Shri Nrisimha Mantrarajapada Stotram

ॐ

ಶ್ರೀ ನೃಸಿಂಹ ಮನ್ತ್ರರಾಜಪಾದ ಸ್ತೋತ್ರಮ್

Narasimha Stotram Kannada

ಪಾರ್ವತ್ಯುವಾಚ ।

ಮನ್ತ್ರಾಣಾಂ ಪರಮಂ ಮನ್ತ್ರಂ ಗುಹ್ಯಾನಾಂ ಗುಹ್ಯಮೇವ ಚ ।

ಬ್ರೂಹಿ ಮೇ ನಾರಸಿಂಹಸ್ಯ ತತ್ತ್ವಂ ಮನ್ತ್ರಸ್ಯ ದುರ್ಲಭಮ್ ॥

ಶಙ್ಕರ ಉವಾಚ ।

ವೃತ್ತೋತ್ಫುಲ್ಲವಿಶಾಲಾಕ್ಷಂ ವಿಪಕ್ಷಕ್ಷಯದೀಕ್ಷಿತಮ್ ।

ನಿನಾದತ್ರಸ್ತವಿಶ್ವಾಣ್ಡಂ ವಿಷ್ಣುಮುಗ್ರಂ ನಮಾಮ್ಯಹಮ್ ॥ 1 ॥

ಸರ್ವೈರವಧ್ಯತಾಂ ಪ್ರಾಪ್ತಂ ಸಬಲೌಘಂ ದಿತೇಃ ಸುತಮ್ ।

ನಖಾಗ್ರೈಃ ಶಕಲೀಚಕ್ರೇ ಯಸ್ತಂ ವೀರಂ ನಮಾಮ್ಯಹಮ್ ॥ 2 ॥

ಪದಾವಷ್ಟಬ್ಧಪಾತಾಲಂ ಮೂರ್ಧಾಽಽವಿಷ್ಟತ್ರಿವಿಷ್ಟಪಮ್ ।

ಭುಜಪ್ರವಿಷ್ಟಾಷ್ಟದಿಶಂ ಮಹಾವಿಷ್ಣುಂ ನಮಾಮ್ಯಹಮ್ ॥ 3 ॥

ಜ್ಯೋತೀಂಷ್ಯರ್ಕೇನ್ದುನಕ್ಷತ್ರಜ್ವಲನಾದೀನ್ಯನುಕ್ರಮಾತ್ ।

ಜ್ವಲನ್ತಿ ತೇಜಸಾ ಯಸ್ಯ ತಂ ಜ್ವಲನ್ತಂ ನಮಾಮ್ಯಹಮ್ ॥ 4 ॥

ಸರ್ವೇನ್ದ್ರಿಯೈರಪಿ ವಿನಾ ಸರ್ವಂ ಸರ್ವತ್ರ ಸರ್ವದಾ ।

ಯೋ ಜಾನಾತಿ ನಮಾಮ್ಯಾದ್ಯಂ ತಮಹಂ ಸರ್ವತೋಮುಖಮ್ ॥ 5 ॥

ನರವತ್ ಸಿಂಹವಚ್ಚೈವ ಯಸ್ಯ ರೂಪಂ ಮಹಾತ್ಮನಃ ।

ಮಹಾಸಟಂ ಮಹಾದಂಷ್ಟ್ರಂ ತಂ ನೃಸಿಂಹಂ ನಮಾಮ್ಯಹಮ್ ॥ 6 ॥

ಯನ್ನಾಮಸ್ಮರಣಾದ್ಭೀತಾಃ ಭೂತವೇತಾಲರಾಕ್ಷಸಾಃ ।

ರೋಗಾದ್ಯಾಶ್ಚ ಪ್ರಣಶ್ಯನ್ತಿ ಭೀಷಣಂ ತಂ ನಮಾಮ್ಯಹಮ್ ॥ 7 ॥

ಸರ್ವೇಽಪಿ ಯಂ ಸಮಾಶ್ರಿತ್ಯ ಸಕಲಂ ಭದ್ರಮಶ್ನುತೇ ।

ಶ್ರಿಯಾ ಚ ಭದ್ರಯಾ ಜುಷ್ಟೋ ಯಸ್ತಂ ಭದ್ರಂ ನಮಾಮ್ಯಹಮ್ ॥ 8 ॥

ಸಾಕ್ಷಾತ್ ಸ್ವಕಾಲೇ ಸಮ್ಪ್ರಾಪ್ತಂ ಮೃತ್ಯುಂ ಶತ್ರುಗಣಾನ್ವಿತಮ್ ।

ಭಕ್ತಾನಾಂ ನಾಶಯೇದ್ಯಸ್ತು ಮೃತ್ಯುಮೃತ್ಯುಂ ನಮಾಮ್ಯಹಮ್ ॥ 9 ॥

ನಮಸ್ಕಾರಾತ್ಮಕಂ ಯಸ್ಮೈ ವಿಧಾಯಾತ್ಮನಿವೇದನಮ್ ।

ತ್ಯಕ್ತದುಃಖೋಽಖಿಲಾನ್ ಕಾಮಾನಶ್ನನ್ತಂ ತಂ ನಮಾಮ್ಯಹಮ್ ॥ 10 ॥

ದಾಸಭೂತಾಃ ಸ್ವತಃ ಸರ್ವೇ ಹ್ಯಾತ್ಮಾನಃ ಪರಮಾತ್ಮನಃ ।

ಅತೋಽಹಮಪಿ ತೇ ದಾಸಃ ಇತಿ ಮತ್ವಾ ನಮಾಮ್ಯಹಮ್ ॥ 11 ॥

ಶಙ್ಕರೇಣಾದರಾತ್ ಪ್ರೋಕ್ತಂ ಪದಾನಾಂ ತತ್ತ್ವಮುತ್ತಮಮ್ ।

ತ್ರಿಸನ್ಧ್ಯಂ ಯಃ ಪಠೇತ್ತಸ್ಯ ಶ್ರೀವಿದ್ಯಾಽಽಯುಶ್ಚ ವರ್ಧತೇ ॥ 12 ॥

ಇತಿ ಶ್ರೀಶಙ್ಕರಕೃತ ಶ್ರೀ ನೃಸಿಂಹ ಮನ್ತ್ರರಾಜಪದ ಸ್ತೋತ್ರಮ್ ।

Roman (IAST) Transliteration

