1.45 Balakanda - Panchachatvarimsha Sargah

ॐ

1.45 ಬಾಲಕಾಣ್ಡ - ಪಞ್ಚಚತ್ವಾರಿಂಶ ಸರ್ಗಃ

Valmiki Kannada

ಶ್ರೀಮದ್ವಾಲ್ಮೀಕೀಯ ರಾಮಾಯಣೇ ಬಾಲಕಾಣ್ಡಮ್ ।

ಅಥ ಪಞ್ಚಚತ್ವಾರಿಂಶಸ್ಸರ್ಗಃ ।

ವಿಶ್ವಾಮಿತ್ರವಚಶ್ಶ್ರುತ್ವಾ ರಾಘವ ಸ್ಸಹಲಕ್ಷ್ಮಣಃ ।

ವಿಸ್ಮಯಂ ಪರಮಂ ಗತ್ವಾ ವಿಶ್ವಾಮಿತ್ರಮಥಾಬ್ರವೀತ್ ॥ 1 ॥

ಅತ್ಯದ್ಭುತಮಿದಂ ಬ್ರಹ್ಮನ್ ಕಥಿತಂ ಪರಮಂ ತ್ವಯಾ ।

ಗಙ್ಗಾವತರಣಂ ಪುಣ್ಯಂ ಸಾಗರಸ್ಯಾಪಿ ಪೂರಣಮ್ ॥ 2 ॥

ತಸ್ಯ ಸಾ ಶರ್ವರೀ ಸರ್ವಾ ಸಹ ಸೌಮಿತ್ರಿಣಾ ತದಾ ।

ಜಗಾಮ ಚಿನ್ತಯಾನಸ್ಯ ವಿಶ್ವಾಮಿತ್ರಕಥಾಂ ಶುಭಾಮ್ ॥ 3 ॥

ತತಃ ಪ್ರಭಾತೇ ವಿಮಲೇ ವಿಶ್ವಾಮಿತ್ರಂ ಮಹಾಮುನಿಮ್ ।

ಉವಾಚ ರಾಘವೋ ವಾಕ್ಯಂ ಕೃತಾಹ್ನಿಕಮರಿನ್ದಮಃ ॥ 4 ॥

ಗತಾ ಭಗವತೀ ರಾತ್ರಿಶ್ಶ್ರೋತವ್ಯಂ ಪರಮಂ ಶ್ರುತಮ್ ।

ಕ್ಷಣಭೂತೇವ ನೌ ರಾತ್ರಿ ಸ್ಸಮ್ವೃತ್ತೇಯಂ ಮಹಾತಪಃ ॥ 5 ॥

ಇಮಾಂ ಚಿನ್ತಯತಸ್ಸರ್ವಾಂ ನಿಖಿಲೇನ ಕಥಾಂ ತವ ।

ತರಾಮ ಸರಿತಾಂ ಶ್ರೇಷ್ಠಾಂ ಪುಣ್ಯಾಂ ತ್ರಿಪಥಗಾಂ ನದೀಮ್ ॥ 6 ॥

ನೌರೇಷಾ ಹಿ ಸುಖಾಸ್ತೀರ್ಣಾ ಋಷೀಣಾಂ ಪುಣ್ಯಕರ್ಮಣಾಮ್ ।

ಭಗವನ್ತಮಿಹ ಪ್ರಾಪ್ತಂ ಜ್ಞಾತ್ವಾ ತ್ವರಿತಮಾಗತಾ ॥ 7 ॥

ತಸ್ಯ ತದ್ವಚನಂ ಶ್ರುತ್ವಾ ರಾಘವಸ್ಯ ಮಹಾತ್ಮನಃ ।

ಸನ್ತಾರಂ ಕಾರಯಾಮಾಸ ಸರ್ಷಿಸಙ್ಘ ಸ್ಸರಾಘವಃ ॥ 8 ॥

ಉತ್ತರಂ ತೀರಮಾಸಾದ್ಯ ಸಮ್ಪೂಜ್ಯರ್ಷಿಗಣಂ ತದಾ ।

ಗಙ್ಗಾಕೂಲೇ ನಿವಿಷ್ಟಾಸ್ತೇ ವಿಶಾಲಾಂ ದದೃಶುಃ ಪುರೀಮ್ ॥ 9 ॥

ತತೋ ಮುನಿವರಸ್ತೂರ್ಣಂ ಜಗಾಮ ಸಹ ರಾಘವಃ ।

ವಿಶಾಲಾಂ ನಗರೀಂ ರಮ್ಯಾಂ ದಿವ್ಯಾಂ ಸ್ವರ್ಗೋಪಮಾಂ ತದಾ ॥ 10 ॥

ಅಥ ರಾಮೋ ಮಹಾಪ್ರಾಜ್ಞೋ ವಿಶ್ವಾಮಿತ್ರಂ ಮಹಾಮುನಿಮ್ ।

ಪಪ್ರಚ್ಛ ಪ್ರಾಞ್ಜಲಿರ್ಭೂತ್ವಾ ವಿಶಾಲಾಮುತ್ತಮಾಂ ಪುರೀಮ್ ॥ 11 ॥

ಕತರೋ ರಾಜವಂಶೋಽಯಂ ವಿಶಾಲಾಯಾಂ ಮಹಾಮುನೇ ।

ಶ್ರೋತುಮಿಚ್ಛಾಮಿ ಭದ್ರಂ ತೇ ಪರಂ ಕೌತೂಹಲಂ ಹಿ ಮೇ ॥ 12 ॥

ತಸ್ಯ ತದ್ವಚನಂ ಶ್ರುತ್ವಾ ರಾಮಸ್ಯ ಮುನಿಪುಙ್ಗವಃ ।

