Shri Hanumadashtakam — InfoLyter.in

ॐ

ಶ್ರೀ ಹನುಮದಷ್ಟಕಮ್

Shri Hanumadashtakam

Hanuman Ashtakam Kannada

ಶ್ರೀರಘುರಾಜಪದಾಬ್ಜನಿಕೇತನ ಪಙ್ಕಜಲೋಚನ ಮಙ್ಗಲರಾಶೇ

ಚಣ್ಡಮಹಾಭುಜದಣ್ಡ ಸುರಾರಿವಿಖಣ್ಡನಪಣ್ಡಿತ ಪಾಹಿ ದಯಾಲೋ ।

ಪಾತಕಿನಂ ಚ ಸಮುದ್ಧರ ಮಾಂ ಮಹತಾಂ ಹಿ ಸತಾಮಪಿ ಮಾನಮುದಾರಂ

ತ್ವಾಂ ಭಜತೋ ಮಮ ದೇಹಿ ದಯಾಘನ ಹೇ ಹನುಮನ್ ಸ್ವಪದಾಮ್ಬುಜದಾಸ್ಯಮ್ ॥ 1 ॥

ಸಂಸೃತಿತಾಪಮಹಾನಲದಗ್ಧತನೂರುಹಮರ್ಮತನೋರತಿವೇಲಂ

ಪುತ್ರಧನಸ್ವಜನಾತ್ಮಗೃಹಾದಿಷು ಸಕ್ತಮತೇರತಿಕಿಲ್ಬಿಷಮೂರ್ತೇಃ ।

ಕೇನಚಿದಪ್ಯಮಲೇನ ಪುರಾಕೃತಪುಣ್ಯಸುಪುಞ್ಜಲವೇನ ವಿಭೋ ವೈ

ತ್ವಾಂ ಭಜತೋ ಮಮ ದೇಹಿ ದಯಾಘನ ಹೇ ಹನುಮನ್ ಸ್ವಪದಾಮ್ಬುಜದಾಸ್ಯಮ್ ॥ 2 ॥

ಸಂಸೃತಿಕೂಪಮನಲ್ಪಮಘೋರನಿದಾಘನಿದಾನಮಜಸ್ರಮಶೇಷಂ

ಪ್ರಾಪ್ಯ ಸುದುಃಖಸಹಸ್ರಭುಜಙ್ಗವಿಷೈಕಸಮಾಕುಲಸರ್ವತನೋರ್ಮೇ ।

ಘೋರಮಹಾಕೃಪಣಾಪದಮೇವ ಗತಸ್ಯ ಹರೇ ಪತಿತಸ್ಯ ಭವಾಬ್ಧೌ

ತ್ವಾಂ ಭಜತೋ ಮಮ ದೇಹಿ ದಯಾಘನ ಹೇ ಹನುಮನ್ ಸ್ವಪದಾಮ್ಬುಜದಾಸ್ಯಮ್ ॥ 3 ॥

ಸಂಸೃತಿಸಿನ್ಧುವಿಶಾಲಕರಾಲಮಹಾಬಲಕಾಲಝಷಗ್ರಸನಾರ್ತಂ

ವ್ಯಗ್ರಸಮಗ್ರಧಿಯಂ ಕೃಪಣಂ ಚ ಮಹಾಮದನಕ್ರಸುಚಕ್ರಹೃತಾಸುಮ್ ।

ಕಾಲಮಹಾರಸನೋರ್ಮಿನಿಪೀಡಿತಮುದ್ಧರ ದೀನಮನನ್ಯಗತಿಂ ಮಾಂ

ತ್ವಾಂ ಭಜತೋ ಮಮ ದೇಹಿ ದಯಾಘನ ಹೇ ಹನುಮನ್ ಸ್ವಪದಾಮ್ಬುಜದಾಸ್ಯಮ್ ॥ 4 ॥

ಸಂಸೃತಿಘೋರಮಹಾಗಹನೇ ಚರತೋ ಮಣಿರಞ್ಜಿತಪುಣ್ಯಸುಮೂರ್ತೇಃ

ಮನ್ಮಥಭೀಕರಘೋರಮಹೋಗ್ರಮೃಗಪ್ರವರಾರ್ದಿತಗಾತ್ರಸುಸನ್ಧೇಃ ।

ಮತ್ಸರತಾಪವಿಶೇಷನಿಪೀಡಿತಬಾಹ್ಯಮತೇಶ್ಚ ಕಥಂ ಚಿದಮೇಯಂ

ತ್ವಾಂ ಭಜತೋ ಮಮ ದೇಹಿ ದಯಾಘನ ಹೇ ಹನುಮನ್ ಸ್ವಪದಾಮ್ಬುಜದಾಸ್ಯಮ್ ॥ 5 ॥

ಸಂಸೃತಿವೃಕ್ಷಮನೇಕಶತಾಘನಿದಾನಮನನ್ತವಿಕರ್ಮಸುಶಾಖಂ

ದುಃಖಫಲಂ ಕರಣಾದಿಪಲಾಶಮನಙ್ಗಸುಪುಷ್ಪಮಚಿನ್ತ್ಯಸುಮೂಲಮ್ ।

ತಂ ಹ್ಯಧಿರುಹ್ಯ ಹರೇ ಪತಿತಂ ಶರಣಾಗತಮೇವ ವಿಮೋಚಯ ಮೂಢಂ

ತ್ವಾಂ ಭಜತೋ ಮಮ ದೇಹಿ ದಯಾಘನ ಹೇ ಹನುಮನ್ ಸ್ವಪದಾಮ್ಬುಜದಾಸ್ಯಮ್ ॥ 6 ॥

ಸಂಸೃತಿಪನ್ನಗವಕ್ತ್ರಭಯಙ್ಕರದಂಷ್ಟ್ರಮಹಾವಿಷದಗ್ಧಶರೀರಂ

ಪ್ರಾಣವಿನಿರ್ಗಮಭೀತಿಸಮಾಕುಲಮನ್ದಮನಾಥಮತೀವ ವಿಷಣ್ಣಮ್ ।

ಮೋಹಮಹಾಕುಹರೇ ಪತಿತಂ ದಯಯೋದ್ಧರ ಮಾಮಜಿತೇನ್ದ್ರಿಯಕಾಮಂ

