📄 Save this Stotram as PDF Click the button to open the Save dialog
How to save: 1 Click "Save as PDF" → 2 A dialog opens → 3 Choose "Save as PDF" as printer → 4 Click Save
ॐ
1.74 ബാലകാണ്ഡ - ചതുഃസപ്തതിതമ സര്ഗഃ
1.74 Balakanda - Chatuhsaptatitama Sargah
Valmiki Malayalam
ശ്രീമദ്വാല്മീകീയ രാമായണേ ബാലകാണ്ഡമ് ।
അഥ ചതുഃസപ്തതിതമസ്സര്ഗഃ ।
അഥ രാത്ര്യാം വ്യതീതായാം വിശ്വാമിത്രോ മഹാമുനിഃ ।
ആപൃഷ്ട്വാ തൌ ച രാജാനൌ ജഗാമോത്തരപര്വതമ് ॥ 1 ॥
ആശീര്ഭിഃ പൂരയിത്വാ ച കുമാരാംശ്ച സരാഘവാന് ।
വിശ്വാമിത്രേ ഗതേ രാജാ വൈദേഹം മിഥിലാധിപമ് ।
ആപൃഷ്ട്വാഽഥ ജഗാമാശു രാജാ ദശരഥഃ പുരീമ് ॥ 2 ॥
ഗച്ഛന്തം തം തു രാജാനമന്വഗച്ഛന്നരാധിപഃ ॥ 3 ॥
അഥ രാജാ വിദേഹാനാം ദദൌ കന്യാധനം ബഹു ।
ഗവാം ശതസഹസ്രാണി ബഹൂനി മിഥിലേശ്വരഃ ।
കമ്ബലാനാം ച മുഖ്യാനാം ക്ഷൌമകോട്യമ്ബരാണി ച ॥ 4 ॥
ഹസ്ത്യശ്വരഥപാദാതം ദിവ്യരൂപം സ്വലങ്കൃതമ് ।
ദദൌ കന്യാപിതാ താസാം ദാസീദാസമനുത്തമമ് ॥ 5 ॥
ഹിരണ്യസ്യ സുവര്ണസ്യ മുക്താനാം വിദ്രുമസ്യ ച ॥ 6 ॥
ദദൌ പരമസംഹൃഷ്ടഃ കന്യാധനമനുത്തമമ് ।
ദത്ത്വാ ബഹു ധനം രാജാ സമനുജ്ഞാപ്യ പാര്ഥിവമ് ॥ 7 ॥
പ്രവിവേശ സ്വനിലയം മിഥിലാം മിഥിലേശ്വരഃ ।
രാജാഽപ്യയോധ്യാധിപതിസ്സഹ പുത്രൈര്മഹാത്മഭിഃ ।
ഋഷീന് സര്വാന് പുരസ്കൃത്യ ജഗാമ സബലാനുഗഃ ॥ 8 ॥
ഗച്ഛന്തം തം നരവ്യാഘ്രം സര്ഷിസങ്ഘം സരാഘവമ് ॥ 9 ॥
ഘോരാഃ സ്മ പക്ഷിണോ വാചോ വ്യാഹരന്തി തതസ്തതഃ ।
ഭൌമാശ്ചൈവ മൃഗാ സ്സര്വേ ഗച്ഛന്തി സ്മ പ്രദക്ഷിണമ് ॥ 10 ॥
താന് ദൃഷ്ട്വാ രാജശാര്ദൂലോ വസിഷ്ഠം പര്യപൃച്ഛത ।
അസൌമ്യാഃ പക്ഷിണോ ഘോരാ മൃഗാശ്ചാപി പ്രദക്ഷിണാഃ ॥ 11 ॥
കിമിദം ഹൃദയോത്കമ്പി മനോ മമ വിഷീദതി ।
രാജ്ഞോ ദശരഥസ്യൈതച്ഛ്രുത്വാ വാക്യം മഹാനൃഷിഃ ॥ 12 ॥
ഉവാച മധുരാം വാണീം ശ്രൂയതാമസ്യ യത്ഫലമ് ।
ഉപസ്ഥിതം ഭയം ഘോരം ദിവ്യം പക്ഷിമുഖാച്ച്യുതമ് ॥ 13 ॥
മൃഗാഃ പ്രശമയന്ത്യേതേ സന്താപസ്ത്യജ്യതാമയമ് ।
തേഷാം സംവദതാം തത്ര വായുഃ പ്രാദുര്ബഭൂവ ഹ ॥ 14 ॥
കമ്പയന് പൃഥിവീം സര്വാം പാതയംശ്ച ദ്രുമാഞ്ച്ഛുഭാന് ।
തമസാ സംവൃതസ്സൂര്യ സ്സര്വാ ന പ്രബഭുര്ദിശ ॥ 15 ॥
ഭസ്മനാ ചാവൃതം സര്വം സമ്മൂഢമിവ തദ്ബലമ് ।
വസിഷ്ഠശ്ചര്ഷയശ്ചാന്യേ രാജാ ച സസുതസ്തദാ ॥ 16 ॥
സംസജ്ഞാ ഇവ തത്രാസന് സര്വമന്യദ്വിചേതനമ് ।