ಆಖ್ಯಾತುಂ ತತ್ಸಮಾರೇಭೇ ವಿಶಾಲಸ್ಯ ಪುರಾತನಮ್ ॥ 13 ॥

ಶ್ರೂಯತಾಂ ರಾಮ ಶಕ್ರಸ್ಯ ಕಥಾಂ ಕಥಯತಶ್ಶುಭಾಮ್ ।

ಅಸ್ಮಿನ್ ದೇಶೇ ತು ಯದ್ವೃತ್ತಂ ತದಪಿ ಶೃಣು ರಾಘವ ॥ 14 ॥

ಪೂರ್ವಂ ಕೃತಯುಗೇ ರಾಮ ದಿತೇಃ ಪುತ್ರಾ ಮಹಾಬಲಾಃ ।

ಅದಿತೇಶ್ಚ ಮಹಾಭಾಗ ವೀರ್ಯವನ್ತಸ್ಸುಧಾರ್ಮಿಕಾಃ ॥ 15 ॥

ತತಸ್ತೇಷಾಂ ನರಶ್ರೇಷ್ಠ ಬುದ್ಧಿರಾಸೀನ್ಮಹಾತ್ಮನಾಮ್ ।

ಅಮರಾ ಅಜರಾಶ್ಚೈವ ಕಥಂ ಸ್ಯಾಮ ನಿರಾಮಯಾಃ ॥ 16 ॥

ತೇಷಾಂ ಚಿನ್ತಯತಾಂ ರಾಮ ಬುದ್ಧಿರಾಸೀನ್ಮಹಾತ್ಮನಾಮ್ ।

ಕ್ಷೀರೋದಮಥನಂ ಕೃತ್ವಾ ರಸಂ ಪ್ರಾಪ್ಸ್ಯಾಮ ತತ್ರ ವೈ ॥ 17 ॥

ತತೋ ನಿಶ್ಚಿತ್ಯ ಮಥನಂ ಯೋಕ್ತ್ರಂ ಕೃತ್ವಾ ಚ ವಾಸುಕಿಮ್ ।

ಮನ್ಥಾನಂ ಮನ್ದರಂ ಕೃತ್ವಾ ಮಮನ್ಥುರಮಿತೌಜಸಃ ॥ 18 ॥

ಅಥ ವರ್ಷಸಹಸ್ರೇಣ ಯೋಕ್ತ್ರಸರ್ಪಶಿರಾಂಸಿ ಚ ।

ವಮನ್ತ್ಯತಿ ವಿಷಂ ತತ್ರ ದದಂಶುರ್ದಶನೈಶ್ಶಿಲಾಃ ॥ 19 ॥

ಉತ್ಪಪಾತಾಗ್ನಿಸಙ್ಕಾಶಂ ಹಾಲಾಹಲಮಹಾವಿಷಮ್ ।

ತೇನ ದಗ್ಧಂ ಜಗತ್ಸರ್ವಂ ಸದೇವಾಸುರಮಾನುಷಮ್ ॥ 20 ॥

ಅಥ ದೇವಾ ಮಹಾದೇವಂ ಶಙ್ಕರಂ ಶರಣಾರ್ಥಿನಃ ।

ಜಗ್ಮುಃ ಪಶುಪತಿಂ ರುದ್ರಂ ತ್ರಾಹಿ ತ್ರಾಹೀತಿ ತುಷ್ಟುವುಃ ॥ 21 ॥

ಏವಮುಕ್ತಸ್ತತೋ ದೇವೈರ್ದೇವದೇವೇಶ್ವರಃ ಪ್ರಭುಃ ।

ಪ್ರಾದುರಾಸೀತ್ತತೋಽತ್ರೈವ ಶಙ್ಖಚಕ್ರಧರೋ ಹರಿಃ ॥ 22 ॥

ಉವಾಚೈನಂ ಸ್ಮಿತಂ ಕೃತ್ವಾ ರುದ್ರಂ ಶೂಲಭೃತಂ ಹರಿಃ ।

ದೈವತೈರ್ಮಥ್ಯಮಾನೇ ತು ಯತ್ಪೂರ್ವಂ ಸಮುಪಸ್ಥಿತಮ್ ॥ 23 ॥

ತ್ವದೀಯಂಹಿ ಸುರಶ್ರೇಷ್ಠ ಸುರಾಣಾಮಗ್ರಜೋಽಸಿ ಯತ್ ।

ಅಗ್ರಪೂಜಾಮಿಮಾಂ ಮತ್ವಾ ಗೃಹಾಣೇದಂ ವಿಷಂ ಪ್ರಭೋ ॥ 24 ॥

ಇತ್ಯುಕ್ತ್ವಾ ಚ ಸುರಶ್ರೇಷ್ಠಸ್ತತ್ರೈವಾನ್ತರಧೀಯತ ।

ದೇವತಾನಾಂ ಭಯಂ ದೃಷ್ಟವಾಶ್ರುತ್ವಾ ವಾಕ್ಯಂ ತು ಶಾರ್ಙ್ಗಿಣಃ ।

ಹಾಲಾಹಲವಿಷಂ ಘೋರಂ ಸ ಜಗ್ರಾಹಾಮೃತೋಪಮಮ್ ॥ 25 ॥

ದೇವಾನ್ವಿಸೃಜ್ಯ ದೇವೇಶೋ ಜಗಾಮ ಭಗವಾನ್ ಹರಃ ।

ತತೋ ದೇವಾಸುರಾಸ್ಸರ್ವೇ ಮಮನ್ಥೂ ರಘುನನ್ದನ ॥ 26 ॥

