5.43 Sundarakanda - Trichatvarimsha Sargah

ॐ

5.43 ಸುನ್ದರಕಾಣ್ಡ - ತ್ರಿಚತ್ವಾರಿಂಶ ಸರ್ಗಃ

Valmiki Kannada

ಶ್ರೀಮದ್ವಾಲ್ಮೀಕೀಯ ರಾಮಾಯಣೇ ಸುನ್ದರಕಾಣ್ಡಮ್ ।

ಅಥ ತ್ರಿಚತ್ವಾರಿಂಶಸ್ಸರ್ಗಃ ।

ತತಸ್ಸ ಕಿಙ್ಕರಾನ್ಹತ್ವಾ ಹನುಮಾನ್ಧ್ಯಾನಮಾಸ್ಥಿತಃ ।

ವನಂ ಭಗ್ನಂ ಮಯಾ ಚೈತ್ಯಪ್ರಾಸಾದೋ ನ ವಿನಾಶಿತಃ ॥ 1 ॥

ತಸ್ಮಾತ್ಪ್ರಾಸಾದಮಪ್ಯೇವಂ ಭೀಮಂ ವಿಧ್ವಂಸಯಾಮ್ಯಹಮ್ ।

ಇತಿ ಸಞ್ಚಿನ್ತ್ಯ ಮನಸಾ ಹನುಮಾನ್ದರ್ಶಯನ್ಬಲಮ್ ॥ 2 ॥

ಚೈತ್ಯಪ್ರಾಸಾದಮಾಪ್ಲುತ್ಯ ಮೇರುಶೃಙ್ಗಮಿವೋನ್ನತಮ್ ।

ಆರುರೋಹ ಕಪಿಶ್ರೇಷ್ಠೋ ಹನುಮಾನ್ಮಾರುತಾತ್ಮಜಃ ॥ 3 ॥

ಆರುಹ್ಯ ಗಿರಿಸಙ್ಕಾಶಂ ಪ್ರಾಸಾದಂ ಹರಿಯೂಥಪಃ ।

ಬಭೌ ಸ ಸುಮಹಾತೇಜಾಃ ಪ್ರತಿಸೂರ್ಯ ಇವೋದಿತಃ ॥ 4 ॥

ಸಮ್ಪ್ರಧೃಷ್ಯ ಚ ದುರ್ಧರ್ಷಂ ಚೈತ್ಯಪ್ರಾಸಾದಮುತ್ತಮಮ್ ।

ಹನುಮಾನ್ಪ್ರಜ್ವಲನ್ಲಕ್ಷ್ಮ್ಯಾ ಪಾರಿಯಾತ್ರೋಪಮೋಽಭವತ್ ॥ 5 ॥

ಸ ಭೂತ್ವಾ ಸುಮಹಾಕಾಯಃ ಪ್ರಭಾವಾನ್ಮಾರುತಾತ್ಮಜಃ ।

ಧೃಷ್ಟಮಾಸ್ಫೋಟಯಾಮಾಸ ಲಙ್ಕಾಂ ಶಬ್ದೇನ ಪೂರಯನ್ ॥ 6 ॥

ತಸ್ಯಾಸ್ಫೋಟಿತಶಬ್ದೇನ ಮಹತಾ ಶ್ರೋತ್ರಘಾತಿನಾ ।

ಪೇತುರ್ವಿಹಙ್ಗಮಾಸ್ತತ್ರ ಚೈತ್ಯಪಾಲಾಶ್ಚ ಮೋಹಿತಾಃ ॥ 7 ॥

ಅಸ್ತ್ರವಿಜ್ಜಯತಾಂ ರಾಮೋ ಲಕ್ಷ್ಮಣಶ್ಚ ಮಹಾಬಲಃ ।

ರಾಜಾ ಜಯತಿ ಸುಗ್ರೀವೋ ರಾಘವೇಣಾಭಿಪಾಲಿತಃ ॥ 8 ॥

ದಾಸೋಽಹಂ ಕೋಸಲೇನ್ದ್ರಸ್ಯ ರಾಮಸ್ಯಾಕ್ಲಿಷ್ಟಕರ್ಮಣಃ ।

ಹನುಮಾನ್ಶತ್ರುಸೈನ್ಯಾನಾಂ ನಿಹನ್ತಾ ಮಾರುತಾತ್ಮಜಃ ॥ 9 ॥

ನ ರಾವಣಸಹಸ್ರಂ ಮೇ ಯುದ್ಧೇ ಪ್ರತಿಬಲಂ ಭವೇತ್ ।

ಶಿಲಾಭಿಸ್ತು ಪ್ರಹರತಃ ಪಾದಪೈಶ್ಚ ಸಹಸ್ರಶಃ ॥ 10 ॥

ಅರ್ದಯಿತ್ವಾ ಪುರೀಂ ಲಙ್ಕಾಮಭಿವಾದ್ಯ ಚ ಮೈಥಿಲೀಮ್ ।

ಸಮೃದ್ಧಾರ್ಥೋ ಗಮಿಷ್ಯಾಮಿ ಮಿಷತಾಂ ಸರ್ವರಕ್ಷಸಾಮ್ ॥ 11 ॥

ಏವಮುಕ್ತ್ವಾ ವಿಮಾನಸ್ಥಶ್ಚೈತ್ಯಸ್ಥಾನ್ಹರಿಯೂಥಪಃ ।

ನನಾದ ಭೀಮನಿರ್ಹ್ರಾದೋ ರಕ್ಷಸಾಂ ಜನಯನ್ಭಯಮ್ ॥ 12 ॥

ತೇನ ಶಬ್ದೇನ ಮಹತಾ ಚೈತ್ಯಪಾಲಾಶ್ಶತಂ ಯಯುಃ ।

