📄 Save this Stotram as PDF Click the button to open the Save dialog
How to save: 1 Click "Save as PDF" → 2 A dialog opens → 3 Choose "Save as PDF" as printer → 4 Click Save
ॐ
3.32 അരണ്യകാണ്ഡ - ദ്വാത്രിംശ സര്ഗഃ
3.32 Aranyakanda - Dvatrimsha Sargah
Valmiki Malayalam
ശ്രീമദ്വാല്മീകീയ രാമായണേ അരണ്യകാണ്ഡമ് ।
അഥ ദ്വാത്രിംശസ്സര്ഗഃ ।
തതശ്ശൂര്പണഖാ ദൃഷ്ട്വാ സഹസ്രാണി ചതുര്ദശ ।
ഹതാന്യേകേന രാമേണ രക്ഷസാം ഭീമകര്മണാമ് ॥ 1 ॥
ദൂഷണം ച ഖരം ചൈവ ഹതം ത്രിശിരസാ സഹ ।
ദൃഷ്ട്വാ പുനര്മഹാനാദം നനാദ ജലദോ യഥാ ॥ 2 ॥
സാ ദൃഷ്ട്വാ കര്മ രാമസ്യ കൃതമന്യൈസ്സുദുഷ്കരമ് ।
ജഗാമ പരമോദ്വിഗ്നാ ലങ്കാം രാവണപാലിതാമ് ॥ 3 ॥
സാ ദദര്ശ വിമാനാഗ്രേ രാവണം ദീപ്തതേജസമ് ।
ഉപോപവിഷ്ടം സചിവൈര്മരുദ്ഭിരിവ വാസവമ് ॥ 4 ॥
ആസീനം സൂര്യസങ്കാശേ കാഞ്ചനേ പരമാസനേ ।
രുക്മവേദിഗതം പ്രാജ്യം ജ്വലന്തമിവ പാവകമ് ॥ 5 ॥
ദേവഗന്ധര്വഭൂതാനാമൃഷീണാം ച മഹാത്മനാമ് ।
അജേയം സമരേ ശൂരം വ്യാത്താനനമിവാന്തകമ് ॥ 6 ॥
ദേവാസുരവിമര്ദേഷു വജ്രാശനികൃതവ്രണമ് ।
ഐരാവതവിഷാണഗ്രൈരുദ്ഘൃഷ്ടകിണവക്ഷസമ് ॥ 7 ॥
വിംശദ്ഭുജം ദശഗ്രീവം ദര്ശനീയപരിച്ഛദമ് ।
വിശാലവക്ഷസം വീരം രാജലക്ഷണ ശോഭിതമ് ॥ 8 ॥
സ്നിഗ്ധവൈഡൂര്യസങ്കാശം തപ്തകാഞ്ചനകുണ്ഡലമ് ।
സുഭുജം ശുക്ലദശനം മഹാസ്യം പര്വതോപമമ് ॥ 9 ॥
വിഷ്ണുചക്രനിപാതൈശ്ച ശതശോ ദേവസംയുഗേ ।
അന്യൈശ്ശസ്ത്രപ്രഹാരൈശ്ച മഹായുദ്ധേഷു താഡിതമ് ॥ 10 ॥
അഹതാങ്ഗം സമസ്തൈശ്ച ദേവപ്രഹരണൈസ്തഥാ ।
അക്ഷോഭ്യാണാം സമുദ്രാണാം ക്ഷോഭണം ക്ഷിപ്രകാരിണമ് ॥ 11 ॥
ക്ഷേപ്താരം പര്വതേന്ദ്രാണാം സുരാണാം ച പ്രമര്ദനമ് ।
ഉച്ഛേത്താരം ച ധര്മാണാം പരദാരാഭിമര്ശനമ് ॥ 12 ॥
സര്വദിവ്യാസ്ത്രയോക്താരം യജ്ഞവിഘ്നകരം സദാ ।
പുരീം ഭോഗവതീം പ്രാപ്യ പരാജിത്യ ച വാസുകിമ് ॥ 13 ॥
തക്ഷകസ്യ പ്രിയാം ഭാര്യാം പരാജിത്യ ജഹാര യഃ ।
കൈലാസപര്വതം ഗത്വാ വിജിത്യ നരവാഹനമ് ।
വിമാനം പുഷ്പകം തസ്യ കാമഗം വൈ ജഹാര യഃ ॥ 14 ॥
വനം ചൈത്രരഥം ദിവ്യം നലിനീം നന്ദനം വനമ് ।
വിനാശയതി യഃ ക്രോധാദ്ദേവോദ്യാനാനി വീര്യവാന് ॥ 15 ॥
ചന്ദ്രസൂര്യൌ മഹാഭാഗാവുത്തിഷ്ഠന്തൌ പരന്തപൌ ।
നിവാരയതി ബാഹുഭ്യാം യശ്ശൈലശിഖരോപമഃ ॥ 16 ॥
