഷസാം ജനയന്ഭയമ് ॥ 12 ॥
തേന ശബ്ദേന മഹതാ ചൈത്യപാലാശ്ശതം യയുഃ ।
ഗൃഹീത്വാ വിവിധാനസ്ത്രാന്പ്രാസാന്ഖങ്ഗാന്പരശ്വഥാന് ॥ 13 ॥
വിസൃജന്തോ മഹാകായാ മാരുതിം പര്യവാരയന് ।
തേ ഗദാഭിര്വിചിത്രാഭിഃ പരിഘൈഃ കാഞ്ചനാങ്ഗദൈഃ ।
ആജഘ്നുര്വാനരശ്രേഷ്ഠം ബാണൈശ്ചാദിത്യസന്നിഭൈഃ ॥ 14 ॥
ആവര്ത ഇവ ഗങ്ഗായാസ്തോയസ്യ വിപുലോ മഹാന് ।
പരിക്ഷിപ്യ ഹരിശ്രേഷ്ഠം സ ബഭൌ രക്ഷസാം ഗണഃ ॥ 15 ॥
തതോ വാതാത്മജഃ ക്രുദ്ധോ ഭീമ രൂപം സമാസ്ഥിതഃ ॥ 16 ॥
പ്രാസാദസ്യ മഹന്തസ്യ സ്തമ്ബം ഹേമപരിഷ്കൃതമ് ।
ഉത്പാടയിത്വാ വേഗേന ഹനുമാന്പവനാത്മജഃ ॥ 17 ॥
തതസ്തം ഭ്രാമയാമാസ ശതധാരം മഹാബലഃ ।
തത്ര ചാഗ്നിസ്സമഭവത്പ്രാസാദശ്ചാപ്യദഹ്യത ॥ 18 ॥
ദഹ്യമാനം തതോ ദൃഷ്ട്വാ പ്രാസാദം ഹരിയൂഥപഃ ।
സ രാക്ഷസശതം ഹത്ത്വാ വജ്രേണേന്ദ്ര ഇവാസുരാന് ॥ 19 ॥
അന്തരിക്ഷേ സ്ഥിതശ്ശ്തീമാനിദം വചനമബ്രവീത് ।
മാദൃശാനാം സഹസ്രാണി വിസൃഷ്ടാനി മഹാത്മനാമ് ॥ 20 ॥
ബലിനാം വാനരേന്ദ്രാണാം സുഗ്രീവവശവര്തിനാമ് ।
അടന്തി വസുധാം കൃത്സ്നാം വയമന്യേ ച വാനരാഃ ॥ 21 ॥
ദശനാഗബലാഃ കേചിത്കേചിദ്ദശഗുണോത്തരാഃ ।
കേചിന്നാഗസഹസ്രസ്യ ബഭൂവുസ്തുല്യവിക്രമാഃ ॥ 22 ॥
സന്തി ചൌഘബലാഃ കേചിത്കേചിദ്വായുബലോപമാഃ ।
അപ്രമേയബലാശ്ചാന്യേ തത്രാസന്ഹരിയൂഥപാഃ ॥ 23 ॥
ഈദൃഗ്വിധൈസ്തു ഹരിഭിര്വൃതോ ദന്തനഖായുധൈഃ ।
ശതൈശ്ശതസഹസ്രൈശ്ച കോടീഭിരയുതൈരപി ॥ 24 ॥
ആഗമിഷ്യതി സുഗ്രീവഃ സര്വേഷാം വോ നിഷൂദനഃ ।
നേയമസ്തി പുരീ ലങ്കാ ന യൂയം ന ച രാവണഃ ॥ 25 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ സുന്ദരകാണ്ഡേ ത്രിചത്വാരിംശസ്സര്ഗഃ ॥
Roman (IAST) Transliteration
śrīmadvālmīkīya rāmāyaṇe sundarakāṇḍam |
atha tricatvāriṃśassargaḥ |
tatassa kiṅkarānhatvā hanumāndhyānamāsthitaḥ |
vanaṃ bhagnaṃ mayā caityaprāsādo na vināśitaḥ || 1 ||
tasmātprāsādamapyevaṃ bhīmaṃ vidhvaṃsayāmyaham |
iti sañcintya manasā hanumāndarśayanbalam || 2 ||
caityaprāsādamāplutya meruśṛṅgamivonnatam |
āruroha kapiśreṣṭho hanumānmārutātmajaḥ || 3 ||
āruhya girisaṅkāśaṃ prāsādaṃ hariyūthapaḥ |
babhau sa sumahātejāḥ pratisūrya ivoditaḥ || 4 ||
sampradhṛṣya ca durdharṣaṃ caityaprāsādamuttamam |
hanumānprajvalanlakṣmyā pāriyātropamo'bhavat || 5 ||
sa bhūtvā sumahākāyaḥ prabhāvānmārutātmajaḥ |
dhṛṣṭamāsphoṭayāmāsa laṅkāṃ śabdena pūrayan || 6 ||
tasyāsphoṭitaśabdena mahatā śrotraghātinā |
