📄 Save this Stotram as PDF Click the button to open the Save dialog
How to save: 1 Click "Save as PDF" → 2 A dialog opens → 3 Choose "Save as PDF" as printer → 4 Click Save
ॐ
1.45 ബാലകാണ്ഡ - പഞ്ചചത്വാരിംശ സര്ഗഃ
1.45 Balakanda - Panchachatvarimsha Sargah
Valmiki Malayalam
ശ്രീമദ്വാല്മീകീയ രാമായണേ ബാലകാണ്ഡമ് ।
അഥ പഞ്ചചത്വാരിംശസ്സര്ഗഃ ।
വിശ്വാമിത്രവചശ്ശ്രുത്വാ രാഘവ സ്സഹലക്ഷ്മണഃ ।
വിസ്മയം പരമം ഗത്വാ വിശ്വാമിത്രമഥാബ്രവീത് ॥ 1 ॥
അത്യദ്ഭുതമിദം ബ്രഹ്മന് കഥിതം പരമം ത്വയാ ।
ഗങ്ഗാവതരണം പുണ്യം സാഗരസ്യാപി പൂരണമ് ॥ 2 ॥
തസ്യ സാ ശര്വരീ സര്വാ സഹ സൌമിത്രിണാ തദാ ।
ജഗാമ ചിന്തയാനസ്യ വിശ്വാമിത്രകഥാം ശുഭാമ് ॥ 3 ॥
തതഃ പ്രഭാതേ വിമലേ വിശ്വാമിത്രം മഹാമുനിമ് ।
ഉവാച രാഘവോ വാക്യം കൃതാഹ്നികമരിന്ദമഃ ॥ 4 ॥
ഗതാ ഭഗവതീ രാത്രിശ്ശ്രോതവ്യം പരമം ശ്രുതമ് ।
ക്ഷണഭൂതേവ നൌ രാത്രി സ്സമ്വൃത്തേയം മഹാതപഃ ॥ 5 ॥
ഇമാം ചിന്തയതസ്സര്വാം നിഖിലേന കഥാം തവ ।
തരാമ സരിതാം ശ്രേഷ്ഠാം പുണ്യാം ത്രിപഥഗാം നദീമ് ॥ 6 ॥
നൌരേഷാ ഹി സുഖാസ്തീര്ണാ ഋഷീണാം പുണ്യകര്മണാമ് ।
ഭഗവന്തമിഹ പ്രാപ്തം ജ്ഞാത്വാ ത്വരിതമാഗതാ ॥ 7 ॥
തസ്യ തദ്വചനം ശ്രുത്വാ രാഘവസ്യ മഹാത്മനഃ ।
സന്താരം കാരയാമാസ സര്ഷിസങ്ഘ സ്സരാഘവഃ ॥ 8 ॥
ഉത്തരം തീരമാസാദ്യ സമ്പൂജ്യര്ഷിഗണം തദാ ।
ഗങ്ഗാകൂലേ നിവിഷ്ടാസ്തേ വിശാലാം ദദൃശുഃ പുരീമ് ॥ 9 ॥
തതോ മുനിവരസ്തൂര്ണം ജഗാമ സഹ രാഘവഃ ।
വിശാലാം നഗരീം രമ്യാം ദിവ്യാം സ്വര്ഗോപമാം തദാ ॥ 10 ॥
അഥ രാമോ മഹാപ്രാജ്ഞോ വിശ്വാമിത്രം മഹാമുനിമ് ।
പപ്രച്ഛ പ്രാഞ്ജലിര്ഭൂത്വാ വിശാലാമുത്തമാം പുരീമ് ॥ 11 ॥
കതരോ രാജവംശോഽയം വിശാലായാം മഹാമുനേ ।
ശ്രോതുമിച്ഛാമി ഭദ്രം തേ പരം കൌതൂഹലം ഹി മേ ॥ 12 ॥
തസ്യ തദ്വചനം ശ്രുത്വാ രാമസ്യ മുനിപുങ്ഗവഃ ।
ആഖ്യാതും തത്സമാരേഭേ വിശാലസ്യ പുരാതനമ് ॥ 13 ॥
ശ്രൂയതാം രാമ ശക്രസ്യ കഥാം കഥയതശ്ശുഭാമ് ।
അസ്മിന് ദേശേ തു യദ്വൃത്തം തദപി ശൃണു രാഘവ ॥ 14 ॥
പൂര്വം കൃതയുഗേ രാമ ദിതേഃ പുത്രാ മഹാബലാഃ ।
അദിതേശ്ച മഹാഭാഗ വീര്യവന്തസ്സുധാര്മികാഃ ॥ 15 ॥
തതസ്തേഷാം നരശ്രേഷ്ഠ ബുദ്ധിരാസീന്മഹാത്മനാമ് ।
അമരാ അജരാശ്ചൈവ കഥം സ്യാമ നിരാമയാഃ ॥ 16 ॥
തേഷാം ചിന്തയതാം രാമ ബുദ്ധിരാസീന്മഹാത്മനാമ് ।
