📄 Save this Stotram as PDF Click the button to open the Save dialog
How to save: 1 Click "Save as PDF" → 2 A dialog opens → 3 Choose "Save as PDF" as printer → 4 Click Save
ॐ
ബഹുരൂപ ഗണപതി (ദ്വാത്രിംശദ്ഗണപതി) ധ്യാന ശ്ലോകാഃ
Bahurupa Ganapati (dvatrimshadganapati) Dhyana Shlokah
Ganesha Dhyana Shloka Malayalam
1. ശ്രീ ബാല ഗണപതിഃ
കരസ്ഥ കദലീചൂതപനസേക്ഷുകമോദകമ് ।
ബാലസൂര്യനിഭം വന്ദേ ദേവം ബാലഗണാധിപമ് ॥ 1 ॥
2. ശ്രീ തരുണ ഗണപതിഃ
പാശാങ്കുശാപൂപകപിത്ഥജമ്ബൂ-
-സ്വദന്തശാലീക്ഷുമപി സ്വഹസ്തൈഃ ।
ധത്തേ സദാ യസ്തരുണാരുണാഭഃ
പായാത് സ യുഷ്മാംസ്തരുണോ ഗണേശഃ ॥ 2 ॥
3. ശ്രീ ഭക്ത ഗണപതിഃ
നാരികേലാമ്രകദലീഗുഡപായസധാരിണമ് ।
ശരച്ചന്ദ്രാഭവപുഷം ഭജേ ഭക്തഗണാധിപമ് ॥ 3 ॥
4. ശ്രീ വീര ഗണപതിഃ
വേതാലശക്തിശരകാര്മുകചക്രഖഡ്ഗ-
-ഖട്വാങ്ഗമുദ്ഗരഗദാങ്കുശനാഗപാശാന് ।
ശൂലം ച കുന്തപരശും ധ്വജമുദ്വഹന്തം
വീരം ഗണേശമരുണം സതതം സ്മരാമി ॥ 4 ॥
5. ശ്രീ ശക്തി ഗണപതിഃ
ആലിങ്ഗ്യ ദേവീം ഹരിതാങ്ഗയഷ്ടിം
പരസ്പരാശ്ലിഷ്ടകടിപ്രദേശമ് ।
സന്ധ്യാരുണം പാശസൃണീ വഹന്തം
ഭയാപഹം ശക്തിഗണേശമീഡേ ॥ 5 ॥
6. ശ്രീ ദ്വിജ ഗണപതിഃ
യം പുസ്തകാക്ഷ ഗുണദണ്ഡകമണ്ഡലു ശ്രീ-
-വിദ്യോതമാനകരഭൂഷണമിന്ദുവര്ണമ് ।
സ്തമ്ബേരമാനനചതുഷ്ടയശോഭമാനം
ത്വാം യഃ സ്മരേത് ദ്വിജഗണാധിപതേ സ ധന്യഃ ॥ 6 ॥
7. ശ്രീ സിദ്ധ ഗണപതിഃ
പക്വചൂതഫലപുഷ്പമഞ്ജരീ-
-രിക്ഷുദണ്ഡതിലമോദകൈഃ സഹ ।
ഉദ്വഹന് പരശുമസ്തു തേ നമഃ
ശ്രീസമൃദ്ധിയുത ഹേമപിങ്ഗല ॥ 7 ॥
8. ശ്രീ ഉച്ഛിഷ്ട ഗണപതിഃ
നീലാബ്ജദാഡിമീവീണാശാലീഗുഞ്ജാക്ഷസൂത്രകമ് ।
ദധദുച്ഛിഷ്ടനാമായം ഗണേശഃ പാതു മേചകഃ ॥ 8 ॥
9. ശ്രീ വിഘ്ന ഗണപതിഃ
ശങ്ഖേക്ഷുചാപകുസുമേഷുകുഠാരപാശ-
-ചക്രസ്വദന്തസൃണിമഞ്ജരികാശരാദ്യൈഃ ।
പാണിശ്രിതൈഃ പരിസമീഹിതഭൂഷണശ്രീ-
-വിഘ്നേശ്വരോ വിജയതേ തപനീയഗൌരഃ ॥ 9 ॥
10. ശ്രീ ക്ഷിപ്ര ഗണപതിഃ
ദന്തകല്പലതാപാശരത്നകുമ്ഭാങ്കുശോജ്ജ്വലമ് ।
ബന്ധൂകകമനീയാഭം ധ്യായേത് ക്ഷിപ്രഗണാധിപമ് ॥ 10 ॥
11. ശ്രീ ഹേരമ്ബ ഗണപതിഃ
