Mantra Matrika Pushpa Mala Stava

ॐ

ಮನ್ತ್ರ ಮಾತೃಕಾ ಪುಷ್ಪ ಮಾಲಾ ಸ್ತವ

Kannada

ಕಲ್ಲೋಲೋಲ್ಲಸಿತಾಮೃತಾಬ್ಧಿಲಹರೀಮಧ್ಯೇ ವಿರಾಜನ್ಮಣಿ-

-ದ್ವೀಪೇ ಕಲ್ಪಕವಾಟಿಕಾಪರಿವೃತೇ ಕಾದಮ್ಬವಾಟ್ಯುಜ್ಜ್ವಲೇ ।

ರತ್ನಸ್ತಮ್ಭಸಹಸ್ರನಿರ್ಮಿತಸಭಾಮಧ್ಯೇ ವಿಮಾನೋತ್ತಮೇ

ಚಿನ್ತಾರತ್ನವಿನಿರ್ಮಿತಂ ಜನನಿ ತೇ ಸಿಂಹಾಸನಂ ಭಾವಯೇ ॥ 1 ॥

ಏಣಾಙ್ಕಾನಲಭಾನುಮಣ್ಡಲಲಸಚ್ಛ್ರೀಚಕ್ರಮಧ್ಯೇ ಸ್ಥಿತಾಂ

ಬಾಲಾರ್ಕದ್ಯುತಿಭಾಸುರಾಂ ಕರತಲೈಃ ಪಾಶಾಙ್ಕುಶೌ ಬಿಭ್ರತೀಮ್ ।

ಚಾಪಂ ಬಾಣಮಪಿ ಪ್ರಸನ್ನವದನಾಂ ಕೌಸುಮ್ಭವಸ್ತ್ರಾನ್ವಿತಾಂ

ತಾಂ ತ್ವಾಂ ಚನ್ದ್ರಕಲಾವತಂಸಮಕುಟಾಂ ಚಾರುಸ್ಮಿತಾಂ ಭಾವಯೇ ॥ 2 ॥

ಈಶಾನಾದಿಪದಂ ಶಿವೈಕಫಲದಂ ರತ್ನಾಸನಂ ತೇ ಶುಭಂ

ಪಾದ್ಯಂ ಕುಙ್ಕುಮಚನ್ದನಾದಿಭರಿತೈರರ್ಘ್ಯಂ ಸರತ್ನಾಕ್ಷತೈಃ ।

ಶುದ್ಧೈರಾಚಮನೀಯಕಂ ತವ ಜಲೈರ್ಭಕ್ತ್ಯಾ ಮಯಾ ಕಲ್ಪಿತಂ

ಕಾರುಣ್ಯಾಮೃತವಾರಿಧೇ ತದಖಿಲಂ ಸನ್ತುಷ್ಟಯೇ ಕಲ್ಪತಾಮ್ ॥ 3 ॥

ಲಕ್ಷ್ಯೇ ಯೋಗಿಜನಸ್ಯ ರಕ್ಷಿತಜಗಜ್ಜಾಲೇ ವಿಶಾಲೇಕ್ಷಣೇ

ಪ್ರಾಲೇಯಾಮ್ಬುಪಟೀರಕುಙ್ಕುಮಲಸತ್ಕರ್ಪೂರಮಿಶ್ರೋದಕೈಃ ।

ಗೋಕ್ಷೀರೈರಪಿ ನಾರಿಕೇಲಸಲಿಲೈಃ ಶುದ್ಧೋದಕೈರ್ಮನ್ತ್ರಿತೈಃ

ಸ್ನಾನಂ ದೇವಿ ಧಿಯಾ ಮಯೈತದಖಿಲಂ ಸನ್ತುಷ್ಟಯೇ ಕಲ್ಪತಾಮ್ ॥ 4 ॥

ಹ್ರೀಂ‍ಕಾರಾಙ್ಕಿತಮನ್ತ್ರಲಕ್ಷಿತತನೋ ಹೇಮಾಚಲಾತ್ಸಞ್ಚಿತೈಃ

ರತ್ನೈರುಜ್ಜ್ವಲಮುತ್ತರೀಯಸಹಿತಂ ಕೌಸುಮ್ಭವರ್ಣಾಂಶುಕಮ್ ।

ಮುಕ್ತಾಸನ್ತತಿಯಜ್ಞಸೂತ್ರಮಮಲಂ ಸೌವರ್ಣತನ್ತೂದ್ಭವಂ

ದತ್ತಂ ದೇವಿ ಧಿಯಾ ಮಯೈತದಖಿಲಂ ಸನ್ತುಷ್ಟಯೇ ಕಲ್ಪತಾಮ್ ॥ 5 ॥

ಹಂಸೈರಪ್ಯತಿಲೋಭನೀಯಗಮನೇ ಹಾರಾವಲೀಮುಜ್ಜ್ವಲಾಂ

ಹಿನ್ದೋಲದ್ಯುತಿಹೀರಪೂರಿತತರೇ ಹೇಮಾಙ್ಗದೇ ಕಙ್ಕಣೇ ।

ಮಞ್ಜೀರೌ ಮಣಿಕುಣ್ಡಲೇ ಮಕುಟಮಪ್ಯರ್ಧೇನ್ದುಚೂಡಾಮಣಿಂ