ക്ഷീരോദമഥനം കൃത്വാ രസം പ്രാപ്സ്യാമ തത്ര വൈ ॥ 17 ॥
തതോ നിശ്ചിത്യ മഥനം യോക്ത്രം കൃത്വാ ച വാസുകിമ് ।
മന്ഥാനം മന്ദരം കൃത്വാ മമന്ഥുരമിതൌജസഃ ॥ 18 ॥
അഥ വര്ഷസഹസ്രേണ യോക്ത്രസര്പശിരാംസി ച ।
വമന്ത്യതി വിഷം തത്ര ദദംശുര്ദശനൈശ്ശിലാഃ ॥ 19 ॥
ഉത്പപാതാഗ്നിസങ്കാശം ഹാലാഹലമഹാവിഷമ് ।
തേന ദഗ്ധം ജഗത്സര്വം സദേവാസുരമാനുഷമ് ॥ 20 ॥
അഥ ദേവാ മഹാദേവം ശങ്കരം ശരണാര്ഥിനഃ ।
ജഗ്മുഃ പശുപതിം രുദ്രം ത്രാഹി ത്രാഹീതി തുഷ്ടുവുഃ ॥ 21 ॥
ഏവമുക്തസ്തതോ ദേവൈര്ദേവദേവേശ്വരഃ പ്രഭുഃ ।
പ്രാദുരാസീത്തതോഽത്രൈവ ശങ്ഖചക്രധരോ ഹരിഃ ॥ 22 ॥
ഉവാചൈനം സ്മിതം കൃത്വാ രുദ്രം ശൂലഭൃതം ഹരിഃ ।
ദൈവതൈര്മഥ്യമാനേ തു യത്പൂര്വം സമുപസ്ഥിതമ് ॥ 23 ॥
ത്വദീയംഹി സുരശ്രേഷ്ഠ സുരാണാമഗ്രജോഽസി യത് ।
അഗ്രപൂജാമിമാം മത്വാ ഗൃഹാണേദം വിഷം പ്രഭോ ॥ 24 ॥
ഇത്യുക്ത്വാ ച സുരശ്രേഷ്ഠസ്തത്രൈവാന്തരധീയത ।
ദേവതാനാം ഭയം ദൃഷ്ടവാശ്രുത്വാ വാക്യം തു ശാര്ങ്ഗിണഃ ।
ഹാലാഹലവിഷം ഘോരം സ ജഗ്രാഹാമൃതോപമമ് ॥ 25 ॥
ദേവാന്വിസൃജ്യ ദേവേശോ ജഗാമ ഭഗവാന് ഹരഃ ।
തതോ ദേവാസുരാസ്സര്വേ മമന്ഥൂ രഘുനന്ദന ॥ 26 ॥
പ്രവിവേശാഥ പാതാലം മന്ഥാനഃ പര്വതോഽനഘ ।
തതോ ദേവാസ്സഗന്ധര്വാസ്തുഷ്ടുവുര്മധുസൂദനമ് ॥ 27 ॥
ത്വം ഗതിഃ സര്വഭൂതാനാം വിശേഷേണ ദിവൌകസാമ് ।
പാലയാസ്മാന്മഹാബാഹോ ഗിരിമുദ്ധര്തുമര്ഹസി ॥ 28 ॥
ഇതി ശ്രുത്വാ ഹൃഷീകേശഃ കാമഠം രൂപമാസ്ഥിതഃ ।
പര്വതം പൃഷ്ഠതഃ കൃത്വാ ശിശ്യേ തത്രോദധൌ ഹരിഃ ॥ 29 ॥
പര്വതാഗ്രേ തു ലോകാത്മാ ഹസ്തേനാക്രമ്യ കേശവഃ ।
ദേവാനാം മധ്യതഃ സ്ഥിത്വാ മമന്ഥ പുരുഷോത്തമഃ ॥ 30 ॥
അഥ വര്ഷസഹസ്രേണ സദണ്ഡസ്സകമണ്ഡലുഃ ।
പൂര്വം ധന്വന്തരിര്നാമ അപ്സരാശ്ച സുവര്ചസഃ ॥ 31 ॥
അപ്സു നിര്മഥനാദേവ രസാസ്തസ്മാദ്വരസ്ത്രിയഃ ।
ഉത്പേതുര്മനുജശ്രേഷ്ഠ തസ്മാദപ്സരസോഽഭവന് ॥ 32 ॥
ഷഷ്ടിഃ കോട്യോഽഭവംസ്താസാം അപ്സരാണാം സുവര്ചസാമ് ।
അസങ്ഖ്യേയാസ്തു കാകുത്സ്ഥ യാസ്താസാം പരിചാരികാഃ ॥ 33 ॥
ന താസ്സ്മ പരിഗൃഹ്ണന്തി സര്വേ തേ ദേവദാനവാഃ ।
അപ്രതിഗ്രഹണാത്താശ്ച സര്വാസ്സാധാരണാസ്സ്മൃതാഃ ॥ 34 ॥
വരുണസ്യ തതഃ കന്യാ വാരുണീ രഘുനന്ദന ।
ഉത്പപാത മഹാഭാഗാ മാര്ഗമാണാ പരിഗ്രഹമ് ॥ 35 ॥
ദിതേഃ പുത്രാ ന താം രാമ ജഗൃഹുര്വരുണാത്മജാമ് ।
അദിതേസ്തു സുതാ വീര ജഗൃഹുസ്താമനിന്ദിതാമ് ॥ 36 ॥
അസുരാസ്തേന ദൈതേയാസ്സുരാസ്തേനാദിതേസ്സുതാഃ ।
