5.26 Sundarakanda - Shadvimsha Sargah

ॐ

5.26 ಸುನ್ದರಕಾಣ್ಡ - ಷಡ್ವಿಂಶ ಸರ್ಗಃ

Valmiki Kannada

ಶ್ರೀಮದ್ವಾಲ್ಮೀಕೀಯ ರಾಮಾಯಣೇ ಸುನ್ದರಕಾಣ್ಡಮ್ ।

ಅಥ ಷಡ್ವಿಂಶಸ್ಸರ್ಗಃ ।

ಪ್ರಸಕ್ತಾಶ್ರುಮುಖೀತ್ಯವಂ ಬ್ರುವನ್ತೀ ಜನಕಾತ್ಮಜಾ ।

ಆಧೋಗತಮುಖೀ ಬಾಲಾ ವಿಲಪ್ತುಮುಪಚಕ್ರಮೇ ॥ 1 ॥

ಉನ್ಮತ್ತೇವ ಪ್ರಮತ್ತೇವ ಭ್ರಾನ್ತಚಿತ್ತೇವ ಶೋಚತೀ ।

ಉಪಾವೃತ್ತಾ ಕಿಶೋರೀವ ವಿವೇಷ್ಟನ್ತೀ ಮಹೀತಲೇ ॥ 2 ॥

ರಾಘವಸ್ಯ ಪ್ರಮತ್ತಸ್ಯ ರಕ್ಷಸಾ ಕಾಮರೂಪಿಣಾ ।

ರಾವಣೇನ ಪ್ರಮಥ್ಯಾಹಮಾನೀತಾ ಕ್ರೋಶತೀ ಬಲಾತ್ ॥ 3 ॥

ರಾಕ್ಷಸೀವಶಮಾಪನ್ನಾ ಭರ್ತ್ಸ್ಯಮಾನಾ ಸುದಾರುಣಮ್ ।

ಚಿನ್ತಯನ್ತೀ ಸುದುಃಖಾರ್ತಾ ನಾಹಂ ಜೀವಿತುಮುತ್ಸುಹೇ ॥ 4 ॥

ನ ಹಿ ಮೇ ಜೀವಿತೇನಾರ್ಥೋ ನೈವಾರ್ಥೇರ್ನ ಚ ಭೂಷಣೈಃ ।

ವಸನ್ತ್ಯಾ ರಾಕ್ಷಸೀಮಧ್ಯೇ ವಿನಾ ರಾಮಂ ಮಹಾರಥಮ್ ॥ 5 ॥

ಅಶ್ಮಸಾರಮಿದಂ ನೂನಮಥವಾಪ್ಯಜರಾಮರಮ್ ।

ಹೃದಯಂ ಮಮ ಯೇನೇದಂ ನ ದುಃಖೇನಾವಶೀರ್ಯತೇ ॥ 6 ॥

ಧಿಙ್ಮಾಮನಾರ್ಯಾಮಸತೀಂ ಯಾಹಂ ತೇನಾ ವಿನಾ ಕೃತಾ ।

ಮುಹೂರ್ತಮಪಿ ರಕ್ಷಾಮಿ ಜೀವಿತಂ ಪಾಪಜೀವಿತಾ ॥ 7 ॥

ಕಾ ಚ ಮೇ ಜೀವಿತೇ ಶ್ರದ್ಧಾ ಸುಖೇ ವಾ ತಂ ಪ್ರಿಯಂ ವಿನಾ ।

ಭರ್ತಾರಂ ಸಾಗರಾನ್ತಾಯಾ ವಸುಧಾಯಾಃ ಪ್ರಿಯಂವದಮ್ ॥ 8 ॥

ಭಿದ್ಯತಾಂ ಭಕ್ಷ್ಯತಾಂ ವಾಪಿ ಶರೀರಂ ವಿಸೃಜಾಮ್ಯಹಮ್ ।

ನ ಚಾಪ್ಯಹಂ ಚಿರಂ ದುಃಖಂ ಸಹೇಯಂ ಪ್ರಿಯವರ್ಜಿತಾ ॥ 9 ॥

ಚರಣೇನಾಪಿ ಸವ್ಯೇನ ನ ಸ್ಪೃಶೇಯಂ ನಿಶಾಚರಮ್ ।

ರಾವಣಂ ಕಿಂ ಪುನರಹಂ ಕಾಮಮೇಯಂ ವಿಗರ್ಹಿತಮ್ ॥ 10 ॥

ಪ್ರತ್ಯಾಖ್ಯಾತಂ ನ ಜಾನಾತಿ ನಾತ್ಮಾನಂ ನಾತ್ಮನಃ ಕುಲಮ್ ।

ಯೋ ನೃಶಂಸಸ್ವಭಾವೇನ ಮಾಂ ಪ್ರಾರ್ಥಯಿತುಮಿಚ್ಛತಿ ॥ 11 ॥

ಛಿನ್ನಾ ಭಿನ್ನಾ ವಿಭಕ್ತಾ ವಾ ದೀಪ್ತೇವಾಗ್ನೌ ಪ್ರದೀಪಿತಾ ।

ರಾವಣಂ ನೋಪತಿಷ್ಠೇಯಂ ಕಿಂ ಪ್ರಲಾಪೇನ ವಶ್ಚಿರಮ್ ॥ 12 ॥

ಖ್ಯಾತಃ ಪ್ರಾಜ್ಞಃ ಕೃತಜ್ಞಶ್ಚ ಸಾನುಕ್ರೋಶಶ್ಚ ರಾಘವಃ ।

ಸದ್ವೃತ್ತೋ ನಿರನುಕ್ರೋಶಶ್ಶಙ್ಕೇ ಮದ್ಭಾಗ್ಯಸಙ್ಕ್ಷಯಾತ್ ॥ 13 ॥

ರಾಕ್ಷಸಾನಾಂ ಸಹಸ್ರಾಣಿ ಜನಸ್ಥಾನೇ ಚತುರ್ದಶ ।

ಯೇನೈಕೇನ ನಿರಸ್ತಾನಿ ಸ ಮಾಂ ಕಿಂ ನಾಭಿಪದ್ಯತೇ ॥ 14 ॥

