Shri Rama Kavacham — InfoLyter.in

ॐ

ಶ್ರೀ ರಾಮ ಕವಚಮ್

Shri Rama Kavacham

Rama Kavacham Kannada

ಅಗಸ್ತಿರುವಾಚ

ಆಜಾನುಬಾಹುಮರವಿನ್ದದಲಾಯತಾಕ್ಷ-

-ಮಾಜನ್ಮಶುದ್ಧರಸಹಾಸಮುಖಪ್ರಸಾದಮ್ ।

ಶ್ಯಾಮಂ ಗೃಹೀತ ಶರಚಾಪಮುದಾರರೂಪಂ

ರಾಮಂ ಸರಾಮಮಭಿರಾಮಮನುಸ್ಮರಾಮಿ ॥ 1 ॥

ಅಸ್ಯ ಶ್ರೀರಾಮಕವಚಸ್ಯ ಅಗಸ್ತ್ಯ ಋಷಿಃ ಅನುಷ್ಟುಪ್ ಛನ್ದಃ ಸೀತಾಲಕ್ಷ್ಮಣೋಪೇತಃ ಶ್ರೀರಾಮಚನ್ದ್ರೋ ದೇವತಾ ಶ್ರೀರಾಮಚನ್ದ್ರಪ್ರಸಾದಸಿದ್ಧ್ಯರ್ಥೇ ಜಪೇ ವಿನಿಯೋಗಃ ।

