1.17 Balakanda - Saptadasha Sargah

ॐ

1.17 ಬಾಲಕಾಣ್ಡ - ಸಪ್ತದಶ ಸರ್ಗಃ

Valmiki Kannada

ಶ್ರೀಮದ್ವಾಲ್ಮೀಕೀಯ ರಾಮಾಯಣೇ ಬಾಲಕಾಣ್ಡಮ್ ।

ಅಥ ಸಪ್ತದಶಸ್ಸರ್ಗಃ ।

ಪುತ್ರತ್ವಂ ತು ಗತೇ ವಿಷ್ಣೌ ರಾಜ್ಞಸ್ತಸ್ಯ ಸುಮಹಾತ್ಮನಃ ।

ಉವಾಚ ದೇವತಾಸ್ಸರ್ವಾಸ್ಸ್ವಯಮ್ಭೂರ್ಭಗವಾನಿದಮ್ ॥ 1 ॥

ಸತ್ಯಸನ್ಧಸ್ಯ ವೀರಸ್ಯ ಸರ್ವೇಷಾನ್ನೋ ಹಿತೈಷಿಣಃ ।

ವಿಷ್ಣೋಸ್ಸಹಾಯಾನ್ಬಲಿನಸ್ಸೃಜಧ್ವಂ ಕಾಮರೂಪಿಣಃ ॥ 2 ॥

ಮಾಯಾವಿದಶ್ಚ ಶೂರಾಂಶ್ಚ ವಾಯುವೇಗಸಮಾಞ್ಜವೇ ।

ನಯಜ್ಞಾನ್ಬುದ್ಧಿಸಮ್ಪನ್ನಾನ್ವಿಷ್ಣುತುಲ್ಯಪರಾಕ್ರಮಾನ್ ॥ 3 ॥

ಅಸಂಹಾರ್ಯಾನುಪಾಯಜ್ಞಾನ್ ದಿವ್ಯಸಂಹನನಾನ್ವಿತಾನ್ ।

ಸರ್ವಾಸ್ತ್ರಗುಣಸಮ್ಪನ್ನಾನಮೃತಪ್ರಾಶನಾನಿವ ॥ 4 ॥

ಅಪ್ಸರಸ್ಸು ಚ ಮುಖ್ಯಾಸು ಗನ್ಧರ್ವಾಣಾಂ ತನೂಷು ಚ ।

ಸೃಜಧ್ವಂ ಹರಿರೂಪೇಣ ಪುತ್ರಾಂಸ್ತುಲ್ಯಪರಾಕ್ರಮಾನ್ ॥ 5 ॥

ಪೂರ್ವಮೇವ ಮಯಾ ಸೃಷ್ಟೋ ಜಾಮ್ಬವಾನೃಕ್ಷಪುಙ್ಗವಃ ।

ಜೃಮ್ಭಮಾಣಸ್ಯ ಸಹಸಾ ಮಮ ವಕ್ತ್ರಾದಜಾಯತ ॥ 6 ॥

ತೇ ತಥೋಕ್ತಾ ಭಗವತಾ ತತ್ಪ್ರತಿಶ್ರುತ್ಯ ಶಾಸನಮ್ ।

ಜನಯಾಮಾಸುರೇವಂ ತೇ ಪುತ್ರಾನ್ವಾನರರೂಪಿಣಃ ॥ 7 ॥

ಋಷಯಶ್ಚ ಮಹಾತ್ಮಾನಸ್ಸಿದ್ಧವಿದ್ಯಾಧರೋರಗಾಃ ।

ಚಾರಣಾಶ್ಚ ಸುತಾನ್ವೀರಾನ್ಸಸೃಜುರ್ವನಚಾರಿಣಃ ॥ 8 ॥

ವಾನರೇನ್ದ್ರಂ ಮಹೇನ್ದ್ರಾಭಮಿನ್ದ್ರೋ ವಾಲಿನಮೂರ್ಜಿತಮ್ ।

ಸುಗ್ರೀವಂ ಜನಯಾಮಾಸ ತಪನಸ್ತಪತಾಂ ವರಃ ॥ 9 ॥

ಬೃಹಸ್ಪತಿಸ್ತ್ವಜನಯತ್ತಾರಂ ನಾಮ ಮಹಾಹರಿಮ್ ।

ಸರ್ವವಾನರಮುಖ್ಯಾನಾಂ ಬುದ್ಧಿಮನ್ತಮನುತ್ತಮಮ್ ॥ 10 ॥

ಧನದಸ್ಯ ಸುತಶ್ಶ್ರೀಮಾನ್ ವಾನರೋ ಗನ್ಧಮಾದನಃ ।

ವಿಶ್ವಕರ್ಮಾತ್ವಜನಯನ್ನಲಂ ನಾಮ ಮಹಾಹರಿಮ್ ॥ 11 ॥

ಪಾವಕಸ್ಯ ಸುತಶ್ಶ್ರೀಮಾನ್ ನೀಲೋಽಗ್ನಿಸದೃಶಪ್ರಭಃ ।

ತೇಜಸಾ ಯಶಸಾ ವೀರ್ಯಾದತ್ಯರಿಚ್ಯತ ವಾನರಾನ್ ॥ 12 ॥

ರೂಪದ್ರವಿಣಸಮ್ಪನ್ನಾವಶ್ವಿನೌ ರೂಪಸಮ್ಮತೌ ।

ಮೈನ್ದಂ ಚ ದ್ವಿವಿದಂ ಚೈವ ಜನಯಾಮಾಸತುಸ್ಸ್ವಯಮ್ ॥ 13 ॥

ವರುಣೋ ಜನಯಾಮಾಸ ಸುಷೇಣಂ ವಾನರರ್ಷಭಮ್ ।

ಶರಭಂ ಜನಯಾಮಾಸ ಪರ್ಜನ್ಯಸ್ತು ಮಹಾಬಲಮ್ ॥ 14 ॥

ಮಾರುತಸ್ಯಾತ್ಮಜಶ್ಶ್ರೀಮಾನ್ಹನುಮಾನ್ನಾಮ ವೀರ್ಯವಾನ್ ।

