📄 Save this Stotram as PDF Click the button to open the Save dialog
How to save: 1 Click "Save as PDF" → 2 A dialog opens → 3 Choose "Save as PDF" as printer → 4 Click Save
ॐ
ഗീതഗോവിന്ദം പ്രഥമഃ സര്ഗഃ - സാമോദ ദാമോദരഃ
Gitagovindam Prathamah Sargah - Samoda Damodarah
Vishnu Gita Jayadeva Malayalam
॥ ഗീതഗോവിന്ദമ് ॥
॥ അഷ്ടപദീ ॥
॥ ശ്രീ ഗോപാലക ധ്യാനമ് ॥
യദ്ഗോപീവദനേന്ദുമണ്ഡനമഭൂത്കസ്തൂരികാപത്രകം യല്ലക്ഷ്മീകുചശാതകുമ്ഭ കലശേ വ്യാഗോചമിന്ദീവരമ് ।
യന്നിര്വാണവിധാനസാധനവിധൌ സിദ്ധാഞ്ജനം യോഗിനാം തന്നശ്യാമലമാവിരസ്തു ഹൃദയേ കൃഷ്ണാഭിധാനം മഹഃ ॥ 1 ॥
॥ ശ്രീ ജയദേവ ധ്യാനമ് ॥
രാധാമനോരമരമാവരരാസലീല-ഗാനാമൃതൈകഭണിതം കവിരാജരാജമ് ।
ശ്രീമാധവാര്ച്ചനവിധവനുരാഗസദ്മ-പദ്മാവതീപ്രിയതമം പ്രണതോസ്മി നിത്യമ് ॥ 2 ॥
ശ്രീഗോപലവിലാസിനീ വലയസദ്രത്നാദിമുഗ്ധാകൃതി ശ്രീരാധാപതിപാദപദ്മഭജനാനന്ദാബ്ധിമഗ്നോഽനിശമ് ॥
ലോകേ സത്കവിരാജരാജ ഇതി യഃ ഖ്യാതോ ദയാമ്ഭോനിധിഃ തം വന്ദേ ജയദേവസദ്ഗുരുമഹം പദ്മാവതീവല്ലഭമ് ॥ 3 ॥
॥ പ്രഥമഃ സര്ഗഃ ॥
॥ സാമോദദാമോദരഃ ॥
മേഘൈര്മേദുരമമ്ബരം വനഭുവഃ ശ്യാമാസ്തമാലദ്രുമൈ-ര്നക്തം ഭീരുരയം ത്വമേവ തദിമം രാധേ ഗൃഹം പ്രാപയ ।
ഇത്ഥം നന്ദനിദേശിതശ്ചലിതയോഃ പ്രത്യധ്വകുഞ്ജദ്രുമം രാധാമാധവയോര്ജയന്തി യമുനാകൂലേ രഹഃകേലയഃ ॥ 1 ॥
വാഗ്ദേവതാചരിതചിത്രിതചിത്തസദ്മാ പദ്മാവതീചരണചാരണചക്രവര്തീ ।
ശ്രീവാസുദേവരതികേലികഥാസമേതം ഏതം കരോതി ജയദേവകവിഃ പ്രബന്ധമ് ॥ 2 ॥
യദി ഹരിസ്മരണേ സരസം മനോ യദി വിലാസകലാസു കുതൂഹലമ് ।
മധുരകോമലകാന്തപദാവലീം ശൃണു തദാ ജയദേവസരസ്വതീമ് ॥ 3 ॥
വാചഃ പല്ലവയത്യുമാപതിധരഃ സന്ദര്ഭശുദ്ധിം ഗിരാം ജാനീതേ ജയദേവ ഏവ ശരണഃ ശ്ലാഘ്യോ ദുരൂഹദ്രുതേ ।
ശൃങ്ഗാരോത്തരസത്പ്രമേയരചനൈരാചാര്യഗോവര്ധന-സ്പര്ധീ കോഽപി ന വിശ്രുതഃ ശ്രുതിധരോ ധോയീ കവിക്ഷ്മാപതിഃ ॥ 4 ॥
॥ ഗീതം 1 ॥
പ്രലയപയോധിജലേ ധൃതവാനസി വേദമ് ।
വിഹിതവഹിത്രചരിത്രമഖേദമ് ॥
കേശവ ധൃതമീനശരീര ജയ ജഗദീശ ഹരേ ॥ 1 ॥
ക്ഷിതിരതിവിപുലതരേ തവ തിഷ്ഠതി പൃഷ്ഠേ ।
ധരണിധരണകിണചക്രഗരിഷ്ഠേ ॥
കേശവ ധൃതകച്ഛപരൂപ ജയ ജഗദീശ ഹരേ ॥ 2 ॥
വസതി ദശനശിഖരേ ധരണീ തവ ലഗ്നാ ।
ശശിനി കലങ്കകലേവ നിമഗ്നാ ॥
കേശവ ധൃതസൂകരരൂപ ജയ ജഗദീശ ഹരേ ॥ 3 ॥
തവ കരകമലവരേ നഖമദ്ഭുതശൃങ്ഗമ് ।
ദലിതഹിരണ്യകശിപുതനുഭൃങ്ഗമ് ॥
കേശവ ധൃതനരഹരിരൂപ ജയ ജഗദീശ ഹരേ ॥ 4 ॥
ഛലയസി വിക്രമണേ ബലിമദ്ഭുതവാമന ।
