Ashtavakra Gita Panchadasho'dhyayah

ॐ

അഷ്ടാവക്ര ഗീതാ പഞ്ചദശോഽധ്യായഃ

Gita Malayalam

അഷ്ടാവക്ര ഉവാച ॥

യഥാതഥോപദേശേന കൃതാര്ഥഃ സത്ത്വബുദ്ധിമാന് ।

ആജീവമപി ജിജ്ഞാസുഃ പരസ്തത്ര വിമുഹ്യതി ॥ 15-1॥

മോക്ഷോ വിഷയവൈരസ്യം ബന്ധോ വൈഷയികോ രസഃ ।

ഏതാവദേവ വിജ്ഞാനം യഥേച്ഛസി തഥാ കുരു ॥ 15-2॥

വാഗ്മിപ്രാജ്ഞാമഹോദ്യോഗം ജനം മൂകജഡാലസമ് ।

കരോതി തത്ത്വബോധോഽയമതസ്ത്യക്തോ ബുഭുക്ഷഭിഃ ॥ 15-3॥

ന ത്വം ദേഹോ ന തേ ദേഹോ ഭോക്താ കര്താ ന വാ ഭവാന് ।

ചിദ്രൂപോഽസി സദാ സാക്ഷീ നിരപേക്ഷഃ സുഖം ചര ॥ 15-4॥

രാഗദ്വേഷൌ മനോധര്മൌ ന മനസ്തേ കദാചന ।

നിര്വികല്പോഽസി ബോധാത്മാ നിര്വികാരഃ സുഖം ചര ॥ 15-5॥

സര്വഭൂതേഷു ചാത്മാനം സര്വഭൂതാനി ചാത്മനി ।

വിജ്ഞായ നിരഹങ്കാരോ നിര്മമസ്ത്വം സുഖീ ഭവ ॥ 15-6॥

വിശ്വം സ്ഫുരതി യത്രേദം തരങ്ഗാ ഇവ സാഗരേ ।

തത്ത്വമേവ ന സന്ദേഹശ്ചിന്മൂര്തേ വിജ്വരോ ഭവ ॥ 15-7॥

ശ്രദ്ധസ്വ താത ശ്രദ്ധസ്വ നാത്ര മോഹം കുരുഷ്വ ഭോഃ ।

ജ്ഞാനസ്വരൂപോ ഭഗവാനാത്മാ ത്വം പ്രകൃതേഃ പരഃ ॥ 15-8॥

ഗുണൈഃ സംവേഷ്ടിതോ ദേഹസ്തിഷ്ഠത്യായാതി യാതി ച ।

ആത്മാ ന ഗന്താ നാഗന്താ കിമേനമനുശോചസി ॥ 15-9॥

ദേഹസ്തിഷ്ഠതു കല്പാന്തം ഗച്ഛത്വദ്യൈവ വാ പുനഃ ।

ക്വ വൃദ്ധിഃ ക്വ ച വാ ഹാനിസ്തവ ചിന്മാത്രരൂപിണഃ ॥ 15-10॥

ത്വയ്യനന്തമഹാമ്ഭോധൌ വിശ്വവീചിഃ സ്വഭാവതഃ ।

ഉദേതു വാസ്തമായാതു ന തേ വൃദ്ധിര്ന വാ ക്ഷതിഃ ॥ 15-11॥

താത ചിന്മാത്രരൂപോഽസി ന തേ ഭിന്നമിദം ജഗത് ।

അതഃ കസ്യ കഥം കുത്ര ഹേയോപാദേയകല്പനാ ॥ 15-12॥

ഏകസ്മിന്നവ്യയേ ശാന്തേ ചിദാകാശേഽമലേ ത്വയി ।

കുതോ ജന്മ കുതോ കര്മ കുതോഽഹങ്കാര ഏവ ച ॥ 15-13॥

യത്ത്വം പശ്യസി തത്രൈകസ്ത്വമേവ പ്രതിഭാസസേ ।

കിം പൃഥക് ഭാസതേ സ്വര്ണാത് കടകാങ്ഗദനൂപുരമ് ॥ 15-14॥

അയം സോഽഹമയം നാഹം വിഭാഗമിതി സന്ത്യജ ।

സര്വമാത്മേതി നിശ്ചിത്യ നിഃസങ്കല്പഃ സുഖീ ഭവ ॥ 15-15॥

തവൈവാജ്ഞാനതോ വിശ്വം ത്വമേകഃ പരമാര്ഥതഃ ।

ത്വത്തോഽന്യോ നാസ്തി സംസാരീ നാസംസാരീ ച കശ്ചന ॥ 15-16॥

ഭ്രാന്തിമാത്രമിദം വിശ്വം ന കിഞ്ചിദിതി നിശ്ചയീ ।

നിര്വാസനഃ സ്ഫൂര്തിമാത്രോ ന കിഞ്ചിദിവ ശാമ്യതി ॥ 15-17॥

ഏക ഏവ ഭവാമ്ഭോധാവാസീദസ്തി ഭവിഷ്യതി ।

ന തേ ബന്ധോഽസ്തി മോക്ഷോ വാ കൃതകൃത്യഃ സുഖം ചര ॥ 15-18॥

മാ സങ്കല്പവികല്പാഭ്യാം ചിത്തം ക്ഷോഭയ ചിന്മയ ।

ഉപശാമ്യ സുഖം തിഷ്ഠ സ്വാത്മന്യാനന്ദവിഗ്രഹേ ॥ 15-19॥

ത്യജൈവ ധ്യാനം സര്വത്ര മാ കിഞ്ചിദ് ഹൃദി ധാരയ ।

ആത്മാ ത്വം മുക്ത ഏവാസി കിം വിമൃശ്യ കരിഷ്യസി ॥ 15-20॥

Roman (IAST) Transliteration

aṣṭāvakra uvāca ||

yathātathopadeśena kṛtārthaḥ sattvabuddhimān |