അഭയവരദഹസ്തഃ പാശദന്താക്ഷമാലാ-
-സൃണിപരശു ദധാനോ മുദ്ഗരം മോദകം ച ।
ഫലമധിഗതസിംഹഃ പഞ്ചമാതങ്ഗവക്ത്രോ
ഗണപതിരതിഗൌരഃ പാതു ഹേരമ്ബനാമാ ॥ 11 ॥
12. ശ്രീ ലക്ഷ്മീ ഗണപതിഃ
ബിഭ്രാണഃ ശുകബീജപൂരകമിലന്മാണിക്യകുമ്ഭാകുശാന്
പാശം കല്പലതാം ച ഖഡ്ഗവിലസജ്ജ്യോതിഃ സുധാനിര്ഝരഃ ।
ശ്യാമേനാത്തസരോരുഹേണ സഹിതം ദേവീദ്വയം ചാന്തികേ
ഗൌരാങ്ഗോ വരദാനഹസ്തസഹിതോ ലക്ഷ്മീഗണേശോഽവതാത് ॥ 12 ॥
13. ശ്രീ മഹാ ഗണപതിഃ
ഹസ്തീന്ദ്രാനനമിന്ദുചൂഡമരുണച്ഛായം ത്രിനേത്രം രസാ-
-ദാശ്ലിഷ്ടം പ്രിയയാ സപദ്മകരയാ സ്വാങ്കസ്ഥയാ സന്തതമ് ।
ബീജാപൂരഗദേക്ഷുകാര്മുകലസച്ചക്രാബ്ജപാശോത്പല-
-വ്രീഹ്യഗ്രസ്വവിഷാണരത്നകലശാന് ഹസ്തൈര്വഹന്തം ഭജേ ॥ 13 ॥
14. ശ്രീ വിജയ ഗണപതിഃ
പാശാങ്കുശസ്വദന്താമ്രഫലവാനാഖുവാഹനഃ ।
വിഘ്നം നിഹന്തു നഃ സര്വം രക്തവര്ണോ വിനായകഃ ॥ 14 ॥
15. ശ്രീ നൃത്ത ഗണപതിഃ
പാശാങ്കുശാപൂപകുഠാരദന്ത-
-ചഞ്ചത്കരാക്ലുപ്തവരാങ്ഗുലീകമ് ।
പീതപ്രഭം കല്പതരോരധസ്ഥം
ഭജാമി നൃത്തോപപദം ഗണേശമ് ॥ 15 ॥
16. ശ്രീ ഊര്ധ്വ ഗണപതിഃ
കല്ഹാരശാലികമലേക്ഷുകചാപബാണ-
-ദന്തപ്രരോഹകഗദീ കനകോജ്ജ്വലാങ്ഗഃ ।
ആലിങ്ഗനോദ്യതകരോ ഹരിതാങ്ഗയഷ്ട്യാ
ദേവ്യാ കരോതു ശുഭമൂര്ധ്വഗണാധിപോ മേ ॥ 16 ॥
17. ശ്രീ ഏകാക്ഷര ഗണപതിഃ
രക്തോ രക്താങ്ഗരാഗാങ്കുശകുസുമയുതസ്തുന്ദിലശ്ചന്ദ്രമൌലിഃ
നേത്രൈര്യുക്തസ്ത്രിഭിര്വാമനകരചരണോ ബീജപൂരം ദധാനഃ ।
ഹസ്താഗ്രാക്ലുപ്ത പാശാങ്കുശരദവരദോ നാഗവക്ത്രോഽഹിഭൂഷോ
ദേവഃ പദ്മാസനസ്ഥോ ഭവതു സുഖകരോ ഭൂതയേ വിഘ്നരാജഃ ॥ 17 ॥
18. ശ്രീ വര ഗണപതിഃ
സിന്ദൂരാഭമിഭാനനം ത്രിനയനം ഹസ്തേ ച പാശാങ്കുശൌ
ബിഭ്രാണം മധുമത്കപാലമനിശം സാധ്വിന്ദുമൌലിം ഭജേ ।
പുഷ്ട്യാശ്ലിഷ്ടതനും ധ്വജാഗ്രകരയാ പദ്മോല്ലസദ്ധസ്തയാ
തദ്യോന്യാഹിത പാണിമാത്തവസുമത്പാത്രോല്ലസത്പുഷ്കരമ് ॥ 18 ॥
19. ശ്രീ ത്ര്യക്ഷര ഗണപതിഃ
ഗജേന്ദ്രവദനം സാക്ഷാച്ചലത്കര്ണസുചാമരം
ഹേമവര്ണം ചതുര്ബാഹും പാശാങ്കുശധരം വരമ് ।
സ്വദന്തം ദക്ഷിണേ ഹസ്തേ സവ്യേ ത്വാമ്രപലം തഥാ
പുഷ്കരൈര്മോദകം ചൈവ ധാരയന്തമനുസ്മരേത് ॥ 19 ॥