പദനഖനീരജനിതജനപാവന ॥
കേശവ ധൃതവാമനരൂപ ജയ ജഗദീശ ഹരേ ॥ 5 ॥
ക്ഷത്രിയരുധിരമയേ ജഗദപഗതപാപമ് ।
സ്നപയസി പയസി ശമിതഭവതാപമ് ॥
കേശവ ധൃതഭൃഘുപതിരൂപ ജയ ജഗദീശ ഹരേ ॥ 6 ॥
വിതരസി ദിക്ഷു രണേ ദിക്പതികമനീയമ് ।
ദശമുഖമൌലിബലിം രമണീയമ് ॥
കേശവ ധൃതരാമശരീര ജയ ജഗദീശ ഹരേ ॥ 7 ॥
വഹസി വപുഷി വിശദേ വസനം ജലദാഭമ് ।
ഹലഹതിഭീതിമിലിതയമുനാഭമ് ॥
കേശവ ധൃതഹലധരരൂപ ജയ ജഗദീശ ഹരേ ॥ 8 ॥
നിന്ദസി യജ്ഞവിധേരഹഹ ശ്രുതിജാതമ് ।
സദയഹൃദയദര്ശിതപശുഘാതമ് ॥
കേശവ ധൃതബുദ്ധശരീര ജയ ജഗദീശ ഹരേ ॥ 9 ॥
മ്ലേച്ഛനിവഹനിധനേ കലയസി കരവാലമ് ।
ധൂമകേതുമിവ കിമപി കരാലമ് ॥
കേശവ ധൃതകല്കിശരീര ജയ ജഗദീശ ഹരേ ॥ 10 ॥
ശ്രീജയദേവകവേരിദമുദിതമുദാരമ് ।
ശൃണു സുഖദം ശുഭദം ഭവസാരമ് ॥
കേശവ ധൃതദശവിധരൂപ ജയ ജഗദീശ ഹരേ ॥ 11 ॥
വേദാനുദ്ധരതേ ജഗന്നിവഹതേ ഭൂഗോലമുദ്ബിഭ്രതേ ദൈത്യം ദാരയതേ ബലിം ഛലയതേ ക്ഷത്രക്ഷയം കുര്വതേ ।
പൌലസ്ത്യം ജയതേ ഹലം കലയതേ കാരുണ്യമാതന്വതേ മ്ലേച്ഛാന്മൂര്ച്ഛയതേ ദശാകൃതികൃതേ കൃഷ്ണായ തുഭ്യം നമഃ ॥ 5 ॥
॥ ഗീതം 2 ॥
ശ്രിതകമലാകുചമണ്ഡല! ധൃതകുണ്ഡല! ।
കലിതലലിതവനമാല! ജയ, ജയ, ദേവ! ഹരേ! ॥ 1 ॥
ദിനമണീമണ്ഡലമണ്ഡന! ഭവഖണ്ഡന! ।
മുനിജനമാനസഹംസ! ജയ, ജയ, ദേവ! ഹരേ! ॥ 2 ॥
കാലിയവിഷധരഗഞ്ജന! ജനരഞ്ജന! ।
യദുകുലനലിനദിനേശ! ജയ, ജയ, ദേവ! ഹരേ! ॥ 3 ॥
മധുമുരനരകവിനാശന! ഗരുഡാസന! ।
സുരകുലകേലിനിദാന! ജയ, ജയ, ദേവ! ഹരേ! ॥ 4 ॥
അമലകമലദലലോചന! ഭവമോചന്! ।
ത്രിഭുവനഭവനനിധാന! ജയ, ജയ, ദേവ! ഹരേ! ॥ 5 ॥
ജനകസുതാകൃതഭൂഷണ! ജിതദൂഷണ! ।
സമരശമിതദശകണ്ഠ! ജയ, ജയ, ദേവ! ഹരേ! ॥ 6 ॥
അഭിനവജലധരസുന്ദര! ധൃതമന്ദര! ।
ശ്രീമുഖചന്ദ്രചകോര! ജയ, ജയ, ദേവ! ഹരേ! ॥ 7 ॥
ശ്രീജയദേവകവേരിദം കുരുതേ മുദമ് ।
മങ്ഗലമുജ്ജ്വലഗീതം; ജയ, ജയ, ദേവ! ഹരേ! ॥ 8 ॥
പദ്മാപയോധരതടീപരിരമ്ഭലഗ്ന-കാശ്മീരമുദ്രിതമുരോ മധുസൂദനസ്യ ।
വ്യക്താനുരാഗമിവ ഖേലദനങ്ഗഖേദ-സ്വേദാമ്ബുപൂരമനുപൂരയതു പ്രിയം വഃ ॥ 6 ॥
വസന്തേ വാസന്തീകുസുമസുകുമാരൈരവയവൈ-ര്ഭ്രമന്തീം കാന്താരേ ബഹുവിഹിതകൃഷ്ണാനുസരണാമ് ।
അമന്ദം കന്ദര്പജ്വരജനിതചിന്താകുലതയാ വലദ്ബാധാം രാധാം സരസമിദമുചേ സഹചരീ ॥ 7 ॥
॥ ഗീതം 3 ॥
ലലിതലവങ്ഗലതാപരിശീലനകോമലമലയസമീരേ ।
മധുകരനികരകരമ്ബിതകോകിലകൂജിതകുഞ്ജകുടീരേ ॥
വിഹരതി ഹരിരിഹ സരസവസന്തേ നൃത്യതി യുവതിജനേന സമം സഖി വിരഹിജനസ്യ ദുരന്തേ ॥ 1 ॥
ഉന്മദമദനമനോരഥപഥികവധൂജനജനിതവിലാപേ ।
അലികുലസങ്കുലകുസുമസമൂഹനിരാകുലബകുലകലാപേ ॥ 2 ॥
മൃഗമദസൌരഭരഭസവശംവദനവദലമാലതമാലേ ।