ನಿರುದ್ಧಾ ರಾವಣೇನಾಹಮಲ್ಪವೀರ್ಯೇಣ ರಕ್ಷಸಾ ।

ಸಮರ್ಥಃ ಖಲು ಮೇ ಭರ್ತಾ ರಾವಣಂ ಹನ್ತುಮಾಹವೇ ॥ 15 ॥

ವಿರಾಧೋ ದಣ್ಡಕಾರಣ್ಯೇ ಯೇನ ರಾಕ್ಷಸಪುಙ್ಗವಃ ।

ರಣೇ ರಾಮೇಣ ನಿಹತಸ್ಸ ಮಾಂ ಕಿಂ ನಾಭಿಪದ್ಯತೇ ॥ 16 ॥

ಕಾಮಂ ಮಧ್ಯೇ ಸಮುದ್ರಸ್ಯ ಲಙ್ಕೇಯಂ ದುಷ್ಪ್ರಧರ್ಷಣಾ ।

ನ ತು ರಾಘವಬಾಣಾನಾಂ ಗತಿರೋಧೋ ಭವಿಷ್ಯತಿ ॥ 17 ॥

ಕಿನ್ನು ತತ್ಕಾರಣಂ ಯೇನ ರಾಮೋ ದೃಢಪರಾಕ್ರಮಃ ।

ರಕ್ಷಸಾಪಹೃತಾಂ ಭಾರ್ಯಾಮಿಷ್ಟಾಂ ನಾಭ್ಯವಪದ್ಯತೇ ॥ 18 ॥

ಇಹಸ್ಥಾಂ ಮಾಂ ನ ಜಾನೀತೇ ಶಙ್ಕೇ ಲಕ್ಷ್ಮಣಪೂರ್ವಜಃ ।

ಜಾನನ್ನಪಿ ಹಿ ತೇಜಸ್ವೀ ಧರ್ಷಣಂ ಮರ್ಷಯಿಷ್ಯತಿ ॥ 19 ॥

ಹೃತೇತಿ ಯೋಽಧಿಗತ್ವಾ ಮಾಂ ರಾಘವಾಯ ನಿವೇದಯೇತ್ ।

ಗೃಧ್ರರಾಜೋಽಪಿ ಸ ರಣೇ ರಾವಣೇನ ನಿಪಾತಿತಃ ॥ 20 ॥

ಕೃತಂ ಕರ್ಮ ಮಹತ್ತೇನ ಮಾಂ ತಥಾಽಭ್ಯವಪದ್ಯತಾ ।

ತಿಷ್ಠತಾ ರಾವಣದ್ವನ್ದ್ವೇ ವೃದ್ಧೇನಾಪಿ ಜಟಾಯುಷಾ ॥ 21 ॥

ಯದಿ ಮಾಮಿಹ ಜಾನೀಯಾದ್ವರ್ತಮಾನಾಂ ಸ ರಾಘವಃ ।

ಅದ್ಯ ಬಾಣೈರಭಿಕ್ರುದ್ಧಃ ಕುರ್ಯಾಲ್ಲೋಕಮರಾಕ್ಷಸಮ್ ॥ 22 ॥

ವಿಧಮೇಚ್ಚ ಪುರೀಂ ಲಙ್ಕಾಂ ಶೋಷಯೇಚ್ಚ ಮಹೋದಧಿಮ್ ।

ರಾವಣಸ್ಯ ಚ ನೀಚಸ್ಯ ಕೀರ್ತಿಂ ನಾಮ ಚ ನಾಶಯೇತ್ ॥ 23 ॥

ತತೋ ನಿಹತನಾಥಾನಾಂ ರಾಕ್ಷಸೀನಾಂ ಗೃಹೇ ಗೃಹೇ ।

ಯಥಾಹಮೇವಂ ರುದತೀ ತಥಾ ಭೂಯೋ ನ ಸಂಶಯಃ ॥ 24 ॥

ಅನ್ವಿಷ್ಯ ರಕ್ಷಸಾಂ ಲಙ್ಕಾಂ ಕುರ್ಯಾದ್ರಾಮಸ್ಸಲಕ್ಷ್ಮಣಃ ।

ನ ಹಿ ತಾಭ್ಯಾಂ ರಿಪುರ್ದೃಷ್ಟೋ ಮುಹೂರ್ತಮಪಿ ಜೀವತಿ ॥ 25 ॥

ಚಿತಾಧೂಮಾಕುಲಪಥಾ ಗೃಧ್ರಮಣ್ಡಲಸಙ್ಕುಲಾ ।

ಅಚಿರೇಣ ತು ಲಙ್ಕೇಯಂ ಶ್ಮಶಾನಸದೃಶೀ ಭವೇತ್ ॥ 26 ॥

ಅಚಿರೇಣೈವ ಕಾಲೇನ ಪ್ರಾಪ್ಸ್ಯಾಮ್ಯೇವ ಮನೋರಥಮ್ ।

ದುಷ್ಪ್ರಸ್ಥಾನೋಽಯಾಮಾಖ್ಯಾತಿ ಸರ್ವೇಷಾಂ ವೋ ವಿಪರ್ಯಯಮ್ ॥ 27 ॥

ಯಾದೃಶಾನೀಹ ದೃಶ್ಯನ್ತೇ ಲಙ್ಕಾಯಾಮಶುಭಾನಿ ವೈ ।

ಅಚಿರೇಣೈವ ಕಾಲೇನ ಭವಿಷ್ಯತಿ ಹತಪ್ರಭಾ ॥ 28 ॥

ನೂನಂ ಲಙ್ಕಾ ಹತೇ ಪಾಪೇ ರಾವಣೇ ರಾಕ್ಷಸಾಧಮೇ ।

ಶೋಷಂ ಯಾಸ್ಯತಿ ದುರ್ಧರ್ಷಾ ಪ್ರಮದಾ ವಿಧವಾ ಯಥಾ ॥ 29 ॥

ಪುಣ್ಯೋತ್ಸವಸಮುತ್ಥಾ ಚ ನಷ್ಟಭರ್ತ್ರೀ ಸರಾಕ್ಷಸೀ ।

ಭವಿಷ್ಯತಿ ಪುರೀ ಲಙ್ಕಾ ನಷ್ಟಭರ್ತ್ರೀ ಯಥಾಙ್ಗನಾ ॥ 30 ॥

