5.6 Sundarakanda - Shashtha Sargah

ॐ

5.6 ಸುನ್ದರಕಾಣ್ಡ - ಷಷ್ಠ ಸರ್ಗಃ

Valmiki Kannada

ಶ್ರೀಮದ್ವಾಲ್ಮೀಕೀಯ ರಾಮಾಯಣೇ ಸುನ್ದರಕಾಣ್ಡಮ್ ।

ಅಥ ಷಷ್ಠಸ್ಸರ್ಗಃ ।

ಸ ನಿಕಾಮಂ ವಿಮಾನೇಷು ನಿಷಣ್ಣಃ ಕಾಮರೂಪಧೃತ್ ।

ವಿಚಚಾರ ಪುನರ್ಲಙ್ಕಾಂ ಲಾಘವೇನ ಸಮನ್ವಿತಃ ॥ 1 ॥

ಆಸಸಾದಾಥ ಲಕ್ಷ್ಮೀವಾನ್ರಾಕ್ಷಸೇನ್ದ್ರನಿವೇಶನಮ್ ।

ಪ್ರಾಕಾರೇಣಾರ್ಕವರ್ಣೇನ ಭಾಸ್ವರೇಣಾಭಿಸಮ್ವೃತಮ್ ॥ 2 ॥

ರಕ್ಷಿತಂ ರಾಕ್ಷಸೈರ್ಘೋರೈಃ ಸಿಂಹೈರಿವ ಮಹದ್ವನಮ್ ।

ಸಮೀಕ್ಷಮಾಣೋ ಭವನಂ ಚಕಾಶೇ ಕಪಿಕುಞ್ಜರಃ ॥ 3 ॥

ರೂಪ್ಯಕೋಪಹಿತೈ ಶ್ಚಿತ್ರೈಸ್ತೋರಣೈರ್ಹೇಮಭೂಷಿತೈಃ ।

ವಿಚಿತ್ರಾಭಿಶ್ಚ ಕಕ್ಷ್ಯಾಭಿರ್ದ್ವಾರೈಶ್ಚ ರುಚಿರೈರ್ವೃತಮ್ ॥ 4 ॥

ಗಜಾಸ್ಥಿತೈರ್ಮಹಾಮಾತ್ರೈಃ ಶೂರೈಶ್ಚ ವಿಗತಶ್ರಮೈಃ ।

ಉಪಸ್ಥಿತಮಸಂಹಾರ್ಯೈಃ ರ್ಹಯೈಃ ಸ್ಯನ್ದನಯಾಯಿಭಿಃ ॥ 5 ॥

ಸಿಂಹವ್ಯಾಘ್ರತನುತ್ರಾಣೈರ್ದಾನ್ತಕಾಞ್ಚನರಾಜತೈಃ ।

ಘೋಷವದ್ಭಿರ್ವಿಚಿತ್ರೈಶ್ಚ ಸದಾ ವಿಚರಿತಂ ರಥೈಃ ॥ 6 ॥

ಬಹುರತ್ನಸಮಾಕೀರ್ಣಂ ಪರಾರ್ಥ್ಯಸನಭಾಜನಮ್ ।

ಮಹಾರಥಸಮಾವಾಸಂ ಮಹಾರಥಮಹಾಸ್ವನಮ್ ॥ 7 ॥

ದೃಶ್ಯೈಶ್ಚ ಪರಮೋದಾರೈಸ್ತೈಸ್ತೈಶ್ಚ ಮೃಗಪಕ್ಷಿಭಿಃ ।

ವಿವಿಧೈ ರ್ಬಹುಸಾಹಸ್ರೈಃ ಪರಿಪೂರ್ಣಂ ಸಮನ್ತತಃ ॥ 8 ॥

ವಿನೀತೈರನ್ತಪಾಲೈಶ್ಚ ರಕ್ಷೋಭಿಶ್ಚ ಸುರಕ್ಷಿತಮ್ ।

ಮುಖ್ಯಾಭಿಶ್ಚ ವರಸ್ತ್ರೀಭಿಃ ಪರಿಪೂರ್ಣಂ ಸಮನ್ತತಃ ॥ 9 ॥

ಮುದಿತಪ್ರಮದಾರತ್ನಂ ರಾಕ್ಷಸೇನ್ದ್ರನಿವೇಶನಮ್ ।

ವರಾಭರಣಸಂಹ್ರಾದೈಃ ಸಮುದ್ರಸ್ವನನ್ನಿಸ್ವನಮ್ ॥ 10 ॥

ತದ್ರಾಜಗುಣಸಮ್ಪನ್ನಂ ಮುಖ್ಯೈಶ್ಚಾಗುರುಚನ್ದನೈಃ ।

ಮಹಾಜನೈಃ ಸಮಾಕೀರ್ಣಾಂ ಸಿಂಹೈರಿವ ಮಹದ್ವನಮ್ ॥ 11 ॥

ಭೇರೀಮೃದಙ್ಗಾಭಿರುತಂ ಶಙ್ಖಘೋಷನಿನಾದಿತಮ್ ।

ನಿತ್ಯಾರ್ಚಿತಂ ಪರ್ವಹುತಂ ಪೂಜಿತಂ ರಾಕ್ಷಸೈಃ ಸದಾ ॥ 12 ॥

ಸಮುದ್ರಮಿವ ಗಮ್ಭೀರಂ ಸಮುದ್ರಮಿವ ನಿಸ್ಸ್ವನಮ್ ।

ಮಹಾತ್ಮನೋ ಮಹಾದ್ವೇಶ್ಮ ಮಹಾರತ್ನಪರಿಚ್ಛದಮ್ ॥ 13 ॥

ಮಹಾರತ್ನಸಮಾಕೀರ್ಣಂ ದದರ್ಶ ಸ ಮಹಾಕಪಿಃ ।

ವಿರಾಜಮಾನಂ ವಪುಷಾ ಗಜಾಶ್ವರಥಸಙ್ಕುಲಮ್ ॥ 14 ॥

ಲಙ್ಕಾಭರಣಮಿತ್ಯೇವ ಸೋಽಮನ್ಯತ ಮಹಾಕಪಿಃ ।

ಚಚಾರ ಹನುಮಾಂಸ್ತತ್ರ ರಾವಣಸ್ಯ ಸಮೀಪತಃ ॥ 15 ॥