യുവജനഹൃദയവിദാരണമനസിജനഖരുചികിംശുകജാലേ ॥ 3 ॥
മദനമഹീപതികനകദണ്ഡരുചികേശരകുസുമവികാസേ ।
മിലിതശിലീമുഖപാടലിപടലകൃതസ്മരതൂണവിലാസേ ॥ 4 ॥
വിഗലിതലജ്ജിതജഗദവലോകനതരുണകരുണകൃതഹാസേ ।
വിരഹിനികൃന്തനകുന്തമുഖാകൃതികേതകദന്തുരിതാശേ ॥ 5 ॥
മാധവികാപരിമലലലിതേ നവമാലികജാതിസുഗന്ധൌ ।
മുനിമനസാമപി മോഹനകാരിണി തരുണാകാരണബന്ധൌ ॥ 6 ॥
സ്ഫുരദതിമുക്തലതാപരിരമ്ഭണമുകുലിതപുലകിതചൂതേ ।
ബൃന്ദാവനവിപിനേ പരിസരപരിഗതയമുനാജലപൂതേ ॥ 7 ॥
ശ്രീജയദേവഭണിതമിദമുദയതി ഹരിചരണസ്മൃതിസാരമ് ।
സരസവസന്തസമയവനവര്ണനമനുഗതമദനവികാരമ് ॥ 8 ॥
ദരവിദലിതമല്ലീവല്ലിചഞ്ചത്പരാഗ-പ്രകടിതപടവാസൈര്വാസയന് കാനനാനി ।
ഇഹ ഹി ദഹതി ചേതഃ കേതകീഗന്ധബന്ധുഃ പ്രസരദസമബാണപ്രാണവദ്ഗന്ധവാഹഃ ॥ 8 ॥
ഉന്മീലന്മധുഗന്ധലുബ്ധമധുപവ്യാധൂതചൂതാങ്കുര-ക്രീഡത്കോകിലകാകലീകലകലൈരുദ്ഗീര്ണകര്ണജ്വരാഃ ।
നീയന്തേ പഥികൈഃ കഥങ്കഥമപി ധ്യാനാവധാനക്ഷണ-പ്രാപ്തപ്രാണസമാസമാഗമരസോല്ലാസൈരമീ വാസരാഃ ॥ 9 ॥
അനേകനാരീപരിരമ്ഭസമ്ഭ്രമ-സ്ഫുരന്മനോഹാരിവിലാസലാലസമ് ।
മുരാരിമാരാദുപദര്ശയന്ത്യസൌ സഖീ സമക്ഷം പുനരാഹ രാധികാമ് ॥ 10 ॥
॥ ഗീതം 4 ॥
ചന്ദനചര്ചിതനീലകലേബരപീതവസനവനമാലീ ।
കേലിചലന്മണികുണ്ഡലമണ്ഡിതഗണ്ഡയുഗസ്മിതശാലീ ॥
ഹരിരിഹമുഗ്ധവധൂനികരേ വിലാസിനി വിലസതി കേലിപരേ ॥ 1 ॥
പീനപയോധരഭാരഭരേണ ഹരിം പരിരമ്യ സരാഗമ് ।
ഗോപവധൂരനുഗായതി കാചിദുദഞ്ചിതപഞ്ചമരാഗമ് ॥ 2 ॥
കാപി വിലാസവിലോലവിലോചനഖേലനജനിതമനോജമ് ।
ധ്യായതി മുഗ്ധവധൂരധികം മധുസൂദനവദനസരോജമ് ॥ 3 ॥
കാപി കപോലതലേ മിലിതാ ലപിതും കിമപി ശ്രുതിമൂലേ ।
ചാരു ചുചുമ്ബ നിതമ്ബവതീ ദയിതം പുലകൈരനുകൂലേ ॥ 4 ॥
കേലികലാകുതുകേന ച കാചിദമും യമുനാജലകൂലേ ।
മഞ്ജുലവഞ്ജുലകുഞ്ജഗതം വിചകര്ഷ കരേണ ദുകൂലേ ॥ 5 ॥
കരതലതാലതരലവലയാവലികലിതകലസ്വനവംശേ ।
രാസരസേ സഹനൃത്യപരാ ഹരിണാ യുവതിഃ പ്രശശംസേ ॥ 6 ॥
ശ്ലിഷ്യതി കാമപി ചുമ്ബതി കാമപി കാമപി രമയതി രാമാമ് ।
പശ്യതി സസ്മിതചാരുപരാമപരാമനുഗച്ഛതി വാമാമ് ॥ 7 ॥
ശ്രീജയദേവകവേരിദമദ്ഭുതകേശവകേലിരഹസ്യമ് ।
വൃന്ദാവനവിപിനേ ലലിതം വിതനോതു ശുഭാനി യശസ്യമ് ॥ 8 ॥
വിശ്വേഷാമനുരഞ്ജനേന ജനയന്നാനന്ദമിന്ദീവര-ശ്രേണീശ്യാമലകോമലൈരുപനയന്നങ്ഗൈരനങ്ഗോത്സവമ് ।
സ്വച്ഛന്ദം വ്രജസുന്ദരീഭിരഭിതഃ പ്രത്യങ്ഗമാലിങ്കിതഃ ശൃങ്ഗാരഃ സഖി മൂര്തിമാനിവ മധൌ മുഗ്ധോ ഹരിഃ ക്രീഡതി ॥ 11 ॥
അദ്യോത്സങ്ഗവസദ്ഭുജങ്ഗകവലക്ലേശാദിവേശാചലം പ്രാലേയപ്ലവനേച്ഛയാനുസരതി ശ്രീഖണ്ഡശൈലാനിലഃ ।