ನೂನಂ ರಾಕ್ಷಸಕನ್ಯಾನಾಂ ರುದನ್ತೀನಾಂ ಗೃಹೇ ಗೃಹೇ ।

ಶ್ರೋಷ್ಯಾಮಿ ನಚಿರಾದೇವ ದುಃಖಾರ್ತಾನಾಮಿಹ ಧ್ವನಿಮ್ ॥ 31 ॥

ಸಾನ್ಥಕಾರಾ ಹತದ್ಯೋತಾ ಹತರಾಕ್ಷಸಪುಙ್ಗವಾ ।

ಭವಿಷ್ಯತಿ ಪುರೀ ಲಙ್ಕಾ ನಿರ್ದಗ್ಧಾ ರಾಮಸಾಯಕೈಃ ॥ 32 ॥

ಯದಿ ನಾಮ ಸ ಶೂರೋ ಮಾಂ ರಾಮೋ ರಕ್ತಾನ್ತಲೋಚನಃ ।

ಜಾನೀಯಾದ್ವರ್ತಮಾನಾಂ ಹಿ ರಾವಣಸ್ಯ ನಿವೇಶನೇ ॥ 33 ॥

ಅನೇನ ತು ನೃಶಂಸೇನ ರಾವಣೇನಾಧಮೇನ ಮೇ ।

ಸಮಯೋ ಯಸ್ತು ನಿರ್ದಿಷ್ಟಸ್ತಸ್ಯ ಕಾಲೋಽಯಮಾಗತಃ ॥ 34 ॥

ಸ ಚ ಮೇ ವಿಹಿತೋ ಮೃತ್ಯುರಸ್ಮಿನ್ ದುಷ್ಟೇ ನ ವರ್ತತೇ ।

ಅಕಾರ್ಯಂ ಯೇ ನ ಜಾನನ್ತಿ ನೈರೃತಾಃ ಪಾಪಕಾರಿಣಃ ॥ 35 ॥

ಅಧರ್ಮಾತ್ತು ಮಹೋತ್ಪಾತೋ ಭವಿಷ್ಯತಿ ಹಿ ಸಾಮ್ಪ್ರತಮ್ ।

ನೈತೇ ಧರ್ಮಂ ವಿಜಾನನ್ತಿ ರಾಕ್ಷಸಾಃ ಪಿಶಿತಾಶನಾಃ ॥ 36 ॥

ಧ್ರುವಂ ಮಾಂ ಪ್ರಾತರಾಶಾರ್ಥೇ ರಾಕ್ಷಸಃ ಕಲ್ಪಯಿಷ್ಯತಿ ।

ಸಾಹಂ ಕಥಂ ಕರಿಷ್ಯಾಮಿ ತಂ ವಿನಾ ಪ್ರಿಯದರ್ಶನಮ್ ॥ 37 ॥

ಕ್ಷಿಪ್ರಂ ವೈವಸ್ವತಂ ದೇವಂ ಪಶ್ಯೇಯಂ ಪತಿನಾ ವಿನಾ ।

ನಾಜಾನಾಜ್ಜೀವತೀಂ ರಾಮಸ್ಸ ಮಾಂ ಲಕ್ಷ್ಮಣಪೂರ್ವಜಃ ॥ 38 ॥

ಜಾನನ್ತೌ ತೌ ನ ಕುರ್ಯಾತಾಂ ನೋರ್ಯ್ವಾಂ ಹಿ ಮಮ ಮಾರ್ಗಣಮ್ ।

ನೂನಂ ಮಮೈವ ಶೋಕೇನ ಸ ವೀರೋ ಲಕ್ಷ್ಮಣಾಗ್ರಜಃ ॥ 39 ॥

ದೇವಲೋಕಮಿತೋ ಯಾತಸ್ತ್ಯಕ್ತ್ವಾ ದೇಹಂ ಮಹೀತಲೇ ।

ಧನ್ಯಾ ದೇವಾಸ್ಸಗನ್ಧರ್ವಾಃ ಸಿದ್ಧಾಶ್ಚ ಪರಮರ್ಷಯಃ ॥ 40 ॥

ಮಮ ಪಶ್ಯನ್ತಿ ಯೇ ನಾಥಂ ರಾಮಂ ರಾಜೀವಲೋಚನಮ್ ।

ಅಥವಾ ನ ಹಿ ತಸ್ಯಾರ್ಥೋ ಧರ್ಮಕಾಮಸ್ಯ ಧೀಮತಃ ॥ 41 ॥

ಮಯಾ ರಾಮಸ್ಯ ರಾಜರ್ಷೇರ್ಭಾರ್ಯಯಾ ಪರಮಾತ್ಮನಃ ।

ದೃಶ್ಯಮಾನೇ ಭವೇತ್ಪ್ರೀತಿ ಸ್ಸೌಹೃದಂ ನಾಸ್ತ್ಯಪಶ್ಯತಃ ॥ 42 ॥

ನಾಶಯನ್ತಿ ಕೃತಘ್ನಾಸ್ತು ನ ರಾಮೋ ನಾಶಯಿಷ್ಯತಿ ।

ಕಿಂ ನು ಮೇ ನ ಗುಣಾಃ ಕೇಚಿತ್ಕಿಂ ವಾ ಭಾಗ್ಯಕ್ಷಯೋ ಮಮ ॥ 43 ॥

ಯಾಹಂ ಸೀದಾಮಿ ರಾಮೇಣ ಹೀನಾ ಮುಖ್ಯೇನ ಭಾಮಿನೀ ।

ಶ್ರೇಯೋ ಮೇ ಜೀವಿತಾನ್ಮರ್ತುಂ ವಿಹೀನಾಯಾ ಮಹಾತ್ಮನಃ ॥ 44 ॥

ರಾಮಾದಕ್ಲಿಷ್ಟಚಾರಿತ್ರಾಚ್ಛೂರಾಚ್ಛತ್ರುನಿಬರ್ಹಣಾತ್ ।

ಅಥವಾ ನ್ಯಸ್ತಶತ್ರೌ ತೌ ವನೇ ಮೂಲಫಲಾಶಿನೌ ॥ 45 ॥

ಭ್ರಾತರೌ ಹಿ ನರಶ್ರೇಷ್ಠೌ ಸಂವೃತ್ತೌ ವನಗೋಚರೌ ।

ಅಥವಾ ರಾಕ್ಷಸೇನ್ದ್ರೇಣ ರಾವಣೇನ ದುರಾತ್ಮನಾ ॥ 46 ॥

