5.45 Sundarakanda - Panchachatvarimsha Sargah

ॐ

5.45 ಸುನ್ದರಕಾಣ್ಡ - ಪಞ್ಚಚತ್ವಾರಿಂಶ ಸರ್ಗಃ

Valmiki Kannada

ಶ್ರೀಮದ್ವಾಲ್ಮೀಕೀಯ ರಾಮಾಯಣೇ ಸುನ್ದರಕಾಣ್ಡಮ್ ।

ಅಥ ಪಞ್ಚಚತ್ವಾರಿಂಶಸ್ಸರ್ಗಃ ।

ತತಸ್ತೇ ರಾಕ್ಷಸೇನ್ದ್ರೇಣ ಚೋದಿತಾ ಮನ್ತ್ರಿಣಸ್ಸುತಾಃ ।

ನಿರ್ಯಯುರ್ಭವನಾತ್ತಸ್ಮಾತ್ಸಪ್ತಸಪ್ತಾರ್ಚಿವರ್ಚಸಃ ॥ 1 ॥

ಮಹಾಬಲಪರೀವಾರಾ ಧನುಷ್ಮನ್ತೋ ಮಹಾಬಲಾಃ ।

ಕೃತಾಸ್ತ್ರಾಸ್ತ್ರವಿದಾಂ ಶ್ರೇಷ್ಠಾಃ ಪರಸ್ಪರಜಯೈಷಿಣಃ ॥ 2 ॥

ಹೇಮಜಾಲಪರಿಕ್ಷಿಪ್ತೈರ್ಧ್ವಜವದ್ಭಿಃ ಪತಾಕಿಭಿಃ ।

ತೋಯದಸ್ವನನಿರ್ಘೋಷೈರ್ವಾಜಿಯುಕ್ತೈರ್ಮಹಾರಥೈಃ ॥ 3 ॥

ತಪ್ತಕಾಞ್ಚನಚಿತ್ರಾಣಿ ಚಾಪಾನ್ಯಮಿತವಿಕ್ರಮಾಃ ।

ವಿಸ್ಫಾರಯನ್ತಸ್ಸಂಹೃಷ್ಟಾಸ್ತಟಿತ್ವನ್ತ ಇವಾಮ್ಬುದಾಃ ॥ 4 ॥

ಜನನ್ಯಸ್ತು ತತಸ್ತೇಷಾಂ ವಿದಿತ್ವಾ ಕಿಙ್ಕರಾನ್ಹತಾನ್ ।

ಬಭೂವುಶ್ಶೋಕಸಮ್ಭ್ರಾನ್ತಾಸ್ಸಬಾನ್ಧವಸುಹೃಜ್ಜನಾಃ ॥ 5 ॥

ತೇ ಪರಸ್ಪರಸಙ್ಘರ್ಷಾತ್ತಪ್ತಕಾಞ್ಚನಭೂಷಣಾಃ ।

ಅಭಿಪೇತುರ್ಹನೂಮನ್ತಂ ತೋರಣಸ್ಥಮವಸ್ಥಿತಮ್ ॥ 6 ॥

ಸೃಜನ್ತೋ ಬಾಣವೃಷ್ಟಿಂ ತೇ ರಥಗರ್ಜಿತನಿಸ್ಸ್ವನಾಃ ।

ವೃಷ್ಟಿಮನ್ತ ಇವಾಮ್ಭೋದಾ ವಿಚೇರುರ್ನೈಋತಾಮ್ಬುದಾಃ ॥ 7 ॥

ಅವಕೀರ್ಣಸ್ತತಸ್ತಾಭಿರ್ಹನುಮಾನ್ಶರವೃಷ್ಟಿಭಿಃ ।

ಅಭವತ್ಸಂವೃತಾಕಾರಶ್ಶೈಲರಾಡಿವ ವೃಷ್ಟಿಭಿಃ ॥ 8 ॥

ಸ ಶರಾನ್ಮೋಘಯಾಮಾಸ ತೇಷಾಮಾಶುಚರಃ ಕಪಿಃ ।

ರಥವೇಗಂ ಚ ವೀರಾಣಾಂ ವಿಚರನ್ವಿಮಲೇಽಮ್ಬರೇ ॥ 9 ॥

ಸ ತೈಃ ಕ್ರೀಡನ್ಧನುಷ್ಮದ್ಭಿರ್ವ್ಯೋಮ್ನಿ ವೀರಃ ಪ್ರಕಾಶತೇ ।

ಧನುಷ್ಮದ್ಭಿರ್ಯಥಾ ಮೇಘೈರ್ಮಾರುತಃ ಪ್ರಭುರಮ್ಬರೇ ॥ 10 ॥

ಸ ಕೃತ್ವಾ ನಿನದಂ ಘೋರಂ ತ್ರಾಸಯಂಸ್ತಾಂ ಮಹಾಚಮೂಮ್ ।

ಚಕಾರ ಹನುಮಾನ್ವೇಗಂ ತೇಷು ರಕ್ಷಸ್ಸು ವೀರ್ಯವಾನ್ ॥ 11 ॥

ತಲೇನಾಭ್ಯಹನತ್ಕಾಂಶ್ಚಿತ್ಪಾದೈಃ ಕಾಂಶ್ಚಿತ್ಪರನ್ತಪಃ ।

ಮುಷ್ಟಿನಾಭ್ಯಹನತ್ಕಾಂಶ್ಚಿನ್ನಖೈಃ ಕಾಂಶ್ಚಿದ್ವ್ಯದಾರಯತ್ ॥ 12 ॥