ಪ್ರವಿವೇಶಾಥ ಪಾತಾಲಂ ಮನ್ಥಾನಃ ಪರ್ವತೋಽನಘ ।

ತತೋ ದೇವಾಸ್ಸಗನ್ಧರ್ವಾಸ್ತುಷ್ಟುವುರ್ಮಧುಸೂದನಮ್ ॥ 27 ॥

ತ್ವಂ ಗತಿಃ ಸರ್ವಭೂತಾನಾಂ ವಿಶೇಷೇಣ ದಿವೌಕಸಾಮ್ ।

ಪಾಲಯಾಸ್ಮಾನ್ಮಹಾಬಾಹೋ ಗಿರಿಮುದ್ಧರ್ತುಮರ್ಹಸಿ ॥ 28 ॥

ಇತಿ ಶ್ರುತ್ವಾ ಹೃಷೀಕೇಶಃ ಕಾಮಠಂ ರೂಪಮಾಸ್ಥಿತಃ ।

ಪರ್ವತಂ ಪೃಷ್ಠತಃ ಕೃತ್ವಾ ಶಿಶ್ಯೇ ತತ್ರೋದಧೌ ಹರಿಃ ॥ 29 ॥

ಪರ್ವತಾಗ್ರೇ ತು ಲೋಕಾತ್ಮಾ ಹಸ್ತೇನಾಕ್ರಮ್ಯ ಕೇಶವಃ ।

ದೇವಾನಾಂ ಮಧ್ಯತಃ ಸ್ಥಿತ್ವಾ ಮಮನ್ಥ ಪುರುಷೋತ್ತಮಃ ॥ 30 ॥

ಅಥ ವರ್ಷಸಹಸ್ರೇಣ ಸದಣ್ಡಸ್ಸಕಮಣ್ಡಲುಃ ।

ಪೂರ್ವಂ ಧನ್ವನ್ತರಿರ್ನಾಮ ಅಪ್ಸರಾಶ್ಚ ಸುವರ್ಚಸಃ ॥ 31 ॥

ಅಪ್ಸು ನಿರ್ಮಥನಾದೇವ ರಸಾಸ್ತಸ್ಮಾದ್ವರಸ್ತ್ರಿಯಃ ।

ಉತ್ಪೇತುರ್ಮನುಜಶ್ರೇಷ್ಠ ತಸ್ಮಾದಪ್ಸರಸೋಽಭವನ್ ॥ 32 ॥

ಷಷ್ಟಿಃ ಕೋಟ್ಯೋಽಭವಂಸ್ತಾಸಾಂ ಅಪ್ಸರಾಣಾಂ ಸುವರ್ಚಸಾಮ್ ।

ಅಸಙ್ಖ್ಯೇಯಾಸ್ತು ಕಾಕುತ್ಸ್ಥ ಯಾಸ್ತಾಸಾಂ ಪರಿಚಾರಿಕಾಃ ॥ 33 ॥

ನ ತಾಸ್ಸ್ಮ ಪರಿಗೃಹ್ಣನ್ತಿ ಸರ್ವೇ ತೇ ದೇವದಾನವಾಃ ।

ಅಪ್ರತಿಗ್ರಹಣಾತ್ತಾಶ್ಚ ಸರ್ವಾಸ್ಸಾಧಾರಣಾಸ್ಸ್ಮೃತಾಃ ॥ 34 ॥

ವರುಣಸ್ಯ ತತಃ ಕನ್ಯಾ ವಾರುಣೀ ರಘುನನ್ದನ ।

ಉತ್ಪಪಾತ ಮಹಾಭಾಗಾ ಮಾರ್ಗಮಾಣಾ ಪರಿಗ್ರಹಮ್ ॥ 35 ॥

ದಿತೇಃ ಪುತ್ರಾ ನ ತಾಂ ರಾಮ ಜಗೃಹುರ್ವರುಣಾತ್ಮಜಾಮ್ ।

ಅದಿತೇಸ್ತು ಸುತಾ ವೀರ ಜಗೃಹುಸ್ತಾಮನಿನ್ದಿತಾಮ್ ॥ 36 ॥

ಅಸುರಾಸ್ತೇನ ದೈತೇಯಾಸ್ಸುರಾಸ್ತೇನಾದಿತೇಸ್ಸುತಾಃ ।

ಹೃಷ್ಟಾಃ ಪ್ರಮುದಿತಾಶ್ಚಾಸನ್ ವಾರುಣೀಗ್ರಹಣಾತ್ಸುರಾಃ ॥ 37 ॥

ಉಚ್ಚೈಶ್ಶ್ರವಾ ಹಯಶ್ರೇಷ್ಠೋ ಮಣಿರತ್ನಂ ಚ ಕೌಸ್ತುಭಮ್ ।

ಉದತಿಷ್ಠನ್ನರಶ್ರೇಷ್ಠ ತಥೈವಾಮೃತಮುತ್ತಮಮ್ ॥ 38 ॥

ಅಥ ತಸ್ಯ ಕೃತೇ ರಾಮ ಮಹಾನಾಸೀತ್ಕುಲಕ್ಷಯಃ ।

ಅದಿತೇಸ್ತು ತತಃ ಪುತ್ರಾ ದಿತೇಃ ಪುತ್ರಾನಸೂದಯನ್ ॥ 39 ॥

ಏಕತೋಽಭ್ಯಾಗಮನ್ ಸರ್ವೇ ಹ್ಯಸುರಾ ರಾಕ್ಷಸೈಸ್ಸಹ ।

ಯುದ್ಧಮಾಸೀನ್ಮಹಾಘೋರಂ ವೀರ ತ್ರೈಲೋಕ್ಯಮೋಹನಮ್ ॥ 40 ॥

