1.75 Balakanda - Panchasaptatitama Sargah

ॐ

1.75 ಬಾಲಕಾಣ್ಡ - ಪಞ್ಚಸಪ್ತತಿತಮ ಸರ್ಗಃ

Valmiki Kannada

ಶ್ರೀಮದ್ವಾಲ್ಮೀಕೀಯ ರಾಮಾಯಣೇ ಬಾಲಕಾಣ್ಡಮ್ ।

ಅಥ ಪಞ್ಚಸಪ್ತತಿತಮಸ್ಸರ್ಗಃ ।

ರಾಮ ದಾಶರಥೇ ರಾಮ ವೀರ್ಯಂ ತೇ ಶ್ರೂಯತೇಽದ್ಭುತಮ್ ।

ಧನುಷೋ ಭೇದನಂ ಚೈವ ನಿಖಿಲೇನ ಮಯಾ ಶ್ರುತಮ್ ॥ 1 ॥

ತದದ್ಭುತಮಚಿನ್ತ್ಯಂ ಚ ಭೇದನಂ ಧನುಷಸ್ತ್ವಯಾ ।

ತಚ್ಛ್ರುತ್ವಾಽಹಮನುಪ್ರಾಪ್ತೋ ಧನುರ್ಗೃಹ್ಯಾಪರಂ ಶುಭಮ್ ॥ 2 ॥

ತದಿದಂ ಘೋರಸಙ್ಕಾಶಂ ಜಾಮದಗ್ನ್ಯಂ ಮಹದ್ಧನುಃ ।

ಪೂರಯಸ್ವ ಶರೇಣೈವ ಸ್ವಬಲಂ ದರ್ಶಯಸ್ವ ಚ ॥ 3 ॥

ತದಹಂ ತೇ ಬಲಂ ದೃಷ್ಟ್ವಾ ಧನುಷೋಽಸ್ಯ ಪ್ರಪೂರಣೇ ।

ದ್ವನ್ದ್ವಯುದ್ಧಂ ಪ್ರದಾಸ್ಯಾಮಿ ವೀರ್ಯಶ್ಲಾಘ್ಯಸ್ಯ ರಾಘವ ॥ 4 ॥

ತಸ್ಯ ತದ್ವಚನಂ ಶ್ರುತ್ವಾ ರಾಜಾ ದಶರಥಸ್ತದಾ ।

ವಿಷಣ್ಣವದನೋ ದೀನಃ ಪ್ರಾಞ್ಜಲಿರ್ವಾಕ್ಯಮಬ್ರವೀತ್ ॥ 5 ॥

ಕ್ಷತ್ರರೋಷಾತ್ಪ್ರಶಾನ್ತಸ್ತ್ವಂ ಬ್ರಾಹ್ಮಣಶ್ಚ ಮಹಾಯಶಾಃ ।

ಬಾಲಾನಾಂ ಮಮ ಪುತ್ರಾಣಾಮಭಯಂ ದಾತುಮರ್ಹಸಿ ॥ 6 ॥

ಭಾರ್ಗವಾಣಾಂ ಕುಲೇ ಜಾತಃ ಸ್ವಾಧ್ಯಾಯವ್ರತಶಾಲಿನಾಮ್ ।

ಸಹಾಸ್ರಾಕ್ಷೇ ಪ್ರತಿಜ್ಞಾಯ ಶಸ್ತ್ರಂ ನಿಕ್ಷಿಪ್ತವಾನಸಿ ॥ 7 ॥

ಸ ತ್ವಂ ಧರ್ಮಪರೋ ಭೂತ್ವಾ ಕಾಶ್ಯಪಾಯ ವಸುನ್ಧರಾಮ್ ।

ದತ್ತ್ವಾ ವನಮುಪಾಗಮ್ಯ ಮಹೇನ್ದ್ರಕೃತಕೇತನಃ ॥ 8 ॥

ಮಮ ಸರ್ವವಿನಾಶಾಯ ಸಮ್ಪ್ರಾಪ್ತಸ್ತ್ವಂ ಮಹಾಮುನೇ ।

ನ ಚೈಕಸ್ಮಿನ್ ಹತೇ ರಾಮೇ ಸರ್ವೇ ಜೀವಾಮಹೇ ವಯಮ್ ॥ 9 ॥

ಬ್ರುವತ್ಯೇವಂ ದಶರಥೇ ಜಾಮದಗ್ನ್ಯಃ ಪ್ರತಾಪವಾನ್ ।

ಅನಾದೃತ್ಯೈವ ತದ್ವಾಕ್ಯಂ ರಾಮಮೇವಾಭ್ಯಭಾಷತ ॥ 10 ॥

ಇಮೇ ದ್ವೇ ಧನುಷೀ ಶ್ರೇಷ್ಠೇ ದಿವ್ಯೇ ಲೋಕಾಭಿವಿಶ್ರುತೇ ।

ದೃಢೇ ಬಲವತೀ ಮುಖ್ಯೇ ಸುಕೃತೇ ವಿಶ್ವಕರ್ಮಣಾ ॥ 11 ॥

ಅತಿಸೃಷ್ಟಂ ಸುರೈರೇಕಂ ತ್ರ್ಯಮ್ಬಕಾಯ ಯುಯುತ್ಸವೇ ।

ತ್ರಿಪುರಘ್ನಂ ನರಶ್ರೇಷ್ಠ ಭಗ್ನಂ ಕಾಕುತ್ಸ್ಥ ಯತ್ತ್ವಯಾ ॥ 12 ॥

ಇದಂ ದ್ವಿತೀಯಂ ದುರ್ಧರ್ಷಂ ವಿಷ್ಣೋರ್ದತ್ತಂ ಸುರೋತ್ತಮೈಃ ।

ತದಿದಂ ವೈಷ್ಣವಂ ರಾಮ ಧನುಃ ಪರಮಭಾಸ್ವರಮ್ ।

ಸಮಾನಸಾರಂ ಕಾಕುತ್ಸ್ಥ ರೌದ್ರೇಣ ಧನುಷಾ ತ್ವಿದಮ್ ॥ 13 ॥

ತದಾ ತು ದೇವತಾಸ್ಸರ್ವಾಃ ಪೃಚ್ಛನ್ತಿ ಸ್ಮ ಪಿತಾಮಹಮ್ ।

ಶಿತಿಕಣ್ಠಸ್ಯ ವಿಷ್ಣೋಶ್ಚ ಬಲಾಬಲನಿರೀಕ್ಷಯಾ ॥ 14 ॥