ഹൃഷ്ടാഃ പ്രമുദിതാശ്ചാസന് വാരുണീഗ്രഹണാത്സുരാഃ ॥ 37 ॥
ഉച്ചൈശ്ശ്രവാ ഹയശ്രേഷ്ഠോ മണിരത്നം ച കൌസ്തുഭമ് ।
ഉദതിഷ്ഠന്നരശ്രേഷ്ഠ തഥൈവാമൃതമുത്തമമ് ॥ 38 ॥
അഥ തസ്യ കൃതേ രാമ മഹാനാസീത്കുലക്ഷയഃ ।
അദിതേസ്തു തതഃ പുത്രാ ദിതേഃ പുത്രാനസൂദയന് ॥ 39 ॥
ഏകതോഽഭ്യാഗമന് സര്വേ ഹ്യസുരാ രാക്ഷസൈസ്സഹ ।
യുദ്ധമാസീന്മഹാഘോരം വീര ത്രൈലോക്യമോഹനമ് ॥ 40 ॥
യദാ ക്ഷയം ഗതം സര്വം തദാ വിഷ്ണുര്മഹാബലഃ ।
അമൃതം സോഽഹരത്ത്തൂര്ണം മായാമാസ്ഥായ മോഹിനീമ് ॥ 41 ॥
യേ ഗതാഽഭിമുഖം വിഷ്ണുമക്ഷയം പുരുഷോത്തമമ് ।
സമ്പിഷ്ടാസ്തേ തദാ യുദ്ധേ വിഷ്ണുനാ പ്രഭവിഷ്ണുനാ ॥ 42 ॥
അദിതേരാത്മജാ വീരാ ദിതേഃ പുത്രാന്നിജഘ്നിരേ ।
തസ്മിന് ഘോരേ മഹായുദ്ധേ ദൈതേയാദിത്യയോര്ഭൃശമ് ॥ 43 ॥
നിഹത്യ ദിതിപുത്രാംശ്ച രാജ്യം പ്രാപ്യ പുരന്ദരഃ ।
ശശാസ മുദിതോ ലോകാന് സര്ഷിസങ്ഘാന് സചാരണാന് ॥ 44 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ ബാലകാണ്ഡേ പഞ്ചചത്വാരിംശസ്സര്ഗഃ ॥
Roman (IAST) Transliteration
śrīmadvālmīkīya rāmāyaṇe bālakāṇḍam |
atha pañcacatvāriṃśassargaḥ |
viśvāmitravacaśśrutvā rāghava ssahalakṣmaṇaḥ |
vismayaṃ paramaṃ gatvā viśvāmitramathābravīt || 1 ||
atyadbhutamidaṃ brahman kathitaṃ paramaṃ tvayā |
gaṅgāvataraṇaṃ puṇyaṃ sāgarasyāpi pūraṇam || 2 ||
tasya sā śarvarī sarvā saha saumitriṇā tadā |
jagāma cintayānasya viśvāmitrakathāṃ śubhām || 3 ||
tataḥ prabhāte vimale viśvāmitraṃ mahāmunim |
uvāca rāghavo vākyaṃ kṛtāhnikamarindamaḥ || 4 ||
gatā bhagavatī rātriśśrotavyaṃ paramaṃ śrutam |
kṣaṇabhūteva nau rātri ssamvṛtteyaṃ mahātapaḥ || 5 ||
imāṃ cintayatassarvāṃ nikhilena kathāṃ tava |
tarāma saritāṃ śreṣṭhāṃ puṇyāṃ tripathagāṃ nadīm || 6 ||
naureṣā hi sukhāstīrṇā ṛṣīṇāṃ puṇyakarmaṇām |
bhagavantamiha prāptaṃ jñātvā tvaritamāgatā || 7 ||
tasya tadvacanaṃ śrutvā rāghavasya mahātmanaḥ |
santāraṃ kārayāmāsa sarṣisaṅgha ssarāghavaḥ || 8 ||
uttaraṃ tīramāsādya sampūjyarṣigaṇaṃ tadā |
gaṅgākūle niviṣṭāste viśālāṃ dadṛśuḥ purīm || 9 ||
tato munivarastūrṇaṃ jagāma saha rāghavaḥ |
