5.57 Sundarakanda - Saptapanchasha Sargah

ॐ

5.57 ಸುನ್ದರಕಾಣ್ಡ - ಸಪ್ತಪಞ್ಚಾಶ ಸರ್ಗಃ

Valmiki Kannada

ಶ್ರೀಮದ್ವಾಲ್ಮೀಕೀಯ ರಾಮಾಯಣೇ ಸುನ್ದರಕಾಣ್ಡಮ್ ।

ಅಥ ಸಪ್ತಪಞ್ಚಾಶಸ್ಸರ್ಗಃ ।

ಸ ಚನ್ದ್ರಕುಮುದಂ ರಮ್ಯಂ ಸಾರ್ಕಕಾರಣ್ಡವಂ ಶುಭಮ್ ।

ತಿಷ್ಯಶ್ರವಣಕಾದಮ್ಬಮಭ್ರಶೈವಾಲಶಾದ್ವಲಮ್ ॥ 1 ॥

ಪುನರ್ವಸುಮಹಾಮೀನಂ ಲೋಹಿತಾಙ್ಗಮಹಾಗ್ರಹಮ್ ।

ಐರಾವತಮಹಾದ್ವೀಪಂ ಸ್ವಾತಿಹಂಸವಿಲೋಲಿತಮ್ ॥ 2 ॥

ವಾತಸಙ್ಘಾತಜಾತೋರ್ಮಿ ಚನ್ದ್ರಾಂಶುಶಿಶಿರಾಮ್ಬುಮತ್ ।

ಭುಜಙ್ಗಯಕ್ಷಗನ್ಧರ್ವಪ್ರಬುದ್ಧಕಮಲೋತ್ಪಲಮ್ ॥ 3 ॥

ಹನುಮಾನ್ಮಾರುತಗತಿರ್ಮಹಾನೌರಿವ ಸಾಗರಮ್ ।

ಅಪಾರಮಪರಿಶ್ರಾನ್ತಃ ಪುಪ್ಲುವೇ ಗಗನಾರ್ಣವಮ್ ॥ 4 ॥

ಗ್ರಸಮಾನ ಇವಾಕಾಶಂ ತಾರಾಧಿಪಮಿವೋಲ್ಲಿಖನ್ ।

ಹರನ್ನಿವ ಸನಕ್ಷತ್ರಂ ಗಗನಂ ಸಾರ್ಕಮಣ್ಡಲಮ್ ॥ 5 ॥

ಮಾರುತಸ್ಯಾತ್ಮಜಃ ಶ್ರೀಮಾನ್ಕಪಿರ್ವ್ಯೋಮಚರೋ ಮಹಾನ್ ।

ಹನುಮಾನ್ಮೇಘಜಾಲಾನಿ ವಿಕರ್ಷನ್ನಿವ ಗಚ್ಛತಿ ॥ 6 ॥

ಪಾಣ್ಡುರಾರುಣವರ್ಣಾನಿ ನೀಲಮಾಞ್ಜಿಷ್ಠಕಾನಿ ಚ ।

ಹರಿತಾರುಣವರ್ಣಾನಿ ಮಹಾಭ್ರಾಣಿ ಚಕಾಶಿರೇ ॥ 7 ॥

ಪ್ರವಿಶನ್ನಭ್ರಜಾಲಾನಿ ನಿಷ್ಪತಂಶ್ಚ ಪುನಃ ಪುನಃ ।

ಪ್ರಚ್ಛನ್ನಶ್ಚ ಪ್ರಕಾಶಶ್ಚ ಚನ್ದ್ರಮಾ ಇವ ಲಕ್ಷ್ಯತೇ ॥ 8 ॥

ವಿವಿಧಾಭ್ರಘನಾಪನ್ನಗೋಚರೋ ಧವಲಾಮ್ಬರಃ ।

ದೃಶ್ಯಾದೃಶ್ಯತನುರ್ವೀರಸ್ತದಾ ಚನ್ದ್ರಾಯತೇಽಮ್ಬರೇ ॥ 9 ॥

ತಾರ್ಕ್ಷ್ಯಾಯಮಾಣೋ ಗಗನೇ ಬಭಾಸೇ ವಾಯುನನ್ದನಃ ।

ದಾರಯನ್ಮೇಘಬೃನ್ದಾನಿ ನಿಷ್ಪತಂಶ್ಚ ಪುನಃ ಪುನಃ ॥ 10 ॥

ನದನ್ನಾದೇನ ಮಹತಾ ಮೇಘಸ್ವನಮಹಾಸ್ವನಃ ।

ಪ್ರವರಾನ್ರಾಕ್ಷಸಾನ್ ಹತ್ವಾ ನಾಮ ವಿಶ್ರಾವ್ಯ ಚಾತ್ಮನಃ ॥ 11 ॥

ಆಕುಲಾಂ ನಗರೀಂ ಕೃತ್ವಾ ವ್ಯಥಯಿತ್ವಾ ಚ ರಾವಣಮ್ ।

ಅರ್ದಯಿತ್ವಾ ಬಲಂ ಘೋರಂ ವೈದೇಹೀಮಭಿವಾದ್ಯ ಚ ॥ 12 ॥

ಆಜಗಾಮ ಮಹಾತೇಜಾಃ ಪುನರ್ಮಧ್ಯೇನ ಸಾಗರಮ್ ।

ಪರ್ವತೇನ್ದ್ರಂ ಸುನಾಭಂ ಚ ಸಮುಪಸ್ಪೃಶ್ಯ ವೀರ್ಯವಾನ್ ॥ 13 ॥

ಜ್ಯಾಮುಕ್ತ ಇವ ನಾರಾಚೋ ಮಹಾವೇಗೋಽಭ್ಯುಪಾಗತಃ ।

ಸ ಕಿಞ್ಚಿದನುಸಮ್ಪ್ರಾಪ್ತಃ ಸಮಾಲೋಕ್ಯ ಮಹಾಗಿರಿಮ್ ॥ 14 ॥

ಮಹೇನ್ದ್ರಂ ಮೇಘಸಙ್ಕಾಶಂ ನನಾದ ಹರಿಪುಙ್ಗವಃ ।

