4.47 Kishkindhakanda - Saptachatvarimsha Sargah

ॐ

4.47 ಕಿಷ್ಕಿನ್ಧಾಕಾಣ್ಡ - ಸಪ್ತಚತ್ವಾರಿಂಶ ಸರ್ಗಃ

Valmiki Kannada

ಶ್ರೀಮದ್ವಾಲ್ಮೀಕೀಯ ರಾಮಾಯಣೇ ಕಿಷ್ಕಿನ್ಧಾಕಾಣ್ಡಮ್ ।

ಅಥ ಸಪ್ತಚತ್ವಾರಿಂಶಸ್ಸರ್ಗಃ ।

ದರ್ಶನಾರ್ಥಂ ತು ವೈದೇಹ್ಯಾಸ್ಸರ್ವತಃ ಕಪಿಯೂಧಪಾಃ ।

ವ್ಯಾದಿಷ್ಟಾಃ ಕಪಿರಾಜೇನ ಯಥೋಕ್ತಂ ಜಗ್ಮುರಞ್ಜಸಾ ॥ 1 ॥

ಸರಾಂಸಿ ಸರಿತ ಕಾಕ್ಷಾನಾಕಾಶಂ ನಗರಾಣಿ ಚ ।

ನದೀದುರ್ಗಾಂಸ್ತಥಾ ಶೈಲಾನ್ವಿಚಿನ್ವನ್ತಿ ಸಮನ್ತತಃ ॥ 2 ॥

ಸುಗ್ರೀವೇಣ ಸಮಾಖ್ಯಾತಾಸ್ಸರ್ವೇ ವಾನರಯೂಥಪಾಃ ।

ಪ್ರದೇಶಾನ್ಪ್ರವಿಚಿನ್ವನ್ತಿ ಸಶೈಲವನಕಾನನಾನ್ ॥ 3 ॥

ವಿಚಿತ್ಯ ದಿವಸಂ ಸರ್ವೇ ಸೀತಾಧಿಗಮನೇ ಧೃತಾಃ ।

ಸಮಾಯಾನ್ತಿ ಸ್ಮ ಮೇದಿನ್ಯಾಂ ನಿಶಾಕಾಲೇಷು ವಾನರಾಃ ॥ 4 ॥

ಸರ್ವರ್ತುಕಮಾನ್ ದೇಶೇಷು ವಾನಾರಾಸ್ಸಫಲದ್ರುಮಾನ್ ।

ಆಸಾದ್ಯ ರಜನೀಂ ಶಯ್ಯಾಂ ಚಕ್ರುಸ್ಸರ್ವೇಷ್ವಹಸ್ಸು ತೇ ॥ 5 ॥

ತದಹಃ ಪ್ರಥಮಂ ಕೃತ್ವಾ ಮಾಸೇ ಪ್ರಶ್ರವಣಂ ಗತಾಃ ।

ಕಪಿರಾಜೇನ ಸಙ್ಗಮ್ಯ ನಿರಾಶಾಃ ಕಪಿಯೂಧಪಾಃ ॥ 6 ॥

ವಿಚಿತ್ಯ ತು ದಿಶಂ ಪೂರ್ವಾಂ ಯಥೋಕ್ತಾಂ ಸಚಿವೈಸ್ಸಹ ।

ಅದೃಷ್ಟ್ವಾ ವಿನತಸ್ಸೀತಾಮಾಜಗಾಮ ಮಹಾಬಲಃ ॥ 7 ॥

ಉತ್ತರಾಂ ಚ ದಿಶಂ ಸರ್ವಾಂ ವಿಚಿತ್ಯ ಸ ಮಹಾಕಪಿಃ ।

ಆಗತಸ್ಸಹ ಸೈನ್ಯೇನ ವೀರಶ್ಶತವಲಿಸ್ತದಾ ॥ 8 ॥

ಸುಷೇಣಃ ಪಶ್ಚಿಮಾ ಮಾಶಾಂ ವಿಚಿತ್ಯ ಸಹ ವಾನರೈಃ ।

ಸಮೇತ್ಯ ಮಾಸೇ ಸಮ್ಪೂರ್ಣೇ ಸುಗ್ರೀವಮುಪಚಕ್ರಮೇ ॥ 9 ॥

ತಂ ಪ್ರಸ್ರವಣಪೃಷ್ಠಸ್ಥಂ ಸಮಾಸಾದ್ಯಾಭಿವಾದ್ಯ ಚ ।

ಆಸೀನಂ ಸಹ ರಾಮೇಣ ಸುಗ್ರೀವಮಿದಮಬ್ರವೀತ್ ॥ 10 ॥

ವಿಚಿತಾಃ ಪರ್ವತಾಸ್ಸರ್ವೇ ವನಾನಿ ಗಹನಾನಿ ಚ ।

ನಿಮ್ನಗಾಸ್ಸಾಗರಾನ್ತಾಶ್ಚ ಸರ್ವೇ ಜನಪದಾಶ್ಚ ಯೇ ॥ 11 ॥

ಗುಹಾಶ್ಚ ವಿಚಿತಾಸ್ಸರ್ವಾಸ್ತ್ವಯಾ ಯಾಃ ಪರಿಕೀರ್ತಿತಾಃ ।

ವಿಚಿತಾಶ್ಚ ಮಹಾಗುಲ್ಮಾ ಲತಾವಿತತಸನ್ತತಾಃ ॥ 12 ॥

ಗಹನೇಷು ಚ ದೇಶೇಷು ದುರ್ಗೇಷು ವಿಷಮೇಷು ಚ ।

ಸತ್ತ್ವಾನ್ಯತಿಪ್ರಮಾಣಾನಿ ವಿಚಿತಾನಿ ಹತಾನಿ ಚ ॥ 13 ॥

ಯೇ ಚೈವ ಗಹನಾ ದೇಶಾ ವಿಚಿತಾಸ್ತೇ ಪುನಃ ಪುನಃ ।

ಉದಾರಸತ್ತ್ವಾಭಿಜನೋ ಮಹಾತ್ಮಾ ಸ ಮೈಥಿಲೀಂ ದ್ರಕ್ಷ್ಯತಿ ವಾನರೇನ್ದ್ರಃ ।

ದಿಶಂ ತು ಯಾಮೇವ ಗತಾ ತು ಸೀತಾ ತಾಮಾಸ್ಥಿತೋವಾಯುಸುತೋ ಹನೂಮಾನ್ ॥ 14 ॥

ಇತ್ಯಾರ್ಷೇ ಶ್ರೀಮದ್ರಾಮಾಯಣೇ ವಾಲ್ಮೀಕೀಯ ಆದಿಕಾವ್ಯೇ ಕಿಷ್ಕಿನ್ಧಾಕಾಣ್ಡೇ ಸಪ್ತಚತ್ವಾರಿಂಶಸ್ಸರ್ಗಃ ॥

Roman (IAST) Transliteration