ಗೃಹೀತ್ವಾ ವಿವಿಧಾನಸ್ತ್ರಾನ್ಪ್ರಾಸಾನ್ಖಙ್ಗಾನ್ಪರಶ್ವಥಾನ್ ॥ 13 ॥

ವಿಸೃಜನ್ತೋ ಮಹಾಕಾಯಾ ಮಾರುತಿಂ ಪರ್ಯವಾರಯನ್ ।

ತೇ ಗದಾಭಿರ್ವಿಚಿತ್ರಾಭಿಃ ಪರಿಘೈಃ ಕಾಞ್ಚನಾಙ್ಗದೈಃ ।

ಆಜಘ್ನುರ್ವಾನರಶ್ರೇಷ್ಠಂ ಬಾಣೈಶ್ಚಾದಿತ್ಯಸನ್ನಿಭೈಃ ॥ 14 ॥

ಆವರ್ತ ಇವ ಗಙ್ಗಾಯಾಸ್ತೋಯಸ್ಯ ವಿಪುಲೋ ಮಹಾನ್ ।

ಪರಿಕ್ಷಿಪ್ಯ ಹರಿಶ್ರೇಷ್ಠಂ ಸ ಬಭೌ ರಕ್ಷಸಾಂ ಗಣಃ ॥ 15 ॥

ತತೋ ವಾತಾತ್ಮಜಃ ಕ್ರುದ್ಧೋ ಭೀಮ ರೂಪಂ ಸಮಾಸ್ಥಿತಃ ॥ 16 ॥

ಪ್ರಾಸಾದಸ್ಯ ಮಹನ್ತಸ್ಯ ಸ್ತಮ್ಬಂ ಹೇಮಪರಿಷ್ಕೃತಮ್ ।

ಉತ್ಪಾಟಯಿತ್ವಾ ವೇಗೇನ ಹನುಮಾನ್ಪವನಾತ್ಮಜಃ ॥ 17 ॥

ತತಸ್ತಂ ಭ್ರಾಮಯಾಮಾಸ ಶತಧಾರಂ ಮಹಾಬಲಃ ।

ತತ್ರ ಚಾಗ್ನಿಸ್ಸಮಭವತ್ಪ್ರಾಸಾದಶ್ಚಾಪ್ಯದಹ್ಯತ ॥ 18 ॥

ದಹ್ಯಮಾನಂ ತತೋ ದೃಷ್ಟ್ವಾ ಪ್ರಾಸಾದಂ ಹರಿಯೂಥಪಃ ।

ಸ ರಾಕ್ಷಸಶತಂ ಹತ್ತ್ವಾ ವಜ್ರೇಣೇನ್ದ್ರ ಇವಾಸುರಾನ್ ॥ 19 ॥

ಅನ್ತರಿಕ್ಷೇ ಸ್ಥಿತಶ್ಶ್ತೀಮಾನಿದಂ ವಚನಮಬ್ರವೀತ್ ।

ಮಾದೃಶಾನಾಂ ಸಹಸ್ರಾಣಿ ವಿಸೃಷ್ಟಾನಿ ಮಹಾತ್ಮನಾಮ್ ॥ 20 ॥

ಬಲಿನಾಂ ವಾನರೇನ್ದ್ರಾಣಾಂ ಸುಗ್ರೀವವಶವರ್ತಿನಾಮ್ ।

ಅಟನ್ತಿ ವಸುಧಾಂ ಕೃತ್ಸ್ನಾಂ ವಯಮನ್ಯೇ ಚ ವಾನರಾಃ ॥ 21 ॥

ದಶನಾಗಬಲಾಃ ಕೇಚಿತ್ಕೇಚಿದ್ದಶಗುಣೋತ್ತರಾಃ ।

ಕೇಚಿನ್ನಾಗಸಹಸ್ರಸ್ಯ ಬಭೂವುಸ್ತುಲ್ಯವಿಕ್ರಮಾಃ ॥ 22 ॥

ಸನ್ತಿ ಚೌಘಬಲಾಃ ಕೇಚಿತ್ಕೇಚಿದ್ವಾಯುಬಲೋಪಮಾಃ ।

ಅಪ್ರಮೇಯಬಲಾಶ್ಚಾನ್ಯೇ ತತ್ರಾಸನ್ಹರಿಯೂಥಪಾಃ ॥ 23 ॥

ಈದೃಗ್ವಿಧೈಸ್ತು ಹರಿಭಿರ್ವೃತೋ ದನ್ತನಖಾಯುಧೈಃ ।

ಶತೈಶ್ಶತಸಹಸ್ರೈಶ್ಚ ಕೋಟೀಭಿರಯುತೈರಪಿ ॥ 24 ॥

ಆಗಮಿಷ್ಯತಿ ಸುಗ್ರೀವಃ ಸರ್ವೇಷಾಂ ವೋ ನಿಷೂದನಃ ।

ನೇಯಮಸ್ತಿ ಪುರೀ ಲಙ್ಕಾ ನ ಯೂಯಂ ನ ಚ ರಾವಣಃ ॥ 25 ॥

ಇತ್ಯಾರ್ಷೇ ಶ್ರೀಮದ್ರಾಮಾಯಣೇ ವಾಲ್ಮೀಕೀಯ ಆದಿಕಾವ್ಯೇ ಸುನ್ದರಕಾಣ್ಡೇ ತ್ರಿಚತ್ವಾರಿಂಶಸ್ಸರ್ಗಃ ॥

Roman (IAST) Transliteration

śrīmadvālmīkīya rāmāyaṇe sundarakāṇḍam |