pārvatyuvāca |

mantrāṇāṃ paramaṃ mantraṃ guhyānāṃ guhyameva ca |

brūhi me nārasiṃhasya tattvaṃ mantrasya durlabham ||

śaṅkara uvāca |

vṛttotphullaviśālākṣaṃ vipakṣakṣayadīkṣitam |

ninādatrastaviśvāṇḍaṃ viṣṇumugraṃ namāmyaham || 1 ||

sarvairavadhyatāṃ prāptaṃ sabalaughaṃ diteḥ sutam |

nakhāgraiḥ śakalīcakre yastaṃ vīraṃ namāmyaham || 2 ||

padāvaṣṭabdhapātālaṃ mūrdhā''viṣṭatriviṣṭapam |

bhujapraviṣṭāṣṭadiśaṃ mahāviṣṇuṃ namāmyaham || 3 ||

jyotīṃṣyarkendunakṣatrajvalanādīnyanukramāt |

jvalanti tejasā yasya taṃ jvalantaṃ namāmyaham || 4 ||

sarvendriyairapi vinā sarvaṃ sarvatra sarvadā |

yo jānāti namāmyādyaṃ tamahaṃ sarvatomukham || 5 ||

naravat siṃhavaccaiva yasya rūpaṃ mahātmanaḥ |

mahāsaṭaṃ mahādaṃṣṭraṃ taṃ nṛsiṃhaṃ namāmyaham || 6 ||

yannāmasmaraṇādbhītāḥ bhūtavetālarākṣasāḥ |

rogādyāśca praṇaśyanti bhīṣaṇaṃ taṃ namāmyaham || 7 ||

sarve'pi yaṃ samāśritya sakalaṃ bhadramaśnute |

śriyā ca bhadrayā juṣṭo yastaṃ bhadraṃ namāmyaham || 8 ||

sākṣāt svakāle samprāptaṃ mṛtyuṃ śatrugaṇānvitam |

bhaktānāṃ nāśayedyastu mṛtyumṛtyuṃ namāmyaham || 9 ||

namaskārātmakaṃ yasmai vidhāyātmanivedanam |

tyaktaduḥkho'khilān kāmānaśnantaṃ taṃ namāmyaham || 10 ||

dāsabhūtāḥ svataḥ sarve hyātmānaḥ paramātmanaḥ |

ato'hamapi te dāsaḥ iti matvā namāmyaham || 11 ||

śaṅkareṇādarāt proktaṃ padānāṃ tattvamuttamam |

trisandhyaṃ yaḥ paṭhettasya śrīvidyā''yuśca vardhate || 12 ||

iti śrīśaṅkarakṛta śrī nṛsiṃha mantrarājapada stotram |