ಯದಾ ಕ್ಷಯಂ ಗತಂ ಸರ್ವಂ ತದಾ ವಿಷ್ಣುರ್ಮಹಾಬಲಃ ।

ಅಮೃತಂ ಸೋಽಹರತ್ತ್ತೂರ್ಣಂ ಮಾಯಾಮಾಸ್ಥಾಯ ಮೋಹಿನೀಮ್ ॥ 41 ॥

ಯೇ ಗತಾಽಭಿಮುಖಂ ವಿಷ್ಣುಮಕ್ಷಯಂ ಪುರುಷೋತ್ತಮಮ್ ।

ಸಮ್ಪಿಷ್ಟಾಸ್ತೇ ತದಾ ಯುದ್ಧೇ ವಿಷ್ಣುನಾ ಪ್ರಭವಿಷ್ಣುನಾ ॥ 42 ॥

ಅದಿತೇರಾತ್ಮಜಾ ವೀರಾ ದಿತೇಃ ಪುತ್ರಾನ್ನಿಜಘ್ನಿರೇ ।

ತಸ್ಮಿನ್ ಘೋರೇ ಮಹಾಯುದ್ಧೇ ದೈತೇಯಾದಿತ್ಯಯೋರ್ಭೃಶಮ್ ॥ 43 ॥

ನಿಹತ್ಯ ದಿತಿಪುತ್ರಾಂಶ್ಚ ರಾಜ್ಯಂ ಪ್ರಾಪ್ಯ ಪುರನ್ದರಃ ।

ಶಶಾಸ ಮುದಿತೋ ಲೋಕಾನ್ ಸರ್ಷಿಸಙ್ಘಾನ್ ಸಚಾರಣಾನ್ ॥ 44 ॥

ಇತ್ಯಾರ್ಷೇ ಶ್ರೀಮದ್ರಾಮಾಯಣೇ ವಾಲ್ಮೀಕೀಯ ಆದಿಕಾವ್ಯೇ ಬಾಲಕಾಣ್ಡೇ ಪಞ್ಚಚತ್ವಾರಿಂಶಸ್ಸರ್ಗಃ ॥

Roman (IAST) Transliteration

śrīmadvālmīkīya rāmāyaṇe bālakāṇḍam |

atha pañcacatvāriṃśassargaḥ |

viśvāmitravacaśśrutvā rāghava ssahalakṣmaṇaḥ |

vismayaṃ paramaṃ gatvā viśvāmitramathābravīt || 1 ||

atyadbhutamidaṃ brahman kathitaṃ paramaṃ tvayā |

gaṅgāvataraṇaṃ puṇyaṃ sāgarasyāpi pūraṇam || 2 ||

tasya sā śarvarī sarvā saha saumitriṇā tadā |

jagāma cintayānasya viśvāmitrakathāṃ śubhām || 3 ||

tataḥ prabhāte vimale viśvāmitraṃ mahāmunim |

uvāca rāghavo vākyaṃ kṛtāhnikamarindamaḥ || 4 ||

gatā bhagavatī rātriśśrotavyaṃ paramaṃ śrutam |

kṣaṇabhūteva nau rātri ssamvṛtteyaṃ mahātapaḥ || 5 ||

imāṃ cintayatassarvāṃ nikhilena kathāṃ tava |

tarāma saritāṃ śreṣṭhāṃ puṇyāṃ tripathagāṃ nadīm || 6 ||

naureṣā hi sukhāstīrṇā ṛṣīṇāṃ puṇyakarmaṇām |

bhagavantamiha prāptaṃ jñātvā tvaritamāgatā || 7 ||