20. ശ്രീ ക്ഷിപ്രപ്രസാദ ഗണപതിഃ
ധൃതപാശാങ്കുശകല്പലതാ സ്വരദശ്ച ബീജപൂരയുതഃ
ശശിശകലകലിതമൌലിസ്ത്രിലോചനോഽരുണശ്ച ഗജവദനഃ ।
ഭാസുരഭൂഷണദീപ്തോ ബൃഹദുദരഃ പദ്മവിഷ്ടരോല്ലസിതഃ
വിഘ്നപയോധരപവനഃ കരധൃതകമലഃ സദാസ്തു മേ ഭൂത്യൈ ॥ 20 ॥
21. ശ്രീ ഹരിദ്രാ ഗണപതിഃ
ഹരിദ്രാഭം ചതുര്ബാഹും കരീന്ദ്രവദനം പ്രഭുമ് ।
പാശാങ്കുശധരം ദേവം മോദകം ദന്തമേവ ച ।
ഭക്താഭയപ്രദാതാരം വന്ദേ വിഘ്നവിനാശനമ് ॥ 21 ॥
22. ശ്രീ ഏകദന്ത ഗണപതിഃ
ലമ്ബോദരം ശ്യാമതനും ഗണേശം
കുഠാരമക്ഷസ്രജമൂര്ധ്വഗാത്രമ് ।
സലഡ്ഡുകം ദന്തമധഃ കരാഭ്യാം
വാമേതരാഭ്യാം ച ദധാനമീഡേ ॥ 22 ॥
23. ശ്രീ സൃഷ്ടി ഗണപതിഃ
പാശാങ്കുശസ്വദന്താമ്രഫലവാനാഖുവാഹനഃ ।
വിഘ്നം നിഹന്തു നഃ ശോണഃ സൃഷ്ടിദക്ഷോ വിനായകഃ ॥ 23 ॥
24. ശ്രീ ഉദ്ദണ്ഡ ഗണപതിഃ
കല്ഹാരാമ്ബുജബീജപൂരകഗദാദന്തേക്ഷുചാപം സുമം
ബിഭ്രാണോ മണികുമ്ഭശാലികലശൌ പാശം സൃണിം ചാബ്ജകമ് ।
ഗൌരാങ്ഗ്യാ രുചിരാരവിന്ദകരയാ ദേവ്യാ സമാലിങ്ഗതഃ
ശോണാങ്ഗഃ ശുഭമാതനോതു ഭജതാമുദ്ദണ്ഡവിഘ്നേശ്വരഃ ॥ 24 ॥
25. ശ്രീ ഋണമോചക ഗണപതിഃ
പാശാങ്കുശൌ ദന്തജമ്ബു ദധാനഃ സ്ഫാടികപ്രഭഃ ।
രക്താംശുകോ ഗണപതിര്മുദേ സ്യാദൃണമോചകഃ ॥ 25 ॥
26. ശ്രീ ഢുണ്ഢി ഗണപതിഃ
അക്ഷമാലാം കുഠാരം ച രത്നപാത്രം സ്വദന്തകമ് ।
ധത്തേ കരൈര്വിഘ്നരാജോ ഢുണ്ഢിനാമാ മുദേഽസ്തു നഃ ॥ 26 ॥
27. ശ്രീ ദ്വിമുഖ ഗണപതിഃ
സ്വദന്തപാശാങ്കുശരത്നപാത്രം
കരൈര്ദധാനോ ഹരിനീലഗാത്രഃ ।
രക്താംശുകോ രത്നകിരീടമാലീ
ഭൂത്യൈ സദാ മേ ദ്വിമുഖോ ഗണേശഃ ॥ 27 ॥
28. ശ്രീ ത്രിമുഖ ഗണപതിഃ
ശ്രീമത്തീക്ഷ്ണശിഖാങ്കുശാക്ഷവരദാന് ദക്ഷേ ദധാനഃ കരൈഃ
പാശം ചാമൃതപൂര്ണകുമ്ഭമഭയം വാമേ ദധാനോ മുദാ ।
പീഠേ സ്വര്ണമയാരവിന്ദവിലസത്സത്കര്ണികാഭാസുരേ
സ്വാസീനസ്ത്രിമുഖഃ പലാശരുചിരോ നാഗാനനഃ പാതു നഃ ॥ 28 ॥
29. ശ്രീ സിംഹ ഗണപതിഃ
വീണാം കല്പലതാമരിം ച വരദം ദക്ഷേ വിദത്തേ കരൈ-
-ര്വാമേ താമരസം ച രത്നകലശം സന്മഞ്ജരീം ചാഭയമ് ।
ശുണ്ഡാദണ്ഡലസന്മൃഗേന്ദ്രവദനഃ ശങ്ഖേന്ദുഗൌരഃ ശുഭോ
ദീവ്യദ്രത്നനിഭാംശുകോ ഗണപതിഃ പായാദപായത് സ നഃ ॥ 29 ॥