കിം ച സ്നിഗ്ധരസാലമൌലിമുകുലാന്യാലോക്യ ഹര്ഷോദയാ-ദുന്മീലന്തി കുഹൂഃ കുഹൂരിതി കലോത്താലാഃ പികാനാം ഗിരഃ ॥ 12 ॥
രാസോല്ലാസഭരേണവിഭ്രമഭൃതാമാഭീരവാമഭ്രുവാ-മഭ്യര്ണം പരിരമ്യനിര്ഭരമുരഃ പ്രേമാന്ധയാ രാധയാ ।
സാധു ത്വദ്വദനം സുധാമയമിതി വ്യാഹൃത്യ ഗീതസ്തുതി-വ്യാജാദുദ്ഭടചുമ്ബിതസ്മിതമനോഹരീ ഹരിഃ പാതു വഃ ॥ 13 ॥
॥ ഇതി ശ്രീഗീതഗോവിന്ദേ സാമോദദാമോദരോ നാമ പ്രഥമഃ സര്ഗഃ ॥
Roman (IAST) Transliteration
|| gītagovindam ||
|| aṣṭapadī ||
|| śrī gopālaka dhyānam ||
yadgopīvadanendumaṇḍanamabhūtkastūrikāpatrakaṃ yallakṣmīkucaśātakumbha kalaśe vyāgocamindīvaram |
yannirvāṇavidhānasādhanavidhau siddhāñjanaṃ yogināṃ tannaśyāmalamāvirastu hṛdaye kṛṣṇābhidhānaṃ mahaḥ || 1 ||
|| śrī jayadeva dhyānam ||
rādhāmanoramaramāvararāsalīla-gānāmṛtaikabhaṇitaṃ kavirājarājam |
śrīmādhavārccanavidhavanurāgasadma-padmāvatīpriyatamaṃ praṇatosmi nityam || 2 ||
śrīgopalavilāsinī valayasadratnādimugdhākṛti śrīrādhāpatipādapadmabhajanānandābdhimagno'niśam ||
loke satkavirājarāja iti yaḥ khyāto dayāmbhonidhiḥ taṃ vande jayadevasadgurumahaṃ padmāvatīvallabham || 3 ||
|| prathamaḥ sargaḥ ||
|| sāmodadāmodaraḥ ||
meghairmeduramambaraṃ vanabhuvaḥ śyāmāstamāladrumai-rnaktaṃ bhīrurayaṃ tvameva tadimaṃ rādhe gṛhaṃ prāpaya |
itthaṃ nandanideśitaścalitayoḥ pratyadhvakuñjadrumaṃ rādhāmādhavayorjayanti yamunākūle rahaḥkelayaḥ || 1 ||
vāgdevatācaritacitritacittasadmā padmāvatīcaraṇacāraṇacakravartī |
śrīvāsudevaratikelikathāsametaṃ etaṃ karoti jayadevakaviḥ prabandham || 2 ||
yadi harismaraṇe sarasaṃ mano yadi vilāsakalāsu kutūhalam |
madhurakomalakāntapadāvalīṃ śṛṇu tadā jayadevasarasvatīm || 3 ||
vācaḥ pallavayatyumāpatidharaḥ sandarbhaśuddhiṃ girāṃ jānīte jayadeva eva śaraṇaḥ ślāghyo durūhadrute |
śṛṅgārottarasatprameyaracanairācāryagovardhana-spardhī ko'pi na viśrutaḥ śrutidharo dhoyī kavikṣmāpatiḥ || 4 ||
|| gītaṃ 1 ||
pralayapayodhijale dhṛtavānasi vedam |
vihitavahitracaritramakhedam ||
keśava dhṛtamīnaśarīra jaya jagadīśa hare || 1 ||
