📄 Save this Stotram as PDF Click the button to open the Save dialog
How to save: 1 Click "Save as PDF" → 2 A dialog opens → 3 Choose "Save as PDF" as printer → 4 Click Save
ॐ
1.71 ബാലകാണ്ഡ - ഏകസപ്തതിതമ സര്ഗഃ
1.71 Balakanda - Ekasaptatitama Sargah
Valmiki Malayalam
ശ്രീമദ്വാല്മീകീയ രാമായണേ ബാലകാണ്ഡമ് ।
അഥ ഏകസപ്തതിതമസ്സര്ഗഃ ।
ഏവം ബ്രുവാണം ജനകഃ പ്രത്യുവാച കൃതാഞ്ജലിഃ ।
ശ്രോതുമര്ഹസി ഭദ്രം തേ കുലം നഃ പരികീര്തിതമ് ॥ 1 ॥
പ്രദാനേ ഹി മുനിശ്രേഷ്ഠ കുലം നിരവശേഷതഃ ।
വക്തവ്യം കുലജാതേന തന്നിബോധ മഹാമുനേ ॥ 2 ॥
രാജാഽഭൂത് ത്രിഷു ലോകേഷു വിശ്രുത സ്സ്വേന കര്മണാ ।
നിമിഃ പരമധര്മാത്മാ സര്വസത്ത്വവതാം വരഃ ॥ 3 ॥
തസ്യ പുത്രോമിഥിര്നാമ മിഥിലാ യേന നിര്മിതാ ।
പ്രഥമോ ജനകോ നാമ ജനകാദപ്യുദാവസുഃ ॥ 4 ॥
ഉദാവസോസ്തു ധര്മാത്മാ ജാതോ വൈ നന്ദിവര്ധനഃ ।
നന്ദിവര്ധനപുത്രസ്തു സുകേതുര്നാമ നാമതഃ ॥ 5 ॥
സുകേതോരപി ധര്മാത്മാ ദേവരാതോ മഹാബലഃ ।
ദേവരാതസ്യ രാജര്ഷേര്ബൃഹദ്രഥ ഇതി സ്മൃതഃ ॥ 6 ॥
ബൃഹദ്രഥസ്യ ശൂരോഽഭൂന്മഹാവീരഃ പ്രതാപവാന് ।
മഹാവീരസ്യ ധൃതിമാന് സുധൃതിസ്സത്യവിക്രമഃ ॥ 7 ॥
സുധൃതേരപി ധര്മാത്മാ ദൃഷ്ടകേതുസ്സുധാര്മികഃ ।
ദൃഷ്ടകേതോസ്തു രാജര്ഷേര്ഹര്യശ്വ ഇതി വിശ്രുതഃ ॥ 8 ॥
ഹര്യശ്വസ്യ മരുഃ പുത്രോ മരോഃ പുത്രഃ പ്രതിന്ധകഃ ।
പ്രതിന്ധകസ്യ ധര്മാത്മാ രാജാ കീര്തിരഥസ്സുതഃ ॥ 9 ॥
പുത്രഃ കീര്തിരഥസ്യാപി ദേവമീഢ ഇതി സ്മൃതഃ ।
ദേവമീഢസ്യ വിബുധോ വിബുധസ്യ മഹീധ്രകഃ ॥ 10 ॥
മഹീധ്രകസുതോ രാജാ കീര്തിരാതോ മഹാബലഃ ।
കീര്തിരാതസ്യ രാജര്ഷേര്മഹാരോമാ വ്യജായത ॥ 11 ॥
മഹാരോമ്ണസ്തു ധര്മാത്മാ സ്വര്ണരോമാ വ്യജായത ।
സ്വര്ണരോമ്ണസ്തു രാജര്ഷേര്ഹ്രസ്വരോമാ വ്യജായത ॥ 12 ॥
തസ്യ പുത്രദ്വയം ജജ്ഞേ ധര്മജ്ഞസ്യ മഹാത്മനഃ ।
ജ്യേഷ്ഠോഽഹമനുജോ ഭ്രാതാ മമ വീരഃ കുശധ്വജഃ ॥ 13 ॥
മാം തു ജ്യേഷ്ഠം പിതാ രാജ്യേ സോഽഭിഷിച്യ നരാധിപഃ ।
കുശധ്വജം സമാവേശ്യ ഭാരം മയി വനം ഗതഃ ॥ 14 ॥
വൃദ്ധേ പിതരി സ്വര്യാതേ ധര്മേണ ധുരമാവഹമ് ।
ഭ്രാതരം ദേവസങ്കാശം സ്നേഹാത്പശ്യന് കുശധ്വജമ് ॥ 15 ॥
കസ്യ ചിത്ത്വഥകാലസ്യ സാങ്കാശ്യാദഗമത്പുരാത് ।