30. ശ്രീ യോഗ ഗണപതിഃ
യോഗാരൂഢോ യോഗപട്ടാഭിരാമോ
ബാലാര്കാഭശ്ചേന്ദ്രനീലാംശുകാഢ്യഃ ।
പാശേക്ഷ്വക്ഷാന് യോഗദണ്ഡം ദധാനോ
പായാന്നിത്യം യോഗവിഘ്നേശ്വരോ നഃ ॥ 30 ॥
31. ശ്രീ ദുര്ഗാ ഗണപതിഃ
തപ്തകാഞ്ചനസങ്കാശശ്ചാഷ്ടഹസ്തോ മഹത്തനുഃ
ദീപ്താങ്കുശം ശരം ചാക്ഷം ദന്തു ദക്ഷേ വഹന് കരൈഃ ।
വാമേ പാശം കാര്മുകം ച ലതാം ജമ്ബു ദധത്കരൈഃ
രക്താംശുകഃ സദാ ഭൂയാദ്ദുര്ഗാഗണപതിര്മുദേ ॥ 31 ॥
32. ശ്രീ സങ്കഷ്ടഹര ഗണപതിഃ
ബാലാര്കാരുണകാന്തിര്വാമേ ബാലാം വഹന്നങ്കേ
ലസദിന്ദീവരഹസ്താം ഗൌരാങ്ഗീം രത്നശോഭാഢ്യാമ് ।
ദക്ഷേഽങ്കുശവരദാനം വാമേ പാശം ച പായസം പാത്രം
നീലാംശുകലസമാനഃ പീഠേ പദ്മാരുണേ തിഷ്ഠന് ॥ 32 ॥
സങ്കടഹരണഃ പായാത് സങ്കടപൂഗാദ്ഗജാനനോ നിത്യമ് ।
ശ്രീ വല്ലഭ ഗണപതി
ബീജാപൂര ഗദേക്ഷുകാര്മുകഭുജാചക്രാബ്ജ പാശോത്പല
വ്രീഹ്യഗ്രസ്വവിഷാണ രത്നകലശ പ്രോദ്യത്കരാമ്ഭോരുഹഃ ।
ധ്യേയോ വല്ലഭയാ ച പദ്മകരയാശ്ലിഷ്ടോ ജ്വലദ്ഭൂഷയാ
വിശ്വോത്പത്തിവിനാശസംസ്ഥിതികരോ വിഘ്നോ വിശിഷ്ടാര്ഥദഃ ॥
ശ്രീ സിദ്ധിദേവീ
പീതവര്ണാം ദ്വിനേത്രാം താമേകവക്ത്രാമ്ബുജദ്വയാം
നവരത്നകിരീടാം ച പീതാമ്ബരസുധാരിണീമ് ।
വാമഹസ്തേ മഹാപദ്മം ദക്ഷേ ലമ്ബകരാന്വിതാം
ജാജീചമ്പകമാലാം ച ത്രിഭങ്ഗീം ലലിതാങ്ഗികാമ് ॥
ഗണേശദക്ഷിണേ ഭാഗേ ഗുരുഃ സിദ്ധിം തു ഭാവയേത് ॥
ശ്രീ ബുദ്ധിദേവീ
ദ്വിഹസ്താം ച ദ്വിനേത്രാം താമേകവക്ത്രാം ത്രിഭങ്ഗികാം
മുക്താമണികിരീടാം ച ദക്ഷേ ഹസ്തേ മഹോത്പലമ് ।
വാമേ പ്രലമ്ബഹസ്താം ച ദിവ്യാമ്ബരസുധാരിണീം
ശ്യാമവര്ണനിഭാം ഭാസ്വത്സര്വാഭരണഭൂഷിതാമ് ॥
പാരിജാതോത്പലാമാല്യാം ഗണേശോ വാമപാര്ശ്വകേ
ധ്യാത്വാ ബുദ്ധിം സുരൂപാം സമര്ചയേദ്ദേശികോത്തമഃ ॥
Roman (IAST) Transliteration
1. śrī bāla gaṇapatiḥ
karastha kadalīcūtapanasekṣukamodakam |
bālasūryanibhaṃ vande devaṃ bālagaṇādhipam || 1 ||
2. śrī taruṇa gaṇapatiḥ
pāśāṅkuśāpūpakapitthajambū-
-svadantaśālīkṣumapi svahastaiḥ |
dhatte sadā yastaruṇāruṇābhaḥ
pāyāt sa yuṣmāṃstaruṇo gaṇeśaḥ || 2 ||