ಛದ್ಮನಾ ಘಾತಿತೌ ಶೂರೌ ಭ್ರಾತರೌ ರಾಮಲಕ್ಷ್ಮಣೌ ।

ಸಾಽಹಮೇವಙ್ಗತೇ ಕಾಲೇ ಮರ್ತುಮಿಚ್ಛಾಮಿ ಸರ್ವಥಾ ॥ 47 ॥

ನ ಚ ಮೇ ವಿಹಿತೋ ಮೃತ್ಯುರಸ್ಮಿನ್ ದುಃಖೇಽಪಿ ವರ್ತತೇ ।

ಧನ್ಯಾಃ ಖಲು ಮಹಾತ್ಮಾನೋ ಮುನಯಸ್ತ್ಯಕ್ತಕಿಲ್ಬಿಷಾಃ ॥ 48 ॥

ಜಿತಾತ್ಮನೋ ಮಹಾಭಾಗಾ ಯೇಷಾಂ ನ ಸ್ತಃ ಪ್ರಿಯಾಪ್ರಿಯೇ ।

ಪ್ರಿಯಾನ್ನ ಸಮ್ಭವೇದ್ದುಃಖಮಪ್ರಿಯಾದಧಿಕಂ ಭಯಮ್ ॥ 49 ॥

ತಾಭ್ಯಾಂ ಹಿ ಯೇ ವಿಯುಜ್ಯನ್ತೇ ನಮಸ್ತೇಷಾಂ ಮಹಾತ್ಮನಾಮ್ ।

ಸಾಹಂ ತ್ಯಕ್ತಾ ಪ್ರಿಯಾರ್ಹೇಣ ರಾಮೇಣ ವಿದಿತಾತ್ಮನಾ ॥ 50 ॥

ಇತ್ಯಾರ್ಷೇ ಶ್ರೀಮದ್ರಾಮಾಯಣೇ ವಾಲ್ಮೀಕೀಯ ಆದಿಕಾವ್ಯೇ ಸುನ್ದರಕಾಣ್ಡೇ ಷಡ್ವಿಂಶಸ್ಸರ್ಗಃ ॥

Roman (IAST) Transliteration

śrīmadvālmīkīya rāmāyaṇe sundarakāṇḍam |

atha ṣaḍviṃśassargaḥ |

prasaktāśrumukhītyavaṃ bruvantī janakātmajā |

ādhogatamukhī bālā vilaptumupacakrame || 1 ||

unmatteva pramatteva bhrāntacitteva śocatī |

upāvṛttā kiśorīva viveṣṭantī mahītale || 2 ||

rāghavasya pramattasya rakṣasā kāmarūpiṇā |

rāvaṇena pramathyāhamānītā krośatī balāt || 3 ||

rākṣasīvaśamāpannā bhartsyamānā sudāruṇam |

cintayantī suduḥkhārtā nāhaṃ jīvitumutsuhe || 4 ||

na hi me jīvitenārtho naivārtherna ca bhūṣaṇaiḥ |

vasantyā rākṣasīmadhye vinā rāmaṃ mahāratham || 5 ||

aśmasāramidaṃ nūnamathavāpyajarāmaram |

hṛdayaṃ mama yenedaṃ na duḥkhenāvaśīryate || 6 ||

dhiṅmāmanāryāmasatīṃ yāhaṃ tenā vinā kṛtā |

muhūrtamapi rakṣāmi jīvitaṃ pāpajīvitā || 7 ||

kā ca me jīvite śraddhā sukhe vā taṃ priyaṃ vinā |

bhartāraṃ sāgarāntāyā vasudhāyāḥ priyaṃvadam || 8 ||

bhidyatāṃ bhakṣyatāṃ vāpi śarīraṃ visṛjāmyaham |