atha tricatvāriṃśassargaḥ |

tatassa kiṅkarānhatvā hanumāndhyānamāsthitaḥ |

vanaṃ bhagnaṃ mayā caityaprāsādo na vināśitaḥ || 1 ||

tasmātprāsādamapyevaṃ bhīmaṃ vidhvaṃsayāmyaham |

iti sañcintya manasā hanumāndarśayanbalam || 2 ||

caityaprāsādamāplutya meruśṛṅgamivonnatam |

āruroha kapiśreṣṭho hanumānmārutātmajaḥ || 3 ||

āruhya girisaṅkāśaṃ prāsādaṃ hariyūthapaḥ |

babhau sa sumahātejāḥ pratisūrya ivoditaḥ || 4 ||

sampradhṛṣya ca durdharṣaṃ caityaprāsādamuttamam |

hanumānprajvalanlakṣmyā pāriyātropamo'bhavat || 5 ||

sa bhūtvā sumahākāyaḥ prabhāvānmārutātmajaḥ |

dhṛṣṭamāsphoṭayāmāsa laṅkāṃ śabdena pūrayan || 6 ||

tasyāsphoṭitaśabdena mahatā śrotraghātinā |

peturvihaṅgamāstatra caityapālāśca mohitāḥ || 7 ||

astravijjayatāṃ rāmo lakṣmaṇaśca mahābalaḥ |

rājā jayati sugrīvo rāghaveṇābhipālitaḥ || 8 ||

dāso'haṃ kosalendrasya rāmasyākliṣṭakarmaṇaḥ |

hanumānśatrusainyānāṃ nihantā mārutātmajaḥ || 9 ||

na rāvaṇasahasraṃ me yuddhe pratibalaṃ bhavet |

śilābhistu praharataḥ pādapaiśca sahasraśaḥ || 10 ||

ardayitvā purīṃ laṅkāmabhivādya ca maithilīm |

samṛddhārtho gamiṣyāmi miṣatāṃ sarvarakṣasām || 11 ||

evamuktvā vimānasthaścaityasthānhariyūthapaḥ |

nanāda bhīmanirhrādo rakṣasāṃ janayanbhayam || 12 ||

tena śabdena mahatā caityapālāśśataṃ yayuḥ |

gṛhītvā vividhānastrānprāsānkhaṅgānparaśvathān || 13 ||