ಅಥ ಧ್ಯಾನಂ

ನೀಲಜೀಮೂತಸಙ್ಕಾಶಂ ವಿದ್ಯುದ್ವರ್ಣಾಮ್ಬರಾವೃತಮ್ ।

ಕೋಮಲಾಙ್ಗಂ ವಿಶಾಲಾಕ್ಷಂ ಯುವಾನಮತಿಸುನ್ದರಮ್ ॥ 1 ॥

ಸೀತಾಸೌಮಿತ್ರಿಸಹಿತಂ ಜಟಾಮುಕುಟಧಾರಿಣಮ್ ।

ಸಾಸಿತೂಣಧನುರ್ಬಾಣಪಾಣಿಂ ದಾನವಮರ್ದನಮ್ ॥ 2 ॥

ಯದಾ ಚೋರಭಯೇ ರಾಜಭಯೇ ಶತ್ರುಭಯೇ ತಥಾ ।

ಧ್ಯಾತ್ವಾ ರಘುಪತಿಂ ಕ್ರುದ್ಧಂ ಕಾಲಾನಲಸಮಪ್ರಭಮ್ ॥ 3 ॥

ಚೀರಕೃಷ್ಣಾಜಿನಧರಂ ಭಸ್ಮೋದ್ಧೂಲಿತವಿಗ್ರಹಮ್ ।

ಆಕರ್ಣಾಕೃಷ್ಟವಿಶಿಖಕೋದಣ್ಡಭುಜಮಣ್ಡಿತಮ್ ॥ 4 ॥

ರಣೇ ರಿಪೂನ್ ರಾವಣಾದೀಂಸ್ತೀಕ್ಷ್ಣಮಾರ್ಗಣವೃಷ್ಟಿಭಿಃ ।

ಸಂಹರನ್ತಂ ಮಹಾವೀರಮುಗ್ರಮೈನ್ದ್ರರಥಸ್ಥಿತಮ್ ॥ 5 ॥

ಲಕ್ಷ್ಮಣಾದ್ಯೈರ್ಮಹಾವೀರೈರ್ವೃತಂ ಹನುಮದಾದಿಭಿಃ ।

ಸುಗ್ರೀವಾದ್ಯೈರ್ಮಾಹಾವೀರೈಃ ಶೈಲವೃಕ್ಷಕರೋದ್ಯತೈಃ ॥ 6 ॥

ವೇಗಾತ್ಕರಾಲಹುಙ್ಕಾರೈರ್ಭುಭುಕ್ಕಾರಮಹಾರವೈಃ ।

ನದದ್ಭಿಃ ಪರಿವಾದದ್ಭಿಃ ಸಮರೇ ರಾವಣಂ ಪ್ರತಿ ॥ 7 ॥

ಶ್ರೀರಾಮ ಶತ್ರುಸಙ್ಘಾನ್ಮೇ ಹನ ಮರ್ದಯ ಖಾದಯ ।

ಭೂತಪ್ರೇತಪಿಶಾಚಾದೀನ್ ಶ್ರೀರಾಮಾಶು ವಿನಾಶಯ ॥ 8 ॥

ಏವಂ ಧ್ಯಾತ್ವಾ ಜಪೇದ್ರಾಮಕವಚಂ ಸಿದ್ಧಿದಾಯಕಮ್ ।

ಸುತೀಕ್ಷ್ಣ ವಜ್ರಕವಚಂ ಶೃಣು ವಕ್ಷ್ಯಾಮ್ಯನುತ್ತಮಮ್ ॥ 9 ॥

ಅಥ ಕವಚಮ್

ಶ್ರೀರಾಮಃ ಪಾತು ಮೇ ಮೂರ್ಧ್ನಿ ಪೂರ್ವೇ ಚ ರಘುವಂಶಜಃ ।

ದಕ್ಷಿಣೇ ಮೇ ರಘುವರಃ ಪಶ್ಚಿಮೇ ಪಾತು ಪಾವನಃ ॥ 10 ॥

ಉತ್ತರೇ ಮೇ ರಘುಪತಿರ್ಭಾಲಂ ದಶರಥಾತ್ಮಜಃ ।

ಭ್ರುವೋರ್ದೂರ್ವಾದಲಶ್ಯಾಮಸ್ತಯೋರ್ಮಧ್ಯೇ ಜನಾರ್ದನಃ ॥ 11 ॥

ಶ್ರೋತ್ರಂ ಮೇ ಪಾತು ರಾಜೇನ್ದ್ರೋ ದೃಶೌ ರಾಜೀವಲೋಚನಃ ।

