Gitagovindam Panchamah Sargah - Sakanksha Pundarikakshah

ॐ

ಗೀತಗೋವಿನ್ದಂ ಪಞ್ಚಮಃ ಸರ್ಗಃ - ಸಾಕಾಙ್ಕ್ಷ ಪುಣ್ಡರೀಕಾಕ್ಷಃ

Vishnu Gita Jayadeva Kannada

॥ ಪಞ್ಚಮಃ ಸರ್ಗಃ ॥

॥ ಸಾಕಾಙ್ಕ್ಷಪುಣ್ಡರೀಕಾಕ್ಷಃ ॥

ಅಹಮಿಹ ನಿವಸಾಮಿ ಯಾಹಿ ರಾಧಾಂ ಅನುನಯ ಮದ್ವಚನೇನ ಚಾನಯೇಥಾಃ ।

ಇತಿ ಮಧುರಿಪುಣಾ ಸಖೀ ನಿಯುಕ್ತಾ ಸ್ವಯಮಿದಮೇತ್ಯ ಪುನರ್ಜಗಾದ ರಾಧಾಮ್ ॥ 31 ॥

॥ ಗೀತಂ 10 ॥

ವಹತಿ ಮಲಯಸಮೀರೇ ಮದನಮುಪನಿಧಾಯ ।

ಸ್ಫುಟತಿ ಕುಸುಮನಿಕರೇ ವಿರಹಿಹೃದಯದಲನಾಯ ॥

ತವ ವಿರಹೇ ವನಮಾಲೀ ಸಖಿ ಸೀದತಿ ॥ 1 ॥

ದಹತಿ ಶಿಶಿರಮಯೂಖೇ ಮರಣಮನುಕರೋತಿ ।

ಪತತಿ ಮದನವಿಶಿಖೇ ವಿಲಪತಿ ವಿಕಲತರೋಽತಿ ॥ 2 ॥

ಧ್ವನತಿ ಮಧುಪಸಮೂಹೇ ಶ್ರವಣಮಪಿದಧಾತಿ ।

ಮನಸಿ ಚಲಿತವಿರಹೇ ನಿಶಿ ನಿಶಿ ರುಜಮುಪಯಾತಿ ॥ 3 ॥

ವಸತಿ ವಿಪಿನವಿತಾನೇ ತ್ಯಜತಿ ಲಲಿತಧಾಮ ।

ಲುಠತಿ ಧರಣಿಶಯನೇ ಬಹು ವಿಲಪತಿ ತವ ನಾಮ ॥ 4 ॥

ರಣತಿ ಪಿಕಸಮವಾಯೇ ಪ್ರತಿದಿಶಮನುಯಾತಿ ।

ಹಸತಿ ಮನುಜನಿಚಯೇ ವಿರಹಮಪಲಪತಿ ನೇತಿ ॥ 5 ॥

ಸ್ಫುರತಿ ಕಲರವರಾವೇ ಸ್ಮರತಿ ಮಣಿತಮೇವ।

ತವರತಿಸುಖವಿಭವೇ ಗಣಯತಿ ಸುಗುಣಮತೀವ ॥ 6 ॥

ತ್ವದಭಿಧಶುಭದಮಾಸಂ ವದತಿ ನರಿ ಶೃಣೋತಿ ।

ತಮಪಿ ಜಪತಿ ಸರಸಂ ಯುವತಿಷು ನ ರತಿಮುಪೈತಿ ॥ 7 ॥

ಭಣತಿ ಕವಿಜಯದೇವೇ ವಿರಹವಿಲಸಿತೇನ ।

ಮನಸಿ ರಭಸವಿಭವೇ ಹರಿರುದಯತು ಸುಕೃತೇನ ॥ 8 ॥

ಪೂರ್ವಂ ಯತ್ರ ಸಮಂ ತ್ವಯಾ ರತಿಪತೇರಾಸಾದಿತಃ ಸಿದ್ಧಯ-ಸ್ತಸ್ಮಿನ್ನೇವ ನಿಕುಞ್ಜಮನ್ಮಥಮಹಾತೀರ್ಥೇ ಪುನರ್ಮಾಧವಃ ।

ಧ್ಯಾಯಂಸ್ತ್ವಾಮನಿಶಂ ಜಪನ್ನಪಿ ತವೈವಾಲಾಪಮನ್ತ್ರಾವಲೀಂ ಭೂಯಸ್ತ್ವತ್ಕುಚಕುಮ್ಭನಿರ್ಭರಪರೀರಮ್ಭಾಮೃತಂ ವಾಞ್ಛತಿ ॥ 32 ॥