ನಾಸಾಮೌಕ್ತಿಕಮಙ್ಗುಲೀಯಕಟಕೌ ಕಾಞ್ಚೀಮಪಿ ಸ್ವೀಕುರು ॥ 6 ॥

ಸರ್ವಾಙ್ಗೇ ಘನಸಾರಕುಙ್ಕುಮಘನಶ್ರೀಗನ್ಧಪಙ್ಕಾಙ್ಕಿತಂ

ಕಸ್ತೂರೀತಿಲಕಂ ಚ ಫಾಲಫಲಕೇ ಗೋರೋಚನಾಪತ್ರಕಮ್ ।

ಗಣ್ಡಾದರ್ಶನಮಣ್ಡಲೇ ನಯನಯೋರ್ದಿವ್ಯಾಞ್ಜನಂ ತೇಽಞ್ಚಿತಂ

ಕಣ್ಠಾಬ್ಜೇ ಮೃಗನಾಭಿಪಙ್ಕಮಮಲಂ ತ್ವತ್ಪ್ರೀತಯೇ ಕಲ್ಪತಾಮ್ ॥ 7 ॥

ಕಹ್ಲಾರೋತ್ಪಲಮಲ್ಲಿಕಾಮರುವಕೈಃ ಸೌವರ್ಣಪಙ್ಕೇರುಹೈ-

-ರ್ಜಾತೀಚಮ್ಪಕಮಾಲತೀವಕುಲಕೈರ್ಮನ್ದಾರಕುನ್ದಾದಿಭಿಃ ।

ಕೇತಕ್ಯಾ ಕರವೀರಕೈರ್ಬಹುವಿಧೈಃ ಕ್ಲುಪ್ತಾಃ ಸ್ರಜೋ ಮಾಲಿಕಾಃ

ಸಙ್ಕಲ್ಪೇನ ಸಮರ್ಪಯಾಮಿ ವರದೇ ಸನ್ತುಷ್ಟಯೇ ಗೃಹ್ಯತಾಮ್ ॥ 8 ॥

ಹನ್ತಾರಂ ಮದನಸ್ಯ ನನ್ದಯಸಿ ಯೈರಙ್ಗೈರನಙ್ಗೋಜ್ಜ್ವಲೈ-

-ರ್ಯೈರ್ಭೃಙ್ಗಾವಲಿನೀಲಕುನ್ತಲಭರೈರ್ಬಧ್ನಾಸಿ ತಸ್ಯಾಶಯಮ್ ।

ತಾನೀಮಾನಿ ತವಾಮ್ಬ ಕೋಮಲತರಾಣ್ಯಾಮೋದಲೀಲಾಗೃಹಾ-

-ಣ್ಯಾಮೋದಾಯ ದಶಾಙ್ಗಗುಗ್ಗುಲುಘೃತೈರ್ಧೂಪೈರಹಂ ಧೂಪಯೇ ॥ 9 ॥

ಲಕ್ಷ್ಮೀಮುಜ್ಜ್ವಲಯಾಮಿ ರತ್ನನಿವಹೋದ್ಭಾಸ್ವತ್ತರೇ ಮನ್ದಿರೇ

ಮಾಲಾರೂಪವಿಲಮ್ಬಿತೈರ್ಮಣಿಮಯಸ್ತಮ್ಭೇಷು ಸಮ್ಭಾವಿತೈಃ ।

ಚಿತ್ರೈರ್ಹಾಟಕಪುತ್ರಿಕಾಕರಧೃತೈರ್ಗವ್ಯೈರ್ಘೃತೈರ್ವರ್ಧಿತೈ-

-ರ್ದಿವ್ಯೈರ್ದೀಪಗಣೈರ್ಧಿಯಾ ಗಿರಿಸುತೇ ಸನ್ತುಷ್ಟಯೇ ಕಲ್ಪತಾಮ್ ॥ 10 ॥

ಹ್ರೀಂ‍ಕಾರೇಶ್ವರಿ ತಪ್ತಹಾಟಕಕೃತೈಃ ಸ್ಥಾಲೀಸಹಸ್ರೈರ್ಭೃತಂ

ದಿವ್ಯಾನ್ನಂ ಘೃತಸೂಪಶಾಕಭರಿತಂ ಚಿತ್ರಾನ್ನಭೇದಂ ತಥಾ ।

ದುಗ್ಧಾನ್ನಂ ಮಧುಶರ್ಕರಾದಧಿಯುತಂ ಮಾಣಿಕ್ಯಪಾತ್ರೇ ಸ್ಥಿತಂ

ಮಾಷಾಪೂಪಸಹಸ್ರಮಮ್ಬ ಸಫಲಂ ನೈವೇದ್ಯಮಾವೇದಯೇ ॥ 11 ॥

ಸಚ್ಛಾಯೈರ್ವರಕೇತಕೀದಲರುಚಾ ತಾಮ್ಬೂಲವಲ್ಲೀದಲೈಃ

ಪೂಗೈರ್ಭೂರಿಗುಣೈಃ ಸುಗನ್ಧಿಮಧುರೈಃ ಕರ್ಪೂರಖಣ್ಡೋಜ್ಜ್ವಲೈಃ ।