ājīvamapi jijñāsuḥ parastatra vimuhyati || 15-1||

mokṣo viṣayavairasyaṃ bandho vaiṣayiko rasaḥ |

etāvadeva vijñānaṃ yathecchasi tathā kuru || 15-2||

vāgmiprājñāmahodyogaṃ janaṃ mūkajaḍālasam |

karoti tattvabodho'yamatastyakto bubhukṣabhiḥ || 15-3||

na tvaṃ deho na te deho bhoktā kartā na vā bhavān |

cidrūpo'si sadā sākṣī nirapekṣaḥ sukhaṃ cara || 15-4||

rāgadveṣau manodharmau na manaste kadācana |

nirvikalpo'si bodhātmā nirvikāraḥ sukhaṃ cara || 15-5||

sarvabhūteṣu cātmānaṃ sarvabhūtāni cātmani |

vijñāya nirahaṅkāro nirmamastvaṃ sukhī bhava || 15-6||

viśvaṃ sphurati yatredaṃ taraṅgā iva sāgare |

tattvameva na sandehaścinmūrte vijvaro bhava || 15-7||

śraddhasva tāta śraddhasva nātra mohaṃ kuruṣva bhoḥ |

jñānasvarūpo bhagavānātmā tvaṃ prakṛteḥ paraḥ || 15-8||

guṇaiḥ saṃveṣṭito dehastiṣṭhatyāyāti yāti ca |

ātmā na gantā nāgantā kimenamanuśocasi || 15-9||

dehastiṣṭhatu kalpāntaṃ gacchatvadyaiva vā punaḥ |

kva vṛddhiḥ kva ca vā hānistava cinmātrarūpiṇaḥ || 15-10||

tvayyanantamahāmbhodhau viśvavīciḥ svabhāvataḥ |

udetu vāstamāyātu na te vṛddhirna vā kṣatiḥ || 15-11||

tāta cinmātrarūpo'si na te bhinnamidaṃ jagat |

ataḥ kasya kathaṃ kutra heyopādeyakalpanā || 15-12||

ekasminnavyaye śānte cidākāśe'male tvayi |

kuto janma kuto karma kuto'haṅkāra eva ca || 15-13||

yattvaṃ paśyasi tatraikastvameva pratibhāsase |

kiṃ pṛthak bhāsate svarṇāt kaṭakāṅgadanūpuram || 15-14||

ayaṃ so'hamayaṃ nāhaṃ vibhāgamiti santyaja |

sarvamātmeti niścitya niḥsaṅkalpaḥ sukhī bhava || 15-15||

tavaivājñānato viśvaṃ tvamekaḥ paramārthataḥ |

tvatto'nyo nāsti saṃsārī nāsaṃsārī ca kaścana || 15-16||

bhrāntimātramidaṃ viśvaṃ na kiñciditi niścayī |

nirvāsanaḥ sphūrtimātro na kiñcidiva śāmyati || 15-17||

eka eva bhavāmbhodhāvāsīdasti bhaviṣyati |

na te bandho'sti mokṣo vā kṛtakṛtyaḥ sukhaṃ cara || 15-18||

mā saṅkalpavikalpābhyāṃ cittaṃ kṣobhaya cinmaya |

upaśāmya sukhaṃ tiṣṭha svātmanyānandavigrahe || 15-19||

tyajaiva dhyānaṃ sarvatra mā kiñcid hṛdi dhāraya |

ātmā tvaṃ mukta evāsi kiṃ vimṛśya kariṣyasi || 15-20||