॥ ಗೀತಂ 11 ॥

ರತಿಸುಖಸಾರೇ ಗತಮಭಿಸಾರೇ ಮದನಮನೋಹರವೇಶಮ್ ।

ನ ಕುರು ನಿತಮ್ಬಿನಿ ಗಮನವಿಲಮ್ಬನಮನುಸರ ತಂ ಹೃದಯೇಶಮ್ ॥

ಧೀರಸಮೀರೇ ಯಮುನಾತೀರೇ ವಸತಿ ವನೇ ವನಮಾಲೀ ॥ 1 ॥

ನಾಮ ಸಮೇತಂ ಕೃತಸಙ್ಕೇತಂ ವಾದಯತೇ ಮೃದುವೇಣುಮ್ ।

ಬಹು ಮನುತೇ ನನು ತೇ ತನುಸಙ್ಗತಪವನಚಲಿತಮಪಿ ರೇಣುಮ್ ॥ 2 ॥

ಪತತಿ ಪತತ್ರೇ ವಿಚಲತಿ ಪತ್ರೇ ಶಙ್ಕಿತಭವದುಪಯಾನಮ್ ।

ರಚಯತಿ ಶಯನಂ ಸಚಕಿತನಯನಂ ಪಶ್ಯತಿ ತವ ಪನ್ಥಾನಮ್ ॥ 3 ॥

ಮುಖರಮಧೀರಂ ತ್ಯಜ ಮಞ್ಜೀರಂ ರಿಪುಮಿವ ಕೇಲಿಷುಲೋಲಮ್ ।

ಚಲ ಸಖಿ ಕುಞ್ಜಂ ಸತಿಮಿರಪುಞ್ಜಂ ಶೀಲಯ ನೀಲನಿಚೋಲಮ್ ॥ 4 ॥

ಉರಸಿ ಮುರಾರೇರುಪಹಿತಹಾರೇ ಘನ ಇವ ತರಲಬಲಾಕೇ ।

ತಟಿದಿವ ಪೀತೇ ರತಿವಿಪರೀತೇ ರಾಜಸಿ ಸುಕೃತವಿಪಾಕೇ ॥ 5 ॥

ವಿಗಲಿತವಸನಂ ಪರಿಹೃತರಸನಂ ಘಟಯ ಜಘನಮಪಿಧಾನಮ್ ।

ಕಿಸಲಯಶಯನೇ ಪಙ್ಕಜನಯನೇ ನಿಧಿಮಿವ ಹರ್ಷನಿದಾನಮ್ ॥ 6 ॥

ಹರಿರಭಿಮಾನೀ ರಜನಿರಿದಾನೀಮಿಯಮಪಿ ಯಾತಿ ವಿರಾಮಮ್ ।

ಕುರು ಮಮ ವಚನಂ ಸತ್ವರರಚನಂ ಪೂರಯ ಮಧುರಿಪುಕಾಮಮ್ ॥ 7 ॥

ಶ್ರೀಜಯದೇವೇ ಕೃತಹರಿಸೇವೇ ಭಣತಿ ಪರಮರಮಣೀಯಮ್ ।

ಪ್ರಮುದಿತಹೃದಯಂ ಹರಿಮತಿಸದಯಂ ನಮತ ಸುಕೃತಕಮನೀಯಮ್ ॥ 8 ॥

ವಿಕಿರತಿ ಮುಹುಃ ಶ್ವಾಸಾನ್ದಿಶಃ ಪುರೋ ಮುಹುರೀಕ್ಷತೇ ಪ್ರವಿಶತಿ ಮುಹುಃ ಕುಞ್ಜಂ ಗುಞ್ಜನ್ಮುಹುರ್ಬಹು ತಾಮ್ಯತಿ ।

ರಚಯತಿ ಮುಹುಃ ಶಯ್ಯಾಂ ಪರ್ಯಾಕುಲಂ ಮುಹುರೀಕ್ಷತೇ ಮದನಕದನಕ್ಲಾನ್ತಃ ಕಾನ್ತೇ ಪ್ರಿಯಸ್ತವ ವರ್ತತೇ ॥ 33 ॥

