📄 Save this Stotram as PDF Click the button to open the Save dialog
How to save: 1 Click "Save as PDF" → 2 A dialog opens → 3 Choose "Save as PDF" as printer → 4 Click Save
ॐ
4.45 കിഷ്കിന്ധാകാണ്ഡ - പഞ്ചചത്വാരിംശ സര്ഗഃ
4.45 Kishkindhakanda - Panchachatvarimsha Sargah
Valmiki Malayalam
ശ്രീമദ്വാല്മീകീയ രാമായണേ കിഷ്കിന്ധാകാണ്ഡമ് ।
അഥ പഞ്ചചത്വാരിംശസ്സര്ഗഃ ।
സര്വാംശ്ചാഹൂയ സുഗ്രീവഃ പ്ലവഗാന് പ്ലവഗര്ഷഭഃ ।
സമസ്താനബ്രവീദ്ഭൂയോ രാമകാര്യര്ഥസിദ്ധയേ ॥ 1 ॥
ഏവമേതദ്വിചേതവ്യം യന്മയാ പരികീര്തിതമ് ।
തദുഗ്രശാസനം ഭര്തുര്വിജ്ഞായ ഹരിപുങ്ഗവാഃ ॥ 2 ॥
ശലഭാ ഇവ സഞ്ഛാദ്യ മേദിനീം സമ്പ്രതസ്ഥിരേ ।
രാമഃ പ്രസ്രവണേ തസ്മിന്യവസത്സഹലക്ഷ്മണഃ ॥ 3 ॥
പ്രതീക്ഷമാണസ്തം മാസം യസ്സീതാധിഗമേ കൃതഃ ।
ഉത്തരാം തു ദിശം രമ്യാം ഗിരിരാജസമാവൃതാമ് ॥ 4 ॥
പ്രതസ്ഥേ സഹസാ വീരോ ഹരിശ്ശതവലിസ്തദാ ।
പൂര്വാം ദിശം പ്രതിയയൌ വിനതോ ഹരിയൂഥപഃ ॥ 5 ॥
താരാങ്ഗദാദിസഹിതഃ പ്ലവങ്ഗോ മാരുതാത്മജഃ ।
അഗത്യാചരിതാമാശാം ദക്ഷിണാം ഹരിയൂഥപഃ ॥ 6 ॥
പശ്ചിമാം തു ഭൃശം ഘോരാം സുഷേണഃ പ്ലവഗേശ്വരഃ ।
പ്രതസ്ഥേ ഹരിശാര്ദൂലോ ദിശം വരുണപാലിതാമ് ॥ 7 ॥
തതസ്സര്വാ ദിശോ രാജാ ചോദയിത്വാ യഥാതഥമ് ।
കപിസേനാപതീന്മുഖ്യാന്മുമോദ സുഖിതസ്സുഖമ് ॥ 8 ॥
ഏവം സമ്ബോധിതാസ്സര്വേ രാജ്ഞാ വാനരയൂഥപാഃ ।
സ്വാം സ്വാം ദിശമഭിപ്രത്ത്യ ത്വരിതാ സമ്പ്രതസ്ഥിരേ ॥ 9 ॥
നദന്തശ്ചോന്നദന്തശ്ച ഗര്ജന്തശ്ച പ്ലവങ്ഗമാഃ ।
ക്ഷ്വേലന്തോ ധാവമാനാശ്ച വിനദന്തോ മഹാബലാഃ ॥ 10 ॥
ഏവം സമ്ബോദിതാസ്സര്വേ രാജ്ഞാ വാനരയൂഥപാഃ ।
ആനയിഷ്യാമഹേ സീതാം ഹനിഷ്യാമശ്ച രാവണമ് ॥ 11 ॥
അഹമേകോ ഹനിഷ്യാമി രാവണം പ്രാപ്തമാഹവേ ।
തതശ്ചോന്മഥ്യ സഹസാ ഹരിഷ്യേ ജനകാത്മജാമ് ॥ 12 ॥
വേപമാനാം ശ്രമേണാദ്യ ഭവദ്ഭിഃ സ്ഥീയതാമിതി ।
ഏക ഏവാഹരിഷ്യാമി പാതാലാദപി ജാനകീമ് ॥ 13 ॥
വധിഷ്യാമ്യഹം വൃക്ഷാന് ദാരയിഷ്യാമ്യഹം ഗിരീന് ।
ധരണീം ദാരയിഷ്യാമി ക്ഷോഭയിഷ്യാമി സാഗരാന് ॥ 14 ॥
അഹം യോജനസങ്ഖ്യായാഃ പ്ലവിതാ നാത്ര സംശയഃ ।
ശതം യോജനസങ്ഖ്യായാശ്ശതം സമധികം ഹ്യഹമ് ॥ 15 ॥
ഭൂതലേ സാഗരേ വാഽപി ശൈലേഷു ച വനേഷു ച ।
പാതാലസ്യാപി വാ മധ്യേ ന മമാച്ഛിദ്യതേ ഗതിഃ ॥ 16 ॥
ഇത്യേകൈകം തദാ തത്ര വാനരാ ബലദര്പിതാഃ ।
ഊചുശ്ച വചനം തത്ര ഹരിരാജസ്യ സന്നിധൌ ॥ 17 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ കിഷ്കിന്ധാകാണ്ഡേ പഞ്ചചത്വാരിംശസ്സര്ഗഃ ॥