kṣitirativipulatare tava tiṣṭhati pṛṣṭhe |
dharaṇidharaṇakiṇacakragariṣṭhe ||
keśava dhṛtakacchaparūpa jaya jagadīśa hare || 2 ||
vasati daśanaśikhare dharaṇī tava lagnā |
śaśini kalaṅkakaleva nimagnā ||
keśava dhṛtasūkararūpa jaya jagadīśa hare || 3 ||
tava karakamalavare nakhamadbhutaśṛṅgam |
dalitahiraṇyakaśiputanubhṛṅgam ||
keśava dhṛtanaraharirūpa jaya jagadīśa hare || 4 ||
chalayasi vikramaṇe balimadbhutavāmana |
padanakhanīrajanitajanapāvana ||
keśava dhṛtavāmanarūpa jaya jagadīśa hare || 5 ||
kṣatriyarudhiramaye jagadapagatapāpam |
snapayasi payasi śamitabhavatāpam ||
keśava dhṛtabhṛghupatirūpa jaya jagadīśa hare || 6 ||
vitarasi dikṣu raṇe dikpatikamanīyam |
daśamukhamaulibaliṃ ramaṇīyam ||
keśava dhṛtarāmaśarīra jaya jagadīśa hare || 7 ||
vahasi vapuṣi viśade vasanaṃ jaladābham |
halahatibhītimilitayamunābham ||
keśava dhṛtahaladhararūpa jaya jagadīśa hare || 8 ||
nindasi yajñavidherahaha śrutijātam |
sadayahṛdayadarśitapaśughātam ||
keśava dhṛtabuddhaśarīra jaya jagadīśa hare || 9 ||
mlecchanivahanidhane kalayasi karavālam |
dhūmaketumiva kimapi karālam ||
keśava dhṛtakalkiśarīra jaya jagadīśa hare || 10 ||
śrījayadevakaveridamuditamudāram |
śṛṇu sukhadaṃ śubhadaṃ bhavasāram ||
keśava dhṛtadaśavidharūpa jaya jagadīśa hare || 11 ||
vedānuddharate jagannivahate bhūgolamudbibhrate daityaṃ dārayate baliṃ chalayate kṣatrakṣayaṃ kurvate |
paulastyaṃ jayate halaṃ kalayate kāruṇyamātanvate mlecchānmūrcchayate daśākṛtikṛte kṛṣṇāya tubhyaṃ namaḥ || 5 ||
|| gītaṃ 2 ||
śritakamalākucamaṇḍala! dhṛtakuṇḍala! |
kalitalalitavanamāla! jaya, jaya, deva! hare! || 1 ||
dinamaṇīmaṇḍalamaṇḍana! bhavakhaṇḍana! |
munijanamānasahaṃsa! jaya, jaya, deva! hare! || 2 ||
kāliyaviṣadharagañjana! janarañjana! |
yadukulanalinadineśa! jaya, jaya, deva! hare! || 3 ||
madhumuranarakavināśana! garuḍāsana! |
surakulakelinidāna! jaya, jaya, deva! hare! || 4 ||
amalakamaladalalocana! bhavamocan! |