ತ್ವದ್ವಾಮ್ಯೇನ ಸಮಂ ಸಮಗ್ರಮಧುನಾ ತಿಗ್ಮಾಂಶುರಸ್ತಂ ಗತೋ ಗೋವಿನ್ದಸ್ಯ ಮನೋರಥೇನ ಚ ಸಮಂ ಪ್ರಾಪ್ತಂ ತಮಃ ಸಾನ್ದ್ರತಾಮ್ ।

ಕೋಕಾನಾಂ ಕರುಣಸ್ವನೇನ ಸದೃಶೀ ದೀರ್ಘಾ ಮದಭ್ಯರ್ಥನಾ ತನ್ಮುಗ್ಧೇ ವಿಫಲಂ ವಿಲಮ್ಬನಮಸೌ ರಮ್ಯೋಽಭಿಸಾರಕ್ಷಣಃ ॥ 34 ॥

ಆಶ್ಲೇಷಾದನು ಚುಮ್ಬನಾದನು ನಖೋಲ್ಲೇಖಾದನು ಸ್ವಾನ್ತಜ-ಪ್ರೋದ್ಬೋಧಾದನು ಸಮ್ಭ್ರಮಾದನು ರತಾರಮ್ಭಾದನು ಪ್ರೀತಯೋಃ ।

ಅನ್ಯಾರ್ಥಂ ಗತಯೋರ್ಭ್ರಮಾನ್ಮಿಲಿತಯೋಃ ಸಮ್ಭಾಷಣೈರ್ಜಾನತೋ-ರ್ದಮ್ಪತ್ಯೋರಿಹ ಕೋ ನ ಕೋ ನ ತಮಸಿ ವ್ರೀಡಾವಿಮಿಶ್ರೋ ರಸಃ ॥ 35 ॥

ಸಭಯಚಕಿತಂ ವಿನ್ಯಸ್ಯನ್ತೀಂ ದೃಶೌ ತಿಮಿರೇ ಪಥಿ ಪ್ರತಿತರು ಮುಹುಃ ಸ್ಥಿತ್ವಾ ಮನ್ದಂ ಪದಾನಿ ವಿತನ್ವತೀಮ್ ।

ಕಥಮಪಿ ರಹಃ ಪ್ರಾಪ್ತಾಮಙ್ಗೈರನಙ್ಗತರಙ್ಗಿಭಿಃ ಸುಮುಖಿ ಸುಭಗಃ ಪಶ್ಯನ್ಸ ತ್ವಾಮುಪೈತು ಕೃತಾರ್ಥತಾಮ್ ॥ 36 ॥

ರಾಧಾಮುಗ್ಧಮುಖಾರವಿನ್ದಮಧುಪಸ್ತ್ರೈಲೋಕ್ಯಮೌಲಿಸ್ಥಲೀ ನೇಪಥ್ಯೋಚಿತನೀಲರತ್ನಮವನೀಭಾರಾವತಾರಾನ್ತಕಃ।

ಸ್ವಚ್ಛನ್ದಂ ವ್ರಜಸುಬ್ದರೀಜನಮನಸ್ತೋಷಪ್ರದೋಷೋದಯಃ ಕಂಸಧ್ವಂಸನಧೂಮಕೇತುರವತು ತ್ವಾಂ ದೇವಕೀನನ್ದನಃ॥ 36 + 1 ॥