ಸ ಪೂರಯಾಮಾಸ ಕಪಿರ್ದಿಶೋ ದಶ ಸಮನ್ತತಃ ॥ 15 ॥

ನದನ್ನಾದೇನ ಮಹತಾ ಮೇಘಸ್ವನಮಹಾಸ್ವನಃ ।

ಸ ತಂ ದೇಶಮನುಪ್ರಾಪ್ತಃ ಸುಹೃದ್ಧರ್ಶನಲಾಲಸಃ ॥ 16 ॥

ನನಾದ ಹರಿಶಾರ್ದೂಲೋ ಲಾಙ್ಗೂಲಂ ಚಾಪ್ಯಕಮ್ಪಯತ್ ।

ತಸ್ಯ ನಾನದ್ಯಮಾನಸ್ಯ ಸುಪರ್ಣಚರಿತೇ ಪಥಿ ॥ 17 ॥

ಫಲತೀವಾಸ್ಯ ಘೋಷೇಣ ಗಗನಂ ಸಾರ್ಕಮಣ್ಡಲಮ್ ।

ಯೇ ತು ತತ್ರೋತ್ತರೇ ತೀರೇ ಸಮುದ್ರಸ್ಯ ಮಹಾಬಲಾಃ ॥ 18 ॥

ಪೂರ್ವಂ ಸಂವಿಷ್ಠಿತಾಶ್ಶೂರಾ ವಾಯುಪುತ್ರದಿದೃಕ್ಷವಃ ।

ಮಹತೋ ವಾತನುನ್ನಸ್ಯ ತೋಯದಸ್ಯೇವ ಗರ್ಜಿತಮ್ ॥ 19 ॥

ಶುಶ್ರುವುಸ್ತೇ ತದಾ ಘೋಷಮೂರುವೇಗಂ ಹನೂಮತಃ ।

ತೇ ದೀನಮನಸಸ್ಸರ್ವೇ ಶುಶ್ರುವುಃ ಕಾನನೌಕಸಃ ॥ 20 ॥

ವಾನರೇನ್ದ್ರಸ್ಯ ನಿರ್ಘೋಷಂ ಪರ್ಜನ್ಯನಿನದೋಪಮಮ್ ।

ನಿಶಮ್ಯ ನದತೋ ನಾದಂ ವಾನರಾಸ್ತೇ ಸಮನ್ತತಃ ॥ 21 ॥

ಬಭೂವುರುತ್ಸುಕಾಸ್ಸರ್ವೇ ಸುಹೃದ್ಧರ್ಶನಕಾಙ್ಕ್ಷಿಣಃ ।

ಜಾಮ್ಬವಾನ್ ಸ ಹರಿಶ್ರೇಷ್ಠಃ ಪ್ರೀತಿಸಂಹೃಷ್ಟಮಾನಸಃ ॥ 22 ॥

ಉಪಾಮನ್ತ್ರ್ಯ ಹರೀನ್ ಸರ್ವಾನಿದಂ ವಚನಮಬ್ರವೀತ್ ।

ಸರ್ವಥಾ ಕೃತಕಾರ್ಯೋಽಸೌ ಹನುಮಾನ್ನಾತ್ರ ಸಂಶಯಃ ॥ 23 ॥

ನ ಹ್ಯಸ್ಯಾಕೃತಕಾರ್ಯಸ್ಯ ನಾದ ಏವಂವಿಧೋ ಭವೇತ್ ।

ತಸ್ಯ ಬಾಹೂರುವೇಗಂ ಚ ನಿನಾದಂ ಚ ಮಹಾತ್ಮನಃ ॥ 24 ॥

ನಿಶಮ್ಯ ಹರಯೋ ಹೃಷ್ಟಾಃ ಸಮುತ್ಪೇತುಸ್ತತಸ್ತತಃ ।

ತೇ ನಗಾಗ್ರಾನ್ನಗಾಗ್ರಾಣಿ ಶಿಖರಾಚ್ಛಿಖರಾಣಿ ಚ ॥ 25 ॥

ಪ್ರಹೃಷ್ಟಾಃ ಸಮಪದ್ಯನ್ತ ಹನೂಮನ್ತಂ ದಿದೃಕ್ಷವಃ ।

ತೇ ಪ್ರೀತಾಃ ಪಾದಪಾಗ್ರೇಷು ಗೃಹ್ಯ ಶಾಖಾಃ ಸುವಿಷ್ಠಿತಾಃ ॥ 26 ॥

ವಾಸಾಂಸೀವ ಪ್ರಶಾಖಾಶ್ಚ ಸಮಾವಿಧ್ಯನ್ತ ವಾನರಾಃ ।

ಗಿರಿಗಹ್ವರಸಂಲೀನೋ ಯಥಾ ಗರ್ಜತಿ ಮಾರುತಃ ॥ 27 ॥

ಏವಂ ಜಗರ್ಜ ಬಲವಾನ್ ಹನುಮಾನ್ಮಾರುತಾತ್ಮಜಃ ।

ತಮಭ್ರಘನಸಙ್ಕಾಶಮಾಪತನ್ತಂ ಮಹಾಕಪಿಮ್ ॥ 28 ॥

ದೃಷ್ಟ್ವಾ ತೇ ವಾನರಾಸ್ಸರ್ವೇ ತಸ್ಥುಃ ಪ್ರಾಞ್ಜಲಯಸ್ತದಾ ।

ತತಸ್ತು ವೇಗವಾಂಸ್ತಸ್ಯ ಗಿರೇರ್ಗಿರಿನಿಭಃ ಕಪಿಃ ॥ 29 ॥

ನಿಪಪಾತ ಮಹೇನ್ದ್ರಸ್ಯ ಶಿಖರೇ ಪಾದಪಾಕುಲೇ ।

ಹರ್ಷೇಣಾಪೂರ್ಯಮಾಣೋಽಸೌ ರಮ್ಯೇ ಪರ್ವತನಿರ್ಝರೇ ॥ 30 ॥

ಛಿನ್ನಪಕ್ಷ ಇವಾಽಕಾಶಾತ್ಪಪಾತ ಧರಣೀಧರಃ ।

ತತಸ್ತೇ ಪ್ರೀತಮನಸಸ್ಸರ್ವೇ ವಾನರಪುಙ್ಗವಾಃ ॥ 31 ॥

