3.4 - Vi Va Etasya Yajnah - Krishna Yajurveda Taittiriya Samhita Pathah

ॐ

3.4 - ವಿ ವಾ ಏತಸ್ಯ ಯಜ್ಞಃ - ಕೃಷ್ಣ ಯಜುರ್ವೇದ ತೈತ್ತಿರೀಯ ಸಂಹಿತಾ ಪಾಠಃ

Krishna Vedic Kannada

ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಸಂಹಿತಾಯಾ-ನ್ತೃತೀಯಕಾಣ್ಡೇ ಚತುರ್ಥಃ ಪ್ರಶ್ನಃ - ಇಷ್ಟಿಹೋಮಾಭಿಧಾನಂ

ಓ-ನ್ನಮಃ ಪರಮಾತ್ಮನೇ, ಶ್ರೀ ಮಹಾಗಣಪತಯೇ ನಮಃ,

ಶ್ರೀ ಗುರುಭ್ಯೋ ನಮಃ । ಹ॒ರಿಃ॒ ಓಮ್ ॥

ವಿ ವಾ ಏ॒ತಸ್ಯ॑ ಯ॒ಜ್ಞ ಋ॑ದ್ಧ್ಯತೇ॒ ಯಸ್ಯ॑ ಹ॒ವಿರ॑ತಿ॒ರಿಚ್ಯ॑ತೇ॒ ಸೂರ್ಯೋ॑ ದೇ॒ವೋ ದಿ॑ವಿ॒ಷದ್ಭ್ಯ॒ ಇತ್ಯಾ॑ಹ॒ ಬೃಹ॒ಸ್ಪತಿ॑ನಾ ಚೈ॒ವಾಸ್ಯ॑ ಪ್ರ॒ಜಾಪ॑ತಿನಾ ಚ ಯ॒ಜ್ಞಸ್ಯ॒ ವ್ಯೃ॑ದ್ಧ॒ಮಪಿ॑ ವಪತಿ॒ ರಕ್ಷಾಗ್ಂ॑ಸಿ॒ ವಾ ಏ॒ತ-ತ್ಪ॒ಶುಗ್ಂ ಸ॑ಚನ್ತೇ॒ ಯದೇ॑ಕದೇವ॒ತ್ಯ॑ ಆಲ॑ಬ್ಧೋ॒ ಭೂಯಾ॒-ನ್ಭವ॑ತಿ॒ ಯಸ್ಯಾ᳚ಸ್ತೇ॒ ಹರಿ॑ತೋ॒ ಗರ್ಭ॒ ಇತ್ಯಾ॑ಹ ದೇವ॒ತ್ರೈವೈನಾ᳚-ಙ್ಗಮಯತಿ॒ ರಕ್ಷ॑ಸಾ॒ಮಪ॑ಹತ್ಯಾ॒ ಆ ವ॑ರ್ತನ ವರ್ತ॒ಯೇತ್ಯಾ॑ಹ॒ [ವರ್ತ॒ಯೇತ್ಯಾ॑ಹ, ಬ್ರಹ್ಮ॑ಣೈ॒ವೈನ॒-ಮಾ] 1

ಬ್ರಹ್ಮ॑ಣೈ॒ವೈನ॒-ಮಾ ವ॑ರ್ತಯತಿ॒ ವಿ ತೇ॑ ಭಿನದ್ಮಿ ತಕ॒ರೀಮಿತ್ಯಾ॑ಹ ಯಥಾಯ॒ಜುರೇ॒ವೈತದು॑- ರುದ್ರ॒ಫ್ಸೋ ವಿ॒ಶ್ವರೂ॑ಪ॒ ಇನ್ದು॒ರಿತ್ಯಾ॑ಹ ಪ್ರ॒ಜಾ ವೈ ಪ॒ಶವ॒ ಇನ್ದುಃ॑ ಪ್ರ॒ಜಯೈ॒ವೈನ॑-ಮ್ಪ॒ಶುಭಿ॒-ಸ್ಸಮ॑ರ್ಧಯತಿ॒ ದಿವಂ॒-ವೈಁ ಯ॒ಜ್ಞಸ್ಯ॒ ವ್ಯೃ॑ದ್ಧ-ಙ್ಗಚ್ಛತಿ ಪೃಥಿ॒ವೀಮತಿ॑ರಿಕ್ತ॒-ನ್ತದ್ಯನ್ನ ಶ॒ಮಯೇ॒ದಾರ್ತಿ॒ಮಾರ್ಚ್ಛೇ॒-ದ್ಯಜ॑ಮಾನೋ ಮ॒ಹೀ ದ್ಯೌಃ ಪೃ॑ಥಿ॒ವೀಚ॑ ನ॒ ಇ॑- [ನ॒ ಇತಿ॑, ಆ॒ಹ॒ ದ್ಯಾವಾ॑ಪೃಥಿ॒ವೀಭ್ಯಾ॑ಮೇ॒ವ] 2

-ತ್ಯಾಹ॒ ದ್ಯಾವಾ॑ಪೃಥಿ॒ವೀಭ್ಯಾ॑ಮೇ॒ವ ಯ॒ಜ್ಞಸ್ಯ॒ ವ್ಯೃ॑ದ್ಧ॒-ಞ್ಚಾತಿ॑ರಿಕ್ತ-ಞ್ಚ ಶಮಯತಿ॒ ನಾ-ಽಽರ್ತಿ॒ಮಾರ್ಚ್ಛ॑ತಿ॒ ಯಜ॑ಮಾನೋ॒ ಭಸ್ಮ॑ನಾ॒-ಽಭಿ ಸಮೂ॑ಹತಿ ಸ್ವ॒ಗಾಕೃ॑ತ್ಯಾ॒ ಅಥೋ॑ ಅ॒ನಯೋ॒ರ್ವಾ ಏ॒ಷ ಗರ್ಭೋ॒-ಽನಯೋ॑ರೇ॒ವೈನ॑-ನ್ದಧಾತಿ॒ ಯದ॑ವ॒ದ್ಯೇದತಿ॒ ತದ್ರೇ॑ಚಯೇ॒ದ್ಯನ್ನಾವ॒ದ್ಯೇ-ತ್ಪ॒ಶೋರಾಲ॑ಬ್ಧಸ್ಯ॒ ನಾವ॑ ದ್ಯೇ-ತ್ಪು॒ರಸ್ತಾ॒ನ್ನಾಭ್ಯಾ॑ ಅ॒ನ್ಯದ॑ವ॒ದ್ಯೇ-ದು॒ಪರಿ॑ಷ್ಟಾದ॒ನ್ಯ-ತ್ಪು॒ರಸ್ತಾ॒ದ್ವೈ ನಾಭ್ಯೈ᳚ [ ] 3

ಪ್ರಾ॒ಣ ಉ॒ಪರಿ॑ಷ್ಟಾದಪಾ॒ನೋ ಯಾವಾ॑ನೇ॒ವ ಪ॒ಶುಸ್ತಸ್ಯಾವ॑ ದ್ಯತಿ॒ ವಿಷ್ಣ॑ವೇ ಶಿಪಿವಿ॒ಷ್ಟಾಯ॑ ಜುಹೋತಿ॒ ಯದ್ವೈ ಯ॒ಜ್ಞಸ್ಯಾ॑ತಿ॒ರಿಚ್ಯ॑ತೇ॒ ಯಃ ಪ॒ಶೋರ್ಭೂ॒ಮಾ ಯಾ ಪುಷ್ಟಿ॒ಸ್ತ-ದ್ವಿಷ್ಣುಃ॑ ಶಿಪಿವಿ॒ಷ್ಟೋ ಽತಿ॑ರಿಕ್ತ ಏ॒ವಾತಿ॑ರಿಕ್ತ-ನ್ದಧಾ॒ತ್ಯತಿ॑ರಿಕ್ತಸ್ಯ॒ ಶಾನ್ತ್ಯಾ॑ ಅ॒ಷ್ಟಾಪ್ರೂ॒ಡ್ಢಿರ॑ಣ್ಯ॒-ನ್ದಕ್ಷಿ॑ಣಾ॒-ಽಷ್ಟಾಪ॑ದೀ॒ ಹ್ಯೇ॑ಷಾ ಽಽತ್ಮಾ ನ॑ವ॒ಮಃ ಪ॒ಶೋರಾಪ್ತ್ಯಾ॑ ಅನ್ತರಕೋ॒ಶ ಉ॒ಷ್ಣೀಷೇ॒ಣಾ-ಽಽವಿ॑ಷ್ಟಿತ-ಮ್ಭವತ್ಯೇ॒ವಮಿ॑ವ॒ ಹಿ ಪ॒ಶುರುಲ್ಬ॑ಮಿವ॒ ಚರ್ಮೇ॑ವ ಮಾ॒ಗ್ಂ॒ಸಮಿ॒ವಾಸ್ಥೀ॑ವ॒ ಯಾವಾ॑ನೇ॒ವ ಪ॒ಶುಸ್ತಮಾ॒ಪ್ತ್ವಾ-ಽವ॑ ರುನ್ಧೇ॒ಯಸ್ಯೈ॒ಷಾ ಯ॒ಜ್ಞೇ ಪ್ರಾಯ॑ಶ್ಚಿತ್ತಿಃ ಕ್ರಿ॒ಯತ॑ ಇ॒ಷ್ಟ್ವಾ ವಸೀ॑ಯಾ-ನ್ಭವತಿ ॥ 4 ॥

(ವ॒ರ್ತ॒ಯತ್ಯಾ॑ಹ-ನ॒ ಇತಿ॒-ವೈ ನಾಭ್ಯಾ॒-ಉಲ್ಬ॑ಮಿ॒ವೈ-ಕ॑ವಿಗ್ಂಶತಿಶ್ಚ) (ಅ. 1)

ಆ ವಾ॑ಯೋ ಭೂಷ ಶುಚಿಪಾ॒ ಉಪ॑ ನ-ಸ್ಸ॒ಹಸ್ರ॑-ನ್ತೇ ನಿ॒ಯುತೋ॑ ವಿಶ್ವವಾರ । ಉಪೋ॑ ತೇ॒ ಅನ್ಧೋ॒ ಮದ್ಯ॑ಮಯಾಮಿ॒ ಯಸ್ಯ॑ ದೇವ ದಧಿ॒ಷೇ ಪೂ᳚ರ್ವ॒ಪೇಯ᳚ಮ್ ॥ ಆಕೂ᳚ತ್ಯೈ ತ್ವಾ॒ ಕಾಮಾ॑ಯ ತ್ವಾ ಸ॒ಮೃಧೇ᳚ ತ್ವಾ ಕಿಕ್ಕಿ॒ಟಾ ತೇ॒ ಮನಃ॑ ಪ್ರ॒ಜಾಪ॑ತಯೇ॒ ಸ್ವಾಹಾ॑ ಕಿಕ್ಕಿ॒ಟಾ ತೇ᳚ ಪ್ರಾ॒ಣಂ-ವಾಁ॒ಯವೇ॒ ಸ್ವಾಹಾ॑ ಕಿಕ್ಕಿ॒ಟಾ ತೇ॒ ಚಕ್ಷು॒-ಸ್ಸೂರ್ಯಾ॑ಯ॒ ಸ್ವಾಹಾ॑ ಕಿಕ್ಕಿ॒ಟಾ ತೇ॒ ಶ್ರೋತ್ರ॒-ನ್ದ್ಯಾವಾ॑ಪೃಥಿ॒ವೀಭ್ಯಾ॒ಗ್॒ ಸ್ವಾಹಾ॑ ಕಿಕ್ಕಿ॒ಟಾ ತೇ॒ ವಾಚ॒ಗ್ಂ॒ ಸರ॑ಸ್ವತ್ಯೈ॒ ಸ್ವಾಹಾ॒ [ಸರ॑ಸ್ವತ್ಯೈ॒ ಸ್ವಾಹಾ᳚, ತ್ವ-ನ್ತು॒ರೀಯಾ॑] 5

ತ್ವ-ನ್ತು॒ರೀಯಾ॑ ವ॒ಶಿನೀ॑ ವ॒ಶಾ-ಽಸಿ॑ ಸ॒ಕೃದ್ಯ-ತ್ತ್ವಾ॒ ಮನ॑ಸಾ॒ ಗರ್ಭ॒ ಆ-ಽಶ॑ಯತ್ । ವ॒ಶಾ ತ್ವಂ-ವಁ॒ಶಿನೀ॑ ಗಚ್ಛ ದೇ॒ವಾನ್-ಥ್ಸ॒ತ್ಯಾ-ಸ್ಸ॑ನ್ತು॒ ಯಜ॑ಮಾನಸ್ಯ॒ ಕಾಮಾಃ᳚ ॥ ಅ॒ಜಾ-ಽಸಿ॑ ರಯಿ॒ಷ್ಠಾ ಪೃ॑ಥಿ॒ವ್ಯಾಗ್ಂ ಸೀ॑ದೋ॒ರ್ಧ್ವಾ-ಽನ್ತರಿ॑ಕ್ಷ॒ಮುಪ॑ ತಿಷ್ಠಸ್ವ ದಿ॒ವಿ ತೇ॑ ಬೃ॒ಹದ್ಭಾಃ ॥ ತನ್ತು॑-ನ್ತ॒ನ್ವ-ನ್ರಜ॑ಸೋ ಭಾ॒ನುಮನ್ವಿ॑ಹಿ॒ ಜ್ಯೋತಿ॑ಷ್ಮತಃ ಪ॒ಥೋ ರ॑ಕ್ಷ ಧಿ॒ಯಾ ಕೃ॒ತಾನ್ ॥ ಅ॒ನು॒ಲ್ಬ॒ಣಂ-ವಁ॑ಯತ॒ ಜೋಗು॑ವಾ॒ಮಪೋ॒ ಮನು॑ ರ್ಭವ ಜ॒ನಯಾ॒ ದೈವ್ಯ॒-ಞ್ಜನ᳚ಮ್ ॥ ಮನ॑ಸೋ ಹ॒ವಿರ॑ಸಿ ಪ್ರ॒ಜಾಪ॑ತೇ॒ರ್ವರ್ಣೋ॒ ಗಾತ್ರಾ॑ಣಾ-ನ್ತೇ ಗಾತ್ರ॒ಭಾಜೋ॑ ಭೂಯಾಸ್ಮ ॥ 6 ॥

(ಸರ॑ಸ್ವತ್ಯೈ॒ ಸ್ವಾಹಾ॒ - ಮನು॒ - ಸ್ತ್ರಯೋ॑ದಶ ಚ) (ಅ. 2)

ಇ॒ಮೇ ವೈ ಸ॒ಹಾ-ಽಽಸ್ತಾ॒-ನ್ತೇ ವಾ॒ಯುರ್ವ್ಯ॑ವಾ॒-ತ್ತೇ ಗರ್ಭ॑ಮದಧಾತಾ॒-ನ್ತಗ್ಂ ಸೋಮಃ॒ ಪ್ರಾಜ॑ನಯ-ದ॒ಗ್ನಿರ॑ಗ್ರಸತ॒ ಸ ಏ॒ತ-ಮ್ಪ್ರ॒ಜಾಪ॑ತಿರಾಗ್ನೇ॒ಯ-ಮ॒ಷ್ಟಾಕ॑ಪಾಲಮಪಶ್ಯ॒-ತ್ತ-ನ್ನಿರ॑ವಪ॒-ತ್ತೇನೈ॒ವೈನಾ॑ಮ॒ಗ್ನೇರಧಿ॒ ನಿರ॑ಕ್ರೀಣಾ॒-ತ್ತಸ್ಮಾ॒ದಪ್ಯ॑ನ್ಯದೇವ॒ತ್ಯಾ॑ಮಾ॒ಲಭ॑ಮಾನ ಆಗ್ನೇ॒ಯಮ॒ಷ್ಟಾಕ॑ಪಾಲ-ಮ್ಪು॒ರಸ್ತಾ॒ನ್ನಿರ್ವ॑ಪೇದ॒ಗ್ನೇರೇ॒ವೈನಾ॒ಮಧಿ॑ ನಿ॒ಷ್ಕ್ರೀಯಾ-ಽಽಲ॑ಭತೇ॒ ಯ- [ಯತ್, ವಾ॒ಯುರ್ವ್ಯವಾ॒-] 7

-ದ್ವಾ॒ಯುರ್ವ್ಯವಾ॒-ತ್ತಸ್ಮಾ᳚-ದ್ವಾಯ॒ವ್ಯಾ॑ ಯದಿ॒ಮೇ ಗರ್ಭ॒ಮದ॑ಧಾತಾ॒-ನ್ತಸ್ಮಾ᳚-ದ್ದ್ಯಾವಾಪೃಥಿ॒ವ್ಯಾ॑ ಯ-ಥ್ಸೋಮಃ॒ ಪ್ರಾಜ॑ನಯದ॒ಗ್ನಿರಗ್ರ॑ಸತ॒ ತಸ್ಮಾ॑ದಗ್ನೀಷೋ॒ಮೀಯಾ॒ ಯದ॒ನಯೋ᳚ರ್ವಿಯ॒ತ್ಯೋ-ರ್ವಾಗವ॑ದ॒-ತ್ತಸ್ಮಾ᳚-ಥ್ಸಾರಸ್ವ॒ತೀ ಯ-ತ್ಪ್ರ॒ಜಾಪ॑ತಿರ॒ಗ್ನೇರಧಿ॑ ನಿ॒ರಕ್ರೀ॑ಣಾ॒-ತ್ತಸ್ಮಾ᳚-ತ್ಪ್ರಾಜಾಪ॒ತ್ಯಾ ಸಾ ವಾ ಏ॒ಷಾ ಸ॑ರ್ವದೇವ॒ತ್ಯಾ॑ ಯದ॒ಜಾ ವ॒ಶಾ ವಾ॑ಯ॒ವ್ಯಾ॑ಮಾ ಲ॑ಭೇತ॒ ಭೂತಿ॑ಕಾಮೋ ವಾ॒ಯುರ್ವೈ ಕ್ಷೇಪಿ॑ಷ್ಠಾ ದೇ॒ವತಾ॑ ವಾ॒ಯುಮೇ॒ವ ಸ್ವೇನ॑ [ಸ್ವೇನ॑, ಭಾ॒ಗ॒ಧೇಯೇ॒ನೋಪ॑ ಧಾವತಿ॒] 8