tribhuvanabhavananidhāna! jaya, jaya, deva! hare! || 5 ||
janakasutākṛtabhūṣaṇa! jitadūṣaṇa! |
samaraśamitadaśakaṇṭha! jaya, jaya, deva! hare! || 6 ||
abhinavajaladharasundara! dhṛtamandara! |
śrīmukhacandracakora! jaya, jaya, deva! hare! || 7 ||
śrījayadevakaveridaṃ kurute mudam |
maṅgalamujjvalagītaṃ; jaya, jaya, deva! hare! || 8 ||
padmāpayodharataṭīparirambhalagna-kāśmīramudritamuro madhusūdanasya |
vyaktānurāgamiva kheladanaṅgakheda-svedāmbupūramanupūrayatu priyaṃ vaḥ || 6 ||
vasante vāsantīkusumasukumārairavayavai-rbhramantīṃ kāntāre bahuvihitakṛṣṇānusaraṇām |
amandaṃ kandarpajvarajanitacintākulatayā valadbādhāṃ rādhāṃ sarasamidamuce sahacarī || 7 ||
|| gītaṃ 3 ||
lalitalavaṅgalatāpariśīlanakomalamalayasamīre |
madhukaranikarakarambitakokilakūjitakuñjakuṭīre ||
viharati haririha sarasavasante nṛtyati yuvatijanena samaṃ sakhi virahijanasya durante || 1 ||
unmadamadanamanorathapathikavadhūjanajanitavilāpe |
alikulasaṅkulakusumasamūhanirākulabakulakalāpe || 2 ||
mṛgamadasaurabharabhasavaśaṃvadanavadalamālatamāle |
yuvajanahṛdayavidāraṇamanasijanakharucikiṃśukajāle || 3 ||
madanamahīpatikanakadaṇḍarucikeśarakusumavikāse |
militaśilīmukhapāṭalipaṭalakṛtasmaratūṇavilāse || 4 ||
vigalitalajjitajagadavalokanataruṇakaruṇakṛtahāse |
virahinikṛntanakuntamukhākṛtiketakadanturitāśe || 5 ||
mādhavikāparimalalalite navamālikajātisugandhau |
munimanasāmapi mohanakāriṇi taruṇākāraṇabandhau || 6 ||
sphuradatimuktalatāparirambhaṇamukulitapulakitacūte |
bṛndāvanavipine parisaraparigatayamunājalapūte || 7 ||
śrījayadevabhaṇitamidamudayati haricaraṇasmṛtisāram |
sarasavasantasamayavanavarṇanamanugatamadanavikāram || 8 ||
daravidalitamallīvallicañcatparāga-prakaṭitapaṭavāsairvāsayan kānanāni |
iha hi dahati cetaḥ ketakīgandhabandhuḥ prasaradasamabāṇaprāṇavadgandhavāhaḥ || 8 ||
unmīlanmadhugandhalubdhamadhupavyādhūtacūtāṅkura-krīḍatkokilakākalīkalakalairudgīrṇakarṇajvarāḥ |