ವಜ್ರಸಂಹನನೋಪೇತೋ ವೈನತೇಯಸಮೋ ಜವೇ ॥ 15 ॥

ತೇ ಸೃಷ್ಟಾ ಬಹುಸಾಹಸ್ರಾ ದಶಗ್ರೀವವಧೇ ರತಾಃ ।

ಅಪ್ರಮೇಯಬಲಾ ವೀರಾ ವಿಕ್ರಾನ್ತಾಃ ಕಾಮರೂಪಿಣಃ ॥ 16 ॥

ಮೇರುಮನ್ದರಸಙ್ಕಾಶಾ ವಪುಷ್ಮನ್ತೋ ಮಹಾಬಲಾಃ ।

ಋಕ್ಷವಾನರಗೋಪುಚ್ಛಾಃ ಕ್ಷಿಪ್ರಮೇವಾಭಿಜಜ್ಞಿರೇ ॥ 17 ॥

ಯಸ್ಯ ದೇವಸ್ಯ ಯದ್ರೂಪಂ ವೇಷೋ ಯಶ್ಚ ಪರಾಕ್ರಮಃ ।

ಅಜಾಯತ ಸಮಸ್ತೇನ ತಸ್ಯ ತಸ್ಯ ಸುತಃ ಪೃಥಕ್ ॥ 18 ॥

ಗೋಲಾಙ್ಗೂಲೀಷು ಚೋತ್ಪನ್ನಾಃ ಕೇಚಿತ್ಸಮ್ಮತವಿಕ್ರಮಾಃ ।

ಋಕ್ಷೀಷು ಚ ತಥಾ ಜಾತಾ ವಾನರಾಃ ಕಿನ್ನರೀಷು ಚ ॥ 19 ॥

ದೇವಾ ಮಹರ್ಷಿಗನ್ಧರ್ವಾಸ್ತಾರ್ಕ್ಷ್ಯಾ ಯಕ್ಷಾ ಯಶಸ್ವಿನಃ ।

ನಾಗಾಃ ಕಿಮ್ಪುರುಷಾಶ್ಚೈವ ಸಿದ್ಧವಿದ್ಯಾಧರೋರಗಾಃ ॥ 20 ॥

ಬಹವೋ ಜನಯಾಮಾಸುರ್ಹೃಷ್ಟಾಸ್ತತ್ರ ಸಹಸ್ರಶಃ ।

ವಾನರಾನ್ಸುಮಹಾಕಾಯಾನ್ಸರ್ವಾನ್ವೈ ವನಚಾರಿಣಃ ॥ 21 ॥

ಅಪ್ಸರಸ್ಸು ಚ ಮುಖ್ಯಾಸು ತಥಾ ವಿದ್ಯಾಧರೀಷು ಚ ।

ನಾಗಕನ್ಯಾಸು ಚ ತಥಾ ಗನ್ಧರ್ವೀಣಾಂ ತನೂಷು ಚ ॥ 22 ॥

ಕಾಮರೂಪಬಲೋಪೇತಾ ಯಥಾಕಾಮಂ ವಿಚಾರಿಣಃ ।

ಸಿಂಹಶಾರ್ದೂಲಸದೃಶಾ ದರ್ಪೇಣ ಚ ಬಲೇನ ಚ ॥ 23 ॥

ಶಿಲಾಪ್ರಹರಣಾಸ್ಸರ್ವೇ ಸರ್ವೇ ಪಾದಪಯೋಧಿನಃ ॥ 24 ॥

ನಖದಂಷ್ಟ್ರಾಯುಧಾಸ್ಸರ್ವೇ ಸರ್ವೇ ಸರ್ವಾಸ್ತ್ರಕೋವಿದಾಃ ।

ವಿಚಾಲಯೇಯುಶ್ಶೈಲೇನ್ದ್ರಾನ್ಭೇದಯೇಯುಸ್ಸ್ಥಿರಾನ್ದ್ರುಮಾನ್ ।

ಕ್ಷೋಭಯೇಯುಶ್ಚ ವೇಗೇನ ಸಮುದ್ರಂ ಸರಿತಾಂ ಪತಿಮ್ ॥ 25 ॥

ದಾರಯೇಯುಃ ಕ್ಷಿತಿಂ ಪದ್ಭ್ಯಾಮಾಪ್ಲವೇಯುರ್ಮಹಾರ್ಣವಮ್ ।

ನಭಃಸ್ಥಲಂ ವಿಶೇಯುಶ್ಚ ಗೃಹ್ಣೀಯುರಪಿ ತೋಯದಾನ್ ॥ 26 ॥

ಗೃಹ್ಣೀಯುರಪಿ ಮಾತಙ್ಗಾನ್ಮತ್ತಾನ್ಪ್ರವ್ರಜತೋ ವನೇ ।

ನರ್ದಮಾನಾಶ್ಚ ನಾದೇನ ಪಾತಯೇಯುರ್ವಿಹಙ್ಗಮಾನ್ ॥ 27 ॥

ಈದೃಶಾನಾಂ ಪ್ರಸೂತಾನಿ ಹರೀಣಾಂ ಕಾಮರೂಪಿಣಾಮ್ ।

ಶತಂ ಶತಸಹಸ್ರಾಣಿ ಯೂಥಪಾನಾಂ ಮಹಾತ್ಮನಾಮ್ ॥ 28 ॥

ತೇ ಪ್ರಧಾನೇಷು ಯೂಥೇಷು ಹರೀಣಾಂ ಹರಿಯೂಥಪಾಃ ।

ಬಭೂವುರ್ಯೂಥಪಶ್ರೇಷ್ಠಾ ವೀರಾಂಶ್ಚಾಜನಯನ್ ಹರೀನ್ ॥ 29 ॥

ಅನ್ಯೇ ಋಕ್ಷವತಃ ಪ್ರಸ್ಥಾನವತಸ್ಥು ಸ್ಸಹಸ್ರಶಃ ।

ಅನ್ಯೇ ನಾನಾವಿಧಾನ್ಶೈಲಾನ್ಭೇಜಿರೇ ಕಾನನಾನಿ ಚ ॥ 30 ॥

ಸೂರ್ಯಪುತ್ರಂ ಚ ಸುಗ್ರೀವಂ ಶಕ್ರಪುತ್ರಂ ಚ ವಾಲಿನಮ್ ।