ಭಾಗ॒ಧೇಯೇ॒ನೋಪ॑ ಧಾವತಿ॒ ಸ ಏ॒ವೈನ॒-ಮ್ಭೂತಿ॑-ಙ್ಗಮಯತಿ ದ್ಯಾವಾಪೃಥಿ॒ವ್ಯಾ॑ಮಾ ಲ॑ಭೇತ ಕೃ॒ಷಮಾ॑ಣಃ ಪ್ರತಿ॒ಷ್ಠಾಕಾ॑ಮೋ ದಿ॒ವ ಏ॒ವಾಸ್ಮೈ॑ ಪ॒ರ್ಜನ್ಯೋ॑ ವರ್ಷತಿ॒ ವ್ಯ॑ಸ್ಯಾಮೋಷ॑ಧಯೋ ರೋಹನ್ತಿ ಸ॒ಮರ್ಧು॑ಕಮಸ್ಯ ಸ॒ಸ್ಯ-ಮ್ಭ॑ವತ್ಯಗ್ನೀಷೋ॒ಮೀಯಾ॒ಮಾ ಲ॑ಭೇತ॒ ಯಃ ಕಾ॒ಮಯೇ॒ತಾನ್ನ॑ವಾನನ್ನಾ॒ದ-ಸ್ಸ್ಯಾ॒ಮಿತ್ಯ॒ಗ್ನಿನೈ॒ವಾನ್ನ॒ಮವ॑ ರುನ್ಧೇ॒ ಸೋಮೇ॑ನಾ॒ನ್ನಾದ್ಯ॒-ಮನ್ನ॑ವಾನೇ॒ವಾನ್ನಾ॒ದೋ ಭ॑ವತಿ ಸಾರಸ್ವ॒ತೀಮಾ ಲ॑ಭೇತ॒ ಯ [ಯಃ, ಈ॒ಶ್ವ॒ರೋ ವಾ॒ಚೋ] 9

ಈ᳚ಶ್ವ॒ರೋ ವಾ॒ಚೋ ವದಿ॑ತೋ॒-ಸ್ಸನ್. ವಾಚ॒-ನ್ನವದೇ॒-ದ್ವಾಗ್ವೈ ಸರ॑ಸ್ವತೀ॒ ಸರ॑ಸ್ವತೀಮೇ॒ವ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸೈವಾಸ್ಮಿ॒ನ್. ವಾಚ॑-ನ್ದಧಾತಿ ಪ್ರಾಜಾಪ॒ತ್ಯಾಮಾ ಲ॑ಭೇತ॒ ಯಃ ಕಾ॒ಮಯೇ॒ತಾನ॑ಭಿಜಿತಮ॒ಭಿ ಜ॑ಯೇಯ॒ಮಿತಿ॑ ಪ್ರ॒ಜಾಪ॑ತಿ॒-ಸ್ಸರ್ವಾ॑ ದೇ॒ವತಾ॑ ದೇ॒ವತಾ॑ಭಿರೇ॒ವಾ-ನ॑ಭಿಜಿತಮ॒ಭಿ ಜ॑ಯತಿ ವಾಯ॒ವ್ಯ॑ಯೋ॒ಪಾಕ॑ರೋತಿ ವಾ॒ಯೋರೇ॒ವೈನಾ॑ಮವ॒ರುದ್ಧ್ಯಾ-ಽಽಲ॑ಭತ॒ ಆಕೂ᳚ತ್ಯೈ ತ್ವಾ॒ ಕಾಮಾ॑ಯ॒ ತ್ವೇ- [ಕಾಮಾ॑ಯ ತ್ವಾ, ಇತ್ಯಾ॑ಹ ಯಥಾಯ॒ಜು-] 10

-ತ್ಯಾ॑ಹ ಯಥಾಯ॒ಜು-ರೇ॒ವೈತ-ತ್ಕಿ॑ಕ್ಕಿಟಾ॒ಕಾರ॑-ಞ್ಜುಹೋತಿ ಕಿಕ್ಕಿಟಾಕಾ॒ರೇಣ॒ ವೈ ಗ್ರಾ॒ಮ್ಯಾಃ ಪ॒ಶವೋ॑ ರಮನ್ತೇ॒ ಪ್ರಾ-ಽಽರ॒ಣ್ಯಾಃ ಪ॑ತನ್ತಿ॒ ಯ-ತ್ಕಿ॑ಕ್ಕಿಟಾ॒ಕಾರ॑-ಞ್ಜು॒ಹೋತಿ॑ ಗ್ರಾ॒ಮ್ಯಾಣಾ᳚-ಮ್ಪಶೂ॒ನಾ-ನ್ಧೃತ್ಯೈ॒ ಪರ್ಯ॑ಗ್ನೌ ಕ್ರಿ॒ಯಮಾ॑ಣೇ ಜುಹೋತಿ॒ ಜೀವ॑ನ್ತೀಮೇ॒ವೈನಾಗ್ಂ॑ ಸುವ॒ರ್ಗಂ-ಲೋಁ॒ಕ-ಙ್ಗ॑ಮಯತಿ॒ ತ್ವ-ನ್ತು॒ರೀಯಾ॑ ವ॒ಶಿನೀ॑ ವ॒ಶಾ-ಽಸೀತ್ಯಾ॑ಹ ದೇವ॒ತ್ರೈವೈನಾ᳚-ಙ್ಗಮಯತಿ ಸ॒ತ್ಯಾ-ಸ್ಸ॑ನ್ತು॒ ಯಜ॑ಮಾನಸ್ಯ॒ ಕಾಮಾ॒ ಇತ್ಯಾ॑ಹೈ॒ಷ ವೈ ಕಾಮೋ॒ [ವೈ ಕಾಮಃ॑, ಯಜ॑ಮಾನಸ್ಯ॒] 11

ಯಜ॑ಮಾನಸ್ಯ॒ ಯದನಾ᳚ರ್ತ ಉ॒ದೃಚ॒-ಙ್ಗಚ್ಛ॑ತಿ॒ ತಸ್ಮಾ॑ದೇ॒ವಮಾ॑ಹಾ॒-ಽಜಾ-ಽಸಿ॑ ರಯಿ॒ಷ್ಠೇತ್ಯಾ॑ಹೈ॒ ಷ್ವೇ॑ವೈನಾಂ᳚-ಲೋಁ॒ಕೇಷು॒ ಪ್ರತಿ॑ಷ್ಠಾಪಯತಿ ದಿ॒ವಿ ತೇ॑ ಬೃ॒ಹದ್ಭಾ ಇತ್ಯಾ॑ಹ ಸುವ॒ರ್ಗ ಏ॒ವಾಸ್ಮೈ॑ ಲೋ॒ಕೇ ಜ್ಯೋತಿ॑-ರ್ದಧಾತಿ॒ ತನ್ತು॑-ನ್ತ॒ನ್ವ-ನ್ರಜ॑ಸೋ ಭಾ॒ನುಮನ್ವಿ॒ಹೀತ್ಯಾ॑ಹೇ॒ಮಾನೇ॒ವಾಸ್ಮೈ॑ ಲೋ॒ಕಾನ್ ಜ್ಯೋತಿ॑ಷ್ಮತಃ ಕರೋತ್ಯನುಲ್ಬ॒ಣಂ-ವಁ॑ಯತ॒ ಜೋಗು॑ವಾ॒ಮಪ॒ ಇ- [ಜೋಗು॑ವಾ॒ಮಪ॒ ಇತಿ॑, ಆ॒ಹ॒ ಯದೇ॒ವ] 12

-ತ್ಯಾ॑ಹ॒ ಯದೇ॒ವ ಯ॒ಜ್ಞ ಉ॒ಲ್ಬಣ॑-ಙ್ಕ್ರಿ॒ಯತೇ॒ ತಸ್ಯೈ॒ವೈಷಾ ಶಾನ್ತಿ॒ರ್ಮನು॑ರ್ಭವ ಜ॒ನಯಾ॒ ದೈವ್ಯ॒-ಞ್ಜನ॒ಮಿತ್ಯಾ॑ಹ ಮಾನ॒ವ್ಯೋ॑ ವೈ ಪ್ರ॒ಜಾಸ್ತಾ ಏ॒ವಾ-ಽಽದ್ಯಾಃ᳚ ಕುರುತೇ॒ ಮನ॑ಸೋ ಹ॒ವಿರ॒ಸೀತ್ಯಾ॑ಹ ಸ್ವ॒ಗಾಕೃ॑ತ್ಯೈ॒ ಗಾತ್ರಾ॑ಣಾ-ನ್ತೇ ಗಾತ್ರ॒ಭಾಜೋ॑ ಭೂಯಾ॒ಸ್ಮೇತ್ಯಾ॑ಹಾ॒ ಽಽಶಿಷ॑ಮೇ॒ವೈತಾಮಾ ಶಾ᳚ಸ್ತೇ॒ ತಸ್ಯೈ॒ ವಾ ಏ॒ತಸ್ಯಾ॒ ಏಕ॑ಮೇ॒ವಾ-ದೇ॑ವಯಜನಂ॒ ಁಯದಾಲ॑ಬ್ಧಾಯಾ-ಮ॒ಭ್ರೋ [-ಮ॒ಭ್ರಃ, ಭವ॑ತಿ॒] 13

ಭವ॑ತಿ॒ ಯದಾಲ॑ಬ್ಧಾಯಾಮ॒ಭ್ರ-ಸ್ಸ್ಯಾದ॒ಫ್ಸು ವಾ᳚ಪ್ರವೇ॒ಶಯೇ॒-ಥ್ಸರ್ವಾಂ᳚-ವಾಁ॒ ಪ್ರಾಶ್ಞೀ॑ಯಾ॒ದ್ಯದ॒ಫ್ಸು ಪ್ರ॑ವೇ॒ಶಯೇ᳚ದ್ಯಜ್ಞವೇಶ॒ಸ-ಙ್ಕು॑ರ್ಯಾ॒-ಥ್ಸರ್ವಾ॑ಮೇ॒ವ ಪ್ರಾಶ್ಞೀ॑ಯಾದಿನ್ದ್ರಿ॒ಯಮೇ॒ವಾ-ಽಽತ್ಮ-ನ್ಧ॑-ತ್ತೇ॒ ಸಾ ವಾ ಏ॒ಷಾ ತ್ರ॑ಯಾ॒ಣಾಮೇ॒ವಾವ॑ ರುದ್ಧಾ ಸಂವಁಥ್ಸರ॒ಸದಃ॑ ಸಹಸ್ರಯಾ॒ಜಿನೋ॑ ಗೃಹಮೇ॒ಧಿನ॒ಸ್ತ ಏ॒ವೈತಯಾ॑ ಯಜೇರ॒-ನ್ತೇಷಾ॑ಮೇ॒ವೈಷಾ-ಽಽಪ್ತಾ ॥ 14 ॥

(ಯಥ್ - ಸ್ವೇನ॑ - ಸಾರಸ್ವ॒ತೀಮಾ ಲ॑ಭೇತ॒ ಯಃ - ಕಾಮಾ॑ಯ ತ್ವಾ॒ - ಕಾಮೋ - ಽಪ॒ ಇತ್ಯ॒ - ಭ್ರೋ - ದ್ವಿಚ॑ತ್ವಾರಿಗ್ಂಶಚ್ಚ) (ಅ. 3)

ಚಿ॒ತ್ತ-ಞ್ಚ॒ ಚಿತ್ತಿ॒ಶ್ಚಾ ಽಽಕೂ॑ತ॒-ಞ್ಚಾ-ಽಽಕೂ॑ತಿಶ್ಚ॒ ವಿಜ್ಞಾ॑ತ-ಞ್ಚ ವಿ॒ಜ್ಞಾನ॑-ಞ್ಚ॒ ಮನ॑ಶ್ಚ॒ ಶಕ್ವ॑ರೀಶ್ಚ॒ ದರ್ಶ॑ಶ್ಚ ಪೂ॒ರ್ಣಮಾ॑ಸಶ್ಚ ಬೃ॒ಹಚ್ಚ॑ ರಥನ್ತ॒ರ-ಞ್ಚ॑ ಪ್ರ॒ಜಾಪ॑ತಿ॒ರ್ಜಯಾ॒ನಿನ್ದ್ರಾ॑ಯ॒ ವೃಷ್ಣೇ॒ ಪ್ರಾಯ॑ಚ್ಛದು॒ಗ್ರಃ ಪೃ॑ತ॒ನಾಜ್ಯೇ॑ಷು॒ ತಸ್ಮೈ॒ ವಿಶ॒-ಸ್ಸಮ॑ನಮನ್ತ॒ ಸರ್ವಾ॒-ಸ್ಸ ಉ॒ಗ್ರ-ಸ್ಸಹಿ ಹವ್ಯೋ॑ ಬ॒ಭೂವ॑ದೇವಾಸು॒ರಾ-ಸ್ಸಂಯಁ॑ತ್ತಾ ಆಸ॒ನ್ಥ್ಸ ಇನ್ದ್ರಃ॑ ಪ್ರ॒ಜಾಪ॑ತಿ॒ಮುಪಾ॑ ಧಾವ॒-ತ್ತಸ್ಮಾ॑ ಏ॒ತಾಞ್ಜಯಾ॒-ನ್ಪ್ರಾಯ॑ಚ್ಛ॒-ತ್ತಾನ॑ಜುಹೋ॒-ತ್ತತೋ॒ ವೈ ದೇ॒ವಾ ಅಸು॑ರಾನಜಯ॒ನ್॒. ಯದಜ॑ಯ॒-ನ್ತಜ್ಜಯಾ॑ನಾ-ಞ್ಜಯ॒ತ್ವಗ್ಗ್ ಸ್ಪರ್ಧ॑ಮಾನೇನೈ॒ತೇ ಹೋ॑ತ॒ವ್ಯಾ॑ ಜಯ॑ತ್ಯೇ॒ವ ತಾ-ಮ್ಪೃತ॑ನಾಮ್ ॥ 15 ॥

(ಉಪ॒ - ಪಞ್ಚ॑ವಿಗ್ಂಶತಿಶ್ಚ) (ಅ. 4)

ಅ॒ಗ್ನಿರ್ಭೂ॒ತಾನಾ॒ಮಧಿ॑ಪತಿ॒-ಸ್ಸಮಾ॑-ಽವ॒ತ್ವಿನ್ದ್ರೋ᳚ ಜ್ಯೇ॒ಷ್ಠಾನಾಂ᳚-ಯಁ॒ಮಃ ಪೃ॑ಥಿ॒ವ್ಯಾ ವಾ॒ಯುರ॒ನ್ತರಿ॑ಕ್ಷಸ್ಯ॒ ಸೂರ್ಯೋ॑ದಿ॒ವಶ್ಚ॒ನ್ದ್ರಮಾ॒ ನಕ್ಷ॑ತ್ರಾಣಾ॒-ಮ್ಬೃಹ॒ಸ್ಪತಿ॒ರ್ಬ್ರಹ್ಮ॑ಣೋ ಮಿ॒ತ್ರ-ಸ್ಸ॒ತ್ಯಾನಾಂ॒-ವಁರು॑ಣೋ॒-ಽಪಾಗ್ಂ ಸ॑ಮು॒ದ್ರ-ಸ್ಸ್ರೋ॒ತ್ಯಾನಾ॒ಮನ್ನ॒ಗ್ಂ॒ ಸಾಮ್ರಾ᳚ಜ್ಯಾನಾ॒ಮಧಿ॑ಪತಿ॒ ತನ್ಮಾ॑-ಽವತು॒ ಸೋಮ॒ ಓಷ॑ಧೀನಾಗ್ಂ ಸವಿ॒ತಾ ಪ್ರ॑ಸ॒ವಾನಾಗ್ಂ॑ ರು॒ದ್ರಃ ಪ॑ಶೂ॒ನಾ-ನ್ತ್ವಷ್ಟಾ॑ ರೂ॒ಪಾಣಾಂ॒-ವಿಁಷ್ಣುಃ॒ ಪರ್ವ॑ತಾನಾ-ಮ್ಮ॒ರುತೋ॑ ಗ॒ಣಾನಾ॒ಮಧಿ॑ಪತಯ॒ಸ್ತೇ ಮಾ॑ವನ್ತು॒ ಪಿತ॑ರಃ ಪಿತಾಮಹಾಃ ಪರೇ-ಽವರೇ॒ ತತಾ᳚ಸ್ತತಾಮಹಾ ಇ॒ಹ ಮಾ॑-ಽವತ । ಅ॒ಸ್ಮಿ-ನ್ಬ್ರಹ್ಮ॑ನ್ನ॒ಸ್ಮಿನ್ ಕ್ಷ॒ತ್ರೇ᳚-ಽಸ್ಯಾ-ಮಾ॒ಶಿಷ್ಯ॒ಸ್ಯಾ-ಮ್ಪು॑ರೋ॒ಧಾಯಾ॑ಮ॒ಸ್ಮಿನ್-ಕರ್ಮ॑ನ್ನ॒ಸ್ಯಾ-ನ್ದೇ॒ವಹೂ᳚ತ್ಯಾಮ್ ॥ 16 ॥

(ಅ॒ವ॒ರೇ॒ - ಸ॒ಪ್ತದ॑ಶ ಚ) (ಅ. 5)

ದೇ॒ವಾ ವೈ ಯದ್ಯ॒ಜ್ಞೇ-ಽಕು॑ರ್ವತ॒ ತದಸು॑ರಾ ಅಕುರ್ವತ॒ ತೇ ದೇ॒ವಾ ಏ॒ತಾನ॑ಭ್ಯಾತಾ॒ನಾನ॑ಪಶ್ಯ॒ನ್- ತಾನ॒ಭ್ಯಾತ॑ನ್ವತ॒ ಯದ್ದೇ॒ವಾನಾ॒-ಙ್ಕರ್ಮಾ-ಽಽಸೀ॒ದಾರ್ಧ್ಯ॑ತ॒ ತದ್ಯದಸು॑ರಾಣಾ॒-ನ್ನ ತದಾ᳚ರ್ಧ್ಯತ॒ ಯೇನ॒ ಕರ್ಮ॒ಣೇರ್ಥ್ಸೇ॒-ತ್ತತ್ರ॑ ಹೋತ॒ವ್ಯಾ॑ ಋ॒ದ್ಧ್ನೋತ್ಯೇ॒ವ ತೇನ॒ ಕರ್ಮ॑ಣಾ॒ ಯದ್ವಿಶ್ವೇ॑ ದೇ॒ವಾ-ಸ್ಸ॒ಮಭ॑ರ॒-ನ್ತಸ್ಮಾ॑-ದಭ್ಯಾತಾ॒ನಾ ವೈ᳚ಶ್ವದೇ॒ವಾಯತ್-ಪ್ರ॒ಜಾಪ॑ತಿ॒ರ್ಜಯಾ॒-ನ್ಪ್ರಾಯ॑ಚ್ಛ॒-ತ್ತಸ್ಮಾ॒ಜ್ಜಯಾಃ᳚ ಪ್ರಾಜಾಪ॒ತ್ಯಾ [ಪ್ರಾಜಾಪ॒ತ್ಯಾಃ, ಯ-ದ್ರಾ᳚ಷ್ಟ್ರ॒ಭೃದ್ಭೀ॑] 17

