📄 Save this Stotram as PDF Click the button to open the Save dialog
How to save: 1 Click "Save as PDF" → 2 A dialog opens → 3 Choose "Save as PDF" as printer → 4 Click Save
ॐ
5.17 സുന്ദരകാണ്ഡ - സപ്തദശ സര്ഗഃ
5.17 Sundarakanda - Saptadasha Sargah
Valmiki Malayalam
ശ്രീമദ്വാല്മീകീയ രാമായണേ സുന്ദരകാണ്ഡമ് ।
അഥ സപ്തദശസ്സര്ഗഃ ।
തതഃ കമുദഷണ്ഡാഭോ നിര്മലം നിര്മലോദയഃ ।
പ്രജഗാമ നഭശ്ചന്ദ്രോ ഹംസോ നീലമിവോദകമ് ॥ 1 ॥
സാചിവ്യമിവ കുര്വന് സ പ്രഭയാ നിര്മലപ്രഭഃ ।
ചന്ദ്രമാ രശ്മിഭിശ്ശീതൈസ്സിഷേവേ പവനാത്മജമ് ॥ 2 ॥
സ ദദര്ശ തതഃ സീതാം പൂര്ണചന്ദ്രനിഭാനനാമ് ।
ശോകഭാരൈരിവ ന്യസ്താം ഭാരൈര്നാവമിവാമ്ഭസി ॥ 3 ॥
ദിദൃക്ഷമാണോ വൈദേഹീം ഹനുമാന്മാരുതാത്മജഃ ।
സ ദദര്ശാവിദൂരസ്ഥാ രാക്ഷസീര്ഘോരദര്ശനാഃ ॥ 4 ॥
ഏകാക്ഷീമേകകര്ണാം ച കര്ണപ്രാവരണാം തഥാ ।
അകര്ണാം ശങ്കുകര്ണാം ച മസ്തകോച്ഛ്വാസനാസികാമ് ॥ 5 ॥
അതികായോത്തമാങ്ഗീം ച തനുദീര്ഘശിരോധരാമ് ।
ധ്വസ്തകേശീം തഥാഽകേശീം കേശകമ്ബലധാരിണീമ് ॥ 6 ॥
ലമ്ബകര്ണലലാടാം ച ലമ്ബോദരപയോധരാമ് ।
ലമ്ബോഷ്ഠീം ചുബുകോഷ്ഠീം ച ലമ്ബാസ്യാം ലമ്ബജാനുകാമ് ॥ 7 ॥
ഹ്രസ്വാം ദീര്ഘാം തഥാ കുബ്ജാം വികടാം വാമനാം തഥാ ।
കരാലാം ഭുഗ്നവക്ത്രാം ച പിങ്ഗാക്ഷീം വികൃതാനനാമ് ॥ 8 ॥
വികൃതാഃ പിങ്ഗലാഃ കാലീഃ ക്രോധനാഃ കലഹപ്രിയാഃ ।
കാലായസമഹാശൂലകൂടമുദ്ഗരധാരിണീഃ ॥ 9 ॥
വരാഹമൃഗശാര്ദൂലമഹിഷാജശിവാമുഖീഃ ।
ഗജോഷ്ട്രഹയപാദീശ്ച നിഖാതശിരസോഽപരാഃ ॥ 10 ॥
ഏകഹസ്തൈകപാദാശ്ച ഖരകര്ണ്യശ്വകര്ണികാഃ ।
ഗോകര്ണീര്ഹസ്തികര്ണീശ്ച ഹരികര്ണീസ്തഥാപരാഃ ॥ 11 ॥
അനാസാ അതിനാസാശ്ച തിര്യങ്നാസാ വിനാസികാഃ ।
ഗജസന്നിഭനാസാശ്ച ലലാടോച്ഛവാസനാസികാഃ ॥ 12 ॥
ഹസ്തിപാദാ മഹാപാദാ ഗോപാദാഃ പാദചൂലികാഃ ।
അതിമാത്രശിരോഗ്രീവാ അതിമാത്രകുചോദരീഃ ॥ 13 ॥
അതിമാത്രാസ്യനേത്രാശ്ച ദീര്ഘജിഹ്വാനഖാസ്തഥാ ।
അജാമുഖീര്ഹസ്തിമുഖീര്ഗോമുഖീസ്സൂകരീമുഖീഃ ॥ 14 ॥
ഹയോഷ്ട്രഖരവക്ത്രാശ്ച രാക്ഷസീര്ഘോരദര്ശനാഃ ।
ശൂലമുദ്ഗരഹസ്താശ്ച ക്രോധനാഃ കലഹപ്രിയാഃ ॥ 15 ॥
കരാലാ ധൂമ്രകേശീശ്ച രാക്ഷസീര്വികൃതാനനാഃ ।