visṛjanto mahākāyā mārutiṃ paryavārayan |

te gadābhirvicitrābhiḥ parighaiḥ kāñcanāṅgadaiḥ |

ājaghnurvānaraśreṣṭhaṃ bāṇaiścādityasannibhaiḥ || 14 ||

āvarta iva gaṅgāyāstoyasya vipulo mahān |

parikṣipya hariśreṣṭhaṃ sa babhau rakṣasāṃ gaṇaḥ || 15 ||

tato vātātmajaḥ kruddho bhīma rūpaṃ samāsthitaḥ || 16 ||

prāsādasya mahantasya stambaṃ hemapariṣkṛtam |

utpāṭayitvā vegena hanumānpavanātmajaḥ || 17 ||

tatastaṃ bhrāmayāmāsa śatadhāraṃ mahābalaḥ |

tatra cāgnissamabhavatprāsādaścāpyadahyata || 18 ||

dahyamānaṃ tato dṛṣṭvā prāsādaṃ hariyūthapaḥ |

sa rākṣasaśataṃ hattvā vajreṇendra ivāsurān || 19 ||

antarikṣe sthitaśśtīmānidaṃ vacanamabravīt |

mādṛśānāṃ sahasrāṇi visṛṣṭāni mahātmanām || 20 ||

balināṃ vānarendrāṇāṃ sugrīvavaśavartinām |

aṭanti vasudhāṃ kṛtsnāṃ vayamanye ca vānarāḥ || 21 ||

daśanāgabalāḥ kecitkeciddaśaguṇottarāḥ |

kecinnāgasahasrasya babhūvustulyavikramāḥ || 22 ||

santi caughabalāḥ kecitkecidvāyubalopamāḥ |

aprameyabalāścānye tatrāsanhariyūthapāḥ || 23 ||

īdṛgvidhaistu haribhirvṛto dantanakhāyudhaiḥ |

śataiśśatasahasraiśca koṭībhirayutairapi || 24 ||

āgamiṣyati sugrīvaḥ sarveṣāṃ vo niṣūdanaḥ |

neyamasti purī laṅkā na yūyaṃ na ca rāvaṇaḥ || 25 ||

ityārṣe śrīmadrāmāyaṇe vālmīkīya ādikāvye sundarakāṇḍe tricatvāriṃśassargaḥ ||