ಯ-ದ್ರಾ᳚ಷ್ಟ್ರ॒ಭೃದ್ಭೀ॑ ರಾ॒ಷ್ಟ್ರಮಾ-ಽದ॑ದತ॒ ತ-ದ್ರಾ᳚ಷ್ಟ್ರ॒ಭೃತಾಗ್ಂ॑ ರಾಷ್ಟ್ರಭೃ॒ತ್ತ್ವ-ನ್ತೇ ದೇ॒ವಾ ಅ॑ಭ್ಯಾತಾ॒ನೈರಸು॑ರಾನ॒ಭ್ಯಾತ॑ನ್ವತ॒ ಜಯೈ॑ರಜಯನ್-ರಾಷ್ಟ್ರ॒ಭೃದ್ಭೀ॑ ರಾ॒ಷ್ಟ್ರಮಾ-ಽದ॑ದತ॒ ಯದ್ದೇ॒ವಾ ಅ॑ಭ್ಯಾತಾ॒ನೈರಸು॑ರಾನ॒ಭ್ಯಾತ॑ನ್ವತ॒ ತದ॑ಭ್ಯಾತಾ॒ನಾನಾ॑ಮಭ್ಯಾತಾನ॒ತ್ವಂ-ಯಁಜ್ಜಯೈ॒ರಜ॑ಯ॒-ನ್ತಜ್ಜಯಾ॑ನಾ-ಞ್ಜಯ॒ತ್ವಂ-ಯಁ-ದ್ರಾ᳚ಷ್ಟ್ರ॒ಭೃದ್ಭೀ॑ ರಾ॒ಷ್ಟ್ರಮಾ-ಽದ॑ದತ॒ ತ-ದ್ರಾ᳚ಷ್ಟ್ರ॒ಭೃತಾಗ್ಂ॑ ರಾಷ್ಟ್ರಭೃ॒ತ್ತ್ವ-ನ್ತತೋ॑ ದೇ॒ವಾ ಅಭ॑ವ॒-ನ್ಪರಾ-ಽಸು॑ರಾ॒ ಯೋ ಭ್ರಾತೃ॑ವ್ಯವಾ॒ನ್-ಥ್ಸ್ಯಾ-ಥ್ಸ ಏ॒ತಾನ್ ಜು॑ಹುಯಾದಭ್ಯಾತಾ॒ನೈರೇ॒ವ ಭ್ರಾತೃ॑ವ್ಯಾನ॒ಭ್ಯಾತ॑ನುತೇ॒ ಜಯೈ᳚ರ್ಜಯತಿ ರಾಷ್ಟ್ರ॒ಭೃದ್ಭೀ॑ ರಾ॒ಷ್ಟ್ರಮಾ ದ॑ತ್ತೇ॒ ಭವ॑ತ್ಯಾ॒ತ್ಮನಾ॒ ಪರಾ᳚-ಽಸ್ಯ॒ ಭ್ರಾತೃ॑ವ್ಯೋ ಭವತಿ ॥ 18 ॥

(ಪ್ರಾ॒ಜಾ॒ಪ॒ತ್ಯಾಃ-ಸೋ᳚-ಽ-ಷ್ಟಾ ದ॑ಶ ಚ) (ಅ. 6)

ಋ॒ತಾ॒ಷಾ-ಡೃ॒ತಧಾ॑ಮಾ॒-ಽಗ್ನಿ-ರ್ಗ॑ನ್ಧ॒ರ್ವಸ್ತ-ಸ್ಯೌಷ॑ಧಯೋ-ಽಫ್ಸ॒ರಸ॒ ಊರ್ಜೋ॒ ನಾಮ॒ ಸ ಇ॒ದ-ಮ್ಬ್ರಹ್ಮ॑ ಕ್ಷ॒ತ್ರ-ಮ್ಪಾ॑ತು॒ ತಾ ಇ॒ದ-ಮ್ಬ್ರಹ್ಮ॑ ಕ್ಷ॒ತ್ರ-ಮ್ಪಾ᳚ನ್ತು॒ ತಸ್ಮೈ॒ ಸ್ವಾಹಾ॒ ತಾಭ್ಯ॒-ಸ್ಸ್ವಾಹಾ॑ ಸಗ್ಂಹಿ॒ತೋ ವಿ॒ಶ್ವಸಾ॑ಮಾ॒ ಸೂರ್ಯೋ॑ ಗನ್ಧ॒ರ್ವ-ಸ್ತಸ್ಯ॒ ಮರೀ॑ಚಯೋ-ಽಫ್ಸ॒ರಸ॑ ಆ॒ಯುವಃ॑ ಸುಷು॒ಮ್ನ-ಸ್ಸೂರ್ಯ॑ ರಶ್ಮಿ-ಶ್ಚ॒ನ್ದ್ರಮಾ॑ ಗನ್ಧ॒ರ್ವ-ಸ್ತಸ್ಯ॒ ನಕ್ಷ॑ತ್ರಾಣ್ಯ-ಫ್ಸ॒ರಸೋ॑ ಬೇ॒ಕುರ॑ಯೋಭು॒ಜ್ಯು-ಸ್ಸು॑ಪ॒ರ್ಣೋ ಯ॒ಜ್ಞೋ ಗ॑ನ್ಧ॒ರ್ವ-ಸ್ತಸ್ಯ॒ ದಕ್ಷಿ॑ಣಾ ಅಪ್ಸ॒ರಸ॑ ಸ್ತ॒ವಾಃ ಪ್ರ॒ಜಾಪ॑ತಿ-ರ್ವಿ॒ಶ್ವಕ॑ರ್ಮಾ॒ ಮನೋ॑ [ಮನಃ॑, ಗ॒ನ್ಧ॒ರ್ವಸ್ತಸ್ಯ॑-ರ್ಖ್ಸಾ॒ಮಾನ್ಯ॑-ಫ್ಸ॒ರಸೋ॒] 19

ಗನ್ಧ॒ರ್ವಸ್ತಸ್ಯ॑-ರ್ಖ್ಸಾ॒ಮಾನ್ಯ॑-ಫ್ಸ॒ರಸೋ॒ ವಹ್ನ॑ಯೈಷಿ॒ರೋ ವಿ॒ಶ್ವವ್ಯ॑ಚಾ॒ ವಾತೋ॑ ಗನ್ಧ॒ರ್ವ-ಸ್ತಸ್ಯಾ-ಽಽಪೋ᳚ ಽಫ್ಸ॒ರಸೋ॑ ಮು॒ದಾಭುವ॑ನಸ್ಯ ಪತೇ॒ ಯಸ್ಯ॑ತ ಉ॒ಪರಿ॑ ಗೃ॒ಹಾ ಇ॒ಹ ಚ॑ । ಸ ನೋ॑ ರಾ॒ಸ್ವಾಜ್ಯಾ॑ನಿಗ್ಂ ರಾ॒ಯಸ್ಪೋಷಗ್ಂ॑ ಸು॒ವೀರ್ಯಗ್ಂ॑ ಸಂವಁಥ್ಸ॒ರೀಣಾಗ್॑ ಸ್ವ॒ಸ್ತಿಮ್ ॥ ಪ॒ರ॒ಮೇ॒ಷ್ಠ್ಯಧಿ॑ಪತಿ-ರ್ಮೃ॒ತ್ಯು-ರ್ಗ॑ನ್ಧ॒ರ್ವ-ಸ್ತಸ್ಯ॒ ವಿಶ್ವ॑ಮಪ್ಸ॒ರಸೋ॒ ಭುವಃ॑ ಸುಕ್ಷಿ॒ತಿಃ- ಸುಭೂ॑ತಿ-ರ್ಭದ್ರ॒ಕೃ-ಥ್ಸುವ॑ರ್ವಾ-ನ್ಪ॒ರ್ಜನ್ಯೋ॑ ಗನ್ಧ॒ರ್ವ-ಸ್ತಸ್ಯ॑ ವಿ॒ದ್ಯುತೋ᳚ ಽಫ್ಸ॒ರಸೋ॒ ರುಚೋ॑ ದೂ॒ರೇ ಹೇ॑ತಿ-ರಮೃಡ॒ಯೋ [ದೂ॒ರೇ ಹೇ॑ತಿ-ರಮೃಡ॒ಯಃ, ಮೃ॒ತ್ಯುರ್ಗ॑ನ್ಧ॒ರ್ವ-ಸ್ತಸ್ಯ॑] 20

ಮೃ॒ತ್ಯುರ್ಗ॑ನ್ಧ॒ರ್ವ-ಸ್ತಸ್ಯ॑ ಪ್ರ॒ಜಾ ಅ॑ಫ್ಸ॒ರಸೋ॑ ಭೀ॒ರುವ॒ಶ್ಚರುಃ॑ ಕೃಪಣ ಕಾ॒ಶೀ ಕಾಮೋ॑ ಗನ್ಧ॒ರ್ವ-ಸ್ತಸ್ಯಾ॒ಧಯೋ᳚ ಽಫ್ಸ॒ರಸಃ॑ ಶೋ॒ಚಯ॑ನ್ತೀ॒ರ್ನಾಮ॒ ಸ ಇ॒ದ-ಮ್ಬ್ರಹ್ಮ॑ ಕ್ಷ॒ತ್ರ-ಮ್ಪಾ॑ತ॒ ತಾ ಇ॒ದ-ಮ್ಬ್ರಹ್ಮ॑ ಕ್ಷ॒ತ್ರ-ಮ್ಪಾ᳚ನ್ತು॒ ತಸ್ಮೈ॒ ಸ್ವಾಹಾ॒ ತಾಭ್ಯ॒-ಸ್ಸ್ವಾಹಾ॒ ಸ ನೋ॑ ಭುವನಸ್ಯ ಪತೇ॒ ಯಸ್ಯ॑ತ ಉ॒ಪರಿ॑ ಗೃ॒ಹಾ ಇ॒ಹ ಚ॑ । ಉ॒ರು ಬ್ರ॒ಹ್ಮ॑ಣೇ॒-ಽಸ್ಮೈ ಕ್ಷ॒ತ್ರಾಯ॒ ಮಹಿ॒ ಶರ್ಮ॑ ಯಚ್ಛ ॥ 21 ॥

(ಮನೋ॑ - ಽಮೃಡ॒ಯಃ - ಷಟ್ಚ॑ತ್ವಾರಿಗ್ಂಶಚ್ಚ) (ಅ. 7)

ರಾ॒ಷ್ಟ್ರಕಾ॑ಮಾಯ ಹೋತ॒ವ್ಯಾ॑ ರಾ॒ಷ್ಟ್ರಂ-ವೈಁ ರಾ᳚ಷ್ಟ್ರ॒ಭೃತೋ॑ ರಾ॒ಷ್ಟ್ರೇಣೈ॒ವಾಸ್ಮೈ॑ ರಾ॒ಷ್ಟ್ರಮವ॑ ರುನ್ಧೇ ರಾ॒ಷ್ಟ್ರಮೇ॒ವ ಭ॑ವತ್ಯಾ॒ತ್ಮನೇ॑ ಹೋತ॒ವ್ಯಾ॑ ರಾ॒ಷ್ಟ್ರಂ-ವೈಁ ರಾ᳚ಷ್ಟ್ರ॒ಭೃತೋ॑ ರಾ॒ಷ್ಟ್ರ-ಮ್ಪ್ರ॒ಜಾ ರಾ॒ಷ್ಟ್ರ-ಮ್ಪ॒ಶವೋ॑ ರಾ॒ಷ್ಟ್ರಂ-ಯಁಚ್ಛ್ರೇಷ್ಠೋ॒ ಭವ॑ತಿ ರಾ॒ಷ್ಟ್ರೇಣೈ॒ವ ರಾ॒ಷ್ಟ್ರಮವ॑ ರುನ್ಧೇ॒ ವಸಿ॑ಷ್ಠ-ಸ್ಸಮಾ॒ನಾನಾ᳚-ಮ್ಭವತಿ॒ ಗ್ರಾಮ॑ಕಾಮಾಯ ಹೋತ॒ವ್ಯಾ॑ ರಾ॒ಷ್ಟ್ರಂ-ವೈಁ ರಾ᳚ಷ್ಟ್ರ॒ಭೃತೋ॑ ರಾ॒ಷ್ಟ್ರಗ್ಂ ಸ॑ಜಾ॒ತಾ ರಾ॒ಷ್ಟ್ರೇಣೈ॒ವಾಸ್ಮೈ॑ ರಾ॒ಷ್ಟ್ರಗ್ಂ ಸ॑ಜಾ॒ತಾನವ॑ ರುನ್ಧೇ ಗ್ರಾ॒- [ರುನ್ಧೇ ಗ್ರಾ॒ಮೀ, ಏ॒ವ ಭ॑ವತ್ಯಧಿ॒ದೇವ॑ನೇ] 22

-ಮ್ಯೇ॑ವ ಭ॑ವತ್ಯಧಿ॒ದೇವ॑ನೇ ಜುಹೋತ್ಯಧಿ॒ದೇವ॑ನ ಏ॒ವಾಸ್ಮೈ॑ ಸಜಾ॒ತಾನವ॑ ರುನ್ಧೇ॒ ತ ಏ॑ನ॒ಮವ॑ರುದ್ಧಾ॒ ಉಪ॑ ತಿಷ್ಠನ್ತೇ ರಥಮು॒ಖ ಓಜ॑ಸ್ಕಾಮಸ್ಯ ಹೋತ॒ವ್ಯಾ॑ ಓಜೋ॒ ವೈ ರಾ᳚ಷ್ಟ್ರ॒ಭೃತ॒ ಓಜೋ॒ ರಥ॒ ಓಜ॑ಸೈ॒ವಾಸ್ಮಾ॒ ಓಜೋ-ಽವ॑ ರುನ್ಧ ಓಜ॒ಸ್ವ್ಯೇ॑ವ ಭ॑ವತಿ॒ ಯೋ ರಾ॒ಷ್ಟ್ರಾದಪ॑ಭೂತ॒-ಸ್ಸ್ಯಾ-ತ್ತಸ್ಮೈ॑ ಹೋತ॒ವ್ಯಾ॑ ಯಾವ॑ನ್ತೋ-ಽಸ್ಯ॒ ರಥಾ॒-ಸ್ಸ್ಯುಸ್ತಾ-ನ್ಬ್ರೂ॑ಯಾ-ದ್ಯು॒ನ್ಧ್ವಮಿತಿ॑ ರಾ॒ಷ್ಟ್ರಮೇ॒ವಾ-ಽಸ್ಮೈ॑ ಯುನ॒- [ರಾ॒ಷ್ಟ್ರಮೇ॒ವಾ-ಽಸ್ಮೈ॑ ಯುನಕ್ತಿ, ಆಹು॑ತಯೋ॒ ವಾ] 23

-ಕ್ತ್ಯಾಹು॑ತಯೋ॒ ವಾ ಏ॒ತಸ್ಯಾಕೢ॑ಪ್ತಾ॒ ಯಸ್ಯ॑ ರಾ॒ಷ್ಟ್ರ-ನ್ನ ಕಲ್ಪ॑ತೇ ಸ್ವರ॒ಥಸ್ಯ॒ ದಕ್ಷಿ॑ಣ-ಞ್ಚ॒ಕ್ರ-ಮ್ಪ್ರ॒ವೃಹ್ಯ॑ ನಾ॒ಡೀಮ॒ಭಿ ಜು॑ಹುಯಾ॒ದಾಹು॑ತೀರೇ॒ವಾಸ್ಯ॑ ಕಲ್ಪಯತಿ॒ ತಾ ಅ॑ಸ್ಯ॒ ಕಲ್ಪ॑ಮಾನಾ ರಾ॒ಷ್ಟ್ರಮನು॑ ಕಲ್ಪತೇ ಸಙ್ಗ್ರಾ॒ಮೇ ಸಂಯಁ॑ತ್ತೇ ಹೋತ॒ವ್ಯಾ॑ ರಾ॒ಷ್ಟ್ರಂ-ವೈಁ ರಾ᳚ಷ್ಟ್ರ॒ಭೃತೋ॑ ರಾ॒ಷ್ಟ್ರೇ ಖಲು॒ ವಾ ಏ॒ತೇ ವ್ಯಾಯ॑ಚ್ಛನ್ತೇ॒ ಯೇ ಸ॑ಙ್ಗ್ರಾ॒ಮಗ್ಂ ಸಂ॒-ಯಁನ್ತಿ॒ ಯಸ್ಯ॒ ಪೂರ್ವ॑ಸ್ಯ॒ ಜುಹ್ವ॑ತಿ॒ ಸ ಏ॒ವ ಭ॑ವತಿ॒ ಜಯ॑ತಿ॒ ತಗ್ಂ ಸ॑ಗ್ರಾ॒ಮ್ಮ-ಮ್ಮಾ᳚ನ್ಧು॒ಕ ಇ॒ದ್ಧ್ಮೋ [ಇ॒ದ್ಧ್ಮಃ, ಭ॒ವ॒ತ್ಯಙ್ಗಾ॑ರಾ] 24

ಭ॑ವ॒ತ್ಯಙ್ಗಾ॑ರಾ ಏ॒ವ ಪ್ರ॑ತಿ॒ವೇಷ್ಟ॑ಮಾನಾ ಅ॒ಮಿತ್ರಾ॑ಣಾಮಸ್ಯ॒ ಸೇನಾ॒-ಮ್ಪ್ರತಿ॑ವೇಷ್ಟಯನ್ತಿ॒ ಯ ಉ॒ನ್ಮಾದ್ಯೇ॒-ತ್ತಸ್ಮೈ॑ ಹೋತ॒ವ್ಯಾ॑ ಗನ್ಧರ್ವಾಫ್ಸ॒ರಸೋ॒ ವಾ ಏ॒ತಮುನ್ಮಾ॑ದಯನ್ತಿ॒ ಯ ಉ॒ನ್ಮಾದ್ಯ॑ತ್ಯೇ॒ತೇ ಖಲು॒ ವೈ ಗ॑ನ್ಧರ್ವಾಫ್ಸ॒ರಸೋ॒ ಯದ್ರಾ᳚ಷ್ಟ್ರ॒ಭೃತ॒ಸ್ತಸ್ಮೈ॒ ಸ್ವಾಹಾ॒ ತಾಭ್ಯ॒-ಸ್ಸ್ವಾಹೇತಿ॑ ಜುಹೋತಿ॒ ತೇನೈ॒ವೈನಾ᳚ಞ್ಛಮಯತಿ॒ ನೈಯ॑ಗ್ರೋಧ॒ ಔದು॑ಮ್ಬರ॒ ಆಶ್ವ॑ತ್ಥಃ॒ ಪ್ಲಾಕ್ಷ॒ ಇತೀ॒ದ್ಧ್ಮೋ ಭ॑ವತ್ಯೇ॒ತೇ ವೈ ಗ॑ನ್ಧರ್ವಾಫ್ಸ॒ರಸಾ᳚-ಙ್ಗೃ॒ಹಾ-ಸ್ಸ್ವ ಏ॒ವೈನಾ॑- [ಏ॒ವೈನಾನ್॑, ಆ॒ಯತ॑ನೇ] 25