tasya tadvacanaṃ śrutvā rāghavasya mahātmanaḥ |

santāraṃ kārayāmāsa sarṣisaṅgha ssarāghavaḥ || 8 ||

uttaraṃ tīramāsādya sampūjyarṣigaṇaṃ tadā |

gaṅgākūle niviṣṭāste viśālāṃ dadṛśuḥ purīm || 9 ||

tato munivarastūrṇaṃ jagāma saha rāghavaḥ |

viśālāṃ nagarīṃ ramyāṃ divyāṃ svargopamāṃ tadā || 10 ||

atha rāmo mahāprājño viśvāmitraṃ mahāmunim |

papraccha prāñjalirbhūtvā viśālāmuttamāṃ purīm || 11 ||

kataro rājavaṃśo'yaṃ viśālāyāṃ mahāmune |

śrotumicchāmi bhadraṃ te paraṃ kautūhalaṃ hi me || 12 ||

tasya tadvacanaṃ śrutvā rāmasya munipuṅgavaḥ |

ākhyātuṃ tatsamārebhe viśālasya purātanam || 13 ||

śrūyatāṃ rāma śakrasya kathāṃ kathayataśśubhām |

asmin deśe tu yadvṛttaṃ tadapi śṛṇu rāghava || 14 ||

pūrvaṃ kṛtayuge rāma diteḥ putrā mahābalāḥ |

aditeśca mahābhāga vīryavantassudhārmikāḥ || 15 ||

tatasteṣāṃ naraśreṣṭha buddhirāsīnmahātmanām |

amarā ajarāścaiva kathaṃ syāma nirāmayāḥ || 16 ||

teṣāṃ cintayatāṃ rāma buddhirāsīnmahātmanām |

kṣīrodamathanaṃ kṛtvā rasaṃ prāpsyāma tatra vai || 17 ||

tato niścitya mathanaṃ yoktraṃ kṛtvā ca vāsukim |

manthānaṃ mandaraṃ kṛtvā mamanthuramitaujasaḥ || 18 ||

atha varṣasahasreṇa yoktrasarpaśirāṃsi ca |

vamantyati viṣaṃ tatra dadaṃśurdaśanaiśśilāḥ || 19 ||

utpapātāgnisaṅkāśaṃ hālāhalamahāviṣam |

tena dagdhaṃ jagatsarvaṃ sadevāsuramānuṣam || 20 ||