ಗೃಹಾದ್ಗೃಹಂ ರಾಕ್ಷಸಾನಾಮುದ್ಯಾನಾನಿ ಚ ವಾನರಃ ।

ವೀಕ್ಷಮಾಣೋಽಹ್ಯಸನ್ತ್ರಸ್ತಃ ಪ್ರಾಸಾದಾಂಶ್ಚ ಚಚಾರ ಸಃ ॥ 16 ॥

ಅವಪ್ಲುತ್ಯ ಮಹಾವೇಗಃ ಪ್ರಹಸ್ತಸ್ಯ ನಿವೇಶನಮ್ ।

ತತೋಽನ್ಯತ್ಪುಪ್ಲುವೇ ವೇಶ್ಮ ಮಹಾಪಾರ್ಶ್ವಸ್ಯ ವೀರ್ಯವಾನ್ ॥ 17 ॥

ಅಥ ಮೇಘಪ್ರತೀಕಾಶಂ ಕುಮ್ಭಕರ್ಣನಿವೇಶನಮ್ ।

ವಿಭೀಷಣಸ್ಯ ಚ ತದಾ ಪುಪ್ಲುವೇ ಸ ಮಹಾಕಪಿಃ ॥ 18 ॥

ಮಹೋದರಸ್ಯ ಚ ಗೃಹಂ ವಿರೂಪಾಕ್ಷಸ್ಯ ಚೈವ ಹಿ ।

ವಿದ್ಯುಜ್ಜಿಹ್ವಸ್ಯ ಭವನಂ ವಿದ್ಯುನ್ಮಾಲೇಸ್ತಥೈವ ಚ ॥ 19 ॥

ವಜ್ರದಂಷ್ಟ್ರಸ್ಯ ಚ ತಥಾ ಪುಪ್ಲುವೇ ಸ ಮಹಾಕಪಿಃ ।

ಶುಕಸ್ಯ ಚ ಮಹಾತೇಜಾಃ ಸಾರಣಸ್ಯ ಚ ಧೀಮತಃ ॥ 20 ॥

ತಥಾ ಚೇನ್ದ್ರಜಿತೋ ವೇಶ್ಮ ಜಗಾಮ ಹರಿಯೂಥಪಃ ।

ಜಮ್ಬುಮಾಲೇಃ ಸುಮಾಲೇಶ್ಚ ಜಗಾಮ ಹರಿಸತ್ತಮಃ ॥ 21 ॥

ರಶ್ಮಿಕೇತೋಶ್ಚ ಭವನಂ ಸೂರ್ಯಕೇತೋಸ್ತಥೈವ ಚ ।

ವಜ್ರಕಾಯಸ್ಯ ಚ ತಥಾ ಪುಪ್ಲುವೇ ಸ ಮಹಾಕಪಿಃ ॥ 22 ॥

ಧೂಮ್ರಾಕ್ಷಸ್ಯ ಚ ಸಮ್ಪಾತೇರ್ಭವನಂ ಮಾರುತಾತ್ಮಜಃ ।

ವಿದ್ಯುದ್ರೂಪಸ್ಯ ಭೀಮಸ್ಯ ಘನಸ್ಯ ವಿಘನಸ್ಯ ಚ ॥ 23 ॥

ಶುಕನಾಸಸ್ಯ ವಕ್ರಸ್ಯ ಶಠಸ್ಯ ವಿಕಟಸ್ಯ ಚ ।

ಬ್ರಹ್ಮಕರ್ಣಸ್ಯ ದಂಷ್ಟ್ರಸ್ಯ ರೋಮಶಸ್ಯ ಚ ರಕ್ಷಸಃ ॥ 24 ॥

ಯುದ್ಧೋನ್ಮತ್ತಸ್ಯ ಮತ್ತಸ್ಯ ಧ್ವಜಗ್ರೀವಸ್ಯ ನಾದಿನಃ ।

ವಿದ್ಯುಜ್ಜಿಹ್ವೇನ್ದ್ರಜಿಹ್ವಾನಾಂ ತಥಾ ಹಸ್ತಿಮುಖಸ್ಯ ಚ ॥ 25 ॥

ಕರಾಲಸ್ಯ ಪಿಶಾಚಸ್ಯ ಶೋಣಿತ ಅಕ್ಷಸ್ಯ ಚೈವ ಹಿ ।

ಕ್ರಮಮಾಣಃ ಕ್ರಮೇಣ ಏವ ಹನೂಮಾನ್ ಮಾರುತ ಆತ್ಮಜಃ ॥ 26 ॥

ತೇಷು ತೇಷು ಮಹಾರ್ಹೇಷು ಭವನೇಷು ಮಹಾಯಶಾಃ ।

ತೇಷಾಮೃದ್ಧಿಮತಾಮೃದ್ಧಿಂ ದದರ್ಶ ಸ ಮಹಾಕಪಿಃ ॥ 27 ॥

ಸರ್ವೇಷಾಂ ಸಮತಿಕ್ರಮ್ಯ ಭವನಾನಿ ಸಮನ್ತತಃ ।

ಆಸಸಾದಾಥ ಲಕ್ಷ್ಮೀವಾನ್ ರಾಕ್ಷಸೇದ್ರನಿವೇಶನಮ್ ॥ 28 ॥

ರಾವಣಸ್ಯೋಪಶಾಯಿನ್ಯೋ ದದರ್ಶ ಹರಿಸತ್ತಮಃ ।

ವಿಚರನ್ಹರಿಶಾರ್ದೂಲೋ ರಾಕ್ಷಸೀರ್ವಿಕೃತೇಕ್ಷಣಾಃ ॥ 29 ॥

ಶೂಲಮುದ್ಗರಹಸ್ತಾಶ್ಚ ಶಕ್ತಿತೋಮರಧಾರಿಣೀಃ ।

ದದರ್ಶ ವಿವಿಧಾನ್ ಗುಲ್ಮಾನ್ ತಸ್ಯ ರಕ್ಷಃಪತೇರ್ಗೃಹೇ ॥ 30 ॥

ರಾಕ್ಷಸಾಂಶ್ಚ ಮಹಾಕಾಯಾನ್ನಾನಾಪ್ರಹರಣೋದ್ಯತಾನ್ ।

ರಕ್ತಾನ್ ಶ್ವೇತಾನ್ ಸಿತಾಂಶ್ಚೈವ ಹರೀಂಶ್ಚಾಪಿ ಮಹಾಜವಾನ್ ॥ 31 ॥

