📄 Save this Stotram as PDF Click the button to open the Save dialog
How to save: 1 Click "Save as PDF" → 2 A dialog opens → 3 Choose "Save as PDF" as printer → 4 Click Save
ॐ
3.71 അരണ്യകാണ്ഡ - ഏകസപ്തതിതമ സര്ഗഃ
3.71 Aranyakanda - Ekasaptatitama Sargah
Valmiki Malayalam
ശ്രീമദ്വാല്മീകീയ രാമായണേ അരണ്യകാണ്ഡമ് ।
അഥ ഏകസപ്തതിതമസ്സര്ഗഃ ।
പുരാ രാമ മഹാബാഹോ മഹാബലപരാക്രമ ।
രൂപമാസീന്മമാ ചിന്ത്യം ത്രിഷു ലോകേഷു വിശ്രുതമ് ॥ 1 ॥
യഥാ സോമസ്യ ശക്രസ്യ സൂര്യസ്യ ച യഥാ വപുഃ ।
സോഽഹം രൂപമിദം കൃത്വാ ലോകവിത്രാസനം മഹത് ॥ 2 ॥
ഋഷീന്വനഗതാന്രാമ ത്രാസയാമി തതസ്തതഃ ।
തതസ്സ്ഥൂലശിരാ നാമ മഹര്ഷിഃ കോപിതോ മയാ ॥ 3 ॥
സഞ്ചിന്വന്വിവിധം വന്യം രൂപേണാനേന ധര്ഷിതഃ ।
തേനാഹമുക്തഃ പ്രേക്ഷ്യൈവം ഘോരശാപാഭിധായിനാ ॥ 4 ॥
ഏതദേവ നൃശംസം തേ രൂപമസ്തു വിഗര്ഹിതമ് ।
സ മയാ യാചിതഃ ക്രുദ്ധശ്ശാപസ്യോന്തോ ഭവേദിതി ॥ 5 ॥
അഭിശാപകൃതസ്യേതി തേനേദം ഭാഷിതം വചഃ ।
യദാ ഛിത്ത്വാ ഭുജൌ രാമസ്ത്വാം ദഹേദ്വിജനേ വനേ ॥ 6 ॥
തദാ ത്വം പ്രാപ്സ്യസേ രൂപം സ്വമേവ വിപുലം ശുഭമ് ।
ശ്രിയാ വിരാജിതം പുത്രം ദനോസ്ത്വം വിദ്ധി ലക്ഷ്മണ ॥ 7 ॥
ഇന്ദ്രകോപാദിദം രൂപം പ്രാപ്തമേവം രണാജിരേ ।
അഹം ഹി തപസോഗ്രേണ പിതാമഹമതോഷയമ് ॥ 8 ॥
ദീര്ഘമായുസ്സ മേ പ്രാദാത്തതോ മാം വിഭ്രമോഽസ്പൃശത് ।
ദീര്ഘമായുര്മയാ പ്രാപ്തം കിം മേ ശക്രഃ കരിഷ്യതി ॥ 9 ॥
ഇത്യേവം ബുദ്ധിമാസ്ഥായ രണേ ശക്രമധര്ഷയമ് ।
തസ്യ ബാഹുപ്രയുക്തേന വജ്രേണ ശതപര്വണാ ॥ 10 ॥
സക്ഥിനീ ചൈവ മൂര്ധാ ച ശരീരേ സമ്പ്രവേശിതമ് ।
സ മയാ യാച്യമാനസ്സന്നാനയദ്യമസാദനമ് ॥ 11 ॥
പിതാമഹവചസ്സത്യം തദസ്ത്വിതി മമാബ്രവീത് ।
അനാഹാരഃ കഥം ശക്തോ ഭഗ്നസക്ഥിശിരോമുഖഃ ॥ 12 ॥
വജ്രേണാഭിഹതഃ കാലം സുദീര്ഘമപി ജീവിതുമ് ।
ഏവമുക്തസ്തു മേ ശക്രോ ബാഹൂ യോജനമായതൌ ॥ 13 ॥
പ്രാദാദാസ്യം ച മേ കുക്ഷൌ തീക്ഷ്ണദംഷ്ട്രമകല്പയത് ।
സോഽഹം ഭുജാഭ്യാം ദീര്ഘാഭ്യാം സങ്കൃഷ്യാസ്മിന്വനേ ചരാന് ॥ 14 ॥
സിംഹവ്ദിപമൃഗവ്യാഘ്രാന് ഭക്ഷയാമി സമന്തതഃ ।
സ തു മാമബ്രവീദിന്ദ്രോ യദാ രാമസ്സലക്ഷ്മണഃ ॥ 15 ॥
ഛേത്സ്യതേ സമരേ ബാഹൂ തദാ സ്വര്ഗം ഗമിഷ്യസി ।