॥ ಇತಿ ಶ್ರೀಗೀತಗೋವಿನ್ದೇಽಭಿಸಾರಿಕವರ್ಣನೇ ಸಾಕಾಙ್ಕ್ಷಪುಣ್ಡರೀಕಾಕ್ಷೋ ನಾಮ ಪಞ್ಚಮಃ ಸರ್ಗಃ ॥

Roman (IAST) Transliteration

|| pañcamaḥ sargaḥ ||

|| sākāṅkṣapuṇḍarīkākṣaḥ ||

ahamiha nivasāmi yāhi rādhāṃ anunaya madvacanena cānayethāḥ |

iti madhuripuṇā sakhī niyuktā svayamidametya punarjagāda rādhām || 31 ||

|| gītaṃ 10 ||

vahati malayasamīre madanamupanidhāya |

sphuṭati kusumanikare virahihṛdayadalanāya ||

tava virahe vanamālī sakhi sīdati || 1 ||

dahati śiśiramayūkhe maraṇamanukaroti |

patati madanaviśikhe vilapati vikalataro'ti || 2 ||

dhvanati madhupasamūhe śravaṇamapidadhāti |

manasi calitavirahe niśi niśi rujamupayāti || 3 ||

vasati vipinavitāne tyajati lalitadhāma |

luṭhati dharaṇiśayane bahu vilapati tava nāma || 4 ||

raṇati pikasamavāye pratidiśamanuyāti |

hasati manujanicaye virahamapalapati neti || 5 ||

sphurati kalaravarāve smarati maṇitameva|

tavaratisukhavibhave gaṇayati suguṇamatīva || 6 ||

tvadabhidhaśubhadamāsaṃ vadati nari śṛṇoti |

tamapi japati sarasaṃ yuvatiṣu na ratimupaiti || 7 ||

bhaṇati kavijayadeve virahavilasitena |

manasi rabhasavibhave harirudayatu sukṛtena || 8 ||

pūrvaṃ yatra samaṃ tvayā ratipaterāsāditaḥ siddhaya-stasminneva nikuñjamanmathamahātīrthe punarmādhavaḥ |

dhyāyaṃstvāmaniśaṃ japannapi tavaivālāpamantrāvalīṃ bhūyastvatkucakumbhanirbharaparīrambhāmṛtaṃ vāñchati || 32 ||

|| gītaṃ 11 ||

ratisukhasāre gatamabhisāre madanamanoharaveśam |

na kuru nitambini gamanavilambanamanusara taṃ hṛdayeśam ||

dhīrasamīre yamunātīre vasati vane vanamālī || 1 ||

nāma sametaṃ kṛtasaṅketaṃ vādayate mṛduveṇum |

bahu manute nanu te tanusaṅgatapavanacalitamapi reṇum || 2 ||

patati patatre vicalati patre śaṅkitabhavadupayānam |

racayati śayanaṃ sacakitanayanaṃ paśyati tava panthānam || 3 ||

mukharamadhīraṃ tyaja mañjīraṃ ripumiva keliṣulolam |

cala sakhi kuñjaṃ satimirapuñjaṃ śīlaya nīlanicolam || 4 ||

urasi murārerupahitahāre ghana iva taralabalāke |

taṭidiva pīte rativiparīte rājasi sukṛtavipāke || 5 ||

vigalitavasanaṃ parihṛtarasanaṃ ghaṭaya jaghanamapidhānam |

kisalayaśayane paṅkajanayane nidhimiva harṣanidānam || 6 ||

harirabhimānī rajaniridānīmiyamapi yāti virāmam |

kuru mama vacanaṃ satvararacanaṃ pūraya madhuripukāmam || 7 ||

śrījayadeve kṛtahariseve bhaṇati paramaramaṇīyam |

pramuditahṛdayaṃ harimatisadayaṃ namata sukṛtakamanīyam || 8 ||

vikirati muhuḥ śvāsāndiśaḥ puro muhurīkṣate praviśati muhuḥ kuñjaṃ guñjanmuhurbahu tāmyati |

racayati muhuḥ śayyāṃ paryākulaṃ muhurīkṣate madanakadanaklāntaḥ kānte priyastava vartate || 33 ||

tvadvāmyena samaṃ samagramadhunā tigmāṃśurastaṃ gato govindasya manorathena ca samaṃ prāptaṃ tamaḥ sāndratām |

kokānāṃ karuṇasvanena sadṛśī dīrghā madabhyarthanā tanmugdhe viphalaṃ vilambanamasau ramyo'bhisārakṣaṇaḥ || 34 ||

āśleṣādanu cumbanādanu nakhollekhādanu svāntaja-prodbodhādanu sambhramādanu ratārambhādanu prītayoḥ |

anyārthaṃ gatayorbhramānmilitayoḥ sambhāṣaṇairjānato-rdampatyoriha ko na ko na tamasi vrīḍāvimiśro rasaḥ || 35 ||

sabhayacakitaṃ vinyasyantīṃ dṛśau timire pathi pratitaru muhuḥ sthitvā mandaṃ padāni vitanvatīm |

kathamapi rahaḥ prāptāmaṅgairanaṅgataraṅgibhiḥ sumukhi subhagaḥ paśyansa tvāmupaitu kṛtārthatām || 36 ||

rādhāmugdhamukhāravindamadhupastrailokyamaulisthalī nepathyocitanīlaratnamavanībhārāvatārāntakaḥ|

svacchandaṃ vrajasubdarījanamanastoṣapradoṣodayaḥ kaṃsadhvaṃsanadhūmaketuravatu tvāṃ devakīnandanaḥ|| 36 + 1 ||

|| iti śrīgītagovinde'bhisārikavarṇane sākāṅkṣapuṇḍarīkākṣo nāma pañcamaḥ sargaḥ ||