ಕುಲೀನಾನ್ ರೂಪಸಮ್ಪನ್ನಾನ್ ಗಜಾನ್ಪರಗಜಾರುಜಾನ್ ।

ನಿಷ್ಠಿತಾನ್ ಗಜಶಿಕ್ಷಯಾಮೈರಾವತಸಮಾನ್ಯುಧಿ ॥ 32 ॥

ನಿಹನ್ತ್ರೂನ್ ಪರಸೈನ್ಯಾನಾಂ ಗೃಹೇ ತಸ್ಮಿನ್ ದದರ್ಶ ಸಃ ।

ಕ್ಷರತಶ್ಚ ಯಥಾ ಮೇಘಾನ್ ಸ್ರವತಶ್ಚ ಯಥಾ ಗಿರೀನ್ ॥ 33 ॥

ಮೇಘಸನ್ತತಿನಿರ್ಘೋಷಾನ್ ದುರ್ಧರ್ಷಾನ್ ಸಮರೇ ಪರೈಃ ।

ಸಹಸ್ರಂ ವಾಹಿನೀಸ್ತತ್ರ ಜಾಮ್ಬೂನದಪರಿಷ್ಕೃತಾಃ ॥ 34 ॥

ಹೇಮಜಾಲಪರಿಚ್ಛನ್ನಾಸ್ತರುಣಾದಿತ್ಯಸನ್ನಿಭಾಃ ।

ದದರ್ಶ ರಾಕ್ಷಸೇನ್ದ್ರಸ್ಯ ರಾವಣಸ್ಯ ನಿವೇಶನೇ ॥ 35 ॥

ಶಿಬಿಕಾ ವಿವಿಧಾಕಾರಾಃ ಸ ಕಪಿರ್ಮಾರುತಾತ್ಮಜಃ ।

ಲತಾಗೃಹಾಣಿ ಚಿತ್ರಾಣಿ ಚಿತ್ರಶಾಲಾಗೃಹಾಣಿ ಚ ॥ 36 ॥

ಕ್ರೀಡಾಗೃಹಾಣಿ ಚಾನ್ಯಾನಿ ದಾರುಪರ್ವತಕಾನಪಿ ।

ಕಾಮಸ್ಯ ಗೃಹಕಂ ರಮ್ಯಂ ದಿವಾಗೃಹಕಮೇವ ಚ ॥ 37 ॥

ದದರ್ಶ ರಾಕ್ಷಸೇನ್ದ್ರಸ್ಯ ರಾವಣಸ್ಯ ನಿವೇಶನೇ ।

ಸ ಮನ್ದರಗಿರಿಪ್ರಖ್ಯಂ ಮಯೂರಸ್ಥಾನಸಙ್ಕುಲಮ್ ॥ 38 ॥

ಧ್ವಜಯಷ್ಟಿಭಿರಾಕೀರ್ಣಂ ದದರ್ಶ ಭವನೋತ್ತಮಮ್ ।

ಅನೇಕರತ್ನಸಙ್ಕೀರ್ಣಂ ನಿಧಿಜಾಲಂ ಸಮನ್ತತಃ ॥ 39 ॥

ಧೀರನಿಷ್ಠಿತಕರ್ಮಾನ್ತಂ ಗೃಹಂ ಭೂತಪತೇರಿವ ।

ಅರ್ಚಿರ್ಭಿಶ್ಚಾಪಿ ರತ್ನಾನಾಂ ತೇಜಸಾ ರಾವಣಸ್ಯ ಚ ॥ 40 ॥

ವಿರರಾಜಾಥ ತದ್ವೇಶ್ಮ ರಶ್ಮಿಮಾನಿವ ರಶ್ಮಿಭಿಃ ।

ಜಾಮ್ಬೂನದಮಯಾನ್ಯೇನ ಶಯನಾನ್ಯಾಸನಾನಿ ಚ ॥ 41 ॥

ಭಾಜನಾನಿ ಚ ಮುಖ್ಯಾನಿ ದದರ್ಶ ಹರಿಯೂಥಪಃ ।

ಮಧ್ವಾಸವಕೃತಕ್ಲೇದಂ ಮಣಿಭಾಜನಸಙ್ಕುಲಮ್ ॥ 42 ॥

ಮನೋರಮಮಸಮ್ಬಾಧಂ ಕುಬೇರಭವನಂ ಯಥಾ ।

ನೂಪುರಾಣಾಂ ಚ ಘೋಷೇಣ ಕಾಞ್ಚೀನಾಂ ನಿನದೇನ ಚ ॥ 43 ॥

ಮೃದಙ್ತಲಘೋಷೈಶ್ಚ ಘೋಷವದ್ಭಿರ್ವಿನಾದಿತಮ್ ।

ಪ್ರಾಸಾದಸಙ್ಘಾತಯುತಂ ಸ್ತ್ರೀರತ್ನಶತಸಙ್ಕುಲಮ್ ॥ 44 ॥

ಇತ್ಯಾರ್ಷೇ ಶ್ರೀಮದ್ರಾಮಾಯಣೇ ವಾಲ್ಮೀಕೀಯ ಆದಿಕಾವ್ಯೇ ಸುನ್ದರಕಾಣ್ಡೇ ಷಷ್ಠಸ್ಸರ್ಗಃ ॥

Roman (IAST) Transliteration

śrīmadvālmīkīya rāmāyaṇe sundarakāṇḍam |

atha ṣaṣṭhassargaḥ |

sa nikāmaṃ vimāneṣu niṣaṇṇaḥ kāmarūpadhṛt |

vicacāra punarlaṅkāṃ lāghavena samanvitaḥ || 1 ||

āsasādātha lakṣmīvānrākṣasendraniveśanam |

