Shri Dakshinamurti Kavacham (rudrayamala)

ॐ

ಶ್ರೀ ದಕ್ಷಿಣಾಮೂರ್ತಿ ಕವಚಂ (ರುದ್ರಯಾಮಲ)

Shiva Kavacham Kannada

ಪಾರ್ವತ್ಯುವಾಚ

ನಮಸ್ತೇಽಸ್ತು ತ್ರಯೀನಾಥ ಪರಮಾನನ್ದಕಾರಕ ।

ಕವಚಂ ದಕ್ಷಿಣಾಮೂರ್ತೇಃ ಕೃಪಯಾ ವದ ಮೇ ಪ್ರಭೋ ॥ 1 ॥

ಈಶ್ವರ ಉವಾಚ

ವಕ್ಷ್ಯೇಽಹಂ ದೇವದೇವೇಶಿ ದಕ್ಷಿಣಾಮೂರ್ತಿರವ್ಯಯಮ್ ।

ಕವಚಂ ಸರ್ವಪಾಪಘ್ನಂ ವೇದಾನ್ತಜ್ಞಾನಗೋಚರಮ್ ॥ 2 ॥

ಅಣಿಮಾದಿ ಮಹಾಸಿದ್ಧಿವಿಧಾನಚತುರಂ ಶುಭಮ್ ।

ವೇದಶಾಸ್ತ್ರಪುರಾಣಾನಿ ಕವಿತಾ ತರ್ಕ ಏವ ಚ ॥ 3 ॥

ಬಹುಧಾ ದೇವಿ ಜಾಯನ್ತೇ ಕವಚಸ್ಯ ಪ್ರಭಾವತಃ ।

ಋಷಿರ್ಬ್ರಹ್ಮಾ ಸಮುದ್ದಿಷ್ಟಶ್ಛನ್ದೋಽನುಷ್ಟುಬುದಾಹೃತಮ್ ॥ 4 ॥

ದೇವತಾ ದಕ್ಷಿಣಾಮೂರ್ತಿಃ ಪರಮಾತ್ಮಾ ಸದಾಶಿವಃ ।

ಬೀಜಂ ವೇದಾದಿಕಂ ಚೈವ ಸ್ವಾಹಾ ಶಕ್ತಿರುದಾಹೃತಾ ।

ಸರ್ವಜ್ಞತ್ವೇಽಪಿ ದೇವೇಶಿ ವಿನಿಯೋಗಂ ಪ್ರಚಕ್ಷತೇ ॥ 5 ॥

ಧ್ಯಾನಮ್

ಅದ್ವನ್ದ್ವನೇತ್ರಮಮಲೇನ್ದುಕಲಾವತಂಸಂ

ಹಂಸಾವಲಮ್ಬಿತ ಸಮಾನ ಜಟಾಕಲಾಪಮ್ ।

ಆನೀಲಕಣ್ಠಮುಪಕಣ್ಠಮುನಿಪ್ರವೀರಾನ್

ಅಧ್ಯಾಪಯನ್ತಮವಲೋಕಯ ಲೋಕನಾಥಮ್ ॥

ಕವಚಮ್

ಓಮ್ । ಶಿರೋ ಮೇ ದಕ್ಷಿಣಾಮೂರ್ತಿರವ್ಯಾತ್ ಫಾಲಂ ಮಹೇಶ್ವರಃ ।

ದೃಶೌ ಪಾತು ಮಹಾದೇವಃ ಶ್ರವಣೇ ಚನ್ದ್ರಶೇಖರಃ ॥ 1 ॥

ಕಪೋಲೌ ಪಾತು ಮೇ ರುದ್ರೋ ನಾಸಾಂ ಪಾತು ಜಗದ್ಗುರುಃ ।

ಮುಖಂ ಗೌರೀಪತಿಃ ಪಾತು ರಸನಾಂ ವೇದರೂಪಧೃತ್ ॥ 2 ॥

ದಶನಾಂ ತ್ರಿಪುರಧ್ವಂಸೀ ಚೋಷ್ಠಂ ಪನ್ನಗಭೂಷಣಃ ।

ಅಧರಂ ಪಾತು ವಿಶ್ವಾತ್ಮಾ ಹನೂ ಪಾತು ಜಗನ್ಮಯಃ ॥ 3 ॥

ಚುಬುಕಂ ದೇವದೇವಸ್ತು ಪಾತು ಕಣ್ಠಂ ಜಟಾಧರಃ ।

ಸ್ಕನ್ಧೌ ಮೇ ಪಾತು ಶುದ್ಧಾತ್ಮಾ ಕರೌ ಪಾತು ಯಮಾನ್ತಕಃ ॥ 4 ॥

ಕುಚಾಗ್ರಂ ಕರಮಧ್ಯಂ ಚ ನಖರಾನ್ ಶಙ್ಕರಃ ಸ್ವಯಮ್ ।

ಹೃನ್ಮೇ ಪಶುಪತಿಃ ಪಾತು ಪಾರ್ಶ್ವೇ ಪರಮಪೂರುಷಃ ॥ 5 ॥

ಮಧ್ಯಮಂ ಪಾತು ಶರ್ವೋ ಮೇ ನಾಭಿಂ ನಾರಾಯಣಪ್ರಿಯಃ ।

ಕಟಿಂ ಪಾತು ಜಗದ್ಭರ್ತಾ ಸಕ್ಥಿನೀ ಚ ಮೃಡಃ ಸ್ವಯಮ್ ॥ 6 ॥

ಕೃತ್ತಿವಾಸಾಃ ಸ್ವಯಂ ಗುಹ್ಯಾಮೂರೂ ಪಾತು ಪಿನಾಕಧೃತ್ ।

ಜಾನುನೀ ತ್ರ್ಯಮ್ಬಕಃ ಪಾತು ಜಙ್ಘೇ ಪಾತು ಸದಾಶಿವಃ ॥ 7 ॥

ಸ್ಮರಾರಿಃ ಪಾತು ಮೇ ಪಾದೌ ಪಾತು ಸರ್ವಾಙ್ಗಮೀಶ್ವರಃ ।

ಇತೀದಂ ಕವಚಂ ದೇವಿ ಪರಮಾನನ್ದದಾಯಕಮ್ ॥ 8 ॥

ಜ್ಞಾನವಾಗರ್ಥದಂ ವೀರ್ಯಮಣಿಮಾದಿವಿಭೂತಿದಮ್ ।

ಆಯುರಾರೋಗ್ಯಮೈಶ್ವರ್ಯಮಪಮೃತ್ಯುಭಯಾಪಹಮ್ ॥ 9 ॥

ಪ್ರಾತಃ ಕಾಲೇ ಶುಚಿರ್ಭೂತ್ವಾ ತ್ರಿವಾರಂ ಸರ್ವದಾ ಜಪೇತ್ ।

ನಿತ್ಯಂ ಪೂಜಾಸಮಾಯುಕ್ತಃ ಸಂವತ್ಸರಮತನ್ದ್ರಿತಃ ॥ 10 ॥

ಜಪೇತ್ ತ್ರಿಸನ್ಧ್ಯಂ ಯೋ ವಿದ್ವಾನ್ ವೇದಶಾಸ್ತ್ರಾರ್ಥಪಾರಗಃ ।

ಗದ್ಯಪದ್ಯೈಸ್ತಥಾ ಚಾಪಿ ನಾಟಕಾಃ ಸ್ವಯಮೇವ ಹಿ ।

ನಿರ್ಗಚ್ಛನ್ತಿ ಮುಖಾಮ್ಭೋಜಾತ್ಸತ್ಯಮೇತನ್ನ ಸಂಶಯಃ ॥ 11 ॥

ಇತಿ ರುದ್ರಯಾಮಲೇ ಉಮಾಮಹೇಶ್ವರಸಂವಾದೇ ಶ್ರೀ ದಕ್ಷಿಣಾಮೂರ್ತಿ ಕವಚಮ್ ॥

Roman (IAST) Transliteration

pārvatyuvāca

namaste'stu trayīnātha paramānandakāraka |