śrīmadvālmīkīya rāmāyaṇe kiṣkindhākāṇḍam |

atha saptacatvāriṃśassargaḥ |

darśanārthaṃ tu vaidehyāssarvataḥ kapiyūdhapāḥ |

vyādiṣṭāḥ kapirājena yathoktaṃ jagmurañjasā || 1 ||

sarāṃsi sarita kākṣānākāśaṃ nagarāṇi ca |

nadīdurgāṃstathā śailānvicinvanti samantataḥ || 2 ||

sugrīveṇa samākhyātāssarve vānarayūthapāḥ |

pradeśānpravicinvanti saśailavanakānanān || 3 ||

vicitya divasaṃ sarve sītādhigamane dhṛtāḥ |

samāyānti sma medinyāṃ niśākāleṣu vānarāḥ || 4 ||

sarvartukamān deśeṣu vānārāssaphaladrumān |

āsādya rajanīṃ śayyāṃ cakrussarveṣvahassu te || 5 ||

tadahaḥ prathamaṃ kṛtvā māse praśravaṇaṃ gatāḥ |

kapirājena saṅgamya nirāśāḥ kapiyūdhapāḥ || 6 ||

vicitya tu diśaṃ pūrvāṃ yathoktāṃ sacivaissaha |

adṛṣṭvā vinatassītāmājagāma mahābalaḥ || 7 ||

uttarāṃ ca diśaṃ sarvāṃ vicitya sa mahākapiḥ |

āgatassaha sainyena vīraśśatavalistadā || 8 ||

suṣeṇaḥ paścimā māśāṃ vicitya saha vānaraiḥ |

sametya māse sampūrṇe sugrīvamupacakrame || 9 ||

taṃ prasravaṇapṛṣṭhasthaṃ samāsādyābhivādya ca |

āsīnaṃ saha rāmeṇa sugrīvamidamabravīt || 10 ||

vicitāḥ parvatāssarve vanāni gahanāni ca |

nimnagāssāgarāntāśca sarve janapadāśca ye || 11 ||

guhāśca vicitāssarvāstvayā yāḥ parikīrtitāḥ |

vicitāśca mahāgulmā latāvitatasantatāḥ || 12 ||

gahaneṣu ca deśeṣu durgeṣu viṣameṣu ca |

sattvānyatipramāṇāni vicitāni hatāni ca || 13 ||

ye caiva gahanā deśā vicitāste punaḥ punaḥ |

udārasattvābhijano mahātmā sa maithilīṃ drakṣyati vānarendraḥ |

diśaṃ tu yāmeva gatā tu sītā tāmāsthitovāyusuto hanūmān || 14 ||

ityārṣe śrīmadrāmāyaṇe vālmīkīya ādikāvye kiṣkindhākāṇḍe saptacatvāriṃśassargaḥ ||