അനേന വപുഷാ രാമ വനേഽസ്മിന്രാജസത്തമ ॥ 16 ॥
യദ്യത്പശ്യാമി സര്വസ്യ ഗ്രഹണം സാധു രോചയേ ।
അവശ്യം ഗ്രഹണം രാമോ മന്യേഽഹം സമുപൈഷ്യതി ॥ 17 ॥
ഇമാം ബുദ്ധിം പുരസ്കൃത്യ ദേഹന്യാസകൃതശ്രമഃ ।
സ ത്വം രാമോഽസി ഭദ്രം തേ നാഹമന്യേന രാഘവ ॥ 18 ॥
ശക്യോ ഹന്തും യഥാതത്ത്വമേവമുക്തം മഹര്ഷിണാ ।
അഹം ഹി മതിസാചിവ്യം കരിഷ്യാമി നരര്ഷഭ ॥ 19 ॥
മിത്രം ചൈവോപദേക്ഷ്യാമി യുവാഭ്യാം സംസ്കൃതോഽഗ്നിനാ ।
ഏവമുക്തസ്തു ധര്മാത്മാ ദനുനാ തേന രാഘവഃ ॥ 20 ॥
ഇദം ജഗാദ വചനം ലക്ഷ്മണസ്യോപശൃണ്വതഃ ।
രാവണേന ഹൃതാ ഭാര്യാ മമ സീതാ യശസ്സ്വിനീ ॥ 21 ॥
നിഷ്ക്രാന്തസ്യ ജനസ്ഥാനാത്സഹഭ്രാത്രാ യഥാസുഖമ് ।
നാമമാത്രം തു ജാനാമി ന രൂപം തസ്യ രക്ഷസഃ ॥ 22 ॥
നിവാസം വാ പ്രഭാവം വാ വയം തസ്യ ന വിദ്മഹേ ।
ശോകാര്താനാമനാഥാനാമേവം വിപരിധാവതാമ് ॥ 23 ॥
കാരുണ്യം സദൃശം കര്തുമുപകാരേ ച വര്തതാമ് ।
കാഷ്ഠാന്യാദായ ശുഷ്കാണി കാലേ ഭഗ്നാനി കുഞ്ജരൈഃ ॥ 24 ॥
ധക്ഷ്യാമസ്ത്വാം വയം വീര ശ്വഭ്രേ മഹതി കല്പിതേ ।
സ ത്വം സീതാം സമാചക്ഷ്വ യേന വാ യത്ര വാ ഹൃതാ ॥ 25 ॥
കുരു കല്യാണമത്യര്ഥം യദി ജാനാസി തത്ത്വതഃ ।
ഏവമുക്തസ്തു രാമേണ വാക്യം ദനുരനുത്തമമ് ॥ 26 ॥
പ്രോവാച കുശലോ വക്തും വക്താരമപി രാഘവമ് ।
ദിവ്യമസ്തി ന മേ ജ്ഞാനം നാഭിജാനാമി മൈഥിലീമ് ॥ 27 ॥
യസ്താം ജ്ഞാസ്യതി തം വക്ഷ്യേ ദഗ്ധസ്സ്വം രൂപമാസ്ഥിതഃ ।
അദഗ്ധസ്യ തു വിജ്ഞാതും ശക്തിരസ്തി ന മേ പ്രഭോ ॥ 28 ॥
രാക്ഷസം തം മഹാവീര്യം സീതാ യേന ഹൃതാ തവ ।
വിജ്ഞാനം ഹി മമ ഭ്രഷ്ടം ശാപദോഷേണ രാഘവ ॥ 29 ॥
സ്വകൃതേന മയാ പ്രാപ്തം രൂപം ലോകവിഗര്ഹിതമ് ।
കിം തു യാവന്ന യാത്യസ്തം സവിതാ ശ്രാന്തവാഹനഃ ॥ 30 ॥
താവന്മാമവടേ ക്ഷിപ്ത്വാ ദഹ രാമ യഥാവിധി ।
ദഗ്ധസ്ത്വയാഹമവടേ ന്യായേന രഘുനന്ധന ॥ 31 ॥
വക്ഷ്യാമി തമഹം വീര യസ്തം ജ്ഞാസ്യതി രാക്ഷസമ് ।
തേന സഖ്യം ച കര്തവ്യം ന്യായ്യവൃത്തേന രാഘവ ॥ 32 ॥
കല്പയിഷ്യതി തേ പ്രീതസ്സാഹായ്യം ലഘുവിക്രമഃ ।
ന ഹി തസ്യാസ്ത്യവിജ്ഞാതം ത്രിഷു ലേകേഷു രാഘവ ॥ 33 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ അരണ്യകാണ്ഡേ ഏകസപ്തതിതമസ്സര്ഗഃ ॥
Roman (IAST) Transliteration
śrīmadvālmīkīya rāmāyaṇe araṇyakāṇḍam |
atha ekasaptatitamassargaḥ |