prākāreṇārkavarṇena bhāsvareṇābhisamvṛtam || 2 ||

rakṣitaṃ rākṣasairghoraiḥ siṃhairiva mahadvanam |

samīkṣamāṇo bhavanaṃ cakāśe kapikuñjaraḥ || 3 ||

rūpyakopahitai ścitraistoraṇairhemabhūṣitaiḥ |

vicitrābhiśca kakṣyābhirdvāraiśca rucirairvṛtam || 4 ||

gajāsthitairmahāmātraiḥ śūraiśca vigataśramaiḥ |

upasthitamasaṃhāryaiḥ rhayaiḥ syandanayāyibhiḥ || 5 ||

siṃhavyāghratanutrāṇairdāntakāñcanarājataiḥ |

ghoṣavadbhirvicitraiśca sadā vicaritaṃ rathaiḥ || 6 ||

bahuratnasamākīrṇaṃ parārthyasanabhājanam |

mahārathasamāvāsaṃ mahārathamahāsvanam || 7 ||

dṛśyaiśca paramodāraistaistaiśca mṛgapakṣibhiḥ |

vividhai rbahusāhasraiḥ paripūrṇaṃ samantataḥ || 8 ||

vinītairantapālaiśca rakṣobhiśca surakṣitam |

mukhyābhiśca varastrībhiḥ paripūrṇaṃ samantataḥ || 9 ||

muditapramadāratnaṃ rākṣasendraniveśanam |

varābharaṇasaṃhrādaiḥ samudrasvanannisvanam || 10 ||

tadrājaguṇasampannaṃ mukhyaiścāgurucandanaiḥ |

mahājanaiḥ samākīrṇāṃ siṃhairiva mahadvanam || 11 ||

bherīmṛdaṅgābhirutaṃ śaṅkhaghoṣanināditam |

nityārcitaṃ parvahutaṃ pūjitaṃ rākṣasaiḥ sadā || 12 ||

samudramiva gambhīraṃ samudramiva nissvanam |

mahātmano mahādveśma mahāratnaparicchadam || 13 ||

mahāratnasamākīrṇaṃ dadarśa sa mahākapiḥ |

virājamānaṃ vapuṣā gajāśvarathasaṅkulam || 14 ||

laṅkābharaṇamityeva so'manyata mahākapiḥ |

cacāra hanumāṃstatra rāvaṇasya samīpataḥ || 15 ||

gṛhādgṛhaṃ rākṣasānāmudyānāni ca vānaraḥ |

vīkṣamāṇo'hyasantrastaḥ prāsādāṃśca cacāra saḥ || 16 ||