ಮುಕ್ತಾಚೂರ್ಣವಿರಾಜಿತೈರ್ಬಹುವಿಧೈರ್ವಕ್ತ್ರಾಮ್ಬುಜಾಮೋದನೈಃ

ಪೂರ್ಣಾ ರತ್ನಕಲಾಚಿಕಾ ತವ ಮುದೇ ನ್ಯಸ್ತಾ ಪುರಸ್ತಾದುಮೇ ॥ 12 ॥

ಕನ್ಯಾಭಿಃ ಕಮನೀಯಕಾನ್ತಿಭಿರಲಙ್ಕಾರಾಮಲಾರಾರ್ತಿಕಾ

ಪಾತ್ರೇ ಮೌಕ್ತಿಕಚಿತ್ರಪಙ್ಕ್ತಿವಿಲಸತ್ಕರ್ಪೂರದೀಪಾಲಿಭಿಃ ।

ತತ್ತತ್ತಾಲಮೃದಙ್ಗಗೀತಸಹಿತಂ ನೃತ್ಯತ್ಪದಾಮ್ಭೋರುಹಂ

ಮನ್ತ್ರಾರಾಧನಪೂರ್ವಕಂ ಸುವಿಹಿತಂ ನೀರಾಜನಂ ಗೃಹ್ಯತಾಮ್ ॥ 13 ॥

ಲಕ್ಷ್ಮೀರ್ಮೌಕ್ತಿಕಲಕ್ಷಕಲ್ಪಿತಸಿತಚ್ಛತ್ತ್ರಂ ತು ಧತ್ತೇ ರಸಾ-

-ದಿನ್ದ್ರಾಣೀ ಚ ರತಿಶ್ಚ ಚಾಮರವರೇ ಧತ್ತೇ ಸ್ವಯಂ ಭಾರತೀ ।

ವೀಣಾಮೇಣವಿಲೋಚನಾಃ ಸುಮನಸಾಂ ನೃತ್ಯನ್ತಿ ತದ್ರಾಗವ-

-ದ್ಭಾವೈರಾಙ್ಗಿಕಸಾತ್ತ್ವಿಕೈಃ ಸ್ಫುಟರಸಂ ಮಾತಸ್ತದಾಕರ್ಣ್ಯತಾಮ್ ॥ 14 ॥

ಹ್ರೀಂ‍ಕಾರತ್ರಯಸಮ್ಪುಟೇನ ಮನುನೋಪಾಸ್ಯೇ ತ್ರಯೀಮೌಲಿಭಿ-

-ರ್ವಾಕ್ಯೈರ್ಲಕ್ಷ್ಯತನೋ ತವ ಸ್ತುತಿವಿಧೌ ಕೋ ವಾ ಕ್ಷಮೇತಾಮ್ಬಿಕೇ ।

ಸಲ್ಲಾಪಾಃ ಸ್ತುತಯಃ ಪ್ರದಕ್ಷಿಣಶತಂ ಸಞ್ಚಾರ ಏವಾಸ್ತು ತೇ

ಸಂವೇಶೋ ನಮಸಃ ಸಹಸ್ರಮಖಿಲಂ ತ್ವತ್ಪ್ರೀತಯೇ ಕಲ್ಪತಾಮ್ ॥ 15 ॥

ಶ್ರೀಮನ್ತ್ರಾಕ್ಷರಮಾಲಯಾ ಗಿರಿಸುತಾಂ ಯಃ ಪೂಜಯೇಚ್ಚೇತಸಾ

ಸನ್ಧ್ಯಾಸು ಪ್ರತಿವಾಸರಂ ಸುನಿಯತಸ್ತಸ್ಯಾಮಲಂ ಸ್ಯಾನ್ಮನಃ ।

ಚಿತ್ತಾಮ್ಭೋರುಹಮಣ್ಟಪೇ ಗಿರಿಸುತಾ ನೃತ್ತಂ ವಿಧತ್ತೇ ರಸಾ-

-ದ್ವಾಣೀ ವಕ್ತ್ರಸರೋರುಹೇ ಜಲಧಿಜಾ ಗೇಹೇ ಜಗನ್ಮಙ್ಗಲಾ ॥ 16 ॥

ಇತಿ ಗಿರಿವರಪುತ್ರೀಪಾದರಾಜೀವಭೂಷಾ

ಭುವನಮಮಲಯನ್ತೀ ಸೂಕ್ತಿಸೌರಭ್ಯಸಾರೈಃ ।

ಶಿವಪದಮಕರನ್ದಸ್ಯನ್ದಿನೀಯಂ ನಿಬದ್ಧಾ

ಮದಯತು ಕವಿಭೃಙ್ಗಾನ್ಮಾತೃಕಾಪುಷ್ಪಮಾಲಾ ॥ 17 ॥

ಇತಿ ಶ್ರೀಮತ್ಪರಮಹಂಸಪರಿವ್ರಾಜಕಾಚಾರ್ಯಸ್ಯ ಶ್ರೀಗೋವಿನ್ದಭಗವತ್ಪೂಜ್ಯಪಾದಶಿಷ್ಯಸ್ಯ ಶ್ರೀಮಚ್ಛಙ್ಕರಭಗವತಃ ಕೃತೌ ಮನ್ತ್ರಮಾತೃಕಾಪುಷ್ಪಮಾಲಾ ಸ್ತವಃ ।