na cāpyahaṃ ciraṃ duḥkhaṃ saheyaṃ priyavarjitā || 9 ||

caraṇenāpi savyena na spṛśeyaṃ niśācaram |

rāvaṇaṃ kiṃ punarahaṃ kāmameyaṃ vigarhitam || 10 ||

pratyākhyātaṃ na jānāti nātmānaṃ nātmanaḥ kulam |

yo nṛśaṃsasvabhāvena māṃ prārthayitumicchati || 11 ||

chinnā bhinnā vibhaktā vā dīptevāgnau pradīpitā |

rāvaṇaṃ nopatiṣṭheyaṃ kiṃ pralāpena vaściram || 12 ||

khyātaḥ prājñaḥ kṛtajñaśca sānukrośaśca rāghavaḥ |

sadvṛtto niranukrośaśśaṅke madbhāgyasaṅkṣayāt || 13 ||

rākṣasānāṃ sahasrāṇi janasthāne caturdaśa |

yenaikena nirastāni sa māṃ kiṃ nābhipadyate || 14 ||

niruddhā rāvaṇenāhamalpavīryeṇa rakṣasā |

samarthaḥ khalu me bhartā rāvaṇaṃ hantumāhave || 15 ||

virādho daṇḍakāraṇye yena rākṣasapuṅgavaḥ |

raṇe rāmeṇa nihatassa māṃ kiṃ nābhipadyate || 16 ||

kāmaṃ madhye samudrasya laṅkeyaṃ duṣpradharṣaṇā |

na tu rāghavabāṇānāṃ gatirodho bhaviṣyati || 17 ||

kinnu tatkāraṇaṃ yena rāmo dṛḍhaparākramaḥ |

rakṣasāpahṛtāṃ bhāryāmiṣṭāṃ nābhyavapadyate || 18 ||

ihasthāṃ māṃ na jānīte śaṅke lakṣmaṇapūrvajaḥ |

jānannapi hi tejasvī dharṣaṇaṃ marṣayiṣyati || 19 ||

hṛteti yo'dhigatvā māṃ rāghavāya nivedayet |

gṛdhrarājo'pi sa raṇe rāvaṇena nipātitaḥ || 20 ||

kṛtaṃ karma mahattena māṃ tathā'bhyavapadyatā |

tiṣṭhatā rāvaṇadvandve vṛddhenāpi jaṭāyuṣā || 21 ||

yadi māmiha jānīyādvartamānāṃ sa rāghavaḥ |

adya bāṇairabhikruddhaḥ kuryāllokamarākṣasam || 22 ||

vidhamecca purīṃ laṅkāṃ śoṣayecca mahodadhim |