purā rāma mahābāho mahābalaparākrama |
rūpamāsīnmamā cintyaṃ triṣu lokeṣu viśrutam || 1 ||
yathā somasya śakrasya sūryasya ca yathā vapuḥ |
so'haṃ rūpamidaṃ kṛtvā lokavitrāsanaṃ mahat || 2 ||
ṛṣīnvanagatānrāma trāsayāmi tatastataḥ |
tatassthūlaśirā nāma maharṣiḥ kopito mayā || 3 ||
sañcinvanvividhaṃ vanyaṃ rūpeṇānena dharṣitaḥ |
tenāhamuktaḥ prekṣyaivaṃ ghoraśāpābhidhāyinā || 4 ||
etadeva nṛśaṃsaṃ te rūpamastu vigarhitam |
sa mayā yācitaḥ kruddhaśśāpasyonto bhavediti || 5 ||
abhiśāpakṛtasyeti tenedaṃ bhāṣitaṃ vacaḥ |
yadā chittvā bhujau rāmastvāṃ dahedvijane vane || 6 ||
tadā tvaṃ prāpsyase rūpaṃ svameva vipulaṃ śubham |
śriyā virājitaṃ putraṃ danostvaṃ viddhi lakṣmaṇa || 7 ||
indrakopādidaṃ rūpaṃ prāptamevaṃ raṇājire |
ahaṃ hi tapasogreṇa pitāmahamatoṣayam || 8 ||
dīrghamāyussa me prādāttato māṃ vibhramo'spṛśat |
dīrghamāyurmayā prāptaṃ kiṃ me śakraḥ kariṣyati || 9 ||
ityevaṃ buddhimāsthāya raṇe śakramadharṣayam |
tasya bāhuprayuktena vajreṇa śataparvaṇā || 10 ||
sakthinī caiva mūrdhā ca śarīre sampraveśitam |
sa mayā yācyamānassannānayadyamasādanam || 11 ||
pitāmahavacassatyaṃ tadastviti mamābravīt |
anāhāraḥ kathaṃ śakto bhagnasakthiśiromukhaḥ || 12 ||
vajreṇābhihataḥ kālaṃ sudīrghamapi jīvitum |
evamuktastu me śakro bāhū yojanamāyatau || 13 ||
prādādāsyaṃ ca me kukṣau tīkṣṇadaṃṣṭramakalpayat |
so'haṃ bhujābhyāṃ dīrghābhyāṃ saṅkṛṣyāsminvane carān || 14 ||
siṃhavdipamṛgavyāghrān bhakṣayāmi samantataḥ |
sa tu māmabravīdindro yadā rāmassalakṣmaṇaḥ || 15 ||
chetsyate samare bāhū tadā svargaṃ gamiṣyasi |
anena vapuṣā rāma vane'sminrājasattama || 16 ||
yadyatpaśyāmi sarvasya grahaṇaṃ sādhu rocaye |
avaśyaṃ grahaṇaṃ rāmo manye'haṃ samupaiṣyati || 17 ||
imāṃ buddhiṃ puraskṛtya dehanyāsakṛtaśramaḥ |