avaplutya mahāvegaḥ prahastasya niveśanam |

tato'nyatpupluve veśma mahāpārśvasya vīryavān || 17 ||

atha meghapratīkāśaṃ kumbhakarṇaniveśanam |

vibhīṣaṇasya ca tadā pupluve sa mahākapiḥ || 18 ||

mahodarasya ca gṛhaṃ virūpākṣasya caiva hi |

vidyujjihvasya bhavanaṃ vidyunmālestathaiva ca || 19 ||

vajradaṃṣṭrasya ca tathā pupluve sa mahākapiḥ |

śukasya ca mahātejāḥ sāraṇasya ca dhīmataḥ || 20 ||

tathā cendrajito veśma jagāma hariyūthapaḥ |

jambumāleḥ sumāleśca jagāma harisattamaḥ || 21 ||

raśmiketośca bhavanaṃ sūryaketostathaiva ca |

vajrakāyasya ca tathā pupluve sa mahākapiḥ || 22 ||

dhūmrākṣasya ca sampāterbhavanaṃ mārutātmajaḥ |

vidyudrūpasya bhīmasya ghanasya vighanasya ca || 23 ||

śukanāsasya vakrasya śaṭhasya vikaṭasya ca |

brahmakarṇasya daṃṣṭrasya romaśasya ca rakṣasaḥ || 24 ||

yuddhonmattasya mattasya dhvajagrīvasya nādinaḥ |

vidyujjihvendrajihvānāṃ tathā hastimukhasya ca || 25 ||

karālasya piśācasya śoṇita akṣasya caiva hi |

kramamāṇaḥ krameṇa eva hanūmān māruta ātmajaḥ || 26 ||

teṣu teṣu mahārheṣu bhavaneṣu mahāyaśāḥ |

teṣāmṛddhimatāmṛddhiṃ dadarśa sa mahākapiḥ || 27 ||

sarveṣāṃ samatikramya bhavanāni samantataḥ |

āsasādātha lakṣmīvān rākṣasedraniveśanam || 28 ||

rāvaṇasyopaśāyinyo dadarśa harisattamaḥ |

vicaranhariśārdūlo rākṣasīrvikṛtekṣaṇāḥ || 29 ||

śūlamudgarahastāśca śaktitomaradhāriṇīḥ |

dadarśa vividhān gulmān tasya rakṣaḥpatergṛhe || 30 ||