atha devā mahādevaṃ śaṅkaraṃ śaraṇārthinaḥ |

jagmuḥ paśupatiṃ rudraṃ trāhi trāhīti tuṣṭuvuḥ || 21 ||

evamuktastato devairdevadeveśvaraḥ prabhuḥ |

prādurāsīttato'traiva śaṅkhacakradharo hariḥ || 22 ||

uvācainaṃ smitaṃ kṛtvā rudraṃ śūlabhṛtaṃ hariḥ |

daivatairmathyamāne tu yatpūrvaṃ samupasthitam || 23 ||

tvadīyaṃhi suraśreṣṭha surāṇāmagrajo'si yat |

agrapūjāmimāṃ matvā gṛhāṇedaṃ viṣaṃ prabho || 24 ||

ityuktvā ca suraśreṣṭhastatraivāntaradhīyata |

devatānāṃ bhayaṃ dṛṣṭavāśrutvā vākyaṃ tu śārṅgiṇaḥ |

hālāhalaviṣaṃ ghoraṃ sa jagrāhāmṛtopamam || 25 ||

devānvisṛjya deveśo jagāma bhagavān haraḥ |

tato devāsurāssarve mamanthū raghunandana || 26 ||

praviveśātha pātālaṃ manthānaḥ parvato'nagha |

tato devāssagandharvāstuṣṭuvurmadhusūdanam || 27 ||

tvaṃ gatiḥ sarvabhūtānāṃ viśeṣeṇa divaukasām |

pālayāsmānmahābāho girimuddhartumarhasi || 28 ||

iti śrutvā hṛṣīkeśaḥ kāmaṭhaṃ rūpamāsthitaḥ |

parvataṃ pṛṣṭhataḥ kṛtvā śiśye tatrodadhau hariḥ || 29 ||

parvatāgre tu lokātmā hastenākramya keśavaḥ |

devānāṃ madhyataḥ sthitvā mamantha puruṣottamaḥ || 30 ||

atha varṣasahasreṇa sadaṇḍassakamaṇḍaluḥ |

pūrvaṃ dhanvantarirnāma apsarāśca suvarcasaḥ || 31 ||

apsu nirmathanādeva rasāstasmādvarastriyaḥ |

utpeturmanujaśreṣṭha tasmādapsaraso'bhavan || 32 ||