ദശവര്ഷസഹസ്രാണി തപസ്തപ്വാ മഹാവനേ ।
പുരാ സ്വയമ്ഭുവേ ധീരശ്ശിരാംസ്യുപജഹാര യഃ ॥ 17 ॥
ദേവദാനവഗന്ധര്വപിശാചപതഗോരഗൈഃ ।
അഭയം യസ്യ സങ്ഗ്രാമേ മൃത്യുതോ മാനുഷാദൃതേ ॥ 18 ॥
മന്ത്രൈരഭിഷ്ടുതം പുണ്യമധ്വരേഷു ദ്വിജാതിഭിഃ ।
ഹവിര്ധാനേഷു യസ്സോമമുപഹന്തി മഹാബലഃ ॥ 19 ॥
ആപ്തയജ്ഞഹരം ക്രൂരം ബ്രഹ്മഘ്നം ദുഷ്ടചാരിണമ് ।
കര്കശം നിരനുക്രോശം പ്രജാനാമഹിതേ രതമ് ॥ 20 ॥
രാവണം സര്വഭൂതാനാം സര്വലോകഭയാവഹമ് ।
രാക്ഷസീ ഭ്രാതരം ശൂരം സാ ദദര്ശ മഹാബലമ് ॥ 21 ॥
തം ദിവ്യവസ്ത്രാഭരണം ദിവ്യമാല്യോപശോഭിതമ് ।
ആസനേ സൂപവിഷ്ടം ച കാലകാലമിവോദ്യതമ് ॥ 22 ॥
രാക്ഷസേന്ദ്രം മഹാഭാഗം പൌലസ്ത്യകുലനന്ദനമ് ॥ 23 ॥
രാവണം ശത്രുഹന്താരം മന്ത്രിഭിഃ പരിവാരിതമ് ।
അഭിഗമ്യാബ്രവീദ്വാക്യം രാക്ഷസീ ഭയവിഹ്വലാ ॥ 24 ॥
തമബ്രവീദ്ദീപ്തവിശാലലോചനം പ്രദര്ശയിത്വാ ഭയമോഹമൂര്ഛിതാ ।
സുദാരുണം വാക്യമഭീതചാരിണീ മഹാത്മനാ ശൂര്പണഖാ വിരൂപിതാ ॥ 25 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ അരണ്യകാണ്ഡേ ദ്വാത്രിംശസ്സര്ഗഃ ॥
Roman (IAST) Transliteration
śrīmadvālmīkīya rāmāyaṇe araṇyakāṇḍam |
atha dvātriṃśassargaḥ |
tataśśūrpaṇakhā dṛṣṭvā sahasrāṇi caturdaśa |
hatānyekena rāmeṇa rakṣasāṃ bhīmakarmaṇām || 1 ||
dūṣaṇaṃ ca kharaṃ caiva hataṃ triśirasā saha |
dṛṣṭvā punarmahānādaṃ nanāda jalado yathā || 2 ||
sā dṛṣṭvā karma rāmasya kṛtamanyaissuduṣkaram |
jagāma paramodvignā laṅkāṃ rāvaṇapālitām || 3 ||
sā dadarśa vimānāgre rāvaṇaṃ dīptatejasam |
upopaviṣṭaṃ sacivairmarudbhiriva vāsavam || 4 ||
āsīnaṃ sūryasaṅkāśe kāñcane paramāsane |
rukmavedigataṃ prājyaṃ jvalantamiva pāvakam || 5 ||
devagandharvabhūtānāmṛṣīṇāṃ ca mahātmanām |
ajeyaṃ samare śūraṃ vyāttānanamivāntakam || 6 ||
devāsuravimardeṣu vajrāśanikṛtavraṇam |
airāvataviṣāṇagrairudghṛṣṭakiṇavakṣasam || 7 ||
viṃśadbhujaṃ daśagrīvaṃ darśanīyaparicchadam |
viśālavakṣasaṃ vīraṃ rājalakṣaṇa śobhitam || 8 ||
snigdhavaiḍūryasaṅkāśaṃ taptakāñcanakuṇḍalam |
subhujaṃ śukladaśanaṃ mahāsyaṃ parvatopamam || 9 ||
