Shri Venkateshvara Mangalashtakam

ॐ

ಶ್ರೀ ವೇಙ್ಕಟೇಶ್ವರ ಮಙ್ಗಲಾಷ್ಟಕಮ್

Vishnu Ashtakam Kannada

ಶ್ರೀಕ್ಷೋಣ್ಯೌ ರಮಣೀಯುಗಂ ಸುರಮಣೀಪುತ್ರೋಽಪಿ ವಾಣೀಪತಿಃ

ಪೌತ್ರಶ್ಚನ್ದ್ರಶಿರೋಮಣಿಃ ಫಣಿಪತಿಃ ಶಯ್ಯಾ ಸುರಾಃ ಸೇವಕಾಃ ।

ತಾರ್ಕ್ಷ್ಯೋ ಯಸ್ಯ ರಥೋ ಮಹಶ್ಚ ಭವನಂ ಬ್ರಹ್ಮಾಣ್ಡಮಾದ್ಯಃ ಪುಮಾನ್

ಶ್ರೀಮದ್ವೇಙ್ಕಟಭೂಧರೇನ್ದ್ರರಮಣಃ ಕುರ್ಯಾದ್ಧರಿರ್ಮಙ್ಗಲಮ್ ॥ 1 ॥

ಯತ್ತೇಜೋ ರವಿಕೋಟಿಕೋಟಿಕಿರಣಾನ್ ಧಿಕ್ಕೃತ್ಯ ಜೇಜೀಯತೇ

ಯಸ್ಯ ಶ್ರೀವದನಾಮ್ಬುಜಸ್ಯ ಸುಷಮಾ ರಾಕೇನ್ದುಕೋಟೀರಪಿ ।

ಸೌನ್ದರ್ಯಂ ಚ ಮನೋಭವಾನಪಿ ಬಹೂನ್ ಕಾನ್ತಿಶ್ಚ ಕಾದಮ್ಬಿನೀಂ

ಶ್ರೀಮದ್ವೇಙ್ಕಟಭೂಧರೇನ್ದ್ರರಮಣಃ ಕುರ್ಯಾದ್ಧರಿರ್ಮಙ್ಗಲಮ್ ॥ 2 ॥

ನಾನಾರತ್ನ ಕಿರೀಟಕುಣ್ಡಲಮುಖೈರ್ಭೂಷಾಗಣೈರ್ಭೂಷಿತಃ

ಶ್ರೀಮತ್ಕೌಸ್ತುಭರತ್ನ ಭವ್ಯಹೃದಯಃ ಶ್ರೀವತ್ಸಸಲ್ಲಾಞ್ಛನಃ ।

ವಿದ್ಯುದ್ವರ್ಣಸುವರ್ಣವಸ್ತ್ರರುಚಿರೋ ಯಃ ಶಙ್ಖಚಕ್ರಾದಿಭಿಃ

ಶ್ರೀಮದ್ವೇಙ್ಕಟಭೂಧರೇನ್ದ್ರರಮಣಃ ಕುರ್ಯಾದ್ಧರಿರ್ಮಙ್ಗಲಮ್ ॥ 3 ॥

ಯತ್ಫಾಲೇ ಮೃಗನಾಭಿಚಾರುತಿಲಕೋ ನೇತ್ರೇಽಬ್ಜಪತ್ರಾಯತೇ

ಕಸ್ತೂರೀಘನಸಾರಕೇಸರಮಿಲಚ್ಛ್ರೀಗನ್ಧಸಾರೋ ದ್ರವೈಃ ।

ಗನ್ಧೈರ್ಲಿಪ್ತತನುಃ ಸುಗನ್ಧಸುಮನೋಮಾಲಾಧರೋ ಯಃ ಪ್ರಭುಃ

ಶ್ರೀಮದ್ವೇಙ್ಕಟಭೂಧರೇನ್ದ್ರರಮಣಃ ಕುರ್ಯಾದ್ಧರಿರ್ಮಙ್ಗಲಮ್ ॥ 4 ॥

ಏತದ್ದಿವ್ಯಪದಂ ಮಮಾಸ್ತಿ ಭುವಿ ತತ್ಸಮ್ಪಶ್ಯತೇತ್ಯಾದರಾ-

-ದ್ಭಕ್ತೇಭ್ಯಃ ಸ್ವಕರೇಣ ದರ್ಶಯತಿ ಯದ್ದೃಷ್ಟ್ಯಾಽತಿಸೌಖ್ಯಂ ಗತಃ ।

ಏತದ್ಭಕ್ತಿಮತೋ ಮಹಾನಪಿ ಭವಾಮ್ಭೋಧಿರ್ನದೀತಿ ಸ್ಪೃಶನ್

ಶ್ರೀಮದ್ವೇಙ್ಕಟಭೂಧರೇನ್ದ್ರರಮಣಃ ಕುರ್ಯಾದ್ಧರಿರ್ಮಙ್ಗಲಮ್ ॥ 5 ॥

ಯಃ ಸ್ವಾಮೀ ಸರಸಸ್ತಟೇ ವಿಹರತೋ ಶ್ರೀಸ್ವಾಮಿನಾಮ್ನಃ ಸದಾ

ಸೌವರ್ಣಾಲಯಮನ್ದಿರೋ ವಿಧಿಮುಖೈರ್ಬರ್ಹಿರ್ಮುಖೈಃ ಸೇವಿತಃ ।

ಯಃ ಶತ್ರೂನ್ ಹನಯನ್ ನಿಜಾನವತಿ ಚ ಶ್ರೀಭೂವರಾಹಾತ್ಮಕಃ

ಶ್ರೀಮದ್ವೇಙ್ಕಟಭೂಧರೇನ್ದ್ರರಮಣಃ ಕುರ್ಯಾದ್ಧರಿರ್ಮಙ್ಗಲಮ್ ॥ 6 ॥

ಯೋ ಬ್ರಹ್ಮಾದಿಸುರಾನ್ ಮುನೀಂಶ್ಚ ಮನುಜಾನ್ ಬ್ರಹ್ಮೋತ್ಸವಾಯಾಗತಾನ್