3. śrī bhakta gaṇapatiḥ
nārikelāmrakadalīguḍapāyasadhāriṇam |
śaraccandrābhavapuṣaṃ bhaje bhaktagaṇādhipam || 3 ||
4. śrī vīra gaṇapatiḥ
vetālaśaktiśarakārmukacakrakhaḍga-
-khaṭvāṅgamudgaragadāṅkuśanāgapāśān |
śūlaṃ ca kuntaparaśuṃ dhvajamudvahantaṃ
vīraṃ gaṇeśamaruṇaṃ satataṃ smarāmi || 4 ||
5. śrī śakti gaṇapatiḥ
āliṅgya devīṃ haritāṅgayaṣṭiṃ
parasparāśliṣṭakaṭipradeśam |
sandhyāruṇaṃ pāśasṛṇī vahantaṃ
bhayāpahaṃ śaktigaṇeśamīḍe || 5 ||
6. śrī dvija gaṇapatiḥ
yaṃ pustakākṣa guṇadaṇḍakamaṇḍalu śrī-
-vidyotamānakarabhūṣaṇaminduvarṇam |
stamberamānanacatuṣṭayaśobhamānaṃ
tvāṃ yaḥ smaret dvijagaṇādhipate sa dhanyaḥ || 6 ||
7. śrī siddha gaṇapatiḥ
pakvacūtaphalapuṣpamañjarī-
-rikṣudaṇḍatilamodakaiḥ saha |
udvahan paraśumastu te namaḥ
śrīsamṛddhiyuta hemapiṅgala || 7 ||
8. śrī ucchiṣṭa gaṇapatiḥ
nīlābjadāḍimīvīṇāśālīguñjākṣasūtrakam |
dadhaducchiṣṭanāmāyaṃ gaṇeśaḥ pātu mecakaḥ || 8 ||
9. śrī vighna gaṇapatiḥ
śaṅkhekṣucāpakusumeṣukuṭhārapāśa-
-cakrasvadantasṛṇimañjarikāśarādyaiḥ |
pāṇiśritaiḥ parisamīhitabhūṣaṇaśrī-
-vighneśvaro vijayate tapanīyagauraḥ || 9 ||
10. śrī kṣipra gaṇapatiḥ
dantakalpalatāpāśaratnakumbhāṅkuśojjvalam |
bandhūkakamanīyābhaṃ dhyāyet kṣipragaṇādhipam || 10 ||
11. śrī heramba gaṇapatiḥ
abhayavaradahastaḥ pāśadantākṣamālā-
-sṛṇiparaśu dadhāno mudgaraṃ modakaṃ ca |
phalamadhigatasiṃhaḥ pañcamātaṅgavaktro
gaṇapatiratigauraḥ pātu herambanāmā || 11 ||
12. śrī lakṣmī gaṇapatiḥ
bibhrāṇaḥ śukabījapūrakamilanmāṇikyakumbhākuśān
pāśaṃ kalpalatāṃ ca khaḍgavilasajjyotiḥ sudhānirjharaḥ |
śyāmenāttasaroruheṇa sahitaṃ devīdvayaṃ cāntike