Roman (IAST) Transliteration
śrīmadvālmīkīya rāmāyaṇe kiṣkindhākāṇḍam |
atha pañcacatvāriṃśassargaḥ |
sarvāṃścāhūya sugrīvaḥ plavagān plavagarṣabhaḥ |
samastānabravīdbhūyo rāmakāryarthasiddhaye || 1 ||
evametadvicetavyaṃ yanmayā parikīrtitam |
tadugraśāsanaṃ bharturvijñāya haripuṅgavāḥ || 2 ||
śalabhā iva sañchādya medinīṃ sampratasthire |
rāmaḥ prasravaṇe tasminyavasatsahalakṣmaṇaḥ || 3 ||
pratīkṣamāṇastaṃ māsaṃ yassītādhigame kṛtaḥ |
uttarāṃ tu diśaṃ ramyāṃ girirājasamāvṛtām || 4 ||
pratasthe sahasā vīro hariśśatavalistadā |
pūrvāṃ diśaṃ pratiyayau vinato hariyūthapaḥ || 5 ||
tārāṅgadādisahitaḥ plavaṅgo mārutātmajaḥ |
agatyācaritāmāśāṃ dakṣiṇāṃ hariyūthapaḥ || 6 ||
paścimāṃ tu bhṛśaṃ ghorāṃ suṣeṇaḥ plavageśvaraḥ |
pratasthe hariśārdūlo diśaṃ varuṇapālitām || 7 ||
tatassarvā diśo rājā codayitvā yathātatham |
kapisenāpatīnmukhyānmumoda sukhitassukham || 8 ||
evaṃ sambodhitāssarve rājñā vānarayūthapāḥ |
svāṃ svāṃ diśamabhiprattya tvaritā sampratasthire || 9 ||
nadantaśconnadantaśca garjantaśca plavaṅgamāḥ |
kṣvelanto dhāvamānāśca vinadanto mahābalāḥ || 10 ||
evaṃ samboditāssarve rājñā vānarayūthapāḥ |
ānayiṣyāmahe sītāṃ haniṣyāmaśca rāvaṇam || 11 ||
ahameko haniṣyāmi rāvaṇaṃ prāptamāhave |
tataśconmathya sahasā hariṣye janakātmajām || 12 ||
vepamānāṃ śrameṇādya bhavadbhiḥ sthīyatāmiti |
eka evāhariṣyāmi pātālādapi jānakīm || 13 ||
vadhiṣyāmyahaṃ vṛkṣān dārayiṣyāmyahaṃ girīn |
dharaṇīṃ dārayiṣyāmi kṣobhayiṣyāmi sāgarān || 14 ||
ahaṃ yojanasaṅkhyāyāḥ plavitā nātra saṃśayaḥ |
śataṃ yojanasaṅkhyāyāśśataṃ samadhikaṃ hyaham || 15 ||
bhūtale sāgare vā'pi śaileṣu ca vaneṣu ca |
pātālasyāpi vā madhye na mamācchidyate gatiḥ || 16 ||
ityekaikaṃ tadā tatra vānarā baladarpitāḥ |
ūcuśca vacanaṃ tatra harirājasya sannidhau || 17 ||
ityārṣe śrīmadrāmāyaṇe vālmīkīya ādikāvye kiṣkindhākāṇḍe pañcacatvāriṃśassargaḥ ||
InfoLyter.in — Sacred Vedic Knowledge Portal · Free forever