-ನಾ॒ಯತ॑ನೇ ಶಮಯತ್ಯಭಿ॒ಚರ॑ತಾ ಪ್ರತಿಲೋ॒ಮಗ್ಂ ಹೋ॑ತ॒ವ್ಯಾಃ᳚ ಪ್ರಾ॒ಣಾನೇ॒ವಾಸ್ಯ॑ ಪ್ರ॒ತೀಚಃ॒ ಪ್ರತಿ॑ ಯೌತಿ॒ ತ-ನ್ತತೋ॒ ಯೇನ॒ ಕೇನ॑ ಚ ಸ್ತೃಣುತೇ॒ ಸ್ವಕೃ॑ತ॒ ಇರಿ॑ಣೇ ಜುಹೋತಿ ಪ್ರದ॒ರೇ ವೈ॒ತದ್ವಾ ಅ॒ಸ್ಯೈ ನಿರ್-ಋ॑ತಿಗೃಹೀತ॒-ನ್ನಿರ್-ಋ॑ತಿಗೃಹೀತ ಏ॒ವೈನ॒-ನ್ನಿರ್-ಋ॑ತ್ಯಾ ಗ್ರಾಹಯತಿ॒ ಯದ್ವಾ॒ಚಃ ಕ್ರೂ॒ರ-ನ್ತೇನ॒ ವಷ॑-ಟ್ಕರೋತಿ ವಾ॒ಚ ಏ॒ವೈನ॑-ಙ್ಕ್ರೂ॒ರೇಣ॒ ಪ್ರವೃ॑ಶ್ಚತಿ ತಾ॒ಜಗಾರ್ತಿ॒ಮಾರ್ಚ್ಛ॑ತಿ॒ ಯಸ್ಯ॑ ಕಾ॒ಮಯೇ॑ತಾ॒ನ್ನಾದ್ಯ॒- [ಕಾ॒ಮಯೇ॑ತಾ॒ನ್ನಾದ್ಯ᳚ಮ್, ಆ ದ॑ದೀ॒ಯೇತಿ॒] 26

-ಮಾ ದ॑ದೀ॒ಯೇತಿ॒ ತಸ್ಯ॑ ಸ॒ಭಾಯಾ॑ಮುತ್ತಾ॒ನೋ ನಿ॒ಪದ್ಯ॒ ಭುವ॑ನಸ್ಯ ಪತ॒ ಇತಿ॒ ತೃಣಾ॑ನಿ॒ ಸ-ಙ್ಗೃ॑ಹ್ಣೀಯಾ-ತ್ಪ್ರ॒ಜಾಪ॑ತಿ॒ರ್ವೈ ಭುವ॑ನಸ್ಯ॒ ಪತಿಃ॑ ಪ್ರ॒ಜಾಪ॑ತಿನೈ॒ವಾಸ್ಯಾ॒ನ್ನಾದ್ಯ॒ಮಾ ದ॑ತ್ತ ಇ॒ದಮ॒ಹಮ॒ಮುಷ್ಯಾ॑ ಽಽಮುಷ್ಯಾಯ॒ಣಸ್ಯಾ॒ನ್ನಾದ್ಯಗ್ಂ॑ ಹರಾ॒ಮೀತ್ಯಾ॑ಹಾ॒ನ್ನಾದ್ಯ॑ಮೇ॒ವಾಸ್ಯ॑ ಹರತಿ ಷ॒ಡ್ಭಿರ್ಹ॑ರತಿ॒ ಷಡ್ವಾ ಋ॒ತವಃ॑ ಪ್ರ॒ಜಾಪ॑ತಿನೈ॒ವಾಸ್ಯಾ॒-ನ್ನಾದ್ಯ॑ಮಾ॒ದಾಯ॒ರ್ತವೋ᳚ ಽಸ್ಮಾ॒ ಅನು॒ ಪ್ರಯ॑ಚ್ಛನ್ತಿ॒ [ಪ್ರಯ॑ಚ್ಛನ್ತಿ, ಯೋ ಜ್ಯೇ॒ಷ್ಠಬ॑ನ್ಧು॒-] 27

ಯೋ ಜ್ಯೇ॒ಷ್ಠಬ॑ನ್ಧು॒-ರಪ॑ ಭೂತ॒-ಸ್ಸ್ಯಾ-ತ್ತಗ್ಗ್ಸ್ಥಲೇ॑-ಽವ॒ಸಾಯ್ಯ॑ ಬ್ರಹ್ಮೌದ॒ನ-ಞ್ಚತುಃ॑ ಶರಾವ-ಮ್ಪ॒ಕ್ತ್ವಾ ತಸ್ಮೈ॑ ಹೋತ॒ವ್ಯಾ॑ ವರ್ಷ್ಮ॒ ವೈ ರಾ᳚ಷ್ಟ್ರ॒ಭೃತೋ॒ ವಷ್ಮ॒ ಸ್ಥಲಂ॒-ವಁರ್ಷ್ಮ॑ಣೈ॒ವೈನಂ॒-ವಁಷ್ಮ॑ ಸಮಾ॒ನಾನಾ᳚-ಙ್ಗಮಯತಿ॒ ಚತುಃ॑ ಶರಾವೋ ಭವತಿ ದಿ॒ಕ್ಷ್ವೇ॑ವ ಪ್ರತಿ॑ತಿಷ್ಠತಿ ಕ್ಷೀ॒ರೇ ಭ॑ವತಿ॒ ರುಚ॑ಮೇ॒ವಾಸ್ಮಿ॑-ನ್ದಧಾ॒ತ್ಯುದ್ಧ॑ರತಿ ಶೃತ॒ತ್ವಾಯ॑ ಸ॒ರ್ಪಿಷ್ವಾ᳚-ನ್ಭವತಿ ಮೇದ್ಧ್ಯ॒ತ್ವಾಯ॑ ಚ॒ತ್ವಾರ॑ ಆರ್ಷೇ॒ಯಾಃ ಪ್ರಾ-ಽಶ್ಞ॑ನ್ತಿ ದಿ॒ಶಾಮೇ॒ವ ಜ್ಯೋತಿ॑ಷಿ ಜುಹೋತಿ ॥ 28 ॥

(ಗ್ರಾ॒ಮೀ - ಯು॑ನಕ್ತೀ॒ - ಧ್ಮಃ - ಸ್ವ ಏ॒ವೈನಾ॑ - ನ॒ನ್ನಾದ್ಯಂ॑ - ಁಯಚ್ಛ॒ನ್ತ್ಯೇ - ಕಾ॒ನ್ನ ಪ॑ಞ್ಚಾ॒ಶಚ್ಚ॑) (ಅ. 8)

ದೇವಿ॑ಕಾ॒ ನಿವ॑ರ್ಪೇ-ತ್ಪ್ರ॒ಜಾಕಾ॑ಮ॒ಶ್ಛನ್ದಾಗ್ಂ॑ಸಿ॒ ವೈ ದೇವಿ॑ಕಾ॒ಶ್ಛನ್ದಾಗ್ಂ॑ಸೀವ॒ ಖಲು॒ ವೈ ಪ್ರ॒ಜಾಶ್ಛನ್ದೋ॑ಭಿರೇ॒ವಾಸ್ಮೈ᳚ ಪ್ರ॒ಜಾಃ ಪ್ರಜ॑ನಯತಿ ಪ್ರಥ॒ಮ-ನ್ಧಾ॒ತಾರ॑-ಙ್ಕರೋತಿ ಮಿಥು॒ನೀ ಏ॒ವ ತೇನ॑ ಕರೋ॒ತ್ಯನ್ವೇ॒ವಾಸ್ಮಾ॒ ಅನು॑ಮತಿರ್ಮನ್ಯತೇ ರಾ॒ತೇ ರಾ॒ಕಾ ಪ್ರ ಸಿ॑ನೀವಾ॒ಲೀ ಜ॑ನಯತಿ ಪ್ರ॒ಜಾಸ್ವೇ॒ವ ಪ್ರಜಾ॑ತಾಸು ಕು॒ಹ್ವಾ॑ ವಾಚ॑-ನ್ದಧಾತ್ಯೇ॒ತಾ ಏ॒ವ ನಿವ॑ರ್ಪೇ-ತ್ಪ॒ಶುಕಾ॑ಮ॒ಶ್ಛನ್ದಾಗ್ಂ॑ಸಿ॒ ವೈ ದೇವಿ॑ಕಾ॒ಶ್ಛನ್ದಾಗ್ಂ॑ಸೀ- [ದೇವಿ॑ಕಾ॒ಶ್ಛನ್ದಾಗ್ಂ॑ಸಿ, ಇ॒ವ॒ ಖಲು॒ ವೈ] 29

-ವ॒ ಖಲು॒ ವೈ ಪ॒ಶವ॒ಶ್ಛನ್ದೋ॑ಭಿರೇ॒ವಾಸ್ಮೈ॑ ಪ॒ಶೂ-ನ್ಪ್ರಜ॑ನಯತಿ ಪ್ರಥ॒ಮ-ನ್ಧಾ॒ತಾರ॑-ಙ್ಕರೋತಿ॒ ಪ್ರೈವ ತೇನ॑ ವಾಪಯ॒ತ್ಯನ್ವೇ॒ವಾಸ್ಮಾ॒ ಅನು॑ಮತಿರ್ಮನ್ಯತೇ ರಾ॒ತೇ ರಾ॒ಕಾ ಪ್ರ ಸಿ॑ನೀವಾ॒ಲೀ ಜ॑ನಯತಿ ಪ॒ಶೂನೇ॒ವ ಪ್ರಜಾ॑ತಾನ್ ಕು॒ಹ್ವಾ᳚ ಪ್ರತಿ॑ಷ್ಠಾಪಯತ್ಯೇ॒ತಾ ಏ॒ವ ನಿರ್ವ॑ಪೇ॒-ದ್ಗ್ರಾಮ॑ಕಾಮ॒ಶ್ಛನ್ದಾಗ್ಂ॑ಸಿ॒ ವೈ ದೇವಿ॑ಕಾ॒ಶ್ಛನ್ದಾಗ್ಂ॑ಸೀ ವ॒ ಖಲು॒ ವೈ ಗ್ರಾಮ॒ಶ್ಛನ್ದೋ॑ಭಿರೇ॒ವಾಸ್ಮೈ॒ ಗ್ರಾಮ॒- [ಗ್ರಾಮ᳚ಮ್, ಅವ॑ ರುನ್ಧೇ] 30

-ಮವ॑ ರುನ್ಧೇ ಮದ್ಧ್ಯ॒ತೋ ಧಾ॒ತಾರ॑-ಙ್ಕರೋತಿ ಮದ್ಧ್ಯ॒ತ ಏ॒ವೈನ॒-ಙ್ಗ್ರಾಮ॑ಸ್ಯ ದಧಾತ್ಯೇ॒ತಾ ಏ॒ವ ನಿರ್ವ॑ಪೇ॒ಜ್ಜ್ಯೋಗಾ॑ಮಯಾವೀ॒ ಛನ್ದಾಗ್ಂ॑ಸಿ॒ ವೈ ದೇವಿ॑ಕಾ॒ಶ್ಛನ್ದಾಗ್ಂ॑ಸಿ॒ ಖಲು॒ ವಾ ಏ॒ತಮ॒ಭಿ ಮ॑ನ್ಯನ್ತೇ॒ ಯಸ್ಯ॒ ಜ್ಯೋಗಾ॒ಮಯ॑ತಿ॒ ಛನ್ದೋ॑ಭಿರೇ॒ವೈನ॑-ಮಗ॒ದ-ಙ್ಕ॑ರೋತಿ ಮದ್ಧ್ಯ॒ತೋ ಧಾ॒ತಾರ॑-ಙ್ಕರೋತಿ ಮದ್ಧ್ಯ॒ತೋ ವಾ ಏ॒ತಸ್ಯಾಕೢ॑ಪ್ತಂ॒-ಯಁಸ್ಯ॒ ಜ್ಯೋಗಾ॒ಮಯ॑ತಿ ಮದ್ಧ್ಯ॒ತ ಏ॒ವಾಸ್ಯ॒ ತೇನ॑ ಕಲ್ಪಯತ್ಯೇ॒ತಾ ಏ॒ವ ನಿ- [ ಏ॒ವ ನಿಃ, ವ॒ಪೇ॒ದ್ಯಂ-ಯಁ॒ಜ್ಞೋ] 31

-ರ್ವ॑ಪೇ॒ದ್ಯಂ-ಯಁ॒ಜ್ಞೋ ನೋಪ॒ನಮೇ॒ಚ್ಛನ್ದಾಗ್ಂ॑ಸಿ॒ ವೈ ದೇವಿ॑ಕಾ॒ಶ್ಛನ್ದಾಗ್ಂ॑ಸಿ॒ ಖಲು॒ ವಾ ಏ॒ತ-ನ್ನೋಪ॑ ನಮನ್ತಿ॒ ಯಂ-ಯಁ॒ಜ್ಞೋ ನೋಪ॒ನಮ॑ತಿ ಪ್ರಥ॒ಮ-ನ್ಧಾ॒ತಾರ॑-ಙ್ಕರೋತಿ ಮುಖ॒ತ ಏ॒ವಾಸ್ಮೈ॒ ಛನ್ದಾಗ್ಂ॑ಸಿ ದಧಾ॒ತ್ಯುಪೈ॑ನಂ-ಯಁ॒ಜ್ಞೋ ನ॑ಮತ್ಯೇ॒ತಾ ಏ॒ವ ನಿವ॑ರ್ಪೇದೀಜಾ॒ನಶ್ಛನ್ದಾಗ್ಂ॑ಸಿ॒ ವೈ ದೇವಿ॑ಕಾ ಯಾ॒ತಯಾ॑ಮಾನೀವ॒ ಖಲು॒ ವಾ ಏ॒ತಸ್ಯ॒ ಛನ್ದಾಗ್ಂ॑ಸಿ॒ ಯ ಈ॑ಜಾ॒ನ ಉ॑ತ್ತ॒ಮ-ನ್ಧಾ॒ತಾರ॑-ಙ್ಕರೋ- [ಉ॑ತ್ತ॒ಮ-ನ್ಧಾ॒ತಾರ॑-ಙ್ಕರೋತಿ, ಉ॒ಪರಿ॑ಷ್ಟಾದೇ॒ವಾಸ್ಮೈ॒] 32

-ತ್ಯು॒ಪರಿ॑ಷ್ಟಾದೇ॒ವಾಸ್ಮೈ॒ ಛನ್ದಾ॒ಗ್॒ಸ್ಯಯಾ॑ತಯಾಮಾ॒ನ್ಯವ॑ ರುನ್ಧ॒ ಉಪೈ॑ನ॒ಮುತ್ತ॑ರೋ ಯ॒ಜ್ಞೋ ನ॑ಮತ್ಯೇ॒ತಾ ಏ॒ವ ನಿವ॑ರ್ಪೇ॒ದ್ಯ-ಮ್ಮೇ॒ಧಾ ನೋಪ॒ನಮೇ॒ಚ್ಛನ್ದಾಗ್ಂ॑ಸಿ॒ ವೈ ದೇವಿ॑ಕಾ॒ಶ್ಛನ್ದಾಗ್ಂ॑ಸಿ॒ ಖಲು॒ ವಾ ಏ॒ತ-ನ್ನೋಪ॑ ನಮನ್ತಿ॒ ಯ-ಮ್ಮೇ॒ಧಾ ನೋಪ॒ನಮ॑ತಿ ಪ್ರಥ॒ಮ-ನ್ಧಾ॒ತಾರ॑-ಙ್ಕರೋತಿ ಮುಖ॒ತ ಏ॒ವಾಸ್ಮೈ॒ ಛನ್ದಾಗ್ಂ॑ಸಿ ದಧಾ॒ತ್ಯುಪೈ॑ನ-ಮ್ಮೇ॒ಧಾ ನ॑ಮತ್ಯೇ॒ತಾ ಏ॒ವ ನಿವ॑ರ್ಪೇ॒- [ನಿವ॑ರ್ಪೇತ್, ರುಕ್ಕಾ॑ಮ॒ಶ್ಛನ್ದಾಗ್ಂ॑ಸಿ॒ ವೈ] 33

-ದ್ರುಕ್ಕಾ॑ಮ॒ಶ್ಛನ್ದಾಗ್ಂ॑ಸಿ॒ ವೈ ದೇವಿ॑ಕಾ॒ಶ್ಛನ್ದಾಗ್ಂ॑ಸೀವ॒ ಖಲು॒ ವೈ ರುಕ್ ಛನ್ದೋ॑ಭಿರೇ॒ವಾಸ್ಮಿ॒-ನ್ರುಚ॑-ನ್ದಧಾತಿಕ್ಷೀ॒ರೇ ಭ॑ವನ್ತಿ॒ ರುಚ॑ಮೇ॒ವಾಸ್ಮಿ॑-ನ್ದಧತಿ ಮದ್ಧ್ಯ॒ತೋ ಧಾ॒ತಾರ॑-ಙ್ಕರೋತಿ ಮದ್ಧ್ಯ॒ತ ಏ॒ವೈನಗ್ಂ॑ ರು॒ಚೋ ದ॑ಧಾತಿಗಾಯ॒ತ್ರೀ ವಾ ಅನು॑ಮತಿಸ್ತ್ರಿ॒ಷ್ಟುಗ್ರಾ॒ಕಾ ಜಗ॑ತೀ ಸಿನೀವಾ॒ಲ್ಯ॑ನು॒ಷ್ಟುಪ್ ಕು॒ಹೂರ್ಧಾ॒ತಾ ವ॑ಷಟ್ಕಾ॒ರಃ ಪೂ᳚ರ್ವಪ॒ಕ್ಷೋ ರಾ॒ಕಾ-ಽಪ॑ರಪ॒ಕ್ಷಃ ಕು॒ಹೂರ॑ಮಾವಾ॒ಸ್ಯಾ॑ ಸಿನೀವಾ॒ಲೀ ಪೌ᳚ರ್ಣಮಾ॒ಸ್ಯನು॑ಮತಿಶ್ಚ॒ನ್ದ್ರಮಾ॑ ಧಾ॒ತಾ-ಽಷ್ಟೌ [ ] 34

ವಸ॑ವೋ॒-ಽಷ್ಟಾಕ್ಷ॑ರಾ ಗಾಯ॒ತ್ರ್ಯೇಕಾ॑ದಶ ರು॒ದ್ರಾ ಏಕಾ॑ದಶಾಕ್ಷರಾ ತ್ರಿ॒ಷ್ಟುಬ್ ದ್ವಾದ॑ಶಾ-ಽಽದಿ॒ತ್ಯಾ ದ್ವಾದ॑ಶಾಕ್ಷರಾ॒ ಜಗ॑ತೀ ಪ್ರ॒ಜಾಪ॑ತಿರನು॒ಷ್ಟುಬ್ ಧಾ॒ತಾ ವ॑ಷಟ್ಕಾ॒ರ ಏ॒ತದ್ವೈ ದೇವಿ॑ಕಾ॒-ಸ್ಸರ್ವಾ॑ಣಿ ಚ॒ ಛನ್ದಾಗ್ಂ॑ಸಿ॒ ಸರ್ವಾ᳚ಶ್ಚ ದೇ॒ವತಾ॑ ವಷಟ್ಕಾ॒ರಸ್ತಾ ಯ-ಥ್ಸ॒ಹ ಸರ್ವಾ॑ ನಿ॒ರ್ವಪೇ॑ದೀಶ್ವ॒ರಾ ಏ॑ನ-ಮ್ಪ್ರ॒ದಹೋ॒ ದ್ವೇ ಪ್ರ॑ಥ॒ಮೇ ನಿ॒ರುಪ್ಯ॑ ಧಾ॒ತುಸ್ತೃ॒ತೀಯ॒-ನ್ನಿವ॑ರ್ಪೇ॒-ತ್ತಥೋ॑ ಏ॒ವೋತ್ತ॑ರೇ॒ ನಿವ॑ರ್ಪೇ॒-ತ್ತಥೈ॑ನ॒-ನ್ನ ಪ್ರದ॑ಹ॒ನ್ತ್ಯ ಥೋ॒ ಯಸ್ಮೈ॒ ಕಾಮಾ॑ಯ ನಿರು॒ಪ್ಯನ್ತೇ॒ ತಮೇ॒ವಾ-ಽಽಭಿ॒ರುಪಾ᳚-ಽಽಪ್ನೋತಿ ॥ 35 ॥