ಘ್ರಾಣಂ ಮೇ ಪಾತು ರಾಜರ್ಷಿರ್ಗಣ್ಡೌ ಮೇ ಜಾನಕೀಪತಿಃ ॥ 12 ॥

ಕರ್ಣಮೂಲೇ ಖರಧ್ವಂಸೀ ಭಾಲಂ ಮೇ ರಘುವಲ್ಲಭಃ ।

ಜಿಹ್ವಾಂ ಮೇ ವಾಕ್ಪತಿಃ ಪಾತು ದನ್ತಪಙ್ಕ್ತೀ ರಘೂತ್ತಮಃ ॥ 13 ॥

ಓಷ್ಠೌ ಶ್ರೀರಾಮಚನ್ದ್ರೋ ಮೇ ಮುಖಂ ಪಾತು ಪರಾತ್ಪರಃ ।

ಕಣ್ಠಂ ಪಾತು ಜಗದ್ವನ್ದ್ಯಃ ಸ್ಕನ್ಧೌ ಮೇ ರಾವಣಾನ್ತಕಃ ॥ 14 ॥

ಧನುರ್ಬಾಣಧರಃ ಪಾತು ಭುಜೌ ಮೇ ವಾಲಿಮರ್ದನಃ ।

ಸರ್ವಾಣ್ಯಙ್ಗುಲಿಪರ್ವಾಣಿ ಹಸ್ತೌ ಮೇ ರಾಕ್ಷಸಾನ್ತಕಃ ॥ 15 ॥

ವಕ್ಷೋ ಮೇ ಪಾತು ಕಾಕುತ್ಸ್ಥಃ ಪಾತು ಮೇ ಹೃದಯಂ ಹರಿಃ ।

ಸ್ತನೌ ಸೀತಾಪತಿಃ ಪಾತು ಪಾರ್ಶ್ವಂ ಮೇ ಜಗದೀಶ್ವರಃ ॥ 16 ॥

ಮಧ್ಯಂ ಮೇ ಪಾತು ಲಕ್ಷ್ಮೀಶೋ ನಾಭಿಂ ಮೇ ರಘುನಾಯಕಃ ।

ಕೌಸಲ್ಯೇಯಃ ಕಟೀ ಪಾತು ಪೃಷ್ಠಂ ದುರ್ಗತಿನಾಶನಃ ॥ 17 ॥

ಗುಹ್ಯಂ ಪಾತು ಹೃಷೀಕೇಶಃ ಸಕ್ಥಿನೀ ಸತ್ಯವಿಕ್ರಮಃ ।

ಊರೂ ಶಾರ್ಙ್ಗಧರಃ ಪಾತು ಜಾನುನೀ ಹನುಮತ್ಪ್ರಿಯಃ ॥ 18 ॥

ಜಙ್ಘೇ ಪಾತು ಜಗದ್ವ್ಯಾಪೀ ಪಾದೌ ಮೇ ತಾಟಕಾನ್ತಕಃ ।

ಸರ್ವಾಙ್ಗಂ ಪಾತು ಮೇ ವಿಷ್ಣುಃ ಸರ್ವಸನ್ಧೀನನಾಮಯಃ ॥ 19 ॥

ಜ್ಞಾನೇನ್ದ್ರಿಯಾಣಿ ಪ್ರಾಣಾದೀನ್ ಪಾತು ಮೇ ಮಧುಸೂದನಃ ।

ಪಾತು ಶ್ರೀರಾಮಭದ್ರೋ ಮೇ ಶಬ್ದಾದೀನ್ವಿಷಯಾನಪಿ ॥ 20 ॥

ದ್ವಿಪದಾದೀನಿ ಭೂತಾನಿ ಮತ್ಸಮ್ಬನ್ಧೀನಿ ಯಾನಿ ಚ ।

ಜಾಮದಗ್ನ್ಯಮಹಾದರ್ಪದಲನಃ ಪಾತು ತಾನಿ ಮೇ ॥ 21 ॥

ಸೌಮಿತ್ರಿಪೂರ್ವಜಃ ಪಾತು ವಾಗಾದೀನೀನ್ದ್ರಿಯಾಣಿ ಚ ।

ರೋಮಾಙ್ಕುರಾಣ್ಯಶೇಷಾಣಿ ಪಾತು ಸುಗ್ರೀವರಾಜ್ಯದಃ ॥ 22 ॥