ಹನುಮನ್ತಂ ಮಹಾತ್ಮಾನಂ ಪರಿವಾರ್ಯೋಪತಸ್ಥಿರೇ ।

ಪರಿವಾರ್ಯ ಚ ತೇ ಸರ್ವೇ ಪರಾಂ ಪ್ರೀತಿಮುಪಾಗತಾಃ ॥ 32 ॥

ಪ್ರಹೃಷ್ಟವದನಾ ಸ್ಸರ್ವೇ ತಮರೋಗಮುಪಾಗತಮ್ ।

ಉಪಾಯನಾನಿ ಚಾದಾಯ ಮೂಲಾನಿ ಚ ಫಲಾನಿ ಚ ॥ 33 ॥

ಪ್ರತ್ಯರ್ಚಯನ್ ಹರಿಶ್ರೇಷ್ಠಂ ಹರಯೋ ಮಾರುತಾತ್ಮಜಮ್ ।

ಹನುಮಾಂಸ್ತು ಗುರೂನ್ ವೃದ್ಧಾಞ್ಜಾಮ್ಬವತ್ಪ್ರಮುಖಾಂಸ್ತದಾ ॥ 34 ॥

ಕುಮಾರಮಙ್ಗದಂ ಚೈವ ಸೋಽವನ್ದತ ಮಹಾಕಪಿಃ ।

ಸ ತಾಭ್ಯಾಂ ಪೂಜಿತಃ ಪೂಜ್ಯಃ ಕಪಿಭಿಶ್ಚ ಪ್ರಸಾದಿತಃ ॥ 35 ॥

ದೃಷ್ಟಾ ಸೀತೇತಿ ವಿಕ್ರಾನ್ತ ಸ್ಸಙ್ಕ್ಷೇಪೇಣ ನ್ಯವೇದಯತ್ ।

ನಿಷಸಾದ ಚ ಹಸ್ತೇನ ಗೃಹೀತ್ವಾ ವಾಲಿನಸ್ಸುತಮ್ ॥ 36 ॥

ರಮಣೀಯೇ ವನೋದ್ದೇಶೇ ಮಹೇನ್ದ್ರಸ್ಯ ಗಿರೇಸ್ತದಾ ।

ಹನುಮಾನಬ್ರವೀದ್ಧೃಷ್ಟಸ್ತದಾ ತಾನ್ವಾನರರ್ಷಭಾನ್ ॥ 37 ॥

ಅಶೋಕವನಿಕಾಸಂಸ್ಥಾ ದೃಷ್ಟಾ ಸಾ ಜನಕಾತ್ಮಜಾ ।

ರಕ್ಷಮಾಣಾ ಸುಘೋರಾಭೀ ರಾಕ್ಷಸೀಭಿರನಿನ್ದಿತಾ ॥ 38 ॥

ಏಕವೇಣೀಧರಾ ಬಾಲಾ ರಾಮದರ್ಶನಲಾಲಸಾ ।

ಉಪವಾಸಪರಿಶ್ರಾನ್ತಾ ಜಟಿಲಾ ಮಲಿನಾ ಕೃಶಾ ॥ 39 ॥

ತತೋ ದೃಷ್ಟೇತಿ ವಚನಂ ಮಹಾರ್ಥಮಮೃತೋಪಮಮ್ ।

ನಿಶಮ್ಯ ಮಾರುತೇಸ್ಸರ್ವೇ ಮುದಿತಾ ವಾನರಾಭವನ್ ॥ 40 ॥

ಕ್ಷ್ವೇಲನ್ತ್ಯನ್ಯೇ ನದನ್ತ್ಯನ್ಯೇ ಗರ್ಜನ್ತ್ಯನ್ಯೇ ಮಹಾಬಲಾಃ ।

ಚಕ್ರುಃ ಕಿಲಕಿಲಾಮನ್ಯೇ ಪ್ರತಿಗರ್ಜನ್ತಿ ಚಾಪರೇ ॥ 41 ॥

ಕೇಚಿದುಚ್ಛ್ರಿತಲಾಙ್ಗೂಲಾಃ ಪ್ರಹೃಷ್ಟಾಃ ಕಪಿಕುಞ್ಜರಾಃ ।

ಆಯತಾಞ್ಚಿತದೀರ್ಘಾಣಿ ಲಾಙ್ಗೂಲಾನಿ ಪ್ರವಿವ್ಯಧುಃ ॥ 42 ॥

ಅಪರೇ ಚ ಹನೂಮನ್ತಂ ವಾನರಾ ವಾರಣೋಪಮಮ್ ।

ಆಪ್ಲುತ್ಯ ಗಿರಿಶೃಙ್ಗೇಭ್ಯಸ್ಸಂಸ್ಪೃಶನ್ತಿ ಸ್ಮ ಹರ್ಷಿತಾಃ ॥ 43 ॥

ಉಕ್ತವಾಕ್ಯಂ ಹನೂಮನ್ತಮಙ್ಗದಸ್ತಮಥಾಬ್ರವೀತ್ ।

ಸರ್ವೇಷಾಂ ಹರಿವೀರಾಣಾಂ ಮಧ್ಯೇ ವಚನಮುತ್ತಮಮ್ ॥ 44 ॥

ಸತ್ತ್ವೇ ವೀರ್ಯೇ ನ ತೇ ಕಶ್ಚಿತ್ಸಮೋ ವಾನರ ವಿದ್ಯತೇ ।

ಯದವಪ್ಲುತ್ಯ ವಿಸ್ತೀರ್ಣಂ ಸಾಗರಂ ಪುನರಾಗತಃ ॥ 45 ॥

ಅಹೋ ಸ್ವಾಮಿನಿ ತೇ ಭಕ್ತಿರಹೋ ವೀರ್ಯಮಹೋ ಧೃತಿಃ ।

ದಿಷ್ಟ್ಯಾ ದೃಷ್ಟಾ ತ್ವಯಾ ದೇವೀ ರಾಮಪತ್ನೀ ಯಶಸ್ವಿನೀ ॥ 46 ॥

ದಿಷ್ಟ್ಯಾ ತ್ಯಕ್ಷ್ಯತಿ ಕಾಕುತ್ಸ್ಥ ಶ್ಶೋಕಂ ಸೀತಾವಿಯೋಗಜಮ್ ।

ತತೋಽಙ್ಗದಂ ಹನೂಮನ್ತಂ ಜಾಮ್ಬವನ್ತಂ ಚ ವಾನರಾಃ ॥ 47 ॥