(ಪ॒ಶುಕಾ॑ಮ॒ಶ್ಛನ್ದಾಗ್ಂ॑ಸಿ॒ ವೈ ದೇವಿ॑ಕಾ॒ಶ್ಛನ್ದಾಗ್ಂ॑ಸಿ॒-ಗ್ರಾಮಂ॑-ಕಲ್ಪಯತ್ಯೇ॒ತಾ ಏ॒ವ ನಿ-ರು॑ತ್ತ॒ಮನ್ಧಾ॒ತಾರ॑-ಙ್ಕರೋತಿ - ಮೇ॒ಧಾ ನ॑ಮತ್ಯೇ॒ತಾ ಏ॒ವ ನಿರ್ವ॑ಪೇ - ದ॒ಷ್ಟೌ - ದ॑ಹನ್ತಿ॒ - ನವ॑ ಚ) (ಅ. 9)

(ದೇವಿ॑ಕಾಃ ಪ್ರ॒ಜಾಕಾ॑ಮೋ ಮಿಥು॒ನೀ ಪ॒ಶುಕಾ॑ಮಃ॒ ಪ್ರೈವ ಗ್ರಾಮ॑ಕಾಮೋ॒ ಜ್ಯೋಗಾ॑ಮಯಾವೀ॒ ಯಂ-ಯಁ॒ಜ್ಞೋ ಯ ಈ॑ಜಾ॒ನೋ ಯ-ಮ್ಮೇ॒ಧಾ ರುಕ್ಕಾ॑ಮೋ॒-ಽಷ್ಟೌ । ದೇವಿ॑ಕಾ ಭವನ್ತಿ ದಧತಿ ರಾ॒ಷ್ಟ್ರಕಾ॑ಮಾಯ ಭವತಿ ದಧಾತಿ ।)

ವಾಸ್ತೋ᳚ಷ್ಪತೇ॒ ಪ್ರತಿ॑ ಜಾನೀ ಹ್ಯ॒ಸ್ಮಾನ್-ಥ್ಸ್ವಾ॑ವೇ॒ಶೋ ಅ॑ನಮೀ॒ವೋ ಭ॑ವಾನಃ । ಯ-ತ್ತ್ವೇಮ॑ಹೇ॒ ಪ್ರತಿ॒ತನ್ನೋ॑ ಜುಷಸ್ವ॒ ಶನ್ನ॑ ಏಧಿ ದ್ವಿ॒ಪದೇ॒ ಶಞ್ಚತು॑ಷ್ಪದೇ ॥ ವಾಸ್ತೋ᳚ಷ್ಪತೇ ಶ॒ಗ್ಮಯಾ॑ ಸ॒ಗ್ಂ॒ ಸದಾ॑ತೇ ಸಕ್ಷೀ॒ಮಹಿ॑ ರ॒ಣ್ವಯಾ॑ ಗಾತು॒ಮತ್ಯಾ᳚ । ಆವಃ॒, ಕ್ಷೇಮ॑ ಉ॒ತ ಯೋಗೇ॒ ವರ॑ನ್ನೋ ಯೂ॒ಯ-ಮ್ಪಾ॑ತ ಸ್ವ॒ಸ್ತಿಭಿ॒-ಸ್ಸದಾ॑ನಃ ॥ ಯ-ಥ್ಸಾ॒ಯ-ಮ್ಪ್ರಾ॑ತರಗ್ನಿಹೋ॒ತ್ರ-ಞ್ಜು॒ಹೋತ್ಯಾ॑ಹುತೀಷ್ಟ॒ಕಾ ಏ॒ವ ತಾ ಉಪ॑ ಧತ್ತೇ॒ [ತಾ ಉಪ॑ ಧತ್ತೇ, ಯಜ॑ಮಾನೋ-ಽಹೋರಾ॒ತ್ರಾಣಿ॒] 36

ಯಜ॑ಮಾನೋ-ಽಹೋರಾ॒ತ್ರಾಣಿ॒ ವಾ ಏ॒ತಸ್ಯೇಷ್ಟ॑ಕಾ॒ ಯ ಆಹಿ॑ತಾಗ್ನಿ॒ರ್ಯ-ಥ್ಸಾ॒ಯ-ಮ್ಪ್ರಾ॑ತರ್ಜು॒ಹೋತ್ಯ॑ಹೋರಾ॒ತ್ರಾಣ್ಯೇ॒ವಾ ಽಽಪ್ತ್ವೇಷ್ಟ॑ಕಾಃ ಕೃ॒ತ್ವೋಪ॑ ಧತ್ತೇ॒ ದಶ॑ ಸಮಾ॒ನತ್ರ॑ ಜುಹೋತಿ॒ ದಶಾ᳚ಕ್ಷರಾ ವಿ॒ರಾ-ಡ್ವಿ॒ರಾಜ॑ಮೇ॒ವಾ-ಽಽಪ್ತ್ವೇಷ್ಟ॑ಕಾ-ಙ್ಕೃ॒ತ್ವೋಪ॑ ಧ॒ತ್ತೇ-ಽಥೋ॑ ವಿ॒ರಾಜ್ಯೇ॒ವ ಯ॒ಜ್ಞಮಾ᳚ಪ್ನೋತಿ॒ ಚಿತ್ಯ॑ಶ್ಚಿತ್ಯೋ-ಽಸ್ಯ ಭವತಿ॒ ತಸ್ಮಾ॒ದ್ಯತ್ರ॒ ದಶೋ॑ಷಿ॒ತ್ವಾ ಪ್ರ॒ಯಾತಿ॒ ತ-ದ್ಯ॑ಜ್ಞವಾ॒ಸ್ತ್ವವಾ᳚ಸ್ತ್ವೇ॒ವ ತದ್ಯ-ತ್ತತೋ᳚-ಽರ್ವಾ॒ಚೀನಗ್ಂ॑ [ತದ್ಯ-ತ್ತತೋ᳚-ಽರ್ವಾ॒ಚೀನ᳚ಮ್, ರು॒ದ್ರಃ ಖಲು॒ ವೈ] 37

ರು॒ದ್ರಃ ಖಲು॒ ವೈ ವಾ᳚ಸ್ತೋಷ್ಪ॒ತಿರ್ಯದಹು॑ತ್ವಾ ವಾಸ್ತೋಷ್ಪ॒ತೀಯ॑-ಮ್ಪ್ರಯಾ॒ಯಾ-ದ್ರು॒ದ್ರ ಏ॑ನ-ಮ್ಭೂ॒ತ್ವಾ-ಽಗ್ನಿರ॑ನೂ॒ತ್ಥಾಯ॑ ಹನ್ಯಾದ್ವಾಸ್ತೋಷ್ಪ॒ತೀಯ॑-ಞ್ಜುಹೋತಿ ಭಾಗ॒ಧೇಯೇ॑ನೈ॒ವೈನಗ್ಂ॑ ಶಮಯತಿ॒ ನಾ-ಽಽರ್ತಿ॒ಮಾರ್ಚ್ಛ॑ತಿ॒ ಯಜ॑ಮಾನೋ॒ ಯದ್ಯು॒ಕ್ತೇ ಜು॑ಹು॒ಯಾದ್ಯಥಾ॒ ಪ್ರಯಾ॑ತೇ॒ ವಾಸ್ತಾ॒ವಾಹು॑ತಿ-ಞ್ಜು॒ಹೋತಿ॑ ತಾ॒ದೃಗೇ॒ವ ತದ್ಯದಯು॑ಕ್ತೇ ಜುಹು॒ಯಾದ್ಯಥಾ॒ ಕ್ಷೇಮ॒ ಆಹು॑ತಿ-ಞ್ಜು॒ಹೋತಿ॑ ತಾ॒ದೃಗೇ॒ವ ತದಹು॑ತಮಸ್ಯ ವಾಸ್ತೋಷ್ಪ॒ತೀಯಗ್ಗ್॑ ಸ್ಯಾ॒- [ಸ್ಯಾತ್, ದಕ್ಷಿ॑ಣೋ] 38

-ದ್ದಕ್ಷಿ॑ಣೋ ಯು॒ಕ್ತೋ ಭವ॑ತಿ ಸ॒ವ್ಯೋ-ಽಯು॒ಕ್ತೋ-ಽಥ॑ ವಾಸ್ತೋಷ್ಪ॒ತೀಯ॑-ಞ್ಜುಹೋತ್ಯು॒ಭಯ॑ಮೇ॒ವಾ-ಽ ಕ॒ರಪ॑ರಿವರ್ಗಮೇ॒ವೈನಗ್ಂ॑ ಶಮಯತಿ॒ ಯದೇಕ॑ಯಾ ಜುಹು॒ಯಾದ್ದ॑ರ್ವಿಹೋ॒ಮ-ಙ್ಕು॑ರ್ಯಾ-ತ್ಪುರೋ-ಽನುವಾ॒ಕ್ಯಾ॑ ಮ॒ನೂಚ್ಯ॑ ಯಾ॒ಜ್ಯ॑ಯಾ ಜುಹೋತಿ ಸದೇವ॒ತ್ವಾಯ॒ ಯದ್ಧು॒ತ ಆ॑ದ॒ದ್ಧ್ಯಾ-ದ್ರು॒ದ್ರ-ಙ್ಗೃ॒ಹಾನ॒ನ್ವಾರೋ॑ಹಯೇ॒-ದ್ಯದ॑ವ॒ಕ್ಷಾಣಾ॒ನ್ಯಸ॑-ಮ್ಪ್ರಕ್ಷಾಪ್ಯ ಪ್ರಯಾ॒ಯಾದ್ಯಥಾ॑ ಯಜ್ಞವೇಶ॒ಸಂ-ವಾಁ॒-ಽಽದಹ॑ನಂ-ವಾಁ ತಾ॒ದೃಗೇ॒ವ ತದ॒ಯನ್ತೇ॒ ಯೋನಿ॑ರ್-ಋ॒ತ್ವಿಯ॒ ಇತ್ಯ॒ರಣ್ಯೋ᳚-ಸ್ಸ॒ಮಾರೋ॑ಹಯ- [ಇತ್ಯ॒ರಣ್ಯೋ᳚-ಸ್ಸ॒ಮಾರೋ॑ಹಯತಿ, ಏ॒ಷ ವಾ] 39

-ತ್ಯೇ॒ಷ ವಾ ಅ॒ಗ್ನೇರ್ಯೋನಿ॒-ಸ್ಸ್ವ ಏ॒ವೈನಂ॒-ಯೋಁನೌ॑ ಸ॒ಮಾರೋ॑ಹಯ॒ತ್ಯಥೋ॒ ಖಲ್ವಾ॑ಹು॒ರ್ಯದ॒ರಣ್ಯೋ᳚-ಸ್ಸ॒ಮಾರೂ॑ಢೋ॒ ನಶ್ಯೇ॒ದುದ॑ಸ್ಯಾ॒ಗ್ನಿ-ಸ್ಸೀ॑ದೇ-ತ್ಪುನರಾ॒ಧೇಯಃ॑ ಸ್ಯಾ॒ದಿತಿ॒ ಯಾ ತೇ॑ ಅಗ್ನೇ ಯ॒ಜ್ಞಿಯಾ॑ ತ॒ನೂಸ್ತಯೇಹ್ಯಾ ರೋ॒ಹೇತ್ಯಾ॒ತ್ಮನ್-ಥ್ಸ॒ಮಾರೋ॑ಹಯತೇ॒ ಯಜ॑ಮಾನೋ॒ ವಾ ಅ॒ಗ್ನೇರ್ಯೋನಿ॒-ಸ್ಸ್ವಾಯಾ॑ಮೇ॒ವೈನಂ॒-ಯೋಁನ್ಯಾಗ್ಂ॑ ಸ॒ಮಾರೋ॑ಹಯತೇ ॥ 40 ॥

(ಧ॒ತ್ತೇ॒-ಽರ್ವಾ॒ಚೀನಗ್ಗ್॑ -ಸ್ಯಾ-ಥ್ಸ॒ಮಾರೋ॑ಹಯತಿ॒ -ಪಞ್ಚ॑ಚತ್ವಾರಿಗ್ಂಶಚ್ಚ) (ಅ. 10)

ತ್ವಮ॑ಗ್ನೇ ಬೃ॒ಹದ್ವಯೋ॒ ದಧಾ॑ಸಿ ದೇವ ದಾ॒ಶುಷೇ᳚ । ಕ॒ವಿರ್ಗೃ॒ಹಪ॑ತಿ॒ರ್ಯುವಾ᳚ ॥ ಹ॒ವ್ಯ॒ವಾಡ॒ಗ್ನಿರ॒ಜರಃ॑ ಪಿ॒ತಾ ನೋ॑ ವಿ॒ಭುರ್ವಿ॒ಭಾವಾ॑ ಸು॒ದೃಶೀ॑ಕೋ ಅ॒ಸ್ಮೇ । ಸು॒ಗಾ॒ರ್॒ಹ॒ಪ॒ತ್ಯಾ-ಸ್ಸಮಿಷೋ॑ ದಿದೀಹ್ಯಸ್ಮ॒ದ್ರಿಯ॒ಖ್ಸ-ಮ್ಮಿ॑ಮೀಹಿ॒ ಶ್ರವಾಗ್ಂ॑ಸಿ ॥ ತ್ವ-ಞ್ಚ॑ ಸೋಮ ನೋ॒ ವಶೋ॑ ಜೀ॒ವಾತು॒-ನ್ನ ಮ॑ರಾಮಹೇ । ಪ್ರಿ॒ಯಸ್ತೋ᳚ತ್ರೋ॒ ವನ॒ಸ್ಪತಿಃ॑ ॥ ಬ್ರ॒ಹ್ಮಾ ದೇ॒ವಾನಾ᳚-ಮ್ಪದ॒ವೀಃ ಕ॑ವೀ॒ನಾಮೃಷಿ॒ರ್ವಿಪ್ರಾ॑ಣಾ-ಮ್ಮಹಿ॒ಷೋ ಮೃ॒ಗಾಣಾ᳚ಮ್ । ಶ್ಯೇ॒ನೋ ಗೃದ್ಧ್ರಾ॑ಣಾ॒ಗ್॒ ಸ್ವಧಿ॑ತಿ॒ ರ್ವನಾ॑ನಾ॒ಗ್ಂ॒ ಸೋಮಃ॑ [ಸೋಮಃ॑, ಪ॒ವಿತ್ರ॒ಮತ್ಯೇ॑ತಿ॒] 41

ಪ॒ವಿತ್ರ॒ಮತ್ಯೇ॑ತಿ॒ ರೇಭನ್ನ್॑ ॥ ಆ ವಿ॒ಶ್ವದೇ॑ವ॒ಗ್ಂ॒ ಸತ್ಪ॑ತಿಗ್ಂ ಸೂ॒ಕ್ತೈರ॒ದ್ಯಾ ವೃ॑ಣೀಮಹೇ । ಸ॒ತ್ಯಸ॑ವಗ್ಂ ಸವಿ॒ತಾರ᳚ಮ್ ॥ ಆಸ॒ತ್ಯೇನ॒ ರಜ॑ಸಾ॒ ವರ್ತ॑ಮಾನೋ ನಿವೇ॒ಶಯ॑ನ್ನ॒ಮೃತ॒-ಮ್ಮರ್ತ್ಯ॑ಞ್ಚ । ಹಿ॒ರ॒ಣ್ಯಯೇ॑ನ ಸವಿ॒ತಾ ರಥೇ॒ನಾ-ಽಽ ದೇ॒ವೋಯಾ॑ತಿ॒ ಭುವ॑ನಾ ವಿ॒ಪಶ್ಯನ್ನ್॑ ॥ ಯಥಾ॑ ನೋ॒ ಅದಿ॑ತಿಃ॒ ಕರ॒-ತ್ಪಶ್ವೇ॒ ನೃಭ್ಯೋ॒ ಯಥಾ॒ ಗವೇ᳚ । ಯಥಾ॑ ತೋ॒ಕಾಯ॑ ರು॒ದ್ರಿಯ᳚ಮ್ ॥ ಮಾ ನ॑ಸ್ತೋ॒ಕೇ ತನ॑ಯೇ॒ ಮಾ ನ॒ ಆಯು॑ಷಿ॒ ಮಾ ನೋ॒ ಗೋಷು॒ ಮಾ [ ] 42

ನೋ॒ ಅಶ್ವೇ॑ಷು ರೀರಿಷಃ । ವೀ॒ರಾ-ನ್ಮಾನೋ॑ ರುದ್ರ ಭಾಮಿ॒ತೋ ವ॑ಧೀರ್ಹ॒ವಿಷ್ಮ॑ನ್ತೋ॒ ನಮ॑ಸಾ ವಿಧೇಮ ತೇ ॥ ಉ॒ದ॒ಪ್ರುತೋ॒ ನ ವಯೋ॒ ರಕ್ಷ॑ಮಾಣಾ॒ ವಾವ॑ದತೋ ಅ॒ಭ್ರಿಯ॑ಸ್ಯೇವ॒ ಘೋಷಾಃ᳚ । ಗಿ॒ರಿ॒ಭ್ರಜೋ॒ ನೋರ್ಮಯೋ॒ ಮದ॑ನ್ತೋ॒ ಬೃಹ॒ಸ್ಪತಿ॑ಮ॒ಭ್ಯ॑ರ್ಕಾ ಅ॑ನಾವನ್ನ್ ॥ ಹ॒ಗ್ಂ॒ಸೈರಿ॑ವ॒ ಸಖಿ॑ಭಿ॒ರ್ವಾವ॑ದದ್ಭಿರಶ್ಮ॒ನ್- ಮಯಾ॑ನಿ॒ ನಹ॑ನಾ॒ ವ್ಯಸ್ಯನ್ನ್॑ । ಬೃಹ॒ಸ್ಪತಿ॑ರಭಿ॒ಕನಿ॑ಕ್ರದ॒ದ್ಗಾ ಉ॒ತ ಪ್ರಾಸ್ತೌ॒ದುಚ್ಚ॑ ವಿ॒ದ್ವಾಗ್ಂ ಅ॑ಗಾಯತ್ ॥ ಏನ್ದ್ರ॑ ಸಾನ॒ಸಿಗ್ಂ ರ॒ಯಿಗ್ಂ [ರ॒ಯಿಮ್, ಸ॒ಜಿತ್ವಾ॑ನಗ್ಂ ಸದಾ॒ಸಹ᳚ಮ್ ।] 43