ವಾಙ್ಮನೋಬುದ್ಧ್ಯಹಙ್ಕಾರೈರ್ಜ್ಞಾನಾಜ್ಞಾನಕೃತಾನಿ ಚ ।

ಜನ್ಮಾನ್ತರಕೃತಾನೀಹ ಪಾಪಾನಿ ವಿವಿಧಾನಿ ಚ ॥ 23 ॥

ತಾನಿ ಸರ್ವಾಣಿ ದಗ್ಧ್ವಾಶು ಹರಕೋದಣ್ಡಖಣ್ಡನಃ ।

ಪಾತು ಮಾಂ ಸರ್ವತೋ ರಾಮಃ ಶಾರ್ಙ್ಗಬಾಣಧರಃ ಸದಾ ॥ 24 ॥

ಇತಿ ಶ್ರೀರಾಮಚನ್ದ್ರಸ್ಯ ಕವಚಂ ವಜ್ರಸಮ್ಮಿತಮ್ ।

ಗುಹ್ಯಾದ್ಗುಹ್ಯತಮಂ ದಿವ್ಯಂ ಸುತೀಕ್ಷ್ಣ ಮುನಿಸತ್ತಮ ॥ 25 ॥

ಯಃ ಪಠೇಚ್ಛೃಣುಯಾದ್ವಾಪಿ ಶ್ರಾವಯೇದ್ವಾ ಸಮಾಹಿತಃ ।

ಸ ಯಾತಿ ಪರಮಂ ಸ್ಥಾನಂ ರಾಮಚನ್ದ್ರಪ್ರಸಾದತಃ ॥ 26 ॥

ಮಹಾಪಾತಕಯುಕ್ತೋ ವಾ ಗೋಘ್ನೋ ವಾ ಭ್ರೂಣಹಾ ತಥಾ ।

ಶ್ರೀರಾಮಚನ್ದ್ರಕವಚಪಠನಾಚ್ಛುದ್ಧಿಮಾಪ್ನುಯಾತ್ ॥ 27 ॥

ಬ್ರಹ್ಮಹತ್ಯಾದಿಭಿಃ ಪಾಪೈರ್ಮುಚ್ಯತೇ ನಾತ್ರ ಸಂಶಯಃ ।

ಭೋ ಸುತೀಕ್ಷ್ಣ ಯಥಾ ಪೃಷ್ಟಂ ತ್ವಯಾ ಮಮ ಪುರಾಃ ಶುಭಮ್ ।

ತಥಾ ಶ್ರೀರಾಮಕವಚಂ ಮಯಾ ತೇ ವಿನಿವೇದಿತಮ್ ॥ 28 ॥

ಇತಿ ಶ್ರೀಮದಾನನ್ದರಾಮಾಯಣೇ ಮನೋಹರಕಾಣ್ಡೇ ಸುತೀಕ್ಷ್ಣಾಗಸ್ತ್ಯಸಂವಾದೇ ಶ್ರೀರಾಮಕವಚಮ್ ॥

Roman (IAST) Transliteration

agastiruvāca

ājānubāhumaravindadalāyatākṣa-

-mājanmaśuddharasahāsamukhaprasādam |

śyāmaṃ gṛhīta śaracāpamudārarūpaṃ

rāmaṃ sarāmamabhirāmamanusmarāmi || 1 ||

asya śrīrāmakavacasya agastya ṛṣiḥ anuṣṭup chandaḥ sītālakṣmaṇopetaḥ śrīrāmacandro devatā śrīrāmacandraprasādasiddhyarthe jape viniyogaḥ |