ಅಭಿಪ್ರಾಯಂ ತು ವಿಜ್ಞಾಯ ದೇವತಾನಾಂ ಪಿತಾಮಹಃ ।

ವಿರೋಧಂ ಜನಯಾಮಾಸ ತಯೋ ಸ್ಸತ್ಯವತಾಂ ವರಃ ॥ 15 ॥

ವಿರೋಧೇ ಚ ಮಹದ್ಯುದ್ಧಮಭವದ್ರೋಮಹರ್ಷಣಮ್ ।

ಶಿತಿಕಣ್ಠಸ್ಯ ವಿಷ್ಣೋಶ್ಚ ಪರಸ್ಪರಜಿಗೀಷುಣೋಃ ॥ 16 ॥

ತದಾ ತು ಜೃಮ್ಭಿತಂ ಶೈವಂ ಧನುರ್ಭೀಮಪರಾಕ್ರಮಮ್ ।

ಹುಙ್ಕಾರೇಣ ಮಹಾದೇವ ಸ್ತಮ್ಭಿತೋಽಥ ತ್ರಿಲೋಚನಃ ॥ 17 ॥

ದೇವೈಸ್ತದಾ ಸಮಾಗಮ್ಯ ಸರ್ಷಿಸಘೈ ಸ್ಸಚಾರಣೈಃ ।

ಯಾಚಿತೌ ಪ್ರಶಮಂ ತತ್ರ ಜಗ್ಮತುಸ್ತೌ ಸುರೋತ್ತಮೌ ॥ 18 ॥

ಜೃಮ್ಭಿತಂ ತದ್ಧನುರ್ದ್ರೃಷ್ಟ್ವಾ ಶೈವಂ ವಿಷ್ಣುಪರಾಕ್ರಮೈಃ ।

ಅಧಿಕಂ ಮೇನಿರೇ ವಿಷ್ಣುಂ ದೇವಾ ಸ್ಸರ್ಷಿಗಣಾಸ್ತದಾ ॥ 19 ॥

ಧನೂ ರುದ್ರಸ್ತು ಸಙ್ಕೃದ್ಧೋ ವಿದೇಹೇಷು ಮಹಾಯಶಾಃ ।

ದೇವರಾತಸ್ಯ ರಾಜರ್ಷೇರ್ದದೌ ಹಸ್ತೇ ಸಸಾಯಕಮ್ ॥ 20 ॥

ಇದಂ ಚ ವೈಷ್ಣವಂ ರಾಮ ಧನುಃ ಪರಪುರಞ್ಜಯಮ್ ।

ಋಚೀಕೇ ಭಾರ್ಗವೇ ಪ್ರಾದಾದ್ವಿಷ್ಣುಃ ಸ ನ್ಯಾಸಮುತ್ತಮಮ್ ॥ 21 ॥

ಋಚೀಕಸ್ತು ಮಹಾತೇಜಾಃ ಪುತ್ರಸ್ಯಾಪ್ರತಿಕರ್ಮಣಃ ।

ಪಿತುರ್ಮಮ ದದೌ ದಿವ್ಯಂ ಜಮದಗ್ನೇರ್ಮಹಾತ್ಮನಃ ॥ 22 ॥

ನ್ಯಸ್ತಶಸ್ತ್ರೇ ಪಿತರಿ ಮೇ ತಪೋಬಲಸಮನ್ವಿತೇ ।

ಅರ್ಜುನೋ ವಿದಧೇ ಮೃತ್ಯುಂ ಪ್ರಾಕೃತಾಂ ಬುದ್ಧಿಮಾಸ್ಥಿತಃ ॥ 23 ॥

ವಧಮಪ್ರತಿರೂಪಂ ತು ಪಿತು ಶ್ಶೃತ್ವಾ ಸುದಾರುಣಮ್ ।

ಕ್ಷತ್ರಮುತ್ಸಾದಯನ್ರೋಷಾಜ್ಜಾತಂ ಜಾತಮನೇಕಶಃ ॥ 24 ॥

ಪೃಥಿವೀಂ ಚಾಖಿಲಾಂ ಪ್ರಾಪ್ಯ ಕಾಶ್ಯಪಾಯ ಮಹಾತ್ಮನೇ ।

ಯಜ್ಞಸ್ಯಾನ್ತೇ ತದಾ ರಾಮ ದಕ್ಷಿಣಾಂ ಪುಣ್ಯಕರ್ಮಣೇ ।

ದತ್ತ್ವಾ ಮಹೇನ್ದ್ರನಿಲಯಸ್ತಪೋಬಲಸಮನ್ವಿತಃ ॥ 25 ॥

ಅದ್ಯತೂತ್ತಮವೀರ್ಯೇಣ ತ್ವಯಾ ರಾಮ ಮಹಾಬಲ ।

ಶ್ರುತವಾನ್ ಧನುಷೋ ಭೇದಂ ತತೋಽಹಂ ದ್ರುತಮಾಗತಃ ॥ 26 ॥

ತದಿದಂ ವೈಷ್ಣವಂ ರಾಮ ಪಿತೃಪೈತಾಮಹಂ ಮಹತ್ ।

ಕ್ಷತ್ರಧರ್ಮಂ ಪುರಸ್ಕೃತ್ಯ ಗೃಹ್ಣೀಷ್ವ ಧನುರುತ್ತಮಮ್ ॥ 27 ॥

ಯೋಜಯಸ್ವ ಧನುಶ್ಶ್ರೇಷ್ಠೇ ಶರಂ ಪರಪುರಞ್ಜಯಮ್ ।

ಯದಿ ಶಕ್ನೋಷಿ ಕಾಕುತ್ಸ್ಥ ದ್ವನ್ದ್ವಂ ದಾಸ್ಯಾಮಿ ತೇ ತತಃ ॥ 28 ॥

ಇತ್ಯಾರ್ಷೇ ಶ್ರೀಮದ್ರಾಮಾಯಣೇ ವಾಲ್ಮೀಕೀಯ ಆದಿಕಾವ್ಯೇ ಬಾಲಕಾಣ್ಡೇ ಪಞ್ಚಸಪ್ತತಿತಮಸ್ಸರ್ಗಃ ॥

Roman (IAST) Transliteration

śrīmadvālmīkīya rāmāyaṇe bālakāṇḍam |

atha pañcasaptatitamassargaḥ |

rāma dāśarathe rāma vīryaṃ te śrūyate'dbhutam |