rāvaṇasya ca nīcasya kīrtiṃ nāma ca nāśayet || 23 ||

tato nihatanāthānāṃ rākṣasīnāṃ gṛhe gṛhe |

yathāhamevaṃ rudatī tathā bhūyo na saṃśayaḥ || 24 ||

anviṣya rakṣasāṃ laṅkāṃ kuryādrāmassalakṣmaṇaḥ |

na hi tābhyāṃ ripurdṛṣṭo muhūrtamapi jīvati || 25 ||

citādhūmākulapathā gṛdhramaṇḍalasaṅkulā |

acireṇa tu laṅkeyaṃ śmaśānasadṛśī bhavet || 26 ||

acireṇaiva kālena prāpsyāmyeva manoratham |

duṣprasthāno'yāmākhyāti sarveṣāṃ vo viparyayam || 27 ||

yādṛśānīha dṛśyante laṅkāyāmaśubhāni vai |

acireṇaiva kālena bhaviṣyati hataprabhā || 28 ||

nūnaṃ laṅkā hate pāpe rāvaṇe rākṣasādhame |

śoṣaṃ yāsyati durdharṣā pramadā vidhavā yathā || 29 ||

puṇyotsavasamutthā ca naṣṭabhartrī sarākṣasī |

bhaviṣyati purī laṅkā naṣṭabhartrī yathāṅganā || 30 ||

nūnaṃ rākṣasakanyānāṃ rudantīnāṃ gṛhe gṛhe |

śroṣyāmi nacirādeva duḥkhārtānāmiha dhvanim || 31 ||

sānthakārā hatadyotā hatarākṣasapuṅgavā |

bhaviṣyati purī laṅkā nirdagdhā rāmasāyakaiḥ || 32 ||

yadi nāma sa śūro māṃ rāmo raktāntalocanaḥ |

jānīyādvartamānāṃ hi rāvaṇasya niveśane || 33 ||

anena tu nṛśaṃsena rāvaṇenādhamena me |

samayo yastu nirdiṣṭastasya kālo'yamāgataḥ || 34 ||

sa ca me vihito mṛtyurasmin duṣṭe na vartate |

akāryaṃ ye na jānanti nairṛtāḥ pāpakāriṇaḥ || 35 ||

adharmāttu mahotpāto bhaviṣyati hi sāmpratam |

naite dharmaṃ vijānanti rākṣasāḥ piśitāśanāḥ || 36 ||

dhruvaṃ māṃ prātarāśārthe rākṣasaḥ kalpayiṣyati |

sāhaṃ kathaṃ kariṣyāmi taṃ vinā priyadarśanam || 37 ||