ತ್ವಾಂ ಭಜತೋ ಮಮ ದೇಹಿ ದಯಾಘನ ಹೇ ಹನುಮನ್ ಸ್ವಪದಾಮ್ಬುಜದಾಸ್ಯಮ್ ॥ 7 ॥

ಇನ್ದ್ರಿಯನಾಮಕಚೋರಗಣೈರ್ಹೃತತತ್ತ್ವವಿವೇಕಮಹಾಧನರಾಶಿಂ

ಸಂಸೃತಿಜಾಲನಿಪಾತಿತಮೇವ ಮಹಾಬಲಿಭಿಶ್ಚ ವಿಖಣ್ಡಿತಕಾಯಮ್ ।

ತ್ವತ್ಪದಪದ್ಮಮನುತ್ತಮಮಾಶ್ರಿತಮಾಶು ಕಪೀಶ್ವರ ಪಾಹಿ ಕೃಪಾಲೋ

ತ್ವಾಂ ಭಜತೋ ಮಮ ದೇಹಿ ದಯಾಘನ ಹೇ ಹನುಮನ್ ಸ್ವಪದಾಮ್ಬುಜದಾಸ್ಯಮ್ ॥ 8 ॥

ಬ್ರಹ್ಮಮರುದ್ಗಣರುದ್ರಮಹೇನ್ದ್ರಕಿರೀಟಸುಕೋಟಿಲಸತ್ಪದಪೀಠಂ

ದಾಶರಥಿಂ ಜಪತಿ ಕ್ಷಿತಿಮಣ್ಡಲ ಏಷ ನಿಧಾಯ ಸದೈವ ಹೃದಬ್ಜೇ ।

ತಸ್ಯ ಹನೂಮತ ಏವ ಶಿವಙ್ಕರಮಷ್ಟಕಮೇತದನಿಷ್ಟಹರಂ ವೈ

ಯಃ ಸತತಂ ಹಿ ಪಠೇತ್ಸ ನರೋ ಲಭತೇಽಚ್ಯುತರಾಮಪದಾಬ್ಜನಿವಾಸಮ್ ॥ 9 ॥

ಇತಿ ಶ್ರೀ ಮಧುಸೂದನಾಶ್ರಮ ಶಿಷ್ಯಾಽಚ್ಯುತವಿರಚಿತಂ ಶ್ರೀಮದ್ದನುಮದಷ್ಟಕಮ್ ।

Roman (IAST) Transliteration

śrīraghurājapadābjaniketana paṅkajalocana maṅgalarāśe

caṇḍamahābhujadaṇḍa surārivikhaṇḍanapaṇḍita pāhi dayālo |

pātakinaṃ ca samuddhara māṃ mahatāṃ hi satāmapi mānamudāraṃ

tvāṃ bhajato mama dehi dayāghana he hanuman svapadāmbujadāsyam || 1 ||

saṃsṛtitāpamahānaladagdhatanūruhamarmatanorativelaṃ

putradhanasvajanātmagṛhādiṣu saktamateratikilbiṣamūrteḥ |

kenacidapyamalena purākṛtapuṇyasupuñjalavena vibho vai

tvāṃ bhajato mama dehi dayāghana he hanuman svapadāmbujadāsyam || 2 ||

saṃsṛtikūpamanalpamaghoranidāghanidānamajasramaśeṣaṃ

prāpya suduḥkhasahasrabhujaṅgaviṣaikasamākulasarvatanorme |

ghoramahākṛpaṇāpadameva gatasya hare patitasya bhavābdhau

tvāṃ bhajato mama dehi dayāghana he hanuman svapadāmbujadāsyam || 3 ||

saṃsṛtisindhuviśālakarālamahābalakālajhaṣagrasanārtaṃ

vyagrasamagradhiyaṃ kṛpaṇaṃ ca mahāmadanakrasucakrahṛtāsum |