പിബന്തീഃ സതതം പാനം സദാ മാംസസുരാപ്രിയാഃ ॥ 16 ॥
മാംസശോണിതദിഗ്ധാങ്ഗീര്മാംസശോണിതഭോജനാഃ ।
താ ദദര്ശ കപിശ്രേഷ്ഠോ രോമഹര്ഷണദര്ശനാഃ ॥ 17 ॥
സ്കന്ധവന്തമുപാസീനാഃ പരിവാര്യ വനസ്പതിമ് ।
തസ്യാധസ്താച്ച താം ദേവീം രാജപുത്രീമനിന്ദിതാമ് ॥ 18 ॥
ലക്ഷയാമാസ ലക്ഷ്മീവാന് ഹനുമാന് ജനകാത്മജാമ് ।
നിഷ്പ്രഭാം ശോകസന്തപ്താം മലസങ്കുലമൂര്ധജാമ് ॥ 19 ॥
ക്ഷീണപുണ്യാം ച്യുതാം ഭൂമൌ താരാം നിപതിതാമിവ ।
ചാരിത്രവ്യപദേശാഢ്യാം ഭര്തൃദര്ശനദുര്ഗതാമ് ॥ 20 ॥
ഭൂഷണൈരുത്തമൈര്ഹീനാം ഭര്തൃവാത്സല്യഭൂഷണാമ് ।
രാക്ഷസാധിപസംരുദ്ധാം ബന്ധുഭിശ്ച വിനാ കൃതാമ് ॥ 21 ॥
വിയൂഥാം സിംഹസംരുദ്ധാം ബദ്ധാം ഗജവധൂമിവ ।
ചന്ദ്രരേഖാം പയോദാന്തേ ശാരദാഭ്രൈരിവാവൃതാമ് ॥ 22 ॥
ക്ലിഷ്ടരൂപാമസംസ്പര്ശാദയുക്താമിവ വല്ലകീമ് ।
സീതാം ഭര്തൃവശേ യുക്താമയുക്താം രാക്ഷസീവശേ ॥ 23 ॥
അശോകവനികാമഥ്യേ ശോകസാഗരമാപ്ലുതാമ് ।
താഭിഃ പരിവൃതാം തത്ര സഗ്രഹാമിവ രോഹിണീമ് ॥ 24 ॥
ദദര്ശ ഹനുമാന് ദേവീം ലതാമകുസുമാമിവ ।
സാ മലേന ച ദിഗ്ധാങ്ഗീ വപുഷാ ചാപ്യലങ്കൃതാ ॥ 25 ॥
മൃണാലീ പങ്കദിഗ്ധേവ വിഭാതി ന വിഭാതി ച ।
മലിനേന തു വസ്ത്രേണ പരിക്ലിഷ്ടേന ഭാമിനീമ് ॥ 26 ॥
സംവൃതാം മൃഗശാബാക്ഷീം ദദര്ശ ഹനുമാന് കപിഃ ।
താം ദേവീം ദീനവദനാമദീനാം ഭര്തൃതേജസാ ॥ 27 ॥
രക്ഷിതാം സ്വേന ശീലേന സീതാമസിതലോചനാമ് ।
താം ദൃഷ്ട്വാ ഹനുമാന് സീതാം മൃഗശാബനിഭേക്ഷണാമ് ।
മൃഗകന്യാമിവ ത്രസ്താം വീക്ഷമാണാം സമന്തതഃ ॥ 28 ॥
ദഹന്തീമിവ നിഃശ്വാസൈര്വൃക്ഷാന് പല്ലവധാരിണഃ ।
സങ്ഘാതമിവ ശോകാനാം ദുഃഖസ്യോര്മിമിവോത്ഥിതാമ് ॥ 29 ॥
താം ക്ഷമാം സുവിഭക്താങ്ഗീ വിനാഭരണശോഭിനീമ് ॥ 30 ॥
പ്രഹര്ഷമതുലം ലേഭേ മാരുതിഃ പ്രേക്ഷ്യ മൈഥിലീമ് ।
ഹര്ഷജാനി ച സോഽശ്രൂണി താം ദൃഷ്ട്വാ മദിരേക്ഷണാമ് ।
മുമുചേ ഹനുമാംസ്തത്ര നമശ്ചക്രേ ച രാഘവമ് ॥ 31 ॥
നമസ്കൃത്വാ ച രാമായ ലക്ഷ്മണായ ച വീര്യവാന് ।
സീതാദര്ശനസംഹൃഷ്ടോ ഹനുമാന് സംവൃതോഽഭവത് ॥ 32 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ സുന്ദരകാണ്ഡേ സപ്തദശസ്സര്ഗഃ ॥
Roman (IAST) Transliteration
śrīmadvālmīkīya rāmāyaṇe sundarakāṇḍam |