ಸ॒ಜಿತ್ವಾ॑ನಗ್ಂ ಸದಾ॒ಸಹ᳚ಮ್ । ವರ್ಷಿ॑ಷ್ಠಮೂ॒ತಯೇ॑ ಭರ ॥ ಪ್ರ ಸ॑ಸಾಹಿಷೇ ಪುರುಹೂತ॒ ಶತ್ರೂ॒ನ್ ಜ್ಯೇಷ್ಠ॑ಸ್ತೇ॒ ಶುಷ್ಮ॑ ಇ॒ಹ ರಾ॒ತಿರ॑ಸ್ತು । ಇನ್ದ್ರಾ-ಽಽ ಭ॑ರ॒ ದಕ್ಷಿ॑ಣೇನಾ॒ ವಸೂ॑ನಿ॒ ಪತಿ॒-ಸ್ಸಿನ್ಧೂ॑ನಾಮಸಿ ರೇ॒ವತೀ॑ನಾಮ್ ॥ ತ್ವಗ್ಂ ಸು॒ತಸ್ಯ॑ ಪೀ॒ತಯೇ॑ ಸ॒ದ್ಯೋ ವೃ॒ದ್ಧೋ ಅ॑ಜಾಯಥಾಃ । ಇನ್ದ್ರ॒ ಜ್ಯೈಷ್ಠ್ಯಾ॑ಯ ಸುಕ್ರತೋ ॥ ಭುವ॒ಸ್ತ್ವಮಿ॑ನ್ದ್ರ॒ ಬ್ರಹ್ಮ॑ಣಾ ಮ॒ಹಾ-ನ್ಭುವೋ॒ ವಿಶ್ವೇ॑ಷು॒ ಸವ॑ನೇಷು ಯ॒ಜ್ಞಿಯಃ॑ । ಭುವೋ॒ ನೄಗ್ಶ್ಚ್ಯೌ॒ತ್ನೋ ವಿಶ್ವ॑ಸ್ಮಿ॒-ನ್ಭರೇ॒ ಜ್ಯೇಷ್ಠ॑ಶ್ಚ॒ ಮನ್ತ್ರೋ॑ [ಮನ್ತ್ರಃ॑, ವಿ॒ಶ್ವ॒ಚ॒ರ್ಷ॒ಣೇ॒ ।] 44

ವಿಶ್ವಚರ್ಷಣೇ ॥ ಮಿ॒ತ್ರಸ್ಯ॑ ಚರ್ಷಣೀ॒ಧೃತ॒-ಶ್ಶ್ರವೋ॑ ದೇ॒ವಸ್ಯ॑ ಸಾನ॒ಸಿಮ್ ।

ಸ॒ತ್ಯ-ಞ್ಚಿ॒ತ್ರ ಶ್ರ॑ವಸ್ತಮಮ್ ॥ ಮಿ॒ತ್ರೋ ಜನಾನ್॑ ಯಾತಯತಿ ಪ್ರಜಾ॒ನ-ನ್ಮಿ॒ತ್ರೋ ದಾ॑ಧಾರ ಪೃಥಿ॒ವೀಮು॒ತ ದ್ಯಾಮ್ । ಮಿ॒ತ್ರಃ ಕೃ॒ಷ್ಟೀರನಿ॑ಮಿಷಾ॒-ಽಭಿ ಚ॑ಷ್ಟೇ ಸ॒ತ್ಯಾಯ॑ ಹ॒ವ್ಯ-ಙ್ಘೃ॒ತವ॑-ದ್ವಿಧೇಮ ॥ ಪ್ರಸಮಿ॑ತ್ರ॒ ಮರ್ತೋ॑ ಅಸ್ತು॒ ಪ್ರಯ॑ಸ್ವಾ॒ನ್॒. ಯಸ್ತ॑ ಆದಿತ್ಯ॒ ಶಿಕ್ಷ॑ತಿ ವ್ರ॒ತೇನ॑ । ನ ಹ॑ನ್ಯತೇ॒ ನ ಜೀ॑ಯತೇ॒ ತ್ವೋತೋ॒ ನೈನ॒ಮಗ್ಂಹೋ॑ ಅಶ್ಞೋ॒ತ್ಯನ್ತಿ॑ತೋ॒ ನ ದೂ॒ರಾತ್ ॥ ಯ- [ಯತ್, ಚಿ॒ದ್ಧಿ ತೇ॒ ವಿಶೋ॑] 45

-ಚ್ಚಿ॒ದ್ಧಿ ತೇ॒ ವಿಶೋ॑ ಯಥಾ॒ ಪ್ರದೇ॑ವ ವರುಣ ವ್ರ॒ತಮ್ । ಮಿ॒ನೀ॒ಮಸಿ॒ ದ್ಯವಿ॑ದ್ಯವಿ ॥ ಯ-ತ್ಕಿಞ್ಚೇ॒ದಂ-ವಁ॑ರುಣ॒ ದೈವ್ಯೇ॒ ಜನೇ॑-ಽಭಿದ್ರೋ॒ಹ-ಮ್ಮ॑ನು॒ಷ್ಯಾ᳚ಶ್ಚರಾ॑ಮಸಿ । ಅಚಿ॑ತ್ತೀ॒ಯ-ತ್ತವ॒ ಧರ್ಮಾ॑ ಯುಯೋಪಿ॒ಮಮಾ ನ॒ಸ್ತಸ್ಮಾ॒ ದೇನ॑ಸೋ ದೇವ ರೀರಿಷಃ ॥ ಕಿ॒ತ॒ವಾಸೋ॒ ಯದ್ರಿ॑ ರಿ॒ಪುರ್ನ ದೀ॒ವಿ ಯದ್ವಾ॑ ಘಾ ಸ॒ತ್ಯ ಮು॒ತಯನ್ನ ವಿ॒ದ್ಮ । ಸರ್ವಾ॒ ತಾ ವಿಷ್ಯ॑ ಶಿಥಿ॒ರೇ ವ॑ ದೇ॒ವಾಥಾ॑ ತೇ ಸ್ಯಾಮ ವರುಣ ಪ್ರಿ॒ಯಾಸಃ॑ ॥ 46 ॥

(ಸೋಮೋ॒-ಗೋಷು॒ ಮಾ- ರ॒ಯಿಂ - ಮನ್ತ್ರೋ॒ -ಯ-ಚ್ಛಿ॑ಥಿ॒ರಾ-ಸ॒ಪ್ತ ಚ॑ ) (ಅ. 11)

(ವಿ ವಾ ಏ॒ತಸ್ಯಾ - ಽಽವಾ॑ಯೋ - ಇ॒ಮೇ ವೈ - ಚಿ॒ತ್ತಞ್ಚಾ॒ - ಽಗ್ನಿರ್ಭೂ॒ತಾನಾಂ᳚ - ದೇ॒ವಾ ವಾ ಅ॑ಭ್ಯಾತಾ॒ನಾ - ನೃ॑ತಾ॒ಷಾಡ್ - ರಾ॒ಷ್ಟ್ರಕಾ॑ಮಾಯ॒ - ದೇವಿ॑ಕಾ॒ - ವಾಸ್ತೋ᳚ಷ್ಪತೇ॒ - ತ್ವಮ॑ಗ್ನೇ ಬೃ॒ಹ - ದೇಕಾ॑ದಶ )

(ವಿ ವಾ ಏ॒ತಸ್ಯೇ - ತ್ಯಾ॑ಹ - ಮೃ॒ತ್ಯುರ್ಗ॑ನ್ಧ॒ರ್ವೋ - ಽವ॑ ರುನ್ಧೇ ಮದ್ಧ್ಯ॒ತ - ಸ್ತ್ವಮ॑ಗ್ನೇ ಬೃ॒ಹಥ್ - ಷಟ್ಚ॑ತ್ವಾರಿಗ್ಂಶತ್)

(ವಿ ವಾ ಏ॒ತಸ್ಯ॑, ಪ್ರಿ॒ಯಾಸಃ॑ )

॥ ಹರಿಃ॑ ಓಮ್ ॥

॥ ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಸಂಹಿತಾಯಾ-ನ್ತೃತೀಯಕಾಣ್ಡೇ ಚತುರ್ಥಃ ಪ್ರಶ್ನ-ಸ್ಸಮಾಪ್ತಃ ॥

Roman (IAST) Transliteration

kṛṣṇa yajurvedīya taittirīya saṃhitāyā-ntṛtīyakāṇḍe caturthaḥ praśnaḥ - iṣṭihomābhidhānaṃ

o-nnamaḥ paramātmane, śrī mahāgaṇapataye namaḥ,

śrī gurubhyo namaḥ | ha॒riḥ॒ om ||

vi vā e॒tasya̭ ya॒jña ṛ̭ddhyate॒ yasya̭ ha॒vira̭ti॒ricya̭te॒ sūryo̭ de॒vo di̭vi॒ṣadbhya॒ ityā̭ha॒ bṛha॒spati̭nā cai॒vāsya̭ pra॒jāpa̭tinā ca ya॒jñasya॒ vyṛ̭ddha॒mapi̭ vapati॒ rakṣāgṃ̭si॒ vā e॒ta-tpa॒śugṃ sa̭cante॒ yadḙkadeva॒tya̭ āla̭bdho॒ bhūyā॒-nbhava̭ti॒ yasyā᳚ste॒ hari̭to॒ garbha॒ ityā̭ha deva॒traivainā᳚-ṅgamayati॒ rakṣa̭sā॒mapa̭hatyā॒ ā va̭rtana varta॒yetyā̭ha॒ [varta॒yetyā̭ha, brahma̭ṇai॒vaina॒-mā] 1

brahma̭ṇai॒vaina॒-mā va̭rtayati॒ vi tḙ bhinadmi taka॒rīmityā̭ha yathāya॒jure॒vaitadṷ- rudra॒phso vi॒śvarṷ̄pa॒ indu॒rityā̭ha pra॒jā vai pa॒śava॒ induḥ̭ pra॒jayai॒vaina̭-mpa॒śubhi॒-ssama̭rdhayati॒ divaṃ॒-vai~ ya॒jñasya॒ vyṛ̭ddha-ṅgacchati pṛthi॒vīmati̭rikta॒-ntadyanna śa॒maye॒dārti॒mārcche॒-dyaja̭māno ma॒hī dyauḥ pṛ̭thi॒vīca̭ na॒ i̭- [na॒ iti̭, ā॒ha॒ dyāvā̭pṛthi॒vībhyā̭me॒va] 2

-tyāha॒ dyāvā̭pṛthi॒vībhyā̭me॒va ya॒jñasya॒ vyṛ̭ddha॒-ñcāti̭rikta-ñca śamayati॒ nā-''rti॒mārccha̭ti॒ yaja̭māno॒ bhasma̭nā॒-'bhi samṷ̄hati sva॒gākṛ̭tyā॒ atho̭ a॒nayo॒rvā e॒ṣa garbho॒-'nayo̭re॒vaina̭-ndadhāti॒ yada̭va॒dyedati॒ tadrḙcaye॒dyannāva॒dye-tpa॒śorāla̭bdhasya॒ nāva̭ dye-tpu॒rastā॒nnābhyā̭ a॒nyada̭va॒dye-du॒pari̭ṣṭāda॒nya-tpu॒rastā॒dvai nābhyai᳚ [ ] 3

prā॒ṇa u॒pari̭ṣṭādapā॒no yāvā̭ne॒va pa॒śustasyāva̭ dyati॒ viṣṇa̭ve śipivi॒ṣṭāya̭ juhoti॒ yadvai ya॒jñasyā̭ti॒ricya̭te॒ yaḥ pa॒śorbhū॒mā yā puṣṭi॒sta-dviṣṇuḥ̭ śipivi॒ṣṭo 'ti̭rikta e॒vāti̭rikta-ndadhā॒tyati̭riktasya॒ śāntyā̭ a॒ṣṭāprū॒ḍḍhira̭ṇya॒-ndakṣi̭ṇā॒-'ṣṭāpa̭dī॒ hyḙṣā ''tmā na̭va॒maḥ pa॒śorāptyā̭ antarako॒śa u॒ṣṇīṣe॒ṇā-''vi̭ṣṭita-mbhavatye॒vami̭va॒ hi pa॒śurulba̭miva॒ carmḙva mā॒gṃ॒sami॒vāsthī̭va॒ yāvā̭ne॒va pa॒śustamā॒ptvā-'va̭ rundhe॒yasyai॒ṣā ya॒jñe prāya̭ścittiḥ kri॒yata̭ i॒ṣṭvā vasī̭yā-nbhavati || 4 ||

(va॒rta॒yatyā̭ha-na॒ iti॒-vai nābhyā॒-ulba̭mi॒vai-ka̭vigṃśatiśca) (a. 1)

ā vā̭yo bhūṣa śucipā॒ upa̭ na-ssa॒hasra̭-nte ni॒yuto̭ viśvavāra | upo̭ te॒ andho॒ madya̭mayāmi॒ yasya̭ deva dadhi॒ṣe pū᳚rva॒peya᳚m || ākū᳚tyai tvā॒ kāmā̭ya tvā sa॒mṛdhe᳚ tvā kikki॒ṭā te॒ manaḥ̭ pra॒jāpa̭taye॒ svāhā̭ kikki॒ṭā te᳚ prā॒ṇaṃ-vā~॒yave॒ svāhā̭ kikki॒ṭā te॒ cakṣu॒-ssūryā̭ya॒ svāhā̭ kikki॒ṭā te॒ śrotra॒-ndyāvā̭pṛthi॒vībhyā॒g॒ svāhā̭ kikki॒ṭā te॒ vāca॒gṃ॒ sara̭svatyai॒ svāhā॒ [sara̭svatyai॒ svāhā᳚, tva-ntu॒rīyā̭] 5

tva-ntu॒rīyā̭ va॒śinī̭ va॒śā-'si̭ sa॒kṛdya-ttvā॒ mana̭sā॒ garbha॒ ā-'śa̭yat | va॒śā tvaṃ-va~॒śinī̭ gaccha de॒vān-thsa॒tyā-ssa̭ntu॒ yaja̭mānasya॒ kāmāḥ᳚ || a॒jā-'si̭ rayi॒ṣṭhā pṛ̭thi॒vyāgṃ sī̭do॒rdhvā-'ntari̭kṣa॒mupa̭ tiṣṭhasva di॒vi tḙ bṛ॒hadbhāḥ || tantṷ-nta॒nva-nraja̭so bhā॒numanvi̭hi॒ jyoti̭ṣmataḥ pa॒tho ra̭kṣa dhi॒yā kṛ॒tān || a॒nu॒lba॒ṇaṃ-va~̭yata॒ jogṷvā॒mapo॒ manṷ rbhava ja॒nayā॒ daivya॒-ñjana᳚m || mana̭so ha॒vira̭si pra॒jāpa̭te॒rvarṇo॒ gātrā̭ṇā-nte gātra॒bhājo̭ bhūyāsma || 6 ||

(sara̭svatyai॒ svāhā॒ - manu॒ - strayo̭daśa ca) (a. 2)

i॒me vai sa॒hā-''stā॒-nte vā॒yurvya̭vā॒-tte garbha̭madadhātā॒-ntagṃ somaḥ॒ prāja̭naya-da॒gnira̭grasata॒ sa e॒ta-mpra॒jāpa̭tirāgne॒ya-ma॒ṣṭāka̭pālamapaśya॒-tta-nnira̭vapa॒-ttenai॒vainā̭ma॒gneradhi॒ nira̭krīṇā॒-ttasmā॒dapya̭nyadeva॒tyā̭mā॒labha̭māna āgne॒yama॒ṣṭāka̭pāla-mpu॒rastā॒nnirva̭peda॒gnere॒vainā॒madhi̭ ni॒ṣkrīyā-''la̭bhate॒ ya- [yat, vā॒yurvyavā॒-] 7

-dvā॒yurvyavā॒-ttasmā᳚-dvāya॒vyā̭ yadi॒me garbha॒mada̭dhātā॒-ntasmā᳚-ddyāvāpṛthi॒vyā̭ ya-thsomaḥ॒ prāja̭nayada॒gniragra̭sata॒ tasmā̭dagnīṣo॒mīyā॒ yada॒nayo᳚rviya॒tyo-rvāgava̭da॒-ttasmā᳚-thsārasva॒tī ya-tpra॒jāpa̭tira॒gneradhi̭ ni॒rakrī̭ṇā॒-ttasmā᳚-tprājāpa॒tyā sā vā e॒ṣā sa̭rvadeva॒tyā̭ yada॒jā va॒śā vā̭ya॒vyā̭mā la̭bheta॒ bhūti̭kāmo vā॒yurvai kṣepi̭ṣṭhā de॒vatā̭ vā॒yume॒va svena̭ [svena̭, bhā॒ga॒dheye॒nopa̭ dhāvati॒] 8

bhāga॒dheye॒nopa̭ dhāvati॒ sa e॒vaina॒-mbhūti̭-ṅgamayati dyāvāpṛthi॒vyā̭mā la̭bheta kṛ॒ṣamā̭ṇaḥ prati॒ṣṭhākā̭mo di॒va e॒vāsmai̭ pa॒rjanyo̭ varṣati॒ vya̭syāmoṣa̭dhayo rohanti sa॒mardhṷkamasya sa॒sya-mbha̭vatyagnīṣo॒mīyā॒mā la̭bheta॒ yaḥ kā॒maye॒tānna̭vānannā॒da-ssyā॒mitya॒gninai॒vānna॒mava̭ rundhe॒ somḙnā॒nnādya॒-manna̭vāne॒vānnā॒do bha̭vati sārasva॒tīmā la̭bheta॒ ya [yaḥ, ī॒śva॒ro vā॒co] 9

ī᳚śva॒ro vā॒co vadi̭to॒-ssan. vāca॒-nnavade॒-dvāgvai sara̭svatī॒ sara̭svatīme॒va svena̭ bhāga॒dheye॒nopa̭ dhāvati॒ saivāsmi॒n. vāca̭-ndadhāti prājāpa॒tyāmā la̭bheta॒ yaḥ kā॒maye॒tāna̭bhijitama॒bhi ja̭yeya॒miti̭ pra॒jāpa̭ti॒-ssarvā̭ de॒vatā̭ de॒vatā̭bhire॒vā-na̭bhijitama॒bhi ja̭yati vāya॒vya̭yo॒pāka̭roti vā॒yore॒vainā̭mava॒ruddhyā-''la̭bhata॒ ākū᳚tyai tvā॒ kāmā̭ya॒ tve- [kāmā̭ya tvā, ityā̭ha yathāya॒ju-] 10