gaurāṅgo varadānahastasahito lakṣmīgaṇeśo'vatāt || 12 ||
13. śrī mahā gaṇapatiḥ
hastīndrānanaminducūḍamaruṇacchāyaṃ trinetraṃ rasā-
-dāśliṣṭaṃ priyayā sapadmakarayā svāṅkasthayā santatam |
bījāpūragadekṣukārmukalasaccakrābjapāśotpala-
-vrīhyagrasvaviṣāṇaratnakalaśān hastairvahantaṃ bhaje || 13 ||
14. śrī vijaya gaṇapatiḥ
pāśāṅkuśasvadantāmraphalavānākhuvāhanaḥ |
vighnaṃ nihantu naḥ sarvaṃ raktavarṇo vināyakaḥ || 14 ||
15. śrī nṛtta gaṇapatiḥ
pāśāṅkuśāpūpakuṭhāradanta-
-cañcatkarākluptavarāṅgulīkam |
pītaprabhaṃ kalpataroradhasthaṃ
bhajāmi nṛttopapadaṃ gaṇeśam || 15 ||
16. śrī ūrdhva gaṇapatiḥ
kalhāraśālikamalekṣukacāpabāṇa-
-dantaprarohakagadī kanakojjvalāṅgaḥ |
āliṅganodyatakaro haritāṅgayaṣṭyā
devyā karotu śubhamūrdhvagaṇādhipo me || 16 ||
17. śrī ekākṣara gaṇapatiḥ
rakto raktāṅgarāgāṅkuśakusumayutastundilaścandramauliḥ
netrairyuktastribhirvāmanakaracaraṇo bījapūraṃ dadhānaḥ |
hastāgrāklupta pāśāṅkuśaradavarado nāgavaktro'hibhūṣo
devaḥ padmāsanastho bhavatu sukhakaro bhūtaye vighnarājaḥ || 17 ||
18. śrī vara gaṇapatiḥ
sindūrābhamibhānanaṃ trinayanaṃ haste ca pāśāṅkuśau
bibhrāṇaṃ madhumatkapālamaniśaṃ sādhvindumauliṃ bhaje |
puṣṭyāśliṣṭatanuṃ dhvajāgrakarayā padmollasaddhastayā
tadyonyāhita pāṇimāttavasumatpātrollasatpuṣkaram || 18 ||
19. śrī tryakṣara gaṇapatiḥ
gajendravadanaṃ sākṣāccalatkarṇasucāmaraṃ
hemavarṇaṃ caturbāhuṃ pāśāṅkuśadharaṃ varam |
svadantaṃ dakṣiṇe haste savye tvāmrapalaṃ tathā
puṣkarairmodakaṃ caiva dhārayantamanusmaret || 19 ||
20. śrī kṣipraprasāda gaṇapatiḥ
dhṛtapāśāṅkuśakalpalatā svaradaśca bījapūrayutaḥ
śaśiśakalakalitamaulistrilocano'ruṇaśca gajavadanaḥ |