സുധന്വാ വീര്യവാന്രാജാ മിഥിലാമവരോധകഃ ॥ 16 ॥
സ ച മേ പ്രേഷയാമാസ ശൈവം ധനുരനുത്തമമ് ।
സീതാ കന്യാ ച പദ്മാക്ഷീ മഹ്യം വൈ ദീയതാമിതി ॥ 17 ॥
തസ്യാപ്രദാനാദ്ബ്രഹ്മര്ഷേ യുദ്ധമാസീന്മയാ സഹ ।
സ ഹതോഽഭിമുഖോ രാജാ സുധന്വാ തു മയാ രണേ ॥ 18 ॥
നിഹത്യ തം മുനിശ്രേഷ്ഠ സുധന്വാനം നരാധിപമ് ।
സാങ്കാശ്യേ ഭ്രാതരം വീരമഭ്യഷിഞ്ചം കുശധ്വജമ് ॥ 19 ॥
കനീയാനേഷ മേ ഭ്രാതാ അഹം ജ്യേഷ്ഠോ മഹാമുനേ ।
ദദാമി പരമപ്രീതോ വധ്വൌ തേ മുനിപുങ്ഗവ ॥ 20 ॥
സീതാം രാമായ ഭദ്രം തേ ഊര്മിലാ ലക്ഷ്മണായ ച ।
വീര്യശുല്കാം മമ സുതാം സീതാം സുരസുതോപമാമ് ॥ 21 ॥
ദ്വിതീയാമൂര്മിലാം ചൈവ ത്രിര്ദദാമി ന സംശയഃ ।
ദദാമി പരമപ്രീതോ വധ്വൌ തേ രഘുനന്ദന ॥ 22 ॥
രാമലക്ഷ്മണയോ രാജന് ഗോദാനം കാരയസ്വ ഹ ।
പിതൃകാര്യം ച ഭദ്രം തേ തതോ വൈവാഹികം കുരു ॥ 23 ॥
മഖാ ഹ്യദ്യ മഹാബാഹോ തൃതീയേ ദിവസേ പ്രഭോ ।
ഫല്ഗുന്യാമുത്തരേ രാജംസ്തസ്മിന്വൈവാഹികം കുരു ॥ 24 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ ബാലകാണ്ഡേ ഏകസപ്തതിതമസ്സര്ഗഃ ॥
Roman (IAST) Transliteration
śrīmadvālmīkīya rāmāyaṇe bālakāṇḍam |
atha ekasaptatitamassargaḥ |
evaṃ bruvāṇaṃ janakaḥ pratyuvāca kṛtāñjaliḥ |
śrotumarhasi bhadraṃ te kulaṃ naḥ parikīrtitam || 1 ||
pradāne hi muniśreṣṭha kulaṃ niravaśeṣataḥ |
vaktavyaṃ kulajātena tannibodha mahāmune || 2 ||
rājā'bhūt triṣu lokeṣu viśruta ssvena karmaṇā |
nimiḥ paramadharmātmā sarvasattvavatāṃ varaḥ || 3 ||
tasya putromithirnāma mithilā yena nirmitā |
prathamo janako nāma janakādapyudāvasuḥ || 4 ||
udāvasostu dharmātmā jāto vai nandivardhanaḥ |
nandivardhanaputrastu suketurnāma nāmataḥ || 5 ||
suketorapi dharmātmā devarāto mahābalaḥ |
devarātasya rājarṣerbṛhadratha iti smṛtaḥ || 6 ||
bṛhadrathasya śūro'bhūnmahāvīraḥ pratāpavān |
mahāvīrasya dhṛtimān sudhṛtissatyavikramaḥ || 7 ||
sudhṛterapi dharmātmā dṛṣṭaketussudhārmikaḥ |
dṛṣṭaketostu rājarṣerharyaśva iti viśrutaḥ || 8 ||
haryaśvasya maruḥ putro maroḥ putraḥ pratindhakaḥ |