-tyā̭ha yathāya॒ju-re॒vaita-tki̭kkiṭā॒kāra̭-ñjuhoti kikkiṭākā॒reṇa॒ vai grā॒myāḥ pa॒śavo̭ ramante॒ prā-''ra॒ṇyāḥ pa̭tanti॒ ya-tki̭kkiṭā॒kāra̭-ñju॒hoti̭ grā॒myāṇā᳚-mpaśū॒nā-ndhṛtyai॒ parya̭gnau kri॒yamā̭ṇe juhoti॒ jīva̭ntīme॒vaināgṃ̭ suva॒rgaṃ-lo~॒ka-ṅga̭mayati॒ tva-ntu॒rīyā̭ va॒śinī̭ va॒śā-'sītyā̭ha deva॒traivainā᳚-ṅgamayati sa॒tyā-ssa̭ntu॒ yaja̭mānasya॒ kāmā॒ ityā̭hai॒ṣa vai kāmo॒ [vai kāmaḥ̭, yaja̭mānasya॒] 11

yaja̭mānasya॒ yadanā᳚rta u॒dṛca॒-ṅgaccha̭ti॒ tasmā̭de॒vamā̭hā॒-'jā-'si̭ rayi॒ṣṭhetyā̭hai॒ ṣvḙvaināṃ᳚-lo~॒keṣu॒ prati̭ṣṭhāpayati di॒vi tḙ bṛ॒hadbhā ityā̭ha suva॒rga e॒vāsmai̭ lo॒ke jyoti̭-rdadhāti॒ tantṷ-nta॒nva-nraja̭so bhā॒numanvi॒hītyā̭he॒māne॒vāsmai̭ lo॒kān jyoti̭ṣmataḥ karotyanulba॒ṇaṃ-va~̭yata॒ jogṷvā॒mapa॒ i- [jogṷvā॒mapa॒ iti̭, ā॒ha॒ yade॒va] 12

-tyā̭ha॒ yade॒va ya॒jña u॒lbaṇa̭-ṅkri॒yate॒ tasyai॒vaiṣā śānti॒rmanṷrbhava ja॒nayā॒ daivya॒-ñjana॒mityā̭ha māna॒vyo̭ vai pra॒jāstā e॒vā-''dyāḥ᳚ kurute॒ mana̭so ha॒vira॒sītyā̭ha sva॒gākṛ̭tyai॒ gātrā̭ṇā-nte gātra॒bhājo̭ bhūyā॒smetyā̭hā॒ ''śiṣa̭me॒vaitāmā śā᳚ste॒ tasyai॒ vā e॒tasyā॒ eka̭me॒vā-dḙvayajanaṃ॒ ~yadāla̭bdhāyā-ma॒bhro [-ma॒bhraḥ, bhava̭ti॒] 13

bhava̭ti॒ yadāla̭bdhāyāma॒bhra-ssyāda॒phsu vā᳚prave॒śaye॒-thsarvāṃ᳚-vā~॒ prāśñī̭yā॒dyada॒phsu pra̭ve॒śaye᳚dyajñaveśa॒sa-ṅkṷryā॒-thsarvā̭me॒va prāśñī̭yādindri॒yame॒vā-''tma-ndha̭-tte॒ sā vā e॒ṣā tra̭yā॒ṇāme॒vāva̭ ruddhā saṃva~thsara॒sadaḥ̭ sahasrayā॒jino̭ gṛhame॒dhina॒sta e॒vaitayā̭ yajera॒-nteṣā̭me॒vaiṣā-''ptā || 14 ||

(yath - svena̭ - sārasva॒tīmā la̭bheta॒ yaḥ - kāmā̭ya tvā॒ - kāmo - 'pa॒ itya॒ - bhro - dvica̭tvārigṃśacca) (a. 3)

ci॒tta-ñca॒ citti॒ścā ''kṷ̄ta॒-ñcā-''kṷ̄tiśca॒ vijñā̭ta-ñca vi॒jñāna̭-ñca॒ mana̭śca॒ śakva̭rīśca॒ darśa̭śca pū॒rṇamā̭saśca bṛ॒hacca̭ rathanta॒ra-ñca̭ pra॒jāpa̭ti॒rjayā॒nindrā̭ya॒ vṛṣṇe॒ prāya̭cchadu॒graḥ pṛ̭ta॒nājyḙṣu॒ tasmai॒ viśa॒-ssama̭namanta॒ sarvā॒-ssa u॒gra-ssahi havyo̭ ba॒bhūva̭devāsu॒rā-ssaṃya~̭ttā āsa॒nthsa indraḥ̭ pra॒jāpa̭ti॒mupā̭ dhāva॒-ttasmā̭ e॒tāñjayā॒-nprāya̭ccha॒-ttāna̭juho॒-ttato॒ vai de॒vā asṷrānajaya॒n॒. yadaja̭ya॒-ntajjayā̭nā-ñjaya॒tvagg spardha̭mānenai॒te ho̭ta॒vyā̭ jaya̭tye॒va tā-mpṛta̭nām || 15 ||

(upa॒ - pañca̭vigṃśatiśca) (a. 4)

a॒gnirbhū॒tānā॒madhi̭pati॒-ssamā̭-'va॒tvindro᳚ jye॒ṣṭhānāṃ᳚-ya~॒maḥ pṛ̭thi॒vyā vā॒yura॒ntari̭kṣasya॒ sūryo̭di॒vaśca॒ndramā॒ nakṣa̭trāṇā॒-mbṛha॒spati॒rbrahma̭ṇo mi॒tra-ssa॒tyānāṃ॒-va~rṷṇo॒-'pāgṃ sa̭mu॒dra-ssro॒tyānā॒manna॒gṃ॒ sāmrā᳚jyānā॒madhi̭pati॒ tanmā̭-'vatu॒ soma॒ oṣa̭dhīnāgṃ savi॒tā pra̭sa॒vānāgṃ̭ ru॒draḥ pa̭śū॒nā-ntvaṣṭā̭ rū॒pāṇāṃ॒-vi~ṣṇuḥ॒ parva̭tānā-mma॒ruto̭ ga॒ṇānā॒madhi̭pataya॒ste mā̭vantu॒ pita̭raḥ pitāmahāḥ pare-'vare॒ tatā᳚statāmahā i॒ha mā̭-'vata | a॒smi-nbrahma̭nna॒smin kṣa॒tre᳚-'syā-mā॒śiṣya॒syā-mpṷro॒dhāyā̭ma॒smin-karma̭nna॒syā-nde॒vahū᳚tyām || 16 ||

(a॒va॒re॒ - sa॒ptada̭śa ca) (a. 5)

de॒vā vai yadya॒jñe-'kṷrvata॒ tadasṷrā akurvata॒ te de॒vā e॒tāna̭bhyātā॒nāna̭paśya॒n- tāna॒bhyāta̭nvata॒ yadde॒vānā॒-ṅkarmā-''sī॒dārdhya̭ta॒ tadyadasṷrāṇā॒-nna tadā᳚rdhyata॒ yena॒ karma॒ṇerthse॒-ttatra̭ hota॒vyā̭ ṛ॒ddhnotye॒va tena॒ karma̭ṇā॒ yadviśvḙ de॒vā-ssa॒mabha̭ra॒-ntasmā̭-dabhyātā॒nā vai᳚śvade॒vāyat-pra॒jāpa̭ti॒rjayā॒-nprāya̭ccha॒-ttasmā॒jjayāḥ᳚ prājāpa॒tyā [prājāpa॒tyāḥ, ya-drā᳚ṣṭra॒bhṛdbhī̭] 17

ya-drā᳚ṣṭra॒bhṛdbhī̭ rā॒ṣṭramā-'da̭data॒ ta-drā᳚ṣṭra॒bhṛtāgṃ̭ rāṣṭrabhṛ॒ttva-nte de॒vā a̭bhyātā॒nairasṷrāna॒bhyāta̭nvata॒ jayai̭rajayan-rāṣṭra॒bhṛdbhī̭ rā॒ṣṭramā-'da̭data॒ yadde॒vā a̭bhyātā॒nairasṷrāna॒bhyāta̭nvata॒ tada̭bhyātā॒nānā̭mabhyātāna॒tvaṃ-ya~jjayai॒raja̭ya॒-ntajjayā̭nā-ñjaya॒tvaṃ-ya~-drā᳚ṣṭra॒bhṛdbhī̭ rā॒ṣṭramā-'da̭data॒ ta-drā᳚ṣṭra॒bhṛtāgṃ̭ rāṣṭrabhṛ॒ttva-ntato̭ de॒vā abha̭va॒-nparā-'sṷrā॒ yo bhrātṛ̭vyavā॒n-thsyā-thsa e॒tān jṷhuyādabhyātā॒naire॒va bhrātṛ̭vyāna॒bhyāta̭nute॒ jayai᳚rjayati rāṣṭra॒bhṛdbhī̭ rā॒ṣṭramā da̭tte॒ bhava̭tyā॒tmanā॒ parā᳚-'sya॒ bhrātṛ̭vyo bhavati || 18 ||

(prā॒jā॒pa॒tyāḥ-so᳚-'-ṣṭā da̭śa ca) (a. 6)

ṛ॒tā॒ṣā-ḍṛ॒tadhā̭mā॒-'gni-rga̭ndha॒rvasta-syauṣa̭dhayo-'phsa॒rasa॒ ūrjo॒ nāma॒ sa i॒da-mbrahma̭ kṣa॒tra-mpā̭tu॒ tā i॒da-mbrahma̭ kṣa॒tra-mpā᳚ntu॒ tasmai॒ svāhā॒ tābhya॒-ssvāhā̭ sagṃhi॒to vi॒śvasā̭mā॒ sūryo̭ gandha॒rva-stasya॒ marī̭cayo-'phsa॒rasa̭ ā॒yuvaḥ̭ suṣu॒mna-ssūrya̭ raśmi-śca॒ndramā̭ gandha॒rva-stasya॒ nakṣa̭trāṇya-phsa॒raso̭ be॒kura̭yobhu॒jyu-ssṷpa॒rṇo ya॒jño ga̭ndha॒rva-stasya॒ dakṣi̭ṇā apsa॒rasa̭ sta॒vāḥ pra॒jāpa̭ti-rvi॒śvaka̭rmā॒ mano̭ [manaḥ̭, ga॒ndha॒rvastasya̭-rkhsā॒mānya̭-phsa॒raso॒] 19

gandha॒rvastasya̭-rkhsā॒mānya̭-phsa॒raso॒ vahna̭yaiṣi॒ro vi॒śvavya̭cā॒ vāto̭ gandha॒rva-stasyā-''po᳚ 'phsa॒raso̭ mu॒dābhuva̭nasya pate॒ yasya̭ta u॒pari̭ gṛ॒hā i॒ha ca̭ | sa no̭ rā॒svājyā̭nigṃ rā॒yaspoṣagṃ̭ su॒vīryagṃ̭ saṃva~thsa॒rīṇāg̭ sva॒stim || pa॒ra॒me॒ṣṭhyadhi̭pati-rmṛ॒tyu-rga̭ndha॒rva-stasya॒ viśva̭mapsa॒raso॒ bhuvaḥ̭ sukṣi॒tiḥ- subhṷ̄ti-rbhadra॒kṛ-thsuva̭rvā-npa॒rjanyo̭ gandha॒rva-stasya̭ vi॒dyuto᳚ 'phsa॒raso॒ ruco̭ dū॒re hḙti-ramṛḍa॒yo [dū॒re hḙti-ramṛḍa॒yaḥ, mṛ॒tyurga̭ndha॒rva-stasya̭] 20

mṛ॒tyurga̭ndha॒rva-stasya̭ pra॒jā a̭phsa॒raso̭ bhī॒ruva॒ścaruḥ̭ kṛpaṇa kā॒śī kāmo̭ gandha॒rva-stasyā॒dhayo᳚ 'phsa॒rasaḥ̭ śo॒caya̭ntī॒rnāma॒ sa i॒da-mbrahma̭ kṣa॒tra-mpā̭ta॒ tā i॒da-mbrahma̭ kṣa॒tra-mpā᳚ntu॒ tasmai॒ svāhā॒ tābhya॒-ssvāhā॒ sa no̭ bhuvanasya pate॒ yasya̭ta u॒pari̭ gṛ॒hā i॒ha ca̭ | u॒ru bra॒hma̭ṇe॒-'smai kṣa॒trāya॒ mahi॒ śarma̭ yaccha || 21 ||

(mano̭ - 'mṛḍa॒yaḥ - ṣaṭca̭tvārigṃśacca) (a. 7)

rā॒ṣṭrakā̭māya hota॒vyā̭ rā॒ṣṭraṃ-vai~ rā᳚ṣṭra॒bhṛto̭ rā॒ṣṭreṇai॒vāsmai̭ rā॒ṣṭramava̭ rundhe rā॒ṣṭrame॒va bha̭vatyā॒tmanḙ hota॒vyā̭ rā॒ṣṭraṃ-vai~ rā᳚ṣṭra॒bhṛto̭ rā॒ṣṭra-mpra॒jā rā॒ṣṭra-mpa॒śavo̭ rā॒ṣṭraṃ-ya~cchreṣṭho॒ bhava̭ti rā॒ṣṭreṇai॒va rā॒ṣṭramava̭ rundhe॒ vasi̭ṣṭha-ssamā॒nānā᳚-mbhavati॒ grāma̭kāmāya hota॒vyā̭ rā॒ṣṭraṃ-vai~ rā᳚ṣṭra॒bhṛto̭ rā॒ṣṭragṃ sa̭jā॒tā rā॒ṣṭreṇai॒vāsmai̭ rā॒ṣṭragṃ sa̭jā॒tānava̭ rundhe grā॒- [rundhe grā॒mī, e॒va bha̭vatyadhi॒deva̭ne] 22

-myḙva bha̭vatyadhi॒deva̭ne juhotyadhi॒deva̭na e॒vāsmai̭ sajā॒tānava̭ rundhe॒ ta ḙna॒mava̭ruddhā॒ upa̭ tiṣṭhante rathamu॒kha oja̭skāmasya hota॒vyā̭ ojo॒ vai rā᳚ṣṭra॒bhṛta॒ ojo॒ ratha॒ oja̭sai॒vāsmā॒ ojo-'va̭ rundha oja॒svyḙva bha̭vati॒ yo rā॒ṣṭrādapa̭bhūta॒-ssyā-ttasmai̭ hota॒vyā̭ yāva̭nto-'sya॒ rathā॒-ssyustā-nbrṷ̄yā-dyu॒ndhvamiti̭ rā॒ṣṭrame॒vā-'smai̭ yuna॒- [rā॒ṣṭrame॒vā-'smai̭ yunakti, āhṷtayo॒ vā] 23

-ktyāhṷtayo॒ vā e॒tasyākḷ̭ptā॒ yasya̭ rā॒ṣṭra-nna kalpa̭te svara॒thasya॒ dakṣi̭ṇa-ñca॒kra-mpra॒vṛhya̭ nā॒ḍīma॒bhi jṷhuyā॒dāhṷtīre॒vāsya̭ kalpayati॒ tā a̭sya॒ kalpa̭mānā rā॒ṣṭramanṷ kalpate saṅgrā॒me saṃya~̭tte hota॒vyā̭ rā॒ṣṭraṃ-vai~ rā᳚ṣṭra॒bhṛto̭ rā॒ṣṭre khalu॒ vā e॒te vyāya̭cchante॒ ye sa̭ṅgrā॒magṃ saṃ॒-ya~nti॒ yasya॒ pūrva̭sya॒ juhva̭ti॒ sa e॒va bha̭vati॒ jaya̭ti॒ tagṃ sa̭grā॒mma-mmā᳚ndhu॒ka i॒ddhmo [i॒ddhmaḥ, bha॒va॒tyaṅgā̭rā] 24

bha̭va॒tyaṅgā̭rā e॒va pra̭ti॒veṣṭa̭mānā a॒mitrā̭ṇāmasya॒ senā॒-mprati̭veṣṭayanti॒ ya u॒nmādye॒-ttasmai̭ hota॒vyā̭ gandharvāphsa॒raso॒ vā e॒tamunmā̭dayanti॒ ya u॒nmādya̭tye॒te khalu॒ vai ga̭ndharvāphsa॒raso॒ yadrā᳚ṣṭra॒bhṛta॒stasmai॒ svāhā॒ tābhya॒-ssvāheti̭ juhoti॒ tenai॒vainā᳚ñchamayati॒ naiya̭grodha॒ audṷmbara॒ āśva̭tthaḥ॒ plākṣa॒ itī॒ddhmo bha̭vatye॒te vai ga̭ndharvāphsa॒rasā᳚-ṅgṛ॒hā-ssva e॒vainā̭- [e॒vaināṋ, ā॒yata̭ne] 25

-nā॒yata̭ne śamayatyabhi॒cara̭tā pratilo॒magṃ ho̭ta॒vyāḥ᳚ prā॒ṇāne॒vāsya̭ pra॒tīcaḥ॒ prati̭ yauti॒ ta-ntato॒ yena॒ kena̭ ca stṛṇute॒ svakṛ̭ta॒ iri̭ṇe juhoti prada॒re vai॒tadvā a॒syai nir-ṛ̭tigṛhīta॒-nnir-ṛ̭tigṛhīta e॒vaina॒-nnir-ṛ̭tyā grāhayati॒ yadvā॒caḥ krū॒ra-ntena॒ vaṣa̭-ṭkaroti vā॒ca e॒vaina̭-ṅkrū॒reṇa॒ pravṛ̭ścati tā॒jagārti॒mārccha̭ti॒ yasya̭ kā॒mayḙtā॒nnādya॒- [kā॒mayḙtā॒nnādya᳚m, ā da̭dī॒yeti॒] 26

-mā da̭dī॒yeti॒ tasya̭ sa॒bhāyā̭muttā॒no ni॒padya॒ bhuva̭nasya pata॒ iti॒ tṛṇā̭ni॒ sa-ṅgṛ̭hṇīyā-tpra॒jāpa̭ti॒rvai bhuva̭nasya॒ patiḥ̭ pra॒jāpa̭tinai॒vāsyā॒nnādya॒mā da̭tta i॒dama॒hama॒muṣyā̭ ''muṣyāya॒ṇasyā॒nnādyagṃ̭ harā॒mītyā̭hā॒nnādya̭me॒vāsya̭ harati ṣa॒ḍbhirha̭rati॒ ṣaḍvā ṛ॒tavaḥ̭ pra॒jāpa̭tinai॒vāsyā॒-nnādya̭mā॒dāya॒rtavo᳚ 'smā॒ anu॒ praya̭cchanti॒ [praya̭cchanti, yo jye॒ṣṭhaba̭ndhu॒-] 27

yo jye॒ṣṭhaba̭ndhu॒-rapa̭ bhūta॒-ssyā-ttaggsthalḙ-'va॒sāyya̭ brahmauda॒na-ñcatuḥ̭ śarāva-mpa॒ktvā tasmai̭ hota॒vyā̭ varṣma॒ vai rā᳚ṣṭra॒bhṛto॒ vaṣma॒ sthalaṃ॒-va~rṣma̭ṇai॒vainaṃ॒-va~ṣma̭ samā॒nānā᳚-ṅgamayati॒ catuḥ̭ śarāvo bhavati di॒kṣvḙva prati̭tiṣṭhati kṣī॒re bha̭vati॒ ruca̭me॒vāsmi̭-ndadhā॒tyuddha̭rati śṛta॒tvāya̭ sa॒rpiṣvā᳚-nbhavati meddhya॒tvāya̭ ca॒tvāra̭ ārṣe॒yāḥ prā-'śña̭nti di॒śāme॒va jyoti̭ṣi juhoti || 28 ||