atha saptadaśassargaḥ |
tataḥ kamudaṣaṇḍābho nirmalaṃ nirmalodayaḥ |
prajagāma nabhaścandro haṃso nīlamivodakam || 1 ||
sācivyamiva kurvan sa prabhayā nirmalaprabhaḥ |
candramā raśmibhiśśītaissiṣeve pavanātmajam || 2 ||
sa dadarśa tataḥ sītāṃ pūrṇacandranibhānanām |
śokabhārairiva nyastāṃ bhārairnāvamivāmbhasi || 3 ||
didṛkṣamāṇo vaidehīṃ hanumānmārutātmajaḥ |
sa dadarśāvidūrasthā rākṣasīrghoradarśanāḥ || 4 ||
ekākṣīmekakarṇāṃ ca karṇaprāvaraṇāṃ tathā |
akarṇāṃ śaṅkukarṇāṃ ca mastakocchvāsanāsikām || 5 ||
atikāyottamāṅgīṃ ca tanudīrghaśirodharām |
dhvastakeśīṃ tathā'keśīṃ keśakambaladhāriṇīm || 6 ||
lambakarṇalalāṭāṃ ca lambodarapayodharām |
lamboṣṭhīṃ cubukoṣṭhīṃ ca lambāsyāṃ lambajānukām || 7 ||
hrasvāṃ dīrghāṃ tathā kubjāṃ vikaṭāṃ vāmanāṃ tathā |
karālāṃ bhugnavaktrāṃ ca piṅgākṣīṃ vikṛtānanām || 8 ||
vikṛtāḥ piṅgalāḥ kālīḥ krodhanāḥ kalahapriyāḥ |
kālāyasamahāśūlakūṭamudgaradhāriṇīḥ || 9 ||
varāhamṛgaśārdūlamahiṣājaśivāmukhīḥ |
gajoṣṭrahayapādīśca nikhātaśiraso'parāḥ || 10 ||
ekahastaikapādāśca kharakarṇyaśvakarṇikāḥ |
gokarṇīrhastikarṇīśca harikarṇīstathāparāḥ || 11 ||
anāsā atināsāśca tiryaṅnāsā vināsikāḥ |
gajasannibhanāsāśca lalāṭocchavāsanāsikāḥ || 12 ||
hastipādā mahāpādā gopādāḥ pādacūlikāḥ |
atimātraśirogrīvā atimātrakucodarīḥ || 13 ||
atimātrāsyanetrāśca dīrghajihvānakhāstathā |
ajāmukhīrhastimukhīrgomukhīssūkarīmukhīḥ || 14 ||
hayoṣṭrakharavaktrāśca rākṣasīrghoradarśanāḥ |
śūlamudgarahastāśca krodhanāḥ kalahapriyāḥ || 15 ||
karālā dhūmrakeśīśca rākṣasīrvikṛtānanāḥ |
pibantīḥ satataṃ pānaṃ sadā māṃsasurāpriyāḥ || 16 ||
māṃsaśoṇitadigdhāṅgīrmāṃsaśoṇitabhojanāḥ |
tā dadarśa kapiśreṣṭho romaharṣaṇadarśanāḥ || 17 ||