bhāsurabhūṣaṇadīpto bṛhadudaraḥ padmaviṣṭarollasitaḥ
vighnapayodharapavanaḥ karadhṛtakamalaḥ sadāstu me bhūtyai || 20 ||
21. śrī haridrā gaṇapatiḥ
haridrābhaṃ caturbāhuṃ karīndravadanaṃ prabhum |
pāśāṅkuśadharaṃ devaṃ modakaṃ dantameva ca |
bhaktābhayapradātāraṃ vande vighnavināśanam || 21 ||
22. śrī ekadanta gaṇapatiḥ
lambodaraṃ śyāmatanuṃ gaṇeśaṃ
kuṭhāramakṣasrajamūrdhvagātram |
salaḍḍukaṃ dantamadhaḥ karābhyāṃ
vāmetarābhyāṃ ca dadhānamīḍe || 22 ||
23. śrī sṛṣṭi gaṇapatiḥ
pāśāṅkuśasvadantāmraphalavānākhuvāhanaḥ |
vighnaṃ nihantu naḥ śoṇaḥ sṛṣṭidakṣo vināyakaḥ || 23 ||
24. śrī uddaṇḍa gaṇapatiḥ
kalhārāmbujabījapūrakagadādantekṣucāpaṃ sumaṃ
bibhrāṇo maṇikumbhaśālikalaśau pāśaṃ sṛṇiṃ cābjakam |
gaurāṅgyā rucirāravindakarayā devyā samāliṅgataḥ
śoṇāṅgaḥ śubhamātanotu bhajatāmuddaṇḍavighneśvaraḥ || 24 ||
25. śrī ṛṇamocaka gaṇapatiḥ
pāśāṅkuśau dantajambu dadhānaḥ sphāṭikaprabhaḥ |
raktāṃśuko gaṇapatirmude syādṛṇamocakaḥ || 25 ||
26. śrī ḍhuṇḍhi gaṇapatiḥ
akṣamālāṃ kuṭhāraṃ ca ratnapātraṃ svadantakam |
dhatte karairvighnarājo ḍhuṇḍhināmā mude'stu naḥ || 26 ||
27. śrī dvimukha gaṇapatiḥ
svadantapāśāṅkuśaratnapātraṃ
karairdadhāno harinīlagātraḥ |
raktāṃśuko ratnakirīṭamālī
bhūtyai sadā me dvimukho gaṇeśaḥ || 27 ||
28. śrī trimukha gaṇapatiḥ
śrīmattīkṣṇaśikhāṅkuśākṣavaradān dakṣe dadhānaḥ karaiḥ
pāśaṃ cāmṛtapūrṇakumbhamabhayaṃ vāme dadhāno mudā |
pīṭhe svarṇamayāravindavilasatsatkarṇikābhāsure
svāsīnastrimukhaḥ palāśaruciro nāgānanaḥ pātu naḥ || 28 ||
29. śrī siṃha gaṇapatiḥ
vīṇāṃ kalpalatāmariṃ ca varadaṃ dakṣe vidatte karai-
-rvāme tāmarasaṃ ca ratnakalaśaṃ sanmañjarīṃ cābhayam |