dhanuṣo bhedanaṃ caiva nikhilena mayā śrutam || 1 ||

tadadbhutamacintyaṃ ca bhedanaṃ dhanuṣastvayā |

tacchrutvā'hamanuprāpto dhanurgṛhyāparaṃ śubham || 2 ||

tadidaṃ ghorasaṅkāśaṃ jāmadagnyaṃ mahaddhanuḥ |

pūrayasva śareṇaiva svabalaṃ darśayasva ca || 3 ||

tadahaṃ te balaṃ dṛṣṭvā dhanuṣo'sya prapūraṇe |

dvandvayuddhaṃ pradāsyāmi vīryaślāghyasya rāghava || 4 ||

tasya tadvacanaṃ śrutvā rājā daśarathastadā |

viṣaṇṇavadano dīnaḥ prāñjalirvākyamabravīt || 5 ||

kṣatraroṣātpraśāntastvaṃ brāhmaṇaśca mahāyaśāḥ |

bālānāṃ mama putrāṇāmabhayaṃ dātumarhasi || 6 ||

bhārgavāṇāṃ kule jātaḥ svādhyāyavrataśālinām |

sahāsrākṣe pratijñāya śastraṃ nikṣiptavānasi || 7 ||

sa tvaṃ dharmaparo bhūtvā kāśyapāya vasundharām |

dattvā vanamupāgamya mahendrakṛtaketanaḥ || 8 ||

mama sarvavināśāya samprāptastvaṃ mahāmune |

na caikasmin hate rāme sarve jīvāmahe vayam || 9 ||

bruvatyevaṃ daśarathe jāmadagnyaḥ pratāpavān |

anādṛtyaiva tadvākyaṃ rāmamevābhyabhāṣata || 10 ||

ime dve dhanuṣī śreṣṭhe divye lokābhiviśrute |

dṛḍhe balavatī mukhye sukṛte viśvakarmaṇā || 11 ||

atisṛṣṭaṃ surairekaṃ tryambakāya yuyutsave |

tripuraghnaṃ naraśreṣṭha bhagnaṃ kākutstha yattvayā || 12 ||

idaṃ dvitīyaṃ durdharṣaṃ viṣṇordattaṃ surottamaiḥ |

tadidaṃ vaiṣṇavaṃ rāma dhanuḥ paramabhāsvaram |

samānasāraṃ kākutstha raudreṇa dhanuṣā tvidam || 13 ||

tadā tu devatāssarvāḥ pṛcchanti sma pitāmaham |

śitikaṇṭhasya viṣṇośca balābalanirīkṣayā || 14 ||

abhiprāyaṃ tu vijñāya devatānāṃ pitāmahaḥ |