ಪರಿವಾರ್ಯ ಪ್ರಮುದಿತಾ ಭೇಜಿರೇ ವಿಪುಲಾಶ್ಶಿಲಾಃ ।

ಶ್ರೋತುಕಾಮಾಸ್ಸಮುದ್ರಸ್ಯ ಲಙ್ಘನಂ ವಾನರೋತ್ತಮಾಃ ॥ 48 ॥

ದರ್ಶನಂ ಚಾಪಿ ಲಙ್ಕಾಯಾಸ್ಸೀತಾಯಾ ರಾವಣಸ್ಯ ಚ ।

ತಸ್ಥುಃ ಪ್ರಾಞ್ಜಲಯಸ್ಸರ್ವೇ ಹನುಮದ್ವಚನೋನ್ಮುಖಾಃ ॥ 49 ॥

ತಸ್ಥೌ ತತ್ರಾಙ್ಗದಃ ಶ್ರೀಮಾನ್ ವಾನರೈರ್ಬಹುಭಿರ್ವೃತಃ ।

ಉಪಾಸ್ಯಮಾನೋ ವಿಬುಧೈರ್ದಿವಿ ದೇವಪತಿರ್ಯಥಾ ॥ 50 ॥

ಹನೂಮತಾ ಕೀರ್ತಿಮತಾ ಯಶಸ್ವಿನಾ ತಥಾಙ್ಗದೇನಾಙ್ಗದಬದ್ಧಬಾಹುನಾ ।

ಮುದಾ ತದಾಽಧ್ಯಾಸಿತಮುನ್ನತಂ ಮಹನ್ಮಹೀಧರಾಗ್ರಂ ಜ್ವಲಿತಂ ಶ್ರಿಯಾಭವತ್ ॥ 51 ॥

ಇತ್ಯಾರ್ಷೇ ಶ್ರೀಮದ್ರಾಮಾಯಣೇ ವಾಲ್ಮೀಕೀಯ ಆದಿಕಾವ್ಯೇ ಸುನ್ದರಕಾಣ್ಡೇ ಸಪ್ತಪಞ್ಚಾಶಸ್ಸರ್ಗಃ ॥

Roman (IAST) Transliteration

śrīmadvālmīkīya rāmāyaṇe sundarakāṇḍam |

atha saptapañcāśassargaḥ |

sa candrakumudaṃ ramyaṃ sārkakāraṇḍavaṃ śubham |

tiṣyaśravaṇakādambamabhraśaivālaśādvalam || 1 ||

punarvasumahāmīnaṃ lohitāṅgamahāgraham |

airāvatamahādvīpaṃ svātihaṃsavilolitam || 2 ||

vātasaṅghātajātormi candrāṃśuśiśirāmbumat |

bhujaṅgayakṣagandharvaprabuddhakamalotpalam || 3 ||

hanumānmārutagatirmahānauriva sāgaram |

apāramapariśrāntaḥ pupluve gaganārṇavam || 4 ||

grasamāna ivākāśaṃ tārādhipamivollikhan |

haranniva sanakṣatraṃ gaganaṃ sārkamaṇḍalam || 5 ||

mārutasyātmajaḥ śrīmānkapirvyomacaro mahān |

hanumānmeghajālāni vikarṣanniva gacchati || 6 ||

pāṇḍurāruṇavarṇāni nīlamāñjiṣṭhakāni ca |

haritāruṇavarṇāni mahābhrāṇi cakāśire || 7 ||

praviśannabhrajālāni niṣpataṃśca punaḥ punaḥ |

pracchannaśca prakāśaśca candramā iva lakṣyate || 8 ||

vividhābhraghanāpannagocaro dhavalāmbaraḥ |

dṛśyādṛśyatanurvīrastadā candrāyate'mbare || 9 ||