śuṇḍādaṇḍalasanmṛgendravadanaḥ śaṅkhendugauraḥ śubho
dīvyadratnanibhāṃśuko gaṇapatiḥ pāyādapāyat sa naḥ || 29 ||
30. śrī yoga gaṇapatiḥ
yogārūḍho yogapaṭṭābhirāmo
bālārkābhaścendranīlāṃśukāḍhyaḥ |
pāśekṣvakṣān yogadaṇḍaṃ dadhāno
pāyānnityaṃ yogavighneśvaro naḥ || 30 ||
31. śrī durgā gaṇapatiḥ
taptakāñcanasaṅkāśaścāṣṭahasto mahattanuḥ
dīptāṅkuśaṃ śaraṃ cākṣaṃ dantu dakṣe vahan karaiḥ |
vāme pāśaṃ kārmukaṃ ca latāṃ jambu dadhatkaraiḥ
raktāṃśukaḥ sadā bhūyāddurgāgaṇapatirmude || 31 ||
32. śrī saṅkaṣṭahara gaṇapatiḥ
bālārkāruṇakāntirvāme bālāṃ vahannaṅke
lasadindīvarahastāṃ gaurāṅgīṃ ratnaśobhāḍhyām |
dakṣe'ṅkuśavaradānaṃ vāme pāśaṃ ca pāyasaṃ pātraṃ
nīlāṃśukalasamānaḥ pīṭhe padmāruṇe tiṣṭhan || 32 ||
saṅkaṭaharaṇaḥ pāyāt saṅkaṭapūgādgajānano nityam |
śrī vallabha gaṇapati
bījāpūra gadekṣukārmukabhujācakrābja pāśotpala
vrīhyagrasvaviṣāṇa ratnakalaśa prodyatkarāmbhoruhaḥ |
dhyeyo vallabhayā ca padmakarayāśliṣṭo jvaladbhūṣayā
viśvotpattivināśasaṃsthitikaro vighno viśiṣṭārthadaḥ ||
śrī siddhidevī
pītavarṇāṃ dvinetrāṃ tāmekavaktrāmbujadvayāṃ
navaratnakirīṭāṃ ca pītāmbarasudhāriṇīm |
vāmahaste mahāpadmaṃ dakṣe lambakarānvitāṃ
jājīcampakamālāṃ ca tribhaṅgīṃ lalitāṅgikām ||
gaṇeśadakṣiṇe bhāge guruḥ siddhiṃ tu bhāvayet ||
śrī buddhidevī
dvihastāṃ ca dvinetrāṃ tāmekavaktrāṃ tribhaṅgikāṃ
muktāmaṇikirīṭāṃ ca dakṣe haste mahotpalam |
vāme pralambahastāṃ ca divyāmbarasudhāriṇīṃ
śyāmavarṇanibhāṃ bhāsvatsarvābharaṇabhūṣitām ||
pārijātotpalāmālyāṃ gaṇeśo vāmapārśvake
dhyātvā buddhiṃ surūpāṃ samarcayeddeśikottamaḥ ||
InfoLyter.in — Sacred Vedic Knowledge Portal · Free forever