തസ്മിംസ്തമസി ഘോരേ തു ഭസ്മച്ഛന്നേവ സാ ചമൂഃ ॥ 17 ॥
ദദര്ശ ഭീമസങ്കാശം ജടാമണ്ഡലധാരിണമ് ।
ഭാര്ഗവം ജാമദഗ്ന്യം തം രാജരാജവിമര്ദിനമ് ॥ 18 ॥
കൈലാസമിവ ദുര്ധര്ഷം കാലാഗ്നിമിവ ദുസ്സഹമ് ।
ജ്വലന്തമിവ തേജോഭിര്ദുര്നിരീക്ഷ്യം പൃഥഗ്ജനൈഃ ॥ 19 ॥
സ്കന്ധേ ചാസജ്യ പരശും ധനുര്വിദ്യുദ്ഗണോപമമ് ।
പ്രഗൃഹ്യ ശരമുഖ്യം ച ത്രിപുരഘ്നം യഥാ ശിവമ് ॥ 20 ॥
തം ദൃഷ്ട്വാ ഭീമസങ്കാശം ജ്വലന്തമിവ പാവകമ് ।
വസിഷ്ഠപ്രമുഖാ വിപ്രാ ജപഹോമപരായണാഃ ॥ 21 ॥
സങ്ഗതാ മുനയസ്സര്വേ സഞ്ജജല്പുരഥോ മിഥഃ ।
കച്ചിത്പിതൃവധാമര്ഷീ ക്ഷത്രം നോത്സാദയിഷ്യതി ॥ 22 ॥
പൂര്വം ക്ഷത്രവധം കൃത്വാ ഗതമന്യുര്ഗതജ്വരഃ ।
ക്ഷത്രസ്യോത്സാദനം ഭൂയോ ന ഖല്വസ്യ ചികീര്ഷിതമ് ॥ 23 ॥
ഏവമുക്ത്വാഽര്ഘ്യമാദായ ഭാര്ഗവം ഭീമദര്ശനമ് ।
ഋഷയോ രാമ രാമേതി വചോ മധുരമബ്രുവന് ॥ 24 ॥
പ്രതിഗൃഹ്യ തു താം പൂജാമൃഷിദത്താം പ്രതാപവാന് ।
രാമം ദാശരഥിം രാമോ ജാമദഗ്ന്യോഽഭ്യഭാഷത ॥ 25 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ ബാലകാണ്ഡേ ചതുഃസപ്തതിതമസ്സര്ഗഃ ॥
Roman (IAST) Transliteration
śrīmadvālmīkīya rāmāyaṇe bālakāṇḍam |
atha catuḥsaptatitamassargaḥ |
atha rātryāṃ vyatītāyāṃ viśvāmitro mahāmuniḥ |
āpṛṣṭvā tau ca rājānau jagāmottaraparvatam || 1 ||
āśīrbhiḥ pūrayitvā ca kumārāṃśca sarāghavān |
viśvāmitre gate rājā vaidehaṃ mithilādhipam |
āpṛṣṭvā'tha jagāmāśu rājā daśarathaḥ purīm || 2 ||
gacchantaṃ taṃ tu rājānamanvagacchannarādhipaḥ || 3 ||
atha rājā videhānāṃ dadau kanyādhanaṃ bahu |
gavāṃ śatasahasrāṇi bahūni mithileśvaraḥ |
kambalānāṃ ca mukhyānāṃ kṣaumakoṭyambarāṇi ca || 4 ||
hastyaśvarathapādātaṃ divyarūpaṃ svalaṅkṛtam |
dadau kanyāpitā tāsāṃ dāsīdāsamanuttamam || 5 ||
hiraṇyasya suvarṇasya muktānāṃ vidrumasya ca || 6 ||
dadau paramasaṃhṛṣṭaḥ kanyādhanamanuttamam |
dattvā bahu dhanaṃ rājā samanujñāpya pārthivam || 7 ||
praviveśa svanilayaṃ mithilāṃ mithileśvaraḥ |
rājā'pyayodhyādhipatissaha putrairmahātmabhiḥ |
ṛṣīn sarvān puraskṛtya jagāma sabalānugaḥ || 8 ||