sa tvaṃ rāmo'si bhadraṃ te nāhamanyena rāghava || 18 ||
śakyo hantuṃ yathātattvamevamuktaṃ maharṣiṇā |
ahaṃ hi matisācivyaṃ kariṣyāmi nararṣabha || 19 ||
mitraṃ caivopadekṣyāmi yuvābhyāṃ saṃskṛto'gninā |
evamuktastu dharmātmā danunā tena rāghavaḥ || 20 ||
idaṃ jagāda vacanaṃ lakṣmaṇasyopaśṛṇvataḥ |
rāvaṇena hṛtā bhāryā mama sītā yaśassvinī || 21 ||
niṣkrāntasya janasthānātsahabhrātrā yathāsukham |
nāmamātraṃ tu jānāmi na rūpaṃ tasya rakṣasaḥ || 22 ||
nivāsaṃ vā prabhāvaṃ vā vayaṃ tasya na vidmahe |
śokārtānāmanāthānāmevaṃ viparidhāvatām || 23 ||
kāruṇyaṃ sadṛśaṃ kartumupakāre ca vartatām |
kāṣṭhānyādāya śuṣkāṇi kāle bhagnāni kuñjaraiḥ || 24 ||
dhakṣyāmastvāṃ vayaṃ vīra śvabhre mahati kalpite |
sa tvaṃ sītāṃ samācakṣva yena vā yatra vā hṛtā || 25 ||
kuru kalyāṇamatyarthaṃ yadi jānāsi tattvataḥ |
evamuktastu rāmeṇa vākyaṃ danuranuttamam || 26 ||
provāca kuśalo vaktuṃ vaktāramapi rāghavam |
divyamasti na me jñānaṃ nābhijānāmi maithilīm || 27 ||
yastāṃ jñāsyati taṃ vakṣye dagdhassvaṃ rūpamāsthitaḥ |
adagdhasya tu vijñātuṃ śaktirasti na me prabho || 28 ||
rākṣasaṃ taṃ mahāvīryaṃ sītā yena hṛtā tava |
vijñānaṃ hi mama bhraṣṭaṃ śāpadoṣeṇa rāghava || 29 ||
svakṛtena mayā prāptaṃ rūpaṃ lokavigarhitam |
kiṃ tu yāvanna yātyastaṃ savitā śrāntavāhanaḥ || 30 ||
tāvanmāmavaṭe kṣiptvā daha rāma yathāvidhi |
dagdhastvayāhamavaṭe nyāyena raghunandhana || 31 ||
vakṣyāmi tamahaṃ vīra yastaṃ jñāsyati rākṣasam |
tena sakhyaṃ ca kartavyaṃ nyāyyavṛttena rāghava || 32 ||
kalpayiṣyati te prītassāhāyyaṃ laghuvikramaḥ |
na hi tasyāstyavijñātaṃ triṣu lekeṣu rāghava || 33 ||
ityārṣe śrīmadrāmāyaṇe vālmīkīya ādikāvye araṇyakāṇḍe ekasaptatitamassargaḥ ||
InfoLyter.in — Sacred Vedic Knowledge Portal · Free forever