nīyante pathikaiḥ kathaṅkathamapi dhyānāvadhānakṣaṇa-prāptaprāṇasamāsamāgamarasollāsairamī vāsarāḥ || 9 ||
anekanārīparirambhasambhrama-sphuranmanohārivilāsalālasam |
murārimārādupadarśayantyasau sakhī samakṣaṃ punarāha rādhikām || 10 ||
|| gītaṃ 4 ||
candanacarcitanīlakalebarapītavasanavanamālī |
kelicalanmaṇikuṇḍalamaṇḍitagaṇḍayugasmitaśālī ||
haririhamugdhavadhūnikare vilāsini vilasati kelipare || 1 ||
pīnapayodharabhārabhareṇa hariṃ pariramya sarāgam |
gopavadhūranugāyati kācidudañcitapañcamarāgam || 2 ||
kāpi vilāsavilolavilocanakhelanajanitamanojam |
dhyāyati mugdhavadhūradhikaṃ madhusūdanavadanasarojam || 3 ||
kāpi kapolatale militā lapituṃ kimapi śrutimūle |
cāru cucumba nitambavatī dayitaṃ pulakairanukūle || 4 ||
kelikalākutukena ca kācidamuṃ yamunājalakūle |
mañjulavañjulakuñjagataṃ vicakarṣa kareṇa dukūle || 5 ||
karatalatālataralavalayāvalikalitakalasvanavaṃśe |
rāsarase sahanṛtyaparā hariṇā yuvatiḥ praśaśaṃse || 6 ||
śliṣyati kāmapi cumbati kāmapi kāmapi ramayati rāmām |
paśyati sasmitacāruparāmaparāmanugacchati vāmām || 7 ||
śrījayadevakaveridamadbhutakeśavakelirahasyam |
vṛndāvanavipine lalitaṃ vitanotu śubhāni yaśasyam || 8 ||
viśveṣāmanurañjanena janayannānandamindīvara-śreṇīśyāmalakomalairupanayannaṅgairanaṅgotsavam |
svacchandaṃ vrajasundarībhirabhitaḥ pratyaṅgamāliṅkitaḥ śṛṅgāraḥ sakhi mūrtimāniva madhau mugdho hariḥ krīḍati || 11 ||
adyotsaṅgavasadbhujaṅgakavalakleśādiveśācalaṃ prāleyaplavanecchayānusarati śrīkhaṇḍaśailānilaḥ |
kiṃ ca snigdharasālamaulimukulānyālokya harṣodayā-dunmīlanti kuhūḥ kuhūriti kalottālāḥ pikānāṃ giraḥ || 12 ||
rāsollāsabhareṇavibhramabhṛtāmābhīravāmabhruvā-mabhyarṇaṃ pariramyanirbharamuraḥ premāndhayā rādhayā |
sādhu tvadvadanaṃ sudhāmayamiti vyāhṛtya gītastuti-vyājādudbhaṭacumbitasmitamanoharī hariḥ pātu vaḥ || 13 ||
|| iti śrīgītagovinde sāmodadāmodaro nāma prathamaḥ sargaḥ ||
InfoLyter.in — Sacred Vedic Knowledge Portal · Free forever