viṣṇucakranipātaiśca śataśo devasaṃyuge |
anyaiśśastraprahāraiśca mahāyuddheṣu tāḍitam || 10 ||
ahatāṅgaṃ samastaiśca devapraharaṇaistathā |
akṣobhyāṇāṃ samudrāṇāṃ kṣobhaṇaṃ kṣiprakāriṇam || 11 ||
kṣeptāraṃ parvatendrāṇāṃ surāṇāṃ ca pramardanam |
ucchettāraṃ ca dharmāṇāṃ paradārābhimarśanam || 12 ||
sarvadivyāstrayoktāraṃ yajñavighnakaraṃ sadā |
purīṃ bhogavatīṃ prāpya parājitya ca vāsukim || 13 ||
takṣakasya priyāṃ bhāryāṃ parājitya jahāra yaḥ |
kailāsaparvataṃ gatvā vijitya naravāhanam |
vimānaṃ puṣpakaṃ tasya kāmagaṃ vai jahāra yaḥ || 14 ||
vanaṃ caitrarathaṃ divyaṃ nalinīṃ nandanaṃ vanam |
vināśayati yaḥ krodhāddevodyānāni vīryavān || 15 ||
candrasūryau mahābhāgāvuttiṣṭhantau parantapau |
nivārayati bāhubhyāṃ yaśśailaśikharopamaḥ || 16 ||
daśavarṣasahasrāṇi tapastapvā mahāvane |
purā svayambhuve dhīraśśirāṃsyupajahāra yaḥ || 17 ||
devadānavagandharvapiśācapatagoragaiḥ |
abhayaṃ yasya saṅgrāme mṛtyuto mānuṣādṛte || 18 ||
mantrairabhiṣṭutaṃ puṇyamadhvareṣu dvijātibhiḥ |
havirdhāneṣu yassomamupahanti mahābalaḥ || 19 ||
āptayajñaharaṃ krūraṃ brahmaghnaṃ duṣṭacāriṇam |
karkaśaṃ niranukrośaṃ prajānāmahite ratam || 20 ||
rāvaṇaṃ sarvabhūtānāṃ sarvalokabhayāvaham |
rākṣasī bhrātaraṃ śūraṃ sā dadarśa mahābalam || 21 ||
taṃ divyavastrābharaṇaṃ divyamālyopaśobhitam |
āsane sūpaviṣṭaṃ ca kālakālamivodyatam || 22 ||
rākṣasendraṃ mahābhāgaṃ paulastyakulanandanam || 23 ||
rāvaṇaṃ śatruhantāraṃ mantribhiḥ parivāritam |
abhigamyābravīdvākyaṃ rākṣasī bhayavihvalā || 24 ||
tamabravīddīptaviśālalocanaṃ pradarśayitvā bhayamohamūrchitā |
sudāruṇaṃ vākyamabhītacāriṇī mahātmanā śūrpaṇakhā virūpitā || 25 ||
ityārṣe śrīmadrāmāyaṇe vālmīkīya ādikāvye araṇyakāṇḍe dvātriṃśassargaḥ ||
InfoLyter.in — Sacred Vedic Knowledge Portal · Free forever