5.29 Sundarakanda - Ekonatrimsha Sargah

ॐ

5.29 ಸುನ್ದರಕಾಣ್ಡ - ಏಕೋನತ್ರಿಂಶ ಸರ್ಗಃ

Valmiki Kannada

ಶ್ರೀಮದ್ವಾಲ್ಮೀಕೀಯ ರಾಮಾಯಣೇ ಸುನ್ದರಕಾಣ್ಡಮ್ ।

ಅಥ ಏಕೋನತ್ರಿಂಶಸ್ಸರ್ಗಃ ।

ತಥಾಗತಾಂ ತಾಂ ವ್ಯಥಿತಾಮನಿನ್ದಿತಾಂ ವ್ಯಪೇತಹರ್ಷಾಂ ಪರಿದೀನಮಾನಸಾಮ್ ।

ಶುಭಾಂ ನಿಮಿತ್ತಾನಿ ಶುಭಾನಿ ಭೇಜಿರೇ ನರಂ ಶ್ರಿಯಾ ಜುಷ್ಟಮಿವೋಪಜೀವಿನಃ ॥ 1 ॥

ತಸ್ಯಾಃ ಶುಭಂ ವಾಮಮರಾಲಪಕ್ಷ್ಮ ರಾಜೀವೃತಂ ಕೃಷ್ಣವಿಶಾಲಶುಕ್ಲಮ್ ।

ಪ್ರಾಸ್ಪನ್ದತೈಕಂ ನಯನಂ ಸುಕೇಶ್ಯಾ ಮೀನಾಹತಂ ಪದ್ಮಮಿವಾಭಿತಾಮ್ರಮ್ ॥ 2 ॥

ಭುಜಶ್ಚ ಚಾರ್ವಞ್ಚಿತಪೀನವೃತ್ತಃ ಪರಾರ್ಥ್ಯಕಾಲಾಗರುಚನ್ದನಾರ್ಹಃ ।

ಅನುತ್ತಮೇನಾಧ್ಯುಷಿತಃ ಪ್ರಿಯೇಣ ಚಿರೇಣ ವಾಮಃ ಸಮವೇಪತಾಽಶು ॥ 3 ॥

ಗಜೇನ್ದ್ರಹಸ್ತಪ್ರತಿಮಶ್ಚ ಪೀನ ಸ್ತಯೋರ್ದ್ವಯೋಃ ಸಮ್ಹತಯೋಃ ಸುಜಾತಃ ।

ಪ್ರಸ್ಪನ್ದಮಾನಃ ಪುನರೂರುರಸ್ಯಾ ರಾಮಂ ಪುರಸ್ತಾತ್ ಸ್ಥಿತಮಾಚಚಕ್ಷೇ ॥ 4 ॥

ಶುಭಂ ಪುನರ್ಹೇಮಸಮಾನವರ್ಣ ಮೀಷದ್ರಜೋಧ್ವಸ್ತಮಿವಾಮಲಾಕ್ಷ್ಯಾಃ ।

ವಾಸ ಸ್ಸ್ಥಿತಾಯಾ ಶ್ಶಿಖರಾಗ್ರದನ್ತ್ಯಾಃ ಕಿಞ್ಚಿತ್ಪರಿಸ್ರಂಸತ ಚಾರುಗಾತ್ಯ್ರಾಃ ॥ 5 ॥

ಏತೈರ್ನಿಮಿತ್ತೈರಪರೈಶ್ಚ ಸುಭ್ರೂಃ ಸಮ್ಬೋಧಿತಾ ಪ್ರಾಗಪಿ ಸಾಧು ಸಿದ್ಧೈಃ ।

ವಾತಾತಪಕ್ಲಾನ್ತಮಿವ ಪ್ರಣಷ್ಟಂ ವರ್ಷೇಣ ಬೀಜಂ ಪ್ರತಿಸಞ್ಜಹರ್ಷ ॥ 6 ॥

ತಸ್ಯಾಃ ಪುನರ್ಬಿಮ್ಬಫಲಾಧರೋಷ್ಠಂ ಸ್ವಕ್ಷಿಭ್ರುಕೇಶಾನ್ತಮರಾಲಪಕ್ಷ್ಮ ।

ವಕ್ತ್ರಂ ಬಭಾಸೇ ಸಿತಶುಕ್ಲದಂಷ್ಟ್ರಂ ರಾಹೋರ್ಮುಖಾಚ್ಚನ್ದ್ರ ಇವ ಪ್ರಮುಕ್ತಃ ॥ 7 ॥

ಸಾ ವೀತಶೋಕಾ ವ್ಯಪನೀತತನ್ದ್ರೀ ಶಾನ್ತಜ್ವರಾ ಹರ್ಷವಿಬುದ್ಧಸತ್ತ್ವಾ ।

ಅಶೋಭತಾರ್ಯಾ ವದನೇನ ಶುಕ್ಲೇ ಶೀತಾಂಶುನಾ ರಾತ್ರಿರಿವೋದಿತೇನ ॥ 8 ॥

ಇತ್ಯಾರ್ಷೇ ಶ್ರೀಮದ್ರಾಮಾಯಣೇ ವಾಲ್ಮೀಕೀಯ ಆದಿಕಾವ್ಯೇ ಸುನ್ದರಕಾಣ್ಡೇ ಏಕೋನತ್ರಿಂಶಸ್ಸರ್ಗಃ ॥

Roman (IAST) Transliteration

śrīmadvālmīkīya rāmāyaṇe sundarakāṇḍam |

atha ekonatriṃśassargaḥ |

tathāgatāṃ tāṃ vyathitāmaninditāṃ vyapetaharṣāṃ paridīnamānasām |

śubhāṃ nimittāni śubhāni bhejire naraṃ śriyā juṣṭamivopajīvinaḥ || 1 ||

tasyāḥ śubhaṃ vāmamarālapakṣma rājīvṛtaṃ kṛṣṇaviśālaśuklam |

prāspandataikaṃ nayanaṃ sukeśyā mīnāhataṃ padmamivābhitāmram || 2 ||

bhujaśca cārvañcitapīnavṛttaḥ parārthyakālāgarucandanārhaḥ |

anuttamenādhyuṣitaḥ priyeṇa cireṇa vāmaḥ samavepatā'śu || 3 ||

gajendrahastapratimaśca pīna stayordvayoḥ samhatayoḥ sujātaḥ |

praspandamānaḥ punarūrurasyā rāmaṃ purastāt sthitamācacakṣe || 4 ||

śubhaṃ punarhemasamānavarṇa mīṣadrajodhvastamivāmalākṣyāḥ |

vāsa ssthitāyā śśikharāgradantyāḥ kiñcitparisraṃsata cārugātyrāḥ || 5 ||

etairnimittairaparaiśca subhrūḥ sambodhitā prāgapi sādhu siddhaiḥ |

vātātapaklāntamiva praṇaṣṭaṃ varṣeṇa bījaṃ pratisañjaharṣa || 6 ||

tasyāḥ punarbimbaphalādharoṣṭhaṃ svakṣibhrukeśāntamarālapakṣma |

vaktraṃ babhāse sitaśukladaṃṣṭraṃ rāhormukhāccandra iva pramuktaḥ || 7 ||

sā vītaśokā vyapanītatandrī śāntajvarā harṣavibuddhasattvā |

aśobhatāryā vadanena śukle śītāṃśunā rātririvoditena || 8 ||

ityārṣe śrīmadrāmāyaṇe vālmīkīya ādikāvye sundarakāṇḍe ekonatriṃśassargaḥ ||