ದೃಷ್ಟ್ವಾ ಹೃಷ್ಟಮನಾ ಬಭೂವ ಬಹುಶಸ್ತೈರರ್ಚಿತಃ ಸಂಸ್ತುತಃ ।

ತೇಭ್ಯೋ ಯಃ ಪ್ರದದಾದ್ವರಾನ್ ಬಹುವಿಧಾನ್ ಲಕ್ಷ್ಮೀನಿವಾಸೋ ವಿಭುಃ

ಶ್ರೀಮದ್ವೇಙ್ಕಟಭೂಧರೇನ್ದ್ರರಮಣಃ ಕುರ್ಯಾದ್ಧರಿರ್ಮಙ್ಗಲಮ್ ॥ 7 ॥

ಯೋ ದೇವೋ ಭುವಿ ವರ್ತತೇ ಕಲಿಯುಗೇ ವೈಕುಣ್ಠಲೋಕಸ್ಥಿತೋ

ಭಕ್ತಾನಾಂ ಪರಿಪಾಲನಾಯ ಸತತಂ ಕಾರುಣ್ಯವಾರಾಂ ನಿಧಿಃ ।

ಶ್ರೀಶೇಷಾಖ್ಯಮಹೀನ್ಧ್ರಮಸ್ತಕಮಣಿರ್ಭಕ್ತೈಕಚಿನ್ತಾಮಣಿಃ

ಶ್ರೀಮದ್ವೇಙ್ಕಟಭೂಧರೇನ್ದ್ರರಮಣಃ ಕುರ್ಯಾದ್ಧರಿರ್ಮಙ್ಗಲಮ್ ॥ 8 ॥

ಶೇಷಾದ್ರಿಪ್ರಭುಮಙ್ಗಲಾಷ್ಟಕಮಿದಂ ತುಷ್ಟೇನ ಯಸ್ಯೇಶಿತುಃ

ಪ್ರೀತ್ಯರ್ಥಂ ರಚಿತಂ ರಮೇಶಚರಣದ್ವನ್ದ್ವೈಕನಿಷ್ಠಾವತಾ ।

ವೈವಾಹ್ಯಾದಿಶುಭಕ್ರಿಯಾಸು ಪಠಿತಂ ಯೈಃ ಸಾಧು ತೇಷಾಮಪಿ

ಶ್ರೀಮದ್ವೇಙ್ಕಟಭೂಧರೇನ್ದ್ರರಮಣಃ ಕುರ್ಯಾದ್ಧರಿರ್ಮಙ್ಗಲಮ್ ॥ 9 ॥

ಇತಿ ಶ್ರೀ ವೇಙ್ಕಟೇಶ ಮಙ್ಗಲಾಷ್ಟಕಮ್ ।

Roman (IAST) Transliteration

śrīkṣoṇyau ramaṇīyugaṃ suramaṇīputro'pi vāṇīpatiḥ

pautraścandraśiromaṇiḥ phaṇipatiḥ śayyā surāḥ sevakāḥ |

tārkṣyo yasya ratho mahaśca bhavanaṃ brahmāṇḍamādyaḥ pumān

śrīmadveṅkaṭabhūdharendraramaṇaḥ kuryāddharirmaṅgalam || 1 ||

yattejo ravikoṭikoṭikiraṇān dhikkṛtya jejīyate

yasya śrīvadanāmbujasya suṣamā rākendukoṭīrapi |

saundaryaṃ ca manobhavānapi bahūn kāntiśca kādambinīṃ

śrīmadveṅkaṭabhūdharendraramaṇaḥ kuryāddharirmaṅgalam || 2 ||

nānāratna kirīṭakuṇḍalamukhairbhūṣāgaṇairbhūṣitaḥ

śrīmatkaustubharatna bhavyahṛdayaḥ śrīvatsasallāñchanaḥ |

vidyudvarṇasuvarṇavastraruciro yaḥ śaṅkhacakrādibhiḥ

śrīmadveṅkaṭabhūdharendraramaṇaḥ kuryāddharirmaṅgalam || 3 ||

yatphāle mṛganābhicārutilako netre'bjapatrāyate