tārkṣyāyamāṇo gagane babhāse vāyunandanaḥ |

dārayanmeghabṛndāni niṣpataṃśca punaḥ punaḥ || 10 ||

nadannādena mahatā meghasvanamahāsvanaḥ |

pravarānrākṣasān hatvā nāma viśrāvya cātmanaḥ || 11 ||

ākulāṃ nagarīṃ kṛtvā vyathayitvā ca rāvaṇam |

ardayitvā balaṃ ghoraṃ vaidehīmabhivādya ca || 12 ||

ājagāma mahātejāḥ punarmadhyena sāgaram |

parvatendraṃ sunābhaṃ ca samupaspṛśya vīryavān || 13 ||

jyāmukta iva nārāco mahāvego'bhyupāgataḥ |

sa kiñcidanusamprāptaḥ samālokya mahāgirim || 14 ||

mahendraṃ meghasaṅkāśaṃ nanāda haripuṅgavaḥ |

sa pūrayāmāsa kapirdiśo daśa samantataḥ || 15 ||

nadannādena mahatā meghasvanamahāsvanaḥ |

sa taṃ deśamanuprāptaḥ suhṛddharśanalālasaḥ || 16 ||

nanāda hariśārdūlo lāṅgūlaṃ cāpyakampayat |

tasya nānadyamānasya suparṇacarite pathi || 17 ||

phalatīvāsya ghoṣeṇa gaganaṃ sārkamaṇḍalam |

ye tu tatrottare tīre samudrasya mahābalāḥ || 18 ||

pūrvaṃ saṃviṣṭhitāśśūrā vāyuputradidṛkṣavaḥ |

mahato vātanunnasya toyadasyeva garjitam || 19 ||

śuśruvuste tadā ghoṣamūruvegaṃ hanūmataḥ |

te dīnamanasassarve śuśruvuḥ kānanaukasaḥ || 20 ||

vānarendrasya nirghoṣaṃ parjanyaninadopamam |

niśamya nadato nādaṃ vānarāste samantataḥ || 21 ||

babhūvurutsukāssarve suhṛddharśanakāṅkṣiṇaḥ |

jāmbavān sa hariśreṣṭhaḥ prītisaṃhṛṣṭamānasaḥ || 22 ||

upāmantrya harīn sarvānidaṃ vacanamabravīt |

sarvathā kṛtakāryo'sau hanumānnātra saṃśayaḥ || 23 ||

na hyasyākṛtakāryasya nāda evaṃvidho bhavet |