atha dhyānaṃ

nīlajīmūtasaṅkāśaṃ vidyudvarṇāmbarāvṛtam |

komalāṅgaṃ viśālākṣaṃ yuvānamatisundaram || 1 ||

sītāsaumitrisahitaṃ jaṭāmukuṭadhāriṇam |

sāsitūṇadhanurbāṇapāṇiṃ dānavamardanam || 2 ||

yadā corabhaye rājabhaye śatrubhaye tathā |

dhyātvā raghupatiṃ kruddhaṃ kālānalasamaprabham || 3 ||

cīrakṛṣṇājinadharaṃ bhasmoddhūlitavigraham |

ākarṇākṛṣṭaviśikhakodaṇḍabhujamaṇḍitam || 4 ||

raṇe ripūn rāvaṇādīṃstīkṣṇamārgaṇavṛṣṭibhiḥ |

saṃharantaṃ mahāvīramugramaindrarathasthitam || 5 ||

lakṣmaṇādyairmahāvīrairvṛtaṃ hanumadādibhiḥ |

sugrīvādyairmāhāvīraiḥ śailavṛkṣakarodyataiḥ || 6 ||

vegātkarālahuṅkārairbhubhukkāramahāravaiḥ |

nadadbhiḥ parivādadbhiḥ samare rāvaṇaṃ prati || 7 ||

śrīrāma śatrusaṅghānme hana mardaya khādaya |

bhūtapretapiśācādīn śrīrāmāśu vināśaya || 8 ||

evaṃ dhyātvā japedrāmakavacaṃ siddhidāyakam |

sutīkṣṇa vajrakavacaṃ śṛṇu vakṣyāmyanuttamam || 9 ||

atha kavacam

śrīrāmaḥ pātu me mūrdhni pūrve ca raghuvaṃśajaḥ |

dakṣiṇe me raghuvaraḥ paścime pātu pāvanaḥ || 10 ||

uttare me raghupatirbhālaṃ daśarathātmajaḥ |

bhruvordūrvādalaśyāmastayormadhye janārdanaḥ || 11 ||

śrotraṃ me pātu rājendro dṛśau rājīvalocanaḥ |

ghrāṇaṃ me pātu rājarṣirgaṇḍau me jānakīpatiḥ || 12 ||

karṇamūle kharadhvaṃsī bhālaṃ me raghuvallabhaḥ |

jihvāṃ me vākpatiḥ pātu dantapaṅktī raghūttamaḥ || 13 ||

oṣṭhau śrīrāmacandro me mukhaṃ pātu parātparaḥ |

kaṇṭhaṃ pātu jagadvandyaḥ skandhau me rāvaṇāntakaḥ || 14 ||

dhanurbāṇadharaḥ pātu bhujau me vālimardanaḥ |

sarvāṇyaṅguliparvāṇi hastau me rākṣasāntakaḥ || 15 ||

vakṣo me pātu kākutsthaḥ pātu me hṛdayaṃ hariḥ |

stanau sītāpatiḥ pātu pārśvaṃ me jagadīśvaraḥ || 16 ||

madhyaṃ me pātu lakṣmīśo nābhiṃ me raghunāyakaḥ |

kausalyeyaḥ kaṭī pātu pṛṣṭhaṃ durgatināśanaḥ || 17 ||

guhyaṃ pātu hṛṣīkeśaḥ sakthinī satyavikramaḥ |

ūrū śārṅgadharaḥ pātu jānunī hanumatpriyaḥ || 18 ||

jaṅghe pātu jagadvyāpī pādau me tāṭakāntakaḥ |

sarvāṅgaṃ pātu me viṣṇuḥ sarvasandhīnanāmayaḥ || 19 ||

jñānendriyāṇi prāṇādīn pātu me madhusūdanaḥ |

pātu śrīrāmabhadro me śabdādīnviṣayānapi || 20 ||

dvipadādīni bhūtāni matsambandhīni yāni ca |

jāmadagnyamahādarpadalanaḥ pātu tāni me || 21 ||

saumitripūrvajaḥ pātu vāgādīnīndriyāṇi ca |

romāṅkurāṇyaśeṣāṇi pātu sugrīvarājyadaḥ || 22 ||

vāṅmanobuddhyahaṅkārairjñānājñānakṛtāni ca |

janmāntarakṛtānīha pāpāni vividhāni ca || 23 ||

tāni sarvāṇi dagdhvāśu harakodaṇḍakhaṇḍanaḥ |

pātu māṃ sarvato rāmaḥ śārṅgabāṇadharaḥ sadā || 24 ||

iti śrīrāmacandrasya kavacaṃ vajrasammitam |

guhyādguhyatamaṃ divyaṃ sutīkṣṇa munisattama || 25 ||

yaḥ paṭhecchṛṇuyādvāpi śrāvayedvā samāhitaḥ |

sa yāti paramaṃ sthānaṃ rāmacandraprasādataḥ || 26 ||

mahāpātakayukto vā goghno vā bhrūṇahā tathā |

śrīrāmacandrakavacapaṭhanācchuddhimāpnuyāt || 27 ||

brahmahatyādibhiḥ pāpairmucyate nātra saṃśayaḥ |

bho sutīkṣṇa yathā pṛṣṭaṃ tvayā mama purāḥ śubham |

tathā śrīrāmakavacaṃ mayā te viniveditam || 28 ||

iti śrīmadānandarāmāyaṇe manoharakāṇḍe sutīkṣṇāgastyasaṃvāde śrīrāmakavacam ||