skandhavantamupāsīnāḥ parivārya vanaspatim |
tasyādhastācca tāṃ devīṃ rājaputrīmaninditām || 18 ||
lakṣayāmāsa lakṣmīvān hanumān janakātmajām |
niṣprabhāṃ śokasantaptāṃ malasaṅkulamūrdhajām || 19 ||
kṣīṇapuṇyāṃ cyutāṃ bhūmau tārāṃ nipatitāmiva |
cāritravyapadeśāḍhyāṃ bhartṛdarśanadurgatām || 20 ||
bhūṣaṇairuttamairhīnāṃ bhartṛvātsalyabhūṣaṇām |
rākṣasādhipasaṃruddhāṃ bandhubhiśca vinā kṛtām || 21 ||
viyūthāṃ siṃhasaṃruddhāṃ baddhāṃ gajavadhūmiva |
candrarekhāṃ payodānte śāradābhrairivāvṛtām || 22 ||
kliṣṭarūpāmasaṃsparśādayuktāmiva vallakīm |
sītāṃ bhartṛvaśe yuktāmayuktāṃ rākṣasīvaśe || 23 ||
aśokavanikāmathye śokasāgaramāplutām |
tābhiḥ parivṛtāṃ tatra sagrahāmiva rohiṇīm || 24 ||
dadarśa hanumān devīṃ latāmakusumāmiva |
sā malena ca digdhāṅgī vapuṣā cāpyalaṅkṛtā || 25 ||
mṛṇālī paṅkadigdheva vibhāti na vibhāti ca |
malinena tu vastreṇa parikliṣṭena bhāminīm || 26 ||
saṃvṛtāṃ mṛgaśābākṣīṃ dadarśa hanumān kapiḥ |
tāṃ devīṃ dīnavadanāmadīnāṃ bhartṛtejasā || 27 ||
rakṣitāṃ svena śīlena sītāmasitalocanām |
tāṃ dṛṣṭvā hanumān sītāṃ mṛgaśābanibhekṣaṇām |
mṛgakanyāmiva trastāṃ vīkṣamāṇāṃ samantataḥ || 28 ||
dahantīmiva niḥśvāsairvṛkṣān pallavadhāriṇaḥ |
saṅghātamiva śokānāṃ duḥkhasyormimivotthitām || 29 ||
tāṃ kṣamāṃ suvibhaktāṅgī vinābharaṇaśobhinīm || 30 ||
praharṣamatulaṃ lebhe mārutiḥ prekṣya maithilīm |
harṣajāni ca so'śrūṇi tāṃ dṛṣṭvā madirekṣaṇām |
mumuce hanumāṃstatra namaścakre ca rāghavam || 31 ||
namaskṛtvā ca rāmāya lakṣmaṇāya ca vīryavān |
sītādarśanasaṃhṛṣṭo hanumān saṃvṛto'bhavat || 32 ||
ityārṣe śrīmadrāmāyaṇe vālmīkīya ādikāvye sundarakāṇḍe saptadaśassargaḥ ||
InfoLyter.in — Sacred Vedic Knowledge Portal · Free forever