kavacaṃ dakṣiṇāmūrteḥ kṛpayā vada me prabho || 1 ||

īśvara uvāca

vakṣye'haṃ devadeveśi dakṣiṇāmūrtiravyayam |

kavacaṃ sarvapāpaghnaṃ vedāntajñānagocaram || 2 ||

aṇimādi mahāsiddhividhānacaturaṃ śubham |

vedaśāstrapurāṇāni kavitā tarka eva ca || 3 ||

bahudhā devi jāyante kavacasya prabhāvataḥ |

ṛṣirbrahmā samuddiṣṭaśchando'nuṣṭubudāhṛtam || 4 ||

devatā dakṣiṇāmūrtiḥ paramātmā sadāśivaḥ |

bījaṃ vedādikaṃ caiva svāhā śaktirudāhṛtā |

sarvajñatve'pi deveśi viniyogaṃ pracakṣate || 5 ||

dhyānam

advandvanetramamalendukalāvataṃsaṃ

haṃsāvalambita samāna jaṭākalāpam |

ānīlakaṇṭhamupakaṇṭhamunipravīrān

adhyāpayantamavalokaya lokanātham ||

kavacam

om | śiro me dakṣiṇāmūrtiravyāt phālaṃ maheśvaraḥ |

dṛśau pātu mahādevaḥ śravaṇe candraśekharaḥ || 1 ||

kapolau pātu me rudro nāsāṃ pātu jagadguruḥ |

mukhaṃ gaurīpatiḥ pātu rasanāṃ vedarūpadhṛt || 2 ||

daśanāṃ tripuradhvaṃsī coṣṭhaṃ pannagabhūṣaṇaḥ |

adharaṃ pātu viśvātmā hanū pātu jaganmayaḥ || 3 ||

cubukaṃ devadevastu pātu kaṇṭhaṃ jaṭādharaḥ |

skandhau me pātu śuddhātmā karau pātu yamāntakaḥ || 4 ||

kucāgraṃ karamadhyaṃ ca nakharān śaṅkaraḥ svayam |

hṛnme paśupatiḥ pātu pārśve paramapūruṣaḥ || 5 ||

madhyamaṃ pātu śarvo me nābhiṃ nārāyaṇapriyaḥ |

kaṭiṃ pātu jagadbhartā sakthinī ca mṛḍaḥ svayam || 6 ||

kṛttivāsāḥ svayaṃ guhyāmūrū pātu pinākadhṛt |

jānunī tryambakaḥ pātu jaṅghe pātu sadāśivaḥ || 7 ||

smarāriḥ pātu me pādau pātu sarvāṅgamīśvaraḥ |

itīdaṃ kavacaṃ devi paramānandadāyakam || 8 ||

jñānavāgarthadaṃ vīryamaṇimādivibhūtidam |

āyurārogyamaiśvaryamapamṛtyubhayāpaham || 9 ||

prātaḥ kāle śucirbhūtvā trivāraṃ sarvadā japet |

nityaṃ pūjāsamāyuktaḥ saṃvatsaramatandritaḥ || 10 ||

japet trisandhyaṃ yo vidvān vedaśāstrārthapāragaḥ |

gadyapadyaistathā cāpi nāṭakāḥ svayameva hi |

nirgacchanti mukhāmbhojātsatyametanna saṃśayaḥ || 11 ||

iti rudrayāmale umāmaheśvarasaṃvāde śrī dakṣiṇāmūrti kavacam ||