virodhaṃ janayāmāsa tayo ssatyavatāṃ varaḥ || 15 ||

virodhe ca mahadyuddhamabhavadromaharṣaṇam |

śitikaṇṭhasya viṣṇośca parasparajigīṣuṇoḥ || 16 ||

tadā tu jṛmbhitaṃ śaivaṃ dhanurbhīmaparākramam |

huṅkāreṇa mahādeva stambhito'tha trilocanaḥ || 17 ||

devaistadā samāgamya sarṣisaghai ssacāraṇaiḥ |

yācitau praśamaṃ tatra jagmatustau surottamau || 18 ||

jṛmbhitaṃ taddhanurdrṛṣṭvā śaivaṃ viṣṇuparākramaiḥ |

adhikaṃ menire viṣṇuṃ devā ssarṣigaṇāstadā || 19 ||

dhanū rudrastu saṅkṛddho videheṣu mahāyaśāḥ |

devarātasya rājarṣerdadau haste sasāyakam || 20 ||

idaṃ ca vaiṣṇavaṃ rāma dhanuḥ parapurañjayam |

ṛcīke bhārgave prādādviṣṇuḥ sa nyāsamuttamam || 21 ||

ṛcīkastu mahātejāḥ putrasyāpratikarmaṇaḥ |

piturmama dadau divyaṃ jamadagnermahātmanaḥ || 22 ||

nyastaśastre pitari me tapobalasamanvite |

arjuno vidadhe mṛtyuṃ prākṛtāṃ buddhimāsthitaḥ || 23 ||

vadhamapratirūpaṃ tu pitu śśṛtvā sudāruṇam |

kṣatramutsādayanroṣājjātaṃ jātamanekaśaḥ || 24 ||

pṛthivīṃ cākhilāṃ prāpya kāśyapāya mahātmane |

yajñasyānte tadā rāma dakṣiṇāṃ puṇyakarmaṇe |

dattvā mahendranilayastapobalasamanvitaḥ || 25 ||

adyatūttamavīryeṇa tvayā rāma mahābala |

śrutavān dhanuṣo bhedaṃ tato'haṃ drutamāgataḥ || 26 ||

tadidaṃ vaiṣṇavaṃ rāma pitṛpaitāmahaṃ mahat |

kṣatradharmaṃ puraskṛtya gṛhṇīṣva dhanuruttamam || 27 ||

yojayasva dhanuśśreṣṭhe śaraṃ parapurañjayam |

yadi śaknoṣi kākutstha dvandvaṃ dāsyāmi te tataḥ || 28 ||

ityārṣe śrīmadrāmāyaṇe vālmīkīya ādikāvye bālakāṇḍe pañcasaptatitamassargaḥ ||