viśālāṃ nagarīṃ ramyāṃ divyāṃ svargopamāṃ tadā || 10 ||
atha rāmo mahāprājño viśvāmitraṃ mahāmunim |
papraccha prāñjalirbhūtvā viśālāmuttamāṃ purīm || 11 ||
kataro rājavaṃśo'yaṃ viśālāyāṃ mahāmune |
śrotumicchāmi bhadraṃ te paraṃ kautūhalaṃ hi me || 12 ||
tasya tadvacanaṃ śrutvā rāmasya munipuṅgavaḥ |
ākhyātuṃ tatsamārebhe viśālasya purātanam || 13 ||
śrūyatāṃ rāma śakrasya kathāṃ kathayataśśubhām |
asmin deśe tu yadvṛttaṃ tadapi śṛṇu rāghava || 14 ||
pūrvaṃ kṛtayuge rāma diteḥ putrā mahābalāḥ |
aditeśca mahābhāga vīryavantassudhārmikāḥ || 15 ||
tatasteṣāṃ naraśreṣṭha buddhirāsīnmahātmanām |
amarā ajarāścaiva kathaṃ syāma nirāmayāḥ || 16 ||
teṣāṃ cintayatāṃ rāma buddhirāsīnmahātmanām |
kṣīrodamathanaṃ kṛtvā rasaṃ prāpsyāma tatra vai || 17 ||
tato niścitya mathanaṃ yoktraṃ kṛtvā ca vāsukim |
manthānaṃ mandaraṃ kṛtvā mamanthuramitaujasaḥ || 18 ||
atha varṣasahasreṇa yoktrasarpaśirāṃsi ca |
vamantyati viṣaṃ tatra dadaṃśurdaśanaiśśilāḥ || 19 ||
utpapātāgnisaṅkāśaṃ hālāhalamahāviṣam |
tena dagdhaṃ jagatsarvaṃ sadevāsuramānuṣam || 20 ||
atha devā mahādevaṃ śaṅkaraṃ śaraṇārthinaḥ |
jagmuḥ paśupatiṃ rudraṃ trāhi trāhīti tuṣṭuvuḥ || 21 ||
evamuktastato devairdevadeveśvaraḥ prabhuḥ |
prādurāsīttato'traiva śaṅkhacakradharo hariḥ || 22 ||
uvācainaṃ smitaṃ kṛtvā rudraṃ śūlabhṛtaṃ hariḥ |
daivatairmathyamāne tu yatpūrvaṃ samupasthitam || 23 ||
tvadīyaṃhi suraśreṣṭha surāṇāmagrajo'si yat |
agrapūjāmimāṃ matvā gṛhāṇedaṃ viṣaṃ prabho || 24 ||
ityuktvā ca suraśreṣṭhastatraivāntaradhīyata |
devatānāṃ bhayaṃ dṛṣṭavāśrutvā vākyaṃ tu śārṅgiṇaḥ |
hālāhalaviṣaṃ ghoraṃ sa jagrāhāmṛtopamam || 25 ||
devānvisṛjya deveśo jagāma bhagavān haraḥ |
tato devāsurāssarve mamanthū raghunandana || 26 ||
praviveśātha pātālaṃ manthānaḥ parvato'nagha |
tato devāssagandharvāstuṣṭuvurmadhusūdanam || 27 ||