ṣaṣṭiḥ koṭyo'bhavaṃstāsāṃ apsarāṇāṃ suvarcasām |

asaṅkhyeyāstu kākutstha yāstāsāṃ paricārikāḥ || 33 ||

na tāssma parigṛhṇanti sarve te devadānavāḥ |

apratigrahaṇāttāśca sarvāssādhāraṇāssmṛtāḥ || 34 ||

varuṇasya tataḥ kanyā vāruṇī raghunandana |

utpapāta mahābhāgā mārgamāṇā parigraham || 35 ||

diteḥ putrā na tāṃ rāma jagṛhurvaruṇātmajām |

aditestu sutā vīra jagṛhustāmaninditām || 36 ||

asurāstena daiteyāssurāstenāditessutāḥ |

hṛṣṭāḥ pramuditāścāsan vāruṇīgrahaṇātsurāḥ || 37 ||

uccaiśśravā hayaśreṣṭho maṇiratnaṃ ca kaustubham |

udatiṣṭhannaraśreṣṭha tathaivāmṛtamuttamam || 38 ||

atha tasya kṛte rāma mahānāsītkulakṣayaḥ |

aditestu tataḥ putrā diteḥ putrānasūdayan || 39 ||

ekato'bhyāgaman sarve hyasurā rākṣasaissaha |

yuddhamāsīnmahāghoraṃ vīra trailokyamohanam || 40 ||

yadā kṣayaṃ gataṃ sarvaṃ tadā viṣṇurmahābalaḥ |

amṛtaṃ so'haratttūrṇaṃ māyāmāsthāya mohinīm || 41 ||

ye gatā'bhimukhaṃ viṣṇumakṣayaṃ puruṣottamam |

sampiṣṭāste tadā yuddhe viṣṇunā prabhaviṣṇunā || 42 ||

aditerātmajā vīrā diteḥ putrānnijaghnire |

tasmin ghore mahāyuddhe daiteyādityayorbhṛśam || 43 ||

nihatya ditiputrāṃśca rājyaṃ prāpya purandaraḥ |

śaśāsa mudito lokān sarṣisaṅghān sacāraṇān || 44 ||

ityārṣe śrīmadrāmāyaṇe vālmīkīya ādikāvye bālakāṇḍe pañcacatvāriṃśassargaḥ ||