pratindhakasya dharmātmā rājā kīrtirathassutaḥ || 9 ||
putraḥ kīrtirathasyāpi devamīḍha iti smṛtaḥ |
devamīḍhasya vibudho vibudhasya mahīdhrakaḥ || 10 ||
mahīdhrakasuto rājā kīrtirāto mahābalaḥ |
kīrtirātasya rājarṣermahāromā vyajāyata || 11 ||
mahāromṇastu dharmātmā svarṇaromā vyajāyata |
svarṇaromṇastu rājarṣerhrasvaromā vyajāyata || 12 ||
tasya putradvayaṃ jajñe dharmajñasya mahātmanaḥ |
jyeṣṭho'hamanujo bhrātā mama vīraḥ kuśadhvajaḥ || 13 ||
māṃ tu jyeṣṭhaṃ pitā rājye so'bhiṣicya narādhipaḥ |
kuśadhvajaṃ samāveśya bhāraṃ mayi vanaṃ gataḥ || 14 ||
vṛddhe pitari svaryāte dharmeṇa dhuramāvaham |
bhrātaraṃ devasaṅkāśaṃ snehātpaśyan kuśadhvajam || 15 ||
kasya cittvathakālasya sāṅkāśyādagamatpurāt |
sudhanvā vīryavānrājā mithilāmavarodhakaḥ || 16 ||
sa ca me preṣayāmāsa śaivaṃ dhanuranuttamam |
sītā kanyā ca padmākṣī mahyaṃ vai dīyatāmiti || 17 ||
tasyāpradānādbrahmarṣe yuddhamāsīnmayā saha |
sa hato'bhimukho rājā sudhanvā tu mayā raṇe || 18 ||
nihatya taṃ muniśreṣṭha sudhanvānaṃ narādhipam |
sāṅkāśye bhrātaraṃ vīramabhyaṣiñcaṃ kuśadhvajam || 19 ||
kanīyāneṣa me bhrātā ahaṃ jyeṣṭho mahāmune |
dadāmi paramaprīto vadhvau te munipuṅgava || 20 ||
sītāṃ rāmāya bhadraṃ te ūrmilā lakṣmaṇāya ca |
vīryaśulkāṃ mama sutāṃ sītāṃ surasutopamām || 21 ||
dvitīyāmūrmilāṃ caiva trirdadāmi na saṃśayaḥ |
dadāmi paramaprīto vadhvau te raghunandana || 22 ||
rāmalakṣmaṇayo rājan godānaṃ kārayasva ha |
pitṛkāryaṃ ca bhadraṃ te tato vaivāhikaṃ kuru || 23 ||
makhā hyadya mahābāho tṛtīye divase prabho |
phalgunyāmuttare rājaṃstasminvaivāhikaṃ kuru || 24 ||
ityārṣe śrīmadrāmāyaṇe vālmīkīya ādikāvye bālakāṇḍe ekasaptatitamassargaḥ ||
InfoLyter.in — Sacred Vedic Knowledge Portal · Free forever