rākṣasāṃśca mahākāyānnānāpraharaṇodyatān |

raktān śvetān sitāṃścaiva harīṃścāpi mahājavān || 31 ||

kulīnān rūpasampannān gajānparagajārujān |

niṣṭhitān gajaśikṣayāmairāvatasamānyudhi || 32 ||

nihantrūn parasainyānāṃ gṛhe tasmin dadarśa saḥ |

kṣarataśca yathā meghān sravataśca yathā girīn || 33 ||

meghasantatinirghoṣān durdharṣān samare paraiḥ |

sahasraṃ vāhinīstatra jāmbūnadapariṣkṛtāḥ || 34 ||

hemajālaparicchannāstaruṇādityasannibhāḥ |

dadarśa rākṣasendrasya rāvaṇasya niveśane || 35 ||

śibikā vividhākārāḥ sa kapirmārutātmajaḥ |

latāgṛhāṇi citrāṇi citraśālāgṛhāṇi ca || 36 ||

krīḍāgṛhāṇi cānyāni dāruparvatakānapi |

kāmasya gṛhakaṃ ramyaṃ divāgṛhakameva ca || 37 ||

dadarśa rākṣasendrasya rāvaṇasya niveśane |

sa mandaragiriprakhyaṃ mayūrasthānasaṅkulam || 38 ||

dhvajayaṣṭibhirākīrṇaṃ dadarśa bhavanottamam |

anekaratnasaṅkīrṇaṃ nidhijālaṃ samantataḥ || 39 ||

dhīraniṣṭhitakarmāntaṃ gṛhaṃ bhūtapateriva |

arcirbhiścāpi ratnānāṃ tejasā rāvaṇasya ca || 40 ||

virarājātha tadveśma raśmimāniva raśmibhiḥ |

jāmbūnadamayānyena śayanānyāsanāni ca || 41 ||

bhājanāni ca mukhyāni dadarśa hariyūthapaḥ |

madhvāsavakṛtakledaṃ maṇibhājanasaṅkulam || 42 ||

manoramamasambādhaṃ kuberabhavanaṃ yathā |

nūpurāṇāṃ ca ghoṣeṇa kāñcīnāṃ ninadena ca || 43 ||

mṛdaṅtalaghoṣaiśca ghoṣavadbhirvināditam |

prāsādasaṅghātayutaṃ strīratnaśatasaṅkulam || 44 ||

ityārṣe śrīmadrāmāyaṇe vālmīkīya ādikāvye sundarakāṇḍe ṣaṣṭhassargaḥ ||