ಭ್ರಾತರಾವುಪತಸ್ಥುಸ್ತೇ ಸರ್ವ ಏವ ಹರೀಶ್ವರಾಃ ॥ 31 ॥

ನಲಂ ನೀಲಂ ಹನೂಮನ್ತಮನ್ಯಾಂಶ್ಚ ಹರಿಯೂಥಪಾನ್ ।

3 ತೇ ತಾರ್ಕ್ಷ್ಯಬಲಸಮ್ಪನ್ನಾಸ್ಸರ್ವೇ ಯುದ್ಧವಿಶಾರದಾಃ ।

ವಿಚರನ್ತೋಽರ್ದಯನ್ದರ್ಪಾತ್ಸಿಂಹವ್ಯಾಘ್ರಮಹೋರಗಾನ್ ॥ 32 ॥

ತಾಂಶ್ಚ ಸರ್ವಾನ್ಮಹಾಬಾಹುರ್ವಾಲೀ ವಿಪುಲವಿಕ್ರಮಃ ।

ಜುಗೋಪ ಭುಜವೀರ್ಯೇಣ ಋಕ್ಷಗೋಪುಚ್ಛವಾನರಾನ್ ॥ 33 ॥

ತೈರಿಯಂ ಪೃಥಿವೀ ಶೂರೈಸ್ಸಪರ್ವತವನಾರ್ಣವಾ ।

ಕೀರ್ಣಾ ವಿವಿಧಸಂಸ್ಥಾನೈರ್ನಾನಾವ್ಯಞ್ಜನಲಕ್ಷಣೈಃ ॥ 34 ॥

ತೈರ್ಮೇಘಬೃನ್ದಾಚಲಕೂಟಕಲ್ಪೈಃ ಮಹಾಬಲೈರ್ವಾನರಯೂಥಪಾಲೈಃ ।

ಬಭೂವ ಭೂರ್ಭೀಮಶರೀರರೂಪೈ ಸ್ಸಮಾವೃತಾ ರಾಮಸಹಾಯಹೇತೋಃ ॥ 35 ॥

ಇತ್ಯಾರ್ಷೇ ಶ್ರೀಮದ್ರಾಮಾಯಣೇ ವಾಲ್ಮೀಕೀಯ ಆದಿಕಾವ್ಯೇ ಬಾಲಕಾಣ್ಡೇ ಸಪ್ತದಶಸ್ಸರ್ಗಃ ॥

Roman (IAST) Transliteration

śrīmadvālmīkīya rāmāyaṇe bālakāṇḍam |

atha saptadaśassargaḥ |

putratvaṃ tu gate viṣṇau rājñastasya sumahātmanaḥ |

uvāca devatāssarvāssvayambhūrbhagavānidam || 1 ||

satyasandhasya vīrasya sarveṣānno hitaiṣiṇaḥ |

viṣṇossahāyānbalinassṛjadhvaṃ kāmarūpiṇaḥ || 2 ||

māyāvidaśca śūrāṃśca vāyuvegasamāñjave |

nayajñānbuddhisampannānviṣṇutulyaparākramān || 3 ||

asaṃhāryānupāyajñān divyasaṃhananānvitān |

sarvāstraguṇasampannānamṛtaprāśanāniva || 4 ||

apsarassu ca mukhyāsu gandharvāṇāṃ tanūṣu ca |

sṛjadhvaṃ harirūpeṇa putrāṃstulyaparākramān || 5 ||

pūrvameva mayā sṛṣṭo jāmbavānṛkṣapuṅgavaḥ |

jṛmbhamāṇasya sahasā mama vaktrādajāyata || 6 ||

te tathoktā bhagavatā tatpratiśrutya śāsanam |

janayāmāsurevaṃ te putrānvānararūpiṇaḥ || 7 ||

ṛṣayaśca mahātmānassiddhavidyādharoragāḥ |

cāraṇāśca sutānvīrānsasṛjurvanacāriṇaḥ || 8 ||