peturvihaṅgamāstatra caityapālāśca mohitāḥ || 7 ||
astravijjayatāṃ rāmo lakṣmaṇaśca mahābalaḥ |
rājā jayati sugrīvo rāghaveṇābhipālitaḥ || 8 ||
dāso'haṃ kosalendrasya rāmasyākliṣṭakarmaṇaḥ |
hanumānśatrusainyānāṃ nihantā mārutātmajaḥ || 9 ||
na rāvaṇasahasraṃ me yuddhe pratibalaṃ bhavet |
śilābhistu praharataḥ pādapaiśca sahasraśaḥ || 10 ||
ardayitvā purīṃ laṅkāmabhivādya ca maithilīm |
samṛddhārtho gamiṣyāmi miṣatāṃ sarvarakṣasām || 11 ||
evamuktvā vimānasthaścaityasthānhariyūthapaḥ |
nanāda bhīmanirhrādo rakṣasāṃ janayanbhayam || 12 ||
tena śabdena mahatā caityapālāśśataṃ yayuḥ |
gṛhītvā vividhānastrānprāsānkhaṅgānparaśvathān || 13 ||
visṛjanto mahākāyā mārutiṃ paryavārayan |
te gadābhirvicitrābhiḥ parighaiḥ kāñcanāṅgadaiḥ |
ājaghnurvānaraśreṣṭhaṃ bāṇaiścādityasannibhaiḥ || 14 ||
āvarta iva gaṅgāyāstoyasya vipulo mahān |
parikṣipya hariśreṣṭhaṃ sa babhau rakṣasāṃ gaṇaḥ || 15 ||
tato vātātmajaḥ kruddho bhīma rūpaṃ samāsthitaḥ || 16 ||
prāsādasya mahantasya stambaṃ hemapariṣkṛtam |
utpāṭayitvā vegena hanumānpavanātmajaḥ || 17 ||
tatastaṃ bhrāmayāmāsa śatadhāraṃ mahābalaḥ |
tatra cāgnissamabhavatprāsādaścāpyadahyata || 18 ||
dahyamānaṃ tato dṛṣṭvā prāsādaṃ hariyūthapaḥ |
sa rākṣasaśataṃ hattvā vajreṇendra ivāsurān || 19 ||
antarikṣe sthitaśśtīmānidaṃ vacanamabravīt |
mādṛśānāṃ sahasrāṇi visṛṣṭāni mahātmanām || 20 ||
balināṃ vānarendrāṇāṃ sugrīvavaśavartinām |
aṭanti vasudhāṃ kṛtsnāṃ vayamanye ca vānarāḥ || 21 ||
daśanāgabalāḥ kecitkeciddaśaguṇottarāḥ |
kecinnāgasahasrasya babhūvustulyavikramāḥ || 22 ||
santi caughabalāḥ kecitkecidvāyubalopamāḥ |
aprameyabalāścānye tatrāsanhariyūthapāḥ || 23 ||
īdṛgvidhaistu haribhirvṛto dantanakhāyudhaiḥ |
śataiśśatasahasraiśca koṭībhirayutairapi || 24 ||
āgamiṣyati sugrīvaḥ sarveṣāṃ vo niṣūdanaḥ |
neyamasti purī laṅkā na yūyaṃ na ca rāvaṇaḥ || 25 ||
ityārṣe śrīmadrāmāyaṇe vālmīkīya ādikāvye sundarakāṇḍe tricatvāriṃśassargaḥ ||
InfoLyter.in — Sacred Vedic Knowledge Portal · Free forever