Ashtavakra Gita Navamo'dhyayah

ॐ

ಅಷ್ಟಾವಕ್ರ ಗೀತಾ ನವಮೋಽಧ್ಯಾಯಃ

Gita Kannada

ಅಷ್ಟಾವಕ್ರ ಉವಾಚ ॥

ಕೃತಾಕೃತೇ ಚ ದ್ವನ್ದ್ವಾನಿ ಕದಾ ಶಾನ್ತಾನಿ ಕಸ್ಯ ವಾ ।

ಏವಂ ಜ್ಞಾತ್ವೇಹ ನಿರ್ವೇದಾದ್ ಭವ ತ್ಯಾಗಪರೋಽವ್ರತೀ ॥ 9-1॥

ಕಸ್ಯಾಪಿ ತಾತ ಧನ್ಯಸ್ಯ ಲೋಕಚೇಷ್ಟಾವಲೋಕನಾತ್ ।

ಜೀವಿತೇಚ್ಛಾ ಬುಭುಕ್ಷಾ ಚ ಬುಭುತ್ಸೋಪಶಮಂ ಗತಾಃ ॥ 9-2॥

ಅನಿತ್ಯಂ ಸರ್ವಮೇವೇದಂ ತಾಪತ್ರಿತಯದೂಷಿತಮ್ ।

ಅಸಾರಂ ನಿನ್ದಿತಂ ಹೇಯಮಿತಿ ನಿಶ್ಚಿತ್ಯ ಶಾಮ್ಯತಿ ॥ 9-3॥

ಕೋಽಸೌ ಕಾಲೋ ವಯಃ ಕಿಂ ವಾ ಯತ್ರ ದ್ವನ್ದ್ವಾನಿ ನೋ ನೃಣಾಮ್ ।

ತಾನ್ಯುಪೇಕ್ಷ್ಯ ಯಥಾಪ್ರಾಪ್ತವರ್ತೀ ಸಿದ್ಧಿಮವಾಪ್ನುಯಾತ್ ॥ 9-4॥

ನಾನಾ ಮತಂ ಮಹರ್ಷೀಣಾಂ ಸಾಧೂನಾಂ ಯೋಗಿನಾಂ ತಥಾ ।

ದೃಷ್ಟ್ವಾ ನಿರ್ವೇದಮಾಪನ್ನಃ ಕೋ ನ ಶಾಮ್ಯತಿ ಮಾನವಃ ॥ 9-5॥

ಕೃತ್ವಾ ಮೂರ್ತಿಪರಿಜ್ಞಾನಂ ಚೈತನ್ಯಸ್ಯ ನ ಕಿಂ ಗುರುಃ ।

ನಿರ್ವೇದಸಮತಾಯುಕ್ತ್ಯಾ ಯಸ್ತಾರಯತಿ ಸಂಸೃತೇಃ ॥ 9-6॥

ಪಶ್ಯ ಭೂತವಿಕಾರಾಂಸ್ತ್ವಂ ಭೂತಮಾತ್ರಾನ್ ಯಥಾರ್ಥತಃ ।

ತತ್ಕ್ಷಣಾದ್ ಬನ್ಧನಿರ್ಮುಕ್ತಃ ಸ್ವರೂಪಸ್ಥೋ ಭವಿಷ್ಯಸಿ ॥ 9-7॥

ವಾಸನಾ ಏವ ಸಂಸಾರ ಇತಿ ಸರ್ವಾ ವಿಮುಞ್ಚ ತಾಃ ।

ತತ್ತ್ಯಾಗೋ ವಾಸನಾತ್ಯಾಗಾತ್ಸ್ಥಿತಿರದ್ಯ ಯಥಾ ತಥಾ ॥ 9-8॥

Roman (IAST) Transliteration

aṣṭāvakra uvāca ||

kṛtākṛte ca dvandvāni kadā śāntāni kasya vā |

evaṃ jñātveha nirvedād bhava tyāgaparo'vratī || 9-1||

kasyāpi tāta dhanyasya lokaceṣṭāvalokanāt |

jīvitecchā bubhukṣā ca bubhutsopaśamaṃ gatāḥ || 9-2||

anityaṃ sarvamevedaṃ tāpatritayadūṣitam |

asāraṃ ninditaṃ heyamiti niścitya śāmyati || 9-3||

ko'sau kālo vayaḥ kiṃ vā yatra dvandvāni no nṛṇām |

tānyupekṣya yathāprāptavartī siddhimavāpnuyāt || 9-4||

nānā mataṃ maharṣīṇāṃ sādhūnāṃ yogināṃ tathā |

dṛṣṭvā nirvedamāpannaḥ ko na śāmyati mānavaḥ || 9-5||

kṛtvā mūrtiparijñānaṃ caitanyasya na kiṃ guruḥ |

nirvedasamatāyuktyā yastārayati saṃsṛteḥ || 9-6||

paśya bhūtavikārāṃstvaṃ bhūtamātrān yathārthataḥ |

tatkṣaṇād bandhanirmuktaḥ svarūpastho bhaviṣyasi || 9-7||

vāsanā eva saṃsāra iti sarvā vimuñca tāḥ |

tattyāgo vāsanātyāgātsthitiradya yathā tathā || 9-8||