tvaṃ gatiḥ sarvabhūtānāṃ viśeṣeṇa divaukasām |
pālayāsmānmahābāho girimuddhartumarhasi || 28 ||
iti śrutvā hṛṣīkeśaḥ kāmaṭhaṃ rūpamāsthitaḥ |
parvataṃ pṛṣṭhataḥ kṛtvā śiśye tatrodadhau hariḥ || 29 ||
parvatāgre tu lokātmā hastenākramya keśavaḥ |
devānāṃ madhyataḥ sthitvā mamantha puruṣottamaḥ || 30 ||
atha varṣasahasreṇa sadaṇḍassakamaṇḍaluḥ |
pūrvaṃ dhanvantarirnāma apsarāśca suvarcasaḥ || 31 ||
apsu nirmathanādeva rasāstasmādvarastriyaḥ |
utpeturmanujaśreṣṭha tasmādapsaraso'bhavan || 32 ||
ṣaṣṭiḥ koṭyo'bhavaṃstāsāṃ apsarāṇāṃ suvarcasām |
asaṅkhyeyāstu kākutstha yāstāsāṃ paricārikāḥ || 33 ||
na tāssma parigṛhṇanti sarve te devadānavāḥ |
apratigrahaṇāttāśca sarvāssādhāraṇāssmṛtāḥ || 34 ||
varuṇasya tataḥ kanyā vāruṇī raghunandana |
utpapāta mahābhāgā mārgamāṇā parigraham || 35 ||
diteḥ putrā na tāṃ rāma jagṛhurvaruṇātmajām |
aditestu sutā vīra jagṛhustāmaninditām || 36 ||
asurāstena daiteyāssurāstenāditessutāḥ |
hṛṣṭāḥ pramuditāścāsan vāruṇīgrahaṇātsurāḥ || 37 ||
uccaiśśravā hayaśreṣṭho maṇiratnaṃ ca kaustubham |
udatiṣṭhannaraśreṣṭha tathaivāmṛtamuttamam || 38 ||
atha tasya kṛte rāma mahānāsītkulakṣayaḥ |
aditestu tataḥ putrā diteḥ putrānasūdayan || 39 ||
ekato'bhyāgaman sarve hyasurā rākṣasaissaha |
yuddhamāsīnmahāghoraṃ vīra trailokyamohanam || 40 ||
yadā kṣayaṃ gataṃ sarvaṃ tadā viṣṇurmahābalaḥ |
amṛtaṃ so'haratttūrṇaṃ māyāmāsthāya mohinīm || 41 ||
ye gatā'bhimukhaṃ viṣṇumakṣayaṃ puruṣottamam |
sampiṣṭāste tadā yuddhe viṣṇunā prabhaviṣṇunā || 42 ||
aditerātmajā vīrā diteḥ putrānnijaghnire |
tasmin ghore mahāyuddhe daiteyādityayorbhṛśam || 43 ||
nihatya ditiputrāṃśca rājyaṃ prāpya purandaraḥ |
śaśāsa mudito lokān sarṣisaṅghān sacāraṇān || 44 ||
ityārṣe śrīmadrāmāyaṇe vālmīkīya ādikāvye bālakāṇḍe pañcacatvāriṃśassargaḥ ||
InfoLyter.in — Sacred Vedic Knowledge Portal · Free forever