gacchantaṃ taṃ naravyāghraṃ sarṣisaṅghaṃ sarāghavam || 9 ||
ghorāḥ sma pakṣiṇo vāco vyāharanti tatastataḥ |
bhaumāścaiva mṛgā ssarve gacchanti sma pradakṣiṇam || 10 ||
tān dṛṣṭvā rājaśārdūlo vasiṣṭhaṃ paryapṛcchata |
asaumyāḥ pakṣiṇo ghorā mṛgāścāpi pradakṣiṇāḥ || 11 ||
kimidaṃ hṛdayotkampi mano mama viṣīdati |
rājño daśarathasyaitacchrutvā vākyaṃ mahānṛṣiḥ || 12 ||
uvāca madhurāṃ vāṇīṃ śrūyatāmasya yatphalam |
upasthitaṃ bhayaṃ ghoraṃ divyaṃ pakṣimukhāccyutam || 13 ||
mṛgāḥ praśamayantyete santāpastyajyatāmayam |
teṣāṃ saṃvadatāṃ tatra vāyuḥ prādurbabhūva ha || 14 ||
kampayan pṛthivīṃ sarvāṃ pātayaṃśca drumāñcchubhān |
tamasā saṃvṛtassūrya ssarvā na prababhurdiśa || 15 ||
bhasmanā cāvṛtaṃ sarvaṃ sammūḍhamiva tadbalam |
vasiṣṭhaścarṣayaścānye rājā ca sasutastadā || 16 ||
saṃsajñā iva tatrāsan sarvamanyadvicetanam |
tasmiṃstamasi ghore tu bhasmacchanneva sā camūḥ || 17 ||
dadarśa bhīmasaṅkāśaṃ jaṭāmaṇḍaladhāriṇam |
bhārgavaṃ jāmadagnyaṃ taṃ rājarājavimardinam || 18 ||
kailāsamiva durdharṣaṃ kālāgnimiva dussaham |
jvalantamiva tejobhirdurnirīkṣyaṃ pṛthagjanaiḥ || 19 ||
skandhe cāsajya paraśuṃ dhanurvidyudgaṇopamam |
pragṛhya śaramukhyaṃ ca tripuraghnaṃ yathā śivam || 20 ||
taṃ dṛṣṭvā bhīmasaṅkāśaṃ jvalantamiva pāvakam |
vasiṣṭhapramukhā viprā japahomaparāyaṇāḥ || 21 ||
saṅgatā munayassarve sañjajalpuratho mithaḥ |
kaccitpitṛvadhāmarṣī kṣatraṃ notsādayiṣyati || 22 ||
pūrvaṃ kṣatravadhaṃ kṛtvā gatamanyurgatajvaraḥ |
kṣatrasyotsādanaṃ bhūyo na khalvasya cikīrṣitam || 23 ||
evamuktvā'rghyamādāya bhārgavaṃ bhīmadarśanam |
ṛṣayo rāma rāmeti vaco madhuramabruvan || 24 ||
pratigṛhya tu tāṃ pūjāmṛṣidattāṃ pratāpavān |
rāmaṃ dāśarathiṃ rāmo jāmadagnyo'bhyabhāṣata || 25 ||
ityārṣe śrīmadrāmāyaṇe vālmīkīya ādikāvye bālakāṇḍe catuḥsaptatitamassargaḥ ||
InfoLyter.in — Sacred Vedic Knowledge Portal · Free forever