vānarendraṃ mahendrābhamindro vālinamūrjitam |

sugrīvaṃ janayāmāsa tapanastapatāṃ varaḥ || 9 ||

bṛhaspatistvajanayattāraṃ nāma mahāharim |

sarvavānaramukhyānāṃ buddhimantamanuttamam || 10 ||

dhanadasya sutaśśrīmān vānaro gandhamādanaḥ |

viśvakarmātvajanayannalaṃ nāma mahāharim || 11 ||

pāvakasya sutaśśrīmān nīlo'gnisadṛśaprabhaḥ |

tejasā yaśasā vīryādatyaricyata vānarān || 12 ||

rūpadraviṇasampannāvaśvinau rūpasammatau |

maindaṃ ca dvividaṃ caiva janayāmāsatussvayam || 13 ||

varuṇo janayāmāsa suṣeṇaṃ vānararṣabham |

śarabhaṃ janayāmāsa parjanyastu mahābalam || 14 ||

mārutasyātmajaśśrīmānhanumānnāma vīryavān |

vajrasaṃhananopeto vainateyasamo jave || 15 ||

te sṛṣṭā bahusāhasrā daśagrīvavadhe ratāḥ |

aprameyabalā vīrā vikrāntāḥ kāmarūpiṇaḥ || 16 ||

merumandarasaṅkāśā vapuṣmanto mahābalāḥ |

ṛkṣavānaragopucchāḥ kṣipramevābhijajñire || 17 ||

yasya devasya yadrūpaṃ veṣo yaśca parākramaḥ |

ajāyata samastena tasya tasya sutaḥ pṛthak || 18 ||

golāṅgūlīṣu cotpannāḥ kecitsammatavikramāḥ |

ṛkṣīṣu ca tathā jātā vānarāḥ kinnarīṣu ca || 19 ||

devā maharṣigandharvāstārkṣyā yakṣā yaśasvinaḥ |

nāgāḥ kimpuruṣāścaiva siddhavidyādharoragāḥ || 20 ||

bahavo janayāmāsurhṛṣṭāstatra sahasraśaḥ |

vānarānsumahākāyānsarvānvai vanacāriṇaḥ || 21 ||

apsarassu ca mukhyāsu tathā vidyādharīṣu ca |

nāgakanyāsu ca tathā gandharvīṇāṃ tanūṣu ca || 22 ||

kāmarūpabalopetā yathākāmaṃ vicāriṇaḥ |