ಪ್ರಮಮಾಥೋರಸಾ ಕಾಂಶ್ಚಿದೂರುಭ್ಯಾಮಪರಾನ್ಕಪಿಃ ।

ಕೇಚಿತ್ತಸ್ಯ ನಿನಾದೇನ ತತ್ರೈವ ಪತಿತಾ ಭುವಿ ॥ 13 ॥

ತತಸ್ತೇಷ್ವವಸನ್ನೇಷು ಭೂಮೌ ನಿಪತಿತೇಷು ಚ ।

ತತ್ಸೈನ್ಯಮಗಮತ್ಸರ್ವಂ ದಿಶೋದಶ ಭಯಾರ್ದಿತಮ್ ॥ 14 ॥

ವಿನೇದುರ್ವಿಸ್ವರಂ ನಾಗಾ ನಿಪೇತುರ್ಭುವಿ ವಾಜಿನಃ ।

ಭಗ್ನನೀಡಧ್ವಜಚ್ಛತ್ರೈರ್ಭೂಶ್ಚ ಕೀರ್ಣಾಽಭವದ್ರಥೈಃ ॥ 15 ॥

ಸ್ರವತಾ ರುಧಿರೇಣಾಥ ಸ್ರವನ್ತ್ಯೋ ದರ್ಶಿತಾಃ ಪಥಿ ।

ವಿವಿಧೈಶ್ಚ ಸ್ವರೈರ್ಲಙ್ಕಾ ನನಾದ ವಿಕೃತಂ ತದಾ ॥ 16 ॥

ಸ ತಾನ್ಪ್ರವೃದ್ಧಾನ್ವಿನಿಹತ್ಯ ರಾಕ್ಷಸಾನ್ ಮಹಾಬಲಶ್ಚಣ್ಡಪರಾಕ್ರಮಃ ಕಪಿಃ ।

ಯುಯುತ್ಸುರನ್ಯೈಃ ಪುನರೇವ ರಾಕ್ಷಸೈ ಸ್ತಮೇವ ವೀರೋಽಭಿಜಗಾಮ ತೋರಣಮ್ ॥ 17 ॥

ಇತ್ಯಾರ್ಷೇ ಶ್ರೀಮದ್ರಾಮಾಯಣೇ ವಾಲ್ಮೀಕೀಯ ಆದಿಕಾವ್ಯೇ ಸುನ್ದರಕಾಣ್ಡೇ ಪಞ್ಚಚತ್ವಾರಿಂಶಸ್ಸರ್ಗಃ ॥

Roman (IAST) Transliteration

śrīmadvālmīkīya rāmāyaṇe sundarakāṇḍam |

atha pañcacatvāriṃśassargaḥ |

tataste rākṣasendreṇa coditā mantriṇassutāḥ |

niryayurbhavanāttasmātsaptasaptārcivarcasaḥ || 1 ||

mahābalaparīvārā dhanuṣmanto mahābalāḥ |

kṛtāstrāstravidāṃ śreṣṭhāḥ parasparajayaiṣiṇaḥ || 2 ||

hemajālaparikṣiptairdhvajavadbhiḥ patākibhiḥ |

toyadasvananirghoṣairvājiyuktairmahārathaiḥ || 3 ||

taptakāñcanacitrāṇi cāpānyamitavikramāḥ |

visphārayantassaṃhṛṣṭāstaṭitvanta ivāmbudāḥ || 4 ||

jananyastu tatasteṣāṃ viditvā kiṅkarānhatān |

babhūvuśśokasambhrāntāssabāndhavasuhṛjjanāḥ || 5 ||

te parasparasaṅgharṣāttaptakāñcanabhūṣaṇāḥ |

abhipeturhanūmantaṃ toraṇasthamavasthitam || 6 ||