kṣipraṃ vaivasvataṃ devaṃ paśyeyaṃ patinā vinā |

nājānājjīvatīṃ rāmassa māṃ lakṣmaṇapūrvajaḥ || 38 ||

jānantau tau na kuryātāṃ noryvāṃ hi mama mārgaṇam |

nūnaṃ mamaiva śokena sa vīro lakṣmaṇāgrajaḥ || 39 ||

devalokamito yātastyaktvā dehaṃ mahītale |

dhanyā devāssagandharvāḥ siddhāśca paramarṣayaḥ || 40 ||

mama paśyanti ye nāthaṃ rāmaṃ rājīvalocanam |

athavā na hi tasyārtho dharmakāmasya dhīmataḥ || 41 ||

mayā rāmasya rājarṣerbhāryayā paramātmanaḥ |

dṛśyamāne bhavetprīti ssauhṛdaṃ nāstyapaśyataḥ || 42 ||

nāśayanti kṛtaghnāstu na rāmo nāśayiṣyati |

kiṃ nu me na guṇāḥ kecitkiṃ vā bhāgyakṣayo mama || 43 ||

yāhaṃ sīdāmi rāmeṇa hīnā mukhyena bhāminī |

śreyo me jīvitānmartuṃ vihīnāyā mahātmanaḥ || 44 ||

rāmādakliṣṭacāritrācchūrācchatrunibarhaṇāt |

athavā nyastaśatrau tau vane mūlaphalāśinau || 45 ||

bhrātarau hi naraśreṣṭhau saṃvṛttau vanagocarau |

athavā rākṣasendreṇa rāvaṇena durātmanā || 46 ||

chadmanā ghātitau śūrau bhrātarau rāmalakṣmaṇau |

sā'hamevaṅgate kāle martumicchāmi sarvathā || 47 ||

na ca me vihito mṛtyurasmin duḥkhe'pi vartate |

dhanyāḥ khalu mahātmāno munayastyaktakilbiṣāḥ || 48 ||

jitātmano mahābhāgā yeṣāṃ na staḥ priyāpriye |

priyānna sambhavedduḥkhamapriyādadhikaṃ bhayam || 49 ||

tābhyāṃ hi ye viyujyante namasteṣāṃ mahātmanām |

sāhaṃ tyaktā priyārheṇa rāmeṇa viditātmanā || 50 ||

ityārṣe śrīmadrāmāyaṇe vālmīkīya ādikāvye sundarakāṇḍe ṣaḍviṃśassargaḥ ||