tasya bāhūruvegaṃ ca ninādaṃ ca mahātmanaḥ || 24 ||

niśamya harayo hṛṣṭāḥ samutpetustatastataḥ |

te nagāgrānnagāgrāṇi śikharācchikharāṇi ca || 25 ||

prahṛṣṭāḥ samapadyanta hanūmantaṃ didṛkṣavaḥ |

te prītāḥ pādapāgreṣu gṛhya śākhāḥ suviṣṭhitāḥ || 26 ||

vāsāṃsīva praśākhāśca samāvidhyanta vānarāḥ |

girigahvarasaṃlīno yathā garjati mārutaḥ || 27 ||

evaṃ jagarja balavān hanumānmārutātmajaḥ |

tamabhraghanasaṅkāśamāpatantaṃ mahākapim || 28 ||

dṛṣṭvā te vānarāssarve tasthuḥ prāñjalayastadā |

tatastu vegavāṃstasya girergirinibhaḥ kapiḥ || 29 ||

nipapāta mahendrasya śikhare pādapākule |

harṣeṇāpūryamāṇo'sau ramye parvatanirjhare || 30 ||

chinnapakṣa ivā'kāśātpapāta dharaṇīdharaḥ |

tataste prītamanasassarve vānarapuṅgavāḥ || 31 ||

hanumantaṃ mahātmānaṃ parivāryopatasthire |

parivārya ca te sarve parāṃ prītimupāgatāḥ || 32 ||

prahṛṣṭavadanā ssarve tamarogamupāgatam |

upāyanāni cādāya mūlāni ca phalāni ca || 33 ||

pratyarcayan hariśreṣṭhaṃ harayo mārutātmajam |

hanumāṃstu gurūn vṛddhāñjāmbavatpramukhāṃstadā || 34 ||

kumāramaṅgadaṃ caiva so'vandata mahākapiḥ |

sa tābhyāṃ pūjitaḥ pūjyaḥ kapibhiśca prasāditaḥ || 35 ||

dṛṣṭā sīteti vikrānta ssaṅkṣepeṇa nyavedayat |

niṣasāda ca hastena gṛhītvā vālinassutam || 36 ||

ramaṇīye vanoddeśe mahendrasya girestadā |

hanumānabravīddhṛṣṭastadā tānvānararṣabhān || 37 ||

aśokavanikāsaṃsthā dṛṣṭā sā janakātmajā |

rakṣamāṇā sughorābhī rākṣasībhiraninditā || 38 ||