(grā॒mī - yṷnaktī॒ - dhmaḥ - sva e॒vainā̭ - na॒nnādyaṃ̭ - ~yaccha॒ntye - kā॒nna pa̭ñcā॒śacca̭) (a. 8)

devi̭kā॒ niva̭rpe-tpra॒jākā̭ma॒śchandāgṃ̭si॒ vai devi̭kā॒śchandāgṃ̭sīva॒ khalu॒ vai pra॒jāśchando̭bhire॒vāsmai᳚ pra॒jāḥ praja̭nayati pratha॒ma-ndhā॒tāra̭-ṅkaroti mithu॒nī e॒va tena̭ karo॒tyanve॒vāsmā॒ anṷmatirmanyate rā॒te rā॒kā pra si̭nīvā॒lī ja̭nayati pra॒jāsve॒va prajā̭tāsu ku॒hvā̭ vāca̭-ndadhātye॒tā e॒va niva̭rpe-tpa॒śukā̭ma॒śchandāgṃ̭si॒ vai devi̭kā॒śchandāgṃ̭sī- [devi̭kā॒śchandāgṃ̭si, i॒va॒ khalu॒ vai] 29

-va॒ khalu॒ vai pa॒śava॒śchando̭bhire॒vāsmai̭ pa॒śū-npraja̭nayati pratha॒ma-ndhā॒tāra̭-ṅkaroti॒ praiva tena̭ vāpaya॒tyanve॒vāsmā॒ anṷmatirmanyate rā॒te rā॒kā pra si̭nīvā॒lī ja̭nayati pa॒śūne॒va prajā̭tān ku॒hvā᳚ prati̭ṣṭhāpayatye॒tā e॒va nirva̭pe॒-dgrāma̭kāma॒śchandāgṃ̭si॒ vai devi̭kā॒śchandāgṃ̭sī va॒ khalu॒ vai grāma॒śchando̭bhire॒vāsmai॒ grāma॒- [grāma᳚m, ava̭ rundhe] 30

-mava̭ rundhe maddhya॒to dhā॒tāra̭-ṅkaroti maddhya॒ta e॒vaina॒-ṅgrāma̭sya dadhātye॒tā e॒va nirva̭pe॒jjyogā̭mayāvī॒ chandāgṃ̭si॒ vai devi̭kā॒śchandāgṃ̭si॒ khalu॒ vā e॒tama॒bhi ma̭nyante॒ yasya॒ jyogā॒maya̭ti॒ chando̭bhire॒vaina̭-maga॒da-ṅka̭roti maddhya॒to dhā॒tāra̭-ṅkaroti maddhya॒to vā e॒tasyākḷ̭ptaṃ॒-ya~sya॒ jyogā॒maya̭ti maddhya॒ta e॒vāsya॒ tena̭ kalpayatye॒tā e॒va ni- [ e॒va niḥ, va॒pe॒dyaṃ-ya~॒jño] 31

-rva̭pe॒dyaṃ-ya~॒jño nopa॒name॒cchandāgṃ̭si॒ vai devi̭kā॒śchandāgṃ̭si॒ khalu॒ vā e॒ta-nnopa̭ namanti॒ yaṃ-ya~॒jño nopa॒nama̭ti pratha॒ma-ndhā॒tāra̭-ṅkaroti mukha॒ta e॒vāsmai॒ chandāgṃ̭si dadhā॒tyupai̭naṃ-ya~॒jño na̭matye॒tā e॒va niva̭rpedījā॒naśchandāgṃ̭si॒ vai devi̭kā yā॒tayā̭mānīva॒ khalu॒ vā e॒tasya॒ chandāgṃ̭si॒ ya ī̭jā॒na ṷtta॒ma-ndhā॒tāra̭-ṅkaro- [ṷtta॒ma-ndhā॒tāra̭-ṅkaroti, u॒pari̭ṣṭāde॒vāsmai॒] 32

-tyu॒pari̭ṣṭāde॒vāsmai॒ chandā॒g॒syayā̭tayāmā॒nyava̭ rundha॒ upai̭na॒mutta̭ro ya॒jño na̭matye॒tā e॒va niva̭rpe॒dya-mme॒dhā nopa॒name॒cchandāgṃ̭si॒ vai devi̭kā॒śchandāgṃ̭si॒ khalu॒ vā e॒ta-nnopa̭ namanti॒ ya-mme॒dhā nopa॒nama̭ti pratha॒ma-ndhā॒tāra̭-ṅkaroti mukha॒ta e॒vāsmai॒ chandāgṃ̭si dadhā॒tyupai̭na-mme॒dhā na̭matye॒tā e॒va niva̭rpe॒- [niva̭rpet, rukkā̭ma॒śchandāgṃ̭si॒ vai] 33

-drukkā̭ma॒śchandāgṃ̭si॒ vai devi̭kā॒śchandāgṃ̭sīva॒ khalu॒ vai ruk chando̭bhire॒vāsmi॒-nruca̭-ndadhātikṣī॒re bha̭vanti॒ ruca̭me॒vāsmi̭-ndadhati maddhya॒to dhā॒tāra̭-ṅkaroti maddhya॒ta e॒vainagṃ̭ ru॒co da̭dhātigāya॒trī vā anṷmatistri॒ṣṭugrā॒kā jaga̭tī sinīvā॒lya̭nu॒ṣṭup ku॒hūrdhā॒tā va̭ṣaṭkā॒raḥ pū᳚rvapa॒kṣo rā॒kā-'pa̭rapa॒kṣaḥ ku॒hūra̭māvā॒syā̭ sinīvā॒lī pau᳚rṇamā॒syanṷmatiśca॒ndramā̭ dhā॒tā-'ṣṭau [ ] 34

vasa̭vo॒-'ṣṭākṣa̭rā gāya॒tryekā̭daśa ru॒drā ekā̭daśākṣarā tri॒ṣṭub dvāda̭śā-''di॒tyā dvāda̭śākṣarā॒ jaga̭tī pra॒jāpa̭tiranu॒ṣṭub dhā॒tā va̭ṣaṭkā॒ra e॒tadvai devi̭kā॒-ssarvā̭ṇi ca॒ chandāgṃ̭si॒ sarvā᳚śca de॒vatā̭ vaṣaṭkā॒rastā ya-thsa॒ha sarvā̭ ni॒rvapḙdīśva॒rā ḙna-mpra॒daho॒ dve pra̭tha॒me ni॒rupya̭ dhā॒tustṛ॒tīya॒-nniva̭rpe॒-ttatho̭ e॒votta̭re॒ niva̭rpe॒-ttathai̭na॒-nna prada̭ha॒ntya tho॒ yasmai॒ kāmā̭ya niru॒pyante॒ tame॒vā-''bhi॒rupā᳚-''pnoti || 35 ||

(pa॒śukā̭ma॒śchandāgṃ̭si॒ vai devi̭kā॒śchandāgṃ̭si॒-grāmaṃ̭-kalpayatye॒tā e॒va ni-rṷtta॒mandhā॒tāra̭-ṅkaroti - me॒dhā na̭matye॒tā e॒va nirva̭pe - da॒ṣṭau - da̭hanti॒ - nava̭ ca) (a. 9)

(devi̭kāḥ pra॒jākā̭mo mithu॒nī pa॒śukā̭maḥ॒ praiva grāma̭kāmo॒ jyogā̭mayāvī॒ yaṃ-ya~॒jño ya ī̭jā॒no ya-mme॒dhā rukkā̭mo॒-'ṣṭau | devi̭kā bhavanti dadhati rā॒ṣṭrakā̭māya bhavati dadhāti |)

vāsto᳚ṣpate॒ prati̭ jānī hya॒smān-thsvā̭ve॒śo a̭namī॒vo bha̭vānaḥ | ya-ttvema̭he॒ prati॒tanno̭ juṣasva॒ śanna̭ edhi dvi॒pade॒ śañcatṷṣpade || vāsto᳚ṣpate śa॒gmayā̭ sa॒gṃ॒ sadā̭te sakṣī॒mahi̭ ra॒ṇvayā̭ gātu॒matyā᳚ | āvaḥ॒, kṣema̭ u॒ta yoge॒ vara̭nno yū॒ya-mpā̭ta sva॒stibhi॒-ssadā̭naḥ || ya-thsā॒ya-mprā̭taragniho॒tra-ñju॒hotyā̭hutīṣṭa॒kā e॒va tā upa̭ dhatte॒ [tā upa̭ dhatte, yaja̭māno-'horā॒trāṇi॒] 36

yaja̭māno-'horā॒trāṇi॒ vā e॒tasyeṣṭa̭kā॒ ya āhi̭tāgni॒rya-thsā॒ya-mprā̭tarju॒hotya̭horā॒trāṇye॒vā ''ptveṣṭa̭kāḥ kṛ॒tvopa̭ dhatte॒ daśa̭ samā॒natra̭ juhoti॒ daśā᳚kṣarā vi॒rā-ḍvi॒rāja̭me॒vā-''ptveṣṭa̭kā-ṅkṛ॒tvopa̭ dha॒tte-'tho̭ vi॒rājye॒va ya॒jñamā᳚pnoti॒ citya̭ścityo-'sya bhavati॒ tasmā॒dyatra॒ daśo̭ṣi॒tvā pra॒yāti॒ ta-dya̭jñavā॒stvavā᳚stve॒va tadya-ttato᳚-'rvā॒cīnagṃ̭ [tadya-ttato᳚-'rvā॒cīna᳚m, ru॒draḥ khalu॒ vai] 37

ru॒draḥ khalu॒ vai vā᳚stoṣpa॒tiryadahṷtvā vāstoṣpa॒tīya̭-mprayā॒yā-dru॒dra ḙna-mbhū॒tvā-'gnira̭nū॒tthāya̭ hanyādvāstoṣpa॒tīya̭-ñjuhoti bhāga॒dheyḙnai॒vainagṃ̭ śamayati॒ nā-''rti॒mārccha̭ti॒ yaja̭māno॒ yadyu॒kte jṷhu॒yādyathā॒ prayā̭te॒ vāstā॒vāhṷti-ñju॒hoti̭ tā॒dṛge॒va tadyadayṷkte juhu॒yādyathā॒ kṣema॒ āhṷti-ñju॒hoti̭ tā॒dṛge॒va tadahṷtamasya vāstoṣpa॒tīyagg̭ syā॒- [syāt, dakṣi̭ṇo] 38

-ddakṣi̭ṇo yu॒kto bhava̭ti sa॒vyo-'yu॒kto-'tha̭ vāstoṣpa॒tīya̭-ñjuhotyu॒bhaya̭me॒vā-' ka॒rapa̭rivargame॒vainagṃ̭ śamayati॒ yadeka̭yā juhu॒yādda̭rviho॒ma-ṅkṷryā-tpuro-'nuvā॒kyā̭ ma॒nūcya̭ yā॒jya̭yā juhoti sadeva॒tvāya॒ yaddhu॒ta ā̭da॒ddhyā-dru॒dra-ṅgṛ॒hāna॒nvāro̭haye॒-dyada̭va॒kṣāṇā॒nyasa̭-mprakṣāpya prayā॒yādyathā̭ yajñaveśa॒saṃ-vā~॒-''daha̭naṃ-vā~ tā॒dṛge॒va tada॒yante॒ yoni̭r-ṛ॒tviya॒ itya॒raṇyo᳚-ssa॒māro̭haya- [itya॒raṇyo᳚-ssa॒māro̭hayati, e॒ṣa vā] 39

-tye॒ṣa vā a॒gneryoni॒-ssva e॒vainaṃ॒-yo~naṷ sa॒māro̭haya॒tyatho॒ khalvā̭hu॒ryada॒raṇyo᳚-ssa॒mārṷ̄ḍho॒ naśye॒duda̭syā॒gni-ssī̭de-tpunarā॒dheyaḥ̭ syā॒diti॒ yā tḙ agne ya॒jñiyā̭ ta॒nūstayehyā ro॒hetyā॒tman-thsa॒māro̭hayate॒ yaja̭māno॒ vā a॒gneryoni॒-ssvāyā̭me॒vainaṃ॒-yo~nyāgṃ̭ sa॒māro̭hayate || 40 ||

(dha॒tte॒-'rvā॒cīnagg̭ -syā-thsa॒māro̭hayati॒ -pañca̭catvārigṃśacca) (a. 10)

tvama̭gne bṛ॒hadvayo॒ dadhā̭si deva dā॒śuṣe᳚ | ka॒virgṛ॒hapa̭ti॒ryuvā᳚ || ha॒vya॒vāḍa॒gnira॒jaraḥ̭ pi॒tā no̭ vi॒bhurvi॒bhāvā̭ su॒dṛśī̭ko a॒sme | su॒gā॒r॒ha॒pa॒tyā-ssamiṣo̭ didīhyasma॒driya॒khsa-mmi̭mīhi॒ śravāgṃ̭si || tva-ñca̭ soma no॒ vaśo̭ jī॒vātu॒-nna ma̭rāmahe | pri॒yasto᳚tro॒ vana॒spatiḥ̭ || bra॒hmā de॒vānā᳚-mpada॒vīḥ ka̭vī॒nāmṛṣi॒rviprā̭ṇā-mmahi॒ṣo mṛ॒gāṇā᳚m | śye॒no gṛddhrā̭ṇā॒g॒ svadhi̭ti॒ rvanā̭nā॒gṃ॒ somaḥ̭ [somaḥ̭, pa॒vitra॒matyḙti॒] 41

pa॒vitra॒matyḙti॒ rebhanṋ || ā vi॒śvadḙva॒gṃ॒ satpa̭tigṃ sū॒ktaira॒dyā vṛ̭ṇīmahe | sa॒tyasa̭vagṃ savi॒tāra᳚m || āsa॒tyena॒ raja̭sā॒ varta̭māno nive॒śaya̭nna॒mṛta॒-mmartya̭ñca | hi॒ra॒ṇyayḙna savi॒tā rathe॒nā-'' de॒voyā̭ti॒ bhuva̭nā vi॒paśyanṋ || yathā̭ no॒ adi̭tiḥ॒ kara॒-tpaśve॒ nṛbhyo॒ yathā॒ gave᳚ | yathā̭ to॒kāya̭ ru॒driya᳚m || mā na̭sto॒ke tana̭ye॒ mā na॒ āyṷṣi॒ mā no॒ goṣu॒ mā [ ] 42

no॒ aśvḙṣu rīriṣaḥ | vī॒rā-nmāno̭ rudra bhāmi॒to va̭dhīrha॒viṣma̭nto॒ nama̭sā vidhema te || u॒da॒pruto॒ na vayo॒ rakṣa̭māṇā॒ vāva̭dato a॒bhriya̭syeva॒ ghoṣāḥ᳚ | gi॒ri॒bhrajo॒ normayo॒ mada̭nto॒ bṛha॒spati̭ma॒bhya̭rkā a̭nāvann || ha॒gṃ॒sairi̭va॒ sakhi̭bhi॒rvāva̭dadbhiraśma॒n- mayā̭ni॒ naha̭nā॒ vyasyanṋ | bṛha॒spati̭rabhi॒kani̭krada॒dgā u॒ta prāstau॒ducca̭ vi॒dvāgṃ a̭gāyat || endra̭ sāna॒sigṃ ra॒yigṃ [ra॒yim, sa॒jitvā̭nagṃ sadā॒saha᳚m |] 43

sa॒jitvā̭nagṃ sadā॒saha᳚m | varṣi̭ṣṭhamū॒tayḙ bhara || pra sa̭sāhiṣe puruhūta॒ śatrū॒n jyeṣṭha̭ste॒ śuṣma̭ i॒ha rā॒tira̭stu | indrā-'' bha̭ra॒ dakṣi̭ṇenā॒ vasṷ̄ni॒ pati॒-ssindhṷ̄nāmasi re॒vatī̭nām || tvagṃ su॒tasya̭ pī॒tayḙ sa॒dyo vṛ॒ddho a̭jāyathāḥ | indra॒ jyaiṣṭhyā̭ya sukrato || bhuva॒stvami̭ndra॒ brahma̭ṇā ma॒hā-nbhuvo॒ viśvḙṣu॒ sava̭neṣu ya॒jñiyaḥ̭ | bhuvo॒ nṝgścyau॒tno viśva̭smi॒-nbhare॒ jyeṣṭha̭śca॒ mantro̭ [mantraḥ̭, vi॒śva॒ca॒rṣa॒ṇe॒ |] 44

viśvacarṣaṇe || mi॒trasya̭ carṣaṇī॒dhṛta॒-śśravo̭ de॒vasya̭ sāna॒sim |

sa॒tya-ñci॒tra śra̭vastamam || mi॒tro janāṋ yātayati prajā॒na-nmi॒tro dā̭dhāra pṛthi॒vīmu॒ta dyām | mi॒traḥ kṛ॒ṣṭīrani̭miṣā॒-'bhi ca̭ṣṭe sa॒tyāya̭ ha॒vya-ṅghṛ॒tava̭-dvidhema || prasami̭tra॒ marto̭ astu॒ praya̭svā॒n॒. yasta̭ āditya॒ śikṣa̭ti vra॒tena̭ | na ha̭nyate॒ na jī̭yate॒ tvoto॒ naina॒magṃho̭ aśño॒tyanti̭to॒ na dū॒rāt || ya- [yat, ci॒ddhi te॒ viśo̭] 45

-cci॒ddhi te॒ viśo̭ yathā॒ pradḙva varuṇa vra॒tam | mi॒nī॒masi॒ dyavi̭dyavi || ya-tkiñce॒daṃ-va~̭ruṇa॒ daivye॒ janḙ-'bhidro॒ha-mma̭nu॒ṣyā᳚ścarā̭masi | aci̭ttī॒ya-ttava॒ dharmā̭ yuyopi॒mamā na॒stasmā॒ dena̭so deva rīriṣaḥ || ki॒ta॒vāso॒ yadri̭ ri॒purna dī॒vi yadvā̭ ghā sa॒tya mu॒tayanna vi॒dma | sarvā॒ tā viṣya̭ śithi॒re va̭ de॒vāthā̭ te syāma varuṇa pri॒yāsaḥ̭ || 46 ||

(somo॒-goṣu॒ mā- ra॒yiṃ - mantro॒ -ya-cchi̭thi॒rā-sa॒pta ca̭ ) (a. 11)

(vi vā e॒tasyā - ''vā̭yo - i॒me vai - ci॒ttañcā॒ - 'gnirbhū॒tānāṃ᳚ - de॒vā vā a̭bhyātā॒nā - nṛ̭tā॒ṣāḍ - rā॒ṣṭrakā̭māya॒ - devi̭kā॒ - vāsto᳚ṣpate॒ - tvama̭gne bṛ॒ha - dekā̭daśa )

(vi vā e॒tasye - tyā̭ha - mṛ॒tyurga̭ndha॒rvo - 'va̭ rundhe maddhya॒ta - stvama̭gne bṛ॒hath - ṣaṭca̭tvārigṃśat)

(vi vā e॒tasya̭, pri॒yāsaḥ̭ )

|| hariḥ̭ om ||

|| kṛṣṇa yajurvedīya taittirīya saṃhitāyā-ntṛtīyakāṇḍe caturthaḥ praśna-ssamāptaḥ ||