siṃhaśārdūlasadṛśā darpeṇa ca balena ca || 23 ||

śilāpraharaṇāssarve sarve pādapayodhinaḥ || 24 ||

nakhadaṃṣṭrāyudhāssarve sarve sarvāstrakovidāḥ |

vicālayeyuśśailendrānbhedayeyussthirāndrumān |

kṣobhayeyuśca vegena samudraṃ saritāṃ patim || 25 ||

dārayeyuḥ kṣitiṃ padbhyāmāplaveyurmahārṇavam |

nabhaḥsthalaṃ viśeyuśca gṛhṇīyurapi toyadān || 26 ||

gṛhṇīyurapi mātaṅgānmattānpravrajato vane |

nardamānāśca nādena pātayeyurvihaṅgamān || 27 ||

īdṛśānāṃ prasūtāni harīṇāṃ kāmarūpiṇām |

śataṃ śatasahasrāṇi yūthapānāṃ mahātmanām || 28 ||

te pradhāneṣu yūtheṣu harīṇāṃ hariyūthapāḥ |

babhūvuryūthapaśreṣṭhā vīrāṃścājanayan harīn || 29 ||

anye ṛkṣavataḥ prasthānavatasthu ssahasraśaḥ |

anye nānāvidhānśailānbhejire kānanāni ca || 30 ||

sūryaputraṃ ca sugrīvaṃ śakraputraṃ ca vālinam |

bhrātarāvupatasthuste sarva eva harīśvarāḥ || 31 ||

nalaṃ nīlaṃ hanūmantamanyāṃśca hariyūthapān |

3 te tārkṣyabalasampannāssarve yuddhaviśāradāḥ |

vicaranto'rdayandarpātsiṃhavyāghramahoragān || 32 ||

tāṃśca sarvānmahābāhurvālī vipulavikramaḥ |

jugopa bhujavīryeṇa ṛkṣagopucchavānarān || 33 ||

tairiyaṃ pṛthivī śūraissaparvatavanārṇavā |

kīrṇā vividhasaṃsthānairnānāvyañjanalakṣaṇaiḥ || 34 ||

tairmeghabṛndācalakūṭakalpaiḥ mahābalairvānarayūthapālaiḥ |

babhūva bhūrbhīmaśarīrarūpai ssamāvṛtā rāmasahāyahetoḥ || 35 ||

ityārṣe śrīmadrāmāyaṇe vālmīkīya ādikāvye bālakāṇḍe saptadaśassargaḥ ||