kastūrīghanasārakesaramilacchrīgandhasāro dravaiḥ |

gandhairliptatanuḥ sugandhasumanomālādharo yaḥ prabhuḥ

śrīmadveṅkaṭabhūdharendraramaṇaḥ kuryāddharirmaṅgalam || 4 ||

etaddivyapadaṃ mamāsti bhuvi tatsampaśyatetyādarā-

-dbhaktebhyaḥ svakareṇa darśayati yaddṛṣṭyā'tisaukhyaṃ gataḥ |

etadbhaktimato mahānapi bhavāmbhodhirnadīti spṛśan

śrīmadveṅkaṭabhūdharendraramaṇaḥ kuryāddharirmaṅgalam || 5 ||

yaḥ svāmī sarasastaṭe viharato śrīsvāmināmnaḥ sadā

sauvarṇālayamandiro vidhimukhairbarhirmukhaiḥ sevitaḥ |

yaḥ śatrūn hanayan nijānavati ca śrībhūvarāhātmakaḥ

śrīmadveṅkaṭabhūdharendraramaṇaḥ kuryāddharirmaṅgalam || 6 ||

yo brahmādisurān munīṃśca manujān brahmotsavāyāgatān

dṛṣṭvā hṛṣṭamanā babhūva bahuśastairarcitaḥ saṃstutaḥ |

tebhyo yaḥ pradadādvarān bahuvidhān lakṣmīnivāso vibhuḥ

śrīmadveṅkaṭabhūdharendraramaṇaḥ kuryāddharirmaṅgalam || 7 ||

yo devo bhuvi vartate kaliyuge vaikuṇṭhalokasthito

bhaktānāṃ paripālanāya satataṃ kāruṇyavārāṃ nidhiḥ |

śrīśeṣākhyamahīndhramastakamaṇirbhaktaikacintāmaṇiḥ

śrīmadveṅkaṭabhūdharendraramaṇaḥ kuryāddharirmaṅgalam || 8 ||

śeṣādriprabhumaṅgalāṣṭakamidaṃ tuṣṭena yasyeśituḥ

prītyarthaṃ racitaṃ rameśacaraṇadvandvaikaniṣṭhāvatā |

vaivāhyādiśubhakriyāsu paṭhitaṃ yaiḥ sādhu teṣāmapi

śrīmadveṅkaṭabhūdharendraramaṇaḥ kuryāddharirmaṅgalam || 9 ||

iti śrī veṅkaṭeśa maṅgalāṣṭakam |