5.29 Sundarakanda - Ekonatrimsha Sargah

ॐ

5.29 സുന്ദരകാണ്ഡ - ഏകോനത്രിംശ സര്ഗഃ

Valmiki Malayalam

ശ്രീമദ്വാല്മീകീയ രാമായണേ സുന്ദരകാണ്ഡമ് ।

അഥ ഏകോനത്രിംശസ്സര്ഗഃ ।

തഥാഗതാം താം വ്യഥിതാമനിന്ദിതാം വ്യപേതഹര്ഷാം പരിദീനമാനസാമ് ।

ശുഭാം നിമിത്താനി ശുഭാനി ഭേജിരേ നരം ശ്രിയാ ജുഷ്ടമിവോപജീവിനഃ ॥ 1 ॥

തസ്യാഃ ശുഭം വാമമരാലപക്ഷ്മ രാജീവൃതം കൃഷ്ണവിശാലശുക്ലമ് ।

പ്രാസ്പന്ദതൈകം നയനം സുകേശ്യാ മീനാഹതം പദ്മമിവാഭിതാമ്രമ് ॥ 2 ॥

ഭുജശ്ച ചാര്വഞ്ചിതപീനവൃത്തഃ പരാര്ഥ്യകാലാഗരുചന്ദനാര്ഹഃ ।

അനുത്തമേനാധ്യുഷിതഃ പ്രിയേണ ചിരേണ വാമഃ സമവേപതാഽശു ॥ 3 ॥

ഗജേന്ദ്രഹസ്തപ്രതിമശ്ച പീന സ്തയോര്ദ്വയോഃ സമ്ഹതയോഃ സുജാതഃ ।

പ്രസ്പന്ദമാനഃ പുനരൂരുരസ്യാ രാമം പുരസ്താത് സ്ഥിതമാചചക്ഷേ ॥ 4 ॥

ശുഭം പുനര്ഹേമസമാനവര്ണ മീഷദ്രജോധ്വസ്തമിവാമലാക്ഷ്യാഃ ।

വാസ സ്സ്ഥിതായാ ശ്ശിഖരാഗ്രദന്ത്യാഃ കിഞ്ചിത്പരിസ്രംസത ചാരുഗാത്യ്രാഃ ॥ 5 ॥

ഏതൈര്നിമിത്തൈരപരൈശ്ച സുഭ്രൂഃ സമ്ബോധിതാ പ്രാഗപി സാധു സിദ്ധൈഃ ।

വാതാതപക്ലാന്തമിവ പ്രണഷ്ടം വര്ഷേണ ബീജം പ്രതിസഞ്ജഹര്ഷ ॥ 6 ॥

തസ്യാഃ പുനര്ബിമ്ബഫലാധരോഷ്ഠം സ്വക്ഷിഭ്രുകേശാന്തമരാലപക്ഷ്മ ।

വക്ത്രം ബഭാസേ സിതശുക്ലദംഷ്ട്രം രാഹോര്മുഖാച്ചന്ദ്ര ഇവ പ്രമുക്തഃ ॥ 7 ॥

സാ വീതശോകാ വ്യപനീതതന്ദ്രീ ശാന്തജ്വരാ ഹര്ഷവിബുദ്ധസത്ത്വാ ।

അശോഭതാര്യാ വദനേന ശുക്ലേ ശീതാംശുനാ രാത്രിരിവോദിതേന ॥ 8 ॥

ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ സുന്ദരകാണ്ഡേ ഏകോനത്രിംശസ്സര്ഗഃ ॥

Roman (IAST) Transliteration

śrīmadvālmīkīya rāmāyaṇe sundarakāṇḍam |

atha ekonatriṃśassargaḥ |

tathāgatāṃ tāṃ vyathitāmaninditāṃ vyapetaharṣāṃ paridīnamānasām |

śubhāṃ nimittāni śubhāni bhejire naraṃ śriyā juṣṭamivopajīvinaḥ || 1 ||

tasyāḥ śubhaṃ vāmamarālapakṣma rājīvṛtaṃ kṛṣṇaviśālaśuklam |

prāspandataikaṃ nayanaṃ sukeśyā mīnāhataṃ padmamivābhitāmram || 2 ||

bhujaśca cārvañcitapīnavṛttaḥ parārthyakālāgarucandanārhaḥ |

anuttamenādhyuṣitaḥ priyeṇa cireṇa vāmaḥ samavepatā'śu || 3 ||

gajendrahastapratimaśca pīna stayordvayoḥ samhatayoḥ sujātaḥ |

praspandamānaḥ punarūrurasyā rāmaṃ purastāt sthitamācacakṣe || 4 ||

śubhaṃ punarhemasamānavarṇa mīṣadrajodhvastamivāmalākṣyāḥ |

vāsa ssthitāyā śśikharāgradantyāḥ kiñcitparisraṃsata cārugātyrāḥ || 5 ||

etairnimittairaparaiśca subhrūḥ sambodhitā prāgapi sādhu siddhaiḥ |

vātātapaklāntamiva praṇaṣṭaṃ varṣeṇa bījaṃ pratisañjaharṣa || 6 ||

tasyāḥ punarbimbaphalādharoṣṭhaṃ svakṣibhrukeśāntamarālapakṣma |

vaktraṃ babhāse sitaśukladaṃṣṭraṃ rāhormukhāccandra iva pramuktaḥ || 7 ||

sā vītaśokā vyapanītatandrī śāntajvarā harṣavibuddhasattvā |

aśobhatāryā vadanena śukle śītāṃśunā rātririvoditena || 8 ||

ityārṣe śrīmadrāmāyaṇe vālmīkīya ādikāvye sundarakāṇḍe ekonatriṃśassargaḥ ||