Roman (IAST) Transliteration

kallolollasitāmṛtābdhilaharīmadhye virājanmaṇi-

-dvīpe kalpakavāṭikāparivṛte kādambavāṭyujjvale |

ratnastambhasahasranirmitasabhāmadhye vimānottame

cintāratnavinirmitaṃ janani te siṃhāsanaṃ bhāvaye || 1 ||

eṇāṅkānalabhānumaṇḍalalasacchrīcakramadhye sthitāṃ

bālārkadyutibhāsurāṃ karatalaiḥ pāśāṅkuśau bibhratīm |

cāpaṃ bāṇamapi prasannavadanāṃ kausumbhavastrānvitāṃ

tāṃ tvāṃ candrakalāvataṃsamakuṭāṃ cārusmitāṃ bhāvaye || 2 ||

īśānādipadaṃ śivaikaphaladaṃ ratnāsanaṃ te śubhaṃ

pādyaṃ kuṅkumacandanādibharitairarghyaṃ saratnākṣataiḥ |

śuddhairācamanīyakaṃ tava jalairbhaktyā mayā kalpitaṃ

kāruṇyāmṛtavāridhe tadakhilaṃ santuṣṭaye kalpatām || 3 ||

lakṣye yogijanasya rakṣitajagajjāle viśālekṣaṇe

prāleyāmbupaṭīrakuṅkumalasatkarpūramiśrodakaiḥ |

gokṣīrairapi nārikelasalilaiḥ śuddhodakairmantritaiḥ

snānaṃ devi dhiyā mayaitadakhilaṃ santuṣṭaye kalpatām || 4 ||

hrīṃ‍kārāṅkitamantralakṣitatano hemācalātsañcitaiḥ

ratnairujjvalamuttarīyasahitaṃ kausumbhavarṇāṃśukam |

muktāsantatiyajñasūtramamalaṃ sauvarṇatantūdbhavaṃ

dattaṃ devi dhiyā mayaitadakhilaṃ santuṣṭaye kalpatām || 5 ||

haṃsairapyatilobhanīyagamane hārāvalīmujjvalāṃ

hindoladyutihīrapūritatare hemāṅgade kaṅkaṇe |

mañjīrau maṇikuṇḍale makuṭamapyardhenducūḍāmaṇiṃ

nāsāmauktikamaṅgulīyakaṭakau kāñcīmapi svīkuru || 6 ||

sarvāṅge ghanasārakuṅkumaghanaśrīgandhapaṅkāṅkitaṃ

kastūrītilakaṃ ca phālaphalake gorocanāpatrakam |

gaṇḍādarśanamaṇḍale nayanayordivyāñjanaṃ te'ñcitaṃ

kaṇṭhābje mṛganābhipaṅkamamalaṃ tvatprītaye kalpatām || 7 ||

kahlārotpalamallikāmaruvakaiḥ sauvarṇapaṅkeruhai-

-rjātīcampakamālatīvakulakairmandārakundādibhiḥ |

ketakyā karavīrakairbahuvidhaiḥ kluptāḥ srajo mālikāḥ

saṅkalpena samarpayāmi varade santuṣṭaye gṛhyatām || 8 ||

hantāraṃ madanasya nandayasi yairaṅgairanaṅgojjvalai-

-ryairbhṛṅgāvalinīlakuntalabharairbadhnāsi tasyāśayam |

tānīmāni tavāmba komalatarāṇyāmodalīlāgṛhā-