sṛjanto bāṇavṛṣṭiṃ te rathagarjitanissvanāḥ |

vṛṣṭimanta ivāmbhodā vicerurnaiṛtāmbudāḥ || 7 ||

avakīrṇastatastābhirhanumānśaravṛṣṭibhiḥ |

abhavatsaṃvṛtākāraśśailarāḍiva vṛṣṭibhiḥ || 8 ||

sa śarānmoghayāmāsa teṣāmāśucaraḥ kapiḥ |

rathavegaṃ ca vīrāṇāṃ vicaranvimale'mbare || 9 ||

sa taiḥ krīḍandhanuṣmadbhirvyomni vīraḥ prakāśate |

dhanuṣmadbhiryathā meghairmārutaḥ prabhurambare || 10 ||

sa kṛtvā ninadaṃ ghoraṃ trāsayaṃstāṃ mahācamūm |

cakāra hanumānvegaṃ teṣu rakṣassu vīryavān || 11 ||

talenābhyahanatkāṃścitpādaiḥ kāṃścitparantapaḥ |

muṣṭinābhyahanatkāṃścinnakhaiḥ kāṃścidvyadārayat || 12 ||

pramamāthorasā kāṃścidūrubhyāmaparānkapiḥ |

kecittasya ninādena tatraiva patitā bhuvi || 13 ||

tatasteṣvavasanneṣu bhūmau nipatiteṣu ca |

tatsainyamagamatsarvaṃ diśodaśa bhayārditam || 14 ||

vinedurvisvaraṃ nāgā nipeturbhuvi vājinaḥ |

bhagnanīḍadhvajacchatrairbhūśca kīrṇā'bhavadrathaiḥ || 15 ||

sravatā rudhireṇātha sravantyo darśitāḥ pathi |

vividhaiśca svarairlaṅkā nanāda vikṛtaṃ tadā || 16 ||

sa tānpravṛddhānvinihatya rākṣasān mahābalaścaṇḍaparākramaḥ kapiḥ |

yuyutsuranyaiḥ punareva rākṣasai stameva vīro'bhijagāma toraṇam || 17 ||

ityārṣe śrīmadrāmāyaṇe vālmīkīya ādikāvye sundarakāṇḍe pañcacatvāriṃśassargaḥ ||