ekaveṇīdharā bālā rāmadarśanalālasā |

upavāsapariśrāntā jaṭilā malinā kṛśā || 39 ||

tato dṛṣṭeti vacanaṃ mahārthamamṛtopamam |

niśamya mārutessarve muditā vānarābhavan || 40 ||

kṣvelantyanye nadantyanye garjantyanye mahābalāḥ |

cakruḥ kilakilāmanye pratigarjanti cāpare || 41 ||

keciducchritalāṅgūlāḥ prahṛṣṭāḥ kapikuñjarāḥ |

āyatāñcitadīrghāṇi lāṅgūlāni pravivyadhuḥ || 42 ||

apare ca hanūmantaṃ vānarā vāraṇopamam |

āplutya giriśṛṅgebhyassaṃspṛśanti sma harṣitāḥ || 43 ||

uktavākyaṃ hanūmantamaṅgadastamathābravīt |

sarveṣāṃ harivīrāṇāṃ madhye vacanamuttamam || 44 ||

sattve vīrye na te kaścitsamo vānara vidyate |

yadavaplutya vistīrṇaṃ sāgaraṃ punarāgataḥ || 45 ||

aho svāmini te bhaktiraho vīryamaho dhṛtiḥ |

diṣṭyā dṛṣṭā tvayā devī rāmapatnī yaśasvinī || 46 ||

diṣṭyā tyakṣyati kākutstha śśokaṃ sītāviyogajam |

tato'ṅgadaṃ hanūmantaṃ jāmbavantaṃ ca vānarāḥ || 47 ||

parivārya pramuditā bhejire vipulāśśilāḥ |

śrotukāmāssamudrasya laṅghanaṃ vānarottamāḥ || 48 ||

darśanaṃ cāpi laṅkāyāssītāyā rāvaṇasya ca |

tasthuḥ prāñjalayassarve hanumadvacanonmukhāḥ || 49 ||

tasthau tatrāṅgadaḥ śrīmān vānarairbahubhirvṛtaḥ |

upāsyamāno vibudhairdivi devapatiryathā || 50 ||

hanūmatā kīrtimatā yaśasvinā tathāṅgadenāṅgadabaddhabāhunā |

mudā tadā'dhyāsitamunnataṃ mahanmahīdharāgraṃ jvalitaṃ śriyābhavat || 51 ||

ityārṣe śrīmadrāmāyaṇe vālmīkīya ādikāvye sundarakāṇḍe saptapañcāśassargaḥ ||