-ṇyāmodāya daśāṅgaguggulughṛtairdhūpairahaṃ dhūpaye || 9 ||

lakṣmīmujjvalayāmi ratnanivahodbhāsvattare mandire

mālārūpavilambitairmaṇimayastambheṣu sambhāvitaiḥ |

citrairhāṭakaputrikākaradhṛtairgavyairghṛtairvardhitai-

-rdivyairdīpagaṇairdhiyā girisute santuṣṭaye kalpatām || 10 ||

hrīṃ‍kāreśvari taptahāṭakakṛtaiḥ sthālīsahasrairbhṛtaṃ

divyānnaṃ ghṛtasūpaśākabharitaṃ citrānnabhedaṃ tathā |

dugdhānnaṃ madhuśarkarādadhiyutaṃ māṇikyapātre sthitaṃ

māṣāpūpasahasramamba saphalaṃ naivedyamāvedaye || 11 ||

sacchāyairvaraketakīdalarucā tāmbūlavallīdalaiḥ

pūgairbhūriguṇaiḥ sugandhimadhuraiḥ karpūrakhaṇḍojjvalaiḥ |

muktācūrṇavirājitairbahuvidhairvaktrāmbujāmodanaiḥ

pūrṇā ratnakalācikā tava mude nyastā purastādume || 12 ||

kanyābhiḥ kamanīyakāntibhiralaṅkārāmalārārtikā

pātre mauktikacitrapaṅktivilasatkarpūradīpālibhiḥ |

tattattālamṛdaṅgagītasahitaṃ nṛtyatpadāmbhoruhaṃ

mantrārādhanapūrvakaṃ suvihitaṃ nīrājanaṃ gṛhyatām || 13 ||

lakṣmīrmauktikalakṣakalpitasitacchattraṃ tu dhatte rasā-

-dindrāṇī ca ratiśca cāmaravare dhatte svayaṃ bhāratī |

vīṇāmeṇavilocanāḥ sumanasāṃ nṛtyanti tadrāgava-

-dbhāvairāṅgikasāttvikaiḥ sphuṭarasaṃ mātastadākarṇyatām || 14 ||

hrīṃ‍kāratrayasampuṭena manunopāsye trayīmaulibhi-

-rvākyairlakṣyatano tava stutividhau ko vā kṣametāmbike |

sallāpāḥ stutayaḥ pradakṣiṇaśataṃ sañcāra evāstu te

saṃveśo namasaḥ sahasramakhilaṃ tvatprītaye kalpatām || 15 ||

śrīmantrākṣaramālayā girisutāṃ yaḥ pūjayeccetasā

sandhyāsu prativāsaraṃ suniyatastasyāmalaṃ syānmanaḥ |

cittāmbhoruhamaṇṭape girisutā nṛttaṃ vidhatte rasā-

-dvāṇī vaktrasaroruhe jaladhijā gehe jaganmaṅgalā || 16 ||

iti girivaraputrīpādarājīvabhūṣā

bhuvanamamalayantī sūktisaurabhyasāraiḥ |

śivapadamakarandasyandinīyaṃ nibaddhā

madayatu kavibhṛṅgānmātṛkāpuṣpamālā || 17 ||

iti śrīmatparamahaṃsaparivrājakācāryasya śrīgovindabhagavatpūjyapādaśiṣyasya śrīmacchaṅkarabhagavataḥ kṛtau mantramātṛkāpuṣpamālā stavaḥ |