kālamahārasanorminipīḍitamuddhara dīnamananyagatiṃ māṃ

tvāṃ bhajato mama dehi dayāghana he hanuman svapadāmbujadāsyam || 4 ||

saṃsṛtighoramahāgahane carato maṇirañjitapuṇyasumūrteḥ

manmathabhīkaraghoramahogramṛgapravarārditagātrasusandheḥ |

matsaratāpaviśeṣanipīḍitabāhyamateśca kathaṃ cidameyaṃ

tvāṃ bhajato mama dehi dayāghana he hanuman svapadāmbujadāsyam || 5 ||

saṃsṛtivṛkṣamanekaśatāghanidānamanantavikarmasuśākhaṃ

duḥkhaphalaṃ karaṇādipalāśamanaṅgasupuṣpamacintyasumūlam |

taṃ hyadhiruhya hare patitaṃ śaraṇāgatameva vimocaya mūḍhaṃ

tvāṃ bhajato mama dehi dayāghana he hanuman svapadāmbujadāsyam || 6 ||

saṃsṛtipannagavaktrabhayaṅkaradaṃṣṭramahāviṣadagdhaśarīraṃ

prāṇavinirgamabhītisamākulamandamanāthamatīva viṣaṇṇam |

mohamahākuhare patitaṃ dayayoddhara māmajitendriyakāmaṃ

tvāṃ bhajato mama dehi dayāghana he hanuman svapadāmbujadāsyam || 7 ||

indriyanāmakacoragaṇairhṛtatattvavivekamahādhanarāśiṃ

saṃsṛtijālanipātitameva mahābalibhiśca vikhaṇḍitakāyam |

tvatpadapadmamanuttamamāśritamāśu kapīśvara pāhi kṛpālo

tvāṃ bhajato mama dehi dayāghana he hanuman svapadāmbujadāsyam || 8 ||

brahmamarudgaṇarudramahendrakirīṭasukoṭilasatpadapīṭhaṃ

dāśarathiṃ japati kṣitimaṇḍala eṣa nidhāya sadaiva hṛdabje |

tasya hanūmata eva śivaṅkaramaṣṭakametadaniṣṭaharaṃ vai

yaḥ satataṃ hi paṭhetsa naro labhate'cyutarāmapadābjanivāsam || 9 ||

iti śrī madhusūdanāśrama śiṣyā'cyutaviracitaṃ śrīmaddanumadaṣṭakam |